ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪಞ್ಚಮಃ ಪ್ರಶ್ನಃ – ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ವಿ॒ಶ್ವರೂ॑ಪೋ॒ ವೈ ತ್ವಾ॒ಷ್ಟ್ರಃ ಪು॒ರೋಹಿ॑ತೋ ದೇ॒ವಾನಾ॑ಮಾಸೀ-ಥ್ಸ್ವ॒ಸ್ರೀಯೋ-ಽಸು॑ರಾಣಾ॒-ನ್ತಸ್ಯ॒ ತ್ರೀಣಿ॑ ಶೀ॒ರ್॒ಷಾಣ್ಯಾ॑ಸನ್-ಥ್ಸೋಮ॒ಪಾನಗ್ಂ॑ ಸುರಾ॒ಪಾನ॑-ಮ॒ನ್ನಾದ॑ನ॒ಗ್ಂ॒ ಸ ಪ್ರ॒ತ್ಯಖ್ಷ॑-ನ್ದೇ॒ವೇಭ್ಯೋ॑ ಭಾ॒ಗಮ॑ವದ-ತ್ಪ॒ರೋಖ್ಷ॒ಮಸು॑ರೇಭ್ಯ॒-ಸ್ಸರ್ವ॑ಸ್ಮೈ॒ ವೈ ಪ್ರ॒ತ್ಯಖ್ಷ॑-ಮ್ಭಾ॒ಗಂ-ವಁ॑ದನ್ತಿ॒ ಯಸ್ಮಾ॑ ಏ॒ವ ಪ॒ರೋಖ್ಷಂ॒-ವಁದ॑ನ್ತಿ॒ ತಸ್ಯ॑ ಭಾ॒ಗ ಉ॑ದಿ॒ತಸ್ತಸ್ಮಾ॒ದಿನ್ದ್ರೋ॑ ಽಬಿಭೇದೀ॒ದೃಂ-ವೈಁ ರಾ॒ಷ್ಟ್ರಂ-ವಿಁ ಪ॒ರ್ಯಾವ॑ರ್ತಯ॒ತೀತಿ॒ ತಸ್ಯ॒ ವಜ್ರ॑ಮಾ॒ದಾಯ॑ ಶೀ॒ರ್॒ಷಾಣ್ಯ॑ಚ್ಛಿನ॒ದ್ಯ-ಥ್ಸೋ॑ಮ॒ಪಾನ॒- [-ಥ್ಸೋ॑ಮ॒ಪಾನ᳚ಮ್, ಆಸೀ॒ಥ್ಸ] 1
-ಮಾಸೀ॒ಥ್ಸ ಕ॒ಪಿಞ್ಜ॑ಲೋ ಽಭವ॒-ದ್ಯ-ಥ್ಸು॑ರಾ॒ಪಾನ॒ಗ್ಂ॒ ಸ ಕ॑ಲ॒ವಿಙ್ಕೋ॒ ಯದ॒ನ್ನಾದ॑ನ॒ಗ್ಂ॒ ಸ ತಿ॑ತ್ತಿ॒ರಿಸ್ತಸ್ಯಾ᳚ಞ್ಜ॒ಲಿನಾ᳚ ಬ್ರಹ್ಮಹ॒ತ್ಯಾಮುಪಾ॑ಗೃಹ್ಣಾ॒-ತ್ತಾಗ್ಂ ಸಂ॑ವಁಥ್ಸ॒ರಮ॑ಬಿಭ॒ಸ್ತ-ಮ್ಭೂ॒ತಾನ್ಯ॒ಭ್ಯ॑ಕ್ರೋಶ॒-ನ್ಬ್ರಹ್ಮ॑ಹ॒ನ್ನಿತಿ॒ ಸ ಪೃ॑ಥಿ॒ವೀಮುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹಾ॒ಣೇತಿ॒ ಸಾ-ಽಬ್ರ॑ವೀ॒ದ್ವರಂ॑-ವೃಁಣೈ ಖಾ॒ತಾ-ತ್ಪ॑ರಾಭವಿ॒ಷ್ಯನ್ತೀ॑ ಮನ್ಯೇ॒ ತತೋ॒ ಮಾ ಪರಾ॑ ಭೂವ॒ಮಿತಿ॑ಪು॒ರಾ ತೇ॑ [ಭೂವ॒ಮಿತಿ॑ಪು॒ರಾ ತೇ᳚, ಸಂವಁಥ್ಸ॒ರಾದಪಿ॑] 2
ಸಂವಁಥ್ಸ॒ರಾದಪಿ॑ ರೋಹಾ॒ದಿತ್ಯ॑ಬ್ರವೀ॒-ತ್ತಸ್ಮಾ᳚-ತ್ಪು॒ರಾ ಸಂ॑ವಁಥ್ಸ॒ರಾ-ತ್ಪೃ॑ಥಿ॒ವ್ಯೈ ಖಾ॒ತಮಪಿ॑ ರೋಹತಿ॒ ವಾರೇ॑ವೃತ॒ಗ್ಗ್॒ ಹ್ಯ॑ಸ್ಯೈ॒ ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಹ್ಣಾ॒-ತ್ತ-ಥ್ಸ್ವಕೃ॑ತ॒ಮಿರಿ॑ಣಮಭವ॒-ತ್ತಸ್ಮಾ॒ದಾಹಿ॑ತಾಗ್ನಿ-ಶ್ಶ್ರ॒ದ್ಧಾದೇ॑ವ॒-ಸ್ಸ್ವಕೃ॑ತ॒ ಇರಿ॑ಣೇ॒ ನಾವ॑ ಸ್ಯೇ-ದ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷ ವರ್ಣ॒-ಸ್ಸ ವನ॒ಸ್ಪತೀ॒ನುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹ್ಣೀ॒ತೇತಿ॒ ತೇ᳚-ಽಬ್ರುವ॒ನ್ ವರಂ॑-ವೃಁಣಾಮಹೈ ವೃ॒ಕ್ಣಾ- [ವೃ॒ಕ್ಣಾತ್, ಪ॒ರಾ॒ಭ॒ವಿ॒ಷ್ಯನ್ತೋ॑] 3
-ತ್ಪ॑ರಾಭವಿ॒ಷ್ಯನ್ತೋ॑ ಮನ್ಯಾಮಹೇ॒ ತತೋ॒ ಮಾ ಪರಾ॑ ಭೂ॒ಮೇತ್ಯಾ॒ವ್ರಶ್ಚ॑ನಾದ್ವೋ॒ ಭೂಯಾಗ್ಂ॑ಸ॒ ಉತ್ತಿ॑ಷ್ಠಾ॒ನಿತ್ಯ॑ಬ್ರವೀ॒-ತ್ತಸ್ಮಾ॑ದಾ॒ವ್ರಶ್ಚ॑ನಾ-ದ್ವೃ॒ಖ್ಷಾಣಾ॒-ಮ್ಭೂಯಾಗ್ಂ॑ಸ॒ ಉತ್ತಿ॑ಷ್ಠನ್ತಿ॒ ವಾರೇ॑ವೃತ॒ಗ್ಗ್॒ ಹ್ಯೇ॑ಷಾ॒-ನ್ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಣ್ಹ॒ನ್ಥ್ಸ ನಿ॑ರ್ಯಾ॒ಸೋ॑ ಽಭವ॒-ತ್ತಸ್ಮಾ᳚ನ್ನಿರ್ಯಾ॒ಸಸ್ಯ॒ ನಾ-ಽಽಶ್ಯ॑-ಮ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷ ವರ್ಣೋ-ಽಥೋ॒ ಖಲು॒ ಯ ಏ॒ವ ಲೋಹಿ॑ತೋ॒ ಯೋ ವಾ॒-ಽಽವ್ರಶ್ಚ॑ನಾನ್ನಿ॒ರ್ಯೇಷ॑ತಿ॒ ತಸ್ಯ॒ ನಾ-ಽಽಶ್ಯ॑- [ನಾ-ಽಽಶ್ಯ᳚ಮ್, ಕಾಮ॑ಮ॒ನ್ಯಸ್ಯ॒] 4
-ಙ್ಕಾಮ॑ಮ॒ನ್ಯಸ್ಯ॒ ಸಸ್ತ್ರೀ॑ಷಗ್ಂಸಾ॒ದ-ಮುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹ್ಣೀ॒ತೇತಿ॒ ತಾ ಅ॑ಬ್ರುವ॒ನ್ ವರಂ॑-ವೃಁಣಾಮಹಾ॒ ಋತ್ವಿ॑ಯಾ-ತ್ಪ್ರ॒ಜಾಂ-ವಿಁ॑ನ್ದಾಮಹೈ॒ ಕಾಮ॒ಮಾ ವಿಜ॑ನಿತೋ॒-ಸ್ಸ-ಮ್ಭ॑ವಾ॒ಮೇತಿ॒ ತಸ್ಮಾ॒ದೃತ್ವಿ॑ಯಾ॒-ಥ್ಸ್ತ್ರಿಯಃ॑ ಪ್ರ॒ಜಾಂ ವಿಁ॑ನ್ದನ್ತೇ॒ ಕಾಮ॒ಮಾ ವಿಜ॑ನಿತೋ॒-ಸ್ಸಮ್ಭ॑ವನ್ತಿ॒ ವಾರೇ॑ವೃತ॒ಗ್ಗ್॒ ಹ್ಯಾ॑ಸಾ॒-ನ್ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಹ್ಣ॒ನ್-ಥ್ಸಾ ಮಲ॑ವದ್ವಾಸಾ ಅಭವ॒-ತ್ತಸ್ಮಾ॒-ನ್ಮಲ॑ವ-ದ್ವಾಸಸಾ॒ ನ ಸಂವಁ॑ದೇತ॒- [ಸಂವಁ॑ದೇತ, ನ ಸ॒ಹಾ-ಽಽಸೀ॑ತ॒] 5
-ನ ಸ॒ಹಾ-ಽಽಸೀ॑ತ॒ ನಾಸ್ಯಾ॒ ಅನ್ನ॑ಮದ್ಯಾ-ದ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷಾ ವರ್ಣ॑-ಮ್ಪ್ರತಿ॒ಮುಚ್ಯಾ ಽಽಸ್ತೇ-ಽಥೋ॒ ಖಲ್ವಾ॑ಹುರ॒ಭ್ಯಞ್ಜ॑ನಂ॒-ವಾಁವ ಸ್ತ್ರಿ॒ಯಾ ಅನ್ನ॑ಮ॒ಭ್ಯಞ್ಜ॑ನಮೇ॒ವ ನ ಪ್ರ॑ತಿ॒ಗೃಹ್ಯ॒-ಙ್ಕಾಮ॑ಮ॒ನ್ಯದಿತಿ॒ ಯಾ-ಮ್ಮಲ॑ವ-ದ್ವಾಸಸಗ್ಂ ಸ॒ಭಂವಁ॑ನ್ತಿ॒ ಯಸ್ತತೋ॒ ಜಾಯ॑ತೇ॒ ಸೋ॑-ಽಭಿಶ॒ಸ್ತೋ ಯಾಮರ॑ಣ್ಯೇ॒ ತಸ್ಯೈ᳚ ಸ್ತೇ॒ನೋ ಯಾ-ಮ್ಪರಾ॑ಚೀ॒-ನ್ತಸ್ಯೈ᳚ ಹ್ರೀತಮು॒ಖ್ಯ॑ಪಗ॒ಲ್ಭೋ ಯಾ ಸ್ನಾತಿ॒ ತಸ್ಯಾ॑ ಅ॒ಫ್ಸು ಮಾರು॑ಕೋ॒ ಯಾ- [ಮಾರು॑ಕೋ॒ ಯಾ, ಅ॒ಭ್ಯ॒ಙ್ಕ್ತೇ] 6
-ಽಭ್ಯ॒ಙ್ಕ್ತೇ ತಸ್ಯೈ॑ ದು॒ಶ್ಚರ್ಮಾ॒ ಯಾ ಪ್ರ॑ಲಿ॒ಖತೇ॒ ತಸ್ಯೈ॑ ಖಲ॒ತಿರ॑ಪಮಾ॒ರೀ ಯಾ-ಽಽಙ್ಕ್ತೇ ತಸ್ಯೈ॑ ಕಾ॒ಣೋ ಯಾ ದ॒ತೋ ಧಾವ॑ತೇ॒ ತಸ್ಯೈ᳚ ಶ್ಯಾ॒ವದ॒ನ್॒. ಯಾ ನ॒ಖಾನಿ॑ ನಿಕೃ॒ನ್ತತೇ॒ ತಸ್ಯೈ॑ ಕುನ॒ಖೀ ಯಾ ಕೃ॒ಣತ್ತಿ॒ ತಸ್ಯೈ᳚ ಕ್ಲೀ॒ಬೋ ಯಾ ರಜ್ಜುಗ್ಂ॑ ಸೃ॒ಜತಿ॒ ತಸ್ಯಾ॑ ಉ॒-ದ್ಬನ್ಧು॑ಕೋ॒ ಯಾ ಪ॒ರ್ಣೇನ॒ ಪಿಬ॑ತಿ॒ ತಸ್ಯಾ॑ ಉ॒ನ್ಮಾದು॑ಕೋ॒ ಯಾ ಖ॒ರ್ವೇಣ॒ ಪಿಬ॑ತಿ॒ ತಸ್ಯೈ॑ ಖ॒ರ್ವಸ್ತಿ॒ಸ್ರೋ ರಾತ್ರೀ᳚ರ್ವ್ರ॒ತ-ಞ್ಚ॑ರೇದಞ್ಜ॒ಲಿನಾ॑ ವಾ॒ ಪಿಬೇ॒ದಖ॑ರ್ವೇಣ ವಾ॒ ಪಾತ್ರೇ॑ಣ ಪ್ರ॒ಜಾಯೈ॑ ಗೋಪೀ॒ಥಾಯ॑ ॥ 7 ॥
(ಯ-ಥ್ಸೋ॑ಮ॒ಪಾನಂ॑ – ತೇ – ವೃ॒ಕ್ಣಾತ್- ತಸ್ಯ॒ ನಾ-ಽಽಶ್ಯಂ॑ – ವಁದೇತ॒ -ಮಾರು॑ಕೋ॒ ಯಾ -ಽಖ॑ರ್ವೇಣ ವಾ॒ – ತ್ರೀಣಿ॑ ಚ) (ಅ. 1)
ತ್ವಷ್ಟಾ॑ ಹ॒ತಪು॑ತ್ರೋ॒ ವೀನ್ದ್ರ॒ಗ್ಂ॒ ಸೋಮ॒ಮಾ-ಽಹ॑ರ॒-ತ್ತಸ್ಮಿ॒ನ್ನಿನ್ದ್ರ॑ ಉಪಹ॒ವಮೈ᳚ಚ್ಛತ॒ ತ-ನ್ನೋಪಾ᳚ಹ್ವಯತ ಪು॒ತ್ರ-ಮ್ಮೇ॑-ಽವಧೀ॒ರಿತಿ॒ ಸ ಯ॑ಜ್ಞವೇಶ॒ಸ-ಙ್ಕೃ॒ತ್ವಾ ಪ್ರಾ॒ಸಹಾ॒ ಸೋಮ॑ಮಪಿಬ॒-ತ್ತಸ್ಯ॒ ಯದ॒ತ್ಯಶಿ॑ಷ್ಯತ॒ ತ-ತ್ತ್ವಷ್ಟಾ॑-ಽಽಹವ॒ನೀಯ॒ಮುಪ॒ ಪ್ರಾವ॑ರ್ತಯ॒-ಥ್ಸ್ವಾಹೇನ್ದ್ರ॑ಶತ್ರು-ರ್ವರ್ಧ॒ಸ್ವೇತಿ॒ ಯದವ॑ರ್ತಯ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವಂ-ಯಁದಬ್ರ॑ವೀ॒-ಥ್ಸ್ವಾಹೇನ್ದ್ರ॑ಶತ್ರು-ರ್ವರ್ಧ॒ಸ್ವೇತಿ॒ ತಸ್ಮಾ॑ದ॒ಸ್ಯೇ- [ತಸ್ಮಾ॑ದಸ್ಯ, ಇನ್ದ್ರ॒-ಶ್ಶತ್ರು॑ರಭವ॒ಥ್ಸ] 8
-ನ್ದ್ರ॒-ಶ್ಶತ್ರು॑ರಭವ॒ಥ್ಸ ಸ॒ಭಂವಁ॑ನ್ನ॒ಗ್ನೀಷೋಮಾ॑ವ॒ಭಿ ಸಮ॑ಭವ॒-ಥ್ಸ ಇ॑ಷುಮಾ॒ತ್ರಮಿ॑ಷುಮಾತ್ರಂ॒-ವಿಁಷ್ವ॑ಙ್ಙವರ್ಧತ॒ ಸ ಇ॒ಮಾಂ-ಲೋಁ॒ಕಾನ॑ವೃಣೋ॒ದ್ಯದಿ॒ಮಾಂ-ಲೋಁ॒ಕಾನವೃ॑ಣೋ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವ-ನ್ತಸ್ಮಾ॒ದಿನ್ದ್ರೋ॑-ಽಬಿಭೇ॒-ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ॒-ಚ್ಛತ್ರು॑ರ್ಮೇ-ಽ ಜ॒ನೀತಿ॒ ತಸ್ಮೈ॒ ವಜ್ರಗ್ಂ॑ ಸಿ॒ಕ್ತ್ವಾ ಪ್ರಾಯ॑ಚ್ಛದೇ॒ತೇನ॑ ಜ॒ಹೀತಿ॒ ತೇನಾ॒ಭ್ಯಾ॑ಯತ॒ ತಾವ॑ಬ್ರೂತಾಮ॒ಗ್ನೀಷೋಮೌ॒ ಮಾ [ ] 9
ಪ್ರಹಾ॑ರಾ॒ವಮ॒ನ್ತ-ಸ್ಸ್ವ॒ ಇತಿ॒ ಮಮ॒ ವೈ ಯು॒ವಗ್ಗ್ಸ್ಥ॒ ಇತ್ಯ॑ಬ್ರವೀ॒-ನ್ಮಾಮ॒ಭ್ಯೇತ॒ಮಿತಿ॒ ತೌ ಭಾ॑ಗ॒ಧೇಯ॑ಮೈಚ್ಛೇತಾ॒-ನ್ತಾಭ್ಯಾ॑-ಮೇ॒ತಮ॑ಗ್ನೀಷೋ॒ಮೀಯ॒-ಮೇಕಾ॑ದಶಕಪಾಲ-ಮ್ಪೂ॒ರ್ಣಮಾ॑ಸೇ॒ ಪ್ರಾಯ॑ಚ್ಛ॒-ತ್ತಾವ॑ಬ್ರೂತಾಮ॒ಭಿ ಸನ್ದ॑ಷ್ಟೌ॒ ವೈ ಸ್ವೋ॒ ನ ಶ॑ಕ್ನುವ॒ ಐತು॒ಮಿತಿ॒ ಸ ಇನ್ದ್ರ॑ ಆ॒ತ್ಮನ॑-ಶ್ಶೀತರೂ॒ರಾವ॑ಜನಯ॒-ತ್ತಚ್ಛೀ॑ತರೂ॒ರಯೋ॒ರ್ಜನ್ಮ॒ ಯ ಏ॒ವಗ್ಂ ಶೀ॑ತರೂ॒ರಯೋ॒ರ್ಜನ್ಮ॒ ವೇದ॒ [ವೇದ॑, ನೈನಗ್ಂ॑] 10
ನೈನಗ್ಂ॑ ಶೀತರೂ॒ರೌ ಹ॑ತ॒ಸ್ತಾಭ್ಯಾ॑ಮೇನಮ॒ಭ್ಯ॑ನಯ॒-ತ್ತಸ್ಮಾ᳚-ಜ್ಜಞ್ಜ॒ಭ್ಯಮಾ॑ನಾದ॒ಗ್ನೀಷೋಮೌ॒ ನಿರ॑ಕ್ರಾಮತಾ-ಮ್ಪ್ರಾಣಾಪಾ॒ನೌ ವಾ ಏ॑ನ॒-ನ್ತದ॑ಜಹಿತಾ-ಮ್ಪ್ರಾ॒ಣೋ ವೈ ದಖ್ಷೋ॑-ಽಪಾ॒ನಃ ಕ್ರತು॒ಸ್ತಸ್ಮಾ᳚-ಜ್ಜಞ್ಜ॒ಭ್ಯಮಾ॑ನೋ ಬ್ರೂಯಾ॒ನ್ಮಯಿ॑ ದಖ್ಷಕ್ರ॒ತೂ ಇತಿ॑ ಪ್ರಾಣಾಪಾ॒ನಾವೇ॒ವಾ-ಽಽತ್ಮ-ನ್ಧ॑ತ್ತೇ॒ ಸರ್ವ॒ಮಾಯು॑ರೇತಿ॒ ಸ ದೇ॒ವತಾ॑ ವೃ॒ತ್ರಾನ್ನಿ॒ರ್॒ಹೂಯ॒ ವಾರ್ತ್ರ॑ಘ್ನಗ್ಂ ಹ॒ವಿಃ ಪೂ॒ರ್ಣಮಾ॑ಸೇ॒ ನಿರ॑ವಪ॒-ದ್ಘ್ನನ್ತಿ॒ ವಾ ಏ॑ನ-ಮ್ಪೂ॒ರ್ಣಮಾ॑ಸ॒ ಆ- [ಆ, ಅ॒ಮಾ॒ವಾ॒ಸ್ಯಾ॑ಯಾಂ-] 11
-ಽಮಾ॑ವಾ॒ಸ್ಯಾ॑ಯಾ-ಮ್ಪ್ಯಾಯಯನ್ತಿ॒ ತಸ್ಮಾ॒-ದ್ವಾರ್ತ್ರ॑ಘ್ನೀ ಪೂ॒ರ್ಣಮಾ॒ಸೇ ಽನೂ᳚ಚ್ಯೇತೇ॒ ವೃಧ॑ನ್ವತೀ ಅಮಾವಾ॒ಸ್ಯಾ॑ಯಾ॒-ನ್ತ-ಥ್ಸ॒ಗ್ಗ್॒ಸ್ಥಾಪ್ಯ॒ ವಾರ್ತ್ರ॑ಘ್ನಗ್ಂ ಹ॒ವಿರ್ವಜ್ರ॑ಮಾ॒ದಾಯ॒ ಪುನ॑ರ॒ಭ್ಯಾ॑ಯತ॒ ತೇ ಅ॑ಬ್ರೂತಾ॒-ನ್ದ್ಯಾವಾ॑ಪೃಥಿ॒ವೀ ಮಾ ಪ್ರ ಹಾ॑ರಾ॒ವಯೋ॒ರ್ವೈ ಶ್ರಿ॒ತ ಇತಿ॒ ತೇ ಅ॑ಬ್ರೂತಾಂ॒-ವಁರಂ॑-ವೃಁಣಾವಹೈ॒ ನಖ್ಷ॑ತ್ರವಿಹಿತಾ॒-ಽಹಮಸಾ॒ನೀತ್ಯ॒ಸಾವ॑ಬ್ರವೀ- ಚ್ಚಿ॒ತ್ರವಿ॑ಹಿತಾ॒- ಽಹಮಿತೀ॒ಯ-ನ್ತಸ್ಮಾ॒ನ್ನಖ್ಷ॑ತ್ರವಿಹಿತಾ॒-ಽಸೌ ಚಿ॒ತ್ರವಿ॑ಹಿತೇ॒-ಽಯಂ-ಯಁ ಏ॒ವ-ನ್ದ್ಯಾವಾ॑ಪೃಥಿ॒ವ್ಯೋ- [-ದ್ಯಾವಾ॑ಪೃಥಿ॒ವ್ಯೋಃ, ವರಂ॒-ವೇಁದೈನಂ॒-ವಁರೋ॑] 12
-ರ್ವರಂ॒-ವೇಁದೈನಂ॒-ವಁರೋ॑ ಗಚ್ಛತಿ॒ ಸ ಆ॒ಭ್ಯಾಮೇ॒ವ ಪ್ರಸೂ॑ತ॒ ಇನ್ದ್ರೋ॑ ವೃ॒ತ್ರಮ॑ಹ॒-ನ್ತೇ ದೇ॒ವಾ ವೃ॒ತ್ರಗ್ಂ ಹ॒ತ್ವಾ-ಽಗ್ನೀಷೋಮಾ॑ವಬ್ರುವನ್. ಹ॒ವ್ಯ-ನ್ನೋ॑ ವಹತ॒ಮಿತಿ॒ ತಾವ॑ಬ್ರೂತಾ॒ಮಪ॑ತೇಜಸೌ॒ ವೈ ತ್ಯೌ ವೃ॒ತ್ರೇ ವೈ ತ್ಯಯೋ॒ಸ್ತೇಜ॒ ಇತಿ॒ ತೇ᳚-ಽಬ್ರುವ॒ನ್ ಕ ಇ॒ದಮಚ್ಛೈ॒ತೀತಿ॒ ಗೌರಿತ್ಯ॑ಬ್ರುವ॒-ನ್ಗೌರ್ವಾವ ಸರ್ವ॑ಸ್ಯ ಮಿ॒ತ್ರಮಿತಿ॒ ಸಾ-ಽಬ್ರ॑ವೀ॒- [ಸಾ-ಽಬ್ರ॑ವೀತ್, ವರಂ॑-ವೃಁಣೈ॒ ಮಯ್ಯೇ॒ವ] 13
-ದ್ವರಂ॑-ವೃಁಣೈ॒ ಮಯ್ಯೇ॒ವ ಸ॒ತೋ-ಽಭಯೇ॑ನ ಭುನಜಾದ್ಧ್ವಾ॒ ಇತಿ॒ ತ-ದ್ಗೌರಾ-ಽಹ॑ರ॒-ತ್ತಸ್ಮಾ॒-ದ್ಗವಿ॑ ಸ॒ತೋಭಯೇ॑ನ ಭುಞ್ಜತ ಏ॒ತದ್ವಾ ಅ॒ಗ್ನೇಸ್ತೇಜೋ॒ ಯ-ದ್ಘೃ॒ತಮೇ॒ತ-ಥ್ಸೋಮ॑ಸ್ಯ॒ ಯ-ತ್ಪಯೋ॒ ಯ ಏ॒ವಮ॒ಗ್ನೀಷೋಮ॑ಯೋ॒ ಸ್ತೇಜೋ॒ ವೇದ॑ ತೇಜ॒ಸ್ವ್ಯೇ॑ವ ಭ॑ವತಿ ಬ್ರಹ್ಮವಾ॒ದಿನೋ॑ ವದನ್ತಿ ಕಿನ್ದೇವ॒ತ್ಯ॑-ಮ್ಪೌರ್ಣಮಾ॒ಸಮಿತಿ॑ ಪ್ರಾಜಾಪ॒ತ್ಯಮಿತಿ॑ ಬ್ರೂಯಾ॒-ತ್ತೇನೇನ್ದ್ರ॑-ಞ್ಜ್ಯೇ॒ಷ್ಠ-ಮ್ಪು॒ತ್ರ-ನ್ನಿ॒ರವಾ॑ಸಾಯಯ॒ದಿತಿ॒ ತಸ್ಮಾ᳚- -ಜ್ಜ್ಯೇ॒ಷ್ಠ-ಮ್ಪು॒ತ್ರ-ನ್ಧನೇ॑ನ ನಿ॒ರವ॑ಸಾಯಯನ್ತಿ ॥ 14 ॥
(ಅ॒ಸ್ಯ॒ – ಮಾ – ವೇದಾ – ಽಽ – ದ್ಯಾವಾ॑ಪೃಥಿ॒ವ್ಯೋ – ರ॑ಬ್ರವೀ॒ – ದಿತಿ॒ ತಸ್ಮಾ᳚ – ಚ್ಚ॒ತ್ವಾರಿ॑ ಚ) (ಅ. 2)
ಇನ್ದ್ರಂ॑-ವೃಁ॒ತ್ರ-ಞ್ಜ॑ಘ್ನಿ॒ವಾಗ್ಂಸ॒-ಮ್ಮೃಧೋ॒-ಽಭಿ ಪ್ರಾವೇ॑ಪನ್ತ॒ ಸ ಏ॒ತಂ-ವೈಁ॑ಮೃ॒ಧ-ಮ್ಪೂ॒ಎಣಮಾ॑ಸೇ-ಽನುನಿರ್ವಾ॒ಪ್ಯ॑ಮಪಶ್ಯ॒-ತ್ತ-ನ್ನಿರ॑ವಪ॒-ತ್ತೇನ॒ ವೈ ಸ ಮೃಧೋ-ಽಪಾ॑ಹತ॒ ಯದ್ವೈ॑ಮೃ॒ಧಃ ಪೂ॒ರ್ಣಮಾ॑ಸೇ-ಽನುನಿರ್ವಾ॒ಪ್ಯೋ॑ ಭವ॑ತಿ॒ ಮೃಧ॑ ಏ॒ವ ತೇನ॒ ಯಜ॑ಮಾ॒ನೋ ಽಪ॑ ಹತ॒ ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ದೇ॒ವತಾ॑ಭಿಶ್ಚೇನ್ದ್ರಿ॒ಯೇಣ॑ ಚ॒ ವ್ಯಾ᳚ರ್ಧ್ಯತ॒ ಸ ಏ॒ತಮಾ᳚ಗ್ನೇ॒ಯ-ಮ॒ಷ್ಟಾಕ॑ಪಾಲ-ಮಮಾವಾ॒ಸ್ಯಾ॑ಯಾಮಪಶ್ಯದೈ॒ನ್ದ್ರ-ನ್ದಧಿ॒ [-ದಧಿ॑, ತ-ನ್ನಿರ॑ವಪ॒-ತ್ತೇನ॒] 15
ತ-ನ್ನಿರ॑ವಪ॒-ತ್ತೇನ॒ ವೈ ಸ ದೇ॒ವತಾ᳚ಶ್ಚೇನ್ದ್ರಿ॒ಯ-ಞ್ಚಾವಾ॑ರುನ್ಧ॒ಯದಾ᳚ಗ್ನೇ॒ಯೋ᳚ ಽಷ್ಟಾಕ॑ಪಾಲೋ ಽಮಾವಾ॒ಸ್ಯಾ॑ಯಾ॒-ಮ್ಭವ॑ತ್ಯೈ॒ನ್ದ್ರ-ನ್ದಧಿ॑ ದೇ॒ವತಾ᳚ಶ್ಚೈ॒ವ ತೇನೇ᳚ನ್ದ್ರಿ॒ಯ-ಞ್ಚ॒ ಯಜ॑ಮಾ॒ನೋ-ಽವ॑ ರುನ್ಧ॒ ಇನ್ದ್ರ॑ಸ್ಯ ವೃ॒ತ್ರ-ಞ್ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑-ಮ್ಪೃಥಿ॒ವೀಮನು॒ ವ್ಯಾ᳚ರ್ಚ್ಛ॒-ತ್ತದೋಷ॑ಧಯೋ ವೀ॒ರುಧೋ॑-ಽಭವ॒ನ್ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ-ದ್ವೃ॒ತ್ರ-ಮ್ಮೇ॑ ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑- [ವೀ॒ರ್ಯ᳚ಮ್, ಪೃ॒ಥಿ॒ವೀಮನು॒] 16
-ಮ್ಪೃಥಿ॒ವೀಮನು॒ ವ್ಯಾ॑ರ॒-ತ್ತದೋಷ॑ಧಯೋ ವೀ॒ರುಧೋ॑-ಽಭೂವ॒ನ್ನಿತಿ॒ ಸ ಪ್ರ॒ಜಾಪ॑ತಿಃ ಪ॒ಶೂನ॑ಬ್ರವೀದೇ॒ತದ॑ಸ್ಮೈ॒ ಸ-ನ್ನ॑ಯ॒ತೇತಿ॒ ತ-ತ್ಪ॒ಶವ॒ ಓಷ॑ಧೀ॒ಭ್ಯೋ ಽಧ್ಯಾ॒ತ್ಮನ್-ಥ್ಸಮ॑ನಯ॒-ನ್ತ-ತ್ಪ್ರತ್ಯ॑ದುಹ॒ನ್॒. ಯ-ಥ್ಸ॒ಮನ॑ಯ॒-ನ್ತ-ಥ್ಸಾ᳚-ನ್ನಾ॒ಯ್ಯಸ್ಯ॑ ಸಾನ್ನಾಯ್ಯ॒ತ್ವಂ-ಯಁ-ತ್ಪ್ರ॒ತ್ಯದು॑ಹ॒-ನ್ತ-ತ್ಪ್ರ॑ತಿ॒ಧುಷಃ॑ ಪ್ರತಿಧು॒ಕ್ತ್ವಗ್ಂ ಸಮ॑ನೈಷುಃ॒ ಪ್ರತ್ಯ॑ಧುಖ್ಷ॒-ನ್ನ ತು ಮಯಿ॑ ಶ್ರಯತ॒ ಇತ್ಯ॑ಬ್ರವೀದೇ॒ತದ॑ಸ್ಮೈ [ ] 17
ಶೃ॒ತ-ಙ್ಕು॑ರು॒ತೇತ್ಯ॑ಬ್ರವೀ॒-ತ್ತದ॑ಸ್ಮೈ ಶೃ॒ತ-ಮ॑ಕುರ್ವನ್ನಿನ್ದ್ರಿ॒ಯಂ-ವಾಁವಾಸ್ಮಿ॑ನ್ ವೀ॒ರ್ಯ॑-ನ್ತದ॑ಶ್ರಯ॒-ನ್ತಚ್ಛೃ॒ತಸ್ಯ॑ ಶೃತ॒ತ್ವಗ್ಂ ಸಮ॑ನೈಷುಃ॒ ಪ್ರತ್ಯ॑ಧುಖ್ಷಞ್ಛೃ॒ತಮ॑ಕ್ರ॒-ನ್ನ ತು ಮಾ॑ ಧಿನೋ॒ತೀತ್ಯ॑ಬ್ರವೀದೇ॒ತದ॑ಸ್ಮೈ॒ ದಧಿ॑ ಕುರು॒ತೇತ್ಯ॑ಬ್ರವೀ॒-ತ್ತದ॑ಸ್ಮೈ॒ ದದ್ಧ್ಯ॑ಕುರ್ವ॒-ನ್ತದೇ॑ನಮಧಿನೋ॒-ತ್ತದ್ದ॒ದ್ಧ್ನೋ ದ॑ಧಿ॒ತ್ವ-ಮ್ಬ್ರ॑ಹ್ಮವಾ॒ದಿನೋ॑ ವದನ್ತಿ ದ॒ದ್ಧ್ನಃ ಪೂರ್ವ॑ಸ್ಯಾವ॒ದೇಯ॒- [ಪೂರ್ವ॑ಸ್ಯಾವ॒ದೇಯ᳚ಮ್, ದಧಿ॒ ಹಿ] 18
-ನ್ದಧಿ॒ ಹಿ ಪೂರ್ವ॑-ಙ್ಕ್ರಿ॒ಯತ॒ ಇತ್ಯನಾ॑ದೃತ್ಯ॒ ತಚ್ಛೃ॒ತಸ್ಯೈ॒ವ ಪೂರ್ವ॒ಸ್ಯಾವ॑ ದ್ಯೇದಿನ್ದ್ರಿ॒ಯಮೇ॒ವಾಸ್ಮಿ॑ನ್ ವೀ॒ರ್ಯಗ್ಗ್॑ ಶ್ರಿ॒ತ್ವಾ ದ॒ದ್ಧ್ನೋ ಪರಿ॑ಷ್ಟಾದ್ಧಿನೋತಿ ಯಥಾಪೂ॒ರ್ವಮುಪೈ॑ತಿ॒ ಯ-ತ್ಪೂ॒ತೀಕೈ᳚ರ್ವಾ ಪರ್ಣವ॒ಲ್ಕೈರ್ವಾ॑ ಽಽತ॒ಞ್ಚ್ಯಾ-ಥ್ಸೌ॒ಮ್ಯ-ನ್ತದ್ಯ-ತ್ಕ್ವ॑ಲೈ ರಾಖ್ಷ॒ಸ-ನ್ತದ್ಯ-ತ್ತ॑ಣ್ಡು॒ಲೈರ್ವೈ᳚ಶ್ವದೇ॒ವ-ನ್ತದ್ಯದಾ॒ತಞ್ಚ॑ನೇನ ಮಾನು॒ಷ-ನ್ತ-ದ್ಯ-ದ್ದ॒ದ್ಧ್ನಾ ತ-ಥ್ಸೇನ್ದ್ರ॑-ನ್ದ॒ದ್ಧ್ನಾ ಽಽತ॑ನಕ್ತಿ [ತ॑ನಕ್ತಿ, ಸೇ॒ನ್ದ್ರ॒ತ್ವಾಯಾ᳚-] 19
ಸೇನ್ದ್ರ॒ತ್ವಾಯಾ᳚-ಽಗ್ನಿಹೋತ್ರೋಚ್ಛೇಷ॒ಣಮ॒ಭ್ಯಾ-ತ॑ನಕ್ತಿ ಯ॒ಜ್ಞಸ್ಯ॒ ಸನ್ತ॑ತ್ಯಾ॒ ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ಪರಾ᳚-ಮ್ಪರಾ॒ವತ॑-ಮಗಚ್ಛ॒-ದಪಾ॑ರಾಧ॒ಮಿತಿ॒ ಮನ್ಯ॑ಮಾನ॒ಸ್ತ-ನ್ದೇ॒ವತಾಃ॒ ಪ್ರೈಷ॑ಮೈಚ್ಛ॒ನ್-ಥ್ಸೋ᳚-ಽಬ್ರವೀ-ತ್ಪ್ರ॒ಜಾಪ॑ತಿ॒ರ್ಯಃ ಪ್ರ॑ಥ॒ಮೋ॑-ಽನುವಿ॒ನ್ದತಿ॒ ತಸ್ಯ॑ ಪ್ರಥ॒ಮ-ಮ್ಭಾ॑ಗ॒ಧೇಯ॒ಮಿತಿ॒ ತ-ಮ್ಪಿ॒ತರೋ-ಽನ್ವ॑ವಿನ್ದ॒-ನ್ತಸ್ಮಾ᳚-ತ್ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ್ರಿ॑ಯತೇ॒ ಸೋ॑-ಽಮಾವಾ॒ಸ್ಯಾ᳚-ಮ್ಪ್ರತ್ಯಾ-ಽಗ॑ಚ್ಛ॒-ತ್ತ-ನ್ದೇ॒ವಾ ಅ॒ಭಿ ಸಮ॑ಗಚ್ಛನ್ತಾ॒ಮಾ ವೈ ನೋ॒- [ವೈ ನಃ॑, ಅ॒ದ್ಯ ವಸು॑] 20
-ಽದ್ಯ ವಸು॑ ವಸ॒ತೀತೀನ್ದ್ರೋ॒ ಹಿ ದೇ॒ವಾನಾಂ॒-ವಁಸು॒ ತದ॑ಮಾವಾ॒ಸ್ಯಾ॑ಯಾ ಅಮಾವಾಸ್ಯ॒ತ್ವ-ಮ್ಬ್ರ॑ಹ್ಮವಾ॒ದಿನೋ॑ ವದನ್ತಿ ಕಿನ್ದೇವ॒ತ್ಯಗ್ಂ॑ ಸಾನ್ನಾ॒ಯ್ಯಮಿತಿ॑ ವೈಶ್ವದೇ॒ವಮಿತಿ॑ ಬ್ರೂಯಾ॒-ದ್ವಿಶ್ವೇ॒ ಹಿ ತದ್ದೇ॒ವಾ ಭಾ॑ಗ॒ಧೇಯ॑ಮ॒ಭಿ ಸ॒ಮಗ॑ಚ್ಛ॒ನ್ತೇತ್ಯಥೋ॒ ಖಲ್ವೈ॒ನ್ದ್ರಮಿತ್ಯೇ॒ವ ಬ್ರೂ॑ಯಾ॒ದಿನ್ದ್ರಂ॒-ವಾಁವ ತೇ ತ-ದ್ಭಿ॑ಷ॒ಜ್ಯನ್ತೋ॒-ಽಭಿ ಸಮ॑ಗಚ್ಛ॒ನ್ತೇತಿ॑ ॥ 21 ॥
(ದಧಿ॑ – ಮೇ ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑ – ಮಿತ್ಯ॑ಬ್ರವೀದೇ॒ತದ॑ಸ್ಮಾ – ಅವ॒ದೇಯಂ॑ – ತನಕ್ತಿ – ನೋ॒ – ದ್ವಿಚ॑ತ್ವಾರಿಗ್ಂಶಚ್ಚ) (ಅ. 3)
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ॒ ಸ ತ್ವೈ ದ॑॑ರ್ಶಪೂರ್ಣಮಾ॒ಸೌ ಯ॑ಜೇತ॒ ಯ ಏ॑ನೌ॒ ಸೇನ್ದ್ರೌ॒ ಯಜೇ॒ತೇತಿ॑ ವೈಮೃ॒ಧಃ ಪೂ॒ರ್ಣಮಾ॑ಸೇ ಽನುನಿರ್ವಾ॒ಪ್ಯೋ॑ ಭವತಿ॒ ತೇನ॑ ಪೂ॒ರ್ಣಮಾ॑ಸ॒-ಸ್ಸೇನ್ದ್ರ॑ ಐ॒ನ್ದ್ರ-ನ್ದದ್ಧ್ಯ॑ಮಾವಾ॒ಸ್ಯಾ॑ಯಾ॒-ನ್ತೇನಾ॑ಮಾವಾ॒ಸ್ಯಾ॑ ಸೇನ್ದ್ರಾ॒ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಸೇನ್ದ್ರಾ॑ವೇ॒ವೈನೌ॑ ಯಜತೇ॒ ಶ್ವ-ಶ್ಶ್ವೋ᳚-ಽಸ್ಮಾ ಈಜಾ॒ನಾಯ॒ ವಸೀ॑ಯೋ ಭವತಿ ದೇ॒ವಾ ವೈ ಯ-ದ್ಯ॒ಜ್ಞೇ ಽಕು॑ರ್ವತ॒ತದಸು॑ರಾ ಅಕುರ್ವತ॒ ತೇ ದೇ॒ವಾ ಏ॒ತಾ- [ದೇ॒ವಾ ಏ॒ತಾಮ್, ಇಷ್ಟಿ॑-ಮಪಶ್ಯನ್-] 22
-ಮಿಷ್ಟಿ॑-ಮಪಶ್ಯ-ನ್ನಾಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒ಗ್ಂ॒ ಸರ॑ಸ್ವತ್ಯೈ ಚ॒ರುಗ್ಂ ಸರ॑ಸ್ವತೇ ಚ॒ರು-ನ್ತಾ-ಮ್ಪೌ᳚ರ್ಣಮಾ॒ಸಗ್ಂ ಸ॒ಗ್ಗ್॒ಸ್ಥಾಪ್ಯಾನು॒ ನಿರ॑ವಪ॒-ನ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್ಥ್ಸ್ಯಾ-ಥ್ಸ ಪೌ᳚ರ್ಣಮಾ॒ಸಗ್ಂ ಸ॒ಗ್ಗ್॒ಸ್ಥಾಪ್ಯೈ॒ತಾಮಿಷ್ಟಿ॒ಮನು॒ ನಿರ್ವ॑ಪೇ-ತ್ಪೌರ್ಣಮಾ॒ಸೇನೈ॒ವ ವಜ್ರ॒-ಮ್ಭ್ರಾತೃ॑ವ್ಯಾಯ ಪ್ರ॒ಹೃತ್ಯಾ᳚-ಽಽಗ್ನಾವೈಷ್ಣ॒ವೇನ॑ ದೇ॒ವತಾ᳚ಶ್ಚ ಯ॒ಜ್ಞ-ಞ್ಚ॒ ಭ್ರಾತೃ॑ವ್ಯಸ್ಯ ವೃಙ್ಕ್ತೇ ಮಿಥು॒ನಾ-ನ್ಪ॒ಶೂನ್-ಥ್ಸಾ॑ರಸ್ವ॒ತಾಭ್ಯಾಂ॒-ಯಾಁವ॑ದೇ॒ವಾಸ್ಯಾಸ್ತಿ॒ ತ- [ಯಾವ॑ದೇ॒ವಾಸ್ಯಾಸ್ತಿ॒ ತತ್, ಸರ್ವಂ॑-ವೃಁಙ್ಕ್ತೇ] 23
-ಥ್ಸರ್ವಂ॑-ವೃಁಙ್ಕ್ತೇ ಪೌರ್ಣಮಾ॒ಸೀಮೇ॒ವ ಯ॑ಜೇತ॒ ಭ್ರಾತೃ॑ವ್ಯವಾ॒ನ್ನಾಮಾ॑ವಾ॒ಸ್ಯಾಗ್ಂ॑ ಹ॒ತ್ವಾ ಭ್ರಾತೃ॑ವ್ಯ॒-ನ್ನಾ-ಽಽಪ್ಯಾ॑ಯಯತಿ ಸಾಕಮ್ಪ್ರಸ್ಥಾ॒ಯೀಯೇ॑ನ ಯಜೇತ ಪ॒ಶುಕಾ॑ಮೋ॒ಯಸ್ಮೈ॒ ವಾ ಅಲ್ಪೇ॑ನಾ॒-ಽಽಹರ॑ನ್ತಿ॒ ನಾ-ಽಽತ್ಮನಾ॒ ತೃಪ್ಯ॑ತಿ॒ ನಾನ್ಯಸ್ಮೈ॑ ದದಾತಿ॒ ಯಸ್ಮೈ॑ ಮಹ॒ತಾ ತೃಪ್ಯ॑ತ್ಯಾ॒ತ್ಮನಾ॒ ದದಾ᳚ತ್ಯ॒ನ್ಯಸ್ಮೈ॑ ಮಹ॒ತಾ ಪೂ॒ರ್ಣಗ್ಂ ಹೋ॑ತ॒ವ್ಯ॑-ನ್ತೃ॒ಪ್ತ ಏ॒ವೈನ॒ಮಿನ್ದ್ರಃ॑ ಪ್ರ॒ಜಯಾ॑ ಪ॒ಶುಭಿ॑ಸ್ತರ್ಪಯತಿ ದಾರುಪಾ॒ತ್ರೇಣ॑ ಜುಹೋತಿ॒ ನ ಹಿ ಮೃ॒ನ್ಮಯ॒ಮಾಹು॑ತಿಮಾನ॒ಶ ಔದು॑ಮ್ಬರ- [ಔದು॑ಮ್ಬರಮ್, ಭ॒ವ॒ತ್ಯೂರ್ಗ್ವಾ] 24
-ಮ್ಭವ॒ತ್ಯೂರ್ಗ್ವಾ ಉ॑ದು॒ಮ್ಬರ॒ ಊರ್-ಕ್ಪ॒ಶವ॑ ಊ॒ರ್ಜೈವಾಸ್ಮಾ॒ ಊರ್ಜ॑-ಮ್ಪ॒ಶೂನವ॑ ರುನ್ಧೇ॒ ನಾಗ॑ತಶ್ರೀರ್ಮಹೇ॒ನ್ದ್ರಂ-ಯಁ॑ಜೇತ॒ ತ್ರಯೋ॒ ವೈ ಗ॒ತಶ್ರಿ॑ಯ-ಶ್ಶುಶ್ರು॒ವಾ-ನ್ಗ್ರಾ॑ಮ॒ಣೀ ರಾ॑ಜ॒ನ್ಯ॑ಸ್ತೇಷಾ᳚-ಮ್ಮಹೇ॒ನ್ದ್ರೋ ದೇ॒ವತಾ॒ ಯೋ ವೈ ಸ್ವಾ-ನ್ದೇ॒ವತಾ॑ಮತಿ॒ ಯಜ॑ತೇ॒ ಪ್ರಸ್ವಾಯೈ॑ ದೇ॒ವತಾ॑ಯೈಚ್ಯವತೇ॒ ನ ಪರಾ॒-ಮ್ಪ್ರಾಪ್ನೋ॑ತಿ॒ ಪಾಪೀ॑ಯಾ-ನ್ಭವತಿ ಸಂವಁಥ್ಸ॒ರ-ಮಿನ್ದ್ರಂ॑-ಯಁಜೇತ ಸಂವಁಥ್ಸ॒ರಗ್ಂ ಹಿ ವ್ರ॒ತ-ನ್ನಾ-ಽತಿ॒ ಸ್ವೈ- [ವ್ರ॒ತ-ನ್ನಾ-ಽತಿ॒ ಸ್ವಾ, ಏ॒ವೈನ॑-ನ್ದೇ॒ವತೇ॒ಜ್ಯಮಾ॑ನಾ॒] 25
-ವೈನ॑-ನ್ದೇ॒ವತೇ॒ಜ್ಯಮಾ॑ನಾ॒ ಭೂತ್ಯಾ॑ ಇನ್ಧೇ॒ ವಸೀ॑ಯಾ-ನ್ಭವತಿ ಸಂವಁಥ್ಸ॒ರಸ್ಯ॑ ಪ॒ರಸ್ತಾ॑ದ॒ಗ್ನಯೇ᳚ ವ್ರ॒ತಪ॑ತಯೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ಥ್ಸಂವಁಥ್ಸ॒ರಮೇ॒ವೈನಂ॑-ವೃಁ॒ತ್ರ-ಞ್ಜ॑ಘ್ನಿ॒ವಾಗ್ಂ ಸ॑ಮ॒ಗ್ನಿ-ರ್ವ್ರ॒ತಪ॑ತಿ-ರ್ವ್ರ॒ತಮಾ ಲ॑ಮ್ಭಯತಿ॒ ತತೋ-ಽಧಿ॒ ಕಾಮಂ॑-ಯಁಜೇತ ॥ 26 ॥
(ಏ॒ತಾಂ – ತ – ದೌದು॑ಮ್ಬರ॒ಗ್ಗ್॒ – ಸ್ವಾ – ತ್ರಿ॒ಗ್ಂ॒ಶಚ್ಚ॑ ) (ಅ. 4)
ನಾಸೋ॑ಮಯಾಜೀ॒ ಸ-ನ್ನ॑ಯೇ॒ದನಾ॑ಗತಂ॒-ವಾಁ ಏ॒ತಸ್ಯ॒ ಪಯೋ॒ ಯೋ-ಽಸೋ॑ಮಯಾಜೀ॒ ಯದಸೋ॑ಮಯಾಜೀ ಸ॒-ನ್ನಯೇ᳚-ತ್ಪರಿಮೋ॒ಷ ಏ॒ವ ಸೋ-ಽನೃ॑ತ-ಙ್ಕರೋ॒ತ್ಯಥೋ॒ ಪರೈ॒ವ ಸಿ॑ಚ್ಯತೇ ಸೋಮಯಾ॒ಜ್ಯೇ॑ವ ಸ-ನ್ನ॑ಯೇ॒-ತ್ಪಯೋ॒ ವೈ ಸೋಮಃ॒ ಪಯ॑-ಸ್ಸಾನ್ನಾ॒ಯ್ಯ-ಮ್ಪಯ॑ಸೈ॒ವ ಪಯ॑ ಆ॒ತ್ಮ-ನ್ಧ॑ತ್ತೇ॒ ವಿ ವಾ ಏ॒ತ-ಮ್ಪ್ರ॒ಜಯಾ॑ ಪ॒ಶುಭಿ॑ರರ್ಧಯತಿ ವ॒ರ್ಧಯ॑ತ್ಯಸ್ಯ॒ ಭ್ರಾತೃ॑ವ್ಯಂ॒-ಯಁಸ್ಯ॑ ಹ॒ವಿರ್ನಿರು॑ಪ್ತ-ಮ್ಪು॒ರಸ್ತಾ᳚ಚ್ಚ॒ನ್ದ್ರಮಾ॑ [ಪು॒ರಸ್ತಾ᳚ಚ್ಚ॒ನ್ದ್ರಮಾಃ᳚, ಅ॒ಭ್ಯು॑ದೇತಿ॑] 27
ಅ॒ಭ್ಯು॑ದೇತಿ॑ ತ್ರೇ॒ಧಾ ತ॑ಣ್ಡು॒ಲಾನ್. ವಿ ಭ॑ಜೇ॒ದ್ಯೇ ಮ॑ದ್ಧ್ಯ॒ಮಾ-ಸ್ಸ್ಯುಸ್ತಾನ॒ಗ್ನಯೇ॑ ದಾ॒ತ್ರೇ ಪು॑ರೋ॒ಡಾಶ॑ಮ॒ಷ್ಟಾಕ॑ಪಾಲ-ಙ್ಕುರ್ಯಾ॒ದ್ಯೇ ಸ್ಥವಿ॑ಷ್ಠಾ॒ಸ್ತಾನಿನ್ದ್ರಾ॑ಯ ಪ್ರದಾ॒ತ್ರೇ ದ॒ಧಗ್ಗ್ಶ್ಚ॒ರುಂ-ಯೇಁ-ಽಣಿ॑ಷ್ಠಾ॒ಸ್ತಾನ್. ವಿಷ್ಣ॑ವೇ ಶಿಪಿವಿ॒ಷ್ಟಾಯ॑ ಶೃ॒ತೇ ಚ॒ರುಮ॒ಗ್ನಿರೇ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರ॑ಜ॒ನಯ॑ತಿ ವೃ॒ದ್ಧಾಮಿನ್ದ್ರಃ॒ ಪ್ರಯ॑ಚ್ಛತಿ ಯ॒ಜ್ಞೋ ವೈ ವಿಷ್ಣುಃ॑ ಪ॒ಶವ॒-ಶ್ಶಿಪಿ॑ರ್ಯ॒ಜ್ಞ ಏ॒ವ ಪ॒ಶುಷು॒ ಪ್ರತಿ॑ತಿಷ್ಠತಿ॒ ನ ದ್ವೇ [ನ ದ್ವೇ, ಯ॒ಜೇ॒ತ॒ ಯ-ತ್ಪೂರ್ವ॑ಯಾ] 28
ಯ॑ಜೇತ॒ ಯ-ತ್ಪೂರ್ವ॑ಯಾ ಸಮ್ಪ್ರ॒ತಿ ಯಜೇ॒ತೋತ್ತ॑ರಯಾ ಛ॒ಮ್ಬಟ್ಕು॑ರ್ಯಾ॒ದ್ಯದುತ್ತ॑ರಯಾ ಸಮ್ಪ್ರ॒ತಿ ಯಜೇ॑ತ॒ ಪೂರ್ವ॑ಯಾ ಛ॒ಮ್ಬಟ್ಕು॑ರ್ಯಾ॒ನ್ನೇಷ್ಟಿ॒ರ್ಭವ॑ತಿ॒ ನ ಯ॒ಜ್ಞಸ್ತದನು॑ ಹ್ರೀತಮು॒ಖ್ಯ॑ಪಗ॒ಲ್ಭೋ ಜಾ॑ಯತ॒ ಏಕಾ॑ಮೇ॒ವ ಯ॑ಜೇತ ಪ್ರಗ॒ಲ್ಭೋ᳚-ಽಸ್ಯ ಜಾಯ॒ತೇ ಽನಾ॑ದೃತ್ಯ॒ ತ-ದ್ದ್ವೇ ಏ॒ವ ಯ॑ಜೇತ ಯಜ್ಞ ಮು॒ಖಮೇ॒ವ ಪೂರ್ವ॑ಯಾ॒-ಽಽಲಭ॑ತೇ॒ ಯಜ॑ತ॒ ಉತ್ತ॑ರಯಾ ದೇ॒ವತಾ॑ ಏ॒ವ ಪೂರ್ವ॑ಯಾ ಽವರು॒ನ್ಧ ಇ॑ನ್ದ್ರಿ॒ಯ-ಮುತ್ತ॑ರಯಾ ದೇವಲೋ॒ಕಮೇ॒ವ [ ] 29
ಪೂರ್ವ॑ಯಾ-ಽಭಿ॒ಜಯ॑ತಿ ಮನುಷ್ಯಲೋ॒ಕಮುತ್ತ॑ರಯಾ॒ ಭೂಯ॑ಸೋ ಯಜ್ಞಕ್ರ॒ತೂನುಪೈ᳚ತ್ಯೇ॒ಷಾ ವೈ ಸು॒ಮನಾ॒ ನಾಮೇಷ್ಟಿ॒ರ್ಯಮ॒ದ್ಯೇಜಾ॒ನ-ಮ್ಪ॒ಶ್ಚಾಚ್ಚ॒ನ್ದ್ರಮಾ॑ ಅ॒ಭ್ಯು॑ದೇತ್ಯ॒ಸ್ಮಿನ್ನೇ॒ವಾಸ್ಮೈ॑ ಲೋ॒ಕೇ-ಽರ್ಧು॑ಕ-ಮ್ಭವತಿ ದಾಖ್ಷಾಯಣ ಯ॒ಜ್ಞೇನ॑ ಸುವ॒ರ್ಗಕಾ॑ಮೋ ಯಜೇತ ಪೂ॒ರ್ಣಮಾ॑ಸೇ॒ ಸ-ನ್ನ॑ಯೇ-ನ್ಮೈತ್ರಾವರು॒ಣ್ಯಾ ಽಽಮಿಖ್ಷ॑ಯಾ ಽಮಾವಾ॒ಸ್ಯಾ॑ಯಾಂ-ಯಁಜೇತ ಪೂ॒ರ್ಣಮಾ॑ಸೇ॒ ವೈ ದೇ॒ವಾನಾಗ್ಂ॑ ಸು॒ತಸ್ತೇಷಾ॑ಮೇ॒ತಮ॑ರ್ಧಮಾ॒ಸ-ಮ್ಪ್ರಸು॑ತ॒ಸ್ತೇಷಾ᳚-ಮ್ಮೈತ್ರಾವರು॒ಣೀ ವ॒ಶಾ-ಽಮಾ॑ವಾ॒ಸ್ಯಾ॑ಯಾ-ಮನೂಬ॒ನ್ಧ್ಯಾ॑ ಯ- [-ಮನೂಬ॒ನ್ಧ್ಯಾ॑ ಯತ್, ಪೂ॒ರ್ವೇ॒ದ್ಯು ರ್ಯಜ॑ತೇ॒] 30
-ತ್ಪೂ᳚ರ್ವೇ॒ದ್ಯು ರ್ಯಜ॑ತೇ॒ ವೇದಿ॑ಮೇ॒ವ ತ-ತ್ಕ॑ರೋತಿ॒ ಯ-ದ್ವ॒ಥ್ಸಾ-ನ॑ಪಾಕ॒ರೋತಿ॑ ಸದೋಹವಿರ್ಧಾ॒ನೇ ಏ॒ವ ಸ-ಮ್ಮಿ॑ನೋತಿ॒ ಯದ್ಯಜ॑ತೇ ದೇ॒ವೈರೇ॒ವ ಸು॒ತ್ಯಾಗ್ಂ ಸ-ಮ್ಪಾ॑ದಯತಿ॒ ಸ ಏ॒ತಮ॑ರ್ಧಮಾ॒ಸಗ್ಂ ಸ॑ಧ॒ಮಾದ॑-ನ್ದೇ॒ವೈ-ಸ್ಸೋಮ॑-ಮ್ಪಿಬತಿ॒ ಯ-ನ್ಮೈ᳚ತ್ರಾವರು॒ಣ್ಯಾ ಽಽಮಿಖ್ಷ॑ಯಾ ಽಮಾವಾ॒ಸ್ಯಾ॑ಯಾಂ॒-ಯಁಜ॑ತೇ॒ ಯೈವಾಸೌ ದೇ॒ವಾನಾಂ᳚-ವಁ॒ಶಾ-ಽನೂ॑ಬ॒ನ್ಧ್ಯಾ॑ ಸೋ ಏ॒ವೈಷೈತಸ್ಯ॑ ಸಾ॒ಖ್ಷಾದ್ವಾ ಏ॒ಷ ದೇ॒ವಾನ॒ಭ್ಯಾರೋ॑ಹತಿ॒ ಯ ಏ॑ಷಾಂ-ಯಁ॒ಜ್ಞ- [ಯ॒ಜ್ಞಮ್, ಅ॒ಭ್ಯಾ॒ರೋಹ॑ತಿ॒] 31
-ಮ॑ಭ್ಯಾ॒ರೋಹ॑ತಿ॒ ಯಥಾ॒ ಖಲು॒ವೈ ಶ್ರೇಯಾ॑ನ॒ಭ್ಯಾರೂ॑ಢಃ ಕಾ॒ಮಯ॑ತೇ॒ ತಥಾ॑ ಕರೋತಿ॒ ಯದ್ಯ॑ವ॒ವಿದ್ಧ್ಯ॑ತಿ॒ ಪಾಪೀ॑ಯಾ-ನ್ಭವತಿ॒ ಯದಿ॒ ನಾವ॒ವಿದ್ಧ್ಯ॑ತಿ ಸ॒ದೃಂ-ವ್ಯಾಁ॒ವೃತ್ಕಾ॑ಮ ಏ॒ತೇನ॑ ಯ॒ಜ್ಞೇನ॑ ಯಜೇತ ಖ್ಷು॒ರಪ॑ವಿ॒ರ್ಹ್ಯೇ॑ಷ ಯ॒ಜ್ಞಸ್ತಾ॒ಜ-ಕ್ಪುಣ್ಯೋ॑ ವಾ॒ ಭವ॑ತಿ॒ ಪ್ರ ವಾ॑ ಮೀಯತೇ॒ ತಸ್ಯೈ॒ತದ್ವ್ರ॒ತ-ನ್ನಾನೃ॑ತಂ-ವಁದೇ॒ನ್ನ ಮಾ॒ಗ್ಂ॒ ಸಮ॑ಶ್ಞೀಯಾ॒ನ್ನ ಸ್ತ್ರಿಯ॒ಮುಪೇ॑ಯಾ॒ನ್ನಾಸ್ಯ॒ ಪಲ್ಪೂ॑ಲನೇನ॒ ವಾಸಃ॑ ಪಲ್ಪೂಲಯೇಯು -ರೇ॒ತದ್ಧಿ ದೇ॒ವಾ-ಸ್ಸರ್ವ॒-ನ್ನ ಕು॒ರ್ವನ್ತಿ॑ ॥ 32 ॥
(ಚ॒ನ್ದ್ರಮಾ॒ -ದ್ವೇ -ದೇ॑ವಲೋ॒ಕಮೇ॒ವ – ಯ-ದ್ಯ॒ಜ್ಞಂ- ಪ॑ಲ್ಪೂಲಯೇಯುಃ॒ -ಷಟ್ ಚ॑) (ಅ. 5)
ಏ॒ಷ ವೈ ದೇ॑ವರ॒ಥೋ ಯ-ದ್ದ॑ರ್ಶಪೂರ್ಣಮಾ॒ಸೌ ಯೋ ದ॑ರ್ಶಪೂರ್ಣಮಾ॒ಸಾವಿ॒ಷ್ಟ್ವಾ ಸೋಮೇ॑ನ॒ ಯಜ॑ತೇ॒ ರಥ॑ಸ್ಪಷ್ಟ ಏ॒ವಾವ॒ಸಾನೇ॒ ವರೇ॑ ದೇ॒ವಾನಾ॒ಮವ॑ ಸ್ಯತ್ಯೇ॒ತಾನಿ॒ ವಾ ಅಙ್ಗಾ॒ಪರೂಗ್ಂ॑ಷಿ ಸಂವಁಥ್ಸ॒ರಸ್ಯ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॒ತೇ-ಽಙ್ಗಾ॒ಪರೂಗ್॑ಷ್ಯೇ॒ವ ಸಂ॑ವಁಥ್ಸ॒ರಸ್ಯ॒ ಪ್ರತಿ॑ ದಧಾತ್ಯೇ॒ ತೇ ವೈ ಸಂ॑ವಁಥ್ಸ॒ರಸ್ಯ॒ ಚಖ್ಷು॑ಷೀ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ತಾಭ್ಯಾ॑ಮೇ॒ವ ಸು॑ವ॒ರ್ಗಂ-ಲೋಁ॒ಕಮನು॑ ಪಶ್ಯ- [ಪಶ್ಯತಿ, ಏ॒ಷಾ ವೈ] 33
-ತ್ಯೇ॒ಷಾ ವೈ ದೇ॒ವಾನಾಂ॒-ವಿಁಕ್ರಾ᳚ನ್ತಿ॒ ರ್ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ದೇ॒ವಾನಾ॑ಮೇ॒ವ ವಿಕ್ರಾ᳚ನ್ತಿ॒ಮನು॒ ವಿಕ್ರ॑ಮತ ಏ॒ಷ ವೈ ದೇ॑ವ॒ಯಾನಃ॒ ಪನ್ಥಾ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಯ ಏ॒ವ ದೇ॑ವ॒ಯಾನಃ॒ ಪನ್ಥಾ॒ಸ್ತಗ್ಂ ಸ॒ಮಾರೋ॑ಹತ್ಯೇ॒ತೌ ವೈ ದೇ॒ವಾನಾ॒ಗ್ಂ॒ ಹರೀ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಯಾವೇ॒ವ ದೇ॒ವಾನಾ॒ಗ್ಂ॒ ಹರೀ॒ ತಾಭ್ಯಾ॑- [ಹರೀ॒ ತಾಭ್ಯಾ᳚ಮ್, ಏ॒ವೈಭ್ಯೋ॑ ಹ॒ವ್ಯಂ-] 34
-ಮೇ॒ವೈಭ್ಯೋ॑ ಹ॒ವ್ಯಂ-ವಁ॑ಹತ್ಯೇ॒ತದ್ವೈ ದೇ॒ವಾನಾ॑ಮಾ॒ಸ್ಯಂ॑-ಯಁ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಸಾ॒ಖ್ಷಾದೇ॒ವ ದೇ॒ವಾನಾ॑ಮಾ॒ಸ್ಯೇ॑ ಜುಹೋತ್ಯೇ॒ಷ ವೈ ಹ॑ವಿರ್ಧಾ॒ನೀ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸಾ॒ಯಮ್ಪ್ರಾ॑ತರಗ್ನಿಹೋ॒ತ್ರ-ಞ್ಜು॑ಹೋತಿ॒ ಯಜ॑ತೇ ದರ್ಶಪೂರ್ಣಮಾ॒ಸಾ-ವಹ॑ರಹರ್-ಹವಿರ್ಧಾ॒ನಿನಾಗ್ಂ॑ ಸು॒ತೋ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಹವಿರ್ಧಾ॒ನ್ಯ॑ಸ್ಮೀತಿ॒ ಸರ್ವ॑ಮೇ॒ವಾಸ್ಯ॑ ಬರ್ಹಿ॒ಷ್ಯ॑-ನ್ದ॒ತ್ತ-ಮ್ಭ॑ವತಿ ದೇ॒ವಾವಾ ಅಹ॑- [ಅಹಃ, ಯ॒ಜ್ಞಿಯ॒-ನ್ನಾವಿ॑ನ್ದ॒-ನ್ತೇ] 35
-ರ್ಯ॒ಜ್ಞಿಯ॒-ನ್ನಾವಿ॑ನ್ದ॒-ನ್ತೇ ದ॑ರ್ಶಪೂರ್ಣಮಾ॒ಸಾವ॑ಪುನ॒-ನ್ತೌ ವಾ ಏ॒ತೌ ಪೂ॒ತೌ ಮೇದ್ಧ್ಯೌ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಪೂ॒ತಾವೇ॒ವೈನೌ॒ ಮೇದ್ಧ್ಯೌ॑ ಯಜತೇ॒ ನಾಮಾ॑ವಾ॒ಸ್ಯಾ॑ಯಾ-ಞ್ಚ ಪೌರ್ಣಮಾ॒ಸ್ಯಾ-ಞ್ಚ॒ ಸ್ತ್ರಿಯ॒-ಮುಪೇ॑ಯಾ॒ದ್ಯ- ದು॑ಪೇ॒ಯಾನ್ನಿರಿ॑ನ್ದ್ರಿಯ-ಸ್ಸ್ಯಾ॒-ಥ್ಸೋಮ॑ಸ್ಯ॒ ವೈ ರಾಜ್ಞೋ᳚-ಽರ್ಧಮಾ॒ಸಸ್ಯ॒ ರಾತ್ರ॑ಯಃ॒ ಪತ್ನ॑ಯ ಆಸ॒-ನ್ತಾಸಾ॑ಮಮಾವಾ॒ಸ್ಯಾ᳚-ಞ್ಚ ಪೌರ್ಣಮಾ॒ಸೀ-ಞ್ಚ॒ ನೋಪೈ॒- [ನೋಪೈ᳚ತ್, ತೇ ಏ॑ನಮ॒ಭಿ] 36
-ತ್ತೇ ಏ॑ನಮ॒ಭಿ ಸಮ॑ನಹ್ಯೇತಾ॒-ನ್ತಂ-ಯಁಖ್ಷ್ಮ॑ ಆರ್ಚ್ಛ॒-ದ್ರಾಜಾ॑ನಂ॒-ಯಁಖ್ಷ್ಮ॑ ಆರ॒ದಿತಿ॒ ತ-ದ್ರಾ॑ಜಯ॒ಖ್ಷ್ಮಸ್ಯ॒ ಜನ್ಮ॒ ಯ-ತ್ಪಾಪೀ॑ಯಾ॒ನಭ॑ವ॒-ತ್ತ-ತ್ಪಾ॑ಪಯ॒ಖ್ಷ್ಮಸ್ಯ॒ ಯಜ್ಜಾ॒ಯಾಭ್ಯಾ॒ಮವಿ॑ನ್ದ॒-ತ್ತಜ್ಜಾ॒ಯೇನ್ಯ॑ಸ್ಯ॒ ಯ ಏ॒ವಮೇ॒ತೇಷಾಂ॒-ಯಁಖ್ಷ್ಮಾ॑ಣಾ॒-ಞ್ಜನ್ಮ॒ ವೇದ॒ ನೈನ॑ಮೇ॒ತೇ ಯಖ್ಷ್ಮಾ॑ವಿನ್ದನ್ತಿ॒ ಸ ಏ॒ತೇ ಏ॒ವ ನ॑ಮ॒ಸ್ಯನ್ನುಪಾ॑ಧಾವ॒-ತ್ತೇ ಅ॑ಬ್ರೂತಾಂ॒-ವಁರಂ॑-ವೃಁಣಾವಹಾ ಆ॒ವ-ನ್ದೇ॒ವಾನಾ᳚-ಮ್ಭಾಗ॒ಧೇ ಅ॑ಸಾವಾ॒- [ಅ॑ಸಾವ, ಆ॒ವದಧಿ॑ ದೇ॒ವಾ] 37
-ಽವದಧಿ॑ ದೇ॒ವಾ ಇ॑ಜ್ಯಾನ್ತಾ॒ ಇತಿ॒ ತಸ್ಮಾ᳚-ಥ್ಸ॒ದೃಶೀ॑ನಾ॒ಗ್ಂ॒ ರಾತ್ರೀ॑ಣಾ-ಮಮಾವಾ॒ಸ್ಯಾ॑ಯಾ-ಞ್ಚ ಪೌರ್ಣಮಾ॒ಸ್ಯಾ-ಞ್ಚ॑ ದೇ॒ವಾ ಇ॑ಜ್ಯನ್ತ ಏ॒ತೇ ಹಿ ದೇ॒ವಾನಾ᳚-ಮ್ಭಾಗ॒ಧೇ ಭಾ॑ಗ॒ಧಾ ಅ॑ಸ್ಮೈ ಮನು॒ಷ್ಯಾ॑ ಭವನ್ತಿ॒ ಯ ಏ॒ವಂ-ವೇಁದ॑ ಭೂ॒ತಾನಿ॒ ಖ್ಷುಧ॑ಮಘ್ನನ್-ಥ್ಸ॒ದ್ಯೋ ಮ॑ನು॒ಷ್ಯಾ॑ ಅರ್ಧಮಾ॒ಸೇ ದೇ॒ವಾ ಮಾ॒ಸಿ ಪಿ॒ತರ॑-ಸ್ಸಂವಁಥ್ಸ॒ರೇ ವನ॒ಸ್ಪತ॑ಯ॒-ಸ್ತಸ್ಮಾ॒-ದಹ॑ರಹ-ರ್ಮನು॒ಷ್ಯಾ॑ ಅಶ॑ನಮಿಚ್ಛನ್ತೇ ಽರ್ಧಮಾ॒ಸೇ ದೇ॒ವಾ ಇ॑ಜ್ಯನ್ತೇ ಮಾ॒ಸಿ ಪಿ॒ತೃಭ್ಯಃ॑ ಕ್ರಿಯತೇ ಸಂವಁಥ್ಸ॒ರೇ ವನ॒ಸ್ಪತ॑ಯಃ॒ ಫಲ॑-ಙ್ಗೃಹ್ಣನ್ತಿ॒ ಯ ಏ॒ವಂ-ವೇಁದ॒ ಹನ್ತಿ॒ ಖ್ಷುಧ॒-ಮ್ಭ್ರಾತೃ॑ವ್ಯಮ್ ॥ 38 ॥
(ಪ॒ಶ್ಯ॒ತಿ॒ – ತಾಭ್ಯಾ॒ -ಮಹ॑ – ರೈ – ದಸಾವ॒ -ಫಲಗ್ಂ॑ -ಸ॒ಪ್ತ ಚ॑) (ಅ. 6)
ದೇ॒ವಾ ವೈ ನರ್ಚಿ ನ ಯಜು॑ಷ್ಯಶ್ರಯನ್ತ॒ ತೇ ಸಾಮ॑ನ್ನೇ॒ವಾ-ಽಶ್ರ॑ಯನ್ತ॒ ಹಿ-ಙ್ಕ॑ರೋತಿ॒ ಸಾಮೈ॒ವಾ-ಽಕ॒ರ್॒ಹಿ-ಙ್ಕ॑ರೋತಿ॒ ಯತ್ರೈ॒ವ ದೇ॒ವಾ ಅಶ್ರ॑ಯನ್ತ॒ ತತ॑ ಏ॒ವೈನಾ॒-ನ್ಪ್ರಯು॑ಙ್ಕ್ತೇ॒ ಹಿ-ಙ್ಕ॑ರೋತಿ ವಾ॒ಚ ಏ॒ವೈಷ ಯೋಗೋ॒ ಹಿ-ಙ್ಕ॑ರೋತಿ ಪ್ರ॒ಜಾ ಏ॒ವ ತ-ದ್ಯಜ॑ಮಾನ-ಸ್ಸೃಜತೇ॒ ತ್ರಿಃ ಪ್ರ॑ಥ॒ಮಾಮನ್ವಾ॑ಹ॒ ತ್ರಿರು॑ತ್ತ॒ಮಾಂ-ಯಁ॒ಜ್ಞಸ್ಯೈ॒ವ ತದ್ಬ॒ರ್॒ಸ- [ತದ್ಬ॒ರ್॒ಸಮ್, ನ॒ಹ್ಯ॒ತ್ಯಪ್ರ॑ಸ್ರಗ್ಂಸಾಯ॒-] 39
-ನ್ನ॑ಹ್ಯ॒ತ್ಯಪ್ರ॑ಸ್ರಗ್ಂಸಾಯ॒ ಸನ್ತ॑ತ॒ಮನ್ವಾ॑ಹ ಪ್ರಾ॒ಣಾನಾ॑ಮ॒ನ್ನಾದ್ಯ॑ಸ್ಯ॒ ಸನ್ತ॑ತ್ಯಾ॒ ಅಥೋ॒ ರಖ್ಷ॑ಸಾ॒ಮಪ॑ಹತ್ಯೈ॒ ರಾಥ॑ತಂರೀ-ಮ್ಪ್ರಥ॒ಮಾಮನ್ವಾ॑ಹ॒ ರಾಥ॑ತಂರೋ॒ ವಾ ಅ॒ಯಂ-ಲೋಁ॒ಕ ಇ॒ಮಮೇ॒ವ ಲೋ॒ಕಮ॒ಭಿ ಜ॑ಯತಿ॒ ತ್ರಿರ್ವಿ ಗೃ॑ಹ್ಣಾತಿ॒ ತ್ರಯ॑ ಇ॒ಮೇ ಲೋ॒ಕಾ ಇ॒ಮಾನೇ॒ವ ಲೋ॒ಕಾನ॒ಭಿ ಜ॑ಯತಿ॒ ಬಾರ್ಹ॑ತೀಮುತ್ತ॒ಮಾ-ಮನ್ವಾ॑ಹ॒ ಬಾರ್ಹ॑ತೋ॒ ವಾ ಅ॒ಸೌ ಲೋ॒ಕೋ॑-ಽಮುಮೇ॒ವ ಲೋ॒ಕಮ॒ಭಿ ಜ॑ಯತಿ॒ ಪ್ರ ವೋ॒ [ಪ್ರ ವಃ॑, ವಾಜಾ॒] 40
ವಾಜಾ॒ ಇತ್ಯನಿ॑ರುಕ್ತಾ-ಮ್ಪ್ರಾಜಾಪ॒ತ್ಯಾಮನ್ವಾ॑ಹ ಯ॒ಜ್ಞೋ ವೈ ಪ್ರ॒ಜಾಪ॑ತಿರ್ಯ॒ಜ್ಞಮೇ॒ವ ಪ್ರ॒ಜಾಪ॑ತಿ॒ಮಾ ರ॑ಭತೇ॒ ಪ್ರವೋ॒ ವಾಜಾ॒ ಇತ್ಯನ್ವಾ॒ಹಾನ್ನಂ॒-ವೈಁ ವಾಜೋ-ಽನ್ನ॑ಮೇ॒ವಾವ॑ ರುನ್ಧೇ॒ ಪ್ರವೋ॒ ವಾಜಾ॒ ಇತ್ಯನ್ವಾ॑ಹ॒ ತಸ್ಮಾ᳚-ತ್ಪ್ರಾ॒ಚೀನ॒ಗ್ಂ॒ ರೇತೋ॑ ಧೀಯ॒ತೇ-ಽಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯಾ॑ಹ॒ ತಸ್ಮಾ᳚-ತ್ಪ್ರ॒ತೀಚೀಃ᳚ ಪ್ರ॒ಜಾ ಜಾ॑ಯನ್ತೇ॒ ಪ್ರವೋ॒ ವಾಜಾ॒ [ವಾಜಾಃ᳚, ಇತ್ಯನ್ವಾ॑ಹ॒] 41
ಇತ್ಯನ್ವಾ॑ಹ॒ ಮಾಸಾ॒ ವೈ ವಾಜಾ॑ ಅರ್ಧಮಾ॒ಸಾ ಅ॒ಭಿದ್ಯ॑ವೋ ದೇ॒ವಾ ಹ॒ವಿಷ್ಮ॑ನ್ತೋ॒ ಗೌರ್ಘೃ॒ತಾಚೀ॑ ಯ॒ಜ್ಞೋ ದೇ॒ವಾಞ್ಜಿ॑ಗಾತಿ॒ ಯಜ॑ಮಾನ-ಸ್ಸುಮ್ನ॒ಯು-ರಿ॒ದ-ಮ॑ಸೀ॒ದ-ಮ॒ಸೀತ್ಯೇ॒ವ ಯ॒ಜ್ಞಸ್ಯ॑ ಪ್ರಿ॒ಯ-ನ್ಧಾಮಾವ॑ ರುನ್ಧೇ॒ ಯ-ಙ್ಕಾ॒ಮಯೇ॑ತ॒ ಸರ್ವ॒-ಮಾಯು॑-ರಿಯಾ॒-ದಿತಿ॒ ಪ್ರ ವೋ॒ ವಾಜಾ॒ ಇತಿ॒ ತಸ್ಯಾ॒ನೂಚ್ಯಾಗ್ನ॒ ಆ ಯಾ॑ಹಿ ವೀ॒ತಯ॒ ಇತಿ॒ ಸನ್ತ॑ತ॒-ಮುತ್ತ॑ರ-ಮರ್ಧ॒ರ್ಚಮಾ ಲ॑ಭೇತ [ ] 42
ಪ್ರಾ॒ಣೇನೈ॒ವಾ-ಽಸ್ಯಾ॑-ಽಪಾ॒ನ-ನ್ದಾ॑ಧಾರ॒ ಸರ್ವ॒ಮಾಯು॑ರೇತಿ॒ ಯೋ ವಾ ಅ॑ರ॒ತ್ನಿಗ್ಂ ಸಾ॑ಮಿಧೇ॒ನೀನಾಂ॒-ವೇಁದಾ॑ರ॒ತ್ನಾವೇ॒ವ ಭ್ರಾತೃ॑ವ್ಯ-ಙ್ಕುರುತೇ-ಽರ್ಧ॒ರ್ಚೌ ಸ-ನ್ದ॑ಧಾತ್ಯೇ॒ಷ ವಾ ಅ॑ರ॒ತ್ನಿ-ಸ್ಸಾ॑ಮಿಧೇ॒ನೀನಾಂ॒-ಯಁ ಏ॒ವಂ-ವೇಁದಾ॑ರ॒ತ್ನಾವೇ॒ವ ಭ್ರಾತೃ॑ವ್ಯ-ಙ್ಕುರುತ॒ ಋಷೇರ್॑-ಋಷೇ॒ರ್ವಾ ಏ॒ತಾ ನಿರ್ಮಿ॑ತಾ॒ ಯ-ಥ್ಸಾ॑ಮಿಧೇ॒ನ್ಯ॑ಸ್ತಾ ಯದಸಂ॑-ಯುಁಕ್ತಾ॒-ಸ್ಸ್ಯುಃ ಪ್ರ॒ಜಯಾ॑ ಪ॒ಶುಭಿ॒ ರ್ಯಜ॑ಮಾನಸ್ಯ॒ ವಿ ತಿ॑ಷ್ಠೇರನ್ನರ್ಧ॒ರ್ಚೌ ಸ-ನ್ದ॑ಧಾತಿ॒ ಸಂ ಯುಁ॑ನಕ್ತ್ಯೇ॒ವೈನಾ॒ಸ್ತಾ ಅ॑ಸ್ಮೈ॒ ಸಂಯುಁ॑ಕ್ತಾ॒ ಅವ॑ರುದ್ಧಾ॒-ಸ್ಸರ್ವಾ॑-ಮಾ॒ಶಿಷ॑-ನ್ದುಹ್ರೇ ॥ 43 ॥
(ಬ॒ರ್ಸಂ – ವೋಁ॑ – ಜಾಯನ್ತೇ॒ ಪ್ರವೋ॒ ವಾಜಾ॑ – ಲಭೇತ – ದಧಾತಿ॒ ಸಂ – ದಶ॑ ಚ) (ಅ. 7)
ಅಯ॑ಜ್ಞೋ॒ ವಾ ಏ॒ಷ ಯೋ॑-ಽಸಾ॒ಮಾ-ಽಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯಾ॑ಹ ರಥನ್ತ॒ರಸ್ಯೈ॒ಷ ವರ್ಣ॒ಸ್ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರ॒ ಇತ್ಯಾ॑ಹ ವಾಮದೇ॒ವ್ಯಸ್ಯೈ॒ಷ ವರ್ಣೋ॑ ಬೃ॒ಹದ॑ಗ್ನೇ ಸು॒ವೀರ್ಯ॒ಮಿತ್ಯಾ॑ಹ ಬೃಹ॒ತ ಏ॒ಷ ವರ್ಣೋ॒ ಯದೇ॒ತ-ನ್ತೃ॒ಚಮ॒ನ್ವಾಹ॑ ಯ॒ಜ್ಞಮೇ॒ವ ತ-ಥ್ಸಾಮ॑ನ್ವನ್ತ-ಙ್ಕರೋತ್ಯ॒ಗ್ನಿರ॒ಮುಷ್ಮಿ॑-ಲ್ಲೋಁ॒ಕ ಆಸೀ॑ದಾದಿ॒ತ್ಯೋ᳚-ಽಸ್ಮಿ-ನ್ತಾವಿ॒ಮೌ ಲೋ॒ಕಾವಶಾ᳚ನ್ತಾ- [ಲೋ॒ಕಾವಶಾ᳚ನ್ತೌ, ಆ॒ಸ್ತಾ॒-ನ್ತೇ ದೇ॒ವಾ] 44
-ವಾಸ್ತಾ॒-ನ್ತೇ ದೇ॒ವಾ ಅ॑ಬ್ರುವ॒ನ್ನೇತೇ॒ಮೌ ವಿ ಪರ್ಯೂ॑ಹಾ॒ಮೇತ್ಯಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯ॒ಸ್ಮಿ-ಲ್ಲೋಁ॒ಕೇ᳚-ಽಗ್ನಿಮ॑ದಧು ರ್ಬೃ॒ಹದ॑ಗ್ನೇ ಸು॒ವೀರ್ಯ॒ಮಿತ್ಯ॒ಮುಷ್ಮಿ॑-ಲ್ಲೋಁ॒ಕ ಆ॑ದಿ॒ತ್ಯ-ನ್ತತೋ॒ ವಾ ಇ॒ಮೌ ಲೋ॒ಕಾವ॑ಶಾಮ್ಯತಾಂ॒-ಯಁದೇ॒ವಮ॒ನ್ವಾಹಾ॒ನಯೋ᳚ ರ್ಲೋ॒ಕಯೋ॒-ಶ್ಶಾನ್ತ್ಯೈ॒ ಶಾಮ್ಯ॑ತೋ-ಽಸ್ಮಾ ಇ॒ಮೌ ಲೋ॒ಕೌ ಯ ಏ॒ವಂ-ವೇಁದ॒ ಪಞ್ಚ॑ದಶ ಸಾಮಿಧೇ॒ನೀರನ್ವಾ॑ಹ॒ ಪಞ್ಚ॑ದಶ॒ [ಪಞ್ಚ॑ದಶ, ವಾ ಅ॑ರ್ಧಮಾ॒ಸಸ್ಯ॒] 45
ವಾ ಅ॑ರ್ಧಮಾ॒ಸಸ್ಯ॒ ರಾತ್ರ॑ಯೋ-ಽರ್ಧಮಾಸ॒ಶ-ಸ್ಸಂ॑ವಁಥ್ಸ॒ರ ಆ᳚ಪ್ಯತೇ॒ ತಾಸಾ॒-ನ್ತ್ರೀಣಿ॑ ಚ ಶ॒ತಾನಿ॑ ಷ॒ಷ್ಟಿಶ್ಚಾ॒ಖ್ಷರಾ॑ಣಿ॒ ತಾವ॑ತೀ-ಸ್ಸಂವಁಥ್ಸ॒ರಸ್ಯ॒ ರಾತ್ರ॑ಯೋ-ಽಖ್ಷರ॒ಶ ಏ॒ವ ಸಂ॑ವಁಥ್ಸ॒ರಮಾ᳚ಪ್ನೋತಿ ನೃ॒ಮೇಧ॑ಶ್ಚ॒ ಪರು॑ಚ್ಛೇಪಶ್ಚ ಬ್ರಹ್ಮ॒ವಾದ್ಯ॑ಮವದೇತಾಮ॒ಸ್ಮಿ-ನ್ದಾರಾ॑ವಾ॒ರ್ದ್ರೇ᳚-ಽಗ್ನಿ-ಞ್ಜ॑ನಯಾವ ಯತ॒ರೋ ನೌ॒ ಬ್ರಹ್ಮೀ॑ಯಾ॒ನಿತಿ॑ ನೃ॒ಮೇಧೋ॒-ಽಭ್ಯ॑ವದ॒-ಥ್ಸ ಧೂ॒ಮಮ॑ಜನಯ॒-ತ್ಪರು॑ಚ್ಛೇಪೋ॒ ಽಭ್ಯ॑ವದ॒-ಥ್ಸೋ᳚-ಽಗ್ನಿಮ॑ಜನಯ॒ದೃಷ॒ ಇತ್ಯ॑ಬ್ರವೀ॒- [ಇತ್ಯ॑ಬ್ರವೀತ್, ಯಥ್ಸ॒ಮಾವ॑ದ್ವಿ॒ದ್ವ] 46
-ದ್ಯಥ್ಸ॒ಮಾವ॑ದ್ವಿ॒ದ್ವ ಕ॒ಥಾ ತ್ವಮ॒ಗ್ನಿಮಜೀ॑ಜನೋ॒ ನಾಹಮಿತಿ॑ ಸಾಮಿಧೇ॒ನೀನಾ॑ಮೇ॒ವಾಹಂ-ವಁರ್ಣಂ॑-ವೇಁ॒ದೇತ್ಯ॑ಬ್ರವೀ॒ದ್ಯ-ದ್ಘೃ॒ತವ॑-ತ್ಪ॒ದಮ॑ನೂ॒ಚ್ಯತೇ॒ ಸ ಆ॑ಸಾಂ॒-ವಁರ್ಣ॒ಸ್ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರ॒ ಇತ್ಯಾ॑ಹ ಸಾಮಿಧೇ॒ನೀಷ್ವೇ॒ವ ತಜ್ಜ್ಯೋತಿ॑ ರ್ಜನಯತಿ॒ ಸ್ತ್ರಿಯ॒ಸ್ತೇನ॒ ಯದೃಚ॒-ಸ್ಸ್ತ್ರಿಯ॒ಸ್ತೇನ॒ ಯ-ದ್ಗಾ॑ಯ॒ತ್ರಿಯ॒-ಸ್ಸ್ತ್ರಿಯ॒ಸ್ತೇನ॒ ಯ-ಥ್ಸಾ॑ಮಿಧೇ॒ನ್ಯೋ॑ ವೃಷ॑ಣ್ವತೀ॒-ಮನ್ವಾ॑ಹ॒ [ವೃಷ॑ಣ್ವತೀ॒-ಮನ್ವಾ॑ಹ, ತೇನ॒ ಪುಗ್ಗ್ಸ್ವ॑ತೀ॒ಸ್ತೇನ॒] 47
ತೇನ॒ ಪುಗ್ಗ್ಸ್ವ॑ತೀ॒ಸ್ತೇನ॒ ಸೇನ್ದ್ರಾ॒ಸ್ತೇನ॑ ಮಿಥು॒ನಾ ಅ॒ಗ್ನಿರ್ದೇ॒ವಾನಾ᳚-ನ್ದೂ॒ತ ಆಸೀ॑ದು॒ಶನಾ॑ ಕಾ॒ವ್ಯೋ-ಽಸು॑ರಾಣಾ॒-ನ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞಮೈ॑ತಾ॒ಗ್ಂ॒ ಸ ಪ್ರ॒ಜಾಪ॑ತಿರ॒ಗ್ನಿ-ನ್ದೂ॒ತಂ-ವೃಁ॑ಣೀಮಹ॒ ಇತ್ಯ॒ಭಿ ಪ॒ರ್ಯಾವ॑ರ್ತತ॒ ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯಸ್ಯೈ॒ವಂ-ವಿಁ॒ದುಷೋ॒-ಽಗ್ನಿ-ನ್ದೂ॒ತಂ-ವೃಁ॑ಣೀಮಹ॒ ಇತ್ಯ॒ನ್ವಾಹ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತ್ಯದ್ಧ್ವ॒ರವ॑ತೀ॒ಮನ್ವಾ॑ಹ॒ ಭ್ರಾತೃ॑ವ್ಯಮೇ॒ವೈತಯಾ᳚ [ಭ್ರಾತೃ॑ವ್ಯಮೇ॒ವೈತಯಾ᳚, ಧ್ವ॒ರ॒ತಿ॒ ಶೋ॒ಚಿಷ್ಕೇ॑ಶ॒ಸ್ತಮೀ॑ಮಹ॒] 48
ಧ್ವರತಿ ಶೋ॒ಚಿಷ್ಕೇ॑ಶ॒ಸ್ತಮೀ॑ಮಹ॒ ಇತ್ಯಾ॑ಹ ಪ॒ವಿತ್ರ॑ಮೇ॒ವೈತ-ದ್ಯಜ॑ಮಾನಮೇ॒ವೈತಯಾ॑ ಪವಯತಿ॒ ಸಮಿ॑ದ್ಧೋ ಅಗ್ನ ಆಹು॒ತೇತ್ಯಾ॑ಹ ಪರಿ॒ಧಿಮೇ॒ವೈತ-ಮ್ಪರಿ॑ ದಧಾ॒ತ್ಯಸ್ಕ॑ನ್ದಾಯ॒ ಯದತ॑ ಊ॒ರ್ಧ್ವಮ॑ಭ್ಯಾದ॒ದ್ಧ್ಯಾದ್ಯಥಾ॑ ಬಹಿಃ ಪರಿ॒ಧಿ ಸ್ಕನ್ದ॑ತಿ ತಾ॒ದೃಗೇ॒ವ ತ-ತ್ತ್ರಯೋ॒ ವಾ ಅ॒ಗ್ನಯೋ॑ ಹವ್ಯ॒ವಾಹ॑ನೋ ದೇ॒ವಾನಾ᳚-ಙ್ಕವ್ಯ॒ವಾಹ॑ನಃ ಪಿತೃ॒ಣಾಗ್ಂ ಸ॒ಹರ॑ಖ್ಷಾ॒ ಅಸು॑ರಾಣಾ॒-ನ್ತ ಏ॒ತರ್ಹ್ಯಾ ಶಗ್ಂ॑ಸನ್ತೇ॒ ಮಾಂ-ವಁ॑ರಿಷ್ಯತೇ॒ ಮಾ- [ಮಾಮ್, ಇತಿ॑] 49
-ಮಿತಿ॑ ವೃಣೀ॒ದ್ಧ್ವಗ್ಂ ಹ॑ವ್ಯ॒ವಾಹ॑ನ॒ಮಿತ್ಯಾ॑ಹ॒ ಯ ಏ॒ವ ದೇ॒ವಾನಾ॒-ನ್ತಂ-ವೃಁ॑ಣೀತ ಆರ್ಷೇ॒ಯಂ-ವೃಁ॑ಣೀತೇ॒ ಬನ್ಧೋ॑ರೇ॒ವ ನೈತ್ಯಥೋ॒ ಸನ್ತ॑ತ್ಯೈ ಪ॒ರಸ್ತಾ॑ದ॒ರ್ವಾಚೋ॑ ವೃಣೀತೇ॒ ತಸ್ಮಾ᳚-ತ್ಪ॒ರಸ್ತಾ॑ದ॒ರ್ವಾಞ್ಚೋ॑ ಮನು॒ಷ್ಯಾ᳚-ನ್ಪಿ॒ತರೋ-ಽನು॒ ಪ್ರ ಪಿ॑ಪತೇ ॥ 50 ॥
(ಅಶಾ᳚ನ್ತಾ – ವಾಹ॒ ಪಞ್ಚ॑ದಶಾ – ಬ್ರವೀ॒ – ದನ್ವಾ॑ಹೈ॒ – ತಯಾ॑ – ವರಿಷ್ಯತೇ॒ ಮಾ – ಮೇಕಾ॒ನ್ನತ್ರಿ॒ಗ್ಂ॒ಶಚ್ಚ॑) (ಅ. 8)
ಅಗ್ನೇ॑ ಮ॒ಹಾಗ್ಂ ಅ॒ಸೀತ್ಯಾ॑ಹ ಮ॒ಹಾನ್. ಹ್ಯೇ॑ಷ ಯದ॒ಗ್ನಿ ರ್ಬ್ರಾ᳚ಹ್ಮ॒ಣೇತ್ಯಾ॑ಹ ಬ್ರಾಹ್ಮ॒ಣೋ ಹ್ಯೇ॑ಷ ಭಾ॑ರ॒ತೇತ್ಯಾ॑ಹೈ॒ಷ ಹಿ ದೇ॒ವೇಭ್ಯೋ॑ ಹ॒ವ್ಯ-ಮ್ಭರ॑ತಿ ದೇ॒ವೇದ್ಧ॒ ಇತ್ಯಾ॑ಹ ದೇ॒ವಾ ಹ್ಯೇ॑ತಮೈನ್ಧ॑ತ॒ ಮನ್ವಿ॑ದ್ಧ॒ ಇತ್ಯಾ॑ಹ॒ ಮನು॒ರ್ಹ್ಯೇ॑ತಮುತ್ತ॑ರೋ ದೇ॒ವೇಭ್ಯ॒ ಐನ್ಧರ್ಷಿ॑ಷ್ಟುತ॒ ಇತ್ಯಾ॒ಹರ್ಷ॑ಯೋ॒ ಹ್ಯೇ॑ತಮಸ್ತು॑ವ॒ನ್ ವಿಪ್ರಾ॑ನುಮದಿತ॒ ಇತ್ಯಾ॑ಹ॒ [ಇತ್ಯಾ॑ಹ, ವಿಪ್ರಾ॒ ಹ್ಯೇ॑ತೇ] 51
ವಿಪ್ರಾ॒ ಹ್ಯೇ॑ತೇ ಯಚ್ಛು॑ಶ್ರು॒ವಾಗ್ಂಸಃ॑ ಕವಿಶ॒ಸ್ತ ಇತ್ಯಾ॑ಹ ಕ॒ವಯೋ॒ ಹ್ಯೇ॑ತೇ ಯಚ್ಛು॑ಶ್ರು॒ವಾಗ್ಂಸೋ॒ ಬ್ರಹ್ಮ॑ಸಗ್ಂಶಿತ॒ ಇತ್ಯಾ॑ಹ॒ ಬ್ರಹ್ಮ॑ಸಗ್ಂಶಿತೋ॒ ಹ್ಯೇ॑ಷ ಘೃ॒ತಾಹ॑ವನ॒ ಇತ್ಯಾ॑ಹ ಘೃತಾಹು॒ತಿರ್ಹ್ಯ॑ಸ್ಯ ಪ್ರಿ॒ಯತ॑ಮಾ ಪ್ರ॒ಣೀರ್ಯ॒ಜ್ಞಾನಾ॒ಮಿತ್ಯಾ॑ಹ ಪ್ರ॒ಣೀರ್ಹ್ಯೇ॑ಷ ಯ॒ಜ್ಞಾನಾಗ್ಂ॑ ರ॒ಥೀರ॑ದ್ಧ್ವ॒ರಾಣಾ॒ಮಿತ್ಯಾ॑ಹೈ॒ಷ ಹಿ ದೇ॑ವರ॒ಥೋ॑-ಽತೂರ್ತೋ॒ ಹೋತೇತ್ಯಾ॑ಹ॒ ನ ಹ್ಯೇ॑ತ-ಙ್ಕಶ್ಚ॒ನ [ ] 52
ತರ॑ತಿ॒ ತೂರ್ಣಿ॑ರ್-ಹವ್ಯ॒ವಾಡಿತ್ಯಾ॑ಹ॒ ಸರ್ವ॒ಗ್ಗ್॒ಹ್ಯೇ॑ಷ ತರ॒ತ್ಯಾಸ್ಪಾತ್ರ॑-ಞ್ಜು॒ಹೂರ್ದೇ॒ವಾನಾ॒ಮಿತ್ಯಾ॑ಹ ಜು॒ಹೂರ್ಹ್ಯೇ॑ಷ ದೇ॒ವಾನಾ᳚-ಞ್ಚಮ॒ಸೋ ದೇ॑ವ॒ಪಾನ॒ ಇತ್ಯಾ॑ಹ ಚಮ॒ಸೋ ಹ್ಯೇ॑ಷ ದೇ॑ವ॒ಪಾನೋ॒-ಽರಾಗ್ಂ ಇ॑ವಾಗ್ನೇ ನೇ॒ಮಿರ್ದೇ॒ವಾಗ್ಸ್ತ್ವ-ಮ್ಪ॑ರಿ॒ಭೂರ॒ಸೀತ್ಯಾ॑ಹ ದೇ॒ವಾನ್ ಹ್ಯೇ॑ಷ ಪ॑ರಿ॒ಭೂರ್ಯ-ದ್ಬ್ರೂ॒ಯಾದಾ ವ॑ಹ ದೇ॒ವಾ-ನ್ದೇ॑ವಯ॒ತೇ ಯಜ॑ಮಾನಾ॒ಯೇತಿ॒ ಭ್ರಾತೃ॑ವ್ಯಮಸ್ಮೈ [ಭ್ರಾತೃ॑ವ್ಯಮಸ್ಮೈ, ಜ॒ನ॒ಯೇ॒ದಾ ವ॑ಹ] 53
ಜನಯೇ॒ದಾ ವ॑ಹ ದೇ॒ವಾನ್. ಯಜ॑ಮಾನಾ॒ಯೇತ್ಯಾ॑ಹ॒ ಯಜ॑ಮಾನಮೇ॒ವೈತೇನ॑ ವರ್ಧಯತ್ಯ॒ಗ್ನಿಮ॑ಗ್ನ॒ ಆ ವ॑ಹ॒ ಸೋಮ॒ಮಾ ವ॒ಹೇತ್ಯಾ॑ಹ ದೇ॒ವತಾ॑ ಏ॒ವ ತ-ದ್ಯ॑ಥಾಪೂ॒ರ್ವಮುಪ॑ ಹ್ವಯತ॒ ಆ ಚಾ᳚ಗ್ನೇ ದೇ॒ವಾನ್. ವಹ॑ ಸು॒ಯಜಾ॑ ಚ ಯಜ ಜಾತವೇದ॒ ಇತ್ಯಾ॑ಹಾ॒ಗ್ನಿಮೇ॒ವ ತ-ಥ್ಸಗ್ಗ್ ಶ್ಯ॑ತಿ॒ ಸೋ᳚-ಽಸ್ಯ॒ ಸಗ್ಂಶಿ॑ತೋ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತ್ಯ॒ಗ್ನಿರ್-ಹೋತೇ- [-ಹೋತಾ᳚, ಇತ್ಯಾ॑ಹಾ॒-ಽಗ್ನಿರ್ವೈ] 54
-ತ್ಯಾ॑ಹಾ॒-ಽಗ್ನಿರ್ವೈ ದೇ॒ವಾನಾ॒ಗ್ಂ॒ ಹೋತಾ॒ ಯ ಏ॒ವ ದೇ॒ವಾನಾ॒ಗ್ಂ॒ ಹೋತಾ॒ ತಂ-ವೃಁ॑ಣೀತೇ॒ಸ್ಮೋ ವ॒ಯಮಿತ್ಯಾ॑ಹಾ॒-ಽಽತ್ಮಾನ॑ಮೇ॒ವ ಸ॒ತ್ತ್ವ-ಙ್ಗ॑ಮಯತಿ ಸಾ॒ಧು ತೇ॑ ಯಜಮಾನ ದೇ॒ವತೇತ್ಯಾ॑ಹಾ॒-ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತೇ॒ ಯದ್ಬ್ರೂ॒ಯಾ-ದ್ಯೋ᳚-ಽಗ್ನಿಗ್ಂ ಹೋತಾ॑ರ॒ಮವೃ॑ಥಾ॒ ಇತ್ಯ॒ಗ್ನಿನೋ॑ಭ॒ಯತೋ॒ ಯಜ॑ಮಾನ॒-ಮ್ಪರಿ॑ ಗೃಹ್ಣೀಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ-ದ್ಯಜಮಾನದೇವ॒ತ್ಯಾ॑ ವೈ ಜು॒ಹೂರ್ಭ್ರಾ॑ತೃವ್ಯ ದೇವ॒ತ್ಯೋ॑ಪ॒ಭೃ- [ದೇವ॒ತ್ಯೋ॑ಪ॒ಭೃತ್, ಯದ್ದ್ವೇ ಇ॑ವ] 55
-ದ್ಯದ್ದ್ವೇ ಇ॑ವ ಬ್ರೂ॒ಯಾ-ದ್ಭ್ರಾತೃ॑ವ್ಯಮಸ್ಮೈ ಜನಯೇ-ದ್ಘೃ॒ತವ॑ತೀಮದ್ಧ್ವರ್ಯೋ॒ ಸ್ರುಚ॒ಮಾ-ಽಸ್ಯ॒ಸ್ವೇತ್ಯಾ॑ಹ॒ ಯಜ॑ಮಾನ ಮೇ॒ವೈತೇನ॑ ವರ್ಧಯತಿ ದೇವಾ॒ಯುವ॒ಮಿತ್ಯಾ॑ಹ ದೇ॒ವಾನ್. ಹ್ಯೇ॑ಷಾ-ಽವ॑ತಿ ವಿ॒ಶ್ವವಾ॑ರಾ॒ಮಿತ್ಯಾ॑ಹ॒ ವಿಶ್ವ॒ಗ್ಗ್॒ ಹ್ಯೇ॑ಷಾ-ಽವ॒ತೀಡಾ॑ಮಹೈ ದೇ॒ವಾಗ್ಂ ಈ॒ಡೇನ್ಯಾ᳚ನ್ನಮ॒ಸ್ಯಾಮ॑ ನಮ॒ಸ್ಯಾನ್॑ ಯಜಾ॑ಮ ಯ॒ಜ್ಞಿಯಾ॒ನಿತ್ಯಾ॑ಹಮನು॒ಷ್ಯಾ॑ ವಾ ಈ॒ಡೇನ್ಯಾಃ᳚ ಪಿ॒ತರೋ॑ ನಮ॒ಸ್ಯಾ॑ ದೇ॒ವಾ ಯ॒ಜ್ಞಿಯಾ॑ ದೇ॒ವತಾ॑ ಏ॒ವ ತ-ದ್ಯ॑ಥಾಭಾ॒ಗಂ-ಯಁ॑ಜತಿ ॥ 56 ॥
(ವಿಪ್ರಾ॑ನುಮದಿತ॒ ಇತ್ಯಾ॑ಹ – ಚ॒ನಾ – ಽಸ್ಮೈ॒ – ಹೋತೋ॑ – ಪ॒ಭೃ-ದ್- ದೇ॒ವತಾ॑ ಏ॒ವ – ತ್ರೀಣಿ॑ ಚ) (ಅ. 9)
ತ್ರೀಗ್ಸ್ತೃ॒ಚಾನನು॑ ಬ್ರೂಯಾ-ದ್ರಾಜ॒ನ್ಯ॑ಸ್ಯ॒ ತ್ರಯೋ॒ ವಾ ಅ॒ನ್ಯೇ ರಾ॑ಜ॒ನ್ಯಾ᳚-ತ್ಪುರು॑ಷಾ ಬ್ರಾಹ್ಮ॒ಣೋ ವೈಶ್ಯ॑-ಶ್ಶೂ॒ದ್ರಸ್ತಾನೇ॒ವಾಸ್ಮಾ॒ ಅನು॑ಕಾನ್ ಕರೋತಿ॒ ಪಞ್ಚ॑ದ॒ಶಾನು॑ ಬ್ರೂಯಾ-ದ್ರಾಜ॒ನ್ಯ॑ಸ್ಯ ಪಞ್ಚದ॒ಶೋ ವೈ ರಾ॑ಜ॒ನ್ಯ॑-ಸ್ಸ್ವ ಏ॒ವೈನ॒ಗ್ಗ್॒ ಸ್ತೋಮೇ॒ ಪ್ರತಿ॑ಷ್ಠಾಪಯತಿ ತ್ರಿ॒ಷ್ಟುಭಾ॒ ಪರಿ॑ ದದ್ಧ್ಯಾದಿನ್ದ್ರಿ॒ಯಂ-ವೈಁ ತ್ರಿ॒ಷ್ಟುಗಿ॑ನ್ದ್ರಿ॒ಯಕಾ॑ಮಃ॒ ಖಲು॒ ವೈ ರಾ॑ಜ॒ನ್ಯೋ॑ ಯಜತೇ ತ್ರಿ॒ಷ್ಟುಭೈ॒ವಾಸ್ಮಾ॑ ಇನ್ದ್ರಿ॒ಯ-ಮ್ಪರಿ॑ ಗೃಹ್ಣಾತಿ॒ ಯದಿ॑ ಕಾ॒ಮಯೇ॑ತ [ಕಾ॒ಮಯೇ॑ತ, ಬ್ರ॒ಹ್ಮ॒ವ॒ರ್ಚ॒ಸಮ॒ಸ್ತ್ವಿತಿ॑] 57
ಬ್ರಹ್ಮವರ್ಚ॒ಸಮ॒ಸ್ತ್ವಿತಿ॑ ಗಾಯತ್ರಿ॒ಯಾ ಪರಿ॑ ದದ್ಧ್ಯಾ-ದ್ಬ್ರಹ್ಮವರ್ಚ॒ಸಂ-ವೈಁ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸಮೇ॒ವ ಭ॑ವತಿ ಸ॒ಪ್ತದ॒ಶಾನು॑ ಬ್ರೂಯಾ॒-ದ್ವೈಶ್ಯ॑ಸ್ಯ ಸಪ್ತದ॒ಶೋ ವೈ ವೈಶ್ಯ॒-ಸ್ಸ್ವ ಏ॒ವೈನ॒ಗ್ಗ್॒ ಸ್ತೋಮೇ॒ ಪ್ರತಿ॑ ಷ್ಠಾಪಯತಿ॒ಜಗ॑ತ್ಯಾ॒ ಪರಿ॑ ದದ್ಧ್ಯಾ॒ಜ್ಜಾಗ॑ತಾ॒ ವೈ ಪ॒ಶವಃ॑ ಪ॒ಶುಕಾ॑ಮಃ॒ ಖಲು॒ ವೈ ವೈಶ್ಯೋ॑ ಯಜತೇ॒ ಜಗ॑ತ್ಯೈ॒ವಾಸ್ಮೈ॑ ಪ॒ಶೂ-ನ್ಪರಿ॑ ಗೃಹ್ಣಾ॒ತ್ಯೇ ಕ॑ವಿಗ್ಂ ಶತಿ॒ಮನು॑ ಬ್ರೂಯಾ-ತ್ಪ್ರತಿ॒ಷ್ಠಾಕಾ॑ಮಸ್ಯೈ ಕವಿ॒ಗ್ಂ॒ಶ-ಸ್ಸ್ತೋಮಾ॑ನಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯೈ॒ [ಪ್ರತಿ॑ಷ್ಠಿತ್ಯೈ, ಚತು॑ರ್ವಿಗ್ಂಶತಿ॒ಮನು॑] 58
ಚತು॑ರ್ವಿಗ್ಂಶತಿ॒ಮನು॑ ಬ್ರೂಯಾ-ದ್ಬ್ರಹ್ಮವರ್ಚ॒ಸ-ಕಾ॑ಮಸ್ಯ॒ ಚತು॑ರ್ವಿಗ್ಂಶತ್ಯಖ್ಷರಾ ಗಾಯ॒ತ್ರೀ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸ-ಙ್ಗಾ॑ಯತ್ರಿ॒ಯೈವಾಸ್ಮೈ᳚ ಬ್ರಹ್ಮವರ್ಚ॒ಸಮವ॑ ರುನ್ಧೇ ತ್ರಿ॒ಗ್ಂ॒ಶತ॒ಮನು॑ ಬ್ರೂಯಾ॒ದನ್ನ॑ಕಾಮಸ್ಯ ತ್ರಿ॒ಗ್ಂ॒ಶದ॑ಖ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾಸ್ಮಾ॑ ಅ॒ನ್ನಾದ್ಯ॒ಮವ॑ ರುನ್ಧೇ॒ ದ್ವಾತ್ರಿಗ್ಂ॑ಶತ॒ಮನು॑ ಬ್ರೂಯಾ-ತ್ಪ್ರತಿ॒ಷ್ಠಾಕಾ॑ಮಸ್ಯ॒ ದ್ವಾತ್ರಿಗ್ಂ॑ಶದಖ್ಷರಾ ಽನು॒ಷ್ಟುಗ॑ನು॒ಷ್ಟು-ಪ್ಛನ್ದ॑ಸಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯೈ॒ ಷಟ್ತ್ರಿಗ್ಂ॑ಶತ॒ಮನು॑ ಬ್ರೂಯಾ-ತ್ಪ॒ಶುಕಾ॑ಮಸ್ಯ॒ ಷಟ್ತ್ರಿಗ್ಂ॑ಶದಖ್ಷರಾ ಬೃಹ॒ತೀ ಬಾರ್ಹ॑ತಾಃ ಪ॒ಶವೋ॑ ಬೃಹ॒ತ್ಯೈವಾಸ್ಮೈ॑ ಪ॒ಶೂ- [ಪ॒ಶೂನ್, ಅವ॑ ರುನ್ಧೇ॒] 59
-ನವ॑ ರುನ್ಧೇ॒ ಚತು॑ಶ್ಚತ್ವಾರಿಗ್ಂಶತ॒ಮನು॑ ಬ್ರೂಯಾದಿನ್ದ್ರಿ॒ಯಕಾ॑ಮಸ್ಯ॒ ಚತು॑ಶ್ಚತ್ವಾರಿಗ್ಂಶದಖ್ಷರಾ ತ್ರಿ॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟು-ಪ್ತ್ರಿ॒ಷ್ಟುಭೈ॒ವಾಸ್ಮಾ॑ ಇನ್ದ್ರಿ॒ಯಮವ॑ ರುನ್ಧೇ॒ ಽಷ್ಟಾಚ॑ತ್ವಾರಿಗ್ಂ ಶತ॒ಮನು॑ ಬ್ರೂಯಾ-ತ್ಪ॒ಶುಕಾ॑ಮಸ್ಯಾ॒ಷ್ಟಾಚ॑ತ್ವಾರಿಗ್ಂಶದಖ್ಷರಾ॒ ಜಗ॑ತೀ॒ ಜಾಗ॑ತಾಃ ಪ॒ಶವೋ॒ಜಗ॑ತ್ಯೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ॒ ಸರ್ವಾ॑ಣಿ॒ ಛನ್ದಾ॒ಗ್॒ ಸ್ಯನು॑ ಬ್ರೂಯಾ-ದ್ಬಹುಯಾ॒ಜಿನ॒-ಸ್ಸರ್ವಾ॑ಣಿ॒ ವಾ ಏ॒ತಸ್ಯ॒ ಛನ್ದಾ॒ಗ್॒ಸ್ಯ ವ॑ರುದ್ಧಾನಿ॒ ಯೋ ಬ॑ಹುಯಾ॒ಜ್ಯಪ॑ರಿಮಿತ॒ಮನು॑ ಬ್ರೂಯಾ॒ದಪ॑ರಿಮಿತ॒ಸ್ಯಾ ವ॑ರುಧ್ಯೈ ॥ 60 ॥
(ಕಾ॒ಮಯೇ॑ತ॒ – ಪ್ರತಿ॑ಷ್ಠಿತ್ಯೈ – ಪ॒ಶೂನ್ಥ್ – ಸ॒ಪ್ತಚ॑ತ್ವಾರಿಗ್ಂಶಚ್ಚ) (ಅ. 10)
ನಿವೀ॑ತ-ಮ್ಮನು॒ಷ್ಯಾ॑ಣಾ-ಮ್ಪ್ರಾಚೀನಾವೀ॒ತ-ಮ್ಪಿ॑ತೃ॒ಣಾಮುಪ॑ವೀತ-ನ್ದೇ॒ವಾನಾ॒ಮುಪ॑ ವ್ಯಯತೇ ದೇವಲ॒ಖ್ಷ್ಮಮೇ॒ವ ತ-ತ್ಕು॑ರುತೇ॒ ತಿಷ್ಠ॒ನ್ನನ್ವಾ॑ಹ॒ ತಿಷ್ಠ॒ನ್ನ್॒. ಹ್ಯಾಶ್ರು॑ತತರಂ॒-ವಁದ॑ತಿ॒ ತಿಷ್ಠ॒ನ್ನನ್ವಾ॑ಹ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿಜಿ॑ತ್ಯಾ॒ ಆಸೀ॑ನೋ ಯಜತ್ಯ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ॒ ಯ-ತ್ಕ್ರೌ॒ಞ್ಚಮ॒ನ್ವಾಹಾ॑-ಽಽಸು॒ರ-ನ್ತ-ದ್ಯನ್ಮ॒ನ್ದ್ರ-ಮ್ಮಾ॑ನು॒ಷ-ನ್ತದ್ಯದ॑ನ್ತ॒ರಾ ತ-ಥ್ಸದೇ॑ವಮನ್ತ॒ರಾ-ಽನೂಚ್ಯಗ್ಂ॑ ಸದೇವ॒ತ್ವಾಯ॑ ವಿ॒ದ್ವಾಗ್ಂಸೋ॒ ವೈ [ ] 61
ಪು॒ರಾ ಹೋತಾ॑ರೋ-ಽಭೂವ॒-ನ್ತಸ್ಮಾ॒-ದ್ವಿಧೃ॑ತಾ॒ ಅದ್ಧ್ವಾ॒ನೋ-ಽಭೂ॑ವ॒-ನ್ನ ಪನ್ಥಾ॑ನ॒-ಸ್ಸಮ॑ರುಖ್ಷನ್ನನ್ತರ್ವೇ॒ದ್ಯ॑ನ್ಯಃ ಪಾದೋ॒ ಭವ॑ತಿ ಬಹಿರ್ವೇ॒ದ್ಯ॑ನ್ಯೋ-ಽಥಾನ್ವಾ॒ಹಾದ್ಧ್ವ॑ನಾಂ॒-ವಿಁಧೃ॑ತ್ಯೈ ಪ॒ಥಾಮಸಗ್ಂ॑ ರೋಹಾ॒ಯಾಥೋ॑ ಭೂ॒ತಞ್ಚೈ॒ವ ಭ॑ವಿ॒ಷ್ಯಚ್ಚಾವ॑ ರು॒ನ್ಧೇ-ಽಥೋ॒ ಪರಿ॑ಮಿತ-ಞ್ಚೈ॒ವಾಪ॑ರಿಮಿತ॒-ಞ್ಚಾವ॑ ರು॒ನ್ಧೇ-ಽಥೋ᳚ ಗ್ರಾ॒ಮ್ಯಾಗ್ಶ್ಚೈ॒ವ ಪ॒ಶೂನಾ॑ರ॒ಣ್ಯಾಗ್ಶ್ಚಾವ॑ ರು॒ನ್ಧೇ-ಽಥೋ॑ [ರು॒ನ್ಧೇ-ಽಥೋ᳚, ದೇ॒ವ॒ಲೋ॒ಕ-ಞ್ಚೈ॒ವ] 62
ದೇವಲೋ॒ಕ-ಞ್ಚೈ॒ವ ಮ॑ನುಷ್ಯ ಲೋ॒ಕ-ಞ್ಚಾ॒ಭಿ ಜ॑ಯತಿ ದೇ॒ವಾ ವೈ ಸಾ॑ಮಿಧೇ॒ನೀರ॒ನೂಚ್ಯ॑ ಯ॒ಜ್ಞ-ನ್ನಾನ್ವ॑ಪಶ್ಯ॒ನ್ಥ್ಸ ಪ್ರ॒ಜಾಪ॑ತಿಸ್ತೂ॒ಷ್ಣೀ-ಮಾ॑ಘಾ॒ರಮಾ ಽಘಾ॑ರಯ॒-ತ್ತತೋ॒ ವೈ ದೇ॒ವಾ ಯ॒ಜ್ಞಮನ್ವ॑ಪಶ್ಯ॒ನ್॒. ಯ-ತ್ತೂ॒ಷ್ಣೀಮಾ॑ಘಾ॒ರ-ಮಾ॑ಘಾ॒ರಯ॑ತಿ ಯ॒ಜ್ಞಸ್ಯಾನು॑ಖ್ಯಾತ್ಯಾ॒ ಅಥೋ॑ ಸಾಮಿಧೇ॒ನೀರೇ॒ವಾಭ್ಯ॑-ನ॒ಕ್ತ್ಯಲೂ᳚ಖ್ಷೋ ಭವತಿ॒ ಯ ಏ॒ವಂ-ವೇಁದಾಥೋ॑ ತ॒ರ್ಪಯ॑ತ್ಯೇ॒ವೈನಾ॒-ಸ್ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿ॒- [ಪ॒ಶುಭಿಃ॑, ಯ ಏ॒ವಂ-ವೇಁದ॒] 63
-ರ್ಯ ಏ॒ವಂ-ವೇಁದ॒ ಯದೇಕ॑ಯಾ ಽಽಘಾ॒ರಯೇ॒ದೇಕಾ᳚-ಮ್ಪ್ರೀಣೀಯಾ॒ದ್ಯ-ದ್ದ್ವಾಭ್ಯಾ॒-ನ್ದ್ವೇ ಪ್ರೀ॑ಣೀಯಾ॒ದ್ಯ-ದ್ತಿ॒ಸೃಭಿ॒ರತಿ॒ ತದ್ರೇ॑ಚಯೇ॒ತ್ಮನ॒ಸಾ ಽಽಘಾ॑ರಯತಿ॒ ಮನ॑ಸಾ॒ ಹ್ಯನಾ᳚ಪ್ತಮಾ॒ಪ್ಯತೇ॑ ತಿ॒ರ್ಯಞ್ಚ॒ಮಾ ಘಾ॑ರಯ॒ತ್ಯಛ॑ಮ್ಬಟ್ಕಾರಂ॒-ವಾಁಕ್ಚ॒ ಮನ॑ಶ್ಚಾ ಽಽರ್ತೀಯೇತಾಮ॒ಹ-ನ್ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹಾ॒ಮೀತಿ॒ ವಾಗ॑ಬ್ರವೀದ॒ಹ-ನ್ದೇ॒ವೇಭ್ಯ॒ ಇತಿ॒ ಮನ॒ಸ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞಮೈ॑ತಾ॒ಗ್ಂ॒ ಸೋ᳚-ಽಬ್ರವೀ- [ಸೋ᳚-ಽಬ್ರವೀತ್, ಪ್ರ॒ಜಾಪ॑ತಿರ್ದೂ॒ತೀರೇ॒ವ] 64
-ತ್ಪ್ರ॒ಜಾಪ॑ತಿರ್ದೂ॒ತೀರೇ॒ವ ತ್ವ-ಮ್ಮನ॑ಸೋ-ಽಸಿ॒ ಯದ್ಧಿ ಮನ॑ಸಾ॒ ಧ್ಯಾಯ॑ತಿ॒ ತದ್ವಾ॒ಚಾ ವದ॒ತೀತಿ॒ ತ-ತ್ಖಲು॒ ತುಭ್ಯ॒-ನ್ನ ವಾ॒ಚಾ ಜು॑ಹವ॒ನ್ನಿತ್ಯ॑ಬ್ರವೀ॒-ತ್ತಸ್ಮಾ॒ನ್ಮನ॑ಸಾ ಪ್ರ॒ಜಾಪ॑ತಯೇ ಜುಹ್ವತಿ॒ಮನ॑ ಇವ॒ ಹಿ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಪರಿ॒ಧೀನ್ಥ್ಸ-ಮ್ಮಾ᳚ರ್ಷ್ಟಿ ಪು॒ನಾತ್ಯೇ॒ವೈನಾ॒ನ್ತ್ರಿರ್ಮ॑ದ್ಧ್ಯ॒ಮ-ನ್ತ್ರಯೋ॒ ವೈ ಪ್ರಾ॒ಣಾಃ ಪ್ರಾ॒ಣಾನೇ॒ವಾಭಿ ಜ॑ಯತಿ॒ ತ್ರಿರ್ದ॑ಖ್ಷಿಣಾ॒ರ್ಧ್ಯಂ॑ ತ್ರಯ॑ [-ತ್ರಯಃ॑, ಇ॒ಮೇ ಲೋ॒ಕಾ] 65
ಇ॒ಮೇ ಲೋ॒ಕಾ ಇ॒ಮಾನೇ॒ವ ಲೋ॒ಕಾನ॒ಭಿ ಜ॑ಯತಿ॒ ತ್ರಿರು॑ತ್ತರಾ॒ರ್ಧ್ಯ॑-ನ್ತ್ರಯೋ॒ ವೈ ದೇ॑ವ॒ಯಾನಾಃ॒ ಪನ್ಥಾ॑ನ॒ಸ್ತಾನೇ॒ವಾಭಿ ಜ॑ಯತಿ॒ ತ್ರಿರುಪ॑ ವಾಜಯತಿ॒ ತ್ರಯೋ॒ ವೈ ದೇ॑ವಲೋ॒ಕಾ ದೇ॑ವಲೋ॒ಕಾನೇ॒ವಾಭಿ ಜ॑ಯತಿ॒ ದ್ವಾದ॑ಶ॒ ಸ-ಮ್ಪ॑ದ್ಯನ್ತೇ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯಾ ಆಘಾ॒ರಮಾ ಘಾ॑ರಯತಿ ತಿ॒ರ ಇ॑ವ॒ [ತಿ॒ರ ಇ॑ವ, ವೈ ಸು॑ವ॒ರ್ಗೋ] 66
ವೈ ಸು॑ವ॒ರ್ಗೋ ಲೋ॒ಕ-ಸ್ಸು॑ವ॒ರ್ಗಮೇ॒ವಾಸ್ಮೈ॑ ಲೋ॒ಕ-ಮ್ಪ್ರರೋ॑ಚಯತ್ಯೃ॒ಜುಮಾ ಘಾ॑ರಯತ್ಯೃ॒ಜುರಿ॑ವ॒ ಹಿ ಪ್ರಾ॒ಣ-ಸ್ಸನ್ತ॑ತ॒ಮಾ ಘಾ॑ರಯತಿ ಪ್ರಾ॒ಣಾನಾ॑ಮ॒ನ್ನಾದ್ಯ॑ಸ್ಯ॒ ಸನ್ತ॑ತ್ಯಾ॒ ಅಥೋ॒ ರಖ್ಷ॑ಸಾ॒ಮಪ॑ಹತ್ಯೈ॒ ಯ-ಙ್ಕಾ॒ಮಯೇ॑ತ ಪ್ರ॒ಮಾಯು॑ಕ-ಸ್ಸ್ಯಾ॒ದಿತಿ॑ ಜಿ॒ಹ್ಮ-ನ್ತಸ್ಯಾ ಽಽಘಾ॑ರಯೇ-ತ್ಪ್ರಾ॒ಣಮೇ॒ವಾಸ್ಮಾ᳚ಜ್ಜಿ॒ಹ್ಮ-ನ್ನ॑ಯತಿ ತಾ॒ಜ-ಕ್ಪ್ರಮೀ॑ಯತೇ॒ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರ ಆ॒ತ್ಮಾ ಧ್ರು॒ವಾ- [ಆ॒ತ್ಮಾ ಧ್ರು॒ವಾ, ಆ॒ಘಾ॒ರಮಾ॒ಘಾರ್ಯ॑] 67
-ಽಽಘಾ॒ರಮಾ॒ಘಾರ್ಯ॑ ಧ್ರು॒ವಾಗ್ಂ ಸಮ॑ನಕ್ತ್ಯಾ॒ತ್ಮನ್ನೇ॒ವ ಯ॒ಜ್ಞಸ್ಯ॒ ಶಿರಃ॒ ಪ್ರತಿ॑ ದಧಾತ್ಯ॒ಗ್ನಿ-ರ್ದೇ॒ವಾನಾ᳚-ನ್ದೂ॒ತ ಆಸೀ॒-ದ್ದೈವ್ಯೋ-ಽಸು॑ರಾಣಾ॒-ನ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞ-ಮೈ॑ತಾ॒ಗ್ಂ॒ ಸ ಪ್ರ॒ಜಾಪ॑ತಿ ರ್ಬ್ರಾಹ್ಮ॒ಣ-ಮ॑ಬ್ರವೀ-ದೇ॒ತದ್ವಿ ಬ್ರೂ॒ಹೀತ್ಯಾ ಶ್ರಾ॑ವ॒ಯೇತೀ॒ದ-ನ್ದೇ॑ವಾ-ಶ್ಶೃಣು॒ತೇತಿ॒ ವಾವ ತದ॑ಬ್ರವೀ-ದ॒ಗ್ನಿ ರ್ದೇ॒ವೋ ಹೋತೇತಿ॒ ಯ ಏ॒ವ ದೇ॒ವಾನಾ॒-ನ್ತಮ॑ವೃಣೀತ॒ ತತೋ॑ ದೇ॒ವಾ [ದೇ॒ವಾಃ, ಅಭ॑ವ॒-ನ್ಪರಾ-ಽಸು॑ರಾ॒] 68
ಅಭ॑ವ॒-ನ್ಪರಾ-ಽಸು॑ರಾ॒ ಯಸ್ಯೈ॒ವಂ-ವಿಁ॒ದುಷಃ॑ ಪ್ರವ॒ರ-ಮ್ಪ್ರ॑ವೃ॒ಣತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ॒ ಯದ್ಬ್ರಾ᳚ಹ್ಮ॒ಣಶ್ಚಾ ಬ್ರಾ᳚ಹ್ಮಣಶ್ಚ ಪ್ರ॒ಶ್ಞ-ಮೇ॒ಯಾತಾ᳚-ಮ್ಬ್ರಾಹ್ಮ॒ಣಾಯಾಧಿ॑ ಬ್ರೂಯಾ॒-ದ್ಯ-ದ್ಬ್ರಾ᳚ಹ್ಮ॒ಣಾಯಾ॒-ಽದ್ಧ್ಯಾಹಾ॒ ಽಽತ್ಮನೇ-ಽದ್ಧ್ಯಾ॑ಹ॒ ಯದ್ಬ್ರಾ᳚ಹ್ಮ॒ಣ-ಮ್ಪ॒ರಾಹಾ॒-ಽಽತ್ಮಾನ॒-ಮ್ಪರಾ॑-ಽಽಹ॒ ತಸ್ಮಾ᳚-ದ್ಬ್ರಾಹ್ಮ॒ಣೋ ನ ಪ॒ರೋಚ್ಯಃ॑ ॥ 69 ॥
(ವಾ – ಆ॑ರ॒ಣ್ಯಾಗ್ಶ್ಚಾವ॑ ರು॒ನ್ಧೇ-ಽಥೋ॑ – ಪ॒ಶುಭಿಃ॒ – ಸೋ᳚-ಽಬ್ರವೀ-ದ್- ದಖ್ಷಿಣಾ॒ರ್ಧ್ಯಂ॑ ತ್ರಯ॑ -ಇವ – ಧ್ರು॒ವಾ – ದೇ॒ವಾ – ಶ್ಚ॑ತ್ವಾರಿ॒ಗ್ಂ॒ಶಚ್ಚ॑ ) (ಅ. 11)
ಆಯು॑ಷ್ಟ ಆಯು॒ರ್ದಾ ಅ॑ಗ್ನ॒ ಆ ಪ್ಯಾ॑ಯಸ್ವ॒ ಸ-ನ್ತೇ ಽವ॑ ತೇ॒ ಹೇಡ॒ ಉದು॑ತ್ತ॒ಮ-ಮ್ಪ್ರಣೋ॑ ದೇ॒ವ್ಯಾ ನೋ॑ ದಿ॒ವೋ ಽಗ್ನಾ॑ ವಿಷ್ಣೂ॒ ಅಗ್ನಾ॑ವಿಷ್ಣೂ ಇ॒ಮ-ಮ್ಮೇ॑ ವರುಣ॒-ತತ್ತ್ವಾ॑ ಯಾ॒ ಮ್ಯು ದು॒ತ್ಯ-ಞ್ಚಿ॒ತ್ರಮ್ ॥ ಅ॒ಪಾ-ನ್ನಪಾ॒ದಾ ಹ್ಯಸ್ಥಾ॑-ದು॒ಪಸ್ಥ॑-ಞ್ಜಿ॒ಹ್ಮಾನಾ॑-ಮೂ॒ರ್ಧ್ವೋ ವಿ॒ದ್ಯುತಂ॒-ವಁಸಾ॑ನಃ । ತಸ್ಯ॒ ಜ್ಯೇಷ್ಠ॑-ಮ್ಮಹಿ॒ಮಾನಂ॒-ವಁಹ॑ನ್ತೀ॒ರ್॒ ಹಿರ॑ಣ್ಯವರ್ಣಾಃ॒ ಪರಿ॑ ಯನ್ತಿ ಯ॒ಹ್ವೀಃ ॥ ಸ- [ಸಮ್, ಅ॒ನ್ಯಾ ಯನ್ತ್ಯುಪ॑] 70
-ಮ॒ನ್ಯಾ ಯನ್ತ್ಯುಪ॑ ಯನ್ತ್ಯ॒ನ್ಯಾ-ಸ್ಸ॑ಮಾ॒ನಮೂ॒ರ್ವ-ನ್ನ॒ದ್ಯಃ॑ ಪೃಣನ್ತಿ । ತಮೂ॒ ಶುಚಿ॒ಗ್ಂ॒ ಶುಚ॑ಯೋ ದೀದಿ॒ವಾಗ್ಂ ಸ॑ಮ॒ಪಾ-ನ್ನಪಾ॑ತ॒-ಮ್ಪರಿ॑ತಸ್ಥು॒ರಾಪಃ॑ । ತಮಸ್ಮೇ॑ರಾ ಯುವ॒ತಯೋ॒ ಯುವಾ॑ನ-ಮ್ಮರ್ಮೃ॒ಜ್ಯಮಾ॑ನಾಃ॒ ಪರಿ॑ ಯ॒ನ್ತ್ಯಾಪಃ॑ ॥ ಸ ಶು॒ಕ್ರೇಣ॒ ಶಿಕ್ವ॑ನಾ ರೇ॒ವದ॒ಗ್ನಿರ್ದೀ॒ದಾಯಾ॑ನಿ॒ದ್ಧ್ಮೋ ಘೃ॒ತನಿ॑ರ್ಣಿಗ॒ಫ್ಸು ॥ ಇನ್ದ್ರಾ॒ವರು॑ಣಯೋರ॒ಹಗ್ಂಸ॒ಮ್ರಾಜೋ॒ರವ॒ ಆ ವೃ॑ಣೇ । ತಾ ನೋ॑ ಮೃಡಾತ ಈ॒ದೃಶೇ᳚ ॥ ಇನ್ದ್ರಾ॑ವರುಣಾ ಯು॒ವಮ॑ದ್ಧ್ವ॒ರಾಯ॑ ನೋ [ಯು॒ವಮ॑ದ್ಧ್ವ॒ರಾಯ॑ ನಃ, ವಿ॒ಶೇ ಜನಾ॑ಯ॒] 71
ವಿ॒ಶೇ ಜನಾ॑ಯ॒ ಮಹಿ॒ ಶರ್ಮ॑ ಯಚ್ಛತಮ್ । ದೀ॒ರ್ಘಪ್ರ॑ಯಜ್ಯು॒ಮತಿ॒ ಯೋ ವ॑ನು॒ಷ್ಯತಿ॑ ವ॒ಯ-ಞ್ಜ॑ಯೇಮ॒ ಪೃತ॑ನಾಸು ದೂ॒ಢ್ಯಃ॑ ॥ ಆ ನೋ॑ಮಿತ್ರಾವರುಣಾ॒, ಪ್ರಬಾ॒ಹವಾ᳚ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥ ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ಗ್ಂ॒ [ನೋ॒ ವರು॑ಣಮ್, ರರಾ॑ಣೋ ವೀ॒ಹಿ] 72
ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ ಪ್ರಪ್ರಾ॒ಯಮ॒ಗ್ನಿರ್ಭ॑ರ॒ತಸ್ಯ॑ ಶೃಣ್ವೇ॒ ವಿ ಯ-ಥ್ಸೂರ್ಯೋ॒ ನ ರೋಚ॑ತೇ ಬೃ॒ಹದ್ಭಾಃ । ಅ॒ಭಿ ಯಃ ಪೂ॒ರು-ಮ್ಪೃತ॑ನಾಸು ತ॒ಸ್ಥೌ ದೀ॒ದಾಯ॒ ದೈವ್ಯೋ॒ ಅತಿ॑ಥಿ-ಶ್ಶಿ॒ವೋ ನಃ॑ ॥ ಪ್ರ ತೇ॑ ಯಖ್ಷಿ॒ ಪ್ರ ತ॑ ಇಯರ್ಮಿ॒ ಮನ್ಮ॒ ಭುವೋ॒ ಯಥಾ॒ ವನ್ದ್ಯೋ॑ ನೋ॒ ಹವೇ॑ಷು । ಧನ್ವ॑ನ್ನಿವ ಪ್ರ॒ಪಾ ಅ॑ಸಿ॒ ತ್ವಮ॑ಗ್ನ ಇಯ॒ಖ್ಷವೇ॑ ಪೂ॒ರವೇ᳚ ಪ್ರತ್ನ ರಾಜನ್ನ್ ॥ 73 ॥
ವಿ ಪಾಜ॑ಸಾ॒ ವಿ ಜ್ಯೋತಿ॑ಷಾ ॥ ಸ ತ್ವಮ॑ಗ್ನೇ॒ ಪ್ರತೀ॑ಕೇನ॒ ಪ್ರತ್ಯೋ॑ಷ ಯಾತುಧಾ॒ನ್ಯಃ॑ । ಉ॒ರು॒ಖ್ಷಯೇ॑ಷು॒ ದೀದ್ಯ॑ತ್ ॥ ತಗ್ಂ ಸು॒ಪ್ರತೀ॑ಕಗ್ಂ ಸು॒ದೃಶ॒ಗ್ಗ್॒ ಸ್ವಞ್ಚ॒-ಮವಿ॑ದ್ವಾಗ್ಂಸೋ ವಿ॒ದುಷ್ಟ॑ರಗ್ಂ ಸಪೇಮ । ಸ ಯ॑ಖ್ಷ॒-ದ್ವಿಶ್ವಾ॑ ವ॒ಯುನಾ॑ನಿ ವಿ॒ದ್ವಾ-ನ್ಪ್ರ ಹ॒ವ್ಯ-ಮ॒ಗ್ನಿ-ರ॒ಮೃತೇ॑ಷು ವೋಚತ್ ॥ ಅ॒ಗ್ಂ॒ಹೋ॒ಮುಚೇ॑ ವಿ॒ವೇಷ॒ ಯನ್ಮಾ॒ ವಿನ॑ ಇ॒ನ್ದ್ರೇ-ನ್ದ್ರ॑ ಖ್ಷ॒ತ್ರಮಿ॑ನ್ದ್ರಿ॒ಯಾಣಿ॑ ಶತಕ್ರ॒ತೋ ಽನು॑ ತೇ ದಾಯಿ ॥ 74 ॥
(ಯ॒ಹ್ವೀ-ಸ್ಸ – ಮ॑ಧ್ವ॒ರಾಯ॑ ನೋ॒ – ವರು॑ಣಗ್ಂ – ರಾಜ॒ಗ್ಗ್॒ -ತು॑ಶ್ಚತ್ವಾರಿಗ್ಂಶಚ್ಚ) (ಅ. 12)
(ವಿ॒ಶ್ವರೂ॑ಪ॒ – ಸ್ತ್ವಷ್ಟೇ – ನ್ದ್ರಂ॑-ವೃಁ॒ತ್ರಂ – ಬ್ರ॑ಹ್ಮವಾ॒ದಿನ॒-ಸ್ಸ ತ್ವೈ – ನಾ-ಽಸೋ॑ಮಯಾಜ್ಯೇ॒ – ಷ ವೈ ದೇ॑ವರ॒ಥೋ – ದೇ॒ವಾ ವೈ ನರ್ಚಿ ನಾ – ಯ॒ಜ್ಞೋ – ಽಗ್ನೇ॑ ಮ॒ಹಾನ್ – ತ್ರೀನ್ – ನಿವೀ॑ತ॒ – ಮಾಯು॑ಷ್ಟೇ॒ – ದ್ವಾದ॑ಶ)
(ವಿ॒ಶ್ವರೂ॑ಪೋ॒ – ನೈನಗ್ಂ॑ ಶೀತರೂ॒ರಾ – ವ॒ದ್ಯ ವಸು॑ – ಪೂರ್ವೇ॒ದ್ಯು – ರ್ವಾಜಾ॒ ಇತ್ಯ – ಗ್ನೇ॑ ಮ॒ಹಾನ್ – ನಿವೀ॑ತ – ಮ॒ನ್ಯಾ ಯನ್ತಿ॒ – ಚತು॑-ಸ್ಸಪ್ತತಿಃ )
(ವಿ॒ಶ್ವರೂಪೋ॒, ಽನು॑ ತೇ ದಾಯಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪಞ್ಚಮಃ ಪ್ರಶ್ನ-ಸ್ಸಮಾಪ್ತಃ ॥