ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ದ್ವಿತೀಯಃ ಪ್ರಶ್ನಃ – ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪ್ರ॒ಜಾಪತಿಃ॑ ಪ್ರ॒ಜಾ ಅ॑ಸೃಜತ॒ ತಾ-ಸ್ಸೃ॒ಷ್ಟಾ॒ ಇನ್ದ್ರಾ॒ಗ್ನೀ ಅಪಾ॑ಗೂಹತಾ॒ಗ್ಂ॒ ಸೋ॑-ಽಚಾಯ-ತ್ಪ್ರ॒ಜಾಪ॑ತಿರಿನ್ದ್ರಾ॒ಗ್ನೀ ವೈ ಮೇ᳚ ಪ್ರ॒ಜಾ ಅಪಾ॑ಘುಖ್ಷತಾ॒ಮಿತಿ॒ ಸ ಏ॒ತಮೈ᳚ನ್ದ್ರಾ॒ಗ್ನ- ಮೇಕಾ॑ದಶಕಪಾಲ-ಮಪಶ್ಯ॒-ತ್ತ-ನ್ನಿರ॑ವಪ॒-ತ್ತಾವ॑ಸ್ಮೈ ಪ್ರ॒ಜಾಃ ಪ್ರಾಸಾ॑ಧಯತಾ- ಮಿನ್ದ್ರಾ॒ಗ್ನೀ ವಾ ಏ॒ತಸ್ಯ॑ ಪ್ರ॒ಜಾಮಪ॑ ಗೂಹತೋ॒ ಯೋ-ಽಲಂ॑ ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತ॑ ಐನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇತ್-ಪ್ರ॒ಜಾಕಾ॑ಮ ಇನ್ದ್ರಾ॒ಗ್ನೀ [ ] 1
ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರ ಸಾ॑ಧಯತೋ ವಿ॒ನ್ದತೇ᳚ ಪ್ರ॒ಜಾ-ಮೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ಥ್ಸ್ಪರ್ಧ॑ಮಾನಃ॒, ಖ್ಷೇತ್ರೇ॑ ವಾ ಸಜಾ॒ತೇಷು॑ ವೇನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾಭ್ಯಾ॑ಮೇ॒ವೇನ್ದ್ರಿ॒ಯಂ ವೀಁ॒ರ್ಯ॑-ಮ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ವಿ ಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಜಯ॒ತೇ-ಽಪ॒ ವಾ ಏ॒ತಸ್ಮಾ॑ದಿನ್ದ್ರಿ॒ಯಂ-ವೀಁ॒ರ್ಯ॑-ಙ್ಕ್ರಾಮತಿ॒ ಯ-ಸ್ಸ॑ಗ್ರಾ॒ಮ್ಮ-ಮು॑ಪಪ್ರ॒ಯಾತ್ಯೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿ- [-ಮೇಕಾ॑ದಶಕಪಾಲ॒-ನ್ನಿಃ, ವ॒ಪೇ॒-ಥ್ಸ॒ಙ್ಗ್ರಾ॒ಮ-] 2
-ರ್ವ॑ಪೇ-ಥ್ಸಙ್ಗ್ರಾ॒ಮ-ಮು॑ಪಪ್ರಯಾ॒ಸ್ಯ-ನ್ನಿ॑ನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ನ್ಧತ್ತ-ಸ್ಸ॒ಹೇನ್ದ್ರಿ॒ಯೇಣ॑ ವೀ॒ರ್ಯೇ॑ಣೋಪ॒ ಪ್ರ ಯಾ॑ತಿ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮಂ-ವಿಁ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ॒ ಯ-ಸ್ಸ॑ಗ್ರಾ॒ಮ್ಮ-ಞ್ಜಯ॑ತ್ಯೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮ-ಞ್ಜಿ॒ತ್ವೇನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿದ್ರಿ॒ಯಂ-ವೀಁ॒ರ್ಯ॑ನ್- [ವೀ॒ರ್ಯ᳚ಮ್, ಧ॒ತ್ತೋ॒ ನೇನ್ದ್ರಿ॒ಯೇಣ॑] 3
-ಧತ್ತೋ॒ ನೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ॒ ವ್ಯೃ॑ದ್ಧ್ಯ॒ತೇ-ಽಪ॒ ವಾ ಏ॒ತಸ್ಮಾ॑ದಿನ್ದ್ರಿ॒ಯಂ-ವೀಁ॒ರ್ಯ॑-ಙ್ಕ್ರಾಮತಿ॒ ಯ ಏತಿ॑ ಜ॒ನತಾ॑ಮೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಜ್ಜ॒ನತಾ॑ಮೇ॒ಷ್ಯ-ನ್ನಿ॑ನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ನ್ಧತ್ತ-ಸ್ಸ॒ಹೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ ಜ॒ನತಾ॑ಮೇತಿ ಪೌ॒ಷ್ಣ-ಞ್ಚ॒ರುಮನು॒ ನಿರ್ವ॑ಪೇ-ತ್ಪೂ॒ಷಾ ವಾ ಇ॑ನ್ದ್ರಿ॒ಯಸ್ಯ॑ ವೀ॒ರ್ಯ॑ಸ್ಯಾ-ಽನುಪ್ರದಾ॒ತಾ ಪೂ॒ಷಣ॑ಮೇ॒ವ [ ] 4
ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॑ ಇನ್ದ್ರಿ॒ಯಂ-ವೀಁ॒ರ್ಯ॑ಮನು॒ ಪ್ರಯ॑ಚ್ಛತಿ ಖ್ಷೈತ್ರಪ॒ತ್ಯ-ಞ್ಚ॒ರು-ನ್ನಿರ್ವ॑ಪೇ-ಜ್ಜ॒ನತಾ॑-ಮಾ॒ಗತ್ಯೇ॒ಯಂ-ವೈಁ ಖ್ಷೇತ್ರ॑ಸ್ಯ॒ ಪತಿ॑ರ॒ಸ್ಯಾಮೇ॒ವ ಪ್ರತಿ॑ ತಿಷ್ಠತ್ಯೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ-ಮು॒ಪರಿ॑ಷ್ಟಾ॒-ನ್ನಿರ್ವ॑ಪೇದ॒ಸ್ಯಾಮೇ॒ವ ಪ್ರ॑ತಿ॒ಷ್ಠಾಯೇ᳚ನ್ದ್ರಿ॒ಯಂ-ವೀಁ॒ರ್ಯ॑-ಮು॒ಪರಿ॑ಷ್ಟಾ-ದಾ॒ತ್ಮ-ನ್ಧ॑ತ್ತೇ ॥ 5 ॥
(ಪ್ರ॒ಜಾಕಾ॑ಮ ಇನ್ದ್ರಾ॒ಗ್ನೀ – ಉ॑ಪಪ್ರ॒ಯಾತ್ಯೈ᳚ನ್ದ್ರಾ॒ಗ್ನಮೇಕಾ॑ದಶಕಪಾಲ॒-ನ್ನಿ- ರ್ವೀ॒ರ್ಯಂ॑ – ಪೂ॒ಷಣ॑ಮೇ॒ ವೈ – ಕಾ॒ನ್ನಚ॑ತ್ವಾರಿ॒ಗ್ಂ॒ಶಚ್ಚ॑ ) (ಅ. 1)
ಅ॒ಗ್ನಯೇ॑ ಪಥಿ॒ಕೃತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑-ಽತಿಪಾ॒ದಯೇ᳚-ತ್ಪ॒ಥೋ ವಾ ಏ॒ಷೋದ್ಧ್ಯಪ॑ಥೇನೈತಿ॒ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑ತಿಪಾ॒ದಯ॑ತ್ಯ॒ಗ್ನಿಮೇ॒ವ ಪ॑ಥಿ॒ಕೃತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಮಪ॑ಥಾ॒-ತ್ಪನ್ಥಾ॒ಮಪಿ॑ ನಯತ್ಯನ॒ಡ್ವಾ-ನ್ದಖ್ಷಿ॑ಣಾ ವ॒ಹೀ ಹ್ಯೇ॑ಷ ಸಮೃ॑ದ್ಧ್ಯಾ ಅ॒ಗ್ನಯೇ᳚ ವ್ರ॒ತಪ॑ತಯೇ [ವ್ರ॒ತಪ॑ತಯೇ, ಪು॒ರೋ॒ಡಾಶ॑-] 6
ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯ ಆಹಿ॑ತಾಗ್ನಿ॒-ಸ್ಸನ್ನ॑ವ್ರ॒ತ್ಯಮಿ॑ವ॒ ಚರೇ॑ದ॒ಗ್ನಿಮೇ॒ವ ವ್ರ॒ತಪ॑ತಿ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॑-ವ್ರಁ॒ತಮಾ ಲ॑ಭಂಯಁತಿ॒ ವ್ರತ್ಯೋ॑ ಭವತ್ಯ॒ಗ್ನಯೇ॑ ರಖ್ಷೋ॒ಘ್ನೇ ಪು॑ರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಗ್ಂ ರಖ್ಷಾಗ್ಂ॑ಸಿ॒ ಸಚೇ॑ರನ್ನ॒ಗ್ನಿಮೇ॒ವ ರ॑ಖ್ಷೋ॒ಹಣ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒-ದ್ರಖ್ಷಾ॒ಗ್॒ಸ್ಯಪ॑ ಹನ್ತಿ॒ ನಿಶಿ॑ತಾಯಾ॒-ನ್ನಿರ್ವ॑ಪೇ॒- [ನಿರ್ವ॑ಪೇತ್, ನಿಶಿ॑ತಾಯಾ॒ಗ್ಂ॒ ಹಿ] 7
-ನ್ನಿಶಿ॑ತಾಯಾ॒ಗ್ಂ॒ ಹಿ ರಖ್ಷಾಗ್ಂ॑ಸಿ ಪ್ರೇ॒ರತೇ॑ ಸ॒ಪ್ರೇಂರ್ಣಾ᳚ನ್ಯೇ॒ವೈನಾ॑ನಿ ಹನ್ತಿ॒ ಪರಿ॑ಶ್ರಿತೇ ಯಾಜಯೇ॒-ದ್ರಖ್ಷ॑ಸಾ॒-ಮನ॑ನ್ವವಚಾರಾಯ ರಖ್ಷೋ॒ಘ್ನೀ ಯಾ᳚ಜ್ಯಾನುವಾ॒ಕ್ಯೇ॑ ಭವತೋ॒ ರಖ್ಷ॑ಸಾ॒ಗ್॒ ಸ್ತೃತ್ಯಾ॑ ಅ॒ಗ್ನಯೇ॑ ರು॒ದ್ರವ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದಭಿ॒ಚರ॑-ನ್ನೇ॒ಷಾ ವಾ ಅ॑ಸ್ಯ ಘೋ॒ರಾ ತ॒ನೂರ್ಯ-ದ್ರು॒ದ್ರಸ್ತಸ್ಮಾ॑ ಏ॒ವೈನ॒ಮಾವೃ॑ಶ್ಚತಿ ತಾ॒ಜಗಾರ್ತಿ॒-ಮಾರ್ಚ್ಛ॑ತ್ಯ॒ಗ್ನಯೇ॑ ಸುರಭಿ॒ಮತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಸ್ಯ॒ ಗಾವೋ॑ ವಾ॒ ಪುರು॑ಷಾ [ವಾ॒ ಪುರು॑ಷಾಃ, ವಾ॒ ಪ್ರ॒ಮೀಯೇ॑ರ॒ನ್॒] 8
ವಾ ಪ್ರ॒ಮೀಯೇ॑ರ॒ನ್॒ ಯೋ ವಾ॑ ಬಿಭೀ॒ಯಾದೇ॒ಷಾ ವಾ ಅ॑ಸ್ಯ ಭೇಷ॒ಜ್ಯಾ॑ ತ॒ನೂರ್ಯ-ಥ್ಸು॑ರಭಿ॒ಮತೀ॒-ತಯೈ॒ವಾ-ಽಸ್ಮೈ॑ ಭೇಷ॒ಜ-ಙ್ಕ॑ರೋತಿ ಸುರಭಿ॒ಮತೇ॑ ಭವತಿ ಪೂತೀಗ॒ನ್ಧಸ್ಯಾ-ಽಪ॑ಹತ್ಯಾ ಅ॒ಗ್ನಯೇ॒ ಖ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮೇ ಸಂಯಁ॑ತ್ತೇ ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯಿ॒ತ್ವಾ ಪರಾ॑ನ॒ಭಿ ನಿರ್ದಿ॑ಶತಿ॒ ಯಮವ॑ರೇಷಾಂ॒-ವಿಁದ್ಧ್ಯ॑ನ್ತಿ॒ ಜೀವ॑ತಿ॒ ಸ ಯ-ಮ್ಪರೇ॑ಷಾ॒-ಮ್ಪ್ರ ಸ ಮೀ॑ಯತೇ॒ ಜಯ॑ತಿ॒ ತಗ್ಂ ಸ॑ಙ್ಗ್ರಾ॒ಮ- [ತಗ್ಂ ಸ॑ಙ್ಗ್ರಾ॒ಮಮ್, ಅ॒ಭಿ ವಾ ಏ॒ಷ] 9
-ಮ॒ಭಿ ವಾ ಏ॒ಷ ಏ॒ತಾನು॑ಚ್ಯತಿ॒ ಯೇಷಾ᳚-ಮ್ಪೂರ್ವಾಪ॒ರಾ ಅ॒ನ್ವಞ್ಚಃ॑ ಪ್ರ॒ಮೀಯ॑ನ್ತೇ ಪುರುಷಾಹು॒ತಿರ್-ಹ್ಯ॑ಸ್ಯ ಪ್ರಿ॒ಯತ॑ಮಾ॒-ಽಗ್ನಯೇ॒ ಖ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನೈಷಾ᳚-ಮ್ಪು॒ರಾ-ಽಽಯು॒ಷೋ-ಽಪ॑ರಃ॒ ಪ್ರಮೀ॑ಯತೇ॒-ಽಭಿ ವಾ ಏ॒ಷ ಏ॒ತಸ್ಯ॑ ಗೃ॒ಹಾನು॑ಚ್ಯತಿ॒ ಯಸ್ಯ॑ ಗೃ॒ಹಾ-ನ್ದಹ॑ತ್ಯ॒ಗ್ನಯೇ॒ ಖ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನಾ-ಽಸ್ಯಾಪ॑ರ-ಙ್ಗೃ॒ಹಾ-ನ್ದ॑ಹತಿ ॥ 10 ॥
(ವ್ರ॒ತಪ॑ತಯೇ॒ – ನಿಶಿ॑ತಾಯಾ॒-ನ್ನಿರ್ವ॑ಪೇ॒ತ್ – ಪುರು॑ಷಾಃ – ಸಙ್ಗ್ರಾ॒ಮಂ – ನ – ಚ॒ತ್ವಾರಿ॑ ಚ) (ಅ. 2)
ಅ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯ-ಙ್ಕಾಮೋ॒ ನೋಪ॒ನಮೇ॑-ದ॒ಗ್ನಿಮೇ॒ವ ಕಾಮ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಙ್ಕಾಮೇ॑ನ॒ ಸಮ॑ರ್ಧಯ॒ತ್ಯುಪೈ॑ನ॒-ಙ್ಕಾಮೋ॑ ನಮತ್ಯ॒ಗ್ನಯೇ॒ ಯ ವಿ॑ಷ್ಠಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸ್ಪರ್ಧ॑ಮಾನಃ॒, ಖ್ಷೇತ್ರೇ॑ ವಾ ಸಜಾ॒ತೇಷು॑ ವಾ॒-ಽಗ್ನಿಮೇ॒ವ ಯವಿ॑ಷ್ಠ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತೇನೈ॒ವೇನ್ದ್ರಿ॒ಯಂ-ವೀಁ॒ರ್ಯ॑-ಮ್ಭ್ರಾತೃ॑ವ್ಯಸ್ಯ [ಭ್ರಾತೃ॑ವ್ಯಸ್ಯ, ಯು॒ವ॒ತೇ॒ ವಿಪಾ॒ಪ್ಮನಾ॒] 11
ಯುವತೇ॒ ವಿಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಜಯತೇ॒-ಽಗ್ನಯೇ॒ ಯವಿ॑ಷ್ಠಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದಭಿಚ॒ರ್ಯಮಾ॑ಣೋ॒ ಽಗ್ನಿಮೇ॒ವ ಯವಿ॑ಷ್ಠ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒-ದ್ರಖ್ಷಾಗ್ಂ॑ಸಿ ಯವಯತಿ॒ ನೈನ॑-ಮಭಿ॒ಚರನ್᳚-ಥ್ಸ್ತೃಣುತೇ॒-ಽಗ್ನಯ॒ ಆಯು॑ಷ್ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಸರ್ವ॒-ಮಾಯು॑-ರಿಯಾ॒-ಮಿತ್ಯ॒ಗ್ನಿ- ಮೇ॒ವಾ-ಽಽಯು॑ಷ್ಮನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॒- [ಏ॒ವಾ-ಽಸ್ಮಿನ್ನ್॑, ಆಯು॑ರ್ದಧಾತಿ॒] 12
-ನ್ನಾಯು॑ರ್ದಧಾತಿ॒ ಸರ್ವ॒ಮಾಯು॑-ರೇತ್ಯ॒ಗ್ನಯೇ॑ ಜಾ॒ತವೇ॑ದಸೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಭೂತಿ॑ಕಾಮೋ॒-ಽಗ್ನಿಮೇ॒ವ ಜಾ॒ತವೇ॑ದಸ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮ್ಭೂತಿ॑-ಙ್ಗಮಯತಿ॒ ಭವ॑ತ್ಯೇ॒ವಾಗ್ನಯೇ॒ ರುಕ್ಮ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ರುಕ್ಕಾ॑ಮೋ॒-ಽಗ್ನಿಮೇ॒ವ ರುಕ್ಮ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॒-ನ್ರುಚ॑-ನ್ದಧಾತಿ॒-ರೋಚ॑ತ ಏ॒ವಾಗ್ನಯೇ॒ ತೇಜ॑ಸ್ವತೇ ಪುರೋ॒ಡಾಶ॑- [ಪುರೋ॒ಡಾಶ᳚ಮ್, ಅ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ತ್] 13
-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ತ್ತೇಜ॑ಸ್ಕಾಮೋ॒-ಽಗ್ನಿಮೇ॒ವ ತೇಜ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॒-ನ್ತೇಜೋ॑ ದಧಾತಿ ತೇಜ॒ಸ್ವ್ಯೇ॑ವ ಭ॑ವತ್ಯ॒ಗ್ನಯೇ॑ ಸಾಹ॒ನ್ತ್ಯಾಯ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸೀಖ್ಷ॑ಮಾಣೋ॒ ಽಗ್ನಿಮೇ॒ವ ಸಾ॑ಹ॒ನ್ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತೇನೈ॒ವ ಸ॑ಹತೇ॒ ಯಗ್ಂ ಸೀಖ್ಷ॑ತೇ ॥ 14 ॥
(ಭ್ರಾತೃ॑ವ್ಯಸ್ಯಾ -ಸ್ಮಿ॒ನ್ – ತೇಜ॑ಸ್ವತೇ ಪುರೋ॒ಡಶ॑ – ಮ॒ಷ್ಟಾತ್ರಿಗ್ಂ॑ಶಚ್ಚ) (ಅ. 3)
ಅ॒ಗ್ನಯೇ-ಽನ್ನ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॒ತಾ-ಽನ್ನ॑ವಾನ್-ಥ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವಾ-ನ್ನ॑ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಮನ್ನ॑ವನ್ತ-ಙ್ಕರೋ॒ತ್ಯನ್ನ॑ವಾನೇ॒ವ ಭ॑ವತ್ಯ॒ಗ್ನಯೇ᳚-ಽನ್ನಾ॒ದಾಯ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತಾ-ಽನ್ನಾ॒ದ-ಸ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವಾನ್ನಾ॒ದಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮನ್ನಾ॒ದ-ಙ್ಕ॑ರೋತ್ಯನ್ನಾ॒ದ – [-ಕ॑ರೋತ್ಯನ್ನಾ॒ದಃ, ಏ॒ವ ಭ॑ವತ್ಯ॒ಗ್ನಯೇ-ಽನ್ನ॑ಪತಯೇ] 15
ಏ॒ವ ಭ॑ವತ್ಯ॒ಗ್ನಯೇ-ಽನ್ನ॑ಪತಯೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ-ಕಾ॒ಮಯೇ॒ತಾ-ಽನ್ನ॑ಪತಿ-ಸ್ಸ್ಯಾ॒-ಮಿತ್ಯ॒ಗ್ನಿ-ಮೇ॒ವಾ-ಽನ್ನ॑ಪತಿ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮನ್ನ॑ಪತಿ-ಙ್ಕರೋ॒ತ್ಯನ್ನ॑ಪತಿ-ರೇ॒ವ ಭ॑ವತ್ಯ॒ಗ್ನಯೇ॒ ಪವ॑ಮಾನಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇದ॒ಗ್ನಯೇ॑ ಪಾವ॒ಕಾಯಾ॒ಗ್ನಯೇ॒ ಶುಚ॑ಯೇ॒ ಜ್ಯೋಗಾ॑ಮಯಾವೀ॒ ಯದ॒ಗ್ನಯೇ॒ ಪವ॑ಮಾನಾಯ ನಿ॒ರ್ವಪ॑ತಿ ಪ್ರಾ॒ಣ-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॑ – [ಯದ॒ಗ್ನಯೇ᳚, ಪಾ॒ವ॒ಕಾಯ॒ ವಾಚ॑-] 16
ಪಾವ॒ಕಾಯ॒ ವಾಚ॑-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॒ ಶುಚ॑ಯ॒ ಆಯು॑-ರೇ॒ವಾ-ಽಸ್ಮಿ॒-ನ್ತೇನ॑ ದಧಾತ್ಯು॒ತ ಯದೀ॒ತಾಸು॒-ರ್ಭವ॑ತಿ॒ ಜೀವ॑ತ್ಯೇ॒ವೈತಾ-ಮೇ॒ವ ನಿರ್ವ॑ಪೇ॒-ಚ್ಚಖ್ಷು॑ಷ್ಕಾಮೋ॒ ಯದ॒ಗ್ನಯೇ॒ ಪವ॑ಮಾನಾಯ ನಿ॒ರ್ವಪ॑ತಿ ಪ್ರಾ॒ಣ-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॑ ಪಾವ॒ಕಾಯ॒ ವಾಚ॑-ಮೇ॒ವಾಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॒ ಶುಚ॑ಯೇ॒ ಚಖ್ಷು॑-ರೇ॒ವಾಸ್ಮಿ॒-ನ್ತೇನ॑ ದಧಾ- [ಚಖ್ಷು॑ರೇ॒ವಾಸ್ಮಿ॒-ನ್ತೇನ॑ ದಧಾತಿ, ಉ॒ತ ಯದ್ಯ॒ನ್ಧೋ] 17
-ತ್ಯು॒ತ ಯದ್ಯ॒ನ್ಧೋ ಭವ॑ತಿ॒ ಪ್ರೈವ ಪ॑ಶ್ಯತ್ಯ॒ಗ್ನಯೇ॑ ಪು॒ತ್ರವ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದಿನ್ದ್ರಾ॑ಯ ಪು॒ತ್ರಿಣೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ-ಮ್ಪ್ರ॒ಜಾಕಾ॑ಮೋ॒-ಽಗ್ನಿ-ರೇ॒ವಾ-ಽಸ್ಮೈ᳚ ಪ್ರ॒ಜಾ-ಮ್ಪ್ರ॑ಜ॒ನಯ॑ತಿ ವೃ॒ದ್ಧಾ-ಮಿನ್ದ್ರಃ॒ ಪ್ರ ಯ॑ಚ್ಛತ್ಯ॒ಗ್ನಯೇ॒ ರಸ॑ವತೇ-ಽಜಖ್ಷೀ॒ರೇ ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ರಸ॑ವಾನ್-ಥ್ಸ್ಯಾ॒-ಮಿತ್ಯ॒ಗ್ನಿ-ಮೇ॒ವ ರಸ॑ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಗ್ಂ॒ ರಸ॑ವನ್ತ-ಙ್ಕರೋತಿ॒ [ರಸ॑ವನ್ತ-ಙ್ಕರೋತಿ, ರಸ॑ವಾನೇ॒ವ] 18
ರಸ॑ವಾನೇ॒ವ ಭ॑ವತ್ಯಜಖ್ಷೀ॒ರೇ ಭ॑ವತ್ಯಾಗ್ನೇ॒ಯೀ ವಾ ಏ॒ಷಾ ಯದ॒ಜಾ ಸಾ॒ಖ್ಷಾದೇ॒ವ ರಸ॒ಮವ॑ ರುನ್ಧೇ॒-ಽಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ವಸು॑ಮಾನ್-ಥ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವ ವಸು॑ಮನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॒-ವಁಸು॑ಮನ್ತ-ಙ್ಕರೋತಿ॒ ವಸು॑ಮಾನೇ॒ವ ಭ॑ವತ್ಯ॒ಗ್ನಯೇ॑ ವಾಜ॒ಸೃತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿವ॑ರ್ಪೇ-ಥ್ಸಙ್ಗ್ರಾ॒ಮೇ ಸಂ-ಯಁ॑ತ್ತೇ॒ ವಾಜಂ॒- [ಸಂ-ಯಁ॑ತ್ತೇ॒ ವಾಜ᳚ಮ್, ವಾ ಏ॒ಷ ಸಿ॑ಸೀರ್ಷತಿ॒] 19
-ವಾಁ ಏ॒ಷ ಸಿ॑ಸೀರ್ಷತಿ॒ ಯ-ಸ್ಸ॑ಗ್ರಾ॒ಮ್ಮ-ಞ್ಜಿಗೀ॑ಷತ್ಯ॒ಗ್ನಿಃ ಖಲು॒ ವೈ ದೇ॒ವಾನಾಂ᳚-ವಾಁಜ॒ಸೃ-ದ॒ಗ್ನಿ-ಮೇ॒ವ ವಾ॑ಜ॒ಸೃತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಧಾವ॑ತಿ॒ ವಾಜ॒ಗ್ಂ॒ ಹನ್ತಿ॑ ವೃ॒ತ್ರ-ಞ್ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮ-ಮಥೋ॑ ಅ॒ಗ್ನಿರಿ॑ವ॒ ನ ಪ್ರ॑ತಿ॒ಧೃಷೇ॑ ಭವತ್ಯ॒ಗ್ನಯೇ᳚-ಽಗ್ನಿ॒ವತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಯಸ್ಯಾ॒ಗ್ನಾ- ವ॒ಗ್ನಿ- ಮ॑ಭ್ಯು॒ದ್ಧರೇ॑ಯು॒-ರ್ನಿರ್ದಿ॑ಷ್ಟಭಾಗೋ॒ ವಾ ಏ॒ತಯೋ॑-ರ॒ನ್ಯೋ-ಽನಿ॑ರ್ದಿಷ್ಟಭಾಗೋ॒-ಽನ್ಯಸ್ತೌ ಸ॒ಭಂವಁ॑ನ್ತೌ॒ ಯಜ॑ಮಾನ- [ಯಜ॑ಮಾನಮ್, ಅ॒ಭಿ] 20
-ಮ॒ಭಿ ಸ-ಮ್ಭ॑ವತ॒-ಸ್ಸ ಈ᳚ಶ್ವ॒ರ ಆರ್ತಿ॒-ಮಾರ್ತೋ॒-ರ್ಯ-ದ॒ಗ್ನಯೇ᳚-ಽಗ್ನಿ॒ವತೇ॑ ನಿ॒ರ್ವಪ॑ತಿ ಭಾಗ॒ಧೇಯೇ॑ನೈ॒ವೈನೌ॑ ಶಮಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನೋ॒-ಽಗ್ನಯೇ॒ ಜ್ಯೋತಿ॑ಷ್ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಯಸ್ಯಾ॒-ಗ್ನಿರುದ್ಧೃ॒ತೋ-ಽಹು॑ತೇ-ಽಗ್ನಿಹೋ॒ತ್ರ ಉ॒ದ್ವಾಯೇ॒ದಪ॑ರ ಆ॒ದೀಪ್ಯಾ॑-ಽನೂ॒ದ್ಧೃತ್ಯ॒ ಇತ್ಯಾ॑ಹು॒ಸ್ತ-ತ್ತಥಾ॒ ನ ಕಾ॒ರ್ಯಂ॑-ಯಁ-ದ್ಭಾ॑ಗ॒ಧೇಯ॑ಮ॒ಭಿ ಪೂರ್ವ॑ ಉದ್ಧ್ರಿ॒ಯತೇ॒ ಕಿಮಪ॑ರೋ॒-ಽಭ್ಯು- [ಕಿಮಪ॑ರೋ॒-ಽಭ್ಯುತ್, ಹ್ರಿ॒ಯೇ॒ತೇತಿ॒ ತಾನ್ಯೇ॒ವಾ] 21
-ದ್ಧ್ರಿ॑ಯೇ॒ತೇತಿ॒ ತಾನ್ಯೇ॒ವಾ ವ॒ಖ್ಷಾಣಾ॑ನಿ ಸನ್ನಿ॒ಧಾಯ॑ ಮನ್ಥೇದಿ॒ತಃ ಪ್ರ॑ಥ॒ಮ-ಞ್ಜ॑ಜ್ಞೇ ಅ॒ಗ್ನಿ-ಸ್ಸ್ವಾದ್ಯೋನೇ॒ರಧಿ॑ ಜಾ॒ತವೇ॑ದಾಃ । ಸ ಗಾ॑ಯತ್ರಿ॒ಯಾ ತ್ರಿ॒ಷ್ಟುಭಾ॒ ಜಗ॑ತ್ಯಾ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತು ಪ್ರಜಾ॒ನನ್ನಿತಿ॒ ಛನ್ದೋ॑ಭಿ-ರೇ॒ವೈನ॒ಗ್ಗ್॒ ಸ್ವಾದ್ಯೋನೇಃ॒ ಪ್ರಜ॑ನಯತ್ಯೇ॒ಷ ವಾ ವ ಸೋ᳚-ಽಗ್ನಿರಿತ್ಯಾ॑ಹು॒ ರ್ಜ್ಯೋತಿ॒ಸ್ತ್ವಾ ಅ॑ಸ್ಯ॒ ಪರಾ॑ಪತಿತ॒-ಮಿತಿ॒ ಯದ॒ಗ್ನಯೇ॒ ಜ್ಯೋತಿ॑ಷ್ಮತೇ ನಿ॒ರ್ವಪ॑ತಿ॒ ಯದೇ॒ವಾಸ್ಯ॒ ಜ್ಯೋತಿಃ॒ ಪರಾ॑ಪತಿತ॒-ನ್ತದೇ॒ವಾವ॑ ರುನ್ಧೇ ॥ 22 ॥
(ಕ॒ರೋ॒ತ್ಯ॒ನ್ನಾ॒ದೋ – ದ॑ಧಾತಿ॒ ಯದ॒ಗ್ನಯೇ॒ – ಶುಚ॑ಯೇ॒ ಚಖ್ಷು॑ರೇ॒ವಾಸ್ಮಿ॒-ನ್ತೇನ॑ ದಧಾತಿ -ಕರೋತಿ॒ – ವಾಜಂ॒ -ಯಁಜ॑ಮಾನ॒ – ಮು – ದೇ॒ವಾಸ್ಯ॒ – ಷಟ್ಚ॑) (ಅ. 4)
ವೈ॒ಶ್ವಾ॒ನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದ್ವಾರು॒ಣ-ಞ್ಚ॒ರು-ನ್ದ॑ಧಿ॒ಕ್ರಾವ್ಣ್ಣೇ॑ ಚ॒ರುಮ॑ಭಿಶ॒ಸ್ಯಮಾ॑ನೋ॒ ಯ-ದ್ವೈ᳚ಶ್ವಾನ॒ರೋ ದ್ವಾದ॑ಶಕಪಾಲೋ॒ ಭವ॑ತಿ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರೇಣೈ॒ವೈನಗ್ಗ್॑ ಸ್ವದಯ॒ತ್ಯಪ॑ ಪಾ॒ಪಂ-ವಁರ್ಣಗ್ಂ॑ ಹತೇ ವಾರು॒ಣೇನೈ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ದಧಿ॒ಕ್ರಾವ್ಣ್ಣಾ॑ ಪುನಾತಿ॒ ಹಿರ॑ಣ್ಯ॒-ನ್ದಖ್ಷಿ॑ಣಾ ಪ॒ವಿತ್ರಂ॒-ವೈಁ ಹಿರ॑ಣ್ಯ-ಮ್ಪು॒ನಾತ್ಯೇ॒ವೈನ॑-ಮಾ॒ದ್ಯ॑-ಮ॒ಸ್ಯಾ-ಽನ್ನ॑-ಮ್ಭವತ್ಯೇ॒ತಾಮೇ॒ವ ನಿರ್ವ॑ಪೇ-ತ್ಪ್ರ॒ಜಾಕಾ॑ಮ-ಸ್ಸಂವಁಥ್ಸ॒ರೋ [ಸಂವಁಥ್ಸ॒ರಃ, ವಾ] 23
ವಾ ಏ॒ತಸ್ಯಾ-ಽಶಾ᳚ನ್ತೋ॒ ಯೋನಿ॑-ಮ್ಪ್ರ॒ಜಾಯೈ॑ ಪಶೂ॒ನಾ-ನ್ನಿರ್ದ॑ಹತಿ॒ ಯೋ-ಽಲ॑-ಮ್ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತೇ॒ ಯ-ದ್ವೈ᳚ಶ್ವಾನ॒ರೋ ದ್ವಾದ॑ಶಕಪಾಲೋ॒ ಭವ॑ತಿ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಮೇ॒ವ ಭಾ॑ಗ॒ಧೇಯೇ॑ನ ಶಮಯತಿ॒ ಸೋ᳚-ಽಸ್ಮೈ ಶಾ॒ನ್ತ-ಸ್ಸ್ವಾದ್ಯೋನೇಃ᳚ ಪ್ರ॒ಜಾ-ಮ್ಪ್ರಜ॑ನಯತಿ ವಾರು॒ಣೇನೈ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ದಧಿ॒ಕ್ರಾವ್ಣ್ಣಾ॑ ಪುನಾತಿ॒ ಹಿರ॑ಣ್ಯ॒-ನ್ದಖ್ಷಿ॑ಣಾ ಪ॒ವಿತ್ರಂ॒-ವೈಁ ಹಿರ॑ಣ್ಯ-ಮ್ಪು॒ನಾತ್ಯೇ॒ವೈನಂ॑- [ಪು॒ನಾತ್ಯೇ॒ವೈನ᳚ಮ್, ವಿ॒ನ್ದತೇ᳚] 24
-ವಿಁ॒ನ್ದತೇ᳚ ಪ್ರ॒ಜಾಂ-ವೈಁ᳚ಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ತ್ಪು॒ತ್ರೇ ಜಾ॒ತೇಯದ॒ಷ್ಟಾಕ॑ಪಾಲೋ॒ ಭವ॑ತಿ ಗಾಯತ್ರಿ॒ಯೈವೈನ॑-ಮ್ಬ್ರಹ್ಮವರ್ಚ॒ಸೇನ॑ ಪುನಾತಿ॒ ಯನ್ನವ॑ಕಪಾಲ-ಸ್ತ್ರಿ॒ವೃತೈ॒ವಾಸ್ಮಿ॒-ನ್ತೇಜೋ॑ ದಧಾತಿ॒ ಯ-ದ್ದಶ॑ಕಪಾಲೋ ವಿ॒ರಾಜೈ॒ವಾ-ಽಸ್ಮಿ॑-ನ್ನ॒ನ್ನಾದ್ಯ॑-ನ್ದಧಾತಿ॒ ಯದೇಕಾ॑ದಶಕಪಾಲ- ಸ್ತ್ರಿ॒ಷ್ಟುಭೈ॒ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ನ್ದ॑ಧಾತಿ॒ ಯ-ದ್ದ್ವಾದ॑ಶಕಪಾಲೋ॒ ಜಗ॑ತ್ಯೈ॒ವಾ-ಽಸ್ಮಿ॑-ನ್ಪ॒ಶೂ-ನ್ದ॑ಧಾತಿ॒ ಯಸ್ಮಿ॑ನ್ ಜಾ॒ತ ಏ॒ತಾಮಿಷ್ಟಿ॑-ನ್ನಿ॒ರ್ವಪ॑ತಿ ಪೂ॒ತ [ಪೂ॒ತಃ, ಏ॒ವ ತೇ॑ಜ॒ಸ್ವ್ಯ॑ನ್ನಾ॒ದ] 25
ಏ॒ವ ತೇ॑ಜ॒ಸ್ವ್ಯ॑ನ್ನಾ॒ದ ಇ॑ನ್ದ್ರಿಯಾ॒ವೀ ಪ॑ಶು॒ಮಾ-ನ್ಭ॑ವ॒ತ್ಯವ॒ ವಾ ಏ॒ಷ ಸು॑ವ॒ರ್ಗಾ-ಲ್ಲೋ॒ಕಾ-ಚ್ಛಿ॑ದ್ಯತೇ॒ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑ತಿಪಾ॒ದಯ॑ತಿ ಸುವ॒ರ್ಗಾಯ॒ ಹಿ ಲೋ॒ಕಾಯ॑ ದರ್ಶಪೂರ್ಣಮಾ॒ಸಾ ವಿ॒ಜ್ಯೇತೇ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑-ಽತಿ॒ಪಾದ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯಾ॒ [ಸಮ॑ಷ್ಟ್ಯೈ, ಅಥೋ॑] 26
ಅಥೋ॑ ದೇ॒ವತಾ॑ ಏ॒ವಾನ್ವಾ॒ರಭ್ಯ॑ ಸುವ॒ರ್ಗಂ-ಲೋಁ॒ಕಮೇ॑ತಿ ವೀರ॒ಹಾ ವಾ ಏ॒ಷ ದೇ॒ವಾನಾಂ॒-ಯೋಁ᳚-ಽಗ್ನಿ-ಮು॑ದ್ವಾ॒ಸಯ॑ತೇ॒ ನ ವಾ ಏ॒ತಸ್ಯ॑ ಬ್ರಾಹ್ಮ॒ಣಾ ಋ॑ತಾ॒ಯವಃ॑ ಪು॒ರಾ-ಽನ್ನ॑-ಮಖ್ಷ-ನ್ನಾಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ವೈಶ್ವಾನ॒ರ-ನ್ದ್ವಾದ॑ಶಕಪಾಲ-ಮ॒ಗ್ನಿಮು॑ದ್ವಾಸಯಿ॒ಷ್ಯನ್. ಯದ॒ಷ್ಟಾಕ॑ಪಾಲೋ॒ ಭವ॑ತ್ಯ॒ಷ್ಟಾಖ್ಷ॑ರಾ ಗಾಯ॒ತ್ರೀ-ಗಾ॑ಯ॒ತ್ರೋ᳚ ಽಗ್ನಿ-ರ್ಯಾವಾ॑-ನೇ॒ವಾ-ಽಗ್ನಿಸ್ತಸ್ಮಾ॑ ಆತಿ॒ಥ್ಯ-ಙ್ಕ॑ರೋ॒ತ್ಯಥೋ॒ ಯಥಾ॒ ಜನಂ॑-ಯಁ॒ತೇ॑-ಽವ॒ಸ-ಙ್ಕ॒ರೋತಿ॑ ತಾ॒ದೃ- [ತಾ॒ದೃಕ್, ಏ॒ವ] 27
-ಗೇ॒ವ ತ-ದ್ದ್ವಾದ॑ಶಕಪಾಲೋ ವೈಶ್ವಾನ॒ರೋ ಭ॑ವತಿ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಃ ಖಲು॒ ವಾ ಅ॒ಗ್ನೇರ್ಯೋನಿ॒-ಸ್ಸ್ವಾಮೇ॒ವೈನಂ॒-ಯೋಁನಿ॑-ಙ್ಗಮಯ-ತ್ಯಾ॒ದ್ಯ॑ಮ॒ಸ್ಯಾನ್ನ॑-ಮ್ಭವತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲ॒-ಙ್ಗ್ರಾಮ॑ಕಾಮ ಆಹವ॒ನೀಯೇ॑ ವೈಶ್ವಾನ॒ರಮಧಿ॑ ಶ್ರಯತಿ॒ ಗಾರ್ಹ॑ಪತ್ಯೇ ಮಾರು॒ತ-ಮ್ಪಾ॑ಪವಸ್ಯ॒ಸಸ್ಯ॒ ವಿಧೃ॑ತ್ಯೈ॒ ದ್ವಾದ॑ಶಕಪಾಲೋ ವೈಶ್ವಾನ॒ರೋ ಭ॑ವತಿ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರೇಣೈ॒ವಾಸ್ಮೈ॑ ಸಜಾ॒ತಾಗ್ಶ್ಚ್ಯಾ॑ವಯತಿ ಮಾರು॒ತೋ ಭ॑ವತಿ [ ] 28
ಮ॒ರುತೋ॒ ವೈ ದೇ॒ವಾನಾಂ॒-ವಿಁಶೋ॑ ದೇವವಿ॒ಶೇನೈ॒ವಾ-ಽಸ್ಮೈ॑ ಮನುಷ್ಯ ವಿ॒ಶಮವ॑ ರುನ್ಧೇ ಸ॒ಪ್ತಕ॑ಪಾಲೋ ಭವತಿ ಸ॒ಪ್ತ ಗ॑ಣಾ॒ ವೈ ಮ॒ರುತೋ॑ ಗಣ॒ಶ ಏ॒ವಾಸ್ಮೈ॑ ಸಜಾ॒ತಾನವ॑ ರುನ್ಧೇ ಽನೂ॒ಚ್ಯಮಾ॑ನ॒ ಆ ಸಾ॑ದಯತಿ॒ ವಿಶ॑ಮೇ॒ವಾಸ್ಮಾ॒ ಅನು॑ವರ್ತ್ಮಾನ-ಙ್ಕರೋತಿ ॥ 29 ॥
(ಪ್ರ॒ಜಾಕಾ॑ಮ-ಸ್ಸಂವಁಥ್ಸ॒ರಃ – ಪು॒ನಾತ್ಯೇ॒ವೈನಂ॑ – ಪೂ॒ತಃ – ಸಮ॑ಷ್ಟ್ಯೈ -ತಾ॒ದೃಂ – ಮಾ॑ರು॒ತೋ ಭ॑ವ॒ – ತ್ಯೇಕಾ॒ನ್ನ ತ್ರಿ॒ಗ್ಂ॒ಶಚ್ಚ॑ ) (ಅ. 5)
ಆ॒ದಿ॒ತ್ಯ-ಞ್ಚ॒ರು-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮ-ಮು॑ಪಪ್ರಯಾ॒ಸ್ಯ-ನ್ನಿ॒ಯಂ-ವಾಁ ಅದಿ॑ತಿ-ರ॒ಸ್ಯಾಮೇ॒ವ ಪೂರ್ವೇ॒ ಪ್ರತಿ॑ತಿಷ್ಠನ್ತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದಾ॒ಯತ॑ನ-ಙ್ಗ॒ತ್ವಾ-ಸಂ॑ವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಃ ಖಲು॒ ವೈ ದೇ॒ವಾನಾ॑-ಮಾ॒ಯತ॑ನ-ಮೇ॒ತಸ್ಮಾ॒ದ್ವಾ ಆ॒ಯತ॑ನಾ-ದ್ದೇ॒ವಾ ಅಸು॑ರಾ-ನಜಯ॒ನ್॒. ಯ-ದ್ವೈ᳚ಶ್ವಾನ॒ರ-ನ್ದ್ವಾದ॑ಶಕಪಾಲ-ನ್ನಿ॒ರ್ವಪ॑ತಿ ದೇ॒ವಾನಾ॑-ಮೇ॒ವಾ-ಽಽಯತ॑ನೇ ಯತತೇ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮ-ಮೇ॒ತಸ್ಮಿ॒ನ್ ವಾ ಏ॒ತೌ ಮೃ॑ಜಾತೇ॒ [ಏ॒ತೌ ಮೃ॑ಜಾತೇ, ಯೋ ವಿ॑ದ್ವಿಷಾ॒ಣಯೋ॒-ರನ್ನ॒-ಮತ್ತಿ॑] ॥ 30 ॥
ಯೋ ವಿ॑ದ್ವಿಷಾ॒ಣಯೋ॒-ರನ್ನ॒-ಮತ್ತಿ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದ್ವಿದ್ವಿಷಾ॒ಣಯೋ॒ರನ್ನ॑-ಞ್ಜ॒ಗ್ಧ್ವಾ ಸಂ॑ವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ ಸ್ವ॑ದಿತ-ಮೇ॒ವಾ-ಽತ್ತಿ॒ ನಾಸ್ಮಿ॑-ನ್ಮೃಜಾತೇ ಸಂವಁಥ್ಸ॒ರಾಯ॒ ವಾ ಏ॒ತೌ ಸಮ॑ಮಾತೇ॒ ಯೌ ಸ॑ಮ॒ಮಾತೇ॒ ತಯೋ॒ರ್ಯಃ ಪೂರ್ವೋ॑-ಽಭಿ॒ದ್ರುಹ್ಯ॑ತಿ॒ ತಂ-ವಁರು॑ಣೋ ಗೃಹ್ಣಾತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ಥ್ಸಮಮಾ॒ನಯೋಃ॒ ಪೂರ್ವೋ॑-ಽಭಿ॒ದ್ರುಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಮೇ॒ವಾ-ಽಽಪ್ತ್ವಾ ನಿ॑ರ್ವರು॒ಣಂ- [ನಿ॑ರ್ವರು॒ಣಮ್, ಪ॒ರಸ್ತಾ॑-ದ॒ಭಿ] ॥ 31 ॥
-ಪ॒ರಸ್ತಾ॑-ದ॒ಭಿ ದ್ರು॑ಹ್ಯತಿ॒ ನೈನಂ॒-ವಁರು॑ಣೋ ಗೃಹ್ಣಾತ್ಯಾ॒ವ್ಯಂ॑-ವಾಁ ಏ॒ಷ ಪ್ರತಿ॑ ಗೃಹ್ಣಾತಿ॒ ಯೋ-ಽವಿ॑-ಮ್ಪ್ರತಿಗೃ॒ಹ್ಣಾತಿ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ॒ದವಿ॑-ಮ್ಪ್ರತಿ॒ಗೃಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಸ್ವ॑ದಿತಾಮೇ॒ವ ಪ್ರತಿ॑ಗೃಹ್ಣಾತಿ॒ ನಾ-ಽಽವ್ಯ॑-ಮ್ಪ್ರತಿ॑ಗೃಹ್ಣಾತ್ಯಾ॒ತ್ಮನೋ॒ ವಾ ಏ॒ಷ ಮಾತ್ರಾ॑ಮಾಪ್ನೋತಿ॒ ಯ ಉ॑ಭ॒ಯಾದ॑-ತ್ಪ್ರತಿಗೃ॒ಹ್ಣಾತ್ಯಶ್ವಂ॑-ವಾಁ॒ ಪುರು॑ಷಂ-ವಾಁ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದುಭ॒ಯಾದ॑- [ನಿರ್ವ॑ಪೇ-ದುಭ॒ಯಾದ॑ತ್, ಪ್ರ॒ತಿ॒ಗೃಹ್ಯ॑] ॥ 32 ॥
-ತ್ಪ್ರತಿ॒ಗೃಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಸ್ವ॑ದಿತಮೇ॒ವ ಪ್ರತಿ॑ ಗೃಹ್ಣಾತಿ॒ ನಾತ್ಮನೋ॒ ಮಾತ್ರಾ॑ಮಾಪ್ನೋತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ಥ್ಸ॒ನಿ-ಮೇ॒ಷ್ಯನ್-ಥ್ಸಂ॑ವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರೋ ಯ॒ದಾ ಖಲು॒ ವೈ ಸಂ॑ವಁಥ್ಸ॒ರ-ಞ್ಜ॒ನತಾ॑ಯಾ॒-ಞ್ಚರ॒ತ್ಯಥ॒ ಸ ಧ॑ನಾ॒ರ್ಘೋ ಭ॑ವತಿ॒ಯ-ದ್ವೈ᳚ಶ್ವಾನ॒ರ-ನ್ದ್ವಾದ॑ಶಕಪಾಲ-ನ್ನಿ॒ರ್ವಪ॑ತಿ ಸಂವಁಥ್ಸ॒ರ-ಸಾ॑ತಾಮೇ॒ವ ಸ॒ನಿಮ॒ಭಿ ಪ್ರಚ್ಯ॑ವತೇ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವನ್ತಿ॒ ಯೋ ವೈ ಸಂ॑ವಁಥ್ಸ॒ರಂ- [ವೈ ಸಂ॑ವಁಥ್ಸ॒ರಮ್, ಪ್ರ॒ಯುಜ್ಯ॒ ನ] ॥ 33 ॥
-ಪ್ರ॒ಯುಜ್ಯ॒ ನ ವಿ॑ಮು॒ಞ್ಚತ್ಯ॑ಪ್ರತಿಷ್ಠಾ॒ನೋ ವೈ ಸ ಭ॑ವತ್ಯೇ॒ತ-ಮೇ॒ವ ವೈ᳚ಶ್ವಾನ॒ರ-ಮ್ಪುನ॑ರಾ॒ಗತ್ಯ॒ ನಿರ್ವ॑ಪೇ॒ದ್ಯ-ಮೇ॒ವ ಪ್ರ॑ಯು॒ಙ್ಕ್ತೇ ತ-ಮ್ಭಾ॑ಗ॒ಧೇಯೇ॑ನ॒ ವಿ ಮು॑ಞ್ಚತಿ॒ ಪ್ರತಿ॑ಷ್ಠಿತ್ಯೈ॒ ಯಯಾ॒ ರಜ್ವೋ᳚ತ್ತ॒ಮಾ-ಙ್ಗಾಮಾ॒ಜೇ-ತ್ತಾ-ಮ್ಭ್ರಾತೃ॑ವ್ಯಾಯ॒ ಪ್ರ ಹಿ॑ಣುಯಾ॒-ನ್ನಿರ್-ಋ॑ತಿ-ಮೇ॒ವಾಸ್ಮೈ॒ ಪ್ರ ಹಿ॑ಣೋತಿ ॥ 34 ॥
(ಮೃ॒ಜಾ॒ತೇ॒ – ನಿ॒ರ್ವ॒ರು॒ಣಂ – ವಁ॑ಪೇದುಭ॒ಯಾದ॒–ದ್ಯೋ ವೈ ಸಂ॑ವಁಥ್ಸ॒ರಗ್ಂ – ಷಟ್ತ್ರಿಗ್ಂ॑ಶಚ್ಚ) (ಅ. 6)
ಐ॒ನ್ದ್ರ-ಞ್ಚ॒ರು-ನ್ನಿರ್ವ॑ಪೇ-ತ್ಪ॒ಶುಕಾ॑ಮ ಐ॒ನ್ದ್ರಾ ವೈ ಪ॒ಶವ॒ ಇನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ಶೂ-ನ್ಪ್ರಯ॑ಚ್ಛತಿ ಪಶು॒ಮಾ-ನೇ॒ವ ಭ॑ವತಿ ಚ॒ರುರ್ಭ॑ವತಿ॒ ಸ್ವಾದೇ॒ವಾಸ್ಮೈ॒ ಯೋನೇಃ᳚ ಪ॒ಶೂ-ನ್ಪ್ರಜ॑ನಯ॒ತೀನ್ದ್ರಾ॑ಯೇನ್ದ್ರಿ॒ಯಾವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ತ್ಪ॒ಶುಕಾ॑ಮ ಇನ್ದ್ರಿ॒ಯಂ-ವೈಁ ಪ॒ಶವ॒ ಇನ್ದ್ರ॑-ಮೇ॒ವೇನ್ದ್ರಿ॒ಯಾವ॑ನ್ತ॒ಗ್ಗ್॒ ಸ್ವೇನ ॑ಭಾಗ॒ಧೇಯೇ॒ನೋಪ॑ ಧಾವತಿ॒ ಸ [ಧಾವತಿ॒ ಸಃ, ಏ॒ವಾ-ಽಸ್ಮಾ॑] ॥ 35 ॥
ಏ॒ವಾ-ಽಸ್ಮಾ॑ ಇನ್ದ್ರಿ॒ಯ-ಮ್ಪ॒ಶೂ-ನ್ಪ್ರಯ॑ಚ್ಛತಿ ಪಶು॒ಮಾನೇ॒ವ ಭ॑ವ॒ತೀನ್ದ್ರಾ॑ಯ-ಘ॒ರ್ಮವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ಬ್ರಹ್ಮವರ್ಚ॒ಸಕಾ॑ಮೋ ಬ್ರಹ್ಮವರ್ಚ॒ಸಂ-ವೈಁ ಘ॒ರ್ಮ ಇನ್ದ್ರ॑ಮೇ॒ವ ಘ॒ರ್ಮವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವ॒ತೀನ್ದ್ರಾ॑ಯಾ॒-ಽರ್ಕವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದನ್ನ॑ಕಾಮೋ॒-ಽರ್ಕೋ ವೈ ದೇ॒ವಾನಾ॒-ಮನ್ನ॒-ಮಿನ್ದ್ರ॑-ಮೇ॒ವಾ-ಽರ್ಕವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋ- [ಸ್ವೇನ॑ ಭಾಗ॒ಧೇಯೇ॑ನ, ಉಪ॑ ಧಾವತಿ॒ ಸ] ॥ 36॥
-ಪ॑ ಧಾವತಿ॒ ಸ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛತ್ಯನ್ನಾ॒ದ ಏ॒ವ ಭ॑ವ॒ತೀನ್ದ್ರಾ॑ಯ ಘ॒ರ್ಮವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಿನ್ದ್ರಾ॑ಯೇ-ನ್ದ್ರಿ॒ಯಾವ॑ತ॒ ಇನ್ದ್ರಾ॑ಯಾ॒-ಽರ್ಕವ॑ತೇ॒ ಭೂತಿ॑ಕಾಮೋ॒ ಯದಿನ್ದ್ರಾ॑ಯ ಘ॒ರ್ಮವ॑ತೇ ನಿ॒ರ್ವಪ॑ತಿ॒ ಶಿರ॑ ಏ॒ವಾಸ್ಯ॒ ತೇನ॑ ಕರೋತಿ॒ ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಆ॒ತ್ಮಾನ॑-ಮೇ॒ವಾಸ್ಯ॒ ತೇನ॑ ಕರೋತಿ॒-ಯ-ದಿನ್ದ್ರಾ॑ಯಾ॒-ಽರ್ಕವ॑ತೇ ಭೂ॒ತ ಏ॒ವಾನ್ನಾದ್ಯೇ॒ ಪ್ರತಿ॑-ತಿಷ್ಠತಿ॒ ಭವ॑ತ್ಯೇ॒ವೇನ್ದ್ರಾ॑ಯಾ- [ಭವ॑ತ್ಯೇ॒ವೇನ್ದ್ರಾ॑ಯಾ, ಅ॒ಗ್ಂ॒ ಹೋ॒ಮುಚೇ॑] ॥ 37 ॥
-ಽಗ್ಂ ಹೋ॒ಮುಚೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಃ ಪಾ॒ಪ್ಮನಾ॑ ಗೃಹೀ॒ತ-ಸ್ಸ್ಯಾ-ತ್ಪಾ॒ಪ್ಮಾ ವಾ ಅಗ್ಂಹ॒ ಇನ್ದ್ರ॑ಮೇ॒ವಾ-ಽಗ್ಂ ಹೋ॒ಮುಚ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮ್ಪಾ॒ಪ್ಮನೋ-ಽಗ್ಂಹ॑ಸೋ ಮುಞ್ಚ॒ತೀನ್ದ್ರಾ॑ಯ ವೈಮೃ॒ಧಾಯ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯ-ಮ್ಮೃಧೋ॒-ಽಭಿ ಪ್ರ॒ವೇಪೇ॑ರನ್-ರಾ॒ಷ್ಟ್ರಾಣಿ॑ ವಾ॒-ಽಭಿ ಸ॑ಮಿ॒ಯು-ರಿನ್ದ್ರ॑-ಮೇ॒ವ ವೈ॑ಮೃ॒ಧಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಾ॒ನ್ಮೃಧೋ- [ಏ॒ವಾ-ಽಸ್ಮಾ॒ನ್ಮೃಧಃ॑, ಅಪ॑ ಹ॒ನ್ತೀನ್ದ್ರಾ॑ಯ] ॥ 38 ॥
-ಽಪ॑ ಹ॒ನ್ತೀನ್ದ್ರಾ॑ಯ ತ್ರಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ಬ॒ದ್ಧೋ ವಾ॒ ಪರಿ॑ಯತ್ತೋ॒ ವೇನ್ದ್ರ॑ಮೇ॒ವ ತ್ರಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ನ್ತ್ರಾಯತ॒ ಇನ್ದ್ರಾ॑ಯಾ-ಽರ್ಕಾಶ್ವಮೇ॒ಧವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯ-ಮ್ಮ॑ಹಾಯ॒ಜ್ಞೋ ನೋಪ॒ನಮೇ॑ದೇ॒ತೇ ವೈ ಮ॑ಹಾಯ॒ಜ್ಞಸ್ಯಾ-ಽನ್ತ್ಯೇ॑ ತ॒ನೂ ಯ-ದ॑ರ್ಕಾಶ್ವಮೇ॒ಧಾ-ವಿನ್ದ್ರ॑-ಮೇ॒ವಾ-ಽರ್ಕಾ᳚ಶ್ವಮೇ॒ಧ- ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॑ ಅನ್ತ॒ತೋ ಮ॑ಹಾಯ॒ಜ್ಞ-ಞ್ಚ್ಯಾ॑ವಯ॒ತ್ಯುಪೈ॑ನ-ಮ್ಮಹಾಯ॒ಜ್ಞೋ ನ॑ಮತಿ ॥ 39 ॥
(ಇ॒ನ್ದ್ರಿ॒ಯಾವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೋ᳚ – ಽರ್ಕವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॑ನೈ॒ – ವೇನ್ದ್ರಾ॑ಯಾ – ಸ್ಮಾ॒-ನ್ಮೃಧೋ᳚ – ಽಸ್ಮೈ – ಸ॒ಪ್ತ ಚ॑ ) (ಅ. 7)
ಇನ್ದ್ರಾ॒ಯಾ-ಽನ್ವೃ॑ಜವೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದ್ಗ್ರಾಮ॑ಕಾಮ॒ ಇನ್ದ್ರ॑-ಮೇ॒ವಾ-ಽನ್ವೃ॑ಜು॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಸಜಾ॒ತಾ-ನನು॑ಕಾನ್ ಕರೋತಿ ಗ್ರಾ॒ಮ್ಯೇ॑ವ ಭ॑ವತೀನ್ದ್ರಾ॒ಣ್ಯೈ ಚ॒ರು-ನ್ನಿರ್ವ॑ಪೇ॒ದ್ಯಸ್ಯ॒ ಸೇನಾ-ಽಸಗ್ಂ॑ಶಿತೇವ॒ ಸ್ಯಾ-ದಿ॑ನ್ದ್ರಾ॒ಣೀ ವೈ ಸೇನಾ॑ಯೈ ದೇ॒ವತೇ᳚ನ್ದ್ರಾ॒ಣೀ-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೈವಾಸ್ಯ॒ ಸೇನಾ॒ಗ್ಂ॒ ಸಗ್ಗ್ ಶ್ಯ॑ತಿ॒ ಬಲ್ಬ॑ಜಾ॒ನಪೀ॒- [ಬಲ್ಬ॑ಜಾ॒ನಪಿ॑, ಇ॒ದ್ಧ್ಮೇ ಸ-ನ್ನ॑ಹ್ಯೇ॒ದ್ಗೌ-] ॥ 40 ॥
-ದ್ಧ್ಮೇ ಸ-ನ್ನ॑ಹ್ಯೇ॒ದ್ಗೌ-ರ್ಯತ್ರಾ-ಽಧಿ॑ಷ್ಕನ್ನಾ॒-ನ್ಯಮೇ॑ಹ॒-ತ್ತತೋ॒ ಬಲ್ಬ॑ಜಾ॒ ಉದ॑ತಿಷ್ಠ॒-ನ್ಗವಾ॑-ಮೇ॒ವೈನ॑-ನ್ನ್ಯಾ॒ಯ-ಮ॑ಪಿ॒ನೀಯ॒ ಗಾ ವೇ॑ದಯ॒ತೀನ್ದ್ರಾ॑ಯ ಮನ್ಯು॒ಮತೇ॒ ಮನ॑ಸ್ವತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮೇ ಸಂಯಁ॑ತ್ತ ಇನ್ದ್ರಿ॒ಯೇಣ॒ ವೈ ಮ॒ನ್ಯುನಾ॒ ಮನ॑ಸಾ ಸಙ್ಗ್ರಾ॒ಮ-ಞ್ಜ॑ಯ॒ತೀನ್ದ್ರ॑-ಮೇ॒ವ ಮ॑ನ್ಯು॒ಮನ್ತ॒-ಮ್ಮನ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑ನ್ನಿನ್ದ್ರಿ॒ಯ-ಮ್ಮ॒ನ್ಯು-ಮ್ಮನೋ॑ ದಧಾತಿ॒ ಜಯ॑ತಿ॒ ತಗ್ಂ [ಜಯ॑ತಿ॒ ತಮ್, ಸ॒ಗ್ರಾ॒ಮ-ಮೇ॒ತಾ-ಮೇ॒ವ] ॥ 41 ॥
ಸ॑ಗ್ರಾ॒ಮ-ಮೇ॒ತಾ-ಮೇ॒ವ ನಿರ್ವ॑ಪೇ॒ದ್ಯೋ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪ ಇವ॒ ಸ್ಯಾದೇ॒ತಾನಿ॒ ಹಿ ವಾ ಏ॒ತಸ್ಮಾ॒ ದಪ॑ಕ್ರಾನ್ತಾ॒ನ್ಯಥೈ॒ಷ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪ॒ ಇನ್ದ್ರ॑ಮೇ॒ವ ಮ॑ನ್ಯು॒ಮನ್ತ॒-ಮ್ಮನ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ನಿನ್ದ್ರಿ॒ಯ-ಮ್ಮ॒ನ್ಯು-ಮ್ಮನೋ॑ ದಧಾತಿ॒ ನ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪೋ ಭವ॒ತೀನ್ದ್ರಾ॑ಯ ದಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ದಾನ॑ಕಾಮಾ ಮೇ ಪ್ರ॒ಜಾ-ಸ್ಸ್ಯು॒- [ದಾನ॑ಕಾಮಾ ಮೇ ಪ್ರ॒ಜಾ-ಸ್ಸ್ಯುಃ॑, ಇತೀನ್ದ್ರ॑-ಮೇ॒ವ] ॥ 42 ॥
-ರಿತೀನ್ದ್ರ॑-ಮೇ॒ವ ದಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॒ ದಾನ॑ಕಾಮಾಃ ಪ್ರ॒ಜಾಃ ಕ॑ರೋತಿ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವ॒ನ್ತೀನ್ದ್ರಾ॑ಯ ಪ್ರದಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದ್ಯಸ್ಮೈ॒ ಪ್ರತ್ತ॑ಮಿವ॒ ಸನ್ನ ಪ್ರ॑ದೀ॒ಯೇತೇನ್ದ್ರ॑-ಮೇ॒ವ ಪ್ರ॑ದಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑-ಧಾವತಿ॒ ಸ ಏ॒ವಾಸ್ಮೈ॒ ಪ್ರ-ದಾ॑ಪಯ॒ತೀನ್ದ್ರಾ॑ಯ ಸು॒ತ್ರಾಮ್ಣೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಪ॑ರುದ್ಧೋ ವಾ- [-ದಪ॑ರುದ್ಧೋ ವಾ, ಅ॒ಪ॒ರು॒ದ್ಧಯಮಾ॑ನೋ॒] ॥ 43 ॥
-ಽಪರು॒ದ್ಧಯಮಾ॑ನೋ॒ ವೇನ್ದ್ರ॑ಮೇ॒ವ ಸು॒ತ್ರಾಮಾ॑ಣ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ನ್ತ್ರಾಯತೇ ಽನಪರು॒ದ್ಧ್ಯೋ ಭ॑ವ॒ತೀನ್ದ್ರೋ॒ ವೈ ಸ॒ದೃ-ನ್ದೇ॒ವತಾ॑ಭಿರಾಸೀ॒-ಥ್ಸ ನ ವ್ಯಾ॒ವೃತ॑ಮಗಚ್ಛ॒-ಥ್ಸ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ತ್ತಸ್ಮಾ॑ ಏ॒ತ-ಮೈ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ॑ವಪ॒-ತ್ತೇನೈ॒-ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ಮ॑ದಧಾ॒-ಚ್ಛಕ್ವ॑ರೀ ಯಾಜ್ಯಾನುವಾ॒ಕ್ಯೇ॑ ಅಕರೋ॒-ದ್ವಜ್ರೋ॒ ವೈ ಶಕ್ವ॑ರೀ॒ ಸ ಏ॑ನಂ॒-ವಁಜ್ರೋ॒ ಭೂತ್ಯಾ॑ ಐನ್ಧ॒- [ಭೂತ್ಯಾ॑ ಐನ್ಧ, ಸೋ॑-ಽಭವ॒-ಥ್ಸೋ॑-ಽಬಿಭೇ-] ॥ 44 ॥
-ಸೋ॑-ಽಭವ॒ಥ್ಸೋ॑-ಽಬಿಭೇ-ದ್ಭೂ॒ತಃ ಪ್ರ ಮಾ॑ ಧಖ್ಷ್ಯ॒ತೀತಿ॒ ಸ ಪ್ರ॒ಜಾಪ॑ತಿ॒-ಮ್ಪುನ॒ರುಪಾ॑-ಽಧಾವ॒-ಥ್ಸ ಪ್ರ॒ಜಾಪ॑ತಿ॒-ಶ್ಶಕ್ವ॑ರ್ಯಾ॒ ಅಧಿ॑ ರೇ॒ವತೀ॒-ನ್ನಿರ॑ಮಿಮೀತ॒ ಶಾನ್ತ್ಯಾ॒ ಅಪ್ರ॑ದಾಹಾಯ॒ ಯೋ-ಽಲಗ್ಗ್॑ ಶ್ರಿ॒ಯೈ ಸನ್-ಥ್ಸ॒ದೃಙ್ಖ್ಸ॑ಮಾ॒ನೈ-ಸ್ಸ್ಯಾ-ತ್ತಸ್ಮಾ॑ ಏ॒ತ-ಮೈ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಿನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ನ್ದ॑ಧಾತಿ ರೇ॒ವತೀ॑ ಪುರೋನುವಾ॒ಕ್ಯಾ॑ ಭವತಿ॒ ಶಾನ್ತ್ಯಾ॒ ಅಪ್ರ॑ದಾಹಾಯ॒ ಶಕ್ವ॑ರೀ ಯಾ॒ಜ್ಯಾ॑ ವಜ್ರೋ॒ ವೈ ಶಕ್ವ॑ರೀ॒ಸ ಏ॑ನಂ॒-ವಁಜ್ರೋ॒ ಭೂತ್ಯಾ॑ ಇನ್ಧೇ॒ ಭವ॑ತ್ಯೇ॒ವ ॥ 45 ॥
(ಅಪಿ॒ – ತಗ್ಗ್ – ಸ್ಯು॑ – ರ್ವೈ – ನ್ಧ – ಭವತಿ॒ – ಚತು॑ರ್ದಶ ಚ ) (ಅ. 8)
ಆ॒ಗ್ನಾ॒-ವೈ॒ಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದಭಿ॒ಚರ॒ನ್-ಥ್ಸರ॑ಸ್ವ॒ತ್ಯಾಜ್ಯ॑ ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ ಯಶ್ಚ॒ರುರ್ಯದಾ᳚ಗ್ನಾ-ವೈಷ್ಣ॒ವ ಏಕಾ॑ದಶಕಪಾಲೋ॒ ಭವ॑ತ್ಯ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑ರ್ಯ॒ಜ್ಞೋ ದೇ॒ವತಾ॑ಭಿ-ಶ್ಚೈ॒ವೈನಂ॑-ಯಁ॒ಜ್ಞೇನ॑ ಚಾ॒ಭಿ ಚ॑ರತಿ॒-ಸರ॑ಸ್ವ॒ತ್ಯಾಜ್ಯ॑ಭಾಗಾ ಭವತಿ॒ ವಾಗ್ವೈ ಸರ॑ಸ್ವತೀ ವಾ॒ಚೈವೈನ॑-ಮ॒ಭಿ ಚ॑ರತಿ ಬಾರ್ಹಸ್ಪ॒ತ್ಯ-ಶ್ಚ॒ರು ರ್ಭ॑ವತಿ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವೈನ॑-ಮ॒ಭಿ ಚ॑ರತಿ॒ [-ಮ॒ಭಿ ಚ॑ರತಿ, ಪ್ರತಿ॒ ವೈ] ॥ 46 ॥
ಪ್ರತಿ॒ ವೈ ಪ॒ರಸ್ತಾ॑-ದಭಿ॒ಚರ॑ನ್ತ-ಮ॒ಭಿ ಚ॑ರನ್ತಿ॒ ದ್ವೇದ್ವೇ॑ ಪುರೋ-ಽನುವಾ॒ಕ್ಯೇ॑ ಕುರ್ಯಾ॒ದತಿ॒ ಪ್ರಯು॑ಕ್ತ್ಯಾ ಏ॒ತಯೈ॒ವ ಯ॑ಜೇತಾಭಿ ಚ॒ರ್ಯಮಾ॑ಣೋ ದೇ॒ವತಾ॑ಭಿ-ರೇ॒ವ ದೇ॒ವತಾಃ᳚ ಪ್ರತಿ॒ಚರ॑ತಿ ಯ॒ಜ್ಞೇನ॑ ಯ॒ಜ್ಞಂ-ವಾಁ॒ಚಾ ವಾಚ॒-ಮ್ಬ್ರಹ್ಮ॑ಣಾ॒ ಬ್ರಹ್ಮ॒ ಸ ದೇ॒ವತಾ᳚ಶ್ಚೈ॒ವ ಯ॒ಜ್ಞ-ಞ್ಚ॑ ಮದ್ಧ್ಯ॒ತೋ ವ್ಯವ॑ಸರ್ಪತಿ॒ ತಸ್ಯ॒ ನ ಕುತ॑-ಶ್ಚ॒ನೋಪಾ᳚ವ್ಯಾ॒ಧೋ ಭ॑ವತಿ॒ ನೈನ॑-ಮಭಿ॒ಚರನ್᳚-ಥ್ಸ್ತೃಣುತ ಆಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಂ-ಯಁ॒ಜ್ಞೋ ನೋ- [-ಯ॒ಜ್ಞೋ ನ, ಉ॒ಪ॒ನಮೇ॑ದ॒ಗ್ನಿ-ಸ್ಸರ್ವಾ॑] ॥ 47 ॥
-ಪ॒ನಮೇ॑ದ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑-ರ್ಯ॒ಜ್ಞೋ᳚-ಽಗ್ನಿ-ಞ್ಚೈ॒ವ ವಿಷ್ಣು॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಯ॒ಜ್ಞ-ಮ್ಪ್ರಯ॑ಚ್ಛತ॒ ಉಪೈ॑ನಂ-ಯಁ॒ಜ್ಞೋ ನ॑ಮತ್ಯಾಗ್ನಾ- ವೈಷ್ಣ॒ವ-ಙ್ಘೃ॒ತೇ ಚ॒ರು-ನ್ನಿರ್ವ॑ಪೇ॒ಚ್ಚಖ್ಷು॑ಷ್ಕಾಮೋ॒-ಽಗ್ನೇರ್ವೈ ಚಖ್ಷು॑ಷಾ ಮನು॒ಷ್ಯಾ॑ ವಿ ಪ॑ಶ್ಯನ್ತಿ ಯ॒ಜ್ಞಸ್ಯ॑ ದೇ॒ವಾ ಅ॒ಗ್ನಿ-ಞ್ಚೈ॒ವ ವಿಷ್ಣು॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾ- [ತಾವೇ॒ವ, ಅ॒ಸ್ಮಿ॒ನ್ ಚಖ್ಷು॑ರ್ಧತ್ತ॒-] ॥ 48 ॥
-ಽಸ್ಮಿ॒ನ್ ಚಖ್ಷು॑-ರ್ಧತ್ತ॒-ಶ್ಚಖ್ಷು॑ಷ್ಮಾ-ನೇ॒ವ ಭ॑ವತಿ ಧೇ॒ನ್ವೈ ವಾ ಏ॒ತ-ದ್ರೇತೋ॒ ಯದಾಜ್ಯ॑-ಮನ॒ಡುಹ॑-ಸ್ತಣ್ಡು॒ಲಾ ಮಿ॑ಥು॒ನಾ-ದೇ॒ವಾಸ್ಮೈ॒ ಚಖ್ಷುಃ॒ ಪ್ರಜ॑ನಯತಿ ಘೃ॒ತೇ ಭ॑ವತಿ॒ ತೇಜೋ॒ ವೈ ಘೃ॒ತ-ನ್ತೇಜ॒ಶ್ಚಖ್ಷು॒-ಸ್ತೇಜ॑ಸೈ॒ವಾಸ್ಮೈ॒ ತೇಜ॒-ಶ್ಚಖ್ಷು॒ರವ॑ ರುನ್ಧ ಇನ್ದ್ರಿ॒ಯಂ-ವೈಁ ವೀ॒ರ್ಯಂ॑-ವೃಁಙ್ಕ್ತೇ॒ ಭ್ರಾತೃ॑ವ್ಯೋ॒ ಯಜ॑ಮಾ॒ನೋ-ಽಯ॑ಜಮಾನಸ್ಯಾ-ಧ್ವ॒ರಕ॑ಲ್ಪಾ॒-ಮ್ಪ್ರತಿ॒ ನಿರ್ವ॑ಪೇ॒-ದ್ಭ್ರಾತೃ॑ವ್ಯೇ॒ ಯಜ॑ಮಾನೇ॒ ನಾ-ಽಸ್ಯೇ᳚ನ್ದ್ರಿ॒ಯಂ- [ನಾ-ಽಸ್ಯೇ᳚ನ್ದ್ರಿ॒ಯಮ್, ವೀ॒ರ್ಯಂ॑ ವೃಁಙ್ಕ್ತೇ] ॥ 49 ॥
-ವೀಁ॒ರ್ಯಂ॑ ವೃಁಙ್ಕ್ತೇ ಪು॒ರಾವಾ॒ಚಃ ಪ್ರವ॑ದಿತೋ॒-ರ್ನಿರ್ವ॑ಪೇ॒-ದ್ಯಾವ॑ತ್ಯೇ॒ವ ವಾ-ಕ್ತಾಮಪ್ರೋ॑ದಿತಾ॒-ಮ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ತಾಮ॑ಸ್ಯ॒ ವಾಚ॑-ಮ್ಪ್ರ॒ವದ॑ನ್ತೀ-ಮ॒ನ್ಯಾ ವಾಚೋ-ಽನು॒ ಪ್ರವ॑ದನ್ತಿ॒ ತಾ ಇ॑ನ್ದ್ರಿ॒ಯಂ-ವೀಁ॒ರ್ಯಂ॑-ಯಁಜ॑ಮಾನೇ ದಧತ್ಯಾಗ್ನಾ ವೈಷ್ಣ॒ವ-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ತ್ಪ್ರಾತ-ಸ್ಸವನ॒ಸ್ಯಾ॑-ಽಽ ಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯಶ್ಚ॒ರು- ರ್ಯದ॒ಷ್ಟಾಕ॑ಪಾಲೋ॒ ಭವ॑ತ್ಯ॒ಷ್ಟಾಖ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರ-ಮ್ಪ್ರಾ॑ತ-ಸ್ಸವ॒ನ-ಮ್ಪ್ರಾ॑ತ-ಸ್ಸವ॒ನಮೇ॒ವ ತೇನಾ᳚-ಽಽಪ್ನೋ- [ತೇನಾ᳚-ಽಽಪ್ನೋತಿ, ಆ॒ಗ್ನಾ॒ವೈ॒ಷ್ಣ॒ವ-] ॥ 50 ॥
-ತ್ಯಾಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ನ್ಮಾದ್ಧ್ಯ॑ನ್ದಿನಸ್ಯ॒ ಸವ॑ನಸ್ಯಾ-ಽಽ ಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯ-ಶ್ಚ॒ರು ರ್ಯದೇಕಾ॑ದಶಕಪಾಲೋ॒ ಭವ॒ತ್ಯೇಕಾ॑ದಶಾಖ್ಷರಾ ತ್ರಿ॒ಷ್ಟು-ಪ್ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನ॒-ಮ್ಮಾದ್ಧ್ಯ॑ದಿನ್ನಮೇ॒ವ ಸವ॑ನ॒-ನ್ತೇನಾ᳚-ಽಽಪ್ನೋತ್ಯಾಗ್ನಾವೈಷ್ಣ॒ವ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ತ್ತೃತೀಯಸವ॒ನಸ್ಯಾ॑-ಽಽಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯ-ಶ್ಚ॒ರುರ್ಯ-ದ್ದ್ವಾದ॑ಶಕಪಾಲೋ॒ ಭವ॑ತಿ॒ ದ್ವಾದ॑ಶಾಖ್ಷರಾ॒ ಜಗ॑ತೀ॒ ಜಾಗ॑ತ-ನ್ತೃತೀಯಸವ॒ನ-ನ್ತೃ॑ತೀಯ ಸವ॒ನಮೇ॒ವ ತೇನಾ᳚-ಽಽಪ್ನೋತಿ ದೇ॒ವತಾ॑ಭಿರೇ॒ವ ದೇ॒ವತಾಃ᳚ [ದೇ॒ವತಾಃ᳚, ಪ್ರ॒ತಿ॒ಚರ॑ತಿ] ॥ 51 ॥
ಪ್ರತಿ॒ಚರ॑ತಿ ಯ॒ಜ್ಞೇನ॑ ಯ॒ಜ್ಞಂ-ವಾಁ॒ಚಾ ವಾಚ॒-ಮ್ಬ್ರಹ್ಮ॑ಣಾ॒ ಬ್ರಹ್ಮ॑ ಕ॒ಪಾಲೈ॑ರೇ॒ವ ಛನ್ದಾಗ್॑ಸ್ಯಾ॒ಪ್ನೋತಿ॑ ಪುರೋ॒ಡಾಶೈ॒-ಸ್ಸವ॑ನಾನಿ ಮೈತ್ರಾವರು॒ಣ-ಮೇಕ॑ಕಪಾಲ॒-ನ್ನಿರ್ವ॑ಪೇ-ದ್ವ॒ಶಾಯೈ॑ ಕಾ॒ಲೇ ಯೈವಾಸೌ ಭ್ರಾತೃ॑ವ್ಯಸ್ಯ ವ॒ಶಾ-ಽನೂ॑ಬ॒ನ್ಧ್ಯಾ॑ ಸೋ ಏ॒ವೈಷೈತಸ್ಯೈಕ॑ಕಪಾಲೋ ಭವತಿ॒ ನ ಹಿ ಕ॒ಪಾಲೈಃ᳚ ಪ॒ಶು-ಮರ್ಹ॒ತ್ಯಾಪ್ತು᳚ಮ್ ॥ 52 ॥
(ಬ್ರಹ್ಮ॑ಣೈ॒ವೈನ॑ಮ॒ಭಿ ಚ॑ರತಿ – ಯ॒ಜ್ಞೋ ನ – ತಾವೇ॒ವಾ – ಽಸ್ಯೇ᳚ನ್ದ್ರಿ॒ಯ – ಮಾ᳚ಪ್ನೋತಿ -ದೇ॒ವತಾಃ᳚ – ಸ॒ಪ್ತತ್ರಿಗ್ಂ॑ಶಚ್ಚ ) (ಅ. 9)
ಅ॒ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿ-ಮೈಚ್ಛ॒-ನ್ತಸ್ಮಾ॑ ಏ॒ತಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ॑ವಪ॒-ನ್ತೇನೈ॒ವಾಸ್ಮಿ॒-ನ್ರುಚ॑ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒-ಥ್ಸೋಮ॑-ಞ್ಚೈ॒ವ ರು॒ದ್ರ-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ಧ॑ತ್ತೋ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ತಿಷ್ಯಾಪೂರ್ಣಮಾ॒ಸೇ ನಿರ್ವ॑ಪೇದ್ರು॒ದ್ರೋ [ನಿರ್ವ॑ಪೇದ್ರು॒ದ್ರಃ, ವೈ ತಿ॒ಷ್ಯ॑-ಸ್ಸೋಮಃ॑] ॥ 53 ॥
ವೈ ತಿ॒ಷ್ಯ॑-ಸ್ಸೋಮಃ॑ ಪೂ॒ರ್ಣಮಾ॑ಸ-ಸ್ಸಾ॒ಖ್ಷಾದೇ॒ವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ॒ ಪರಿ॑ಶ್ರಿತೇ ಯಾಜಯತಿ ಬ್ರಹ್ಮವರ್ಚ॒ಸಸ್ಯ॒ ಪರಿ॑ಗೃಹೀತ್ಯೈ ಶ್ವೇ॒ತಾಯೈ᳚ ಶ್ವೇ॒ತವ॑ಥ್ಸಾಯೈ ದು॒ಗ್ಧ-ಮ್ಮ॑ಥಿ॒ತಮಾಜ್ಯ॑-ಮ್ಭವ॒ತ್ಯಾಜ್ಯ॒-ಮ್ಪ್ರೋಖ್ಷ॑ಣ॒ಮಾಜ್ಯೇ॑ನ ಮಾರ್ಜಯನ್ತೇ॒ ಯಾವ॑ದೇ॒ವ ಬ್ರ॑ಹ್ಮವರ್ಚ॒ಸ-ನ್ತ-ಥ್ಸರ್ವ॑-ಙ್ಕರೋ॒ತ್ಯತಿ॑ ಬ್ರಹ್ಮವರ್ಚ॒ಸ-ಙ್ಕ್ರಿ॑ಯತ॒ ಇತ್ಯಾ॑ಹುರೀಶ್ವ॒ರೋ ದು॒ಶ್ಚರ್ಮಾ॒ ಭವಿ॑ತೋ॒ರಿತಿ॑ ಮಾನ॒ವೀ ಋಚೌ॑ ಧಾ॒ಯ್ಯೇ॑ ಕುರ್ಯಾ॒-ದ್ಯದ್ವೈ ಕಿಞ್ಚ॒ ಮನು॒-ರವ॑ದ॒ತ್ತ-ದ್ಭೇ॑ಷ॒ಜಂ- [-ದ್ಭೇ॑ಷ॒ಜಮ್, ಭೇ॒ಷ॒ಜ-ಮೇ॒ವಾ-ಽಸ್ಮೈ॑] ॥ 54 ॥
-ಭೇ॑ಷ॒ಜ-ಮೇ॒ವಾ-ಽಸ್ಮೈ॑ ಕರೋತಿ॒ ಯದಿ॑ ಬಿಭೀ॒ಯಾ-ದ್ದು॒ಶ್ಚರ್ಮಾ॑ ಭವಿಷ್ಯಾ॒ಮೀತಿ॑ ಸೋಮಾಪೌ॒ಷ್ಣ-ಞ್ಚ॒ರು-ನ್ನಿರ್ವ॑ಪೇ-ಥ್ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷಃ ಪೌ॒ಷ್ಣಾಃ ಪ॒ಶವ॒-ಸ್ಸ್ವಯೈ॒ ವಾಸ್ಮೈ॑ ದೇ॒ವತ॑ಯಾ ಪ॒ಶುಭಿ॒-ಸ್ತ್ವಚ॑-ಙ್ಕರೋತಿ॒ ನ ದು॒ಶ್ಚರ್ಮಾ॑ ಭವತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ-ತ್ಪ್ರ॒ಜಾಕಾ॑ಮ॒-ಸ್ಸೋಮೋ॒ ವೈ ರೇ॑ತೋ॒ಧಾ ಅ॒ಗ್ನಿಃ ಪ್ರ॒ಜಾನಾ᳚-ಮ್ಪ್ರಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ᳚ತ್ಯ॒ಗ್ನಿಃ ಪ್ರ॒ಜಾ-ಮ್ಪ್ರಜ॑ನಯತಿ ವಿ॒ನ್ದತೇ᳚ – [ ] ॥ 55 ॥
ಪ್ರ॒ಜಾಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ-ದಭಿ॒ಚರನ್᳚-ಥ್ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷ ಏ॒ಷ ರು॒ದ್ರೋ ಯದ॒ಗ್ನಿ-ಸ್ಸ್ವಾಯಾ॑ ಏ॒ವೈನ॑-ನ್ದೇ॒ವತಾ॑ಯೈ ನಿ॒ಷ್ಕ್ರೀಯ॑ ರು॒ದ್ರಾಯಾಪಿ॑ ದಧಾತಿ ತಾ॒ಜಗಾರ್ತಿ॒-ಮಾರ್ಚ್ಛ॑ತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒-ಜ್ಜ್ಯೋಗಾ॑ಮಯಾವೀ॒ ಸೋಮಂ॒-ವಾಁ ಏ॒ತಸ್ಯ॒ ರಸೋ॑ ಗಚ್ಛತ್ಯ॒ಗ್ನಿಗ್ಂ ಶರೀ॑ರಂ॒-ಯಁಸ್ಯ॒ ಜ್ಯೋಗಾ॒ಮಯ॑ತಿ॒ ಸೋಮಾ॑ದೇ॒ವಾಸ್ಯ॒ ರಸ॑-ನ್ನಿಷ್ಕ್ರೀ॒ಣಾತ್ಯ॒ಗ್ನೇ-ಶ್ಶರೀ॑ರಮು॒ತ ಯದೀ॒- [ಯದಿ॑, ಇ॒ತಾಸು॒ ರ್ಭವ॑ತಿ॒] ॥ 56 ॥
-ತಾಸು॒ ರ್ಭವ॑ತಿ॒ ಜೀವ॑ತ್ಯೇ॒ವ ಸೋ॑ಮಾರು॒ದ್ರಯೋ॒ರ್ವಾ ಏ॒ತ-ಙ್ಗ್ರ॑ಸಿ॒ತಗ್ಂ ಹೋತಾ॒ ನಿಷ್ಖಿ॑ದತಿ॒ ಸ ಈ᳚ಶ್ವ॒ರ ಆರ್ತಿ॒ಮಾರ್ತೋ॑-ರನ॒ಡ್ವಾನ್. ಹೋತ್ರಾ॒ ದೇಯೋ॒ ವಹ್ನಿ॒ರ್ವಾ ಅ॑ನ॒ಡ್ವಾನ್. ವಹ್ನಿ॒ರ್॒ಹೋತಾ॒ ವಹ್ನಿ॑ನೈ॒ವ ವಹ್ನಿ॑-ಮಾ॒ತ್ಮಾನಗ್ಗ್॑ ಸ್ಪೃಣೋತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಸ್ವೇ᳚-ಽಸ್ಮಾ ಆ॒ಯತ॑ನೇ॒ ಭ್ರಾತೃ॑ವ್ಯ-ಞ್ಜನಯೇಯ॒ಮಿತಿ॒ ವೇದಿ॑-ಮ್ಪರಿ॒ಗೃಹ್ಯಾ॒-ಽರ್ಧ-ಮು॑ದ್ಧ॒ನ್ಯಾ-ದ॒ರ್ಧ-ನ್ನಾರ್ಧ-ಮ್ಬ॒ರ್॒ಹಿಷ॑-ಸ್ಸ್ತೃಣೀ॒ಯಾ-ದ॒ರ್ಧ-ನ್ನಾರ್ಧ-ಮಿ॒ದ್ಧ್ಮಸ್ಯಾ᳚-ಽಭ್ಯಾ-ದ॒ದ್ಧ್ಯಾ-ದದ್॒ರ್ಧ-ನ್ನ ಸ್ವ ಏ॒ವಾಸ್ಮಾ॑ ಆ॒ಯತ॑ನೇ॒ ಭ್ರಾತೃ॑ವ್ಯ-ಞ್ಜನಯತಿ ॥ 57 ॥
(ರು॒ದ್ರೋ – ಭೇ॑ಷ॒ಜಂ – ವಿ॒ನ್ದತೇ॒- ಯದಿ॑ – ಸ್ತೃಣೀ॒ಯಾದ॒ರ್ಧಂ – ದ್ವಾದ॑ಶ ಚ) (ಅ. 10)
ಐ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲ॒-ಙ್ಗ್ರಾಮ॑ಕಾಮ॒ ಇನ್ದ್ರ॑-ಞ್ಚೈ॒ವ ಮ॒ರುತ॑ಶ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತ್ಯಾಹವ॒ನೀಯ॑ ಐ॒ನ್ದ್ರಮಧಿ॑ ಶ್ರಯತಿ॒ ಗಾರ್ಹ॑ಪತ್ಯೇ ಮಾರು॒ತ-ಮ್ಪಾ॑ಪವಸ್ಯ॒ಸಸ್ಯ॒ ವಿಧೃ॑ತ್ಯೈ ಸ॒ಪ್ತಕ॑ಪಾಲೋ ಮಾರು॒ತೋ ಭ॑ವತಿ ಸ॒ಪ್ತಗ॑ಣಾ॒ ವೈ ಮ॒ರುತೋ॑ಗಣ॒ಶ ಏ॒ವಾಸ್ಮೈ॑ ಸಜಾ॒ತಾನವ॑ ರುನ್ಧೇ-ಽನೂ॒ಚ್ಯಮಾ॑ನ॒ ಆ ಸಾ॑ದಯತಿ॒ ವಿಶ॑ಮೇ॒ವಾ- [ವಿಶ॑ಮೇ॒ವ, ಅ॒ಸ್ಮಾ॒ ಅನು॑ವರ್ತ್ಮಾನಂ-] ॥ 58 ॥
-ಽಸ್ಮಾ॒ ಅನು॑ವರ್ತ್ಮಾನ-ಙ್ಕರೋತ್ಯೇ॒ತಾಮೇ॒ವ ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ ಖ್ಷ॒ತ್ರಾಯ॑ ಚ ವಿ॒ಶೇ ಚ॑ ಸ॒ಮದ॑-ನ್ದದ್ಧ್ಯಾ॒-ಮಿತ್ಯೈ॒ನ್ದ್ರಸ್ಯಾ॑-ಽವ॒ದ್ಯ-ನ್ಬ್ರೂ॑ಯಾ॒-ದಿನ್ದ್ರಾ॒ಯಾ-ಽನು॑ ಬ್ರೂ॒ಹೀತ್ಯಾ॒ಶ್ರಾವ್ಯ॑ ಬ್ರೂಯಾ-ನ್ಮ॒ರುತೋ॑ ಯ॒ಜೇತಿ॑ ಮಾರು॒ತಸ್ಯಾ॑-ಽವ॒ದ್ಯ-ನ್ಬ್ರೂ॑ಯಾ-ನ್ಮ॒ರುದ್ಭ್ಯೋ-ಽನು॑ ಬ್ರೂ॒ಹೀತ್ಯಾ॒ಶ್ರಾವ್ಯ॑ ಬ್ರೂಯಾ॒ದಿನ್ದ್ರಂ॑-ಯಁ॒ಜೇತಿ॒ ಸ್ವ ಏ॒ವೈಭ್ಯೋ॑ ಭಾಗ॒ಧೇಯೇ॑ ಸ॒ಮದ॑-ನ್ದಧಾತಿ ವಿತೃಗ್ಂಹಾ॒ಣಾ-ಸ್ತಿ॑ಷ್ಠನ್ತ್ಯೇ॒ ತಾಮೇ॒ವ [ ] ॥ 59 ॥
ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಕಲ್ಪೇ॑ರ॒ನ್ನಿತಿ॑ ಯಥಾದೇವ॒ತ-ಮ॑ವ॒ದಾಯ॑ ಯಥಾ ದೇವ॒ತಂ-ಯಁ॑ಜೇ-ದ್ಭಾಗ॒ಧೇಯೇ॑ನೈ॒ವೈನಾನ್॑ ಯಥಾಯ॒ಥ-ಙ್ಕ॑ಲ್ಪಯತಿ॒ ಕಲ್ಪ॑ನ್ತ ಏ॒ವೈನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ವೈಶ್ವದೇ॒ವ-ನ್ದ್ವಾದ॑ಶಕಪಾಲ॒-ಙ್ಗ್ರಾಮ॑ಕಾಮ॒ ಇನ್ದ್ರ॑-ಞ್ಚೈ॒ವ ವಿಶ್ವಾಗ್॑ಶ್ಚ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತ್ಯೈ॒ನ್ದ್ರಸ್ಯಾ॑-ಽವ॒ದಾಯ॑ ವೈಶ್ವದೇ॒ವಸ್ಯಾವ॑ ದ್ಯೇ॒-ದಥೈ॒ನ್ದ್ರಸ್ಯೋ॒- [-ದಥೈ॒ನ್ದ್ರಸ್ಯ॑, ಉ॒ಪರಿ॑ಷ್ಟಾ-] ॥ 60 ॥
-ಪರಿ॑ಷ್ಟಾ-ದಿನ್ದ್ರಿ॒ಯೇಣೈ॒ವಾಸ್ಮಾ॑ ಉಭ॒ಯತ॑-ಸ್ಸಜಾ॒ತಾ-ನ್ಪರಿ॑ ಗೃಹ್ಣಾತ್ಯುಪಾಧಾ॒ಯ್ಯ॑ ಪೂರ್ವಯಂ॒-ವಾಁಸೋ॒ ದಖ್ಷಿ॑ಣಾ ಸಜಾ॒ತಾನಾ॒ಮುಪ॑ಹಿತ್ಯೈ॒ ಪೃಶ್ಞಿ॑ಯೈ ದು॒ಗ್ಧೇ ಪ್ರೈಯ॑ಙ್ಗವ-ಞ್ಚ॒ರು-ನ್ನಿರ್ವ॑ಪೇನ್ಮ॒ರುದ್ಭ್ಯೋ॒ ಗ್ರಾಮ॑ಕಾಮಃ॒ ಪೃಶ್ಞಿ॑ಯೈ॒ ವೈ ಪಯ॑ಸೋ ಮ॒ರುತೋ॑ ಜಾ॒ತಾಃ ಪೃಶ್ಞಿ॑ಯೈ ಪ್ರಿ॒ಯಙ್ಗ॑ವೋ ಮಾರು॒ತಾಃ ಖಲು॒ ವೈ ದೇ॒ವತ॑ಯಾ ಸಜಾ॒ತಾ ಮ॒ರುತ॑ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತಿ ಪ್ರಿ॒ಯವ॑ತೀ ಯಾಜ್ಯಾನುವಾ॒ಕ್ಯೇ॑ [ಯಾಜ್ಯಾನುವಾ॒ಕ್ಯೇ᳚, ಭ॒ವ॒ತಃ॒ ಪ್ರಿ॒ಯಮೇ॒ವೈನಗ್ಂ॑] ॥ 61 ॥
ಭವತಃ ಪ್ರಿ॒ಯಮೇ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತಿ ದ್ವಿ॒ಪದಾ॑ ಪುರೋ-ಽನುವಾ॒ಕ್ಯಾ॑ ಭವತಿ ದ್ವಿ॒ಪದ॑ ಏ॒ವಾವ॑ ರುನ್ಧೇ॒ ಚತು॑ಷ್ಪದಾ ಯಾ॒ಜ್ಯಾ॑ ಚತು॑ಷ್ಪದ ಏ॒ವ ಪ॒ಶೂನವ॑ ರುನ್ಧೇ ದೇವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಮಿ॒ಥೋ ವಿಪ್ರಿ॑ಯಾ ಆಸ॒-ನ್ತೇ᳚(1॒) ಽನ್ಯೋ᳚-ಽನ್ಯಸ್ಮೈ॒ ಜ್ಯೈಷ್ಠ್ಯಾ॒ಯಾ-ತಿ॑ಷ್ಠಮಾನಾ-ಶ್ಚತು॒ರ್ಧಾ ವ್ಯ॑ಕ್ರಾಮ-ನ್ನ॒ಗ್ನಿ-ರ್ವಸು॑ಭಿ॒-ಸ್ಸೋಮೋ॑ ರು॒ದ್ರೈರಿನ್ದ್ರೋ॑ ಮ॒ರುದ್ಭಿ॒-ರ್ವರು॑ಣ ಆದಿ॒ತ್ಯೈ-ಸ್ಸ ಇನ್ದ್ರಃ॑ ಪ್ರ॒ಜಾಪ॑ತಿ॒-ಮುಪಾ॑-ಽಧಾವ॒-ತ್ತ- [-ಽಧಾವ॒-ತ್ತಮ್, ಏ॒ತಯಾ॑] ॥ 62 ॥
-ಮೇ॒ತಯಾ॑ ಸಂ॒(2)ಜ್ಞಾನ್ಯಾ॑-ಽಯಾಜಯ-ದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪ॒-ಥ್ಸೋಮಾ॑ಯ ರು॒ದ್ರವ॑ತೇ ಚ॒ರುಮಿನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒ -ಮೇಕಾ॑ದಶಕಪಾಲಂ॒-ವಁರು॑ಣಾಯಾ-ಽಽದಿ॒ತ್ಯವ॑ತೇ ಚ॒ರು-ನ್ತತೋ॒ ವಾ ಇನ್ದ್ರ॑-ನ್ದೇ॒ವಾ ಜ್ಯೈಷ್ಠ್ಯಾ॑ಯಾ॒ಭಿ ಸಮ॑ಜಾನತ॒ ಯ-ಸ್ಸ॑ಮಾ॒ನೈ-ರ್ಮಿ॒ಥೋ ವಿಪ್ರಿ॑ಯ॒-ಸ್ಸ್ಯಾ-ತ್ತಮೇ॒ತಯಾ॑ ಸಂ॒(2)ಜ್ಞಾನ್ಯಾ॑ ಯಾಜಯೇ-ದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸೋಮಾ॑ಯ ರು॒ದ್ರವ॑ತೇ ಚ॒ರು-ಮಿನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲಂ॒-ವಁರು॑ಣಾಯಾ ಽಽದಿ॒ತ್ಯವ॑ತೇ ಚ॒ರು-ಮಿನ್ದ್ರ॑-ಮೇ॒ವೈನ॑-ಮ್ಭೂ॒ತ-ಞ್ಜ್ಯೈಷ್ಠ್ಯಾ॑ಯ ಸಮಾ॒ನಾ ಅ॒ಭಿ ಸ-ಞ್ಜಾ॑ನತೇ॒ ವಸಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ ॥ 63 ॥
(ವಿಶ॑ಮೇ॒ವ – ತಿ॑ಷ್ಠನ್ತ್ಯೇ॒ತಾಮೇ॒ – ವಾಥೈ॒ನ್ದ್ರಸ್ಯ॑ – ಯಾಜ್ಯಾನುವಾ॒ಕ್ಯೇ॑ – ತಂ – ವಁರು॑ಣಾಯ॒ -ಚತು॑ರ್ದಶ ಚ) (ಅ. 11)
ಹಿ॒ರ॒ಣ್ಯ॒ಗ॒ರ್ಭ ಆಪೋ॑ ಹ॒ ಯತ್ಪ್ರಜಾ॑ಪತೇ ॥ ಸ ವೇ॑ದ ಪು॒ತ್ರಃ ಪಿ॒ತರ॒ಗ್ಂ॒ ಸ ಮಾ॒ತರ॒ಗ್ಂ॒ ಸ ಸೂ॒ನುಭ॑ರ್ವ॒-ಥ್ಸ ಭು॑ವ॒-ತ್ಪುನ॑ರ್ಮಘಃ । ಸ ದ್ಯಾಮೌರ್ಣೋ॑ದ॒ನ್ತರಿ॑ಖ್ಷ॒ಗ್ಂ॒ ಸ ಸುವ॒-ಸ್ಸ ವಿಶ್ವಾ॒ ಭುವೋ॑ ಅಭವ॒-ಥ್ಸ ಆ-ಽಭ॑ವತ್ ॥ ಉದು॒ ತ್ಯ-ಞ್ಚಿ॒ತ್ರಮ್ ॥ ಸ ಪ್ರ॑ತ್ನ॒ವನ್ನವೀ॑ಯ॒ಸಾ-ಽಗ್ನೇ᳚ ದ್ಯು॒ಮ್ನೇನ॑ ಸಂ॒ಯಁತಾ᳚ । ಬೃ॒ಹ-ತ್ತ॑ತನ್ಥ ಭಾ॒ನುನಾ᳚ ॥ ನಿ ಕಾವ್ಯಾ॑ ವೇ॒ಧಸ॒-ಶ್ಶಶ್ವ॑ತಸ್ಕ॒ರ್॒ಹಸ್ತೇ॒ ದಧಾ॑ನೋ॒ [ದಧಾ॑ನಃ, ನರ್ಯಾ॑ ಪು॒ರೂಣಿ॑ ।] ॥ 64 ॥
ನರ್ಯಾ॑ ಪು॒ರೂಣಿ॑ । ಅ॒ಗ್ನಿರ್ಭು॑ವದ್ರಯಿ॒ಪತೀ॑ ರಯೀ॒ಣಾಗ್ಂ ಸ॒ತ್ರಾ ಚ॑ಕ್ರಾ॒ಣೋ ಅ॒ಮೃತಾ॑ನಿ॒ ವಿಶ್ವಾ᳚ ॥ ಹಿರ॑ಣ್ಯಪಾಣಿಮೂ॒ತಯೇ॑ ಸವಿ॒ತಾರ॒ಮುಪ॑ ಹ್ವಯೇ । ಸ ಚೇತ್ತಾ॑ ದೇ॒ವತಾ॑ ಪ॒ದಮ್ ॥ ವಾ॒ಮಮ॒ದ್ಯ ಸ॑ವಿತರ್ವಾ॒ಮಮು॒ ಶ್ವೋ ದಿ॒ವೇದಿ॑ವೇ ವಾ॒ಮಮ॒ಸ್ಮಭ್ಯಗ್ಂ॑ ಸಾವೀಃ । ವಾ॒ಮಸ್ಯ॒ ಹಿ ಖ್ಷಯ॑ಸ್ಯ ದೇವ॒ ಭೂರೇ॑ರ॒ಯಾ ಧಿ॒ಯಾ ವಾ॑ಮ॒ಭಾಜ॑-ಸ್ಸ್ಯಾಮ ॥ ಬಡಿ॒ತ್ಥಾ ಪರ್ವ॑ತಾನಾ-ಙ್ಖಿ॒ದ್ರ-ಮ್ಬಿ॑ಭರ್ಷಿ ಪೃಥಿವಿ । ಪ್ರ ಯಾ ಭೂ॑ಮಿ ಪ್ರವತ್ವತಿ ಮ॒ಹ್ನಾ ಜಿ॒ನೋಷಿ॑ [ಜಿ॒ನೋಷಿ॑, ಮ॒ಹಿ॒ನಿ॒ ।] ॥ 65 ॥
ಮಹಿನಿ ॥ ಸ್ತೋಮಾ॑ಸಸ್ತ್ವಾ ವಿಚಾರಿಣಿ॒ ಪ್ರತಿ॑ಷ್ಟೋಭನ್ತ್ಯ॒ಕ್ತುಭಿಃ॑ । ಪ್ರಯಾ ವಾಜ॒-ನ್ನ ಹೇಷ॑ನ್ತ-ಮ್ಪೇ॒ರು-ಮಸ್ಯ॑ಸ್ಯರ್ಜುನಿ ॥ ಋ॒ದೂ॒ದರೇ॑ಣ॒ ಸಖ್ಯಾ॑ ಸಚೇಯ॒ ಯೋ ಮಾ॒ ನ ರಿಷ್ಯೇ᳚ದ್ಧರ್ಯಶ್ವ ಪೀ॒ತಃ । ಅ॒ಯಂ-ಯಁ-ಸ್ಸೋಮೋ॒ ನ್ಯಧಾ᳚ಯ್ಯ॒ಸ್ಮೇ ತಸ್ಮಾ॒ ಇನ್ದ್ರ॑-ಮ್ಪ್ರ॒ತಿರ॑-ಮೇ॒ಮ್ಯಚ್ಛ॑ ॥ ಆಪಾ᳚ನ್ತಮನ್ಯು-ಸ್ತೃ॒ಪಲ॑-ಪ್ರಭರ್ಮಾ॒ ಧುನಿ॒-ಶ್ಶಿಮೀ॑ ವಾ॒ಞ್ಛರು॑ಮಾಗ್ಂ ಋಜೀ॒ಷೀ । ಸೋಮೋ॒ ವಿಶ್ವಾ᳚ನ್ಯತ॒ಸಾ ವನಾ॑ನಿ॒ ನಾರ್ವಾಗಿನ್ದ್ರ॑-ಮ್ಪ್ರತಿ॒ಮಾನಾ॑ನಿ ದೇಭುಃ ॥ ಪ್ರ- [ಪ್ರ, ಸು॒ವಾ॒ನ-ಸ್ಸೋಮ॑] ॥ 66 ॥
-ಸು॑ವಾ॒ನ-ಸ್ಸೋಮ॑ ಋತ॒ಯು-ಶ್ಚಿ॑ಕೇ॒ತೇನ್ದ್ರಾ॑ಯ॒ ಬ್ರಹ್ಮ॑ ಜ॒ಮದ॑ಗ್ನಿ॒-ರರ್ಚನ್ನ್॑ । ವೃಷಾ॑ ಯ॒ನ್ತಾ-ಽಸಿ॒ ಶವ॑ಸ-ಸ್ತು॒ರಸ್ಯಾ॒-ಽನ್ತ-ರ್ಯ॑ಚ್ಛ ಗೃಣ॒ತೇ ಧ॒ರ್ತ್ರ-ನ್ದೃಗ್ಂ॑ಹ ॥ ಸ॒ಬಾಧ॑ಸ್ತೇ॒ ಮದ॑-ಞ್ಚ ಶುಷ್ಮ॒ಯ-ಞ್ಚ॒ ಬ್ರಹ್ಮ॒ ನರೋ᳚ ಬ್ರಹ್ಮ॒ಕೃತ॑-ಸ್ಸಪರ್ಯನ್ನ್ । ಅ॒ರ್ಕೋ ವಾ॒ ಯ-ತ್ತು॒ರತೇ॒ ಸೋಮ॑ಚಖ್ಷಾ॒-ಸ್ತತ್ರೇ-ದಿನ್ದ್ರೋ॑ ದಧತೇ ಪೃ॒ಥ್ಸು ತು॒ರ್ಯಾಮ್ ॥ ವಷ॑-ಟ್ತೇ ವಿಷ್ಣವಾ॒ಸ ಆ ಕೃ॑ಣೋಮಿ॒ ತನ್ಮೇ॑ ಜುಷಸ್ವ ಶಿಪಿವಿಷ್ಟ ಹ॒ವ್ಯಮ್ । ॥ 67 ॥
ವರ್ಧ॑ನ್ತು ತ್ವಾ ಸುಷ್ಟು॒ತಯೋ॒ ಗಿರೋ॑ ಮೇ ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ಪ್ರ ತ-ತ್ತೇ॑ ಅ॒ದ್ಯ ಶಿ॑ಪಿವಿಷ್ಟ॒ ನಾಮಾ॒-ಽರ್ಯ-ಶ್ಶಗ್ಂ॑ ಸಾಮಿ ವ॒ಯುನಾ॑ನಿ ವಿ॒ದ್ವಾನ್ । ತನ್ತ್ವಾ॑ ಗೃಣಾಮಿ ತ॒ವಸ॒-ಮತ॑ವೀಯಾ॒ನ್ ಖ್ಷಯ॑ನ್ತಮ॒ಸ್ಯ ರಜ॑ಸಃ ಪರಾ॒ಕೇ ॥ ಕಿಮಿ-ತ್ತೇ॑ ವಿಷ್ಣೋ ಪರಿ॒ಚಖ್ಷ್ಯ॑-ಮ್ಭೂ॒-ತ್ಪ್ರ ಯದ್ವ॑ವ॒ಖ್ಷೇ ಶಿ॑ಪಿವಿ॒ಷ್ಟೋ ಅ॑ಸ್ಮಿ । ಮಾ ವರ್ಪೋ॑ ಅ॒ಸ್ಮದಪ॑ ಗೂಹ ಏ॒ತದ್ಯ-ದ॒ನ್ಯರೂ॑ಪ-ಸ್ಸಮಿ॒ಥೇ ಬ॒ಭೂಥ॑ । ॥ 68 ॥
ಅಗ್ನೇ॒ ದಾ ದಾ॒ಶುಷೇ॑ ರ॒ಯಿಂ-ವೀಁ॒ರವ॑ನ್ತ॒-ಮ್ಪರೀ॑ಣಸಮ್ । ಶಿ॒ಶೀ॒ಹಿ ನ॑-ಸ್ಸೂನು॒ಮತಃ॑ ॥ ದಾ ನೋ॑ ಅಗ್ನೇ ಶ॒ತಿನೋ॒ ದಾ-ಸ್ಸ॑ಹ॒ಸ್ರಿಣೋ॑ ದು॒ರೋ ನ ವಾಜ॒ಗ್ಗ್॒ ಶ್ರುತ್ಯಾ॒ ಅಪಾ॑ ವೃಧಿ । ಪ್ರಾಚೀ॒ ದ್ಯಾವಾ॑ಪೃಥಿ॒ವೀ ಬ್ರಹ್ಮ॑ಣಾ ಕೃಧಿ॒ ಸುವ॒ರ್ಣ ಶು॒ಕ್ರಮು॒ಷಸೋ॒ ವಿ ದಿ॑ದ್ಯುತುಃ ॥ ಅ॒ಗ್ನಿರ್ದಾ॒ ದ್ರವಿ॑ಣಂ-ವೀಁ॒ರಪೇ॑ಶಾ ಅ॒ಗ್ನಿರ್-ಋಷಿಂ॒-ಯಁ-ಸ್ಸ॒ಹಸ್ರಾ॑ ಸ॒ನೋತಿ॑ । ಅ॒ಗ್ನಿರ್ದಿ॒ವಿ ಹ॒ವ್ಯಮಾ ತ॑ತಾನಾ॒-ಽಗ್ನೇ-ರ್ಧಾಮಾ॑ನಿ॒ ವಿಭೃ॑ತಾ ಪುರು॒ತ್ರಾ ॥ ಮಾ [ಮಾ, ನೋ॒ ಮ॒ರ್ಧೀ॒ ರಾ ತೂ ಭ॑ರ ।] ॥ 69 ॥
ನೋ॑ ಮರ್ಧೀ॒ ರಾ ತೂ ಭ॑ರ ॥ ಘೃ॒ತ-ನ್ನ ಪೂ॒ತ-ನ್ತ॒ನೂರ॑ರೇ॒ಪಾ-ಶ್ಶುಚಿ॒ ಹಿರ॑ಣ್ಯಮ್ । ತ-ತ್ತೇ॑ ರು॒ಕ್ಮೋ ನ ರೋ॑ಚತ ಸ್ವಧಾವಃ ॥ ಉ॒ಭೇ ಸು॑ಶ್ಚನ್ದ್ರ ಸ॒ರ್ಪಿಷೋ॒ ದರ್ವೀ᳚ ಶ್ರೀಣೀಷ ಆ॒ಸನಿ॑ । ಉ॒ತೋ ನ॒ ಉ-ತ್ಪು॑ಪೂರ್ಯಾ ಉ॒ಕ್ಥೇಷು॑ ಶವಸಸ್ಪತ॒ ಇಷಗ್ಗ್॑ ಸ್ತೋ॒ತೃಭ್ಯ॒ ಆ ಭ॑ರ ॥ ವಾಯೋ॑ ಶ॒ತಗ್ಂ ಹರೀ॑ಣಾಂ-ಯುಁ॒ವಸ್ವ॒ ಪೋಷ್ಯಾ॑ಣಾಮ್ । ಉ॒ತ ವಾ॑ ತೇ ಸಹ॒ಸ್ರಿಣೋ॒ ರಥ॒ ಆ ಯಾ॑ತು॒ ಪಾಜ॑ಸಾ ॥ ಪ್ರ ಯಾಭಿ॒- [ಪ್ರ ಯಾಭಿಃ, ಯಾಸಿ॑ ದಾ॒ಶ್ವಾಗ್ಂ ಸ॒ಮಚ್ಛಾ॑] ॥ 70 ॥
-ರ್ಯಾಸಿ॑ ದಾ॒ಶ್ವಾಗ್ಂ ಸ॒ಮಚ್ಛಾ॑ ನಿ॒ಯುದ್ಭಿ॑-ರ್ವಾಯವಿ॒ಷ್ಟಯೇ॑ ದುರೋ॒ಣೇ । ನಿ ನೋ॑ ರ॒ಯಿಗ್ಂ ಸು॒ಭೋಜ॑ಸಂ-ಯುಁವೇ॒ಹ ನಿ ವೀ॒ರವ॒-ದ್ಗವ್ಯ॒ಮಶ್ವಿ॑ಯ-ಞ್ಚ॒ ರಾಧಃ॑ ॥ರೇ॒ವತೀ᳚ರ್ನ-ಸ್ಸಧ॒ಮಾದ॒ ಇನ್ದ್ರೇ॑ ಸನ್ತು ತು॒ವಿವಾ॑ಜಾಃ । ಖ್ಷು॒ಮನ್ತೋ॒ ಯಾಭಿ॒ರ್ಮದೇ॑ಮ ॥ ರೇ॒ವಾಗ್ಂ ಇದ್ರೇ॒ವತ॑-ಸ್ಸ್ತೋ॒ತಾ ಸ್ಯಾ-ತ್ತ್ವಾವ॑ತೋ ಮ॒ಘೋನಃ॑ । ಪ್ರೇದು॑ ಹರಿವ-ಶ್ಶ್ರು॒ತಸ್ಯ॑ ॥ 71 ॥
(ದಧಾ॑ನೋ – ಜಿ॒ನೋಷಿ॑ – ದೇಭುಃ॒ ಪ್ರ – ಹ॒ವ್ಯಂ – ಬ॒ಭೂಥ॒ – ಮಾ – ಯಾಭಿ॑ – ಶ್ಚತ್ವಾರಿ॒ಗ್ಂ॒ಶಚ್ಚ॑ ) (ಅ. 12)
(ಪ್ರ॒ಜಾಪ॑ತಿ॒ಸ್ತಾ-ಸ್ಸೃ॒ಷ್ಟಾ – ಅ॒ಗ್ನಯೇ॑ ಪಥಿ॒ಕೃತೇ॒ – ಗ್ನಯೇ॒ ಕಾಮಾ॑ಯಾ॒ – ಗ್ನಯೇನ್ನ॑ವತೇ -ವೈಶ್ವಾನ॒ರ -ಮಾ॑ದಿ॒ತ್ಯ-ಞ್ಚ॒ರು – ಮೈ॒ನ್ದ್ರ-ಞ್ಚ॒ರು – ಮಿನ್ದ್ರಾ॒ಯಾನ್ವೃ॑ಜವ – ಆಗ್ನಾವೈಷ್ಣ॒ವ -ಮ॒ಸೌ ಸೋ॑ಮಾರೌ॒ದ್ರ – ಮೈ॒ನ್ದ್ರಮ॒ಕಾ॑ದಶಕಪಾಲಗ್ಂ- ಹಿರಣ್ಯಗ॒ರ್ಭೋ – ದ್ವಾದ॑ಶ )
(ಪ್ರ॒ಜಾಪ॑ತಿ – ರ॒ಗ್ನಯೇ॒ ಕಾಮಾ॑ಯಾ॒ – ಽಭಿ ಸ-ಮ್ಭ॑ವತೋ॒ – ಯೋ ವಿ॑ದ್ವಿಷಾ॒ಣಯೋ॑ -ರಿ॒ಧ್ಮೇ ಸನ್ನ॑ ಹ್ಯೇ – ದಾಗ್ನಾವೈಷ್ಣ॒ವಮು॒ – ಪರಿ॑ಷ್ಟಾ॒ – ದ್ಯಾಸಿ॑ ದಾ॒ಶ್ವಾಗ್ಂಸ॒ – ಮೇಕ॑ಸಪ್ತತಿಃ )
(ಪ್ರ॒ಜಾಪ॑ತಿಃ॒, ಪ್ರೇದು॑ ಹರಿವ-ಶ್ಶ್ರು॒ತಸ್ಯ॑)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ದ್ವಿತೀಯಃ ಪ್ರಶ್ನ-ಸ್ಸಮಾಪ್ತಃ ॥