ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಚತುರ್ಥಃ ಪ್ರಶ್ನಃ – ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ದೇ॒ವಾ ಮ॑ನು॒ಷ್ಯಾಃ᳚ ಪಿ॒ತರ॒ಸ್ತೇ᳚-ಽನ್ಯತ॑ ಆಸ॒ನ್ನಸು॑ರಾ॒ ರಖ್ಷಾಗ್ಂ॑ಸಿ ಪಿಶಾ॒ಚಾಸ್ತೇ᳚ ಽನ್ಯತ॒ಸ್ತೇಷಾ᳚-ನ್ದೇ॒ವಾನಾ॑ಮು॒ತ ಯದಲ್ಪಂ॒-ಲೋಁಹಿ॑ತ॒ಮಕು॑ರ್ವ॒-ನ್ತ-ದ್ರಖ್ಷಾಗ್ಂ॑ಸಿ॒ ರಾತ್ರೀ॑ಭಿರಸುಭ್ನ॒-ನ್ತಾನ್-ಥ್ಸು॒ಬ್ಧಾ-ನ್ಮೃ॒ತಾನ॒ಭಿ ವ್ಯೌ᳚ಚ್ಛ॒-ತ್ತೇ ದೇ॒ವಾ ಅ॑ವಿದು॒ರ್ಯೋ ವೈ ನೋ॒-ಽಯ-ಮ್ಮ್ರಿ॒ಯತೇ॒ ರಖ್ಷಾಗ್ಂ॑ಸಿ॒ ವಾ ಇ॒ಮ-ಙ್ಘ್ನ॒ನ್ತೀತಿ॒ ತೇ ರಖ್ಷಾ॒ಗ್॒ಸ್ಯುಪಾ॑ಮನ್ತ್ರಯನ್ತ॒ ತಾನ್ಯ॑ಬ್ರುವ॒ನ್. ವರಂ॑-ವೃಁಣಾಮಹೈ॒ ಯ- [ಯತ್, ಅಸು॑ರಾ॒ನ್ ಜಯಾ॑ಮ॒] 1
-ದಸು॑ರಾ॒ನ್ ಜಯಾ॑ಮ॒ ತನ್ನ॑-ಸ್ಸ॒ಹಾಸ॒ದಿತಿ॒ ತತೋ॒ ವೈ ದೇ॒ವಾ ಅಸು॑ರಾನಜಯ॒-ನ್ತೇ-ಽಸು॑ರಾನ್ ಜಿ॒ತ್ವಾರಖ್ಷಾ॒ಗ್॒ಸ್ಯಪಾ॑ನುದನ್ತ॒ ತಾನಿ॒ ರಖ್ಷಾ॒ಗ್॒ಸ್ಯನೃ॑ತಮ ಕ॒ರ್ತೇತಿ॑ ಸಮ॒ನ್ತ-ನ್ದೇ॒ವಾ-ನ್ಪರ್ಯ॑ವಿಶ॒-ನ್ತೇ ದೇ॒ವಾ ಅ॒ಗ್ನಾವ॑ನಾಥನ್ತ॒ ತೇ᳚-ಽಗ್ನಯೇ॒ ಪ್ರವ॑ತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ॑ವಪನ್ನ॒ಗ್ನಯೇ॑ ವಿಬಾ॒ಧವ॑ತೇ॒-ಽಗ್ನಯೇ॒ ಪ್ರತೀ॑ಕವತೇ॒ ಯದ॒ಗ್ನಯೇ॒ ಪ್ರವ॑ತೇ ನಿ॒ರವ॑ಪ॒ನ್॒. ಯಾನ್ಯೇ॒ವ ಪು॒ರಸ್ತಾ॒-ದ್ರಖ್ಷಾ॒ಗ್॒- [ಪು॒ರಸ್ತಾ॒-ದ್ರಖ್ಷಾ॒ಗ್ಂ॑ಸಿ, ಆ॒ಸ॒ನ್ತಾನಿ॒ ತೇನ॒] 2
-ಸ್ಯಾಸ॒ನ್ತಾನಿ॒ ತೇನ॒ ಪ್ರಾಣು॑ದನ್ತ॒ ಯದ॒ಗ್ನಯೇ॑ ವಿಬಾ॒ಧವ॑ತೇ॒ ಯಾನ್ಯೇ॒ವಾಭಿತೋ॒ ರಖ್ಷಾ॒ಗ್॒ಸ್ಯಾಸ॒-ನ್ತಾನಿ॒ ತೇನ॒ ವ್ಯ॑ಬಾಧನ್ತ॒ ಯದ॒ಗ್ನಯೇ॒ ಪ್ರತೀ॑ಕವತೇ॒ ಯಾನ್ಯೇ॒ವ ಪ॒ಶ್ಚಾ-ದ್ರಖ್ಷಾ॒ಗ್॒ಸ್ಯಾಸ॒-ನ್ತಾನಿ॒ ತೇನಾಪಾ॑ನುದನ್ತ॒ ತತೋ॑ ದೇ॒ವಾ ಅಭ॑ವ॒-ನ್ಪರಾಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್-ಥ್ಸ್ಯಾ-ಥ್ಸ ಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇತಾ॒ಗ್ನಯೇ॒ ಪ್ರವ॑ತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇದ॒ಗ್ನಯೇ॑ ವಿಬಾ॒ಧವ॑ತೇ॒- [ವಿಬಾ॒ಧವ॑ತೇ॒, ಅ॒ಗ್ನಯೇ॒ ಪ್ರತೀ॑ಕವತೇ॒] 3
-ಽಗ್ನಯೇ॒ ಪ್ರತೀ॑ಕವತೇ॒ ಯದ॒ಗ್ನಯೇ॒ ಪ್ರವ॑ತೇ ನಿ॒ರ್ವಪ॑ತಿ॒ ಯ ಏ॒ವಾಸ್ಮಾ॒ಚ್ಛ್ರೇಯಾ॒ನ್-ಭ್ರಾತೃ॑ವ್ಯ॒ಸ್ತ-ನ್ತೇನ॒ ಪ್ರಣು॑ದತೇ॒ ಯದ॒ಗ್ನಯೇ॑ ವಿಬಾ॒ಧವ॑ತೇ॒ ಯ ಏ॒ವೈನೇ॑ನ ಸ॒ದೃನ್ತ-ನ್ತೇನ॒ ವಿ ಬಾ॑ಧತೇ॒ ಯದ॒ಗ್ನಯೇ॒ ಪ್ರತೀ॑ಕವತೇ॒ ಯ ಏ॒ವಾಸ್ಮಾ॒-ತ್ಪಾಪೀ॑ಯಾ॒-ನ್ತ-ನ್ತೇನಾಪ॑ ನುದತೇ॒ ಪ್ರ ಶ್ರೇಯಾಗ್ಂ॑ಸ॒-ಮ್ಭ್ರಾತೃ॑ವ್ಯ-ನ್ನುದ॒ತೇತಿ॑ ಸ॒ದೃಶ॑-ಙ್ಕ್ರಾಮತಿ॒ ನೈನ॒-ಮ್ಪಾಪೀ॑ಯಾನಾಪ್ನೋತಿ॒ ಯ ಏ॒ವಂ ವಿಁ॒ದ್ವಾನೇ॒ತಯೇಷ್ಟ್ಯಾ॒ ಯಜ॑ತೇ ॥ 4 ॥
(ವೃ॒ಣಾ॒ಮ॒ಹೈ॒ ಯತ್ – ಪು॒ರಸ್ತಾ॒-ದ್ರಖ್ಷಾಗ್ಂ॑ಸಿ- ವಪೇದ॒ಗ್ನಯೇ॑ ವಿಬಾ॒ಧವ॑ತ – ಏ॒ವಂ – ಚ॒ತ್ವಾರಿ॑ ಚ) (ಅ. 1)
ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಅ॑ಬ್ರುವ॒ನ್॒. ಯೋ ನೋ॑ ವೀ॒ರ್ಯಾ॑ವತ್ತಮ॒ಸ್ತಮನು॑ ಸ॒ಮಾರ॑ಭಾಮಹಾ॒ ಇತಿ॒ ತ ಇನ್ದ್ರ॑ಮಬ್ರುವ॒-ನ್ತ್ವಂ-ವೈಁ ನೋ॑ ವೀ॒ರ್ಯಾ॑ವತ್ತಮೋ-ಽಸಿ॒ ತ್ವಾಮನು॑ ಸ॒ಮಾರ॑ಭಾಮಹಾ॒ ಇತಿ॒ ಸೋ᳚-ಽಬ್ರವೀ-ತ್ತಿ॒ಸ್ರೋ ಮ॑ ಇ॒ಮಾಸ್ತ॒ನುವೋ॑ ವೀ॒ರ್ಯಾ॑ವತೀ॒ಸ್ತಾಃ ಪ್ರೀ॑ಣೀ॒ತಾಥಾ-ಸು॑ರಾನ॒ಭಿ ಭ॑ವಿಷ್ಯ॒ಥೇತಿ॒ ತಾ ವೈ ಬ್ರೂ॒ಹೀತ್ಯ॑ಬ್ರುವನ್ನಿ॒ಯಮಗ್ಂ॑ ಹೋ॒ಮುಗಿ॒ಯಂ-ವಿಁ॑ಮೃ॒ಧೇಯ-ಮಿ॑ನ್ದ್ರಿ॒ಯಾವ॒ತೀ- [-ಮಿ॑ನ್ದ್ರಿ॒ಯಾವ॒ತೀ, ಇತ್ಯ॑ಬ್ರವೀ॒ತ್ತ] 5
-ತ್ಯ॑ಬ್ರವೀ॒ತ್ತ ಇನ್ದ್ರಾ॑ಯಾಗ್ಂ ಹೋ॒ಮುಚೇ॑ ಪುರೋ॒ಡಾಶ॒ಮೇಕಾ॑ದಶಕಪಾಲ॒-ನ್ನಿರ॑ವಪ॒ನ್ನಿನ್ದ್ರಾ॑ಯ ವೈಮೃ॒ಧಾಯೇ-ನ್ದ್ರಾ॑ಯೇನ್ದ್ರಿ॒ಯಾವ॑ತೇ॒ ಯದಿನ್ದ್ರಾ॑ಯಾಗ್ಂ ಹೋ॒ಮುಚೇ॑ ನಿ॒ರವ॑ಪ॒ನ್ನಗ್ಂಹ॑ಸ ಏ॒ವ ತೇನಾ॑ಮುಚ್ಯನ್ತ॒ ಯದಿನ್ದ್ರಾ॑ಯ ವೈ ಮೃ॒ಧಾಯ॒ ಮೃಧ॑ ಏ॒ವ ತೇನಾಪಾ᳚ಘ್ನತ॒ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಇನ್ದ್ರಿ॒ಯಮೇ॒ವ ತೇನಾ॒-ಽಽತ್ಮನ್ನ॑ದಧತ॒ ತ್ರಯ॑ಸ್ತ್ರಿಗ್ಂಶತ್ಕಪಾಲ-ಮ್ಪುರೋ॒ಡಾಶ॒-ನ್ನಿರ॑ವಪ॒-ನ್ತ್ರಯ॑ಸ್ತ್ರಿಗ್ಂಶ॒ದ್ವೈ ದೇ॒ವತಾ॒ಸ್ತಾ ಇನ್ದ್ರ॑ ಆ॒ತ್ಮನ್ನನು॑ ಸ॒ಮಾರ॑ಭಂಯಁತ॒ ಭೂತ್ಯೈ॒ [ಭೂತ್ಯೈ᳚, ತಾಂ-ವಾಁವ] 6
ತಾಂ-ವಾಁವ ದೇ॒ವಾ ವಿಜಿ॑ತಿ-ಮುತ್ತ॒ಮಾ-ಮಸು॑ರೈ॒-ರ್ವ್ಯ॑ಜಯನ್ತ॒ಯೋ ಭ್ರಾತೃ॑ವ್ಯವಾ॒ನ್ಥ್- ಸ್ಯಾ-ಥ್ಸ ಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇ॒ತೇನ್ದ್ರಾ॑ಯಾಗ್ಂ ಹೋ॒ಮುಚೇ॑ ಪುರೋ॒ಡಾಶ॒ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದಿನ್ದ್ರಾ॑ಯ ವೈಮೃ॒ಧಾಯೇನ್ದ್ರಾ॑ಯೇನ್ದ್ರಿ॒ಯಾವ॒ತೇ-ಽಗ್ಂ ಹ॑ಸಾ॒ ವಾ ಏ॒ಷ ಗೃ॑ಹೀ॒ತೋ ಯಸ್ಮಾ॒ಚ್ಛ್ರೇಯಾ॒-ನ್ಭ್ರಾತೃ॑ವ್ಯೋ॒ಯದಿನ್ದ್ರಾ॑ಯಾಗ್ಂ ಹೋ॒ಮುಚೇ॑ ನಿ॒ರ್ವಪ॒ತ್ಯಗ್ಂಹ॑ಸ ಏ॒ವ ತೇನ॑ ಮುಚ್ಯತೇಮೃ॒ಧಾ ವಾ ಏ॒ಷೋ॑-ಽಭಿಷ॑ಣ್ಣೋ॒ ಯಸ್ಮಾ᳚-ಥ್ಸಮಾ॒ನೇಷ್ವ॒ನ್ಯ-ಶ್ಶ್ರೇಯಾ॑ನು॒ತಾ- [ಶ್ರೇಯಾ॑ನು॒ತ, ಅ-ಽಭ್ರಾ॑ತೃವ್ಯೋ॒] 7
-ಽಭ್ರಾ॑ತೃವ್ಯೋ॒ ಯದಿನ್ದ್ರಾ॑ಯ ವೈಮೃ॒ಧಾಯ॒ ಮೃಧ॑ ಏ॒ವ ತೇನಾಪ॑ ಹತೇ॒ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಇನ್ದ್ರಿ॒ಯಮೇ॒ವ ತೇನಾ॒ತ್ಮ-ನ್ಧ॑ತ್ತೇ॒ ತ್ರಯ॑ಸ್ತ್ರಿಗ್ಂಶತ್ಕಪಾಲ-ಮ್ಪುರೋ॒ಡಾಶ॒-ನ್ನಿರ್ವ॑ಪತಿ॒ ತ್ರಯ॑ಸ್ತ್ರಿಗ್ಂಶ॒ದ್ವೈ ದೇ॒ವತಾ॒ಸ್ತಾ ಏ॒ವ ಯಜ॑ಮಾನ ಆ॒ತ್ಮನ್ನನು॑ ಸ॒ಮಾರ॑ಭಂಯಁತೇ॒ ಭೂತ್ಯೈ॒ ಸಾ ವಾ ಏ॒ಷಾ ವಿಜಿ॑ತಿ॒ರ್ನಾಮೇಷ್ಟಿ॒ರ್ಯ ಏ॒ವಂ-ವಿಁ॒ದ್ವಾನೇ॒ತಯೇಷ್ಟ್ಯಾ॒ ಯಜ॑ತ ಉತ್ತ॒ಮಾಮೇ॒ವ ವಿಜಿ॑ತಿ॒-ಮ್ಭ್ರಾತೃ॑ವ್ಯೇಣ॒ ವಿ ಜ॑ಯತೇ ॥ 8 ॥
(ಇ॒ನ್ದ್ರಿ॒ಯಾವ॑ತೀ॒ – ಭೂತ್ಯಾ॑ – ಉ॒ತೈ – ಕಾ॒ನ್ನ ಪ॑ಞ್ಚಾ॒ಶಚ್ಚ॑) (ಅ. 2)
ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇಷಾ᳚-ಙ್ಗಾಯ॒ತ್ರ್ಯೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂನ್-ಥ್ಸ॒ಗೃಂಹ್ಯಾ॒ ಽಽದಾಯಾ॑-ಪ॒ಕ್ರಮ್ಯಾ॑ತಿಷ್ಠ॒-ತ್ತೇ॑-ಽಮನ್ಯನ್ತ ಯತ॒ರಾನ್. ವಾ ಇ॒ಯಮು॑ಪಾವ॒ರ್ಥ್ಸ್ಯತಿ॒ ತ ಇ॒ದ-ಮ್ಭ॑ವಿಷ್ಯ॒ನ್ತೀತಿ॒ ತಾಂ-ವ್ಯಁ॑ಹ್ವಯನ್ತ॒ ವಿಶ್ವ॑ಕರ್ಮ॒ನ್ನಿತಿ॑ ದೇ॒ವಾ ದಾಭೀತ್ಯಸು॑ರಾ॒-ಸ್ಸಾ ನಾನ್ಯ॑ತ॒ರಾಗ್ಶ್ಚ॒-ನೋಪಾವ॑ರ್ತತ॒ ತೇ ದೇ॒ವಾ ಏ॒ತ-ದ್ಯಜು॑ರಪಶ್ಯ॒ನ್ನೋಜೋ॑-ಽಸಿ॒ ಸಹೋ॑-ಽಸಿ॒ ಬಲ॑ಮಸಿ॒ [ಬಲ॑ಮಸಿ, ಭ್ರಾಜೋ॑-ಽಸಿ] 9
ಭ್ರಾಜೋ॑-ಽಸಿ ದೇ॒ವಾನಾ॒-ನ್ಧಾಮ॒ ನಾಮಾ॑-ಽಸಿ॒ ವಿಶ್ವ॑ಮಸಿ ವಿ॒ಶ್ವಾಯು॒-ಸ್ಸರ್ವ॑ಮಸಿ ಸ॒ರ್ವಾಯು॑ರಭಿ॒ಭೂರಿತಿ॒ ವಾವ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂನ॑ವೃಞ್ಜತ॒ ಯ-ದ್ಗಾ॑ಯ॒ತ್ರ್ಯ॑ಪ॒ಕ್ರಮ್ಯಾತಿ॑ಷ್ಠ॒-ತ್ತಸ್ಮಾ॑ದೇ॒ತಾ-ಙ್ಗಾ॑ಯ॒ತ್ರೀತೀಷ್ಟಿ॑ಮಾಹು-ಸ್ಸಂವಁಥ್ಸ॒ರೋ ವೈ ಗಾ॑ಯ॒ತ್ರೀ ಸಂ॑ವಁಥ್ಸ॒ರೋ ವೈ ತದ॑ಪ॒ಕ್ರಮ್ಯಾ॑ತಿಷ್ಠ॒-ದ್ಯದೇ॒ತಯಾ॑ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑- [ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ᳚ಮ್, ಪ್ರ॒ಜಾ-ಮ್ಪ॒ಶೂ-] 10
-ಮ್ಪ್ರ॒ಜಾ-ಮ್ಪ॒ಶೂ-ನವೃ॑ಞ್ಜತ॒ ತಸ್ಮಾ॑ದೇ॒ತಾಗ್ಂ ಸಂ॑ವಁ॒ರ್ಗ ಇತೀಷ್ಟಿ॑ಮಾಹು॒ರ್ಯೋ ಭ್ರಾತೃ॑ವ್ಯವಾ॒ನ್ಥ್ಸ್ಯಾ-ಥ್ಸಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇತಾ॒ಗ್ನಯೇ॑ ಸಂವಁ॒ರ್ಗಾಯ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ತ್ತಗ್ಂಶೃ॒ತಮಾಸ॑ನ್ನಮೇ॒ತೇನ॒ ಯಜು॑ಷಾ॒-ಽಭಿ ಮೃ॑ಶೇ॒ದೋಜ॑ ಏ॒ವ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂ-ನ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚ಸ್ಯ॒ ಭ್ರಾತೃ॑ವ್ಯೋ ಭವತಿ ॥ 11
(ಬಲ॑ಮಸ್ಯೇ॒ – ತಯಾ॑ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯಂ॑ – ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 3)
ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ ಅ॑ಸ್ಮಾ-ಥ್ಸೃ॒ಷ್ಟಾಃ ಪರಾ॑ಚೀರಾಯ॒-ನ್ತಾ ಯತ್ರಾವ॑ಸ॒-ನ್ತತೋ॑ ಗ॒ರ್ಮುದುದ॑ತಿಷ್ಠ॒-ತ್ತಾ ಬೃಹ॒ಸ್ಪತಿ॑ಶ್ಚಾ॒ನ್ವವೈ॑ತಾ॒ಗ್ಂ॒ ಸೋ᳚-ಽಬ್ರವೀ॒-ದ್ಬೃಹ॒ಸ್ಪತಿ॑ರ॒ನಯಾ᳚ ತ್ವಾ॒ ಪ್ರತಿ॑ಷ್ಠಾ॒ನ್ಯಥ॑ ತ್ವಾ ಪ್ರ॒ಜಾ ಉ॒ಪಾವ॑ರ್ಥ್ಸ್ಯ॒ನ್ತೀತಿ॒ ತ-ಮ್ಪ್ರಾತಿ॑ಷ್ಠ॒-ತ್ತತೋ॒ ವೈ ಪ್ರ॒ಜಾಪ॑ತಿ-ಮ್ಪ್ರ॒ಜಾ ಉ॒ಪಾವ॑ರ್ತನ್ತ॒ ಯಃ ಪ್ರ॒ಜಾಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತ-ಮ್ಪ್ರಾ॑ಜಾಪ॒ತ್ಯ-ಙ್ಗಾ᳚ರ್ಮು॒ತ-ಞ್ಚ॒ರು-ನ್ನಿರ್ವ॑ಪೇ-ತ್ಪ್ರ॒ಜಾಪ॑ತಿ- [-ನಿರ್ವ॑ಪೇ-ತ್ಪ್ರ॒ಜಾಪ॑ತಿಮ್, ಏ॒ವ ಸ್ವೇನ॑] 12
-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರಜ॑ನಯತಿಪ್ರ॒ಜಾಪ॑ತಿಃ ಪ॒ಶೂನ॑ಸೃಜತ॒ ತೇ᳚-ಽಸ್ಮಾ-ಥ್ಸೃ॒ಷ್ಟಾಃ ಪರಾ᳚ಞ್ಚ ಆಯ॒-ನ್ತೇ ಯತ್ರಾವ॑ಸ॒-ನ್ತತೋ॑ ಗ॒ರ್ಮುದುದ॑ತಿಷ್ಠ॒-ತ್ತಾ-ನ್ಪೂ॒ಷಾ ಚಾ॒ನ್ವವೈ॑ತಾ॒ಗ್ಂ॒ ಸೋ᳚-ಽಬ್ರವೀ-ತ್ಪೂ॒ಷಾ-ಽನಯಾ॑ ಮಾ॒ ಪ್ರತಿ॒ಷ್ಠಾಥ॑ ತ್ವಾ ಪ॒ಶವ॑ ಉ॒ಪಾವ॑ರ್ಥ್ಸ್ಯ॒ನ್ತೀತಿ॒ ಮಾ-ಮ್ಪ್ರತಿ॒ಷ್ಠೇತಿ॒ ಸೋಮೋ᳚-ಽಬ್ರವೀ॒-ನ್ಮಮ॒ ವಾ [-ಮಮ॒ ವೈ, ಅ॒ಕೃ॒ಷ್ಟ॒ಪ॒ಚ್ಯಮಿತ್ಯು॒ಭೌ] 13
ಅ॑ಕೃಷ್ಟಪ॒ಚ್ಯಮಿತ್ಯು॒ಭೌ ವಾ॒-ಮ್ಪ್ರತಿ॑ಷ್ಠಾ॒ನೀತ್ಯ॑ಬ್ರವೀ॒-ತ್ತೌ ಪ್ರಾತಿ॑ಷ್ಠ॒-ತ್ತತೋ॒ ವೈ ಪ್ರ॒ಜಾಪ॑ತಿ-ಮ್ಪ॒ಶವ॑ ಉ॒ಪಾವ॑ರ್ತನ್ತ॒ ಯಃ ಪ॒ಶುಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಗ್ಂ ಸೋ॑ಮಾಪೌ॒ಷ್ಣ-ಙ್ಗಾ᳚ರ್ಮು॒ತ-ಞ್ಚ॒ರು-ನ್ನಿರ್ವ॑ಪೇ-ಥ್ಸೋಮಾಪೂ॒ಷಣಾ॑ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಪ॒ಶೂ-ನ್ಪ್ರಜ॑ನಯತ॒-ಸ್ಸೋಮೋ॒ ವೈ ರೇ॑ತೋ॒ಧಾಃ ಪೂ॒ಷಾ ಪ॑ಶೂ॒ನಾ-ಮ್ಪ್ರ॑ಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ॑ತಿ ಪೂ॒ಷಾ ಪ॒ಶೂ-ನ್ಪ್ರಜ॑ನಯತಿ ॥ 14 ॥
(ವ॒ಪೇ॒-ತ್ಪ್ರ॒ಜಾಪ॑ತಿಂ॒ – ವೈಁ – ದಧಾ॑ತಿ ಪೂ॒ಷಾ – ತ್ರೀಣಿ॑ ಚ) (ಅ. 4)
ಅಗ್ನೇ॒ ಗೋಭಿ॑ರ್ನ॒ ಆ ಗ॒ಹೀನ್ದೋ॑ ಪು॒ಷ್ಟ್ಯಾ ಜು॑ಷಸ್ವ ನಃ । ಇನ್ದ್ರೋ॑ ಧ॒ರ್ತಾ ಗೃ॒ಹೇಷು॑ ನಃ ॥ ಸ॒ವಿ॒ತಾ ಯ-ಸ್ಸ॑ಹ॒ಸ್ರಿಯ॒-ಸ್ಸ ನೋ॑ ಗೃ॒ಹೇಷು॑ ರಾರಣತ್ । ಆ ಪೂ॒ಷಾ ಏ॒ತ್ವಾ ವಸು॑ ॥ ಧಾ॒ತಾ ದ॑ದಾತು ನೋ ರ॒ಯಿಮೀಶಾ॑ನೋ॒ ಜಗ॑ತ॒ಸ್ಪತಿಃ॑ । ಸ ನಃ॑ ಪೂ॒ರ್ಣೇನ॑ ವಾವನತ್ ॥ ತ್ವಷ್ಟಾ॒ ಯೋ ವೃ॑ಷ॒ಭೋ ವೃಷಾ॒ ಸ ನೋ॑ ಗೃ॒ಹೇಷು॑ ರಾರಣತ್ । ಸ॒ಹಸ್ರೇ॑ಣಾ॒ಯುತೇ॑ನ ಚ ॥ ಯೇನ॑ ದೇ॒ವಾ ಅ॒ಮೃತ॑- [ಅ॒ಮೃತ᳚ಮ್, ದೀ॒ರ್ಘಗ್ಗ್ ಶ್ರವೋ॑ ದಿ॒ವ್ಯೈರ॑ಯನ್ತ ।] 15
-ನ್ದೀ॒ರ್ಘಗ್ಗ್ ಶ್ರವೋ॑ ದಿ॒ವ್ಯೈರ॑ಯನ್ತ । ರಾಯ॑ಸ್ಪೋಷ॒ ತ್ವಮ॒ಸ್ಮಭ್ಯ॒-ಙ್ಗವಾ᳚ಙ್ಕು॒ಲ್ಮಿ-ಞ್ಜೀ॒ವಸ॒ ಆ ಯು॑ವಸ್ವ ॥ ಅ॒ಗ್ನಿ ರ್ಗೃ॒ಹಪ॑ತಿ॒-ಸ್ಸೋಮೋ॑ ವಿಶ್ವ॒ವನಿ॑-ಸ್ಸವಿ॒ತಾ ಸು॑ಮೇ॒ಧಾ-ಸ್ಸ್ವಾಹಾ᳚ ॥ ಅಗ್ನೇ॑ ಗೃಹಪತೇ॒ ಯಸ್ತೇ॒ ಘೃತ್ಯೋ॑ ಭಾ॒ಗಸ್ತೇನ॒ ಸಹ॒ ಓಜ॑ ಆ॒ಕ್ರಮ॑ಮಾಣಾಯ ಧೇಹಿ॒ ಶ್ರೈಷ್ಠ್ಯಾ᳚ತ್ಪ॒ಥೋ ಮಾ ಯೋ॑ಷ-ಮ್ಮೂ॒ರ್ಧಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 16 ॥
(ಅ॒ಮೃತ॑ – ಮ॒ಷ್ಟಾತ್ರಿಗ್ಂ॑ಶಚ್ಚ) (ಅ. 5)
ಚಿ॒ತ್ರಯಾ॑ ಯಜೇತ ಪ॒ಶುಕಾ॑ಮ ಇ॒ಯಂ-ವೈಁ ಚಿ॒ತ್ರಾ ಯದ್ವಾ ಅ॒ಸ್ಯಾಂ-ವಿಁಶ್ವ॑-ಮ್ಭೂ॒ತಮಧಿ॑ ಪ್ರ॒ಜಾಯ॑ತೇ॒ ತೇ ನೇ॒ಯಞ್ಚಿ॒ತ್ರಾ ಯ ಏ॒ವಂ-ವಿಁ॒ದ್ವಾಗ್ ಶ್ಚಿ॒ತ್ರಯಾ॑ ಪ॒ಶುಕಾ॑ಮೋ॒ ಯಜ॑ತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑ ರ್ಮಿಥು॒ನೈ ರ್ಜಾ॑ಯತೇ॒ ಪ್ರೈವಾಗ್ನೇ॒ಯೇನ॑ ವಾಪಯತಿ॒ ರೇತ॑-ಸ್ಸೌ॒ಮ್ಯೇನ॑ ದಧಾತಿ॒ ರೇತ॑ ಏ॒ವ ಹಿ॒ತ-ನ್ತ್ವಷ್ಟಾ॑ ರೂ॒ಪಾಣಿ॒ ವಿ ಕ॑ರೋತಿಸಾರಸ್ವ॒ತೌ ಭ॑ವತ ಏ॒ತದ್ವೈ ದೈವ್ಯ॑-ಮ್ಮಿಥು॒ನ-ನ್ದೈವ್ಯ॑ಮೇ॒ವಾಸ್ಮೈ॑ [-ದೈವ್ಯ॑ಮೇ॒ವಾಸ್ಮೈ᳚, ಮಿ॒ಥು॒ನ-ಮ್ಮ॑ದ್ಧ್ಯ॒ತೋ] 17
ಮಿಥು॒ನ-ಮ್ಮ॑ದ್ಧ್ಯ॒ತೋ ದ॑ಧಾತಿ॒ ಪುಷ್ಟ್ಯೈ᳚ ಪ್ರ॒ಜನ॑ನಾಯ ಸಿನೀವಾ॒ಲ್ಯೈ ಚ॒ರುರ್ಭ॑ವತಿ॒ ವಾಗ್ವೈ ಸಿ॑ನೀವಾ॒ಲೀ ಪುಷ್ಟಿಃ॒ ಖಲು॒ ವೈ ವಾಕ್ಪುಷ್ಟಿ॑ಮೇ॒ವ ವಾಚ॒ಮುಪೈ᳚ತ್ಯೈ॒ನ್ದ್ರ ಉ॑ತ್ತ॒ಮೋ ಭ॑ವತಿ॒ ತೇನೈ॒ವ ತನ್ಮಿ॑ಥು॒ನಗ್ಂ ಸ॒ಪ್ತೈತಾನಿ॑ ಹ॒ವೀಗ್ಂಷಿ॑ ಭವನ್ತಿ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವ॑-ಸ್ಸ॒ಪ್ತಾರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑ಸ್ಯು॒-ಭಯ॒ಸ್ಯಾ-ವ॑ರುದ್ಧ್ಯಾ॒ ಅಥೈ॒ತಾ ಆಹು॑ತೀ ರ್ಜುಹೋತ್ಯೇ॒ತೇ ವೈ ದೇ॒ವಾಃ ಪುಷ್ಟಿ॑ಪತಯ॒ಸ್ತ ಏ॒ವಾ ಸ್ಮಿ॒-ನ್ಪುಷ್ಟಿ॑-ನ್ದಧತಿ॒ ಪುಷ್ಯ॑ತಿ ಪ್ರ॒ಜಯಾ॑ ಪ॒ಶುಭಿ॒ರಥೋ॒ ಯದೇ॒ತಾ ಆಹು॑ತೀ ರ್ಜು॒ಹೋತಿ॒ ಪ್ರತಿ॑ಷ್ಠಿತ್ಯೈ ॥ 18 ॥
(ಅ॒ಸ್ಮೈ॒ – ತ ಏ॒ವ – ದ್ವಾದ॑ಶ ಚ) (ಅ. 6)
ಮಾ॒ರು॒ತಮ॑ಸಿ ಮ॒ರುತಾ॒ಮೋಜೋ॒-ಽಪಾ-ನ್ಧಾರಾ᳚-ಮ್ಭಿನ್ಧಿ ರ॒ಮಯ॑ತ ಮರುತ-ಶ್ಶ್ಯೇ॒ನಮಾ॒ಯಿನ॒-ಮ್ಮನೋ॑ಜವ ಸಂ॒-ವೃಁಷ॑ಣಗ್ಂ ಸುವೃ॒ಕ್ತಿಮ್ ॥ ಯೇನ॒ ಶರ್ಧ॑ ಉ॒ಗ್ರಮವ॑-ಸೃಷ್ಟ॒ಮೇತಿ॒ ತದ॑ಶ್ವಿನಾ॒ ಪರಿ॑ ಧತ್ತಗ್ಗ್ ಸ್ವ॒ಸ್ತಿ । ಪು॒ರೋ॒ವಾ॒ತೋ ವರ್ಷ॑ಞ್ಜಿ॒ನ್ವರಾ॒ವೃ-ಥ್ಸ್ವಾಹಾ॑ ವಾ॒ತಾವದ್- ವರ್ಷ॑ನ್ನು॒ಗ್ರರಾ॒ವೃ-ಥ್ಸ್ವಾಹಾ᳚ ಸ್ತ॒ನಯ॒ನ್ ವರ್ಷ॑-ನ್ಭೀ॒ಮರಾ॒ವಥ್ಸ್ವಾಹಾ॑ ಽನಶ॒ನ್ಯ॑ವ॒ಸ್ಫೂರ್ಜ॑ನ್-ದಿ॒ದ್ಯು-ದ್ವರ್ಷ॑ನ್-ತ್ವೇ॒ಷರಾ॒ವೃ-ಥ್ಸ್ವಾಹಾ॑ ಽತಿರಾ॒ತ್ರಂ॒-ವಁರ್ಷ॑-ನ್ಪೂ॒ರ್ತಿರಾ॒ವೃ- [-ಪೂ॒ರ್ತಿರಾ॒ವೃತ್, ಸ್ವಾಹಾ॑ ಬ॒ಹು] 19
-ಥ್ಸ್ವಾಹಾ॑ ಬ॒ಹು ಹಾ॒ಯಮ॑ವೃಷಾ॒ದಿತಿ॑ ಶ್ರು॒ತರಾ॒ವೃ-ಥ್ಸ್ವಾಹಾ॒ ಽಽತಪ॑ತಿ॒ ವರ್ಷ॑ನ್-ವಿ॒ರಾಡಾ॒ವೃ-ಥ್ಸ್ವಾಹಾ॑ ಽವ॒ಸ್ಫೂರ್ಜ॑ನ್-ದಿ॒ದ್ಯು-ದ್ವರ್ಷ॑-ನ್ಭೂ॒ತರಾ॒ವೃ-ಥ್ಸ್ವಾಹಾ॒ಮಾನ್ದಾ॒ ವಾಶಾ॒-ಶ್ಶುನ್ಧ್ಯೂ॒ರಜಿ॑ರಾಃ । ಜ್ಯೋತಿ॑ಷ್ಮತೀ॒-ಸ್ತಮ॑ಸ್ವರೀ॒-ರುನ್ದ॑ತೀ॒-ಸ್ಸುಫೇ॑ನಾಃ । ಮಿತ್ರ॑ಭೃತಃ॒, ಖ್ಷತ್ರ॑ಭೃತ॒-ಸ್ಸುರಾ᳚ಷ್ಟ್ರಾ ಇ॒ಹ ಮಾ॑-ಽವತ ॥ವೃಷ್ಣೋ॒ ಅಶ್ವ॑ಸ್ಯ ಸ॒ನ್ದಾನ॑ಮಸಿ॒ ವೃಷ್ಟ್ಯೈ॒ ತ್ವೋಪ॑ ನಹ್ಯಾಮಿ ॥ 20 ॥
(ಪೂ॒ರ್ತಿರಾ॒ವೃ-ದ್- ದ್ವಿಚ॑ತ್ವಾರಿಗ್ಂಶಚ್ಚ) (ಅ. 7)
ದೇವಾ॑ ವಸವ್ಯಾ॒ ಅಗ್ನೇ॑ ಸೋಮ ಸೂರ್ಯ ॥ ದೇವಾ᳚-ಶ್ಶರ್ಮಣ್ಯಾ॒ ಮಿತ್ರಾ॑ವರುಣಾ-ಽರ್ಯಮನ್ನ್ ॥ ದೇವಾ᳚-ಸ್ಸಪೀತ॒ಯೋ ಽಪಾ᳚-ನ್ನಪಾದಾಶುಹೇಮನ್ನ್ । ಉ॒ದ್ನೋ ದ॑ತ್ತೋದ॒ಧಿ-ಮ್ಭಿ॑ನ್ತ್ತ ದಿ॒ವಃ ಪ॒ರ್ಜನ್ಯಾ॑ದ॒ನ್ತರಿ॑ಖ್ಷಾತ್-ಪೃಥಿ॒ವ್ಯಾಸ್ತತೋ॑ ನೋ॒ ವೃಷ್ಟ್ಯಾ॑-ಽವತ ॥ ದಿವಾ॑ ಚಿ॒ತ್ತಮಃ॑ ಕೃಣ್ವನ್ತಿ ಪ॒ರ್ಜನ್ಯೇ॑ನೋ-ದವಾ॒ಹೇನ॑ । ಪೃ॒ಥಿ॒ವೀಂ-ಯಁ-ದ್ವ್ಯು॒ನ್ದನ್ತಿ॑ ॥ ಆಯ-ನ್ನರ॑-ಸ್ಸು॒ದಾನ॑ವೋ ದದಾ॒ಶುಷೇ॑ ದಿ॒ವಃ ಕೋಶ॒ಮಚು॑ಚ್ಯವುಃ । ವಿ ಪ॒ರ್ಜನ್ಯಾ᳚-ಸ್ಸೃಜನ್ತಿ॒ ರೋದ॑ಸೀ॒ ಅನು॒ ಧನ್ವ॑ನಾ ಯನ್ತಿ [ ] 21
ವೃ॒ಷ್ಟಯಃ॑ ॥ ಉದೀ॑ರಯಥಾ ಮರುತ-ಸ್ಸಮುದ್ರ॒ತೋ ಯೂ॒ಯಂ-ವೃಁ॒ಷ್ಟಿಂ-ವಁ॑ರ್ಷಯಥಾ ಪುರೀಷಿಣಃ । ನ ವೋ॑ ದಸ್ರಾ॒ ಉಪ॑ ದಸ್ಯನ್ತಿ ಧೇ॒ನವ॒-ಶ್ಶುಭಂ॑-ಯಾಁ॒ತಾಮನು॒ ರಥಾ॑ ಅವೃಥ್ಸತ ॥ ಸೃ॒ಜಾ ವೃ॒ಷ್ಟಿ-ನ್ದಿ॒ವ ಆ-ಽದ್ಭಿ-ಸ್ಸ॑ಮು॒ದ್ರ-ಮ್ಪೃ॑ಣ ॥ ಅ॒ಬ್ಜಾ ಅ॑ಸಿ ಪ್ರಥಮ॒ಜಾ ಬಲ॑ಮಸಿ ಸಮು॒ದ್ರಿಯ᳚ಮ್ ॥ ಉನ್ನ॑ಮ್ಭಯ ಪೃಥಿ॒ವೀ-ಮ್ಭಿ॒ನ್ಧೀದ-ನ್ದಿ॒ವ್ಯ-ನ್ನಭಃ॑ । ಉ॒ದ್ನೋ ದಿ॒ವ್ಯಸ್ಯ॑ ನೋ ದೇ॒ಹೀಶಾ॑ನೋ॒ ವಿಸೃ॑ಜಾ॒ ದೃತಿ᳚ಮ್ ॥ ಯೇ ದೇ॒ವಾ ದಿ॒ವಿಭಾ॑ಗಾ॒ ಯೇ᳚-ಽನ್ತರಿ॑ಖ್ಷ ಭಾಗಾ॒ ಯೇ ಪೃ॑ಥಿ॒ವಿ ಭಾ॑ಗಾಃ । ತ ಇ॒ಮಂ-ಯಁ॒ಜ್ಞಮ॑ವನ್ತು॒ ತ ಇ॒ದ-ಙ್ಖ್ಷೇತ್ರ॒ಮಾ ವಿ॑ಶನ್ತು॒ ತ ಇ॒ದ-ಙ್ಖ್ಷೇತ್ರ॒ಮನು॒ ವಿ ವಿ॑ಶನ್ತು ॥ 22 ॥
(ಯ॒ನ್ತಿ॒ – ದೇ॒ವಾ – ವಿಗ್ಂ॑ಶ॒ತಿಶ್ಚ॑) (ಅ. 8)
ಮಾ॒ರು॒ತಮ॑ಸಿ ಮ॒ರುತಾ॒ಮೋಜ॒ ಇತಿ॑ ಕೃ॒ಷ್ಣಂ-ವಾಁಸಃ॑ ಕೃ॒ಷ್ಣತೂ॑ಷ॒-ಮ್ಪರಿ॑ ಧತ್ತ ಏ॒ತದ್ವೈ ವೃಷ್ಟ್ಯೈ॑ ರೂ॒ಪಗ್ಂ ಸರೂ॑ಪ ಏ॒ವ ಭೂ॒ತ್ವಾ ಪ॒ರ್ಜನ್ಯಂ॑-ವಁರ್ಷಯತಿರ॒ಮಯ॑ತ ಮರುತ-ಶ್ಶ್ಯೇ॒ನಮಾ॒ಯಿನ॒ಮಿತಿ॑ ಪಶ್ಚಾದ್ವಾ॒ತ-ಮ್ಪ್ರತಿ॑ ಮೀವತಿ ಪುರೋವಾ॒ತಮೇ॒ವ ಜ॑ನಯತಿ ವ॒ರ್॒ಷಸ್ಯಾ ವ॑ರುದ್ಧ್ಯೈ ವಾತನಾ॒ಮಾನಿ॑ ಜುಹೋತಿ ವಾ॒ಯುರ್ವೈ ವೃಷ್ಟ್ಯಾ॑ ಈಶೇ ವಾ॒ಯುಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ರ್ಜನ್ಯಂ॑-ವಁರ್ಷಯತ್ಯ॒ಷ್ಟೌ [ವರ್ಷಯತ್ಯ॒ಷ್ಟೌ, ಜು॒ಹೋ॒ತಿ॒ ಚತ॑ಸ್ರೋ॒ ವೈ] 23
ಜು॑ಹೋತಿ॒ ಚತ॑ಸ್ರೋ॒ ವೈ ದಿಶ॒ಶ್ಚತ॑ಸ್ರೋ-ಽವಾನ್ತರದಿ॒ಶಾ ದಿ॒ಗ್ಭ್ಯ ಏ॒ವ ವೃಷ್ಟಿ॒ಗ್ಂ॒ ಸ-ಮ್ಪ್ರ ಚ್ಯಾ॑ವಯತಿ ಕೃಷ್ಣಾಜಿ॒ನೇ ಸಂಯೌಁ॑ತಿ ಹ॒ವಿರೇ॒ವಾಕ॑ರನ್ತರ್ವೇ॒ದಿ ಸಂಯೌಁ॒ತ್ಯ ವ॑ರುದ್ಧ್ಯೈ॒ ಯತೀ॑ನಾಮ॒ದ್ಯಮಾ॑ನಾನಾಗ್ಂ ಶೀ॒ರ್॒ಷಾಣಿ॒ ಪರಾ॑-ಽಪತ॒ನ್ತೇ ಖ॒ರ್ಜೂರಾ॑ ಅಭವ॒ನ್-ತೇಷಾ॒ಗ್ಂ॒ ರಸ॑ ಊ॒ರ್ಧ್ವೋ॑-ಽಪತ॒ತ್-ತಾನಿ॑ ಕ॒ರೀರಾ᳚ಣ್ಯ-ಭವನ್-ಥ್ಸೌ॒ಮ್ಯಾನಿ॒ ವೈ ಕ॒ರೀರಾ॑ಣಿ ಸೌ॒ಮ್ಯಾ ಖಲು॒ ವಾ ಆಹು॑ತಿ ರ್ದಿ॒ವೋ ವೃಷ್ಟಿ॑-ಞ್ಚ್ಯಾವಯತಿ॒ ಯತ್ಕ॒ರೀರಾ॑ಣಿ॒ ಭವ॑ನ್ತಿ [ ] 24
ಸೌ॒ಮ್ಯಯೈ॒ವಾ-ಽಽಹು॑ತ್ಯಾ ದಿ॒ವೋ ವೃಷ್ಟಿ॒ಮವ॑ ರುನ್ಧೇ॒ ಮಧು॑ಷಾ॒ ಸಂ-ಯೌಁ᳚ತ್ಯ॒ಪಾಂ-ವಾಁ ಏ॒ಷ ಓಷ॑ಧೀನಾ॒ಗ್ಂ॒ ರಸೋ॒ ಯನ್ಮದ್ಧ್ವ॒ದ್ಭ್ಯ ಏ॒ವೌಷ॑ಧೀಭ್ಯೋ ವರ್ಷ॒ತ್ಯಥೋ॑ ಅ॒ದ್ಭ್ಯ ಏ॒ವೌಷ॑ಧೀಭ್ಯೋ॒ ವೃಷ್ಟಿ॒ನಿ-ನ್ನ॑ಯತಿ॒ ಮಾನ್ದಾ॒ ವಾಶಾ॒ ಇತಿ॒ ಸಂಯೌಁ॑ತಿ ನಾಮ॒ಧೇಯೈ॑ರೇ॒ವೈನಾ॒ ಅಚ್ಛೈ॒ತ್ಯಥೋ॒ ಯಥಾ᳚ ಬ್ರೂ॒ಯಾದಸಾ॒ ವೇಹೀತ್ಯೇ॒ವಮೇ॒ವೈನಾ॑ ನಾಮ॒ಧೇಯೈ॒ರಾ – [ನಾಮ॒ಧೇಯೈ॒ರಾ, ಚ್ಯಾ॒ವ॒ಯ॒ತಿ॒ ವೃಷ್ಣೋ॒] 25
ಚ್ಯಾ॑ವಯತಿ॒ ವೃಷ್ಣೋ॒ ಅಶ್ವ॑ಸ್ಯ ಸ॒ನ್ದಾನ॑ಮಸಿ॒ ವೃಷ್ಟ್ಯೈ॒ ತ್ವೋಪ॑ ನಹ್ಯಾ॒ಮೀತ್ಯಾ॑ಹ॒ ವೃಷಾ॒ ವಾ ಅಶ್ವೋ॒ ವೃಷಾ॑ ಪ॒ರ್ಜನ್ಯಃ॑ ಕೃ॒ಷ್ಣ ಇ॑ವ॒ ಖಲು॒ ವೈ ಭೂ॒ತ್ವಾ ವ॑ರ್ಷತಿ ರೂ॒ಪೇಣೈ॒ವೈನ॒ಗ್ಂ॒ ಸಮ॑ರ್ಧಯತಿ ವ॒ರ್॒ಷಸ್ಯಾ ವ॑ರುದ್ಧ್ಯೈ ॥ 26 ॥
(ಅ॒ಷ್ಟೌ – ಭವ॑ನ್ತಿ – ನಾಮ॒ಧೇಯೈ॒ರೈ – ಕಾ॒ನ್ನ ತ್ರಿ॒ಗ್ಂ॒ಶಚ್ಚ॑) (ಅ. 9)
ದೇವಾ॑ ವಸವ್ಯಾ॒ ದೇವಾ᳚-ಶ್ಶರ್ಮಣ್ಯಾ॒ ದೇವಾ᳚-ಸ್ಸಪೀತಯ॒ ಇತ್ಯಾ ಬ॑ದ್ಧ್ನಾತಿ ದೇ॒ವತಾ॑ಭಿರೇ॒ವಾನ್ವ॒ಹಂ-ವೃಁಷ್ಟಿ॑ಮಿಚ್ಛತಿ॒ ಯದಿ॒ ವರ್ಷೇ॒ತ್-ತಾವ॑ತ್ಯೇ॒ವ ಹೋ॑ತ॒ವ್ಯಂ॑-ಯಁದಿ॒ ನ ವರ್ಷೇ॒ಚ್ಛ್ವೋ ಭೂ॒ತೇ ಹ॒ವಿರ್ನಿರ್ವ॑ಪೇದಹೋರಾ॒ತ್ರೇ ವೈ ಮಿ॒ತ್ರಾವರು॑ಣಾವಹೋರಾ॒ತ್ರಾಭ್ಯಾ॒-ಙ್ಖಲು॒ ವೈ ಪ॒ರ್ಜನ್ಯೋ॑ ವರ್ಷತಿ॒ ನಕ್ತಂ॑-ವಾಁ॒ ಹಿ ದಿವಾ॑ ವಾ॒ ವರ್ಷ॑ತಿ ಮಿ॒ತ್ರಾವರು॑ಣಾವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಾ॑ [ತಾವೇ॒ವಾಸ್ಮೈ᳚, ಅ॒ಹೋ॒ರಾ॒ತ್ರಾಭ್ಯಾಂ᳚-] 27
ಅಹೋರಾ॒ತ್ರಾಭ್ಯಾ᳚-ಮ್ಪ॒ರ್ಜನ್ಯಂ॑ ವಁರ್ಷಯತೋ॒-ಽಗ್ನಯೇ॑ ಧಾಮ॒ಚ್ಛದೇ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲಗ್ಂ ಸೌ॒ರ್ಯಮೇಕ॑ಕಪಾಲಮ॒ಗ್ನಿರ್ವಾ ಇ॒ತೋ ವೃಷ್ಟಿ॒ಮುದೀ॑ರಯತಿ ಮ॒ರುತ॑-ಸ್ಸೃ॒ಷ್ಟಾ-ನ್ನ॑ಯನ್ತಿ ಯ॒ದಾ ಖಲು॒ ವಾ ಅ॒ಸಾವಾ॑ದಿ॒ತ್ಯೋ ನ್ಯಂ॑-ರ॒ಶ್ಮಿಭಿಃ॑ ಪರ್ಯಾ॒ವರ್ತ॒ತೇ-ಽಥ॑ವರ್ಷತಿಧಾಮ॒ಚ್ಛದಿ॑ವ॒ ಖಲು॒ ವೈ ಭೂ॒ತ್ವಾ ವ॑ರ್ಷತ್ಯೇ॒ತಾ ವೈ ದೇ॒ವತಾ॒ ವೃಷ್ಟ್ಯಾ॑ ಈಶತೇ॒ ತಾ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾ [ಭಾಗ॒ಧೇಯೇ॒ನೋಪ॑ ಧಾವತಿ॒ ತಾಃ, ಏ॒ವಾಸ್ಮೈ॑] 28
ಏ॒ವಾಸ್ಮೈ॑ ಪ॒ರ್ಜನ್ಯಂ॑-ವಁರ್ಷಯನ್ತ್ಯು॒ತಾ ವ॑ರ್ಷಿಷ್ಯ॒ನ್ ವರ್ಷ॑ತ್ಯೇ॒ವ ಸೃ॒ಜಾ ವೃ॒ಷ್ಟಿ-ನ್ದಿ॒ವ ಆ-ಽದ್ಭಿ-ಸ್ಸ॑ಮು॒ದ್ರ-ಮ್ಪೃ॒ಣೇತ್ಯಾ॑ಹೇ॒ಮಾಶ್ಚೈ॒ವಾ-ಮೂಶ್ಚಾ॒ಪ-ಸ್ಸಮ॑ರ್ಧಯ॒ತ್ಯಥೋ॑ ಆ॒ಭಿರೇ॒ವಾ-ಮೂರಚ್ಛೈ᳚ತ್ಯ॒ಬ್ಜಾ ಅ॑ಸಿ ಪ್ರಥಮ॒ಜಾ ಬಲ॑ಮಸಿ ಸಮು॒ದ್ರಿಯ॒ಮಿತ್ಯಾ॑ಹ ಯಥಾಯ॒ಜುರೇ॒ವೈತ-ದುನ್ನ॑-ಮ್ಭಯ ಪೃಥಿ॒ವೀಮಿತಿ॑ ವರ್ಷಾ॒ಹ್ವಾ-ಞ್ಜು॑ಹೋತ್ಯೇ॒ಷಾ ವಾ ಓಷ॑ಧೀನಾಂ-ವೃಁಷ್ಟಿ॒ವನಿ॒ಸ್ತಯೈ॒ವ ವೃಷ್ಟಿ॒ಮಾ ಚ್ಯಾ॑ವಯತಿ॒ ಯೇ ದೇ॒ವಾ ದಿ॒ವಿಭಾ॑ಗಾ॒ ಇತಿ॑ ಕೃಷ್ಣಾಜಿ॒ನಮವ॑ ಧೂನೋತೀ॒ಮ ಏ॒ವಾಸ್ಮೈ॑ ಲೋ॒ಕಾಃ ಪ್ರೀ॒ತಾ ಅ॒ಭೀಷ್ಟಾ॑ ಭವನ್ತಿ ॥ 29 ॥
(ಅ॒ಸ್ಮೈ॒ – ಧಾ॒ವ॒ತಿ॒ ತಾ – ವಾ – ಏಕ॑ವಿಗ್ಂಶತಿಶ್ಚ ) (ಅ. 10)
ಸರ್ವಾ॑ಣಿ॒ ಛನ್ದಾಗ್॑ಸ್ಯೇ॒ತಸ್ಯಾ॒-ಮಿಷ್ಟ್ಯಾ॑-ಮ॒ನೂಚ್ಯಾ॒ನೀತ್ಯಾ॑ಹು-ಸ್ತ್ರಿ॒ಷ್ಟುಭೋ॒ ವಾ ಏ॒ತದ್ವೀ॒ರ್ಯಂ॑-ಯಁ-ತ್ಕ॒ಕುದು॒ಷ್ಣಿಹಾ॒ ಜಗ॑ತ್ಯೈ॒ ಯದು॑ಷ್ಣಿಹ-ಕ॒ಕುಭಾ॑ವ॒ನ್ವಾಹ॒ ತೇನೈ॒ವ ಸರ್ವಾ॑ಣಿ॒ ಛನ್ದಾ॒ಗ್॒ಸ್ಯವ॑ ರುನ್ಧೇ ಗಾಯ॒ತ್ರೀ ವಾ ಏ॒ಷಾ ಯದು॒ಷ್ಣಿಹಾ॒ ಯಾನಿ॑ ಚ॒ತ್ವಾರ್ಯದ್ಧ್ಯ॒ಖ್ಷರಾ॑ಣಿ॒ ಚತು॑ಷ್ಪಾದ ಏ॒ವ ತೇ ಪ॒ಶವೋ॒ಯಥಾ॑ ಪುರೋ॒ಡಾಶೇ॑ ಪುರೋ॒ಡಾಶೋ-ಽದ್ಧ್ಯೇ॒ವಮೇ॒ವ ತ-ದ್ಯದ್-ಋ॒ಚ್ಯದ್ಧ್ಯ॒ಖ್ಷರಾ॑ಣಿ॒ ಯಜ್ಜಗ॑ತ್ಯಾ [ಯಜ್ಜಗ॑ತ್ಯಾ, ಪ॒ರಿ॒ದ॒ದ್ಧ್ಯಾದನ್ತಂ॑-] 30
ಪರಿದ॒ದ್ಧ್ಯಾದನ್ತಂ॑-ಯಁ॒ಜ್ಞ-ಙ್ಗ॑ಮಯೇ-ತ್ತ್ರಿ॒ಷ್ಟುಭಾ॒ ಪರಿ॑ ದಧಾತೀನ್ದ್ರಿ॒ಯಂ-ವೈಁ ವೀ॒ರ್ಯ॑-ನ್ತ್ರಿ॒ಷ್ಟುಗಿ॑ನ್ದ್ರಿ॒ಯ ಏ॒ವ ವೀ॒ರ್ಯೇ॑ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ॒ ನಾನ್ತ॑-ಙ್ಗಮಯ॒ತ್ಯಗ್ನೇ॒ ತ್ರೀ ತೇ॒ ವಾಜಿ॑ನಾ॒ ತ್ರೀ ಷ॒ಧಸ್ಥೇತಿ॒ ತ್ರಿವ॑ತ್ಯಾ॒ ಪರಿ॑ ದಧಾತಿ ಸರೂಪ॒ತ್ವಾಯ॒ ಸರ್ವೋ॒ ವಾ ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒-ಙ್ಕಾಮಾ॑ಯ-ಕಾಮಾಯ॒ ಪ್ರಯು॑ಜ್ಯತೇ॒ ಸರ್ವೇ᳚ಭ್ಯೋ॒ ಹಿ ಕಾಮೇ᳚ಭ್ಯೋ ಯ॒ಜ್ಞಃ ಪ್ರ॑ಯು॒ಜ್ಯತೇ᳚ ತ್ರೈಧಾತ॒ವೀಯೇ॑ನ ಯಜೇತಾಭಿ॒ಚರ॒ನ್-ಥ್ಸರ್ವೋ॒ ವಾ [ಸರ್ವೋ॒ ವೈ, ಏ॒ಷ] 31
ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವೈನಂ॑-ಯಁ॒ಜ್ಞೇನಾ॒ಭಿ ಚ॑ರತಿ ಸ್ತೃಣು॒ತ ಏ॒ವೈನ॑ಮೇ॒ತಯೈ॒ವ ಯ॑ಜೇತಾಭಿಚ॒ರ್ಯಮಾ॑ಣ॒-ಸ್ಸರ್ವೋ॒ ವಾ ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವ ಯ॒ಜ್ಞೇನ॑ ಯಜತೇ॒ ನೈನ॑ಮಭಿ॒ಚರ᳚ನ್-ಥ್ಸ್ತೃಣುತ ಏ॒ತಯೈ॒ವ ಯ॑ಜೇತ ಸ॒ಹಸ್ರೇ॑ಣ ಯ॒ಖ್ಷ್ಯಮಾ॑ಣಃ॒ ಪ್ರಜಾ॑ತಮೇ॒ವೈನ॑-ದ್ದದಾತ್ಯೇ॒ತಯೈ॒ವ ಯ॑ಜೇತ ಸ॒ಹಸ್ರೇ॑ಣೇಜಾ॒ನೋ-ಽನ್ತಂ॒-ವಾಁ ಏ॒ಷ ಪ॑ಶೂ॒ನಾ-ಙ್ಗ॑ಚ್ಛತಿ॒ [-ಗ॑ಚ್ಛತಿ, ಯ-ಸ್ಸ॒ಹಸ್ರೇ॑ಣ॒] 32
ಯ-ಸ್ಸ॒ಹಸ್ರೇ॑ಣ॒ ಯಜ॑ತೇ ಪ್ರ॒ಜಾಪ॑ತಿಃ॒ ಖಲು॒ ವೈ ಪ॒ಶೂನ॑ಸೃಜತ॒ ತಾಗ್ಸ್ತ್ರೈ॑ಧಾತ॒ ವೀಯೇ॑-ನೈ॒ವಾಸೃ॑ಜತ॒ ಯ ಏ॒ವಂ-ವಿಁ॒ದ್ವಾಗ್ ಸ್ತ್ರೈ॑ಧಾತ॒ವೀಯೇ॑ನಪ॒ಶುಕಾ॑ಮೋ॒ ಯಜ॑ತೇ॒ ಯಸ್ಮಾ॑ದೇ॒ವ ಯೋನೇಃ᳚ ಪ್ರ॒ಜಾಪ॑ತಿಃ ಪ॒ಶೂನಸೃ॑ಜತ॒ ತಸ್ಮಾ॑ದೇ॒ವೈನಾ᳚ನ್-ಥ್ಸೃಜತ॒ ಉಪೈ॑ನ॒ಮುತ್ತ॑ರಗ್ಂ ಸ॒ಹಸ್ರ॑-ನ್ನಮತಿ ದೇ॒ವತಾ᳚ಭ್ಯೋ॒ ವಾ ಏ॒ಷ ಆ ವೃ॑ಶ್ಚ್ಯತೇ॒ ಯೋ ಯ॒ಖ್ಷ್ಯ ಇತ್ಯು॒ಕ್ತ್ವಾ ನ ಯಜ॑ತೇ ತ್ರೈಧಾತ॒ವೀಯೇ॑ನ ಯಜೇತ॒ ಸರ್ವೋ॒ ವಾ ಏ॒ಷ ಯ॒ಜ್ಞೋ [ಯ॒ಜ್ಞಃ, ಯ-ತ್ತ್ರೈ॑ಧಾತ॒ವೀಯ॒ಗ್ಂ॒] 33
ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವ ಯ॒ಜ್ಞೇನ॑ ಯಜತೇ॒ ನ ದೇ॒ವತಾ᳚ಭ್ಯ॒ ಆ ವೃ॑ಶ್ಚ್ಯತೇ॒ ದ್ವಾದ॑ಶಕಪಾಲಃ ಪುರೋ॒ಡಾಶೋ॑ ಭವತಿ॒ ತೇ ತ್ರಯ॒ಶ್ಚತು॑ಷ್ಕಪಾಲಾ-ಸ್ತ್ರಿಷ್ಷಮೃದ್ಧ॒ತ್ವಾಯ॒ ತ್ರಯಃ॑ ಪುರೋ॒ಡಾಶಾ॑ ಭವನ್ತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯಾ॒ ಉತ್ತ॑ರ-ಉತ್ತರೋ॒ ಜ್ಯಾಯಾ᳚-ನ್ಭವತ್ಯೇ॒ವಮಿ॑ವ॒ ಹೀಮೇ ಲೋ॒ಕಾ ಯ॑ವ॒ಮಯೋ॒ ಮದ್ಧ್ಯ॑ ಏ॒ತದ್ವಾ ಅ॒ನ್ತರಿ॑ಖ್ಷಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ॒ ಸರ್ವೇ॑ಷಾಮಭಿಗ॒ಮಯ॒ನ್ನವ॑ ದ್ಯ॒ತ್ಯಛ॑ಬಣ್ಟ್ಕಾರ॒ಗ್ಂ॒ ಹಿರ॑ಣ್ಯ-ನ್ದದಾತಿ॒ ತೇಜ॑ ಏ॒ವಾ- [ಏ॒ವ, ಅವ॑ ರುನ್ಧೇ] 34
-ಽವ॑ ರುನ್ಧೇ ತಾ॒ರ್ಪ್ಯ-ನ್ದ॑ದಾತಿ ಪ॒ಶೂನೇ॒ವಾವ॑ ರುನ್ಧೇ ಧೇ॒ನು-ನ್ದ॑ದಾತ್ಯಾ॒ಶಿಷ॑ ಏ॒ವಾವ॑ ರುನ್ಧೇ॒ ಸಾಮ್ನೋ॒ ವಾ ಏ॒ಷ ವರ್ಣೋ॒ ಯದ್ಧಿರ॑ಣ್ಯಂ॒-ಯಁಜು॑ಷಾ-ನ್ತಾ॒ರ್ಪ್ಯಮು॑ಕ್ಥಾಮ॒ದಾನಾ᳚-ನ್ಧೇ॒ನುರೇ॒ತಾನೇ॒ವ ಸರ್ವಾ॒ನ್॒. ವರ್ಣಾ॒ನವ॑ ರುನ್ಧೇ ॥ 35 ॥
(ಜಗ॑ತ್ಯಾ – ಽಭಿ॒ಚರ॒ನ್-ಥ್ಸರ್ವೋ॒ ವೈ – ಗ॑ಚ್ಛತಿ – ಯ॒ಜ್ಞ – ಸ್ತೇಜ॑ ಏ॒ವ – ತ್ರಿ॒ಗ್ಂ॒ಶಚ್ಚ॑) (ಅ. 11)
ತ್ವಷ್ಟಾ॑ ಹ॒ತಪು॑ತ್ರೋ॒ ವೀನ್ದ್ರ॒ಗ್ಂ॒ ಸೋಮ॒ಮಾ-ಽಹ॑ರ॒-ತ್ತಸ್ಮಿ॒ನ್ನಿನ್ದ್ರ॑ ಉಪಹ॒ವಮೈ᳚ಚ್ಛತ॒ ತ-ನ್ನೋಪಾ᳚ಹ್ವಯತ ಪು॒ತ್ರ-ಮ್ಮೇ॑-ಽವಧೀ॒ರಿತಿ॒ ಸ ಯ॑ಜ್ಞವೇಶ॒ಸ-ಙ್ಕೃ॒ತ್ವಾ ಪ್ರಾ॒ಸಹಾ॒ ಸೋಮ॑ಮಪಿಬ॒-ತ್ತಸ್ಯ॒ ಯದ॒ತ್ಯಶಿ॑ಷ್ಯತ॒ ತ-ತ್ತ್ವಷ್ಟಾ॑-ಽಽಹವ॒ನೀಯ॒ಮುಪ॒ ಪ್ರಾವ॑ರ್ತಯ॒-ಥ್ಸ್ವಾಹೇನ್ದ್ರ॑ಶತ್ರುರ್ವರ್ಧ॒ಸ್ವೇತಿ॒ ಸ ಯಾವ॑ದೂ॒ರ್ಧ್ವಃ ಪ॑ರಾ॒ವಿದ್ಧ್ಯ॑ತಿ॒ ತಾವ॑ತಿ ಸ್ವ॒ಯಮೇ॒ವ ವ್ಯ॑ರಮತ॒ ಯದಿ॑ ವಾ॒ ತಾವ॑-ತ್ಪ್ರವ॒ಣ- [ತಾವ॑-ತ್ಪ್ರವ॒ಣಮ್, ಆಸೀ॒ದ್ಯದಿ॑] 36
-ಮಾಸೀ॒ದ್ಯದಿ॑ ವಾ॒ ತಾವ॒ದದ್ಧ್ಯ॒ಗ್ನೇರಾಸೀ॒-ಥ್ಸ ಸ॒ಮ್ಭವ॑ನ್ನ॒ಗ್ನೀಷೋಮಾ॑ವ॒ಭಿ ಸಮ॑ಭವ॒-ಥ್ಸ ಇ॑ಷುಮಾ॒ತ್ರಮಿ॑ಷುಮಾತ್ರಂ॒-ವಿಁಷ್ವ॑ಙ್ಙವರ್ಧತ॒ ಸ ಇ॒ಮಾಂ-ಲೋಁ॒ಕಾನ॑ವೃಣೋ॒ದ್ಯ-ದಿ॒ಮಾಂ-ಲೋಁ॒ಕಾನವೃ॑ಣೋ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವ-ನ್ತಸ್ಮಾ॒ದಿನ್ದ್ರೋ॑-ಽಬಿಭೇ॒ದಪಿ॒ ತ್ವಷ್ಟಾ॒ ತಸ್ಮೈ॒ ತ್ವಷ್ಟಾ॒ ವಜ್ರ॑ಮಸಿಞ್ಚ॒-ತ್ತಪೋ॒ ವೈ ಸ ವಜ್ರ॑ ಆಸೀ॒-ತ್ತಮುದ್ಯ॑ನ್ತು॒-ನ್ನಾಶ॑ಕ್ನೋ॒ದಥ॒ ವೈ ತರ್ಹಿ॒ ವಿಷ್ಣು॑- [ವಿಷ್ಣುಃ॑, ಅ॒ನ್ಯಾ] 37
-ರ॒ನ್ಯಾ ದೇ॒ವತಾ॑ ಽಽಸೀ॒-ಥ್ಸೋ᳚-ಽಬ್ರವೀ॒-ದ್ವಿಷ್ಣ॒ವೇಹೀ॒ದಮಾ ಹ॑ರಿಷ್ಯಾವೋ॒ ಯೇನಾ॒ಯಮಿ॒ದಮಿತಿ॒ಸ ವಿಷ್ಣು॑ಸ್ತ್ರೇ॒ಧಾ-ಽಽತ್ಮಾನಂ॒-ವಿಁನ್ಯ॑ಧತ್ತ ಪೃಥಿ॒ವ್ಯಾ-ನ್ತೃತೀ॑ಯಮ॒ನ್ತರಿ॑ಖ್ಷೇ॒ ತೃತೀ॑ಯ-ನ್ದಿ॒ವಿ ತೃತೀ॑ಯ-ಮಭಿಪರ್ಯಾವ॒ರ್ತಾ-ದ್ಧ್ಯಬಿ॑ಭೇ॒ದ್ಯತ್-ಪೃ॑ಥಿ॒ವ್ಯಾ-ನ್ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರ ಹಾ॒ರಸ್ತಿ॒ ವಾ ಇ॒ದ- [ವಾ ಇ॒ದಮ್, ಮಯಿ॑ ವೀ॒ರ್ಯ॑-ನ್ತ-ತ್ತೇ॒] 38
-ಮ್ಮಯಿ॑ ವೀ॒ರ್ಯ॑-ನ್ತ-ತ್ತೇ॒ ಪ್ರದಾ᳚ಸ್ಯಾ॒ಮೀತಿ॒ ತದ॑ಸ್ಮೈ॒ ಪ್ರಾಯ॑ಚ್ಛ॒-ತ್ತ-ತ್ಪ್ರತ್ಯ॑ಗೃಹ್ಣಾ॒ದಧಾ॒ ಮೇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾ-ದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯದ॒ನ್ತರಿ॑ಖ್ಷೇ॒ ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರಹಾ॒ರಸ್ತಿ॒ ವಾ ಇ॒ದ- [ವಾ ಇ॒ದಮ್, ಮಯಿ॑ ವೀ॒ರ್ಯ॑-ನ್ತ-ತ್ತೇ॒] 39
-ಮ್ಮಯಿ॑ ವೀ॒ರ್ಯ॑-ನ್ತ-ತ್ತೇ॒ ಪ್ರ ದಾ᳚ಸ್ಯಾ॒ಮೀತಿ॒ ತದ॑ಸ್ಮೈ॒ ಪ್ರಾಯ॑ಚ್ಛ॒-ತ್ತ-ತ್ಪ್ರತ್ಯ॑ಗೃಹ್ಣಾ॒-ದ್ದ್ವಿರ್ಮಾ॑-ಽಧಾ॒ ಇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯದ್ದಿ॒ವಿ ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರಹಾ॒ರ್ಯೇನಾ॒ಹ- [ಪ್ರಹಾ॒ರ್ಯೇನಾ॒ಹಮ್, ಇ॒ದಮಸ್ಮಿ॒ ತ-ತ್ತೇ॒] 40
-ಮಿ॒ದಮಸ್ಮಿ॒ ತ-ತ್ತೇ॒ ಪ್ರದಾ᳚ಸ್ಯಾ॒ಮೀತಿ॒ ತ್ವೀ(3) ಇತ್ಯ॑ಬ್ರವೀ-ಥ್ಸ॒ನ್ಧಾ-ನ್ತು ಸನ್ದ॑ಧಾವಹೈ॒ ತ್ವಾಮೇ॒ವ ಪ್ರವಿ॑ಶಾ॒ನೀತಿ॒ ಯನ್ಮಾ-ಮ್ಪ್ರ॑ವಿ॒ಶೇಃ ಕಿ-ಮ್ಮಾ॑ ಭುಞ್ಜ್ಯಾ॒ ಇತ್ಯ॑ಬ್ರವೀ॒-ತ್ತ್ವಾಮೇ॒ವೇನ್ಧೀ॑ಯ॒ ತವ॒ ಭೋಗಾ॑ಯ॒ ತ್ವಾ-ಮ್ಪ್ರವಿ॑ಶೇಯ॒ಮಿತ್ಯ॑ಬ್ರವೀ॒-ತ್ತಂ-ವೃಁ॒ತ್ರಃ ಪ್ರಾವಿ॑ಶದು॒ದರಂ॒-ವೈಁ ವೃ॒ತ್ರಃ, ಖ್ಷು-ತ್ಖಲು॒ ವೈ ಮ॑ನು॒ಷ್ಯ॑ಸ್ಯ॒ ಭ್ರಾತೃ॑ವ್ಯೋ॒ ಯ [ಭ್ರಾತೃ॑ವ್ಯೋ॒ ಯಃ, ಏ॒ವಂ-ವೇಁದ॒ ಹನ್ತಿ॒] 41
ಏ॒ವಂ-ವೇಁದ॒ ಹನ್ತಿ॒ ಖ್ಷುಧ॒-ಮ್ಭ್ರಾತೃ॑ವ್ಯ॒-ನ್ತದ॑ಸ್ಮೈ॒ ಪ್ರಾಯ॑ಚ್ಛ॒ತ್ತ-ತ್ಪ್ರತ್ಯ॑ಗೃಹ್ಣಾ॒ತ್- ತ್ರಿರ್ಮಾ॑-ಽಧಾ॒ ಇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯತ್ತ್ರಿಃ ಪ್ರಾಯ॑ಚ್ಛ॒-ತ್ತ್ರಿಃ ಪ್ರ॒ತ್ಯಗೃ॑ಹ್ಣಾ॒-ತ್ತ-ತ್ತ್ರಿ॒ಧಾತೋ᳚ಸ್ತ್ರಿಧಾತು॒ತ್ವಂ-ಯಁ-ದ್ವಿಷ್ಣು॑ರ॒ನ್ವತಿ॑ಷ್ಠತ॒ ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತಸ್ಮಾ॑ದೈನ್ದ್ರಾವೈಷ್ಣ॒ವಗ್ಂ ಹ॒ವಿರ್ಭ॑ವತಿ॒ ಯದ್ವಾ ಇ॒ದ-ಙ್ಕಿಞ್ಚ॒ ತದ॑ಸ್ಮೈ॒ ತ-ತ್ಪ್ರಾಯ॑ಚ್ಛ॒-ದೃಚ॒-ಸ್ಸಾಮಾ॑ನಿ॒ ಯಜೂಗ್ಂ॑ಷಿ ಸ॒ಹಸ್ರಂ॒-ವಾಁ ಅ॑ಸ್ಮೈ॒ ತ-ತ್ಪ್ರಾಯ॑ಚ್ಛ॒-ತ್ತಸ್ಮಾ᳚-ಥ್ಸ॒ಹಸ್ರ॑ದಖ್ಷಿಣಮ್ ॥ 42 ॥
(ಪ್ರ॒ವ॒ಣಂ – ವಿಁಷ್ಣು॒- ರ್ವಾ ಇ॒ದ- ಮಿ॒ದ – ಮ॒ಹಂ – ಯೋಁ – ಭ॑ವ॒ – ತ್ಯೇಕ॑ ವಿಗ್ಂಶತಿಶ್ಚ) (ಅ. 12)
ದೇ॒ವಾ ವೈ ರಾ॑ಜ॒ನ್ಯಾ᳚-ಜ್ಜಾಯ॑ಮಾನಾ-ದಬಿಭಯು॒-ಸ್ತಮ॒ನ್ತರೇ॒ವ ಸನ್ತ॒-ನ್ದಾಮ್ನಾ ಽಪೌ᳚ಮ್ಭ॒ನ್-ಥ್ಸ ವಾ ಏ॒ಷೋ-ಽಪೋ᳚ಬ್ಧೋ ಜಾಯತೇ॒ ಯ-ದ್ರಾ॑ಜ॒ನ್ಯೋ॑ ಯದ್ವಾ ಏ॒ಷೋ-ಽನ॑ಪೋಬ್ಧೋ॒ ಜಾಯೇ॑ತ ವೃ॒ತ್ರಾ-ನ್ಘ್ನಗ್ಗ್ ಶ್ಚ॑ರೇ॒ದ್ಯ-ಙ್ಕಾ॒ಮಯೇ॑ತ ರಾಜ॒ನ್ಯ॑ಮನ॑ಪೋಬ್ಧೋ ಜಾಯೇತ ವೃ॒ತ್ರಾ-ನ್ಘ್ನಗ್ಗ್ ಶ್ಚ॑ರೇ॒ದಿತಿ॒ ತಸ್ಮಾ॑ ಏ॒ತಮೈ᳚ನ್ದ್ರಾ ಬಾರ್ಹಸ್ಪ॒ತ್ಯ-ಞ್ಚ॒ರು-ನ್ನಿರ್ವ॑ಪೇದೈ॒ನ್ದ್ರೋ ವೈ ರಾ॑ಜ॒ನ್ಯೋ᳚ ಬ್ರಹ್ಮ॒ ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವೈನ॒-ನ್ದಾಮ್ನೋ॒-ಽಪೋಮ್ಭ॑ನಾ-ನ್ಮುಞ್ಚತಿ ಹಿರ॒ಣ್ಮಯ॒-ನ್ದಾಮ॒ ದಖ್ಷಿ॑ಣಾ ಸಾ॒ಖ್ಷಾದೇ॒ವೈನ॒-ನ್ದಾಮ್ನೋ॒-ಽಪೋಮ್ಭ॑ನಾ-ನ್ಮುಞ್ಚತಿ ॥ 43 ॥
(ಏ॒ನಂ॒ – ದ್ವಾದ॑ಶ ಚ) (ಅ. 13)
ನವೋ॑ನವೋ ಭವತಿ॒ ಜಾಯ॑ಮಾ॒ನೋ-ಽಹ್ನಾ᳚-ಙ್ಕೇ॒ತುರು॒ಷಸಾ॑ ಮೇ॒ತ್ಯಗ್ರೇ᳚ । ಭಾ॒ಗ-ನ್ದೇ॒ವೇಭ್ಯೋ॒ ವಿದ॑ಧಾತ್ಯಾ॒ಯ-ನ್ಪ್ರಚ॒ನ್ದ್ರಮಾ᳚ಸ್ತಿರತಿ ದೀ॒ರ್ಘಮಾಯುಃ॑ ॥ ಯಮಾ॑ದಿ॒ತ್ಯಾ ಅ॒ಗ್ಂ॒ಶುಮಾ᳚ಪ್ಯಾ॒ಯಯ॑ನ್ತಿ॒ ಯಮಖ್ಷಿ॑ತ॒-ಮಖ್ಷಿ॑ತಯಃ॒ ಪಿಬ॑ನ್ತಿ । ತೇನ॑ ನೋ॒ ರಾಜಾ॒ ವರು॑ಣೋ॒ ಬೃಹ॒ಸ್ಪತಿ॒ರಾ ಪ್ಯಾ॑ಯಯನ್ತು॒ ಭುವ॑ನಸ್ಯ ಗೋ॒ಪಾಃ ॥ಪ್ರಾಚ್ಯಾ᳚-ನ್ದಿ॒ಶಿ ತ್ವಮಿ॑ನ್ದ್ರಾಸಿ॒ ರಾಜೋ॒ತೋದೀ᳚ಚ್ಯಾಂ-ವೃಁತ್ರಹನ್ ವೃತ್ರ॒ಹಾ-ಽಸಿ॑ । ಯತ್ರ॒ ಯನ್ತಿ॑ ಸ್ರೋ॒ತ್ಯಾಸ್ತ- [ಯನ್ತಿ॑ ಸ್ರೋ॒ತ್ಯಾಸ್ತತ್, ಜಿ॒ತ-ನ್ತೇ॑] 44
-ಜ್ಜಿ॒ತ-ನ್ತೇ॑ ದಖ್ಷಿಣ॒ತೋ ವೃ॑ಷ॒ಭ ಏ॑ಧಿ॒ ಹವ್ಯಃ॑ ॥ ಇನ್ದ್ರೋ॑ ಜಯಾತಿ॒ ನ ಪರಾ॑ ಜಯಾತಾ ಅಧಿರಾ॒ಜೋ ರಾಜ॑ಸು ರಾಜಯಾತಿ । ವಿಶ್ವಾ॒ ಹಿ ಭೂ॒ಯಾಃ ಪೃತ॑ನಾ ಅಭಿ॒ಷ್ಟೀರು॑ಪ॒ಸದ್ಯೋ॑ ನಮ॒ಸ್ಯೋ॑ ಯಥಾ-ಽಸ॑ತ್ ॥ ಅ॒ಸ್ಯೇದೇ॒ವ ಪ್ರರಿ॑ರಿಚೇ ಮಹಿ॒ತ್ವ-ನ್ದಿ॒ವಃ ಪೃ॑ಥಿ॒ವ್ಯಾಃ ಪರ್ಯ॒ನ್ತರಿ॑ಖ್ಷಾತ್ । ಸ್ವ॒ರಾಡಿನ್ದ್ರೋ॒ ದಮ॒ ಆ ವಿ॒ಶ್ವಗೂ᳚ರ್ತ-ಸ್ಸ್ವ॒ರಿರಮ॑ತ್ರೋ ವವಖ್ಷೇ॒ ರಣಾ॑ಯ ॥ ಅ॒ಭಿ ತ್ವಾ॑ ಶೂರ ನೋನು॒ಮೋ-ಽದು॑ಗ್ಧಾ ಇವ ಧೇ॒ನವಃ॑ । ಈಶಾ॑ನ- [ಈಶಾ॑ನಮ್, ಅ॒ಸ್ಯ] 45
-ಮ॒ಸ್ಯ ಜಗ॑ತ-ಸ್ಸುವ॒ರ್ದೃಶ॒ಮೀಶಾ॑ನಮಿನ್ದ್ರ ತ॒ಸ್ಥುಷಃ॑ ॥ ತ್ವಾಮಿದ್ಧಿ ಹವಾ॑ಮಹೇ ಸಾ॒ತಾ ವಾಜ॑ಸ್ಯ ಕಾ॒ರವಃ॑ । ತ್ವಾಂ-ವೃಁ॒ತ್ರೇಷ್ವಿ॑ನ್ದ್ರ॒ ಸತ್ಪ॑ತಿ॒-ನ್ನರ॒ಸ್ತ್ವಾ-ಙ್ಕಾಷ್ಠಾ॒ಸ್ವರ್ವ॑ತಃ ॥ ಯದ್ದ್ಯಾವ॑ಇನ್ದ್ರತೇಶ॒ತಗ್ಂ ಶ॒ತ-ಮ್ಭೂಮೀ॑ರು॒ತ ಸ್ಯುಃ । ನ ತ್ವಾ॑ ವಜ್ರಿನ್-ಥ್ಸ॒ಹಸ್ರ॒ಗ್ಂ॒ ಸೂರ್ಯಾ॒ ಅನು॒ ನ ಜಾ॒ತಮ॑ಷ್ಟ॒ ರೋದ॑ಸೀ ॥ ಪಿಬಾ॒ ಸೋಮ॑ಮಿನ್ದ್ರ॒ ಮನ್ದ॑ತು ತ್ವಾ॒ ಯನ್ತೇ॑ ಸು॒ಷಾವ॑ ಹರ್ಯ॒ಶ್ವಾದ್ರಿಃ॑ । 46
ಸೋ॒ತುರ್ಬಾ॒ಹುಭ್ಯಾ॒ಗ್ಂ॒ ಸುಯ॑ತೋ॒ ನಾರ್ವಾ᳚ ॥ ರೇ॒ವತೀ᳚ರ್ನ-ಸ್ಸಧ॒ಮಾದ॒ ಇನ್ದ್ರೇ॑ ಸನ್ತು ತು॒ವಿವಾ॑ಜಾಃ । ಖ್ಷು॒ಮನ್ತೋ॒ ಯಾಭಿ॒ರ್ಮದೇ॑ಮ ॥ ಉದ॑ಗ್ನೇ॒ ಶುಚ॑ಯ॒ಸ್ತವ॒ , ವಿ ಜ್ಯೋತಿ॒ಷೋ,ದು॒ ತ್ಯ-ಞ್ಜಾ॒ತವೇ॑ದಸಗ್ಂಸ॒ಪ್ತ ತ್ವಾ॑ ಹ॒ರಿತೋ॒ ರಥೇ॒ ವಹ॑ನ್ತಿ ದೇವ ಸೂರ್ಯ । ಶೋ॒ಚಿಷ್ಕೇ॑ಶಂ-ವಿಁಚಖ್ಷಣ ॥ ಚಿ॒ತ್ರ-ನ್ದೇ॒ವಾನಾ॒ಮುದ॑ಗಾ॒ದನೀ॑ಕ॒-ಞ್ಚಖ್ಷು॑ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ । ಆ-ಽಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಖ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑- [ಜಗ॑ತಸ್ತ॒ಸ್ಥುಷಃ॑, ಚ ।] 47
-ಶ್ಚ ॥ ವಿಶ್ವೇ॑ ದೇ॒ವಾ ಋ॑ತಾ॒ವೃಧ॑ ಋ॒ತುಭಿ॑ರ್-ಹವನ॒ಶ್ರುತಃ॑ । ಜು॒ಷನ್ತಾಂ॒-ಯುಁಜ್ಯ॒-ಮ್ಪಯಃ॑ ॥ ವಿಶ್ವೇ॑ ದೇವಾ-ಶ್ಶೃಣು॒ತೇಮಗ್ಂ ಹವ॑-ಮ್ಮೇ॒ ಯೇ ಅ॒ನ್ತರಿ॑ಖ್ಷೇ॒ ಯ ಉಪ॒ ದ್ಯವಿ॒ಷ್ಠ । ಯೇ ಅ॑ಗ್ನಿಜಿ॒ಹ್ವಾ ಉ॒ತ ವಾ॒ ಯಜ॑ತ್ರಾ ಆ॒ಸದ್ಯಾ॒ಸ್ಮಿ-ನ್ಬ॒ರ್॒ಹಿಷಿ॑ ಮಾದಯದ್ಧ್ವಮ್ ॥ 48 ॥
(ತ – ದೀಶಾ॑ನ॒ – ಮದ್ರಿ॑ – ಸ್ತ॒ಸ್ಥುಷ॑ – ಸ್ತ್ರಿ॒ಗ್ಂ॒ಶಚ್ಚ॑) (ಅ. 14)
(ದೇ॒ವಾ ಮ॑ನು॒ಷ್ಯಾ॑ – ದೇವಸು॒ರಾ ಅ॑ಬ್ರುವನ್ – ದೇವಾಸು॒ರಾಸ್ತೇಷಾ᳚-ಙ್ಗಾಯ॒ತ್ರೀ – ಪ್ರ॒ಜಾಪ॑ತಿ॒ಸ್ತಾ ಯತ್ರಾ-ಽ – ಗ್ನೇ॒ ಗೋಭಿಃ॑ – ಚಿ॒ತ್ರಯಾ॑ – ಮಾರು॒ತಂ – ದೇವಾ॑ ವಸವ್ಯಾ॒ ಅಗ್ನೇ॑ – ಮಾರು॒ತಮಿತಿ॒ – ದೇವಾ॑ ವಸವ್ಯಾ॒ ದೇವಾ᳚-ಶ್ಶರ್ಮಣ್ಯಾಃ॒ – ಸರ್ವಾ॑ಣಿ॒ – ತ್ವಷ್ಟಾ॑ ಹ॒ತಪು॑ತ್ರೋ – ದೇ॒ವಾ ವೈ ರಾ॑ಜ॒ನ್ಯಾ᳚ನ್ – ನವೋ॑ನವ॒ – ಶ್ಚತು॑ರ್ದಶ )
(ದೇ॒ವಾ ಮ॑ನು॒ಷ್ಯಾಃ᳚ – ಪ್ರ॒ಜಾ-ಮ್ಪ॒ಶುನ್ – ದೇವಾ॑ ವಸವ್ಯಾಃ – ಪರಿದ॒ಧ್ಯದಿ॒ದ- ಮಸ್ಮ್ಯ॒ – ಷ್ಟಾ ಚ॑ತ್ವಾರಿಗ್ಂಶತ್ )
(ದೇ॒ವಾ ಮ॑ನು॒ಷ್ಯಾ॑, ಮಾದಯಧ್ವಂ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಚತುರ್ಥಃ ಪ್ರಶ್ನ-ಸ್ಸಮಾಪ್ತಃ ॥