ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಪಞ್ಚಮಃ ಪ್ರಶ್ನಃ – ಇಷ್ಟಿಶೇಷಾಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪೂ॒ರ್ಣಾ ಪ॒ಶ್ಚಾದು॒ತ ಪೂ॒ರ್ಣಾ ಪು॒ರಸ್ತಾ॒ದು-ನ್ಮ॑ದ್ಧ್ಯ॒ತಃ ಪೌ᳚ರ್ಣಮಾ॒ಸೀ ಜಿ॑ಗಾಯ । ತಸ್ಯಾ᳚-ನ್ದೇ॒ವಾ ಅಧಿ॑ ಸಂ॒ವಁಸ॑ನ್ತ ಉತ್ತ॒ಮೇ ನಾಕ॑ ಇ॒ಹ ಮಾ॑ದಯನ್ತಾಮ್ ॥ ಯತ್ತೇ॑ ದೇ॒ವಾ ಅದ॑ಧು ರ್ಭಾಗ॒ಧೇಯ॒ಮಮಾ॑ವಾಸ್ಯೇ ಸಂ॒ವಁಸ॑ನ್ತೋ ಮಹಿ॒ತ್ವಾ । ಸಾನೋ॑ ಯ॒ಜ್ಞ-ಮ್ಪಿ॑ಪೃಹಿ ವಿಶ್ವವಾರೇ ರ॒ಯಿ-ನ್ನೋ॑ ಧೇಹಿ ಸುಭಗೇ ಸು॒ವೀರ᳚ಮ್ ॥ನಿ॒ವೇಶ॑ನೀ ಸ॒ಙ್ಗಮ॑ನೀ॒ ವಸೂ॑ನಾಂ॒-ವಿಁಶ್ವಾ॑ ರೂ॒ಪಾಣಿ॒ ವಸೂ᳚ನ್ಯಾವೇ॒ಶಯ॑ನ್ತೀ । ಸ॒ಹ॒ಸ್ರ॒ಪೋ॒ಷಗ್ಂ ಸು॒ಭಗಾ॒ ರರಾ॑ಣಾ॒ ಸಾ ನ॒ ಆಗ॒ನ್. ವರ್ಚ॑ಸಾ [ಆಗ॒ನ್. ವರ್ಚ॑ಸಾ, ಸಂ॒ವಿಁ॒ದಾ॒ನಾ ।] 1
ಸಂವಿಁದಾ॒ನಾ ॥ ಅಗ್ನೀ॑ಷೋಮೌ ಪ್ರಥ॒ಮೌ ವೀ॒ರ್ಯೇ॑ಣ॒ ವಸೂ᳚-ನ್ರು॒ದ್ರಾನಾ॑ದಿ॒ತ್ಯಾನಿ॒ಹ ಜಿ॑ನ್ವತಮ್ । ಮಾ॒ದ್ಧ್ಯಗ್ಂ ಹಿ ಪೌ᳚ರ್ಣಮಾ॒ಸ-ಞ್ಜು॒ಷೇಥಾ॒-ಮ್ಬ್ರಹ್ಮ॑ಣಾ ವೃ॒ದ್ಧೌ ಸು॑ಕೃ॒ತೇನ॑ ಸಾ॒ತಾವಥಾ॒-ಽಸ್ಮಭ್ಯಗ್ಂ॑ ಸ॒ಹವೀ॑ರಾಗ್ಂ ರ॒ಯಿ-ನ್ನಿ ಯ॑ಚ್ಛತಮ್ ॥ ಆ॒ದಿ॒ತ್ಯಾಶ್ಚಾ-ಽಙ್ಗಿ॑ರಸಶ್ಚಾ॒ಗ್ನೀನಾ-ಽದ॑ಧತ॒ ತೇ ದ॑ರ್ಶಪೂರ್ಣಮಾ॒ಸೌ ಪ್ರೈಫ್ಸ॒-ನ್ತೇಷಾ॒ಮಙ್ಗಿ॑ರಸಾ॒-ನ್ನಿರು॑ಪ್ತಗ್ಂ ಹ॒ವಿರಾಸೀ॒ದಥಾ॑-ಽಽದಿ॒ತ್ಯಾ ಏ॒ತೌ ಹೋಮಾ॑ವಪಶ್ಯ॒-ನ್ತಾವ॑ಜುಹವು॒ಸ್ತತೋ॒ ವೈ ತೇ ದ॑ರ್ಶಪೂರ್ಣಮಾ॒ಸೌ [ ] 2
ಪೂರ್ವ॒ ಆ ಽಲ॑ಭನ್ತ ದರ್ಶಪೂರ್ಣಮಾ॒ಸಾ-ವಾ॒ಲಭ॑ಮಾನ ಏ॒ತೌ ಹೋಮೌ॑ ಪು॒ರಸ್ತಾ᳚ಜ್ಜುಹುಯಾ-ಥ್ಸಾ॒ಖ್ಷಾದೇ॒ವ ದ॑ರ್ಶಪೂರ್ಣಮಾ॒ಸಾವಾ ಲ॑ಭತೇ ಬ್ರಹ್ಮವಾ॒ದಿನೋ॑ ವದನ್ತಿ॒ ಸ ತ್ವೈ ದ॑ರ್ಶಪೂರ್ಣಮಾ॒ಸಾವಾ ಲ॑ಭೇತ॒ ಯ ಏ॑ನಯೋರನು-ಲೋ॒ಮಞ್ಚ॑ ಪ್ರತಿಲೋ॒ಮಞ್ಚ॑ ವಿ॒ದ್ಯಾದಿತ್ಯ॑ಮಾವಾ॒ಸ್ಯಾ॑ಯಾ ಊ॒ರ್ಧ್ವ-ನ್ತದ॑ನುಲೋ॒ಮ-ಮ್ಪೌ᳚ರ್ಣಮಾ॒ಸ್ಯೈ ಪ್ರ॑ತೀ॒ಚೀನ॒-ನ್ತ-ತ್ಪ್ರ॑ತಿಲೋ॒ಮಂ-ಯಁ-ತ್ಪೌ᳚ರ್ಣಮಾ॒ಸೀ-ಮ್ಪೂರ್ವಾ॑ಮಾ॒ಲಭೇ॑ತ ಪ್ರತಿಲೋ॒ಮಮೇ॑ನಾ॒ವಾ ಲ॑ಭೇತಾ॒-ಮುಮ॑ಪ॒ಖ್ಷೀಯ॑ಮಾಣ॒-ಮನ್ವಪ॑- [-ಮನ್ವಪ॑, ಖ್ಷೀ॒ಯೇ॒ತ॒ ಸಾ॒ರ॒ಸ್ವ॒ತೌ ಹೋಮೌ॑] 3
-ಖ್ಷೀಯೇತ ಸಾರಸ್ವ॒ತೌ ಹೋಮೌ॑ ಪು॒ರಸ್ತಾ᳚ಜ್ಜುಹುಯಾದಮಾವಾ॒ಸ್ಯಾ॑ ವೈ ಸರ॑ಸ್ವತ್ಯನುಲೋ॒ಮ-ಮೇ॒ವೈನಾ॒ವಾ ಲ॑ಭತೇ॒ ಽಮುಮಾ॒ಪ್ಯಾಯ॑ಮಾನ॒ಮನ್ವಾ ಪ್ಯಾ॑ಯತ ಆಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ-ಮ್ಪು॒ರಸ್ತಾ॒ನ್ನಿವ॑ರ್ಪೇ॒-ಥ್ಸರ॑ಸ್ವತ್ಯೈ ಚ॒ರುಗ್ಂ ಸರ॑ಸ್ವತೇ॒ ದ್ವಾದ॑ಶಕಪಾಲಂ॒-ಯಁದಾ᳚ಗ್ನೇ॒ಯೋ ಭವ॑ತ್ಯ॒ಗ್ನಿರ್ವೈ ಯ॑ಜ್ಞಮು॒ಖಂ-ಯಁ॑ಜ್ಞಮು॒ಖಮೇ॒ವರ್ಧಿ॑-ಮ್ಪು॒ರಸ್ತಾ᳚-ದ್ಧತ್ತೇ॒ ಯ-ದ್ವೈ᳚ಷ್ಣ॒ವೋ ಭವ॑ತಿ ಯ॒ಜ್ಞೋ ವೈ ವಿಷ್ಣು॑ರ್ಯ॒ಜ್ಞಮೇ॒ವಾ-ಽಽರಭ್ಯ॒ ಪ್ರತ॑ನುತೇ॒ ಸರ॑ಸ್ವತ್ಯೈ ಚ॒ರುರ್ಭ॑ವತಿ॒ ಸರ॑ಸ್ವತೇ॒ ದ್ವಾದ॑ಶಕಪಾಲೋ-ಽಮಾವಾ॒ಸ್ಯಾ॑ ವೈ ಸರ॑ಸ್ವತೀ ಪೂ॒ರ್ಣಮಾ॑ಸ॒-ಸ್ಸರ॑ಸ್ವಾ॒-ನ್ತಾವೇ॒ವ ಸಾ॒ಖ್ಷಾದಾ ರ॑ಭತ ಋ॒ದ್ಧ್ನೋತ್ಯಾ᳚ಭ್ಯಾ॒-ನ್ದ್ವಾದ॑ಶಕಪಾಲ॒-ಸ್ಸರ॑ಸ್ವತೇ ಭವತಿ ಮಿಥುನ॒ತ್ವಾಯ॒ ಪ್ರಜಾ᳚ತ್ಯೈ ಮಿಥು॒ನೌ ಗಾವೌ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ ॥ 4 ॥
(ವರ್ಚ॑ಸಾ॒ – ವೈ ತೇ ದ॑ರ್ಶಪೂರ್ಣಮಾ॒ಸಾ – ವಪ॑ – ತನುತೇ॒ ಸರ॑ಸ್ವತ್ಯೈ॒ – ಪಞ್ಚ॑ವಿಗ್ಂಶತಿಶ್ಚ) (ಅ. 1)
ಋಷ॑ಯೋ॒ ವಾ ಇನ್ದ್ರ॑-ಮ್ಪ್ರ॒ತ್ಯಖ್ಷ॒-ನ್ನಾಪ॑ಶ್ಯ॒-ನ್ತಂ-ವಁಸಿ॑ಷ್ಠಃ ಪ್ರ॒ತ್ಯಖ್ಷ॑ಮಪಶ್ಯ॒-ಥ್ಸೋ᳚-ಽಬ್ರವೀ॒-ದ್ಬ್ರಾಹ್ಮ॑ಣ-ನ್ತೇ ವಖ್ಷ್ಯಾಮಿ॒ ಯಥಾ॒ ತ್ವತ್ಪು॑ರೋಹಿತಾಃ ಪ್ರ॒ಜಾಃ ಪ್ರ॑ಜನಿ॒ಷ್ಯನ್ತೇ-ಽಥ॒ ಮೇತ॑ರೇಭ್ಯ॒ ಋಷಿ॑ಭ್ಯೋ॒ ಮಾ ಪ್ರವೋ॑ಚ॒ ಇತಿ॒ ತಸ್ಮಾ॑ ಏ॒ತಾನ್ಥ್ಸ್ತೋಮ॑-ಭಾಗಾನಬ್ರವೀ॒-ತ್ತತೋ॒ ವಸಿ॑ಷ್ಠಪುರೋಹಿತಾಃ ಪ್ರ॒ಜಾಃ ಪ್ರಾಜಾ॑ಯನ್ತ॒ ತಸ್ಮಾ᳚-ದ್ವಾಸಿ॒ಷ್ಠೋ ಬ್ರ॒ಹ್ಮಾ ಕಾ॒ರ್ಯಃ॑ ಪ್ರೈವ ಜಾ॑ಯತೇ ರ॒ಶ್ಮಿರ॑ಸಿ॒ ಖ್ಷಯಾ॑ಯ ತ್ವಾ॒ ಖ್ಷಯ॑-ಞ್ಜಿ॒ನ್ವೇ- [ಖ್ಷಯ॑-ಞ್ಜಿ॒ನ್ವೇತಿ॑, ಆ॒ಹ॒ ದೇ॒ವಾ ವೈ] 5
-ತ್ಯಾ॑ಹ ದೇ॒ವಾ ವೈ ಖ್ಷಯೋ॑ ದೇ॒ವೇಭ್ಯ॑ ಏ॒ವ ಯ॒ಜ್ಞ-ಮ್ಪ್ರಾ-ಽಽಹ॒ ಪ್ರೇತಿ॑ರಸಿ॒ ಧರ್ಮಾ॑ಯ ತ್ವಾ॒ ಧರ್ಮ॑-ಞ್ಜಿ॒ನ್ವೇತ್ಯಾ॑ಹ ಮನು॒ಷ್ಯಾ॑ ವೈ ಧರ್ಮೋ॑ ಮನು॒ಷ್ಯೇ᳚ಭ್ಯ ಏ॒ವ ಯ॒ಜ್ಞ-ಮ್ಪ್ರಾ-ಽಽಹಾನ್ವಿ॑ತಿರಸಿ ದಿ॒ವೇ ತ್ವಾ॒ ದಿವ॑-ಞ್ಜಿ॒ನ್ವೇತ್ಯಾ॑ಹೈ॒ಭ್ಯ ಏ॒ವ ಲೋ॒ಕೇಭ್ಯೋ॑ ಯ॒ಜ್ಞ-ಮ್ಪ್ರಾ-ಽಽಹ॑ವಿಷ್ಟ॒ಮ್ಭೋ॑-ಽಸಿ॒ ವೃಷ್ಟ್ಯೈ᳚ ತ್ವಾ॒ ವೃಷ್ಟಿ॑-ಞ್ಜಿ॒ನ್ವೇತ್ಯಾ॑ಹ॒ ವೃಷ್ಟಿ॑ಮೇ॒ವಾ-ಽವ॑- [ವೃಷ್ಟಿ॑ಮೇ॒ವಾ-ಽವ॑, ರು॒ನ್ಧೇ॒ ಪ್ರ॒ವಾ-] 6
-ರುನ್ಧೇ ಪ್ರ॒ವಾ-ಽಸ್ಯ॑ನು॒ವಾ-ಽಸೀತ್ಯಾ॑ಹ ಮಿಥುನ॒ತ್ವಾಯೋ॒ಶಿಗ॑ಸಿ॒ ವಸು॑ಭ್ಯಸ್ತ್ವಾ॒ ವಸೂ᳚ಞ್ಜಿ॒ನ್ವೇತ್ಯಾ॑ಹಾ॒ಷ್ಟೌ ವಸ॑ವ॒ ಏಕಾ॑ದಶ ರು॒ದ್ರಾ ದ್ವಾದ॑ಶಾ-ಽಽದಿ॒ತ್ಯಾ ಏ॒ತಾವ॑ನ್ತೋ॒ ವೈ ದೇ॒ವಾಸ್ತೇಭ್ಯ॑ ಏ॒ವ ಯ॒ಜ್ಞ-ಮ್ಪ್ರಾ-ಽಽಹೌಜೋ॑-ಽಸಿ ಪಿ॒ತೃಭ್ಯ॑ಸ್ತ್ವಾ ಪಿ॒ತೄನ್ ಜಿ॒ನ್ವೇತ್ಯಾ॑ಹ ದೇ॒ವಾನೇ॒ವ ಪಿ॒ತೄನನು॒ ಸನ್ತ॑ನೋತಿ॒ ತನ್ತು॑ರಸಿ ಪ್ರ॒ಜಾಭ್ಯ॑ಸ್ತ್ವಾ ಪ್ರ॒ಜಾ ಜಿ॒ನ್ವೇ- [ಪ್ರ॒ಜಾ ಜಿ॑ನ್ವ, ಇತ್ಯಾ॑ಹ ಪಿ॒ತೄನೇ॒ವ] 7
-ತ್ಯಾ॑ಹ ಪಿ॒ತೄನೇ॒ವ ಪ್ರ॒ಜಾ ಅನು॒ ಸನ್ತ॑ನೋತಿ ಪೃತನಾ॒ಷಾಡ॑ಸಿ ಪ॒ಶುಭ್ಯ॑ಸ್ತ್ವಾ ಪ॒ಶೂಞ್ಜಿ॒ನ್ವೇತ್ಯಾ॑ಹ ಪ್ರ॒ಜಾ ಏ॒ವ ಪ॒ಶೂನನು॒ ಸನ್ತ॑ನೋತಿರೇ॒ವದ॒ಸ್ಯೋ-ಷ॑ಧೀಭ್ಯ॒ ಸ್ತ್ವೌಷ॑ಧೀ-ರ್ಜಿ॒ನ್ವೇತ್ಯಾ॒ಹೌಷ॑ಧೀಷ್ವೇ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯತ್ಯಭಿ॒ಜಿದ॑ಸಿ ಯು॒ಕ್ತಗ್ರಾ॒ವೇನ್ದ್ರಾ॑ಯ॒ ತ್ವೇನ್ದ್ರ॑-ಞ್ಜಿ॒ನ್ವೇತ್ಯಾ॑ಹಾ॒ಭಿಜಿ॑ತ್ಯಾ॒ ಅಧಿ॑ಪತಿರಸಿ ಪ್ರಾ॒ಣಾಯ॑ ತ್ವಾ ಪ್ರಾ॒ಣ- [ಪ್ರಾ॒ಣಮ್, ಜಿ॒ನ್ವೇತ್ಯಾ॑ಹ] 8
-ಞ್ಜಿ॒ನ್ವೇತ್ಯಾ॑ಹ ಪ್ರ॒ಜಾಸ್ವೇ॒ವ ಪ್ರಾ॒ಣಾ-ನ್ದ॑ಧಾತಿ ತ್ರಿ॒ವೃದ॑ಸಿ ಪ್ರ॒ವೃದ॒ಸೀತ್ಯಾ॑ಹ ಮಿಥುನ॒ತ್ವಾಯ॑ ಸಗ್ಂರೋ॒ಹೋ॑-ಽಸಿ ನೀರೋ॒ಹೋ॑-ಽಸೀತ್ಯಾ॑ಹ॒ ಪ್ರಜಾ᳚ತ್ಯೈ ವಸು॒ಕೋ॑-ಽಸಿ॒ ವೇಷ॑ಶ್ರಿರಸಿ॒ ವಸ್ಯ॑ಷ್ಟಿರ॒ಸೀತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ॥ 9 ॥
(ಜಿ॒ನ್ವೇತ್ಯ – ವ॑ – ಪ್ರ॒ಜಾ ಜಿ॑ನ್ವ – ಪ್ರಾ॒ಣನ್ – ತ್ರಿ॒ಗ್ಂ॒ಶಚ್ಚ॑) (ಅ. 2)
ಅ॒ಗ್ನಿನಾ॑ ದೇ॒ವೇನ॒ ಪೃತ॑ನಾ ಜಯಾಮಿ ಗಾಯ॒ತ್ರೇಣ॒ ಛನ್ದ॑ಸಾ ತ್ರಿ॒ವೃತಾ॒ ಸ್ತೋಮೇ॑ನ ರಥನ್ತ॒ರೇಣ॒ ಸಾಮ್ನಾ॑ ವಷಟ್ಕಾ॒ರೇಣ॒ ವಜ್ರೇ॑ಣ ಪೂರ್ವ॒ಜಾ-ನ್ಭ್ರಾತೃ॑ವ್ಯಾ॒ನಧ॑ರಾ-ನ್ಪಾದಯಾ॒ಮ್ಯವೈ॑ನಾ-ನ್ಬಾಧೇ॒ ಪ್ರತ್ಯೇ॑ನಾನ್ನುದೇ॒-ಽಸ್ಮಿನ್ ಖ್ಷಯೇ॒-ಽಸ್ಮಿ-ನ್ಭೂ॑ಮಿಲೋ॒ಕೇ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೇ॒ಣಾ-ಽತ್ಯೇ॑ನಾನ್ ಕ್ರಾಮಾ॒ಮೀನ್ದ್ರೇ॑ಣ ದೇ॒ವೇನ॒ ಪೃತ॑ನಾ ಜಯಾಮಿ॒ ತ್ರೈಷ್ಟು॑ಭೇನ॒ ಛನ್ದ॑ಸಾ ಪಞ್ಚದ॒ಶೇನ॒ ಸ್ತೋಮೇ॑ನ ಬೃಹ॒ತಾ ಸಾಮ್ನಾ॑ ವಷಟ್ಕಾ॒ರೇಣ॒ ವಜ್ರೇ॑ಣ [ವಜ್ರೇ॑ಣ, ಸ॒ಹ॒ಜಾನ್. ವಿಶ್ವೇ॑ಭಿರ್ದೇ॒ವೇಭಿಃ॒ ಪೃತ॑ನಾ] 10
ಸಹ॒ಜಾನ್. ವಿಶ್ವೇ॑ಭಿರ್ದೇ॒ವೇಭಿಃ॒ ಪೃತ॑ನಾ ಜಯಾಮಿ॒ ಜಾಗ॑ತೇನ॒ ಛನ್ದ॑ಸಾ ಸಪ್ತದ॒ಶೇನ॒ ಸ್ತೋಮೇ॑ನ ವಾಮದೇ॒ವ್ಯೇನ॒ ಸಾಮ್ನಾ॑ ವಷಟ್ಕಾ॒ರೇಣ॒ ವಜ್ರೇ॑ಣಾ ಪರ॒ಜಾನಿನ್ದ್ರೇ॑ಣ ಸ॒ಯುಜೋ॑ ವ॒ಯಗ್ಂ ಸಾ॑ಸ॒ಹ್ಯಾಮ॑ ಪೃತನ್ಯ॒ತಃ । ಘ್ನನ್ತೋ॑ ವೃ॒ತ್ರಾಣ್ಯ॑ಪ್ರ॒ತಿ । ಯತ್ತೇ॑ ಅಗ್ನೇ॒ ತೇಜ॒ಸ್ತೇನಾ॒ಹ-ನ್ತೇ॑ಜ॒ಸ್ವೀ ಭೂ॑ಯಾಸಂ॒-ಯಁತ್ತೇ॑ ಅಗ್ನೇ॒ ವರ್ಚ॒ಸ್ತೇನಾ॒ಹಂ-ವಁ॑ರ್ಚ॒ಸ್ವೀ ಭೂ॑ಯಾಸಂ॒-ಯಁತ್ತೇ॑ ಅಗ್ನೇ॒ ಹರ॒ಸ್ತೇನಾ॒ಹಗ್ಂ ಹ॑ರ॒ಸ್ವೀ ಭೂ॑ಯಾಸಮ್ ॥ 11 ॥
(ಬೃ॒ಹ॒ತಾ ಸಾಮ್ನಾ॑ ವಷಟ್ಕಾ॒ರೇಣ॒ ವಜ್ರೇ॑ಣ॒ – ಷಟ್ಚ॑ತ್ವಾರಿಗ್ಂಶಚ್ಚ) (ಅ. 3)
ಯೇ ದೇ॒ವಾ ಯ॑ಜ್ಞ॒ಹನೋ॑ ಯಜ್ಞ॒ಮುಷಃ॑ ಪೃಥಿ॒ವ್ಯಾಮದ್ಧ್ಯಾಸ॑ತೇ । ಅ॒ಗ್ನಿರ್ಮಾ॒ ತೇಭ್ಯೋ॑ ರಖ್ಷತು॒ ಗಚ್ಛೇ॑ಮ ಸು॒ಕೃತೋ॑ ವ॒ಯಮ್ ॥ ಆ-ಽಗ॑ನ್ಮ ಮಿತ್ರಾವರುಣಾ ವರೇಣ್ಯಾ॒ ರಾತ್ರೀ॑ಣಾ-ಮ್ಭಾ॒ಗೋ ಯು॒ವಯೋ॒ರ್ಯೋ ಅಸ್ತಿ॑ । ನಾಕ॑-ಙ್ಗೃಹ್ಣಾ॒ನಾ-ಸ್ಸು॑ಕೃ॒ತಸ್ಯ॑ ಲೋ॒ಕೇ ತೃ॒ತೀಯೇ॑ ಪೃ॒ಷ್ಠೇ ಅಧಿ॑ ರೋಚ॒ನೇ ದಿ॒ವಃ ॥ ಯೇ ದೇ॒ವಾ ಯ॑ಜ್ಞ॒ಹನೋ॑ ಯಜ್ಞ॒ಮುಷೋ॒-ಽನ್ತರಿ॒ಖ್ಷೇ-ಽದ್ಧ್ಯಾಸ॑ತೇ । ವಾ॒ಯುರ್ಮಾ॒ ತೇಭ್ಯೋ॑ ರಖ್ಷತು॒ ಗಚ್ಛೇ॑ಮ ಸು॒ಕೃತೋ॑ ವ॒ಯಮ್ ॥ ಯಾಸ್ತೇ॒ ರಾತ್ರೀ᳚-ಸ್ಸವಿತ- [ರಾತ್ರೀ᳚-ಸ್ಸವಿತಃ, ದೇ॒ವ॒ಯಾನೀ॑ರನ್ತ॒ರಾ] 12
-ರ್ದೇವ॒ಯಾನೀ॑ರನ್ತ॒ರಾ ದ್ಯಾವಾ॑ಪೃಥಿ॒ವೀ ವಿ॒ಯನ್ತಿ॑ । ಗೃ॒ಹೈಶ್ಚ॒ ಸರ್ವೈಃ᳚ ಪ್ರ॒ಜಯಾ॒ ನ್ವಗ್ರೇ॒ ಸುವೋ॒ ರುಹಾ॑ಣಾಸ್ತರತಾ॒ ರಜಾಗ್ಂ॑ಸಿ ॥ ಯೇ ದೇ॒ವಾ ಯ॑ಜ್ಞ॒ಹನೋ॑ ಯಜ್ಞ॒ಮುಷೋ॑ ದಿ॒ವ್ಯದ್ಧ್ಯಾಸ॑ತೇ । ಸೂರ್ಯೋ॑ ಮಾ॒ ತೇಭ್ಯೋ॑ ರಖ್ಷತು॒ ಗಚ್ಛೇ॑ಮ ಸು॒ಕೃತೋ॑ ವ॒ಯಮ್ ॥ ಯೇನೇನ್ದ್ರಾ॑ಯ ಸ॒ಮಭ॑ರಃ॒ ಪಯಾಗ್॑ಸ್ಯುತ್ತ॒ಮೇನ॑ ಹ॒ವಿಷಾ॑ ಜಾತವೇದಃ । ತೇನಾ᳚-ಽಗ್ನೇ॒ ತ್ವಮು॒ತ ವ॑ರ್ಧಯೇ॒ಮಗ್ಂ ಸ॑ಜಾ॒ತಾನಾ॒ಗ್॒ ಶ್ರೈಷ್ಠ್ಯ॒ ಆ ಧೇ᳚ಹ್ಯೇನಮ್ ॥ ಯ॒ಜ್ಞ॒ಹನೋ॒ ವೈ ದೇ॒ವಾ ಯ॑ಜ್ಞ॒ಮುಷ॑- [ದೇ॒ವಾ ಯ॑ಜ್ಞ॒ಮುಷಃ॑, ಸ॒ನ್ತಿ॒ ತ ಏ॒ಷು] 13
-ಸ್ಸನ್ತಿ॒ ತ ಏ॒ಷು ಲೋ॒ಕೇಷ್ವಾ॑ಸತ ಆ॒ದದಾ॑ನಾ ವಿಮಥ್ನಾ॒ನಾ ಯೋ ದದಾ॑ತಿ॒ ಯೋ ಯಜ॑ತೇ॒ ತಸ್ಯ॑ । ಯೇ ದೇ॒ವಾ ಯ॑ಜ್ಞ॒ಹನಃ॑ ಪೃಥಿ॒ವ್ಯಾಮದ್ಧ್ಯಾಸ॑ತೇ॒ ಯೇ ಅ॒ನ್ತರಿ॑ಖ್ಷೇ॒ ಯೇ ದಿ॒ವೀತ್ಯಾ॑ಹೇ॒ಮಾನೇ॒ವ ಲೋ॒ಕಾಗ್ಸ್ತೀ॒ರ್ತ್ವಾ ಸಗೃ॑ಹ॒-ಸ್ಸಪ॑ಶು-ಸ್ಸುವ॒ರ್ಗಂ-ಲೋಁ॒ಕಮೇ॒ತ್ಯಪ॒ ವೈ ಸೋಮೇ॑ನೇಜಾ॒ನಾದ್ದೇ॒ವತಾ᳚ಶ್ಚ ಯ॒ಜ್ಞಶ್ಚ॑ ಕ್ರಾಮನ್ತ್ಯಾಗ್ನೇ॒ಯ-ಮ್ಪಞ್ಚ॑ಕಪಾಲಮುದವಸಾ॒ನೀಯ॒-ನ್ನಿರ್ವ॑ಪೇದ॒ಗ್ನಿ-ಸ್ಸರ್ವಾ॑ ದೇ॒ವತಾಃ॒ [ದೇ॒ವತಾಃ᳚, ಪಾಙ್ಕ್ತೋ॑ ಯ॒ಜ್ಞೋ] 14
ಪಾಙ್ಕ್ತೋ॑ ಯ॒ಜ್ಞೋ ದೇ॒ವತಾ᳚ಶ್ಚೈ॒ವ ಯ॒ಜ್ಞಞ್ಚಾವ॑ ರುನ್ಧೇಗಾಯ॒ತ್ರೋ ವಾ ಅ॒ಗ್ನಿರ್ಗಾ॑ಯ॒ತ್ರ ಛ॑ನ್ದಾ॒ಸ್ತ-ಞ್ಛನ್ದ॑ಸಾ॒ ವ್ಯ॑ರ್ಧಯತಿ॒ ಯ-ತ್ಪಞ್ಚ॑ಕಪಾಲ-ಙ್ಕ॒ರೋತ್ಯ॒ಷ್ಟಾಕ॑ಪಾಲಃ ಕಾ॒ರ್ಯೋ᳚-ಽಷ್ಟಾಖ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರೋ᳚-ಽಗ್ನಿ-ರ್ಗಾ॑ಯ॒ತ್ರ ಛ॑ನ್ದಾ॒-ಸ್ಸ್ವೇನೈ॒ವೈನ॒-ಞ್ಛನ್ದ॑ಸಾ॒ ಸಮ॑ರ್ಧಯತಿ ಪ॒ಙ್ಕ್ತ್ಯೌ॑ ಯಾಜ್ಯಾನುವಾ॒ಕ್ಯೇ॑ ಭವತಃ॒ ಪಾಙ್ಕ್ತೋ॑ ಯ॒ಜ್ಞಸ್ತೇನೈ॒ವ ಯ॒ಜ್ಞಾನ್ನೈತಿ॑ ॥ 15 ॥
(ಸ॒ವಿ॒ತ॒-ರ್ದೇ॒ವಾ ಯ॑ಜ್ಞ॒ಮುಷಃ॒ – ಸರ್ವಾ॑ ದೇ॒ವತಾ॒ – ಸ್ತ್ರಿಚ॑ತ್ವಾರಿಗ್ಂಶಚ್ಚ) (ಅ. 4)
ಸೂರ್ಯೋ॑ ಮಾ ದೇ॒ವೋ ದೇ॒ವೇಭ್ಯಃ॑ ಪಾತು ವಾ॒ಯುರ॒ನ್ತರಿ॑ಖ್ಷಾ॒-ದ್ಯಜ॑ಮಾನೋ॒-ಽಗ್ನಿರ್ಮಾ॑ ಪಾತು॒ ಚಖ್ಷು॑ಷಃ । ಸಖ್ಷ॒ ಶೂಷ॒ ಸವಿ॑ತ॒ರ್ವಿಶ್ವ॑ಚರ್ಷಣ ಏ॒ತೇಭಿ॑-ಸ್ಸೋಮ॒ ನಾಮ॑ಭಿರ್ವಿಧೇಮ ತೇ॒ ತೇಭಿ॑-ಸ್ಸೋಮ॒ ನಾಮ॑ಭಿರ್ವಿಧೇಮ ತೇ ॥ ಅ॒ಹ-ಮ್ಪ॒ರಸ್ತಾ॑ದ॒-ಹಮ॒ವಸ್ತಾ॑ದ॒ಹ-ಞ್ಜ್ಯೋತಿ॑ಷಾ॒ ವಿ ತಮೋ॑ ವವಾರ । ಯದ॒ನ್ತರಿ॑ಖ್ಷ॒-ನ್ತದು॑ ಮೇ ಪಿ॒ತಾ-ಽಭೂ॑ದ॒ಹಗ್ಂ ಸೂರ್ಯ॑ಮುಭ॒ಯತೋ॑ ದದರ್ಶಾ॒ಹ-ಮ್ಭೂ॑ಯಾ ಸಮುತ್ತ॒ಮ-ಸ್ಸ॑ಮಾ॒ನಾನಾ॒- [ಸಮುತ್ತ॒ಮ-ಸ್ಸ॑ಮಾ॒ನಾನಾ᳚ಮ್, ಆ ಸ॑ಮು॒ದ್ರಾ-] 16
-ಮಾ ಸ॑ಮು॒ದ್ರಾ-ದಾ-ಽನ್ತರಿ॑ಖ್ಷಾತ್-ಪ್ರ॒ಜಾಪ॑ತಿರುದ॒ಧಿ-ಞ್ಚ್ಯಾ॑ವಯಾ॒ತೀನ್ದ್ರಃ॒ ಪ್ರಸ್ನೌ॑ತು ಮ॒ರುತೋ॑ ವರ್ಷಯ॒ನ್ತೂನ್ನ॑ಮ್ಭಯ ಪೃಥಿ॒ವೀ-ಮ್ಭಿ॒ನ್ಧೀದ-ನ್ದಿ॒ವ್ಯ-ನ್ನಭಃ॑ । ಉ॒ದ್ರೋ ದಿ॒ವ್ಯಸ್ಯ॑ ನೋ ದೇ॒ಹೀಶಾ॑ನೋ॒ ವಿಸೃ॑ಜಾ॒ ದೃತಿ᳚ಮ್ ॥ ಪ॒ಶವೋ॒ ವಾ ಏ॒ತೇ ಯದಾ॑ದಿ॒ತ್ಯ ಏ॒ಷ ರು॒ದ್ರೋ ಯದ॒ಗ್ನಿರೋಷ॑ಧೀಃ॒ ಪ್ರಾಸ್ಯಾ॒ಗ್ನಾವಾ॑ದಿ॒ತ್ಯ-ಞ್ಜು॑ಹೋತಿ ರು॒ದ್ರಾದೇ॒ವ ಪ॒ಶೂನ॒ನ್ತರ್ದ॑ಧಾ॒ತ್ಯಥೋ॒ ಓಷ॑ಧೀಷ್ವೇ॒ವ ಪ॒ಶೂ- [ಪ॒ಶೂನ್, ಪ್ರತಿ॑ಷ್ಠಾಪಯತಿ] 17
-ನ್ಪ್ರತಿ॑ಷ್ಠಾಪಯತಿ ಕ॒ವಿರ್ಯ॒ಜ್ಞಸ್ಯ॒ ವಿತ॑ನೋತಿ॒ ಪನ್ಥಾ॒-ನ್ನಾಕ॑ಸ್ಯ ಪೃ॒ಷ್ಠೇ ಅಧಿ॑ ರೋಚ॒ನೇ ದಿ॒ವಃ । ಯೇನ॑ ಹ॒ವ್ಯಂ-ವಁಹ॑ಸಿ॒ ಯಾಸಿ॑ ದೂ॒ತ ಇ॒ತಃ ಪ್ರಚೇ॑ತಾ ಅ॒ಮುತ॒-ಸ್ಸನೀ॑ಯಾನ್ ॥ ಯಾಸ್ತೇ॒ ವಿಶ್ವಾ᳚-ಸ್ಸ॒ಮಿಧ॒-ಸ್ಸನ್ತ್ಯ॑ಗ್ನೇ॒ಯಾಃ ಪೃ॑ಥಿ॒ವ್ಯಾ-ಮ್ಬ॒ರ್॒ಹಿಷಿ॒ ಸೂರ್ಯೇ॒ ಯಾಃ । ತಾಸ್ತೇ॑ ಗಚ್ಛ॒ನ್ತ್ವಾಹು॑ತಿ-ಙ್ಘೃ॒ತಸ್ಯ॑ ದೇವಾಯ॒ತೇ ಯಜ॑ಮಾನಾಯ॒ ಶರ್ಮ॑ ॥ ಆ॒ಶಾಸಾ॑ನ-ಸ್ಸು॒ವೀರ್ಯಗ್ಂ॑ ರಾ॒ಯಸ್ಪೋಷ॒ಗ್ಗ್॒ ಸ್ವಶ್ವಿ॑ಯಮ್ । ಬೃಹ॒ಸ್ಪತಿ॑ನಾ ರಾ॒ಯಾ ಸ್ವ॒ಗಾಕೃ॑ತೋ॒ ಮಹ್ಯಂ॒-ಯಁಜ॑ಮಾನಾಯ ತಿಷ್ಠ ॥ 18 ॥
(ಸ॒ಮಾ॒ನಾನಾ॒-ಮೋಷ॑ಧೀಷ್ವೇ॒ವ ಪ॒ಶೂನ್ – ಮಹ್ಯಂ॒-ಯಁಜ॑ಮಾನಾ॒ – ಯೈಕ॑ಞ್ಚ) (ಅ. 5)
ಸ-ನ್ತ್ವಾ॑ ನಹ್ಯಾಮಿ॒ ಪಯ॑ಸಾ ಘೃ॒ತೇನ॒ ಸ-ನ್ತ್ವಾ॑ ನಹ್ಯಾಮ್ಯ॒ಪ ಓಷ॑ಧೀಭಿಃ । ಸ-ನ್ತ್ವಾ॑ ನಹ್ಯಾಮಿ ಪ್ರ॒ಜಯಾ॒-ಽಹಮ॒ದ್ಯ ಸಾ ದೀ᳚ಖ್ಷಿ॒ತಾ ಸ॑ನವೋ॒ ವಾಜ॑ಮ॒ಸ್ಮೇ ॥ ಪ್ರೈತು॒ ಬ್ರಹ್ಮ॑ಣ॒ಸ್ಪತ್ನೀ॒ ವೇದಿಂ॒-ವಁರ್ಣೇ॑ನ ಸೀದತು । ಅಥಾ॒ಹಮ॑ನುಕಾ॒ಮಿನೀ॒ ಸ್ವೇ ಲೋ॒ಕೇ ವಿ॒ಶಾ ಇ॒ಹ ॥ ಸು॒ಪ್ರ॒ಜಸ॑ಸ್ತ್ವಾ ವ॒ಯಗ್ಂ ಸು॒ಪತ್ನೀ॒ರುಪ॑ ಸೇದಿಮ । ಅಗ್ನೇ॑ ಸಪತ್ನ॒ದಮ್ಭ॑ನ॒ಮದ॑ಬ್ಧಾಸೋ॒ ಅದಾ᳚ಭ್ಯಮ್ ॥ ಇ॒ಮಂ-ವಿಁಷ್ಯಾ॑ಮಿ॒ ವರು॑ಣಸ್ಯ॒ ಪಾಶಂ॒- [ಪಾಶ᳚ಮ್, ಯಮಬ॑ದ್ಧ್ನೀತ] 19
-ಯಁಮಬ॑ದ್ಧ್ನೀತ ಸವಿ॒ತಾ ಸು॒ಕೇತಃ॑ । ಧಾ॒ತುಶ್ಚ॒ ಯೋನೌ॑ ಸುಕೃ॒ತಸ್ಯ॑ ಲೋ॒ಕೇ ಸ್ಯೋ॒ನ-ಮ್ಮೇ॑ ಸ॒ಹ ಪತ್ಯಾ॑ ಕರೋಮಿ ॥ ಪ್ರೇಹ್ಯು॒ದೇಹ್ಯೃ॒ತಸ್ಯ॑ ವಾ॒ಮೀರನ್ವ॒ಗ್ನಿಸ್ತೇ-ಽಗ್ರ॑-ನ್ನಯ॒ತ್ವದಿ॑ತಿ॒ರ್ಮದ್ಧ್ಯ॑-ನ್ದದತಾಗ್ಂ ರು॒ದ್ರಾವ॑ಸೃಷ್ಟಾ-ಽಸಿ ಯು॒ವಾ ನಾಮ॒ ಮಾ ಮಾ॑ ಹಿಗ್ಂಸೀ॒ರ್ವಸು॑ಭ್ಯೋ ರು॒ದ್ರೇಭ್ಯ॑ ಆದಿ॒ತ್ಯೇಭ್ಯೋ॒ ವಿಶ್ವೇ᳚ಭ್ಯೋ ವೋ ದೇ॒ವೇಭ್ಯಃ॑ ಪ॒ನ್ನೇಜ॑ನೀರ್ಗೃಹ್ಣಾಮಿ ಯ॒ಜ್ಞಾಯ॑ ವಃ ಪ॒ನ್ನೇಜ॑ನೀ-ಸ್ಸಾದಯಾಮಿ॒ ವಿಶ್ವ॑ಸ್ಯ ತೇ॒ ವಿಶ್ವಾ॑ವತೋ॒ ವೃಷ್ಣಿ॑ಯಾವತ॒- [ವೃಷ್ಣಿ॑ಯಾವತಃ, ತವಾ᳚ಗ್ನೇ ವಾ॒ಮೀರನು॑] 20
-ಸ್ತವಾ᳚ಗ್ನೇ ವಾ॒ಮೀರನು॑ ಸ॒ದೃಂಶಿ॒ ವಿಶ್ವಾ॒ ರೇತಾಗ್ಂ॑ಸಿ ಧಿಷೀ॒ಯಾ-ಽಗ॑-ನ್ದೇ॒ವಾನ್. ಯ॒ಜ್ಞೋ ನಿ ದೇ॒ವೀರ್ದೇ॒ವೇಭ್ಯೋ॑ ಯ॒ಜ್ಞಮ॑ಶಿಷನ್ನ॒ಸ್ಮಿನ್-ಥ್ಸು॑ನ್ವ॒ತಿ ಯಜ॑ಮಾನ ಆ॒ಶಿಷ॒-ಸ್ಸ್ವಾಹಾ॑ಕೃತಾ-ಸ್ಸಮುದ್ರೇ॒ಷ್ಠಾ ಗ॑ನ್ಧ॒ರ್ವಮಾತಿ॑ಷ್ಠ॒ತಾನು॑ । ವಾತ॑ಸ್ಯ॒ ಪತ್ಮ॑ನ್ನಿ॒ಡ ಈ॑ಡಿ॒ತಾಃ ॥ 21 ॥
(ಪಾಶಂ॒ – ವೃಁಷ್ಣಿ॑ಯಾವತ – ಸ್ತ್ರಿ॒ಗ್ಂ॒ಶಚ್ಚ॑) (ಅ. 6)
ವ॒ಷ॒ಟ್ಕಾ॒ರೋ ವೈ ಗಾ॑ಯತ್ರಿ॒ಯೈ ಶಿರೋ᳚-ಽಛಿನ॒-ತ್ತಸ್ಯೈ॒ ರಸಃ॒ ಪರಾ॑-ಽಪತ॒-ಥ್ಸ ಪೃ॑ಥಿ॒ವೀ-ಮ್ಪ್ರಾವಿ॑ಶ॒ಥ್ಸ ಖ॑ದಿ॒ರೋ॑-ಽಭವ॒ದ್ಯಸ್ಯ॑ ಖಾದಿ॒ರ-ಸ್ಸ್ರು॒ವೋ ಭವ॑ತಿ॒ ಛನ್ದ॑ಸಾಮೇ॒ವ ರಸೇ॒ನಾವ॑ ದ್ಯತಿ॒ ಸರ॑ಸಾ ಅ॒ಸ್ಯಾ-ಽಽಹು॑ತಯೋ ಭವನ್ತಿ ತೃ॒ತೀಯ॑ಸ್ಯಾಮಿ॒ತೋ ದಿ॒ವಿ ಸೋಮ॑ ಆಸೀ॒-ತ್ತ-ಙ್ಗಾಯ॒ತ್ರ್ಯಾ-ಽ ಹ॑ರ॒-ತ್ತಸ್ಯ॑ ಪ॒ರ್ಣಮ॑ಚ್ಛಿದ್ಯತ॒ ತ-ತ್ಪ॒ರ್ಣೋ॑-ಽಭವ॒-ತ್ತ-ತ್ಪ॒ರ್ಣಸ್ಯ॑ ಪರ್ಣ॒ತ್ವಂ-ಯಁಸ್ಯ॑ ಪರ್ಣ॒ಮಯೀ॑ ಜು॒ಹೂ- [ಜು॒ಹೂಃ, ಭವ॑ತಿ ಸೌ॒ಮ್ಯಾ] 22
-ರ್ಭವ॑ತಿ ಸೌ॒ಮ್ಯಾ ಅ॒ಸ್ಯಾ-ಽಽಹು॑ತಯೋ ಭವನ್ತಿ ಜು॒ಷನ್ತೇ᳚-ಽಸ್ಯ ದೇ॒ವಾ ಆಹು॑ತೀರ್ದೇ॒ವಾ ವೈ ಬ್ರಹ್ಮ॑ನ್ನವದನ್ತ॒ ತ-ತ್ಪ॒ರ್ಣ ಉಪಾ॑-ಽಶೃಣೋ-ಥ್ಸು॒ಶ್ರವಾ॒ ವೈ ನಾಮ॒ ಯಸ್ಯ॑ ಪರ್ಣ॒ಮಯೀ॑ ಜು॒ಹೂರ್ಭವ॑ತಿ॒ ನ ಪಾ॒ಪಗ್ಗ್ ಶ್ಲೋಕಗ್ಂ॑ ಶೃಣೋತಿ॒ ಬ್ರಹ್ಮ॒ ವೈ ಪ॒ರ್ಣೋ ವಿಣ್ಮ॒ರುತೋ-ಽನ್ನಂ॒-ವಿಁಣ್ಮಾ॑ರು॒ತೋ᳚-ಽಶ್ವ॒ತ್ಥೋ ಯಸ್ಯ॑ ಪರ್ಣ॒ಮಯೀ॑ ಜು॒ಹೂರ್ಭವ॒ತ್ಯಾ-ಶ್ವ॑ತ್-ಥ್ಯುಪ॒ಭೃದ್- ಬ್ರಹ್ಮ॑ಣೈ॒ವಾನ್ನ॒ಮವ॑ ರು॒ನ್ಧೇ-ಽಥೋ॒ ಬ್ರಹ್ಮೈ॒- [ರು॒ನ್ಧೇ-ಽಥೋ॒ ಬ್ರಹ್ಮ॑, ಏ॒ವ ವಿ॒ಶ್ಯದ್ಧ್ಯೂ॑ಹತಿ] 23
-ವ ವಿ॒ಶ್ಯದ್ಧ್ಯೂ॑ಹತಿ ರಾ॒ಷ್ಟ್ರಂ-ವೈಁ ಪ॒ರ್ಣೋ ವಿಡ॑ಶ್ವ॒ತ್ಥೋ ಯ-ತ್ಪ॑ರ್ಣ॒ಮಯೀ॑ ಜು॒ಹೂರ್ಭವ॒ತ್ಯಾ-ಶ್ವ॑ತ್ಥ್ಯುಪ॒ಭೃ-ದ್ರಾ॒ಷ್ಟ್ರಮೇ॒ವ ವಿ॒ಶ್ಯದ್ಧ್ಯೂ॑ಹತಿ ಪ್ರ॒ಜಾಪ॑ತಿ॒ರ್ವಾ ಅ॑ಜುಹೋ॒-ಥ್ಸಾ ಯತ್ರಾ-ಽಽಹು॑ತಿಃ ಪ್ರ॒ತ್ಯತಿ॑ಷ್ಠ॒-ತ್ತತೋ॒ ವಿಕ॑ಙ್ಕತ॒ ಉದ॑ತಿಷ್ಠ॒-ತ್ತತಃ॑ ಪ್ರ॒ಜಾ ಅ॑ಸೃಜತ॒ ಯಸ್ಯ॒ ವೈಕ॑ಙ್ಕತೀ ಧ್ರು॒ವಾ ಭವ॑ತಿ॒ ಪ್ರತ್ಯ॒ವಾಸ್ಯಾ ಽಽಹು॑ತಯಸ್ತಿಷ್ಠ॒ನ್ತ್ಯಥೋ॒ ಪ್ರೈವ ಜಾ॑ಯತ ಏ॒ತದ್ವೈ ಸ್ರು॒ಚಾಗ್ಂ ರೂ॒ಪಂ-ಯಁಸ್ಯೈ॒ವಗ್ಂ ರೂ॑ಪಾ॒-ಸ್ಸ್ರುಚೋ॒ ಭವ॑ನ್ತಿ॒ ಸರ್ವಾ᳚ಣ್ಯೇ॒ವೈನಗ್ಂ॑ ರೂ॒ಪಾಣಿ॑ ಪಶೂ॒ನಾಮುಪ॑ತಿಷ್ಠನ್ತೇ॒ ನಾಸ್ಯಾಪ॑-ರೂಪಮಾ॒ತ್ಮಞ್ಜಾ॑ಯತೇ ॥ 24 ॥
(ಜು॒ಹೂ – ರಥೋ॒ ಬ್ರಹ್ಮ॑ – ಸ್ರು॒ಚಾಗ್ಂ – ಸ॒ಪ್ತದ॑ಶ ಚ) (ಅ. 7)
ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಪ್ರ॒ಜಾಪ॑ತಯೇ ತ್ವಾ॒ ಜ್ಯೋತಿ॑ಷ್ಮತೇ॒ ಜ್ಯೋತಿ॑ಷ್ಮನ್ತ-ಙ್ಗೃಹ್ಣಾಮಿ॒ ದಖ್ಷಾ॑ಯ ದಖ್ಷ॒ವೃಧೇ॑ ರಾ॒ತ-ನ್ದೇ॒ವೇಭ್ಯೋ᳚-ಽಗ್ನಿ ಜಿ॒ಹ್ವೇಭ್ಯ॑ಸ್ತ್ವರ್ತಾ॒ಯುಭ್ಯ॒ ಇನ್ದ್ರ॑ಜ್ಯೇಷ್ಠೇಭ್ಯೋ॒ ವರು॑ಣರಾಜಭ್ಯೋ॒ ವಾತಾ॑ಪಿಭ್ಯಃ ಪ॒ರ್ಜನ್ಯಾ᳚ತ್ಮಭ್ಯೋ ದಿ॒ವೇ ತ್ವಾ॒-ಽನ್ತರಿ॑ಖ್ಷಾಯ ತ್ವಾ ಪೃಥಿ॒ವ್ಯೈ ತ್ವಾ-ಽಪೇ᳚ನ್ದ್ರ ದ್ವಿಷ॒ತೋ ಮನೋ-ಽಪ॒ ಜಿಜ್ಯಾ॑ಸತೋ ಜ॒ಹ್ಯಪ॒ ಯೋ ನೋ॑-ಽರಾತೀ॒ಯತಿ॒ ತ-ಞ್ಜ॑ಹಿ ಪ್ರಾ॒ಣಾಯ॑ ತ್ವಾ-ಽಪಾ॒ನಾಯ॑ ತ್ವಾ ವ್ಯಾ॒ನಾಯ॑ ತ್ವಾ ಸ॒ತೇ ತ್ವಾ-ಽಸ॑ತೇ ತ್ವಾ॒-ಽದ್ಭ್ಯಸ್ತ್ವೌಷ॑ಧೀಭ್ಯೋ॒ ವಿಶ್ವೇ᳚ಭ್ಯಸ್ತ್ವಾ ಭೂ॒ತೇಭ್ಯೋ॒ ಯತಃ॑ ಪ್ರ॒ಜಾ ಅಕ್ಖಿ॑ದ್ರಾ॒ ಅಜಾ॑ಯನ್ತ॒ ತಸ್ಮೈ᳚ ತ್ವಾ ಪ್ರ॒ಜಾಪ॑ತಯೇ ವಿಭೂ॒ದಾವಂನೇ॒ ಜ್ಯೋತಿ॑ಷ್ಮತೇ॒ ಜ್ಯೋತಿ॑ಷ್ಮನ್ತ-ಞ್ಜುಹೋಮಿ ॥ 25 ॥
(ಓಷ॑ಧೀಭ್ಯ॒ – ಶ್ಚತು॑ರ್ದಶ ಚ) (ಅ. 8)
ಯಾಂ-ವಾಁ ಅ॑ದ್ಧ್ವ॒ರ್ಯುಶ್ಚ॒ ಯಜ॑ಮಾನಶ್ಚ ದೇ॒ವತಾ॑ಮನ್ತರಿ॒ತಸ್ತಸ್ಯಾ॒ ಆ ವೃ॑ಶ್ಚ್ಯೇತೇ ಪ್ರಾಜಾಪ॒ತ್ಯ-ನ್ದ॑ಧಿಗ್ರ॒ಹ-ಙ್ಗೃ॑ಹ್ಣೀಯಾ-ತ್ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾ॑ ದೇ॒ವತಾ᳚ಭ್ಯ ಏ॒ವ ನಿಹ್ನು॑ವಾತೇ ಜ್ಯೇ॒ಷ್ಠೋ ವಾ ಏ॒ಷ ಗ್ರಹಾ॑ಣಾಂ॒-ಯಁಸ್ಯೈ॒ಷ ಗೃ॒ಹ್ಯತೇ॒ ಜ್ಯೈಷ್ಠ್ಯ॑ಮೇ॒ವ ಗ॑ಚ್ಛತಿ॒ ಸರ್ವಾ॑ಸಾಂ॒-ವಾಁ ಏ॒ತದ್ದೇ॒ವತಾ॑ನಾಗ್ಂ ರೂ॒ಪಂ-ಯಁದೇ॒ಷ ಗ್ರಹೋ॒ ಯಸ್ಯೈ॒ಷ ಗೃ॒ಹ್ಯತೇ॒ ಸರ್ವಾ᳚ಣ್ಯೇ॒ವೈನಗ್ಂ॑ ರೂ॒ಪಾಣಿ॑ ಪಶೂ॒ನಾಮುಪ॑ತಿಷ್ಠನ್ತ ಉಪಯಾ॒ಮಗೃ॑ಹೀತೋ- [ಉಪಯಾ॒ಮಗೃ॑ಹೀತಃ, ಅ॒ಸಿ॒ ಪ್ರ॒ಜಾಪ॑ತಯೇ] 26
-ಽಸಿ ಪ್ರ॒ಜಾಪ॑ತಯೇ ತ್ವಾ॒ ಜ್ಯೋತಿ॑ಷ್ಮತೇ॒ ಜ್ಯೋತಿ॑ಷ್ಮನ್ತ-ಙ್ಗೃಹ್ಣಾ॒ಮೀತ್ಯಾ॑ಹ॒ ಜ್ಯೋತಿ॑ರೇ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತ್ಯಗ್ನಿ-ಜಿ॒ಹ್ವೇಭ್ಯ॑ಸ್ತ್ವರ್ತಾ॒ಯುಭ್ಯ॒ ಇತ್ಯಾ॑ಹೈ॒ತಾವ॑ತೀ॒ರ್ವೈ ದೇ॒ವತಾ॒ಸ್ತಾಭ್ಯ॑ ಏ॒ವೈನ॒ಗ್ಂ॒ ಸರ್ವಾ᳚ಭ್ಯೋ ಗೃಹ್ಣಾ॒ತ್ಯಪೇ᳚ನ್ದ್ರ ದ್ವಿಷ॒ತೋ ಮನ॒ ಇತ್ಯಾ॑ಹ॒ ಭ್ರಾತೃ॑ವ್ಯಾಪನುತ್ತ್ಯೈ ಪ್ರಾ॒ಣಾಯ॑ ತ್ವಾ-ಽಪಾ॒ನಾಯ॒ ತ್ವೇತ್ಯಾ॑ಹ ಪ್ರಾ॒ಣಾನೇ॒ವ ಯಜ॑ಮಾನೇ ದಧಾತಿ॒ ತಸ್ಮೈ᳚ ತ್ವಾ ಪ್ರ॒ಜಾಪ॑ತಯೇ ವಿಭೂ॒ದಾವಂನೇ॒ ಜ್ಯೋತಿ॑ಷ್ಮತೇ॒ ಜ್ಯೋತಿ॑ಷ್ಮನ್ತ-ಞ್ಜುಹೋ॒ಮೀ- [ಜ್ಯೋತಿ॑ಷ್ಮನ್ತ-ಞ್ಜುಹೋ॒ಮಿ, ಇತ್ಯಾ॑ಹ ಪ್ರ॒ಜಾಪ॑ತಿ-] 27
-ತ್ಯಾ॑ಹ ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾ॒-ಸ್ಸರ್ವಾ᳚ಭ್ಯ ಏ॒ವೈನ॑-ನ್ದೇ॒ವತಾ᳚ಭ್ಯೋ ಜುಹೋತ್ಯಾಜ್ಯಗ್ರ॒ಹ-ಙ್ಗೃ॑ಹ್ಣೀಯಾ॒-ತ್ತೇಜ॑ಸ್ಕಾಮಸ್ಯ॒ ತೇಜೋ॒ ವಾ ಆಜ್ಯ॑-ನ್ತೇಜ॒ಸ್ವ್ಯೇ॑ವ ಭ॑ವತಿ ಸೋಮಗ್ರ॒ಹ-ಙ್ಗೃ॑ಹ್ಣೀಯಾ-ದ್ಬ್ರಹ್ಮವರ್ಚ॒ಸಕಾ॑ಮಸ್ಯ ಬ್ರಹ್ಮವರ್ಚ॒ಸಂ-ವೈಁ ಸೋಮೋ᳚ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ದಧಿಗ್ರ॒ಹ-ಙ್ಗೃ॑ಹ್ಣೀಯಾ-ತ್ಪ॒ಶುಕಾ॑ಮ॒ಸ್ಯೋರ್ಗ್ವೈ ದದ್ಧ್ಯೂರ್-ಕ್ಪ॒ಶವ॑ ಊ॒ರ್ಜೈವಾಸ್ಮಾ॒ ಊರ್ಜ॑-ಮ್ಪ॒ಶೂನವ॑ ರುನ್ಧೇ ॥ 28 ॥
(ಉ॒ಪ॒ಯಾ॒ಮಗೃ॑ಹೀತೋ – ಜುಹೋಮಿ॒ – ತ್ರಿಚ॑ತ್ವಾರಿಗ್ಂಶಚ್ಚ) (ಅ. 9)
ತ್ವೇ ಕ್ರತು॒ಮಪಿ॑ ವೃಞ್ಜನ್ತಿ॒ ವಿಶ್ವೇ॒ ದ್ವಿರ್ಯದೇ॒ತೇ ತ್ರಿ-ರ್ಭವ॒ನ್ತ್ಯೂಮಾಃ᳚ । ಸ್ವಾ॒ದೋ-ಸ್ಸ್ವಾದೀ॑ಯ-ಸ್ಸ್ವಾ॒ದುನಾ॑ ಸೃಜಾ॒ ಸಮತ॑ ಊ॒ ಷು ಮಧು॒ ಮಧು॑ನಾ॒-ಽಭಿ ಯೋ॑ಧಿ । ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಪ್ರ॒ಜಾಪ॑ತಯೇ ತ್ವಾ॒ ಜುಷ್ಟ॑-ಙ್ಗೃಹ್ಣಾಮ್ಯೇ॒ಷ ತೇ॒ ಯೋನಿಃ॑ ಪ್ರ॒ಜಾಪ॑ತಯೇ ತ್ವಾ ॥ ಪ್ರಾ॒ಣ॒ಗ್ರ॒ಹಾ-ನ್ಗೃ॑ಹ್ಣಾತ್ಯೇ॒ತಾವ॒ದ್ವಾ ಅ॑ಸ್ತಿ॒ ಯಾವ॑ದೇ॒ತೇ ಗ್ರಹಾ॒-ಸ್ಸ್ತೋಮಾ॒ಶ್ಛನ್ದಾಗ್ಂ॑ಸಿ ಪೃ॒ಷ್ಠಾನಿ॒ ದಿಶೋ॒ ಯಾವ॑ದೇ॒ವಾಸ್ತಿ॒ ತ- [ಯಾವ॑ದೇ॒ವಾಸ್ತಿ॒ ತತ್, ಅವ॑ ರುನ್ಧೇ] 29
-ದವ॑ ರುನ್ಧೇ ಜ್ಯೇ॒ಷ್ಠಾ ವಾ ಏ॒ತಾ-ನ್ಬ್ರಾ᳚ಹ್ಮ॒ಣಾಃ ಪು॒ರಾ ವಿದಾಮ॑ಕ್ರ॒-ನ್ತಸ್ಮಾ॒-ತ್ತೇಷಾ॒ಗ್ಂ॒ ಸರ್ವಾ॒ ದಿಶೋ॒-ಽಭಿಜಿ॑ತಾ ಅಭೂವ॒ನ್॒. ಯಸ್ಯೈ॒ ತೇ ಗೃ॒ಹ್ಯನ್ತೇ॒ ಜ್ಯೈಷ್ಠ್ಯ॑ಮೇ॒ವ ಗ॑ಚ್ಛತ್ಯ॒ಭಿ ದಿಶೋ॑ ಜಯತಿ॒ ಪಞ್ಚ॑ ಗೃಹ್ಯನ್ತೇ॒ ಪಞ್ಚ॒ ದಿಶ॒-ಸ್ಸರ್ವಾ᳚ಸ್ವೇ॒ವ ದಿ॒ಖ್ಷ್-ವೃ॑ದ್ಧ್ನುವನ್ತಿ॒ ನವ॑ನವ ಗೃಹ್ಯನ್ತೇ॒ ನವ॒ ವೈ ಪುರು॑ಷೇ ಪ್ರಾ॒ಣಾಃ ಪ್ರಾ॒ಣಾನೇ॒ವ ಯಜ॑ಮಾನೇಷು ದಧತಿ ಪ್ರಾಯ॒ಣೀಯೇ॑ ಚೋದಯ॒ನೀಯೇ॑ ಚ ಗೃಹ್ಯನ್ತೇ ಪ್ರಾ॒ಣಾ ವೈ ಪ್ರಾ॑ಣಗ್ರ॒ಹಾಃ [ಪ್ರಾ॒ಣಾ ವೈ ಪ್ರಾ॑ಣಗ್ರ॒ಹಾಃ, ಪ್ರಾ॒ಣೈರೇ॒ವ] 30
ಪ್ರಾ॒ಣೈರೇ॒ವ ಪ್ರ॒ಯನ್ತಿ॑ ಪ್ರಾ॒ಣೈರುದ್ಯ॑ನ್ತಿ ದಶ॒ಮೇ-ಽಹ॑-ನ್ಗೃಹ್ಯನ್ತೇ ಪ್ರಾ॒ಣಾ ವೈ ಪ್ರಾ॑ಣಗ್ರ॒ಹಾಃ ಪ್ರಾ॒ಣೇಭ್ಯಃ॒ ಖಲು॒ ವಾ ಏ॒ತ-ತ್ಪ್ರ॒ಜಾ ಯ॑ನ್ತಿ॒ ಯದ್ವಾ॑ಮದೇ॒ವ್ಯಂ-ಯೋಁನೇ॒ಶ್ಚ್ಯವ॑ತೇ ದಶ॒ಮೇ-ಽಹ॑ನ್. ವಾಮದೇ॒ವ್ಯಂ-ಯೋಁನೇ᳚ಶ್ಚ್ಯವತೇ॒ ಯ-ದ್ದ॑ಶ॒ಮೇ-ಽಹ॑-ನ್ಗೃ॒ಹ್ಯನ್ತೇ᳚ ಪ್ರಾ॒ಣೇಭ್ಯ॑ ಏ॒ವ ತ-ತ್ಪ್ರ॒ಜಾ ನಯ॑ನ್ತಿ । 31
(ತತ್ – ಪ್ರಾ॑ಣಗ್ರ॒ಹಾಃ – ಸ॒ಪ್ತವಿಗ್ಂ॑ಶಚ್ಚ) (ಅ. 10)
ಪ್ರ ದೇ॒ವನ್ದೇ॒ವ್ಯಾ ಧಿ॒ಯಾ ಭರ॑ತಾ ಜಾ॒ತವೇ॑ದಸಮ್ । ಹ॒ವ್ಯಾ ನೋ॑ ವಖ್ಷದಾನು॒ಷಕ್ ॥ ಅ॒ಯಮು॒ ಷ್ಯ ಪ್ರದೇ॑ವ॒ಯುರ್ಹೋತಾ॑ ಯ॒ಜ್ಞಾಯ॑ ನೀಯತೇ । ರಥೋ॒ ನ ಯೋರ॒ಭೀವೃ॑ತೋ॒ ಘೃಣೀ॑ವಾನ್ ಚೇತತಿ॒ ತ್ಮನಾ᳚ ॥ ಅ॒ಯಮ॒ಗ್ನಿರು॑ರುಷ್ಯತ್ಯ॒ಮೃತಾ॑ದಿವ॒ ಜನ್ಮ॑ನಃ । ಸಹ॑ಸಶ್ಚಿ॒-ಥ್ಸಹೀ॑ಯಾ-ನ್ದೇ॒ವೋ ಜೀ॒ವಾತ॑ವೇ ಕೃ॒ತಃ ॥ ಇಡಾ॑ಯಾಸ್ತ್ವಾ ಪ॒ದೇ ವ॒ಯ-ನ್ನಾಭಾ॑ ಪೃಥಿ॒ವ್ಯಾ ಅಧಿ॑ । ಜಾತ॑ವೇದೋ॒ ನಿ ಧೀ॑ಮ॒ಹ್ಯಗ್ನೇ॑ ಹ॒ವ್ಯಾಯ॒ ವೋಢ॑ವೇ । 32
ಅಗ್ನೇ॒ ವಿಶ್ವೇ॑ಭಿ-ಸ್ಸ್ವನೀಕ ದೇ॒ವೈರೂರ್ಣಾ॑ವನ್ತ-ಮ್ಪ್ರಥ॒ಮ-ಸ್ಸೀ॑ದ॒ ಯೋನಿ᳚ಮ್ । ಕು॒ಲಾ॒ಯಿನ॑-ಙ್ಘೃ॒ತವ॑ನ್ತಗ್ಂ ಸವಿ॒ತ್ರೇ ಯ॒ಜ್ಞ-ನ್ನ॑ಯ॒ ಯಜ॑ಮಾನಾಯ ಸಾ॒ಧು ॥ ಸೀದ॑ ಹೋತ॒-ಸ್ಸ್ವ ಉ॑ ಲೋ॒ಕೇ ಚಿ॑ಕಿ॒ತ್ವಾನ್ಥ್ಸಾ॒ದಯಾ॑ ಯ॒ಜ್ಞಗ್ಂ ಸು॑ಕೃ॒ತಸ್ಯ॒ ಯೋನೌ᳚ । ದೇ॒ವಾ॒ವೀರ್ದೇ॒ವಾನ್. ಹ॒ವಿಷಾ॑ ಯಜಾ॒ಸ್ಯಗ್ನೇ॑ ಬೃ॒ಹ-ದ್ಯಜ॑ಮಾನೇ॒ ವಯೋ॑ ಧಾಃ ॥ ನಿ ಹೋತಾ॑ ಹೋತೃ॒ಷದ॑ನೇ॒ ವಿದಾ॑ನಸ್ತ್ವೇ॒ಷೋ ದೀ॑ದಿ॒ವಾಗ್ಂ ಅ॑ಸದ-ಥ್ಸು॒ದಖ್ಷಃ॑ । ಅದ॑ಬ್ಧವ್ರತ-ಪ್ರಮತಿ॒ರ್ವಸಿ॑ಷ್ಠ-ಸ್ಸಹಸ್ರ-ಮ್ಭ॒ರ-ಶ್ಶುಚಿ॑ಜಿಹ್ವೋ ಅ॒ಗ್ನಿಃ ॥ ತ್ವ-ನ್ದೂ॒ತಸ್ತ್ವ- [ತ್ವ-ನ್ದೂ॒ತಸ್ತ್ವಮ್, ಉ॒ ನಃ॒ ಪ॒ರ॒ಸ್ಪಾಸ್ತ್ವಂ-ವಁಸ್ಯ॒ ಆ] 33
-ಮು॑ ನಃ ಪರ॒ಸ್ಪಾಸ್ತ್ವಂ-ವಁಸ್ಯ॒ ಆ ವೃ॑ಷಭ ಪ್ರಣೇ॒ತಾ । ಅಗ್ನೇ॑ ತೋ॒ಕಸ್ಯ॑ ನ॒ಸ್ತನೇ॑ ತ॒ನೂನಾ॒ಮಪ್ರ॑ಯುಚ್ಛ॒-ನ್ದೀದ್ಯ॑ದ್ಬೋಧಿ ಗೋ॒ಪಾಃ ॥ ಅ॒ಭಿ ತ್ವಾ॑ ದೇವ ಸವಿತ॒ರೀಶಾ॑ನಂ॒-ವಾಁರ್ಯಾ॑ಣಾಮ್ । ಸದಾ॑-ಽವ-ನ್ಭಾ॒ಗಮೀ॑ಮಹೇ ॥ ಮ॒ಹೀ ದ್ಯೌಃ ಪೃ॑ಥಿ॒ವೀ ಚ॑ನ ಇ॒ಮಂ-ಯಁ॒ಜ್ಞ-ಮ್ಮಿ॑ಮಿಖ್ಷತಾಮ್ । ಪಿ॒ಪೃ॒ತಾ-ನ್ನೋ॒ ಭರೀ॑ಮಭಿಃ ॥ ತ್ವಾಮ॑ಗ್ನೇ॒ ಪುಷ್ಕ॑ರಾ॒ದದ್ಧ್ಯಥ॑ರ್ವಾ॒ ನಿರ॑ಮನ್ಥತ । ಮೂ॒ರ್ಧ್ನೋ ವಿಶ್ವ॑ಸ್ಯ ವಾ॒ಘತಃ॑ ॥ ತಮು॑- [ತಮು॑, ತ್ವಾ॒ ದ॒ದ್ಧ್ಯಙ್ಙೃಷಿಃ॑] 34
-ತ್ವಾ ದ॒ದ್ಧ್ಯಙ್ಙೃಷಿಃ॑ ಪು॒ತ್ರ ಈ॑ಧೇ॒ ಅಥ॑ರ್ವಣಃ । ವೃ॒ತ್ರ॒ಹಣ॑-ಮ್ಪುರನ್ದ॒ರಮ್ ॥ ತಮು॑ ತ್ವಾ ಪಾ॒ಥ್ಯೋ ವೃಷಾ॒ ಸಮೀ॑ಧೇ ದಸ್ಯು॒ಹನ್ತ॑ಮಮ್ । ಧ॒ನ॒-ಞ್ಜ॒ಯಗ್ಂ ರಣೇ॑ರಣೇ ॥ ಉ॒ತ ಬ್ರು॑ವನ್ತು ಜ॒ನ್ತವ॒ ಉದ॒ಗ್ನಿರ್ವೃ॑ತ್ರ॒ಹಾ-ಽಜ॑ನಿ । ಧ॒ನ॒-ಞ್ಜ॒ಯೋ ರಣೇ॑ರಣೇ ॥ ಆ ಯಗ್ಂ ಹಸ್ತೇ॒ ನ ಖಾ॒ದಿನ॒ಗ್ಂ॒ ಶಿಶು॑-ಞ್ಜಾ॒ತ-ನ್ನ ಬಿಭ್ರ॑ತಿ । ವಿ॒ಶಾಮ॒ಗ್ನಿಗ್ಗ್ ಸ್ವ॑ದ್ಧ್ವ॒ರಮ್ ॥ ಪ್ರದೇ॒ವ-ನ್ದೇ॒ವವೀ॑ತಯೇ॒ ಭರ॑ತಾ ವಸು॒ವಿತ್ತ॑ಮಮ್ । ಆಸ್ವೇ ಯೋನೌ॒ ನಿ ಷೀ॑ದತು ॥ ಆ [ ] 35
ಜಾ॒ತ-ಞ್ಜಾ॒ತವೇ॑ದಸಿ ಪ್ರಿ॒ಯಗ್ಂ ಶಿ॑ಶೀ॒ತಾ-ಽತಿ॑ಥಿಮ್ । ಸ್ಯೋ॒ನ ಆ ಗೃ॒ಹಪ॑ತಿಮ್ ॥ ಅ॒ಗ್ನಿನಾ॒-ಽಗ್ನಿ-ಸ್ಸಮಿ॑ದ್ಧ್ಯತೇ ಕ॒ವಿರ್ಗೃ॒ಹಪ॑ತಿ॒ರ್ಯುವಾ᳚ । ಹ॒ವ್ಯ॒ವಾ-ಡ್ಜು॒ಹ್ವಾ᳚ಸ್ಯಃ ॥ ತ್ವಗ್ಗ್ ಹ್ಯ॑ಗ್ನೇ ಅ॒ಗ್ನಿನಾ॒ ವಿಪ್ರೋ॒ ವಿಪ್ರೇ॑ಣ॒ ಸನ್ಥ್ಸ॒ತಾ । ಸಖಾ॒ ಸಖ್ಯಾ॑ ಸಮಿ॒ದ್ಧ್ಯಸೇ᳚ ॥ ತ-ಮ್ಮ॑ರ್ಜಯನ್ತ ಸು॒ಕ್ರತು॑-ಮ್ಪುರೋ॒ಯಾವಾ॑ನಮಾ॒ಜಿಷು॑ । ಸ್ವೇಷು॒ ಖ್ಷಯೇ॑ಷು ವಾ॒ಜಿನ᳚ಮ್ ॥ ಯ॒ಜ್ಞೇನ॑ ಯ॒ಜ್ಞಮ॑ಯಜನ್ತ ದೇ॒ವಾಸ್ತಾನಿ॒ ಧರ್ಮಾ॑ಣಿ ಪ್ರಥ॒ಮಾನ್ಯಾ॑ಸನ್ನ್ । ತೇ ಹ॒ ನಾಕ॑-ಮ್ಮಹಿ॒ಮಾನ॑-ಸ್ಸಚನ್ತೇ॒ ಯತ್ರ॒ ಪೂರ್ವೇ॑ ಸಾ॒ದ್ಧ್ಯಾ-ಸ್ಸನ್ತಿ॑ ದೇ॒ವಾಃ ॥ 36 ॥
(ವೋಢ॑ವೇ- ದೂ॒ತಸ್ತ್ವಂ – ತಮು॑ – ಸೀದ॒ತ್ವಾ – ಯತ್ರ॑ – ಚ॒ತ್ವಾರಿ॑ ಚ) (ಅ. 11)
(ಪೂ॒ರ್ಣ – ರ್ಷ॑ಯೋ॒ – ಽಗ್ನಿನಾ॒ – ಯೇ ದೇ॒ವಾಃ – ಸೂರ್ಯೋ॑ ಮಾ॒ – ಸನ್ತ್ವಾ॑ ನಹ್ಯಾಮಿ – ವಷಟ್ಕಾ॒ರ-ಸ್ಸ ಖ॑ದಿ॒ರ – ಉ॑ಪಯಾ॒ಮಗೃ॑ಹೀತೋ-ಽಸಿ॒ – ಯಾಂ-ವೈಁ – ತ್ವೇ ಕ್ರತುಂ॒ – ಪ್ರದೇ॒ವ – ಮೇಕಾ॑ದಶ )
(ಪೂ॒ರ್ಣಾ – ಸ॑ಹ॒ಜಾನ್ – ತವಾ᳚-ಽಗ್ನೇ – ಪ್ರಾ॒ಣೈರೇ॒ವ – ಷಟ್ತ್ರಿಗ್ಂ॑ಶತ್)
(ಪೂ॒ರ್ಣಾ, ಸನ್ತಿ॑ ದೇ॒ವಾಃ)
॥ ಹರಿಃ॑ ಓಮ್ ॥
(ಪ್ರ॒ಜಾಪ॑ತಿ॒ – ಯೋ॑ ವಾ – ಅಗ್ನೇ॒ – ವಿ ವೈ – ಪೂ॒ರ್ಣಾ – ಪಞ್ಚ॑) (5)
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಪಞ್ಚಮಃ ಪ್ರಶ್ನ-ಸ್ಸಮಾಪ್ತಃ ॥