ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ತೃತೀಯಃ ಪ್ರಶ್ನಃ – ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಆ॒ದಿ॒ತ್ಯೇಭ್ಯೋ॒ ಭುವ॑ದ್ವದ್ಭ್ಯಶ್ಚ॒ರು-ನ್ನಿರ್ವ॑ಪೇ॒-ದ್ಭೂತಿ॑ಕಾಮ ಆದಿ॒ತ್ಯಾ ವಾ ಏ॒ತ-ಮ್ಭೂತ್ಯೈ॒ ಪ್ರತಿ॑ ನುದನ್ತೇ॒ ಯೋ-ಽಲ॒-ಮ್ಭೂತ್ಯೈ॒ ಸ-ನ್ಭೂತಿ॒-ನ್ನ ಪ್ರಾ॒ಪ್ನೋತ್ಯಾ॑ದಿ॒ತ್ಯಾನೇ॒ವ ಭುವ॑ದ್ವತ॒-ಸ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವೈನ॒-ಮ್ಭೂತಿ॑-ಙ್ಗಮಯನ್ತಿ॒ ಭವ॑ತ್ಯೇ॒ವಾ ಽಽದಿ॒ತ್ಯೇಭ್ಯೋ॑ ಧಾ॒ರಯ॑ದ್ವ-ದ್ಭ್ಯಶ್ಚ॒ರು-ನ್ನಿರ್ವ॑ಪೇ॒-ದಪ॑ರುದ್ಧೋ ವಾ-ಽಪರು॒ದ್ಧ್ಯಮಾ॑ನೋ ವಾ-ಽಽದಿ॒ತ್ಯಾ ವಾ ಅ॑ಪರೋ॒ದ್ಧಾರ॑ ಆದಿ॒ತ್ಯಾ ಅ॑ವಗಮಯಿ॒ತಾರ॑ ಆದಿ॒ತ್ಯಾನೇ॒ವ ಧಾ॒ರಯ॑ದ್ವತ॒- [ಧಾ॒ರಯ॑ದ್ವತಃ, ಸ್ವೇನ॑] 1
-ಸ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವೈನಂ॑-ವಿಁ॒ಶಿ ದಾ᳚ದ್ಧ್ರತ್ಯನಪರು॒ದ್ಧ್ಯೋ ಭ॑ವ॒ತ್ಯದಿ॒ತೇ-ಽನು॑ ಮನ್ಯ॒ಸ್ವೇ-ತ್ಯ॑ಪರು॒ದ್ಧ್ಯಮಾ॑ನೋ-ಽಸ್ಯ ಪ॒ದಮಾ ದ॑ದೀತೇ॒ಯಂ-ವಾಁ ಅದಿ॑ತಿರಿ॒ಯಮೇ॒ವಾಸ್ಮೈ॑ ರಾ॒ಜ್ಯಮನು॑ ಮನ್ಯತೇ ಸ॒ತ್ಯಾ-ಽಽಶೀರಿತ್ಯಾ॑ಹ ಸ॒ತ್ಯಾಮೇ॒ವಾ-ಽಽಶಿಷ॑-ಙ್ಕುರುತ ಇ॒ಹ ಮನ॒ ಇತ್ಯಾ॑ಹ ಪ್ರ॒ಜಾ ಏ॒ವಾಸ್ಮೈ॒ ಸಮ॑ನಸಃ ಕರೋ॒ತ್ಯುಪ॒ ಪ್ರೇತ॑ ಮರುತ- [ಪ್ರೇತ॑ ಮರುತಃ, ಸು॒ದಾ॒ನ॒ವ॒ ಏ॒ನಾ] 2
-ಸ್ಸುದಾನವ ಏ॒ನಾ ವಿ॒ಶ್ಪತಿ॑ನಾ॒-ಽಭ್ಯ॑ಮುಗ್ಂ ರಾಜಾ॑ನ॒ಮಿತ್ಯಾ॑ಹ ಮಾರು॒ತೀ ವೈ ವಿ-ಡ್ಜ್ಯೇ॒ಷ್ಠೋ ವಿ॒ಶ್ಪತಿ॑-ರ್ವಿ॒ಶೈವೈನಗ್ಂ॑ ರಾ॒ಷ್ಟ್ರೇಣ॒ ಸಮ॑ರ್ಧಯತಿ॒ ಯಃ ಪ॒ರಸ್ತಾ᳚-ದ್ಗ್ರಾಮ್ಯವಾ॒ದೀ ಸ್ಯಾ-ತ್ತಸ್ಯ॑ ಗೃ॒ಹಾ-ದ್ವ್ರೀ॒ಹೀನಾ ಹ॑ರೇಚ್ಛು॒ಕ್ಲಾಗ್ಶ್ಚ॑ ಕೃ॒ಷ್ಣಾಗ್ಶ್ಚ॒ ವಿ ಚಿ॑ನುಯಾ॒ದ್ಯೇ ಶು॒ಕ್ಲಾ-ಸ್ಸ್ಯುಸ್ತಮಾ॑ದಿ॒ತ್ಯ-ಞ್ಚ॒ರು-ನ್ನಿರ್ವ॑ಪೇದಾದಿ॒ತ್ಯಾ ವೈ ದೇ॒ವತ॑ಯಾ॒ ವಿಡ್ವಿಶ॑ಮೇ॒ವಾ-ಽವ॑ ಗಚ್ಛ॒- [ಗಚ್ಛತಿ, ಅವ॑ಗತಾ-ಽಸ್ಯ॒] 3
-ತ್ಯವ॑ಗತಾ-ಽಸ್ಯ॒ ವಿಡನ॑ವಗತಗ್ಂ ರಾ॒ಷ್ಟ್ರ-ಮಿತ್ಯಾ॑ಹು॒ರ್ಯೇ ಕೃ॒ಷ್ಣಾ-ಸ್ಸ್ಯುಸ್ತಂ-ವಾಁ॑ರು॒ಣ-ಞ್ಚ॒ರು-ನ್ನಿರ್ವ॑ಪೇ-ದ್ವಾರು॒ಣಂ-ವೈಁ ರಾ॒ಷ್ಟ್ರಮು॒ಭೇ ಏ॒ವ ವಿಶ॑-ಞ್ಚ ರಾ॒ಷ್ಟ್ರ-ಞ್ಚಾವ॑ ಗಚ್ಛತಿ॒ ಯದಿ॒ ನಾವ॒ಗಚ್ಛೇ॑ದಿ॒ಮ-ಮ॒ಹಮಾ॑ದಿ॒ತ್ಯೇಭ್ಯೋ॑ ಭಾ॒ಗ-ನ್ನಿರ್ವ॑ಪಾ॒ಮ್ಯಾ ಽಮುಷ್ಮಾ॑-ದ॒ಮುಷ್ಯೈ॑ ವಿ॒ಶೋ-ಽವ॑ಗನ್ತೋ॒-ರಿತಿ॒ ನಿರ್ವ॑ಪೇ-ದಾದಿ॒ತ್ಯಾ ಏ॒ವೈನ॑-ಮ್ಭಾಗ॒ಧೇಯ॑-ಮ್ಪ್ರೇ॒ಫ್ಸನ್ತೋ॒ ವಿಶ॒ಮವ॑ [ವಿಶ॒ಮವ॑, ಗ॒ಮ॒ಯ॒ನ್ತಿ॒ ಯದಿ॒] 4
ಗಮಯನ್ತಿ॒ ಯದಿ॒ ನಾವ॒ಗಚ್ಛೇ॒ದಾಶ್ವ॑ತ್ಥಾ-ನ್ಮ॒ಯೂಖಾ᳚ನ್-ಥ್ಸ॒ಪ್ತ ಮ॑ದ್ಧ್ಯಮೇ॒ಷಾಯಾ॒ಮುಪ॑- ಹನ್ಯಾದಿ॒ದಮ॒ಹ-ಮಾ॑ದಿ॒ತ್ಯಾ-ನ್ಬ॑ಧ್ನಾ॒ಮ್ಯಾ ಽಮುಷ್ಮಾ॑ದ॒ಮುಷ್ಯೈ॑ ವಿ॒ಶೋ-ಽವ॑ಗನ್ತೋ॒ರಿತ್ಯಾ॑ದಿ॒ತ್ಯಾ ಏ॒ವೈನ॑-ಮ್ಬ॒ದ್ಧವೀ॑ರಾ॒ ವಿಶ॒ಮವ॑ ಗಮಯನ್ತಿ॒ ಯದಿ॒ ನಾ-ಽವ॒ಗಚ್ಛೇ॑-ದೇ॒ತ-ಮೇ॒ವಾ-ಽಽದಿ॒ತ್ಯ-ಞ್ಚ॒ರು-ನ್ನಿರ್ವ॑ಪೇ-ದಿ॒ದ್ಧ್ಮೇ-ಽಪಿ॑ ಮ॒ಯೂಖಾ॒ನ್-ಥ್ಸ-ನ್ನ॑ಹ್ಯೇ-ದನಪರು॒ದ್ಧ್ಯ-ಮೇ॒ವಾವ॑ ಗಚ್ಛ॒ತ್ಯಾಶ್ವ॑ತ್ಥಾ ಭವನ್ತಿಮ॒ರುತಾಂ॒-ವಾಁ ಏ॒ತ -ದೋಜೋ॒ ಯದ॑ಶ್ವ॒ತ್ಥ ಓಜ॑ಸೈ॒ವ ವಿಶ॒ಮವ॑ ಗಚ್ಛತಿ ಸ॒ಪ್ತ ಭ॑ವನ್ತಿ ಸ॒ಪ್ತ ಗ॑ಣಾ॒ ವೈ ಮ॒ರುತೋ॑ ಗಣ॒ಶ ಏ॒ವ ವಿಶ॒ಮವ॑ ಗಚ್ಛತಿ । 5
(ಧಾ॒ರಯ॑ದ್ವತೋ – ಮರುತೋ – ಗಚ್ಛತಿ॒ – ವಿಶ॒ಮವೈ॒ – ತ – ದ॒ಷ್ಟಾದ॑ಶ ಚ) (ಅ. 1)
ದೇ॒ವಾ ವೈ ಮೃ॒ತ್ಯೋ-ರ॑ಬಿಭಯು॒ಸ್ತೇ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ನ್ತೇಭ್ಯ॑ ಏ॒ತಾ-ಮ್ಪ್ರಾ॑ಜಾಪ॒ತ್ಯಾಗ್ಂ ಶ॒ತಕೃ॑ಷ್ಣಲಾ॒-ನ್ನಿರ॑ವಪ॒-ತ್ತಯೈ॒ವೈಷ್ವ॒ಮೃತ॑-ಮದಧಾ॒ದ್ಯೋ ಮೃ॒ತ್ಯೋ-ರ್ಬಿ॑ಭೀ॒ಯಾ-ತ್ತಸ್ಮಾ॑ ಏ॒ತಾ-ಮ್ಪ್ರಾ॑ಜಾಪ॒ತ್ಯಾಗ್ಂ ಶ॒ತಕೃ॑ಷ್ಣಲಾ॒-ನ್ನಿರ್ವ॑ಪೇ-ತ್ಪ್ರ॒ಜಾಪ॑ತಿ-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॒-ನ್ನಾಯು॑-ರ್ದಧಾತಿ॒ ಸರ್ವ॒ಮಾಯು॑ರೇತಿ ಶ॒ತಕೃ॑ಷ್ಣಲಾ ಭವತಿ ಶ॒ತಾಯುಃ॒ ಪುರು॑ಷ॒-ಶ್ಶ॒ತೇನ್ದ್ರಿ॑ಯ॒ ಆಯು॑ಷ್ಯೇ॒ವೇನ್ದ್ರಿ॒ಯೇ [ ] 6
ಪ್ರತಿ॑ ತಿಷ್ಠತಿ ಘೃ॒ತೇ ಭ॑ವ॒ತ್ಯಾಯು॒ರ್ವೈ ಘೃ॒ತ-ಮ॒ಮೃತ॒ಗ್ಂ॒ ಹಿರ॑ಣ್ಯ॒-ಮಾಯು॑ಶ್ಚೈ॒ವಾಸ್ಮಾ॑ ಅ॒ಮೃತ॑-ಞ್ಚ ಸ॒ಮೀಚೀ॑ ದಧಾತಿ ಚ॒ತ್ವಾರಿ॑ ಚತ್ವಾರಿ ಕೃ॒ಷ್ಣಲಾ॒ನ್ಯವ॑ ದ್ಯತಿ ಚತುರವ॒-ತ್ತಸ್ಯಾ-ಽಽಪ್ತ್ಯಾ॑ ಏಕ॒ಧಾ ಬ್ರ॒ಹ್ಮಣ॒ ಉಪ॑ ಹರತ್ಯೇಕ॒ಧೈವ ಯಜ॑ಮಾನ॒ ಆಯು॑ರ್ದಧಾತ್ಯ॒- ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿ-ಮೈಚ್ಛ॒-ನ್ತಸ್ಮಾ॑ ಏ॒ತಗ್ಂ ಸೌ॒ರ್ಯ-ಞ್ಚ॒ರು-ನ್ನಿರ॑ವಪ॒-ನ್ತೇನೈ॒ವಾ-ಽಸ್ಮಿ॒- [-ತೇನೈ॒ವಾ-ಽಸ್ಮಿನ್ನ್॑, ರುಚ॑-ಮದಧು॒ರ್ಯೋ] 7
-ನ್ರುಚ॑-ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಗ್ಂ ಸೌ॒ರ್ಯ-ಞ್ಚ॒ರು-ನ್ನಿರ್ವ॑ಪೇ-ದ॒ಮು-ಮೇ॒ವಾ-ಽಽದಿ॒ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತ್ಯುಭ॒ಯತೋ॑ ರು॒ಕ್ಮೌ ಭ॑ವತ ಉಭ॒ಯತ॑ ಏ॒ವಾಸ್ಮಿ॒-ನ್ರುಚ॑-ನ್ದಧಾತಿ ಪ್ರಯಾ॒ಜೇ ಪ್ರ॑ಯಾಜೇ ಕೃ॒ಷ್ಣಲ॑-ಞ್ಜುಹೋತಿ ದಿ॒ಗ್ಭ್ಯ ಏ॒ವಾಸ್ಮೈ᳚ ಬ್ರಹ್ಮವರ್ಚ॒ಸಮವ॑ ರುನ್ಧ ಆಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ಥ್ಸಾವಿ॒ತ್ರ-ನ್ದ್ವಾದ॑ಶಕಪಾಲ॒-ಮ್ಭೂಮ್ಯೈ॑ [-ಭೂಮ್ಯೈ᳚, ಚ॒ರುಂ-ಯಃ ಁಕಾ॒ಮಯೇ॑ತ॒] 8
ಚ॒ರುಂ-ಯಃ ಁಕಾ॒ಮಯೇ॑ತ॒ ಹಿರ॑ಣ್ಯಂ-ವಿಁನ್ದೇಯ॒ ಹಿರ॑ಣ್ಯ॒-ಮ್ಮೋಪ॑ ನಮೇ॒ದಿತಿ॒ ಯದಾ᳚ಗ್ನೇ॒ಯೋ ಭವ॑ತ್ಯಾಗ್ನೇ॒ಯಂ-ವೈಁ ಹಿರ॑ಣ್ಯಂ॒-ಯಁಸ್ಯೈ॒ವ ಹಿರ॑ಣ್ಯ॒-ನ್ತೇನೈ॒ವೈನ॑-ದ್ವಿನ್ದತೇ ಸಾವಿ॒ತ್ರೋ ಭ॑ವತಿ ಸವಿ॒ತೃಪ್ರ॑ಸೂತ ಏ॒ವೈನ॑-ದ್ವಿನ್ದತೇ॒ ಭೂಮ್ಯೈ॑ ಚ॒ರುರ್ಭ॑ವತ್ಯ॒ಸ್ಯಾಮೇ॒ವೈನ॑-ದ್ವಿನ್ದತ॒ ಉಪೈ॑ನ॒ಗ್ಂ॒ ಹಿರ॑ಣ್ಯ-ನ್ನಮತಿ॒ ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ॒ ಯೋ ಹಿರ॑ಣ್ಯಂ-ವಿಁ॒ನ್ದತ॑ ಏ॒ತಾ- [ಏ॒ತಾಮ್, ಏ॒ವ] 9
-ಮೇ॒ವ ನಿರ್ವ॑ಪೇ॒ದ್ಧಿರ॑ಣ್ಯಂ-ವಿಁ॒ತ್ತ್ವಾ ನೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ॒ ವ್ಯೃ॑ದ್ಧ್ಯತ ಏ॒ತಾಮೇ॒ವ ನಿರ್ವ॑ಪೇ॒ದ್ಯಸ್ಯ॒ ಹಿರ॑ಣ್ಯ॒-ನ್ನಶ್ಯೇ॒ದ್ಯದಾ᳚ಗ್ನೇ॒ಯೋ ಭವ॑ತ್ಯಾಗ್ನೇ॒ಯಂ-ವೈಁ ಹಿರ॑ಣ್ಯಂ॒-ಯಁಸ್ಯೈ॒ ವ ಹಿರ॑ಣ್ಯ॒-ನ್ತೇನೈ॒ವೈನ॑-ದ್ವಿನ್ದತಿ ಸಾವಿ॒ತ್ರೋ ಭ॑ವತಿ ಸವಿ॒ತೃ-ಪ್ರ॑ಸೂತ ಏ॒ವೈನ॑-ದ್ವಿನ್ದತಿ॒ ಭೂಮ್ಯೈ॑ ಚ॒ರುರ್ಭ॑ವತ್ಯ॒ಸ್ಯಾಂ-ವಾಁ ಏ॒ತನ್ನ॑ಶ್ಯತಿ॒ ಯನ್ನಶ್ಯ॑ತ್ಯ॒ಸ್ಯಾಮೇ॒ವೈನ॑-ದ್ವಿನ್ದ॒ತೀನ್ದ್ರ॒- [ದ್ವಿನ್ದ॒ತೀನ್ದ್ರಃ॑, ತ್ವಷ್ಟು॒-ಸ್ಸೋಮ॑] 10
-ಸ್ತ್ವಷ್ಟು॒-ಸ್ಸೋಮ॑-ಮಭೀ॒ಷಹಾ॑-ಽ ಪಿಬ॒-ಥ್ಸ ವಿಷ್ವಂ॒-ವ್ಯಾಁ᳚ರ್ಚ್ಛ॒-ಥ್ಸ ಇ॑ನ್ದ್ರಿ॒ಯೇಣ॑ ಸೋಮಪೀ॒ಥೇನ॒ ವ್ಯಾ᳚ರ್ಧ್ಯತ॒ ಸ ಯದೂ॒ರ್ಧ್ವಮು॒ದವ॑ಮೀ॒-ತ್ತೇ ಶ್ಯಾ॒ಮಾಕಾ॑ ಅಭವ॒ನ್ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ॒-ತ್ತಸ್ಮಾ॑ ಏ॒ತಗ್ಂ ಸೋ॑ಮೇ॒ನ್ದ್ರಗ್ಗ್ ಶ್ಯಾ॑ಮಾ॒ಕ-ಞ್ಚ॒ರು-ನ್ನಿರ॑ವಪ॒-ತ್ತೇನೈ॒ವಾಸ್ಮಿ॑ನ್ನಿನ್ದ್ರಿ॒ಯಗ್ಂ ಸೋ॑ಮಪೀ॒ಥಮ॑ದಧಾ॒ದ್ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ಸೋಮ॒ಪೀಥೇನ॑ರ್ಧ್ಯತೇ॒ ಯ-ಸ್ಸೋಮಂ॒-ವಁಮಿ॑ತಿ॒ ಯ-ಸ್ಸೋ॑ಮವಾ॒ಮೀ ಸ್ಯಾ-ತ್ತಸ್ಮಾ॑ [ಸ್ಯಾ-ತ್ತಸ್ಮೈ᳚, ಏ॒ತಗ್ಂ] 11
ಏ॒ತಗ್ಂ ಸೋ॑ಮೇ॒ನ್ದ್ರಗ್ಗ್ ಶ್ಯಾ॑ಮಾ॒ಕ-ಞ್ಚ॒ರು-ನ್ನಿರ್ವ॑ಪೇ॒-ಥ್ಸೋಮ॑-ಞ್ಚೈ॒ವೇನ್ದ್ರ॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑ನ್ನಿನ್ದ್ರಿ॒ಯಗ್ಂ ಸೋ॑ಮಪೀ॒ಥ-ನ್ಧ॑ತ್ತೋ॒ ನೇನ್ದ್ರಿ॒ಯೇಣ॑ ಸೋಮಪೀ॒ಥೇನ॒ ವ್ಯೃ॑ದ್ಧ್ಯತೇ॒ ಯ-ಥ್ಸೌ॒ಮ್ಯೋ ಭವ॑ತಿ ಸೋಮಪೀ॒ಥಮೇ॒ವಾವ॑ ರುನ್ಧೇ॒ ಯದೈ॒ನ್ದ್ರೋ ಭವ॑ತೀನ್ದ್ರಿ॒ಯಂ-ವೈಁ ಸೋ॑ಮಪೀ॒ಥ ಇ॑ನ್ದ್ರಿ॒ಯಮೇ॒ವ ಸೋ॑ಮಪೀ॒ಥಮವ॑ ರುನ್ಧೇ ಶ್ಯಾಮಾ॒ಕೋ ಭ॑ವತ್ಯೇ॒ಷ ವಾವ ಸ ಸೋಮ॑- [ಸ ಸೋಮಃ॑, ಸಾ॒ಖ್ಷಾದೇ॒ವ] 12
-ಸ್ಸಾ॒ಖ್ಷಾದೇ॒ವ ಸೋ॑ಮಪೀ॒ಥಮವ॑ ರುನ್ಧೇ॒ ಽಗ್ನಯೇ॑ ದಾ॒ತ್ರೇ ಪು॑ರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದಿನ್ದ್ರಾ॑ಯ ಪ್ರದಾ॒ತ್ರೇ ಪು॑ರೋ॒ಡಾಶ॒ಮೇಕಾ॑ದಶಕಪಾಲ-ಮ್ಪ॒ಶುಕಾ॑ಮೋ॒-ಽಗ್ನಿರೇ॒ವಾಸ್ಮೈ॑ ಪ॒ಶೂ-ನ್ಪ್ರ॑ಜ॒ನಯ॑ತಿ ವೃ॒ದ್ಧಾನಿನ್ದ್ರಃ॒ ಪ್ರ ಯ॑ಚ್ಛತಿ॒ ದಧಿ॒ ಮಧು॑ ಘೃ॒ತಮಾಪೋ॑ ಧಾ॒ನಾ ಭ॑ವನ್ತ್ಯೇ॒ತದ್ವೈ ಪ॑ಶೂ॒ನಾಗ್ಂ ರೂ॒ಪಗ್ಂ ರೂ॒ಪೇಣೈ॒ವ ಪ॒ಶೂನವ॑ ರುನ್ಧೇ ಪಞ್ಚ-ಗೃಹೀ॒ತ-ಮ್ಭ॑ವತಿ॒ ಪಾಙ್ಕ್ತಾ॒ ಹಿ ಪ॒ಶವೋ॑ ಬಹು ರೂ॒ಪ-ಮ್ಭ॑ವತಿ ಬಹು ರೂ॒ಪಾ ಹಿ ಪ॒ಶವ॒- [ಪ॒ಶವಃ॑, ಸಮೃ॑ದ್ಧ್ಯೈ] 13
-ಸ್ಸಮೃ॑ದ್ಧ್ಯೈ ಪ್ರಾಜಾಪ॒ತ್ಯ-ಮ್ಭ॑ವತಿ ಪ್ರಾಜಾಪ॒ತ್ಯಾ ವೈ ಪ॒ಶವಃ॑ ಪ್ರ॒ಜಾಪ॑ತಿರೇ॒ವಾಸ್ಮೈ॑ ಪ॒ಶೂ-ನ್ಪ್ರಜ॑ನಯತ್ಯಾ॒ತ್ಮಾ ವೈ ಪುರು॑ಷಸ್ಯ॒ ಮಧು॒ ಯನ್ಮದ್ಧ್ವ॒ಗ್ನೌ ಜು॒ಹೋತ್ಯಾ॒ತ್ಮಾನ॑ಮೇ॒ವ ತ-ದ್ಯಜ॑ಮಾನೋ॒-ಽಗ್ನೌ ಪ್ರದ॑ಧಾತಿ ಪ॒ಙ್ಕ್ತ್ಯೌ॑ ಯಾಜ್ಯಾನುವಾ॒ಕ್ಯೇ॑ ಭವತಃ॒ ಪಾಙ್ಕ್ತಃ॒ ಪುರು॑ಷಃ॒ ಪಾಙ್ಕ್ತಾಃ᳚ ಪ॒ಶವ॑ ಆ॒ತ್ಮಾನ॑ಮೇ॒ವ ಮೃ॒ತ್ಯೋರ್ನಿ॒ಷ್ಕ್ರೀಯ॑ಪ॒ಶೂನವ॑ ರುನ್ಧೇ ॥ 14 ॥
(ಇ॒ನ್ದ್ರಿ॒ಯೇ᳚ – ಽಸ್ಮಿ॒ನ್ – ಭೂಮ್ಯಾ॑ – ಏ॒ತಾ – ಮಿನ್ದ್ರಃ॒ – ಸ್ಯಾ-ತ್ತಸ್ಮೈ॒ – ಸೋಮೋ॑ – ಬಹು ರೂ॒ಪಾ ಹಿ ಪ॒ಶವ॒ – ಏಕ॑ಚತ್ವಾರಿಗ್ಂಶಚ್ಚ ) (ಅ. 2)
ದೇ॒ವಾ ವೈ ಸ॒ತ್ರಮಾ॑ಸ॒ತ-ರ್ಧಿ॑ಪರಿಮಿತಂ॒-ಯಁಶ॑ಸ್ಕಾಮಾ॒ಸ್ತೇಷಾ॒ಗ್ಂ॒ ಸೋಮ॒ಗ್ಂ॒ ರಾಜಾ॑ನಂ॒-ಯಁಶ॑ ಆರ್ಚ್ಛ॒-ಥ್ಸ ಗಿ॒ರಿಮುದೈ॒-ತ್ತಮ॒ಗ್ನಿರನೂದೈ॒-ತ್ತಾವ॒ಗ್ನೀಷೋಮೌ॒ ಸಮ॑ಭವತಾ॒-ನ್ತಾವಿನ್ದ್ರೋ॑ ಯ॒ಜ್ಞವಿ॑ಭ್ರ॒ಷ್ಟೋ-ಽನು॒ ಪರೈ॒-ತ್ತಾವ॑ಬ್ರವೀದ್ಯಾ॒ಜಯ॑ತ॒-ಮ್ಮೇತಿ॒ ತಸ್ಮಾ॑ ಏ॒ತಾಮಿಷ್ಟಿ॒-ನ್ನಿರ॑ವಪತಾಮಾಗ್ನೇ॒ಯ-ಮ॒ಷ್ಟಾಕ॑ಪಾಲಮೈ॒ನ್ದ್ರ-ಮೇಕಾ॑ದಶಕಪಾಲಗ್ಂ ಸೌ॒ಮ್ಯ-ಞ್ಚ॒ರು-ನ್ತಯೈ॒ವಾ-ಽಸ್ಮಿ॒-ನ್ತೇಜ॑ [ತಯೈ॒ವಾ-ಽಸ್ಮಿ॒-ನ್ತೇಜಃ॑, ಇ॒ನ್ದ್ರಿ॒ಯ-ಮ್ಬ್ರ॑ಹ್ಮವರ್ಚ॒ಸ-] 15
ಇನ್ದ್ರಿ॒ಯ-ಮ್ಬ್ರ॑ಹ್ಮವರ್ಚ॒ಸ-ಮ॑ಧತ್ತಾಂ॒-ಯೋಁ ಯ॒ಜ್ಞವಿ॑ಭ್ರಷ್ಟ॒-ಸ್ಸ್ಯಾ-ತ್ತಸ್ಮಾ॑ ಏ॒ತಾಮಿಷ್ಟಿ॒-ನ್ನಿರ್ವ॑ಪೇದಾಗ್ನೇ॒ಯ-ಮ॒ಷ್ಟಾಕ॑ಪಾಲಮೈ॒ನ್ದ್ರ-ಮೇಕಾ॑ದಶಕಪಾಲಗ್ಂ ಸೌ॒ಮ್ಯ-ಞ್ಚ॒ರುಂ-ಯಁದಾ᳚ಗ್ನೇ॒ಯೋ ಭವ॑ತಿ॒ ತೇಜ॑ ಏ॒ವಾಸ್ಮಿ॒-ನ್ತೇನ॑ ದಧಾತಿ॒ ಯದೈ॒ನ್ದ್ರೋ ಭವ॑ತೀನ್ದ್ರಿ॒ಯಮೇ॒ವಾಸ್ಮಿ॒-ನ್ತೇನ॑ ದಧಾತಿ॒ ಯ-ಥ್ಸೌ॒ಮ್ಯೋ ಬ್ರ॑ಹ್ಮವರ್ಚ॒ಸ-ನ್ತೇನಾ᳚ ಽಽಗ್ನೇ॒ಯಸ್ಯ॑ ಚ ಸೌ॒ಮ್ಯಸ್ಯ॑ ಚೈ॒ನ್ದ್ರೇ ಸ॒ಮಾಶ್ಲೇ॑ಷಯೇ॒-ತ್ತೇಜ॑ಶ್ಚೈ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ಞ್ಚ॑ ಸ॒ಮೀಚೀ॑ [ಸ॒ಮೀಚೀ᳚, ದ॒ಧಾ॒ತ್ಯ॒ಗ್ನೀ॒ಷೋ॒ಮೀಯ॒-] 16
ದಧಾತ್ಯಗ್ನೀಷೋ॒ಮೀಯ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯ-ಙ್ಕಾಮೋ॒ ನೋಪ॒ನಮೇ॑ದಾಗ್ನೇ॒ಯೋ ವೈ ಬ್ರಾ᳚ಹ್ಮ॒ಣ-ಸ್ಸ ಸೋಮ॑-ಮ್ಪಿಬತಿ॒ ಸ್ವಾಮೇ॒ವ ದೇ॒ವತಾ॒ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೈವೈನ॒-ಙ್ಕಾಮೇ॑ನ॒ ಸಮ॑ರ್ಧಯ॒ತ್ಯುಪೈ॑ನ॒-ಙ್ಕಾಮೋ॑ ನಮತ್ಯಗ್ನೀಷೋ॒ಮೀಯ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ಬ್ರಹ್ಮವರ್ಚ॒ಸಕಾ॑ಮೋ॒-ಽಗ್ನೀಷೋಮಾ॑ ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ಧ॑ತ್ತೋ ಬ್ರಹ್ಮವರ್ಚ॒ಸ್ಯೇ॑ವ [ಬ್ರಹ್ಮವರ್ಚ॒ಸ್ಯೇ॑ವ, ಭ॒ವ॒ತಿ॒ ಯದ॒ಷ್ಟಾಕ॑ಪಾಲ॒-] 17
ಭ॑ವತಿ॒ ಯದ॒ಷ್ಟಾಕ॑ಪಾಲ॒-ಸ್ತೇನಾ᳚-ಽಽಗ್ನೇ॒ಯೋ ಯಚ್ಛ್ಯಾ॑ಮಾ॒ಕಸ್ತೇನ॑ ಸೌ॒ಮ್ಯ-ಸ್ಸಮೃ॑ದ್ಧ್ಯೈ॒ ಸೋಮಾ॑ಯ ವಾ॒ಜಿನೇ᳚ ಶ್ಯಾಮಾ॒ಕ-ಞ್ಚ॒ರು-ನ್ನಿರ್ವ॑ಪೇ॒ದ್ಯಃ ಕ್ಲೈಬ್ಯಾ᳚ದ್ಬಿಭೀ॒ಯಾ-ದ್ರೇತೋ॒ ಹಿ ವಾ ಏ॒ತಸ್ಮಾ॒-ದ್ವಾಜಿ॑ನಮಪ॒ಕ್ರಾಮ॒ತ್ಯಥೈ॒ಷ ಕ್ಲೈಬ್ಯಾ᳚ದ್ಬಿಭಾಯ॒ ಸೋಮ॑ಮೇ॒ವ ವಾ॒ಜಿನ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॒-ನ್ರೇತೋ॒ ವಾಜಿ॑ನ-ನ್ದಧಾತಿ॒ ನ ಕ್ಲೀ॒ಬೋ ಭ॑ವತಿಬ್ರಾಹ್ಮಣಸ್ಪ॒ತ್ಯ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದ್ಗ್ರಾಮ॑ಕಾಮೋ॒ [-ನಿರ್ವ॑ಪೇ॒-ದ್ಗ್ರಾಮ॑ಕಾಮಃ, ಬ್ರಹ್ಮ॑ಣ॒ಸ್ಪತಿ॑ಮೇ॒ವ] 18
ಬ್ರಹ್ಮ॑ಣ॒ಸ್ಪತಿ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರ ಯ॑ಚ್ಛತಿ ಗ್ರಾ॒ಮ್ಯೇ॑ವ ಭ॑ವತಿ ಗ॒ಣವ॑ತೀ ಯಾಜ್ಯಾನುವಾ॒ಕ್ಯೇ॑ ಭವತ-ಸ್ಸಜಾ॒ತೈರೇ॒ವೈನ॑-ಙ್ಗ॒ಣವ॑ನ್ತ-ಙ್ಕರೋತ್ಯೇ॒ತಾಮೇ॒ವ ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಬ್ರಹ್ಮ॒ನ್ ವಿಶಂ॒-ವಿಁ ನಾ॑ಶಯೇಯ॒ಮಿತಿ॑ ಮಾರು॒ತೀ ಯಾ᳚ಜ್ಯಾನುವಾ॒ಕ್ಯೇ॑ ಕುರ್ಯಾ॒-ದ್ಬ್ರಹ್ಮ॑ನ್ನೇ॒ವ ವಿಶಂ॒-ವಿಁ ನಾ॑ಶಯತಿ ॥ 19
(ತೇಜಃ॑ – ಸ॒ಮೀಚೀ᳚ – ಬ್ರಹ್ಮವರ್ಚ॒ಸ್ಯೇ॑ವ – ಗ್ರಾಮ॑ಕಾಮ॒ – ಸ್ತ್ರಿಚ॑ತ್ವಾರಿಗ್ಂಶಚ್ಚ ) (ಅ. 3)
ಅ॒ರ್ಯ॒ಮ್ಣೇ ಚ॒ರು-ನ್ನಿರ್ವ॑ಪ-ಥ್ಸುವ॒ರ್ಗಕಾ॑ಮೋ॒-ಽಸೌ ವಾ ಆ॑ದಿ॒ತ್ಯೋ᳚-ಽರ್ಯ॒ಮಾ-ಽರ್ಯ॒ಮಣ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಗ್ಂ॑ ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತ್ಯರ್ಯ॒ಮ್ಣೇ ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ದಾನ॑ಕಾಮಾ ಮೇ ಪ್ರ॒ಜಾ-ಸ್ಸ್ಯು॒ರಿತ್ಯ॒ಸೌ ವಾ ಆ॑ದಿ॒ತ್ಯೋ᳚-ಽರ್ಯ॒ಮಾ ಯಃ ಖಲು॒ ವೈ ದದಾ॑ತಿ॒ ಸೋ᳚-ಽರ್ಯ॒ಮಾ-ಽರ್ಯ॒ಮಣ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ- [ಸ ಏ॒ವ, ಅ॒ಸ್ಮೈ॒ ದಾನ॑ಕಾಮಾಃ] 20
-ಽಸ್ಮೈ॒ ದಾನ॑ಕಾಮಾಃ ಪ್ರ॒ಜಾಃ ಕ॑ರೋತಿ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವನ್ತ್ಯರ್ಯ॒ಮ್ಣೇ ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ ಸ್ವ॒ಸ್ತಿ ಜ॒ನತಾ॑ಮಿಯಾ॒ಮಿತ್ಯ॒ಸೌ ವಾ ಆ॑ದಿ॒ತ್ಯೋ᳚-ಽರ್ಯ॒ಮಾ- ಽರ್ಯ॒ಮಣ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ನ್ತ-ದ್ಗ॑ಮಯತಿ॒ ಯತ್ರ॒ ಜಿಗ॑ಮಿಷ॒ತೀನ್ದ್ರೋ॒ ವೈ ದೇ॒ವಾನಾ॑ಮಾನುಜಾವ॒ರ ಆ॑ಸೀ॒-ಥ್ಸ ಪ್ರ॒ಜಾಪ॑ತಿ॒ -ಮುಪಾ॑ಧಾವ॒-ತ್ತಸ್ಮಾ॑ ಏ॒ತಮೈ॒ನ್ದ್ರಮಾ॑ನುಷೂ॒ಕ-ಮೇಕಾ॑ದಶಕಪಾಲ॒-ನ್ನಿ- [-ಮೇಕಾ॑ದಶಕಪಾಲ॒-ನ್ನಿಃ, ಅ॒ವ॒ಪ॒-ತ್ತೇನೈ॒ವೈನ॒ಮಗ್ರಂ॑-] 21
-ರ॑ವಪ॒-ತ್ತೇನೈ॒ವೈನ॒-ಮಗ್ರ॑-ನ್ದೇ॒ವತಾ॑ನಾ॒-ಮ್ಪರ್ಯ॑ಣಯ-ದ್ಬು॒ದ್ಧ್ನವ॑ತೀ॒ ಅಗ್ರ॑ವತೀ ಯಾಜ್ಯಾನುವಾ॒ಕ್ಯೇ॑ ಅಕರೋ-ದ್ಬು॒ದ್ಧ್ನಾ-ದೇ॒ವೈನ॒ಮಗ್ರ॒-ಮ್ಪರ್ಯ॑ಣಯ॒ದ್ಯೋ ರಾ॑ಜ॒ನ್ಯ॑ ಆನುಜಾವ॒ರ-ಸ್ಸ್ಯಾ-ತ್ತಸ್ಮಾ॑ ಏ॒ತಮೈ॒ನ್ದ್ರ-ಮಾ॑ನುಷೂ॒ಕ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಿನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮಗ್ರಗ್ಂ॑ ಸಮಾ॒ನಾನಾ॒-ಮ್ಪರಿ॑ಣಯತಿ ಬು॒ದ್ಧ್ನವ॑ತೀ॒ ಅಗ್ರ॑ವತೀ ಯಾಜ್ಯಾನುವಾ॒ಕ್ಯೇ॑ ಭವತೋ ಬು॒ದ್ಧ್ನಾ-ದೇ॒ವೈನ॒-ಮಗ್ರಂ॒- [ಬು॒ದ್ಧ್ನಾ-ದೇ॒ವೈನ॒-ಮಗ್ರ᳚ಮ್, ಪರಿ॑] 22
-ಪರಿ॑ ಣಯತ್ಯಾನುಷೂ॒ಕೋ ಭ॑ವತ್ಯೇ॒ಷಾ ಹ್ಯೇ॑ತಸ್ಯ॑ ದೇ॒ವತಾ॒ ಯ ಆ॑ನುಜಾವ॒ರ-ಸ್ಸಮೃ॑ದ್ಧ್ಯೈ॒ ಯೋ ಬ್ರಾ᳚ಹ್ಮ॒ಣ ಆ॑ನುಜಾವ॒ರ-ಸ್ಸ್ಯಾ-ತ್ತಸ್ಮಾ॑ ಏ॒ತ-ಮ್ಬಾ॑ರ್ಹಸ್ಪ॒ತ್ಯ-ಮಾ॑ನುಷೂ॒ಕ-ಞ್ಚ॒ರು-ನ್ನಿರ್ವ॑ಪೇ॒-ದ್ಬೃಹ॒ಸ್ಪತಿ॑-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಮಗ್ರಗ್ಂ॑ ಸಮಾ॒ನಾನಾ॒-ಮ್ಪರಿ॑ಣಯತಿ ಬು॒ದ್ಧ್ನವ॑ತೀ॒ ಅಗ್ರ॑ವತೀ ಯಾಜ್ಯಾನುವಾ॒ಕ್ಯೇ॑ ಭವತೋ ಬು॒ದ್ಧ್ನಾ-ದೇ॒ವೈನ॒-ಮಗ್ರ॒-ಮ್ಪರಿ॑ ಣಯತ್ಯಾನುಷೂ॒ಕೋ ಭ॑ವತ್ಯೇ॒ಷಾ ಹ್ಯೇ॑ತಸ್ಯ॑ ದೇ॒ವತಾ॒ ಯ ಆ॑ನುಜಾವ॒ರ-ಸ್ಸಮೃ॑ದ್ಧ್ಯೈ ॥ 23 ॥
(ಏ॒ವ – ನಿರ – ಗ್ರ॑-ಮೇ॒ತಸ್ಯ॑ – ಚ॒ತ್ವಾರಿ॑ ಚ) (ಅ. 4)
ಪ್ರ॒ಜಾಪ॑ತೇ॒-ಸ್ತ್ರಯ॑ಸ್ತ್ರಿಗ್ಂಶ-ದ್ದುಹಿ॒ತರ॑ ಆಸ॒-ನ್ತಾ-ಸ್ಸೋಮಾ॑ಯ॒ ರಾಜ್ಞೇ॑-ಽದದಾ॒-ತ್ತಾಸಾಗ್ಂ॑ ರೋಹಿ॒ಣೀಮುಪೈ॒-ತ್ತಾ ಈರ್ಷ್ಯ॑ನ್ತೀಃ॒ ಪುನ॑ರಗಚ್ಛ॒-ನ್ತಾ ಅನ್ವೈ॒-ತ್ತಾಃ ಪುನ॑ರಯಾಚತ॒ ತಾ ಅ॑ಸ್ಮೈ॒ ನ ಪುನ॑ರದದಾ॒-ಥ್ಸೋ᳚-ಽಬ್ರವೀ-ದೃ॒ತ-ಮ॑ಮೀಷ್ವ॒ ಯಥಾ॑ ಸಮಾವ॒ಚ್ಛ ಉ॑ಪೈ॒ಷ್ಯಾಮ್ಯಥ॑ ತೇ॒ ಪುನ॑-ರ್ದಾಸ್ಯಾ॒ಮೀತಿ॒ ಸ ಋ॒ತಮಾ॑ಮೀ॒-ತ್ತಾ ಅ॑ಸ್ಮೈ॒ ಪುನ॑ರದದಾ॒-ತ್ತಾಸಾಗ್ಂ॑ ರೋಹಿ॒ಣೀಮೇ॒ವೋಪ॒- [ರೋಹಿ॒ಣೀಮೇ॒ವೋಪ॑, ಐ॒ತ್ತಂ-ಯಁಖ್ಷ್ಮ॑] 24
-ತ್ತಂ-ಯಁಖ್ಷ್ಮ॑ ಆರ್ಚ್ಛ॒-ದ್ರಾಜಾ॑ನಂ॒-ಯಁಖ್ಷ್ಮ॑ ಆರ॒ದಿತಿ॒ ತದ್ರಾ॑ಜಯ॒ಖ್ಷ್ಮಸ್ಯ॒ ಜನ್ಮ॒ ಯ-ತ್ಪಾಪೀ॑ಯಾ॒ನಭ॑ವ॒-ತ್ತ-ತ್ಪಾ॑ಪಯ॒ಖ್ಷ್ಮಸ್ಯ॒ ಯಜ್ಜಾ॒ಯಾಭ್ಯೋ-ಽವಿ॑ನ್ದ॒-ತ್ತಜ್ಜಾ॒ಯೇನ್ಯ॑ಸ್ಯ॒ಯ ಏ॒ವಮೇ॒ತೇಷಾಂ॒-ಯಁಖ್ಷ್ಮಾ॑ಣಾ॒-ಞ್ಜನ್ಮ॒ ವೇದ॒ ನೈನ॑ಮೇ॒ತೇ ಯಖ್ಷ್ಮಾ॑ ವಿನ್ದನ್ತಿ॒ಸ ಏ॒ತಾ ಏ॒ವ ನ॑ಮ॒ಸ್ಯ-ನ್ನುಪಾ॑-ಽಧಾವ॒-ತ್ತಾ ಅ॑ಬ್ರುವ॒ನ್. ವರಂ॑-ವೃಁಣಾಮಹೈ ಸಮಾವ॒ಚ್ಛ ಏ॒ವ ನ॒ ಉಪಾ॑ಯ॒ ಇತಿ॒ ತಸ್ಮಾ॑ ಏ॒ತ- [ತಸ್ಮಾ॑ ಏ॒ತಮ್, ಆ॑ದಿ॒ತ್ಯ-ಞ್ಚ॒ರುಂ] 25
-ಮಾ॑ದಿ॒ತ್ಯ-ಞ್ಚ॒ರು-ನ್ನಿರ॑ವಪ॒-ನ್ತೇನೈ॒ವೈನ॑-ಮ್ಪಾ॒ಪಾ-ಥ್ಸ್ರಾಮಾ॑ದಮುಞ್ಚ॒ನ್. ಯಃ ಪಾ॑ಪಯ॒ಖ್ಷ್ಮಗೃ॑ಹೀತ॒-ಸ್ಸ್ಯಾ-ತ್ತಸ್ಮಾ॑ ಏ॒ತಮಾ॑ದಿ॒ತ್ಯ-ಞ್ಚ॒ರು-ನ್ನಿರ್ವ॑ಪೇದಾದಿ॒ತ್ಯಾನೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವೈನ॑-ಮ್ಪಾ॒ಪಾ-ಥ್ಸ್ರಾಮಾ᳚ನ್ಮುಞ್ಚನ್ತ್ಯ-ಮಾವಾ॒ಸ್ಯಾ॑ಯಾ॒-ನ್ನಿರ್ವ॑ಪೇ-ದ॒ಮುಮೇ॒ವೈನ-॑ಮಾ॒ಪ್ಯಾಯ॑ಮಾನ॒-ಮನ್ವಾ ಪ್ಯಾ॑ಯಯತಿ॒ ನವೋ॑ನವೋ ಭವತಿ॒ ಜಾಯ॑ಮಾನ॒ ಇತಿ॑ ಪುರೋ-ಽನುವಾ॒ಕ್ಯಾ॑ ಭವ॒ತ್ಯಾಯು॑ರೇ॒ವಾಸ್ಮಿ॒-ನ್ತಯಾ॑ ದಧಾತಿ॒ ಯಮಾ॑ದಿ॒ತ್ಯಾ ಅ॒ಗ್ಂ॒ಶುಮಾ᳚ಪ್ಯಾ॒ಯಯ॒ನ್ತೀತಿ॑ ಯಾ॒ಜ್ಯೈವೈನ॑ಮೇ॒ತಯಾ᳚ ಪ್ಯಾಯಯತಿ ॥ 26 ॥
(ಏ॒ವೋಪೈ॒ -ತ- ಮ॑ಸ್ಮಿ॒ನ್ – ತ್ರಯೋ॑ದಶಚ) (ಅ. 5)
ಪ್ರ॒ಜಾಪ॑ತಿ ರ್ದೇ॒ವೇಭ್ಯೋ॒-ಽನ್ನಾದ್ಯಂ॒-ವ್ಯಾಁದಿ॑ಶ॒-ಥ್ಸೋ᳚-ಽಬ್ರವೀ॒ದ್ಯದಿ॒ಮಾ-ಲ್ಲೋಁ॒ಕಾ-ನ॒ಭ್ಯ॑ತಿ॒ರಿಚ್ಯಾ॑ತೈ॒ ತನ್ಮಮಾ॑ಸ॒ದಿತಿ॒ ತದಿ॒ಮಾ-ಲ್ಲೋಁ॒ಕಾ-ನ॒ಭ್ಯತ್ಯ॑ರಿಚ್ಯ॒ತೇನ್ದ್ರ॒ಗ್ಂ॒ ರಾಜಾ॑ನ॒-ಮಿನ್ದ್ರ॑-ಮಧಿರಾ॒ಜ-ಮಿನ್ದ್ರಗ್ಗ್॑ ಸ್ವ॒ರಾಜಾ॑ನ॒-ನ್ತತೋ॒ ವೈ ಸ ಇ॒ಮಾ-ಲ್ಲೋಁ॒ಕಾಗ್ ಸ್ತ್ರೇ॒ಧಾ-ಽದು॑ಹ॒-ತ್ತ-ತ್ತ್ರಿ॒ಧಾತೋ᳚-ಸ್ತ್ರಿಧಾತು॒ತ್ವಂ-ಯಁ-ಙ್ಕಾ॒ಮಯೇ॑ತಾನ್ನಾ॒ದ-ಸ್ಸ್ಯಾ॒ದಿತಿ॒ ತಸ್ಮಾ॑ ಏ॒ತ-ನ್ತ್ರಿ॒ಧಾತು॒-ನ್ನಿರ್ವ॑ಪೇ॒ದಿನ್ದ್ರಾ॑ಯ॒ ರಾಜ್ಞೇ॑ ಪುರೋ॒ಡಾಶ॒- [ಪುರೋ॒ಡಾಶ᳚ಮ್, ಏಕಾ॑ದಶಕಪಾಲ॒-] 27
-ಮೇಕಾ॑ದಶಕಪಾಲ॒-ಮಿನ್ದ್ರಾ॑ಯಾ-ಧಿರಾ॒ಜಾಯೇನ್ದ್ರಾ॑ಯ ಸ್ವ॒ರಾಜ್ಞೇ॒-ಽಯಂ-ವಾಁ ಇನ್ದ್ರೋ॒ ರಾಜಾ॒-ಽಯಮಿನ್ದ್ರೋ॑-ಽಧಿರಾ॒ಜೋ॑-ಽಸಾವಿನ್ದ್ರ॑-ಸ್ಸ್ವ॒ರಾಡಿ॒ಮಾನೇ॒ವ ಲೋ॒ಕಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛನ್ತ್ಯನ್ನಾ॒ದ ಏ॒ವ ಭ॑ವತಿ॒ ಯಥಾ॑ ವ॒ಥ್ಸೇನ॒ ಪ್ರತ್ತಾ॒-ಙ್ಗಾ-ನ್ದು॒ಹ ಏ॒ವಮೇ॒ವೇಮಾ-ಲ್ಲೋಁ॒ಕಾ-ನ್ಪ್ರತ್ತಾ॒ನ್ ಕಾಮ॑ಮ॒ನ್ನಾದ್ಯ॑-ನ್ದುಹ ಉತ್ತಾ॒ನೇಷು॑ ಕ॒ಪಾಲೇ॒ಷ್ವಧಿ॑ ಶ್ರಯ॒ತ್ಯಯಾ॑ತಯಾಮತ್ವಾಯ॒ ತ್ರಯಃ॑ ಪುರೋ॒ಡಾಶಾ॑ ಭವನ್ತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯಾ॒ ಉತ್ತ॑ರಉತ್ತರೋ॒ ಜ್ಯಾಯಾ᳚-ನ್ಭವತ್ಯೇ॒ವಮಿ॑ವ॒ ಹೀಮೇ ಲೋ॒ಕಾ-ಸ್ಸಮೃ॑ದ್ಧ್ಯೈ॒ ಸರ್ವೇ॑ಷಾಮಭಿ-ಗ॒ಮಯ॒ನ್ನವ॑ ದ್ಯ॒ತ್ಯಛ॑ಮ್ಬಟ್ಕಾರಂ-ವ್ಯಁ॒ತ್ಯಾಸ॒ಮನ್ವಾ॒ಹಾನಿ॑ರ್ದಾಹಾಯ ॥ 28 ॥
(ಪು॒ರೋ॒ಡಾಶಂ॒ – ತ್ರಯಃ॒ – ಷಡ್ವಿಗ್ಂ॑ಶತಿಶ್ಚ) (ಅ. 6)
ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತಾ-ನ್ದೇ॒ವಾನಸು॑ರಾ ಅಜಯ॒-ನ್ತೇ ದೇ॒ವಾಃ ಪ॑ರಾಜಿಗ್ಯಾ॒ನಾ ಅಸು॑ರಾಣಾಂ॒-ವೈಁಶ್ಯ॒ಮುಪಾ॑-ಽಽಯ॒-ನ್ತೇಭ್ಯ॑ ಇನ್ದ್ರಿ॒ಯಂ-ವೀಁ॒ರ್ಯ॑ಮಪಾ᳚ಕ್ರಾಮ॒-ತ್ತದಿನ್ದ್ರೋ॑-ಽಚಾಯ॒-ತ್ತದನ್ವಪಾ᳚ಕ್ರಾಮ॒-ತ್ತದ॑ವ॒ರುಧ॒-ನ್ನಾಶ॑ಕ್ನೋ॒-ತ್ತದ॑ಸ್ಮಾದಭ್ಯ॒ರ್ಧೋ॑ ಽಚರ॒-ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ॒-ತ್ತಮೇ॒ತಯಾ॒ ಸರ್ವ॑ಪೃಷ್ಠಯಾ-ಽಯಾಜಯ॒-ತ್ತಯೈ॒ವಾ-ಽಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ಮದಧಾ॒ದ್ಯ ಇ॑ನ್ದ್ರಿ॒ಯಕಾ॑ಮೋ [ಇ॑ನ್ದ್ರಿ॒ಯಕಾ॑ಮಃ, ವೀ॒ರ್ಯ॑ಕಾಮ॒-ಸ್ಸ್ಯಾತ್-] 29
ವೀ॒ರ್ಯ॑ಕಾಮ॒-ಸ್ಸ್ಯಾ-ತ್ತಮೇ॒ತಯಾ॒ ಸರ್ವ॑ಪೃಷ್ಠಯಾ ಯಾಜಯೇದೇ॒ತಾ ಏ॒ವ ದೇ॒ವತಾ॒-ಸ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾ ಏ॒ವಾಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ನ್ದಧತಿ॒ಯದಿನ್ದ್ರಾ॑ಯ॒ ರಾಥ॑ನ್ತರಾಯ ನಿ॒ರ್ವಪ॑ತಿ॒ ಯದೇ॒ವಾಗ್ನೇ-ಸ್ತೇಜ॒ಸ್ತದೇ॒ವಾವ॑ ರುನ್ಧೇ॒ಯದಿನ್ದ್ರಾ॑ಯ॒ ಬಾರ್ಹ॑ತಾಯ॒ ಯದೇ॒ವೇನ್ದ್ರ॑ಸ್ಯ॒ ತೇಜ॒ಸ್ತದೇ॒ವಾವ॑ ರುನ್ಧೇ॒ ಯದಿನ್ದ್ರಾ॑ಯ ವೈರೂ॒ಪಾಯ॒ ಯದೇ॒ವ ಸ॑ವಿ॒ತು-ಸ್ತೇಜ॒ಸ್ತ- [ಸ॑ವಿ॒ತು-ಸ್ತೇಜ॒ಸ್ತತ್, ಏ॒ವಾವ॑ ರುನ್ಧೇ॒] 30
-ದೇ॒ವಾವ॑ ರುನ್ಧೇ॒ ಯದಿನ್ದ್ರಾ॑ಯ ವೈರಾ॒ಜಾಯ॒ ಯದೇ॒ವ ಧಾ॒ತು-ಸ್ತೇಜ॒ಸ್ತ-ದೇ॒ವಾವ॑ ರುನ್ಧೇ॒ ಯದಿನ್ದ್ರಾ॑ಯ ಶಾಕ್ವ॒ರಾಯ॒ ಯದೇ॒ವ ಮ॒ರುತಾ॒-ನ್ತೇಜ॒ಸ್ತ-ದೇ॒ವಾವ॑ ರುನ್ಧೇ॒ ಯದಿನ್ದ್ರಾ॑ಯ ರೈವ॒ತಾಯ॒ ಯದೇ॒ವ ಬೃಹ॒ಸ್ಪತೇ॒-ಸ್ತೇಜ॒ಸ್ತ-ದೇ॒ವಾ-ಽವ॑ ರುನ್ಧ ಏ॒ತಾವ॑ನ್ತಿ॒ ವೈ ತೇಜಾಗ್ಂ॑ಸಿ॒ ತಾನ್ಯೇ॒ವಾವ॑ ರುನ್ಧ ಉತ್ತಾ॒ನೇಷು॑ ಕ॒ಪಾಲೇ॒ಷ್ವಧಿ॑ ಶ್ರಯ॒ತ್ಯಯಾ॑ತಯಾಮತ್ವಾಯ॒ ದ್ವಾದ॑ಶಕಪಾಲಃ ಪುರೋ॒ಡಾಶೋ॑ [ಪುರೋ॒ಡಾಶಃ॑, ಭ॒ವ॒ತಿ॒ ವೈ॒ಶ್ವ॒ದೇ॒ವ॒ತ್ವಾಯ॑] 31
ಭವತಿ ವೈಶ್ವದೇವ॒ತ್ವಾಯ॑ ಸಮ॒ನ್ತ-ಮ್ಪ॒ರ್ಯವ॑ದ್ಯತಿ ಸಮ॒ನ್ತ-ಮೇ॒ವೇನ್ದ್ರಿ॒ಯಂ-ವೀಁ॒ರ್ಯಂ॑-ಯಁಜ॑ಮಾನೇ ದಧಾತಿ ವ್ಯ॒ತ್ಯಾಸ॒-ಮನ್ವಾ॒ಹಾನಿ॑ರ್ದಾಹಾ॒ಯಾಶ್ವ॑ ಋಷ॒ಭೋ ವೃ॒ಷ್ಣಿರ್ಬ॒ಸ್ತ-ಸ್ಸಾ-ದಖ್ಷಿ॑ಣಾ-ವೃಷ॒ತ್ವಾಯೈ॒ತಯೈ॒ವ ಯ॑ಜೇತಾ-ಽಭಿಶ॒ಸ್ಯಮಾ॑ನ ಏ॒ತಾಶ್ಚೇದ್ವಾ ಅ॑ಸ್ಯದೇ॒ವತಾ॒ ಅನ್ನ॑-ಮ॒ದನ್ತ್ಯ॒ದನ್ತ್ಯು॑-ವೇ॒ವಾ-ಽಸ್ಯ॑ ಮನು॒ಷ್ಯಾಃ᳚ ॥ 32 ॥
(ಇ॒ನ್ದ್ರಿ॒ಯ॒ಕಾ॑ಮಃ-ಸವಿ॒ತುಸ್ತೇಜ॒ಸ್ತತ್ – ಪು॑ರೋ॒ಡಾಶೋ॒ -ಽಷ್ಟಾತ್ರಿಗ್ಂ॑ಶಚ್ಚ) (ಅ. 7)
ರಜ॑ನೋ॒ ವೈ ಕೌ॑ಣೇ॒ಯಃ ಕ್ರ॑ತು॒ಜಿತ॒-ಞ್ಜಾನ॑ಕಿ-ಞ್ಚಖ್ಷು॒ರ್ವನ್ಯ॑ಮಯಾ॒-ತ್ತಸ್ಮಾ॑ ಏ॒ತಾಮಿಷ್ಟಿ॒-ನ್ನಿರ॑ವಪ-ದ॒ಗ್ನಯೇ॒ ಭ್ರಾಜ॑ಸ್ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲಗ್ಂ ಸೌ॒ರ್ಯ-ಞ್ಚ॒ರುಮ॒ಗ್ನಯೇ॒ ಭ್ರಾಜ॑ಸ್ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ತಯೈ॒ವಾಸ್ಮಿ॒ನ್ ಚಖ್ಷು॑ರದಧಾ॒-ದ್ಯ-ಶ್ಚಖ್ಷು॑ಕಾಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಾಮಿಷ್ಟಿ॒-ನ್ನಿರ್ವ॑ಪೇ-ದ॒ಗ್ನಯೇ॒ ಭ್ರಾಜ॑ಸ್ವತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲಗ್ಂ ಸೌ॒ರ್ಯ-ಞ್ಚ॒ರುಮ॒ಗ್ನಯೇ॒ ಭ್ರಾಜ॑ಸ್ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲಮ॒ಗ್ನೇ ರ್ವೈ ಚಖ್ಷು॑ಷಾ ಮನು॒ಷ್ಯಾ॑ ವಿ- [ಚಖ್ಷು॑ಷಾ ಮನು॒ಷ್ಯಾ॑ ವಿ, ಪ॒ಶ್ಯ॒ನ್ತಿ॒ ಸೂರ್ಯ॑ಸ್ಯ] 33
ಪ॑ಶ್ಯನ್ತಿ॒ ಸೂರ್ಯ॑ಸ್ಯ ದೇ॒ವಾ ಅ॒ಗ್ನಿ-ಞ್ಚೈ॒ವ ಸೂರ್ಯ॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॒ನ್ ಚಖ್ಷು॑-ರ್ಧತ್ತ॒-ಶ್ಚಖ್ಷು॑ಷ್ಮಾ-ನೇ॒ವ ಭ॑ವತಿ॒ ಯದಾ᳚ಗ್ನೇ॒ಯೌ ಭವ॑ತ॒-ಶ್ಚಖ್ಷು॑ಷೀ ಏ॒ವಾಸ್ಮಿ॒-ನ್ತ-ತ್ಪ್ರತಿ॑ ದಧಾತಿ॒ ಯ-ಥ್ಸೌ॒ರ್ಯೋ ನಾಸಿ॑ಕಾ॒-ನ್ತೇನಾ॒ಭಿತ॑-ಸ್ಸೌ॒ರ್ಯಮಾ᳚ಗ್ನೇ॒ಯೌ ಭ॑ವತ॒-ಸ್ತಸ್ಮಾ॑-ದ॒ಭಿತೋ॒ ನಾಸಿ॑ಕಾ॒-ಞ್ಚಖ್ಷು॑ಷೀ॒ ತಸ್ಮಾ॒-ನ್ನಾಸಿ॑ಕಯಾ॒ ಚಖ್ಷು॑ಷೀ॒ ವಿಧೃ॑ತೇ ಸಮಾ॒ನೀ ಯಾ᳚ಜ್ಯಾನುವಾ॒ಕ್ಯೇ॑ ಭವತ-ಸ್ಸಮಾ॒ನಗ್ಂ ಹಿ ಚಖ್ಷು॒-ಸ್ಸಮೃ॑ದ್ಧ್ಯಾ॒ ಉದು॒ತ್ಯ-ಞ್ಜಾ॒ತವೇ॑ದಸಗ್ಂ ಸ॒ಪ್ತ ತ್ವಾ॑ ಹ॒ರಿತೋ॒ ರಥೇ॑ ಚಿ॒ತ್ರ-ನ್ದೇ॒ವಾನಾ॒ಮುದ॑ಗಾ॒ದನೀ॑ಕ॒ಮಿತಿ॒ ಪಿಣ್ಡಾ॒-ನ್ಪ್ರಯ॑ಚ್ಛತಿ॒ ಚಖ್ಷು॑-ರೇ॒ವಾಸ್ಮೈ॒ ಪ್ರಯ॑ಚ್ಛತಿ॒ ಯದೇ॒ವ ತಸ್ಯ॒ ತತ್ ॥ 34 ॥
(ವಿ – ಹ್ಯ॑ – ಷ್ಟಾವಿಗ್ಂ॑ಶತಿಶ್ಚ) (ಅ. 8)
ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒-ನ್ಧೀರ॒ಶ್ಚೇತ್ತಾ॑ ವಸು॒ವಿ-ದ್ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ-ಮು॒ಗ್ರಶ್ಚೇತ್ತಾ॑ ವಸು॒ವಿ-ದ್ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ-ಮಭಿ॒ಭೂಶ್ಚೇತ್ತಾ॑ ವಸು॒ವಿ-ದಾಮ॑ನ-ಮ॒ಸ್ಯಾಮ॑ನಸ್ಯ ದೇವಾ॒ ಯೇ ಸ॑ಜಾ॒ತಾಃ ಕು॑ಮಾ॒ರಾ-ಸ್ಸಮ॑ನಸ॒ಸ್ತಾನ॒ಹ-ಙ್ಕಾ॑ಮಯೇ ಹೃ॒ದಾ ತೇ ಮಾ-ಙ್ಕಾ॑ಮಯನ್ತಾಗ್ಂ ಹೃ॒ದಾ ತಾ-ನ್ಮ॒ ಆಮ॑ನಸಃ ಕೃಧಿ॒ ಸ್ವಾಹಾ ಽಽಮ॑ನಮ॒- [ಸ್ವಾಹಾ ಽಽಮ॑ನಮ॒ಸಿ, ಆಮ॑ನಸ್ಯ] 35
-ಸ್ಯಾಮ॑ನಸ್ಯ ದೇವಾ॒ ಯಾ-ಸ್ಸ್ತ್ರಿಯ॒-ಸ್ಸಮ॑ನಸ॒ಸ್ತಾ ಅ॒ಹ-ಙ್ಕಾ॑ಮಯೇ ಹೃ॒ದಾ ತಾ ಮಾ-ಙ್ಕಾ॑ಮಯನ್ತಾಗ್ಂ ಹೃ॒ದಾ ತಾ ಮ॒ ಆಮ॑ನಸಃ ಕೃಧಿ॒ ಸ್ವಾಹಾ॑ ವೈಶ್ವದೇ॒ವೀಗ್ಂ-ಸಾ᳚ಙ್ಗ್ರಹ॒ಣೀ-ನ್ನಿರ್ವ॑ಪೇ॒ದ್ಗ್ರಾಮ॑ಕಾಮೋ ವೈಶ್ವದೇ॒ವಾ ವೈ ಸ॑ಜಾ॒ತಾ ವಿಶ್ವಾ॑ನೇ॒ವ ದೇ॒ವಾನ್ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರ ಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತಿ ಸಾಙ್ಗ್ರಹ॒ಣೀ ಭ॑ವತಿ ಮನೋ॒ಗ್ರಹ॑ಣಂ॒-ವೈಁಸ॒ಗ್ರಂಹ॑ಣ॒-ಮ್ಮನ॑ ಏ॒ವ ಸ॑ಜಾ॒ತಾನಾಂ᳚- [ಏ॒ವ ಸ॑ಜಾ॒ತಾನಾ᳚ಮ್, ಗೃ॒ಹ್ಣಾ॒ತಿ॒ ಧ್ರು॒ವೋ॑-ಽಸಿ] 36
-ಗೃಹ್ಣಾತಿ ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒ಮಿತಿ॑ ಪರಿ॒ಧೀ-ನ್ಪರಿ॑ ದಧಾತ್ಯಾ॒ಶಿಷ॑ಮೇ॒ವೈತಾಮಾ ಶಾ॒ಸ್ತೇ-ಽಥೋ॑ ಏ॒ತದೇ॒ವ ಸರ್ವಗ್ಂ॑ ಸಜಾ॒ತೇಷ್ವಧಿ॑ ಭವತಿ॒ ಯಸ್ಯೈ॒ವಂ-ವಿಁ॒ದುಷ॑ ಏ॒ತೇ ಪ॑ರಿ॒ಧಯಃ॑ ಪರಿಧೀ॒ಯನ್ತ॒ ಆಮ॑ ನಮ॒ಸ್ಯಾಮ॑ನಸ್ಯ ದೇವಾ॒ ಇತಿ॑ ತಿ॒ಸ್ರ ಆಹು॑ತೀ ರ್ಜುಹೋತ್ಯೇ॒ತಾವ॑ನ್ತೋ॒ ವೈ ಸ॑ಜಾ॒ತಾ ಯೇ ಮ॒ಹಾನ್ತೋ॒ ಯೇ ಖ್ಷು॑ಲ್ಲ॒ಕಾ ಯಾ-ಸ್ಸ್ತ್ರಿಯ॒ಸ್ತಾನೇ॒ವಾವ॑ ರುನ್ಧೇ॒ ತ ಏ॑ನ॒ಮವ॑ರುದ್ಧಾ॒ ಉಪ॑ ತಿಷ್ಠನ್ತೇ ॥ 37 ॥
(ಸ್ವಾಹಾ ಽಽಮ॑ನಮಸಿ – ಸಜಾ॒ತಾನಾಗ್ಂ॑ – ರುನ್ಧೇ॒ – ಪಞ್ಚ॑ ಚ ) (ಅ. 9)
ಯನ್ನವ॒-ಮೈತ್ತ-ನ್ನವ॑ನೀತ-ಮಭವ॒ದ್ಯ-ದಸ॑ರ್ಪ॒-ತ್ತ-ಥ್ಸ॒ರ್ಪಿರ॑ಭವ॒-ದ್ಯದದ್ಧಿ॑ಯತ॒ ತ-ದ್ಘೃ॒ತಮ॑ಭವದ॒ಶ್ವಿನೋಃ᳚ ಪ್ರಾ॒ಣೋ॑-ಽಸಿ॒ ತಸ್ಯ॑ ತೇ ದತ್ತಾಂ॒-ಯಁಯೋಃ᳚ ಪ್ರಾ॒ಣೋ-ಽಸಿ॒ ಸ್ವಾಹೇನ್ದ್ರ॑ಸ್ಯ ಪ್ರಾ॒ಣೋ॑-ಽಸಿ॒ ತಸ್ಯ॑ ತೇ ದದಾತು॒ ಯಸ್ಯ॑ ಪ್ರಾ॒ಣೋ-ಽಸಿ॒ ಸ್ವಾಹಾ॑ ಮಿ॒ತ್ರಾವರು॑ಣಯೋಃ ಪ್ರಾ॒ಣೋ॑-ಽಸಿ॒ ತಸ್ಯ॑ ತೇ ದತ್ತಾಂ॒-ಯಁಯೋಃ᳚ ಪ್ರಾ॒ಣೋ-ಽಸಿ॒ ಸ್ವಾಹಾ॒ ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಪ್ರಾ॒ಣೋ॑-ಽಸಿ॒ [ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಪ್ರಾ॒ಣೋ॑-ಽಸಿ॒, ತಸ್ಯ॑ ತೇ] 38
ತಸ್ಯ॑ ತೇ ದದತು॒ ಯೇಷಾ᳚-ಮ್ಪ್ರಾ॒ಣೋ-ಽಸಿ॒ ಸ್ವಾಹಾ॑ ಘೃ॒ತಸ್ಯ॒ ಧಾರಾ॑ಮ॒ಮೃತ॑ಸ್ಯ॒ ಪನ್ಥಾ॒ಮಿನ್ದ್ರೇ॑ಣ ದ॒ತ್ತಾ-ಮ್ಪ್ರಯ॑ತಾ-ಮ್ಮ॒ರುದ್ಭಿಃ॑ । ತ-ತ್ತ್ವಾ॒ ವಿಷ್ಣುಃ॒ ಪರ್ಯ॑ಪಶ್ಯ॒-ತ್ತ-ತ್ತ್ವೇಡಾ॒ ಗವ್ಯೈರ॑ಯತ್ ॥ ಪಾ॒ವ॒ಮಾ॒ನೇನ॑ ತ್ವಾ॒ ಸ್ತೋಮೇ॑ನ ಗಾಯ॒ತ್ರಸ್ಯ॑ ವರ್ತ॒ನ್ಯೋಪಾ॒ಗ್ಂ॒ಶೋ ರ್ವೀ॒ರ್ಯೇ॑ಣ ದೇ॒ವಸ್ತ್ವಾ॑ ಸವಿ॒ತೋ-ಥ್ಸೃ॑ಜತು ಜೀ॒ವಾತ॑ವೇ ಜೀವನ॒ಸ್ಯಾಯೈ॑ ಬೃಹ-ದ್ರಥನ್ತ॒ರಯೋ᳚ಸ್ತ್ವಾ॒ ಸ್ತೋಮೇ॑ನ ತ್ರಿ॒ಷ್ಟುಭೋ॑ ವರ್ತ॒ನ್ಯಾ ಶು॒ಕ್ರಸ್ಯ॑ ವೀ॒ರ್ಯೇ॑ಣ ದೇ॒ವಸ್ತ್ವಾ॑ ಸವಿ॒ತೋ- [ಸವಿ॒ತೋತ್, ಸೃ॒ಜ॒ತು॒ ಜೀ॒ವಾತ॑ವೇ] 39
-ಥ್ಸೃ॑ಜತು ಜೀ॒ವಾತ॑ವೇ ಜೀವನ॒ಸ್ಯಾಯಾ॑ ಅ॒ಗ್ನೇಸ್ತ್ವಾ॒ ಮಾತ್ರ॑ಯಾ॒ ಜಗ॑ತ್ಯೈ ವರ್ತ॒ನ್ಯಾ-ಽಽಗ್ರ॑ಯ॒ಣಸ್ಯ॑ ವೀ॒ರ್ಯೇ॑ಣ ದೇ॒ವಸ್ತ್ವಾ॑ ಸವಿ॒ತೋ-ಥ್ಸೃ॑ಜತು ಜೀ॒ವಾತ॑ವೇ ಜೀವನ॒ಸ್ಯಾಯಾ॑ ಇ॒ಮಮ॑ಗ್ನ॒ ಆಯು॑ಷೇ॒ ವರ್ಚ॑ಸೇ ಕೃಧಿ ಪ್ರಿ॒ಯಗ್ಂ ರೇತೋ॑ ವರುಣ ಸೋಮ ರಾಜನ್ನ್ । ಮಾ॒ ತೇವಾ᳚ಸ್ಮಾ ಅದಿತೇ॒ ಶರ್ಮ॑ ಯಚ್ಛ॒ ವಿಶ್ವೇ॑ ದೇವಾ॒ ಜರ॑ದಷ್ಟಿ॒ರ್ಯಥಾ-ಽಸ॑ತ್ ॥ ಅ॒ಗ್ನಿರಾಯು॑ಷ್ಮಾ॒ನ್-ಥ್ಸ ವನ॒ಸ್ಪತಿ॑ಭಿ॒-ರಾಯು॑ಷ್ಮಾ॒-ನ್ತೇನ॒ ತ್ವಾ-ಽಽಯು॒ಷಾ-ಽಽಯು॑ಷ್ಮನ್ತ-ಙ್ಕರೋಮಿ॒ ಸೋಮ॒ ಆಯು॑ಷ್ಮಾ॒ನ್-ಥ್ಸ ಓಷ॑ಧೀಭಿ ರ್ಯ॒ಜ್ಞ ಆಯು॑ಷ್ಮಾ॒ನ್-ಥ್ಸ ದಖ್ಷಿ॑ಣಾಭಿ॒ ರ್ಬ್ರಹ್ಮಾ-ಽಽಯು॑ಷ್ಮ॒-ತ್ತ-ದ್ಬ್ರಾ᳚ಹ್ಮ॒ಣೈರಾಯು॑ಷ್ಮ-ದ್ದೇ॒ವಾ ಆಯು॑ಷ್ಮನ್ತ॒ಸ್ತೇ॑-ಽಮೃತೇ॑ನ ಪಿ॒ತರ॒ ಆಯು॑ಷ್ಮನ್ತ॒ಸ್ತೇ ಸ್ವ॒ಧಯಾ-ಽಽಯು॑ಷ್ಮನ್ತ॒ಸ್ತೇನ॒ ತ್ವಾ ಽಽಯು॒ಷಾ-ಽಽ ಯು॑ಷ್ಮನ್ತ-ಙ್ಕರೋಮಿ ॥ 40 ॥
(ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಪ್ರಾ॒ಣೋ॑-ಽಸಿ – ತ್ರಿ॒ಷ್ಟುಭೋ॑ ವರ್ತ॒ನ್ಯಾ ಶು॒ಕ್ರಸ್ಯ॑ ವೀ॒ರ್ಯೇ॑ಣ ದೇ॒ವಸ್ತ್ವಾ॑ ಸವಿ॒ತೋಥ್ – ಸೋಮ॒ ಆಯು॑ಷ್ಮಾ॒ನ್ – ಪಞ್ಚ॑ವಿಗ್ಂಶತಿಶ್ಚ) (ಅ. 10)
ಅ॒ಗ್ನಿಂ-ವಾಁ ಏ॒ತಸ್ಯ॒ ಶರೀ॑ರ-ಙ್ಗಚ್ಛತಿ॒ ಸೋಮ॒ಗ್ಂ॒ ರಸೋ॒ ವರು॑ಣ ಏನಂ-ವಁರುಣಪಾ॒ಶೇನ॑ ಗೃಹ್ಣಾತಿ॒ ಸರ॑ಸ್ವತೀಂ॒-ವಾಁಗ॒ಗ್ನಾವಿಷ್ಣೂ॑ ಆ॒ತ್ಮಾ ಯಸ್ಯ॒ ಜ್ಯೋಗಾ॒ಮಯ॑ತಿ॒ ಯೋ ಜ್ಯೋಗಾ॑ಮಯಾವೀ॒ ಸ್ಯಾದ್ಯೋ ವಾ॑ ಕಾ॒ಮಯೇ॑ತ॒ ಸರ್ವ॒ಮಾಯು॑ರಿಯಾ॒ಮಿತಿ॒ ತಸ್ಮಾ॑ ಏ॒ತಾಮಿಷ್ಟಿ॒-ನ್ನಿರ್ವ॑ಪೇದಾಗ್ನೇ॒ಯ -ಮ॒ಷ್ಟಾಕ॑ಪಾಲಗ್ಂ ಸೌ॒ಮ್ಯ-ಞ್ಚ॒ರುಂ-ವಾಁ॑ರು॒ಣ-ನ್ದಶ॑ಕಪಾಲಗ್ಂ ಸಾರಸ್ವ॒ತ-ಞ್ಚ॒ರುಮಾ᳚ಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ-ಮ॒ಗ್ನೇರೇ॒ವಾಸ್ಯ॒ ಶರೀ॑ರ-ನ್ನಿಷ್ಕ್ರೀ॒ಣಾತಿ॒ ಸೋಮಾ॒ದ್ರಸಂ॑- [ಸೋಮಾ॒ದ್ರಸ᳚ಮ್, ವಾ॒ರು॒ಣೇನೈ॒ವೈನಂ॑-] 41
-ವಾಁರು॒ಣೇನೈ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ಸಾರಸ್ವ॒ತೇನ॒ ವಾಚ॑-ನ್ದಧಾತ್ಯ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑ರ್ಯ॒ಜ್ಞೋ ದೇ॒ವತಾ॑ಭಿಶ್ಚೈ॒ವೈನಂ॑-ಯಁ॒ಜ್ಞೇನ॑ ಚ ಭಿಷಜ್ಯತ್ಯು॒ತ ಯದೀ॒ತಾಸು॒ ರ್ಭವ॑ತಿ॒ ಜೀವ॑ತ್ಯೇ॒ವ ಯನ್ನವ॒-ಮೈತ್ತ-ನ್ನವ॑ನೀತ-ಮಭವ॒-ದಿತ್ಯಾಜ್ಯ॒- ಮವೇ᳚ಖ್ಷತೇ-ರೂ॒ಪಮೇ॒ವಾಸ್ಯೈ॒-ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ॒-ಽಶ್ವಿನೋಃ᳚ ಪ್ರಾ॒ಣೋ॑-ಽಸೀತ್ಯಾ॑ಹಾ॒ಶ್ವಿನೌ॒ ವೈ ದೇ॒ವಾನಾಂ᳚- [ದೇ॒ವಾನಾ᳚ಮ್, ಭಿ॒ಷಜೌ॒] 42
-ಭಿ॒ಷಜೌ॒ ತಾಭ್ಯಾ॑ಮೇ॒ವಾಸ್ಮೈ॑ ಭೇಷ॒ಜ-ಙ್ಕ॑ರೋ॒ತೀನ್ದ್ರ॑ಸ್ಯ ಪ್ರಾ॒ಣೋ॑ ಽಸೀತ್ಯಾ॑ಹೇನ್ದ್ರಿ॒ಯ- ಮೇ॒ವಾಸ್ಮಿ॑ನ್ನೇ॒ತೇನ॑ ದಧಾತಿ ಮಿ॒ತ್ರಾವರು॑ಣಯೋಃ ಪ್ರಾ॒ಣೋ॑-ಽಸೀತ್ಯಾ॑ಹ ಪ್ರಾಣಾಪಾ॒ನಾವೇ॒- ವಾಸ್ಮಿ॑ನ್ನೇ॒ತೇನ॑ ದಧಾತಿ॒ ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಪ್ರಾ॒ಣೋ॑-ಽಸೀತ್ಯಾ॑ಹ ವೀ॒ರ್ಯ॑ಮೇ॒ವಾಸ್ಮಿ॑ನ್ನೇ॒ತೇನ॑ ದಧಾತಿ ಘೃ॒ತಸ್ಯ॒ ಧಾರಾ॑ಮ॒ಮೃತ॑ಸ್ಯ॒ ಪನ್ಥಾ॒ಮಿತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಪಾ॑ವಮಾ॒ನೇನ॑ ತ್ವಾ॒ ಸ್ತೋಮೇ॒ನೇ- [ಸ್ತೋಮೇ॒ನೇತಿ, ಆ॒ಹ॒ ಪ್ರಾ॒ಣಮೇ॒ವಾಸ್ಮಿ॑-] 43
-ತ್ಯಾ॑ಹ ಪ್ರಾ॒ಣಮೇ॒ವಾಸ್ಮಿ॑-ನ್ನೇ॒ತೇನ॑ ದಧಾತಿ ಬೃಹ-ದ್ರಥನ್ತ॒ರಯೋ᳚ಸ್ತ್ವಾ॒ ಸ್ತೋಮೇ॒ನೇತ್ಯಾ॒ಹೌಜ॑ ಏ॒ವಾಸ್ಮಿ॑ನ್ನೇ॒ತೇನ॑ ದಧಾತ್ಯ॒ಗ್ನೇಸ್ತ್ವಾ॒ ಮಾತ್ರ॒ಯೇತ್ಯಾ॑ಹಾ॒-ಽಽತ್ಮಾನ॑-ಮೇ॒ವಾಸ್ಮಿ॑ನ್ನೇ॒ತೇನ॑ ದಧಾತ್ಯೃ॒ತ್ವಿಜಃ॒ ಪರ್ಯಾ॑ಹು॒ರ್ಯಾವ॑ನ್ತ ಏ॒ವರ್ತ್ವಿಜ॒ಸ್ತ ಏ॑ನ-ಮ್ಭಿಷಜ್ಯನ್ತಿ ಬ್ರ॒ಹ್ಮಣೋ॒ ಹಸ್ತ॑ಮನ್ವಾ॒ರಭ್ಯ॒ ಪರ್ಯಾ॑ಹುರೇಕ॒ಧೈವ ಯಜ॑ಮಾನ॒ ಆಯು॑ರ್ದಧತಿ॒ ಯದೇ॒ವ ತಸ್ಯ॒ ತದ್ಧಿರ॑ಣ್ಯಾ- [ತದ್ಧಿರ॑ಣ್ಯಾತ್, ಘೃ॒ತ-ನ್ನಿಷ್ಪಿ॑ಬ॒ತ್ಯಾಯು॒ರ್ವೈ] 44
-ದ್ಘೃ॒ತ-ನ್ನಿಷ್ಪಿ॑ಬ॒ತ್ಯಾಯು॒ರ್ವೈ ಘೃ॒ತಮ॒ಮೃತ॒ಗ್ಂ॒ ಹಿರ॑ಣ್ಯಮ॒ಮೃತಾ॑ದೇ॒ವಾ ಽಽಯು॒ರ್ನಿಷ್ಪಿ॑ಬತಿ ಶ॒ತಮಾ॑ನ-ಮ್ಭವತಿ ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯ॒ ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠ॒ತ್ಯಥೋ॒ ಖಲು॒ ಯಾವ॑ತೀ॒-ಸ್ಸಮಾ॑ ಏ॒ಷ್ಯ-ನ್ಮನ್ಯೇ॑ತ॒ ತಾವ॑ನ್ಮಾನಗ್ಗ್ ಸ್ಯಾ॒-ಥ್ಸಮೃ॑ದ್ಧ್ಯಾ ಇ॒ಮಮ॑ಗ್ನ॒ ಆಯು॑ಷೇ॒ ವರ್ಚ॑ಸೇ ಕೃ॒ಧೀತ್ಯಾ॒ಹಾ ಽಽಯು॑ರೇ॒ವಾಸ್ಮಿ॒ನ್. ವರ್ಚೋ॑ ದಧಾತಿ॒ ವಿಶ್ವೇ॑ ದೇವಾ॒ ಜರ॑ದಷ್ಟಿ॒ರ್ಯಥಾ ಽಸ॒ದಿತ್ಯಾ॑ -ಹ॒ ಜರ॑ದಷ್ಟಿಮೇ॒ವೈನ॑-ಙ್ಕರೋತ್ಯ॒ಗ್ನಿ-ರಾಯು॑ಷ್ಮಾ॒ನಿತಿ॒ ಹಸ್ತ॑-ಙ್ಗೃಹ್ಣಾತ್ಯೇ॒ತೇ ವೈ ದೇ॒ವಾ ಆಯು॑ಷ್ಮನ್ತ॒ಸ್ತ ಏ॒ವಾಸ್ಮಿ॒ನ್ನಾಯು॑ರ್ದಧತಿ॒ ಸರ್ವ॒ಮಾಯು॑ರೇತಿ ॥ 45 ॥
(ರಸಂ॑-ದೇ॒ವಾನಾ॒ಗ್॒-ಸ್ತೋಮೇ॒ನೇತಿ॒-ಹಿರ॑ಣ್ಯಾ॒-ದಸ॒ದಿತಿ॒-ದ್ವಾವಿಗ್ಂ॑ಶತಿಶ್ಚ) (ಅ. 11)
ಪ್ರ॒ಜಾಪ॑ತಿ॒ ರ್ವರು॑ಣಾ॒ಯಾಶ್ವ॑ಮನಯ॒-ಥ್ಸ ಸ್ವಾ-ನ್ದೇ॒ವತಾ॑ಮಾರ್ಚ್ಛ॒-ಥ್ಸ ಪರ್ಯ॑ದೀರ್ಯತ॒ ಸ ಏ॒ತಂ-ವಾಁ॑ರು॒ಣ-ಞ್ಚತು॑ಷ್-ಕಪಾಲಮಪಶ್ಯ॒-ತ್ತ-ನ್ನಿರ॑ವಪ॒-ತ್ತತೋ॒ ವೈ ಸ ವ॑ರುಣ- ಪಾ॒ಶಾದ॑ಮುಚ್ಯತ॒ ವರು॑ಣೋ॒ ವಾ ಏ॒ತ-ಙ್ಗೃ॑ಹ್ಣಾತಿ॒ ಯೋ-ಽಶ್ವ॑-ಮ್ಪ್ರತಿಗೃ॒ಹ್ಣಾತಿ॒ ಯಾವ॒ತೋ-ಽಶ್ವಾ᳚-ನ್ಪ್ರತಿಗೃಹ್ಣೀ॒ಯಾ-ತ್ತಾವ॑ತೋ ವಾರು॒ಣಾನ್ ಚತು॑ಷ್ಕಪಾಲಾ॒-ನ್ನಿರ್ವ॑ಪೇ॒-ದ್ವರು॑ಣಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॑-ವಁರುಣಪಾ॒ಶಾನ್ -ಮು॑ಞ್ಚತಿ॒ [ವರುಣಪಾ॒ಶಾನ್ -ಮು॑ಞ್ಚತಿ, ಚತು॑ಷ್ಕಪಾಲಾ] 46
ಚತು॑ಷ್ಕಪಾಲಾ ಭವನ್ತಿ॒ ಚತು॑ಷ್ಪಾ॒ದ್ಧ್ಯಶ್ವ॒-ಸ್ಸಮೃ॑ದ್ಧ್ಯಾ॒ ಏಕ॒ಮತಿ॑ರಿಕ್ತ॒-ನ್ನಿರ್ವ॑ಪೇ॒-ದ್ಯಮೇ॒ವ ಪ್ರ॑ತಿಗ್ರಾ॒ಹೀ ಭವ॑ತಿ॒ ಯಂ-ವಾಁ॒ ನಾದ್ಧ್ಯೇತಿ॒ ತಸ್ಮಾ॑ದೇ॒ವ ವ॑ರುಣಪಾ॒ಶಾ-ನ್ಮು॑ಚ್ಯತೇ॒ ಯದ್ಯಪ॑ರ-ಮ್ಪ್ರತಿಗ್ರಾ॒ಹೀ ಸ್ಯಾ-ಥ್ಸೌ॒ರ್ಯಮೇಕ॑ಕಪಾಲ॒ಮನು॒ ನಿರ್ವ॑ಪೇದ॒ಮುಮೇ॒ವಾ ಽಽದಿ॒ತ್ಯಮು॑ಚ್ಚಾ॒ರ-ಙ್ಕು॑ರುತೇ॒ ಽಪೋ॑-ಽವಭೃ॒ಥಮವೈ᳚ತ್ಯ॒ಫ್ಸು ವೈ ವರು॑ಣ-ಸ್ಸಾ॒ಖ್ಷಾದೇ॒ವ ವರು॑ಣ॒ಮವ॑ ಯಜತೇ ಽಪೋನ॒ಪ್ತ್ರೀಯ॑-ಞ್ಚ॒ರು-ಮ್ಪುನ॒ರೇತ್ಯ॒ ನಿರ್ವ॑ಪೇದ॒ಫ್ಸು ಯೋ॑ನಿ॒ರ್ವಾ ಅಶ್ವ॒-ಸ್ಸ್ವಾಮೇ॒ವೈನಂ॒-ಯೋಁನಿ॑-ಙ್ಗಮಯತಿ॒ ಸ ಏ॑ನಗ್ಂ ಶಾ॒ನ್ತ ಉಪ॑ ತಿಷ್ಠತೇ ॥ 47 ॥
(ಮು॒ಞ್ಚ॒ತಿ॒ – ಚ॒ರುಗ್ಂ – ಸ॒ಪ್ತದ॑ಶ ಚ) (ಅ. 12)
ಯಾ ವಾ॑ಮಿನ್ದ್ರಾವರುಣಾ ಯತ॒ವ್ಯಾ॑ ತ॒ನೂಸ್ತಯೇ॒ಮಮಗ್ಂ ಹ॑ಸೋ ಮುಞ್ಚತಂ॒-ಯಾಁ ವಾ॑ಮಿನ್ದ್ರಾ ವರುಣಾ ಸಹ॒ಸ್ಯಾ॑ ರಖ್ಷ॒ಸ್ಯಾ॑ ತೇಜ॒ಸ್ಯಾ॑ ತ॒ನೂಸ್ತಯೇ॒ ಮಮಗ್ಂ ಹ॑ಸೋ ಮುಞ್ಚತಂ॒-ಯೋಁ ವಾ॑ಮಿನ್ದ್ರಾ ವರುಣಾ ವ॒ಗ್ನೌ ಸ್ರಾಮ॒ಸ್ತಂ-ವಾಁ॑ ಮೇ॒ ತೇನಾ ವ॑ಯಜೇ॒ಯೋ ವಾ॑ಮಿನ್ದ್ರಾ ವರುಣಾ ದ್ವಿ॒ಪಾಥ್ಸು॑ ಪ॒ಶುಷು॒ ಚತು॑ಷ್ಪಾಥ್ಸು ಗೋ॒ಷ್ಠೇ ಗೃ॒ಹೇಷ್ವ॒ಫ್ಸ್ವೋಷ॑ಧೀಷು॒ ವನ॒ಸ್ಪತಿ॑ಷು॒ ಸ್ರಾಮ॒ಸ್ತಂ-ವಾಁ॑ ಮೇ॒ ತೇನಾವ॑ ಯಜ॒ ಇನ್ದ್ರೋ॒ ವಾ ಏ॒ತಸ್ಯೇ᳚- [ಏ॒ತಸ್ಯ॑, ಇ॒ನ್ದ್ರಿ॒ಯೇಣಾಪ॑ ಕ್ರಾಮತಿ॒] 48
-ನ್ದ್ರಿ॒ಯೇಣಾಪ॑ ಕ್ರಾಮತಿ॒ ವರು॑ಣ ಏನಂ-ವಁರುಣಪಾ॒ಶೇನ॑ ಗೃಹ್ಣಾತಿ॒ ಯಃ ಪಾ॒ಪ್ಮನಾ॑ ಗೃಹೀ॒ತೋ ಭವ॑ತಿ॒ ಯಃ ಪಾ॒ಪ್ಮನಾ॑ ಗೃಹೀ॒ತ-ಸ್ಸ್ಯಾ-ತ್ತಸ್ಮಾ॑ ಏ॒ತಾಮೈ᳚ನ್ದ್ರಾವರು॒ಣೀ-ಮ್ಪ॑ಯ॒ಸ್ಯಾ᳚-ನ್ನಿರ್ವ॑ಪೇ॒ದಿನ್ದ್ರ॑ ಏ॒ವಾಸ್ಮಿ॑-ನ್ನಿನ್ದ್ರಿ॒ಯ-ನ್ದ॑ಧಾತಿ॒ ವರು॑ಣ ಏನಂ ವಁರುಣಪಾ॒ಶಾ-ನ್ಮು॑ಞ್ಚತಿ ಪಯ॒ಸ್ಯಾ॑ ಭವತಿ॒ ಪಯೋ॒ ಹಿ ವಾ ಏ॒ತಸ್ಮಾ॑-ದಪ॒ಕ್ರಾಮ॒ತ್ಯಥೈ॒ಷ ಪಾ॒ಪ್ಮನಾ॑ ಗೃಹೀ॒ತೋ ಯ-ತ್ಪ॑ಯ॒ಸ್ಯಾ॑ ಭವ॑ತಿ॒ ಪಯ॑ ಏ॒ವಾಸ್ಮಿ॒-ನ್ತಯಾ॑ ದಧಾತಿ ಪಯ॒ಸ್ಯಾ॑ಯಾ- [ಪಯ॒ಸ್ಯಾ॑ಯಾಮ್, ಪುರೋ॒ಡಾಶ॒ಮವ॑] 49
-ಮ್ಪುರೋ॒ಡಾಶ॒ಮವ॑ ದಧಾತ್ಯಾತ್ಮ॒ನ್ವನ್ತ॑-ಮೇ॒ವೈನ॑-ಙ್ಕರೋ॒ತ್ಯಥೋ॑ ಆ॒ಯತ॑ನವನ್ತ-ಮೇ॒ವ ಚ॑ತು॒ರ್ಧಾ ವ್ಯೂ॑ಹತಿ ದಿ॒ಖ್ಷ್ವೇ॑ವ ಪ್ರತಿ॑ತಿಷ್ಠತಿ॒ ಪುನ॒-ಸ್ಸಮೂ॑ಹತಿ ದಿ॒ಗ್ಭ್ಯ ಏ॒ವಾಸ್ಮೈ॑ ಭೇಷ॒ಜ-ಙ್ಕ॑ರೋತಿ ಸ॒ಮೂಹ್ಯಾವ॑ ದ್ಯತಿ॒ ಯಥಾ-ಽಽವಿ॑ದ್ಧ-ನ್ನಿಷ್ಕೃ॒ನ್ತತಿ॑ ತಾ॒ದೃಗೇ॒ವ ತದ್ಯೋ ವಾ॑ಮಿನ್ದ್ರಾ-ವರುಣಾವ॒ಗ್ನೌ ಸ್ರಾಮ॒ಸ್ತಂ-ವಾಁ॑ಮೇ॒ತೇನಾವ॑ ಯಜ॒ ಇತ್ಯಾ॑ಹ॒ ದುರಿ॑ಷ್ಟ್ಯಾ ಏ॒ವೈನ॑-ಮ್ಪಾತಿ॒ ಯೋ ವಾ॑ ಮಿನ್ದ್ರಾ ವರುಣಾ ದ್ವಿ॒ಪಾಥ್ಸು॑ ಪ॒ಶುಷು॒ ಸ್ರಾಮ॒ಸ್ತಂ-ವಾಁ॑ ಮೇ॒ ತೇನಾವ॑ ಯಜ॒ ಇತ್ಯಾ॑ಹೈ॒ತಾವ॑ತೀ॒ರ್ವಾ ಆಪ॒ ಓಷ॑ಧಯೋ॒ ವನ॒ಸ್ಪತ॑ಯಃ ಪ್ರ॒ಜಾಃ ಪ॒ಶವ॑ ಉಪಜೀವ॒ನೀಯಾ॒ಸ್ತಾ ಏ॒ವಾಸ್ಮೈ॑ ವರುಣಪಾ॒ಶಾ-ನ್ಮು॑ಞ್ಚತಿ ॥ 50 ॥
(ಏ॒ತಸ್ಯ॑ – ಪಯ॒ಸ್ಯಾ॑ಯಾಂ – ಪಾತಿ॒ – ಷಡ್ವಿಗ್ಂ॑ಶತಿಶ್ಚ ) (ಅ. 13)
ಸ ಪ್ರ॑ತ್ನ॒ವನ್ನಿ ಕಾವ್ಯೇನ್ದ್ರಂ॑-ವೋಁ ವಿ॒ಶ್ವತ॒-ಸ್ಪರೀನ್ದ್ರ॒-ನ್ನರಃ॑ ॥ ತ್ವ-ನ್ನ॑-ಸ್ಸೋಮ ವಿ॒ಶ್ವತೋ॒ ರಖ್ಷಾ॑ ರಾಜನ್ನಘಾಯ॒ತಃ । ನ ರಿ॑ಷ್ಯೇ॒-ತ್ತ್ವಾವ॑ತ॒-ಸ್ಸಖಾಃ᳚ ॥ ಯಾ ತೇ॒ ಧಾಮಾ॑ನಿ ದಿ॒ವಿ ಯಾ ಪೃ॑ಥಿ॒ವ್ಯಾಂ-ಯಾಁ ಪರ್ವ॑ತೇ॒ಷ್ವೋಷ॑ಧೀಷ್ವ॒ಫ್ಸು ॥ ತೇಭಿ॑ರ್ನೋ॒ ವಿಶ್ವೈ᳚-ಸ್ಸು॒ಮನಾ॒ ಅಹೇ॑ಡ॒-ನ್ರಾಜನ್᳚-ಥ್ಸೋಮ॒ ಪ್ರತಿ॑ ಹ॒ವ್ಯಾ ಗೃ॑ಭಾಯ ॥ ಅಗ್ನೀ॑ಷೋಮಾ॒ ಸವೇ॑ದಸಾ॒ ಸಹೂ॑ತೀ ವನತ॒-ಙ್ಗಿರಃ॑ । ಸ-ನ್ದೇ॑ವ॒ತ್ರಾ ಬ॑ಭೂವಥುಃ ॥ ಯು॒ವ- [ಯು॒ವಮ್, ಏ॒ತಾನಿ॑ ದಿ॒ವಿ ರೋ॑ಚ॒ನಾನ್ಯ॒ಗ್ನಿಶ್ಚ॑] 51
-ಮೇ॒ತಾನಿ॑ ದಿ॒ವಿ ರೋ॑ಚ॒ನಾನ್ಯ॒ಗ್ನಿಶ್ಚ॑ ಸೋಮ॒ ಸಕ್ರ॑ತೂ ಅಧತ್ತಮ್ ॥ ಯು॒ವಗ್ಂ ಸಿನ್ಧೂಗ್ಂ॑ ರ॒ಭಿಶ॑ಸ್ತೇರವ॒ದ್ಯಾ-ದಗ್ನೀ॑ಷೋಮಾ॒-ವಮು॑ಞ್ಚತ-ಙ್ಗೃಭೀ॒ತಾನ್ ॥ ಅಗ್ನೀ॑ಷೋಮಾವಿ॒ಮಗ್ಂ ಸು ಮೇ॑ ಶೃಣು॒ತಂ-ವೃಁ॑ಷಣಾ॒ ಹವ᳚ಮ್ । ಪ್ರತಿ॑ ಸೂ॒ಕ್ತಾನಿ॑ ಹರ್ಯತ॒-ಮ್ಭವ॑ತ-ನ್ದಾ॒ಶುಷೇ॒ ಮಯಃ॑ ॥ ಆ-ಽನ್ಯ-ನ್ದಿ॒ವೋ ಮಾ॑ತ॒ರಿಶ್ವಾ॑ ಜಭಾ॒ರಾ-ಽಮ॑ಥ್ನಾದ॒ನ್ಯ-ಮ್ಪರಿ॑ ಶ್ಯೇ॒ನೋ ಅದ್ರೇಃ᳚ । ಅಗ್ನೀ॑ಷೋಮಾ॒ ಬ್ರಹ್ಮ॑ಣಾ ವಾವೃಧಾ॒ನೋರುಂ-ಯಁ॒ಜ್ಞಾಯ॑ ಚಕ್ರಥುರು ಲೋ॒ಕಮ್ ॥ ಅಗ್ನೀ॑ಷೋಮಾ ಹ॒ವಿಷಃ॒ ಪ್ರಸ್ಥಿ॑ತಸ್ಯ ವೀ॒ತಗ್ಂ [ವೀ॒ತಮ್, ಹರ್ಯ॑ತಂ-ವೃಁಷಣಾ ಜು॒ಷೇಥಾ᳚ಮ್ ।] 52
ಹರ್ಯ॑ತಂ-ವೃಁಷಣಾ ಜು॒ಷೇಥಾ᳚ಮ್ । ಸು॒ಶರ್ಮಾ॑ಣಾ॒ ಸ್ವವ॑ಸಾ॒ ಹಿ ಭೂ॒ತಮಥಾ॑ ಧತ್ತಂ॒-ಯಁಜ॑ಮಾನಾಯ॒ ಶಂ-ಯೋಃ ಁ॥ ಆಪ್ಯಾ॑ಯಸ್ವ॒, ಸ-ನ್ತೇ᳚ ॥ ಗ॒ಣಾನಾ᳚-ನ್ತ್ವಾ ಗ॒ಣಪ॑ತಿಗ್ಂ ಹವಾಮಹೇ ಕ॒ವಿ-ಙ್ಕ॑ವೀ॒ನಾ-ಮು॑ಪ॒ಮಶ್ರ॑ವಸ್ತಮಮ್ । ಜ್ಯೇ॒ಷ್ಠ॒ರಾಜ॒-ಮ್ಬ್ರಹ್ಮ॑ಣಾ-ಮ್ಬ್ರಹ್ಮಣಸ್ಪತ॒ ಆ ನ॑-ಶ್ಶೃ॒ಣ್ವನ್ನೂ॒ತಿಭಿ॑-ಸ್ಸೀದ॒ ಸಾದ॑ನಮ್ । ಸ ಇಜ್ಜನೇ॑ನ॒ ಸ ವಿ॒ಶಾ ಸ ಜನ್ಮ॑ನಾ॒ ಸ ಪು॒ತ್ರೈರ್ವಾಜ॑-ಮ್ಭರತೇ॒ ಧನಾ॒ ನೃಭಿಃ॑ । ದೇ॒ವಾನಾಂ॒-ಯಃ ಁಪಿ॒ತರ॑-ಮಾ॒ವಿವಾ॑ಸತಿ [ ] 53
ಶ್ರ॒ದ್ಧಾಮ॑ನಾ ಹ॒ವಿಷಾ॒ ಬ್ರಹ್ಮ॑ಣ॒ಸ್ಪತಿ᳚ಮ್ ॥ ಸ ಸು॒ಷ್ಟುಭಾ॒ ಸ ಋಕ್ವ॑ತಾ ಗ॒ಣೇನ॑ ವ॒ಲಗ್ಂ ರು॑ರೋಜ ಫಲಿ॒ಗಗ್ಂ ರವೇ॑ಣ । ಬೃಹ॒ಸ್ಪತಿ॑-ರು॒ಸ್ತ್ರಿಯಾ॑ ಹವ್ಯ॒ಸೂದಃ॒ ಕನಿ॑ಕ್ರದ॒ದ್- ವಾವ॑ಶತೀ॒ರುದಾ॑ಜತ್ ॥ ಮರು॑ತೋ॒ ಯದ್ಧ॑ ವೋ ದಿ॒ವೋ, ಯಾ ವ॒-ಶ್ಶರ್ಮ॑ ॥ ಅ॒ರ್ಯ॒ಮಾ ಽಽಯಾ॑ತಿ ವೃಷ॒ಭಸ್ತುವಿ॑ಷ್ಮಾ-ನ್ದಾ॒ತಾ ವಸೂ॑ನಾ-ಮ್ಪುರುಹೂ॒ತೋ ಅರ್ಹನ್ನ್॑ । ಸ॒ಹ॒ಸ್ರಾ॒ಖ್ಷೋ ಗೋ᳚ತ್ರ॒ಭಿ-ದ್ವಜ್ರ॑ಬಾಹುರ॒ಸ್ಮಾಸು॑ ದೇ॒ವೋ ದ್ರವಿ॑ಣ-ನ್ದಧಾತು ॥ ಯೇ ತೇ᳚-ಽರ್ಯಮ-ನ್ಬ॒ಹವೋ॑ ದೇವ॒ಯಾನಾಃ॒ ಪನ್ಥಾ॑ನೋ [ಪನ್ಥಾ॑ನಃ, ರಾ॒ಜ॒-ನ್ದಿ॒ವ ಆ॒ಚರ॑ನ್ತಿ ।] 54
ರಾಜ-ನ್ದಿ॒ವ ಆ॒ಚರ॑ನ್ತಿ । ತೇಭಿ॑ರ್ನೋ ದೇವ॒ ಮಹಿ॒ ಶರ್ಮ॑ ಯಚ್ಛ॒ ಶ-ನ್ನ॑ ಏಧಿ ದ್ವಿ॒ಪದೇ॒ ಶ-ಞ್ಚತು॑ಷ್ಪದೇ ॥ ಬು॒ದ್ಧ್ನಾದಗ್ರ॒-ಮಙ್ಗಿ॑ರೋಭಿ-ರ್ಗೃಣಾ॒ನೋ ವಿ ಪರ್ವ॑ತಸ್ಯ ದೃಗ್ಂಹಿ॒ತಾನ್ಯೈ॑ರತ್ । ರು॒ಜ-ದ್ರೋಧಾಗ್ಂ॑ಸಿ-ಕೃ॒ತ್ರಿಮಾ᳚ಣ್ಯೇಷಾ॒ಗ್ಂ॒-ಸೋಮ॑ಸ್ಯ॒ ತಾ-ಮದ॒ ಇನ್ದ್ರ॑-ಶ್ಚಕಾರ ॥ ಬು॒ದ್ಧ್ನಾ-ದಗ್ರೇ॑ಣ॒ ವಿ ಮಿ॑ಮಾಯ॒ ಮಾನೈ॒-ರ್ವಜ್ರೇ॑ಣ॒ ಖಾನ್ಯ॑ತೃಣ-ನ್ನ॒ದೀನಾ᳚ಮ್ । ವೃಥಾ॑ ಽಸೃಜ-ತ್ಪ॒ಥಿಭಿ॑ ರ್ದೀರ್ಘಯಾ॒ಥೈ-ಸ್ಸೋಮ॑ಸ್ಯ॒ ತಾ ಮದ॒ ಇನ್ದ್ರ॑ಶ್ಚಕಾರ । ॥ 55 ॥
ಪ್ರ ಯೋ ಜ॒ಜ್ಞೇ ವಿ॒ದ್ವಾಗ್ಂ ಅ॒ಸ್ಯ ಬನ್ಧುಂ॒-ವಿಁಶ್ವಾ॑ನಿ ದೇ॒ವೋ ಜನಿ॑ಮಾ ವಿವಕ್ತಿ । ಬ್ರಹ್ಮ॒ ಬ್ರಹ್ಮ॑ಣ॒ ಉಜ್ಜ॑ಭಾರ॒ ಮದ್ಧ್ಯಾ᳚ನ್ನೀ॒ಚಾದು॒ಚ್ಚಾ ಸ್ವ॒ಧಯಾ॒-ಽಭಿ ಪ್ರತ॑ಸ್ಥೌ ॥ ಮ॒ಹಾ-ನ್ಮ॒ಹೀ ಅ॑ಸ್ತಭಾಯ॒ದ್ವಿ ಜಾ॒ತೋ ದ್ಯಾಗ್ಂ ಸದ್ಮ॒ ಪಾರ್ಥಿ॑ವ-ಞ್ಚ॒ ರಜಃ॑ । ಸ ಬು॒ದ್ಧ್ನಾದಾ᳚ಷ್ಟ ಜ॒ನುಷಾ॒-ಽಭ್ಯಗ್ರ॒-ಮ್ಬೃಹ॒ಸ್ಪತಿ॑ ರ್ದೇ॒ವತಾ॒ಯಸ್ಯ॑ ಸ॒ಮ್ರಾಟ್ ॥ ಬು॒ದ್ಧ್ನಾದ್ಯೋ ಅಗ್ರ॑ಮ॒ಭ್ಯರ್ತ್ಯೋಜ॑ಸಾ॒ ಬೃಹ॒ಸ್ಪತಿ॒ಮಾ ವಿ॑ವಾಸನ್ತಿ ದೇ॒ವಾಃ । ಭಿ॒ನದ್ವ॒ಲಂ-ವಿಁ ಪುರೋ॑ ದರ್ದರೀತಿ॒ ಕನಿ॑ಕ್ರದ॒-ಥ್ಸುವ॑ರ॒ಪೋ ಜಿ॑ಗಾಯ ॥ 56 ॥
(ಯು॒ವಂ – ವೀಁ॒ತಮಾ॒ – ವಿವಾ॑ಸತಿ॒ – ಪನ್ಥಾ॑ನೋ – ದೀರ್ಘಯಾ॒ಥೈ-ಸ್ಸೋಮ॑ಸ್ಯ॒ ತಾ ಮದ॒ ಇನ್ದ್ರ॑ಶ್ಚಕಾರ – ದೇ॒ವಾ – ನವ॑ ಚ) (ಅ. 14)
(ಆ॒ದಿ॒ತ್ಯೇಭ್ಯೋ॑ – ದೇ॒ವಾ ವೈ ಮೃ॒ತ್ಯೋ – ರ್ದೇ॒ವಾ ವೈ – ಸ॒ತ್ರಮ॑ – ರ್ಯ॒ಮ್ಣೇ -ಪ್ರ॒ಜಾಪ॑ತೇ॒ಸ್ತ್ರಯ॑ಸ್ತ್ರಿಗ್ಂಶತ್ – ಪ್ರ॒ಜಾಪ॑ತಿ ರ್ದೇ॒ವೇಭ್ಯೋ॒-ಽನ್ನಾದ್ಯಂ॑ -ದೇವಾಸು॒ರಾಸ್ತಾನ್ – ರಜ॑ನೋ – ಧ್ರು॒ವೋ॑-ಽಸಿ॒ – ಯನ್ನವ॑ – ಮ॒ಗ್ನಿಂ-ವೈಁ – ಪ್ರ॒ಜಾಪ॑ತಿ॒ ರ್ವರು॑ಣಾಯ॒ – ಯಾ ವಾ॑ಮಿನ್ದ್ರಾ ವರುಣಾ॒ – ಸ ಪ್ರ॑ತ್ನ॒ವ -ಚ್ಚತು॑ರ್ದಶ)
(ಆ॒ದಿ॒ತ್ಯೇಭ್ಯ॒ – ಸ್ತ್ವಷ್ಟು॑ – ರಸ್ಮೈ॒ ದಾನ॑ಕಾಮಾ – ಏ॒ವಾವ॑ ರುನ್ಧೇ॒ – ಽಗ್ನಿಂ-ವೈಁ – ಸ ಪ್ರ॑ತ್ನ॒ವಥ್ – ಷಟ್ಪ॑ಞ್ಚಾ॒ಶತ್ )
(ಆ॒ದಿ॒ತ್ಯೇಭ್ಯಃ॒ – ಸುವ॑ರ॒ಪೋ ಜಿ॑ಗಾಯ )
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ತೃತೀಯಃ ಪ್ರಶ್ನ-ಸ್ಸಮಾಪ್ತಃ ॥