ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಞ್ಚತುರ್ಥಕಾಣ್ಡೇ ಷಷ್ಠಃ ಪ್ರಶ್ನಃ – ಪರಿಷೇಚನ-ಸಂಸ್ಕಾರಾಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಅಶ್ಮ॒ನ್ನೂರ್ಜ॒-ಮ್ಪರ್ವ॑ತೇ ಶಿಶ್ರಿಯಾ॒ಣಾಂ-ವಾಁತೇ॑ ಪ॒ರ್ಜನ್ಯೇ॒ ವರು॑ಣಸ್ಯ॒ ಶುಷ್ಮೇ᳚ । ಅ॒ದ್ಭ್ಯ ಓಷ॑ಧೀಭ್ಯೋ॒ ವನ॒ಸ್ಪತಿ॒ಭ್ಯೋ-ಽಧಿ॒ ಸಮ್ಭೃ॑ತಾ॒-ನ್ತಾ-ನ್ನ॒ ಇಷ॒ಮೂರ್ಜ॑-ನ್ಧತ್ತ ಮರುತ-ಸ್ಸಗ್ಂ ರರಾ॒ಣಾಃ ॥ ಅಶ್ಮಗ್ಗ್॑ಸ್ತೇ॒ ಖ್ಷುದ॒ಮು-ನ್ತೇ॒ ಶುಗೃ॑ಚ್ಛತು॒ ಯ-ನ್ದ್ವಿ॒ಷ್ಮಃ ॥ ಸ॒ಮು॒ದ್ರಸ್ಯ॑ ತ್ವಾ॒-ಽವಾಕ॒ಯಾ-ಽಗ್ನೇ॒ ಪರಿ॑ ವ್ಯಯಾಮಸಿ । ಪಾ॒ವ॒ಕೋ ಅ॒ಸ್ಮಭ್ಯಗ್ಂ॑ ಶಿ॒ವೋ ಭ॑ವ ॥ ಹಿ॒ಮಸ್ಯ॑ ತ್ವಾ ಜ॒ರಾಯು॒ಣಾ-ಽಗ್ನೇ॒ ಪರಿ॑ ವ್ಯಯಾಮಸಿ । ಪಾ॒ವ॒ಕೋ ಅ॒ಸ್ಮಭ್ಯಗ್ಂ॑ ಶಿ॒ವೋ ಭ॑ವ ॥ ಉಪ॒- [ಉಪ॑, ಜ್ಮನ್ನುಪ॑] 1
-ಜ್ಮನ್ನುಪ॑ ವೇತ॒ಸೇ-ಽವ॑ತ್ತರ-ನ್ನ॒ದೀಷ್ವಾ । ಅಗ್ನೇ॑ ಪಿ॒ತ್ತಮ॒ಪಾಮ॑ಸಿ ॥ ಮಣ್ಡೂ॑ಕಿ॒ ತಾಭಿ॒ರಾ ಗ॑ಹಿ॒ ಸೇಮ-ನ್ನೋ॑ ಯ॒ಜ್ಞಮ್ । ಪಾ॒ವ॒ಕವ॑ರ್ಣಗ್ಂ ಶಿ॒ವ-ಙ್ಕೃ॑ಧಿ ॥ ಪಾ॒ವ॒ಕ ಆ ಚಿ॒ತಯ॑ನ್ತ್ಯಾ ಕೃ॒ಪಾ । ಖ್ಷಾಮ॑-ನ್ರುರು॒ಚ ಉ॒ಷಸೋ॒ ನ ಭಾ॒ನುನಾ᳚ ॥ ತೂರ್ವ॒-ನ್ನ ಯಾಮ॒ನ್ನೇತ॑ಶಸ್ಯ॒ ನೂ ರಣ॒ ಆ ಯೋ ಘೃ॒ಣೇ । ನ ತ॑ತೃಷಾ॒ಣೋ ಅ॒ಜರಃ॑ ॥ ಅಗ್ನೇ॑ ಪಾವಕ ರೋ॒ಚಿಷಾ॑ ಮ॒ನ್ದ್ರಯಾ॑ ದೇವ ಜಿ॒ಹ್ವಯಾ᳚ । ಆ ದೇ॒ವಾನ್ [ಆ ದೇ॒ವಾನ್, ವ॒ಖ್ಷಿ॒ ಯಖ್ಷಿ॑ ಚ ।] 2
ವ॑ಖ್ಷಿ॒ ಯಖ್ಷಿ॑ ಚ ॥ ಸ ನಃ॑ ಪಾವಕ ದೀದಿ॒ವೋ-ಽಗ್ನೇ॑ ದೇ॒ವಾಗ್ಂ ಇ॒ಹಾ-ಽಽ ವ॑ಹ । ಉಪ॑ ಯ॒ಜ್ಞಗ್ಂ ಹ॒ವಿಶ್ಚ॑ ನಃ ॥ ಅ॒ಪಾಮಿ॒ದ-ನ್ನ್ಯಯ॑ನಗ್ಂ ಸಮು॒ದ್ರಸ್ಯ॑ ನಿ॒ವೇಶ॑ನಮ್ । ಅ॒ನ್ಯ-ನ್ತೇ॑ ಅ॒ಸ್ಮ-ತ್ತ॑ಪನ್ತು ಹೇ॒ತಯಃ॑ ಪಾವ॒ಕೋ ಅ॒ಸ್ಮಭ್ಯಗ್ಂ॑ ಶಿ॒ವೋ ಭ॑ವ ॥ ನಮ॑ಸ್ತೇ॒ ಹರ॑ಸೇ ಶೋ॒ಚಿಷೇ॒ ನಮ॑ಸ್ತೇ ಅಸ್ತ್ವ॒ರ್ಚಿಷೇ᳚ । ಅ॒ನ್ಯ-ನ್ತೇ॑ ಅ॒ಸ್ಮ-ತ್ತ॑ಪನ್ತು ಹೇ॒ತಯಃ॑ ಪಾವ॒ಕೋ ಅ॒ಸ್ಮಭ್ಯಗ್ಂ॑ ಶಿ॒ವೋ ಭ॑ವ ॥ ನೃ॒ಷದೇ॒ ವ- [ನೃ॒ಷದೇ॒ ವಟ್, ಅ॒ಫ್ಸು॒ಷದೇ॒ ವ-ಡ್ವ॑ನ॒ಸದೇ॒] 3
-ಡ॑ಫ್ಸು॒ಷದೇ॒ ವ-ಡ್ವ॑ನ॒ಸದೇ॒ ವ-ಡ್ಬ॑ರ್ಹಿ॒ಷದೇ॒ ವಟ್-ಥ್ಸು॑ವ॒ರ್ವಿದೇ॒ ವಟ್ ॥ ಯೇ ದೇ॒ವಾ ದೇ॒ವಾನಾಂ᳚-ಯಁ॒ಜ್ಞಿಯಾ॑ ಯ॒ಜ್ಞಿಯಾ॑ನಾಗ್ಂ ಸಂವಁ-ಥ್ಸ॒ರೀಣ॒ಮುಪ॑ ಭಾ॒ಗಮಾಸ॑ತೇ । ಅ॒ಹು॒ತಾದೋ॑ ಹ॒ವಿಷೋ॑ ಯ॒ಜ್ಞೇ ಅ॒ಸ್ಮಿನ್-ಥ್ಸ್ವ॒ಯ-ಞ್ಜು॑ಹುದ್ಧ್ವ॒-ಮ್ಮಧು॑ನೋ ಘೃ॒ತಸ್ಯ॑ ॥ ಯೇ ದೇ॒ವಾ ದೇ॒ವೇಷ್ವಧಿ॑ ದೇವ॒ತ್ವಮಾಯ॒ನ್॒ ಯೇ ಬ್ರಹ್ಮ॑ಣಃ ಪುರ ಏ॒ತಾರೋ॑ ಅ॒ಸ್ಯ । ಯೇಭ್ಯೋ॒ ನರ್ತೇ ಪವ॑ತೇ॒ ಧಾಮ॒ ಕಿ-ಞ್ಚ॒ನ ನ ತೇ ದಿ॒ವೋ ನ ಪೃ॑ಥಿ॒ವ್ಯಾ ಅಧಿ॒ ಸ್ನುಷು॑ ॥ ಪ್ರಾ॒ಣ॒ದಾ [ಪ್ರಾ॒ಣ॒ದಾಃ, ಅ॒ಪಾ॒ನ॒ದಾ ವ್ಯಾ॑ನ॒ದಾ-] 4
ಅ॑ಪಾನ॒ದಾ ವ್ಯಾ॑ನ॒ದಾ-ಶ್ಚ॑ಖ್ಷು॒ರ್ದಾ ವ॑ರ್ಚೋ॒ದಾ ವ॑ರಿವೋ॒ದಾಃ । ಅ॒ನ್ಯ-ನ್ತೇ॑ ಅ॒ಸ್ಮ-ತ್ತ॑ಪನ್ತು ಹೇ॒ತಯಃ॑ ಪಾವ॒ಕೋ ಅ॒ಸ್ಮಭ್ಯಗ್ಂ॑ ಶಿ॒ವೋ ಭ॑ವ ॥ ಅ॒ಗ್ನಿಸ್ತಿ॒ಗ್ಮೇನ॑ ಶೋ॒ಚಿಷಾ॒ ಯಗ್ಂಸ॒ದ್ವಿಶ್ವ॒-ನ್ನ್ಯ॑ತ್ರಿಣ᳚ಮ್ । ಅ॒ಗ್ನಿರ್ನೋ॑ ವಗ್ಂಸತೇ ರ॒ಯಿಮ್ ॥ ಸೈನಾ-ಽನೀ॑ಕೇನ ಸುವಿ॒ದತ್ರೋ॑ ಅ॒ಸ್ಮೇ ಯಷ್ಟಾ॑ ದೇ॒ವಾಗ್ಂ ಆಯ॑ಜಿಷ್ಠ-ಸ್ಸ್ವ॒ಸ್ತಿ । ಅದ॑ಬ್ಧೋ ಗೋ॒ಪಾ ಉ॒ತ ನಃ॑ ಪರ॒ಸ್ಪಾ ಅಗ್ನೇ᳚ ದ್ಯು॒ಮದು॒ತ ರೇ॒ವ-ದ್ದಿ॑ದೀಹಿ ॥ 5 ॥
(ಉಪ॑-ದೇ॒ವಾನ್-ವಟ್-ಪ್ರಾ॑ಣ॒ದಾ-ಶ್ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 1)
ಯ ಇ॒ಮಾ ವಿಶ್ವಾ॒ ಭುವ॑ನಾನಿ॒ ಜುಹ್ವ॒ದೃಷಿ॒ರ್॒ಹೋತಾ॑ ನಿಷ॒ಸಾದಾ॑ ಪಿ॒ತಾ ನಃ॑ । ಸ ಆ॒ಶಿಷಾ॒ ದ್ರವಿ॑ಣಮಿ॒ಚ್ಛಮಾ॑ನಃ ಪರಮ॒ಚ್ಛದೋ॒ ವರ॒ ಆ ವಿ॑ವೇಶ ॥ ವಿ॒ಶ್ವಕ॑ರ್ಮಾ॒ ಮನ॑ಸಾ॒ ಯದ್ವಿಹಾ॑ಯಾ ಧಾ॒ತಾ ವಿ॑ಧಾ॒ತಾ ಪ॑ರ॒ಮೋತ ಸ॒ನ್ದೃಕ್ । ತೇಷಾ॑ಮಿ॒ಷ್ಟಾನಿ॒ ಸಮಿ॒ಷಾ ಮ॑ದನ್ತಿ॒ ಯತ್ರ॑ ಸಪ್ತ॒ರ್॒ಷೀ-ನ್ಪ॒ರ ಏಕ॑ಮಾ॒ಹುಃ ॥ ಯೋ ನಃ॑ ಪಿ॒ತಾ ಜ॑ನಿ॒ತಾ ಯೋ ವಿ॑ಧಾ॒ತಾ ಯೋ ನ॑-ಸ್ಸ॒ತೋ ಅ॒ಭ್ಯಾ ಸಜ್ಜ॒ಜಾನ॑ । 6
ಯೋ ದೇ॒ವಾನಾ᳚-ನ್ನಾಮ॒ಧಾ ಏಕ॑ ಏ॒ವ ತಗ್ಂ ಸ॑ಮ್ಪ್ರ॒ಶ್ಞ-ಮ್ಭುವ॑ನಾ ಯನ್ತ್ಯ॒ನ್ಯಾ ॥ ತ ಆ-ಽಯ॑ಜನ್ತ॒ ದ್ರವಿ॑ಣ॒ಗ್ಂ॒ ಸಮ॑ಸ್ಮಾ॒ ಋಷ॑ಯಃ॒ ಪೂರ್ವೇ॑ ಜರಿ॒ತಾರೋ॒ ನ ಭೂ॒ನಾ । ಅ॒ಸೂರ್ತಾ॒ ಸೂರ್ತಾ॒ ರಜ॑ಸೋ ವಿ॒ಮಾನೇ॒ ಯೇ ಭೂ॒ತಾನಿ॑ ಸ॒ಮಕೃ॑ಣ್ವನ್ನಿ॒ಮಾನಿ॑ ॥ ನ ತಂ-ವಿಁ॑ದಾಥ॒ ಯ ಇ॒ದ-ಞ್ಜ॒ಜಾನಾ॒ನ್ಯ-ದ್ಯು॒ಷ್ಮಾಕ॒ಮನ್ತ॑ರ-ಮ್ಭವಾತಿ । ನೀ॒ಹಾ॒ರೇಣ॒ ಪ್ರಾವೃ॑ತಾ॒ ಜಲ್ಪ್ಯಾ॑ ಚಾಸು॒ತೃಪ॑ ಉಕ್ಥ॒ ಶಾಸ॑ಶ್ಚರನ್ತಿ ॥ ಪ॒ರೋ ದಿ॒ವಾ ಪ॒ರ ಏ॒ನಾ [ಪ॒ರ ಏ॒ನಾ, ಪೃ॒ಥಿ॒ವ್ಯಾ ಪ॒ರೋ] 7
ಪೃ॑ಥಿ॒ವ್ಯಾ ಪ॒ರೋ ದೇ॒ವೇಭಿ॒ರಸು॑ರೈ॒ರ್ಗುಹಾ॒ ಯತ್ । ಕಗ್ಗ್ ಸ್ವಿ॒ದ್ಗರ್ಭ॑-ಮ್ಪ್ರಥ॒ಮ-ನ್ದ॑ದ್ಧ್ರ॒ ಆಪೋ॒ ಯತ್ರ॑ ದೇ॒ವಾ-ಸ್ಸ॒ಮಗ॑ಚ್ಛನ್ತ॒ ವಿಶ್ವೇ᳚ ॥ ತಮಿದ್ಗರ್ಭ॑-ಮ್ಪ್ರಥ॒ಮ-ನ್ದ॑ದ್ಧ್ರ॒ ಆಪೋ॒ ಯತ್ರ॑ ದೇ॒ವಾ-ಸ್ಸ॒ಮಗ॑ಚ್ಛನ್ತ॒ ವಿಶ್ವೇ᳚ । ಅ॒ಜಸ್ಯ॒ ನಾಭಾ॒ವದ್ಧ್ಯೇಕ॒-ಮರ್ಪಿ॑ತಂ॒-ಯಁಸ್ಮಿ॑ನ್ನಿ॒ದಂ-ವಿಁಶ್ವ॒-ಮ್ಭುವ॑ನ॒ಮಧಿ॑ ಶ್ರಿ॒ತಮ್ ॥ ವಿ॒ಶ್ವಕ॑ರ್ಮಾ॒ ಹ್ಯಜ॑ನಿಷ್ಟ ದೇ॒ವ ಆದಿ-ದ್ಗ॑ನ್ಧ॒ರ್ವೋ ಅ॑ಭವ-ದ್ದ್ವಿ॒ತೀಯಃ॑ । ತೃ॒ತೀಯಃ॑ ಪಿ॒ತಾ ಜ॑ನಿ॒ತೌಷ॑ಧೀನಾ- [ಪಿ॒ತಾ ಜ॑ನಿ॒ತೌಷ॑ಧೀನಾಮ್, ಅ॒ಪಾ-ಙ್ಗರ್ಭಂ॒-ವ್ಯಁ॑ದಧಾ-ತ್ಪುರು॒ತ್ರಾ ।] 8
-ಮ॒ಪಾ-ಙ್ಗರ್ಭಂ॒-ವ್ಯಁ॑ದಧಾ-ತ್ಪುರು॒ತ್ರಾ ॥ ಚಖ್ಷು॑ಷಃ ಪಿ॒ತಾ ಮನ॑ಸಾ॒ ಹಿ ಧೀರೋ॑ ಘೃ॒ತಮೇ॑ನೇ ಅಜನ॒ನ್ನ॑ಮಾನೇ । ಯ॒ದೇದನ್ತಾ॒ ಅದ॑ದೃಗ್ಂಹನ್ತ॒ ಪೂರ್ವ॒ ಆದಿ-ದ್ದ್ಯಾವಾ॑ಪೃಥಿ॒ವೀ ಅ॑ಪ್ರಥೇತಾಮ್ ॥ ವಿ॒ಶ್ವತ॑-ಶ್ಚಖ್ಷುರು॒ತ ವಿ॒ಶ್ವತೋ॑ಮುಖೋ ವಿ॒ಶ್ವತೋ॑ಹಸ್ತ ಉ॒ತ ವಿ॒ಶ್ವತ॑ಸ್ಪಾತ್ । ಸ-ಮ್ಬಾ॒ಹುಭ್ಯಾ॒-ನ್ನಮ॑ತಿ॒ ಸ-ಮ್ಪತ॑ತ್ರೈ॒ ರ್ದ್ಯಾವಾ॑ಪೃಥಿ॒ವೀ ಜ॒ನಯ॑-ನ್ದೇ॒ವ ಏಕಃ॑ ॥ ಕಿಗ್ಗ್ ಸ್ವಿ॑ದಾಸೀ-ದಧಿ॒ಷ್ಠಾನ॑-ಮಾ॒ರಮ್ಭ॑ಣ-ಙ್ಕತ॒ಮ-ಥ್ಸ್ವಿ॒-ತ್ಕಿಮಾ॑ಸೀತ್ । ಯದೀ॒ ಭೂಮಿ॑-ಞ್ಜ॒ನಯ॑- [ಯದೀ॒ ಭೂಮಿ॑-ಞ್ಜ॒ನಯನ್ನ್॑, ವಿ॒ಶ್ವಕ॑ರ್ಮಾ॒] 9
-ನ್ವಿ॒ಶ್ವಕ॑ರ್ಮಾ॒ ವಿ ದ್ಯಾಮೌರ್ಣೋ᳚-ನ್ಮಹಿ॒ನಾ ವಿ॒ಶ್ವಚ॑ಖ್ಷಾಃ ॥ ಕಿಗ್ಗ್ ಸ್ವಿ॒ದ್ವನ॒-ಙ್ಕ ಉ॒ ಸ ವೃ॒ಖ್ಷ ಆ॑ಸೀ॒ದ್ಯತೋ॒ ದ್ಯಾವಾ॑ಪೃಥಿ॒ವೀ ನಿ॑ಷ್ಟತ॒ಖ್ಷುಃ । ಮನೀ॑ಷಿಣೋ॒ ಮನ॑ಸಾ ಪೃ॒ಚ್ಛತೇದು॒ ತದ್ಯದ॒ದ್ಧ್ಯತಿ॑ಷ್ಠ॒-ದ್ಭುವ॑ನಾನಿ ಧಾ॒ರಯನ್ನ್॑ ॥ ಯಾ ತೇ॒ ಧಾಮಾ॑ನಿ ಪರ॒ಮಾಣಿ॒ ಯಾ-ಽವ॒ಮಾ ಯಾ ಮ॑ದ್ಧ್ಯ॒ಮಾ ವಿ॑ಶ್ವಕರ್ಮನ್ನು॒ತೇಮಾ । ಶಿಖ್ಷಾ॒ ಸಖಿ॑ಭ್ಯೋ ಹ॒ವಿಷಿ॑ ಸ್ವಧಾವ-ಸ್ಸ್ವ॒ಯಂ-ಯಁ॑ಜಸ್ವ ತ॒ನುವ॑-ಞ್ಜುಷಾ॒ಣಃ ॥ ವಾ॒ಚಸ್ಪತಿಂ॑-ವಿಁ॒ಶ್ವಕ॑ರ್ಮಾಣ-ಮೂ॒ತಯೇ॑ [-ಮೂ॒ತಯೇ᳚, ಮ॒ನೋ॒ಯುಜಂ॒-ವಾಁಜೇ॑] 10
ಮನೋ॒ಯುಜಂ॒-ವಾಁಜೇ॑ ಅ॒ದ್ಯಾ ಹು॑ವೇಮ । ಸ ನೋ॒ ನೇದಿ॑ಷ್ಠಾ॒ ಹವ॑ನಾನಿ ಜೋಷತೇ ವಿ॒ಶ್ವಶ॑ಭೂಂ॒ರವ॑ಸೇ ಸಾ॒ಧುಕ॑ರ್ಮಾ ॥ ವಿಶ್ವ॑ಕರ್ಮನ್. ಹ॒ವಿಷಾ॑ ವಾವೃಧಾ॒ನ-ಸ್ಸ್ವ॒ಯಂ-ಯಁ॑ಜಸ್ವ ತ॒ನುವ॑-ಞ್ಜುಷಾ॒ಣಃ । ಮುಹ್ಯ॑ನ್ತ್ವ॒ನ್ಯೇ ಅ॒ಭಿತ॑-ಸ್ಸ॒ಪತ್ನಾ॑ ಇ॒ಹಾಸ್ಮಾಕ॑-ಮ್ಮ॒ಘವಾ॑ ಸೂ॒ರಿರ॑ಸ್ತು ॥ ವಿಶ್ವ॑ಕರ್ಮನ್. ಹ॒ವಿಷಾ॒ ವರ್ಧ॑ನೇನ ತ್ರಾ॒ತಾರ॒ಮಿನ್ದ್ರ॑-ಮಕೃಣೋರವ॒ದ್ಧ್ಯಮ್ । ತಸ್ಮೈ॒ ವಿಶ॒-ಸ್ಸಮ॑ನಮನ್ತ ಪೂ॒ರ್ವೀರ॒ಯಮು॒ಗ್ರೋ ವಿ॑ಹ॒ವ್ಯೋ॑ ಯಥಾ-ಽಸ॑ತ್ ॥ ಸ॒ಮು॒ದ್ರಾಯ॑ ವ॒ಯುನಾ॑ಯ॒ ಸಿನ್ಧೂ॑ನಾ॒-ಮ್ಪತ॑ಯೇ॒ ನಮಃ॑ । ನ॒ದೀನಾ॒ಗ್ಂ॒ ಸರ್ವಾ॑ಸಾ-ಮ್ಪಿ॒ತ್ರೇ ಜು॑ಹು॒ತಾ ವಿ॒ಶ್ವಕ॑ರ್ಮಣೇ॒ ವಿಶ್ವಾ-ಽಹಾಮ॑ರ್ತ್ಯಗ್ಂ ಹ॒ವಿಃ ॥ 11 ॥
(ಜ॒ಜಾನೈ॒ – ನೌ – ಷ॑ಧೀನಾಂ॒ – ಭೂಮಿ॑-ಞ್ಜ॒ನಯ॑ – ನ್ನೂ॒ತಯೇ॒ – ನಮೋ॒ – ನವ॑ ಚ) (ಅ. 2)
ಉದೇ॑ನಮುತ್ತ॒ರಾ-ನ್ನ॒ಯಾಗ್ನೇ॑ ಘೃತೇನಾ-ಽಽಹುತ । ರಾ॒ಯಸ್ಪೋಷೇ॑ಣ॒ ಸಗ್ಂ ಸೃ॑ಜ ಪ್ರ॒ಜಯಾ॑ ಚ॒ ಧನೇ॑ನ ಚ ॥ ಇನ್ದ್ರೇ॒ಮ-ಮ್ಪ್ರ॑ತ॒ರಾ-ಙ್ಕೃ॑ಧಿ ಸಜಾ॒ತಾನಾ॑-ಮಸದ್ವ॒ಶೀ । ಸಮೇ॑ನಂ॒-ವಁರ್ಚ॑ಸಾ ಸೃಜ ದೇ॒ವೇಭ್ಯೋ॑ ಭಾಗ॒ಧಾ ಅ॑ಸತ್ ॥ ಯಸ್ಯ॑ ಕು॒ರ್ಮೋ ಹ॒ವಿರ್ಗೃ॒ಹೇ ತಮ॑ಗ್ನೇ ವರ್ಧಯಾ॒ ತ್ವಮ್ । ತಸ್ಮ॑ ದೇ॒ವಾ ಅಧಿ॑ ಬ್ರವನ್ನ॒ಯ-ಞ್ಚ॒ ಬ್ರಹ್ಮ॑ಣ॒ಸ್ಪತಿಃ॑ ॥ ಉದು॑ ತ್ವಾ॒ ವಿಶ್ವೇ॑ ದೇ॒ವಾ [ವಿಶ್ವೇ॑ ದೇ॒ವಾಃ, ಅಗ್ನೇ॒ ಭರ॑ನ್ತು॒ ಚಿತ್ತಿ॑ಭಿಃ ।] 12
ಅಗ್ನೇ॒ ಭರ॑ನ್ತು॒ ಚಿತ್ತಿ॑ಭಿಃ । ಸ ನೋ॑ ಭವ ಶಿ॒ವತ॑ಮ-ಸ್ಸು॒ಪ್ರತೀ॑ಕೋ ವಿ॒ಭಾವ॑ಸುಃ ॥ ಪಞ್ಚ॒ ದಿಶೋ॒ ದೈವೀ᳚ರ್ಯ॒ಜ್ಞಮ॑ವನ್ತು ದೇ॒ವೀರಪಾಮ॑ತಿ-ನ್ದುರ್ಮ॒ತಿ-ಮ್ಬಾಧ॑ಮಾನಾಃ । ರಾ॒ಯಸ್ಪೋಷೇ॑ ಯ॒ಜ್ಞಪ॑ತಿ-ಮಾ॒ಭಜ॑ನ್ತೀಃ ॥ ರಾ॒ಯಸ್ಪೋಷೇ॒ ಅಧಿ॑ ಯ॒ಜ್ಞೋ ಅ॑ಸ್ಥಾ॒-ಥ್ಸಮಿ॑ದ್ಧೇ ಅ॒ಗ್ನಾವಧಿ॑ ಮಾಮಹಾ॒ನಃ । ಉ॒ಕ್ಥಪ॑ತ್ರ॒ ಈಡ್ಯೋ॑ ಗೃಭೀ॒ತಸ್ತ॒ಪ್ತ-ಙ್ಘ॒ರ್ಮ-ಮ್ಪ॑ರಿ॒ಗೃಹ್ಯಾ॑ಯಜನ್ತ ॥ ಊ॒ರ್ಜಾ ಯ-ದ್ಯ॒ಜ್ಞಮಶ॑ಮನ್ತ ದೇ॒ವಾ ದೈವ್ಯಾ॑ಯ ಧ॒ರ್ತ್ರೇ ಜೋಷ್ಟ್ರೇ᳚ । ದೇ॒ವ॒ಶ್ರೀ-ಶ್ಶ್ರೀಮ॑ಣಾ-ಶ್ಶ॒ತಪ॑ಯಾಃ [ದೇ॒ವ॒ಶ್ರೀ-ಶ್ಶ್ರೀಮ॑ಣಾ-ಶ್ಶ॒ತಪ॑ಯಾಃ, ಪ॒ರಿ॒ಗೃಹ್ಯ॑] 13
ಪರಿ॒ಗೃಹ್ಯ॑ ದೇ॒ವಾ ಯ॒ಜ್ಞಮಾ॑ಯನ್ನ್ ॥ ಸೂರ್ಯ॑ರಶ್ಮಿ॒ರ್॒ಹರಿ॑ಕೇಶಃ ಪು॒ರಸ್ತಾ᳚-ಥ್ಸವಿ॒ತಾ ಜ್ಯೋತಿ॒ರುದ॑ಯಾ॒ಗ್ಂ॒ ಅಜ॑ಸ್ರಮ್ । ತಸ್ಯ॑ ಪೂ॒ಷಾ ಪ್ರ॑ಸ॒ವಂ-ಯಾಁ॑ತಿ ದೇ॒ವ-ಸ್ಸ॒ಪಂಶ್ಯ॒ನ್ ವಿಶ್ವಾ॒ ಭುವ॑ನಾನಿ ಗೋ॒ಪಾಃ ॥ ದೇ॒ವಾ ದೇ॒ವೇಭ್ಯೋ॑ ಅದ್ಧ್ವ॒ರ್ಯನ್ತೋ॑ ಅಸ್ಥುರ್ವೀ॒ತಗ್ಂ ಶ॑ಮಿ॒ತ್ರೇ ಶ॑ಮಿ॒ತಾ ಯ॒ಜದ್ಧ್ಯೈ᳚ । ತು॒ರೀಯೋ॑ ಯ॒ಜ್ಞೋ ಯತ್ರ॑ ಹ॒ವ್ಯಮೇತಿ॒ ತತಃ॑ ಪಾವ॒ಕಾ ಆ॒ಶಿಷೋ॑ ನೋ ಜುಷನ್ತಾಮ್ ॥ ವಿ॒ಮಾನ॑ ಏ॒ಷ ದಿ॒ವೋ ಮದ್ಧ್ಯ॑ ಆಸ್ತ ಆಪಪ್ರಿ॒ವಾ-ನ್ರೋದ॑ಸೀ ಅ॒ನ್ತರಿ॑ಖ್ಷಮ್ । ಸ ವಿ॒ಶ್ವಾಚೀ॑ರ॒ಭಿ- [ಸ ವಿ॒ಶ್ವಾಚೀ॑ರ॒ಭಿ, ಚ॒ಷ್ಟೇ॒ ಘೃ॒ತಾಚೀ॑ರನ್ತ॒ರಾ] 14
-ಚ॑ಷ್ಟೇ ಘೃ॒ತಾಚೀ॑ರನ್ತ॒ರಾ ಪೂರ್ವ॒ಮಪ॑ರ-ಞ್ಚ ಕೇ॒ತುಮ್ ॥ ಉ॒ಖ್ಷಾ ಸ॑ಮು॒ದ್ರೋ ಅ॑ರು॒ಣ-ಸ್ಸು॑ಪ॒ರ್ಣಃ ಪೂರ್ವ॑ಸ್ಯ॒ ಯೋನಿ॑-ಮ್ಪಿ॒ತುರಾ ವಿ॑ವೇಶ । ಮದ್ಧ್ಯೇ॑ ದಿ॒ವೋ ನಿಹಿ॑ತಃ॒ ಪೃಶ್ಞಿ॒ರಶ್ಮಾ॒ ವಿ ಚ॑ಕ್ರಮೇ॒ ರಜ॑ಸಃ ಪಾ॒ತ್ಯನ್ತೌ᳚ ॥ ಇನ್ದ್ರಂ॒-ವಿಁಶ್ವಾ॑ ಅವೀವೃಧನ್-ಥ್ಸಮು॒ದ್ರವ್ಯ॑ಚಸ॒-ಙ್ಗಿರಃ॑ । ರ॒ಥೀತ॑ಮಗ್ಂ ರಥೀ॒ನಾಂ-ವಾಁಜಾ॑ನಾ॒ಗ್ಂ॒ ಸತ್ಪ॑ತಿ॒-ಮ್ಪತಿ᳚ಮ್ ॥ ಸು॒ಮ್ನ॒ಹೂರ್ಯ॒ಜ್ಞೋ ದೇ॒ವಾಗ್ಂ ಆ ಚ॑ ವಖ್ಷ॒ದ್ಯಖ್ಷ॑ದ॒ಗ್ನಿರ್ದೇ॒ವೋ ದೇ॒ವಾಗ್ಂ ಆ ಚ॑ ವಖ್ಷತ್ ॥ ವಾಜ॑ಸ್ಯ ಮಾ ಪ್ರಸ॒ವೇನೋ᳚-ದ್ಗ್ರಾ॒ಭೇಣೋ-ದ॑ಗ್ರಭೀತ್ । ಅಥಾ॑ ಸ॒ಪತ್ನಾ॒ಗ್ಂ॒ ಇನ್ದ್ರೋ॑ ಮೇ ನಿಗ್ರಾ॒ಭೇಣಾಧ॑ರಾಗ್ಂ ಅಕಃ ॥ ಉ॒ದ್ಗ್ರಾ॒ಭ-ಞ್ಚ॑ ನಿಗ್ರಾ॒ಭ-ಞ್ಚ॒ ಬ್ರಹ್ಮ॑ ದೇ॒ವಾ ಅ॑ವೀವೃಧನ್ನ್ । ಅಥಾ॑ ಸ॒ಪತ್ನಾ॑ನಿನ್ದ್ರಾ॒ಗ್ನೀ ಮೇ॑ ವಿಷೂ॒ಚೀನಾ॒ನ್ ವ್ಯ॑ಸ್ಯತಾಮ್ ॥ 15 ॥
(ದೇ॒ವಾಃ – ಶ॒ತಪ॑ಯಾ – ಅ॒ಭಿ – ವಾಜ॑ಸ್ಯ॒ – ಷಡ್ವಿಗ್ಂ॑ಶತಿಶ್ಚ ) (ಅ. 3)
ಆ॒ಶು-ಶ್ಶಿಶಾ॑ನೋ ವೃಷ॒ಭೋ ನ ಯು॒ದ್ಧ್ಮೋ ಘ॑ನಾಘ॒ನಃ, ಖ್ಷೋಭ॑ಣ-ಶ್ಚರ್ಷಣೀ॒ನಾಮ್ । ಸ॒ಙ್ಕ್ರನ್ದ॑ನೋ-ಽನಿಮಿ॒ಷ ಏ॑ಕ ವೀ॒ರ-ಶ್ಶ॒ತಗ್ಂ ಸೇನಾ॑ ಅಜಯ-ಥ್ಸಾ॒ಕಮಿನ್ದ್ರಃ॑ ॥ ಸ॒ಙ್ಕ್ರನ್ದ॑ನೇನಾ ನಿಮಿ॒ಷೇಣ॑ ಜಿ॒ಷ್ಣುನಾ॑ ಯುತ್ಕಾ॒ರೇಣ॑ ದುಶ್ಚ್ಯವ॒ನೇನ॑ ಧೃ॒ಷ್ಣುನಾ᳚ । ತದಿನ್ದ್ರೇ॑ಣ ಜಯತ॒ ತ-ಥ್ಸ॑ಹದ್ಧ್ವಂ॒-ಯುಁಧೋ॑ ನರ॒ ಇಷು॑ಹಸ್ತೇನ॒ ವೃಷ್ಣಾ᳚ ॥ ಸ ಇಷು॑ಹಸ್ತೈ॒-ಸ್ಸ ನಿ॑ಷ॒ಙ್ಗಿಭಿ॑ರ್ವ॒ಶೀ ಸಗ್ಗ್ಸ್ರ॑ಷ್ಟಾ॒ ಸ ಯುಧ॒ ಇನ್ದ್ರೋ॑ ಗ॒ಣೇನ॑ । ಸ॒ಗ್ಂ॒ಸೃ॒ಷ್ಟ॒ಜಿ-ಥ್ಸೋ॑ಮ॒ಪಾ ಬಾ॑ಹುಶ॒ರ್ಧ್ಯೂ᳚ರ್ಧ್ವಧ॑ನ್ವಾ॒ ಪ್ರತಿ॑ಹಿತಾಭಿ॒ರಸ್ತಾ᳚ ॥ ಬೃಹ॑ಸ್ಪತೇ॒ ಪರಿ॑ ದೀಯಾ॒ [ಪರಿ॑ ದೀಯ, ರಥೇ॑ನ] 16
ರಥೇ॑ನ ರಖ್ಷೋ॒ಹಾ ಽಮಿತ್ರಾಗ್ಂ॑ ಅಪ॒ ಬಾಧ॑ಮಾನಃ । ಪ್ರ॒ಭ॒ಞ್ಜನ್-ಥ್ಸೇನಾಃ᳚ ಪ್ರಮೃ॒ಣೋ ಯು॒ಧಾ ಜಯ॑ನ್ನ॒ಸ್ಮಾಕ॑-ಮೇದ್ಧ್ಯವಿ॒ತಾ ರಥಾ॑ನಾಮ್ ॥ ಗೋ॒ತ್ರ॒ಭಿದ॑-ಙ್ಗೋ॒ವಿದಂ॒-ವಁಜ್ರ॑ಬಾಹು॒-ಞ್ಜಯ॑ನ್ತ॒ಮಜ್ಮ॑ ಪ್ರಮೃ॒ಣನ್ತ॒-ಮೋಜ॑ಸಾ । ಇ॒ಮಗ್ಂ ಸ॑ಜಾತಾ॒ ಅನು॑ವೀರ-ಯದ್ಧ್ವ॒ಮಿನ್ದ್ರಗ್ಂ॑ ಸಖಾ॒ಯೋ-ಽನು॒ ಸಗ್ಂ ರ॑ಭದ್ಧ್ವಮ್ ॥ ಬ॒ಲ॒ವಿ॒ಜ್ಞಾ॒ಯಃ-ಸ್ಥವಿ॑ರಃ॒ ಪ್ರವೀ॑ರ॒-ಸ್ಸಹ॑ಸ್ವಾನ್. ವಾ॒ಜೀ ಸಹ॑ಮಾನ ಉ॒ಗ್ರಃ । ಅ॒ಭಿವೀ॑ರೋ ಅ॒ಭಿಸ॑ತ್ವಾ ಸಹೋ॒ಜಾ ಜೈತ್ರ॑ಮಿನ್ದ್ರ॒ ರಥ॒ಮಾತಿ॑ಷ್ಠ ಗೋ॒ವಿತ್ ॥ ಅ॒ಭಿ ಗೋ॒ತ್ರಾಣಿ॒ ಸಹ॑ಸಾ॒ ಗಾಹ॑ಮಾನೋ-ಽದಾ॒ಯೋ [ಗಾಹ॑ಮಾನೋ-ಽದಾ॒ಯಃ, ವೀ॒ರ-ಶ್ಶ॒ತಮ॑ನ್ಯು॒ರಿನ್ದ್ರಃ॑ ।] 17
ವೀ॒ರ-ಶ್ಶ॒ತಮ॑ನ್ಯು॒ರಿನ್ದ್ರಃ॑ । ದು॒ಶ್ಚ್ಯ॒ವ॒ನಃ ಪೃ॑ತನಾ॒ಷಾಡ॑ ಯು॒ದ್ಧ್ಯೋ᳚-ಸ್ಮಾಕ॒ಗ್ಂ॒ ಸೇನಾ॑ ಅವತು॒ ಪ್ರ ಯು॒ಥ್ಸು ॥ ಇನ್ದ್ರ॑ ಆಸಾಂ-ನೇ॒ತಾ ಬೃಹ॒ಸ್ಪತಿ॒ ರ್ದಖ್ಷಿ॑ಣಾ ಯ॒ಜ್ಞಃ ಪು॒ರ ಏ॑ತು॒ ಸೋಮಃ॑ । ದೇ॒ವ॒ಸೇ॒ನಾನಾ॑-ಮಭಿಭಞ್ಜತೀ॒ನಾ-ಞ್ಜಯ॑ನ್ತೀನಾ-ಮ್ಮ॒ರುತೋ॑ ಯ॒ನ್ತ್ವಗ್ರೇ᳚ ॥ ಇನ್ದ್ರ॑ಸ್ಯ॒ ವೃಷ್ಣೋ॒ ವರು॑ಣಸ್ಯ॒ ರಾಜ್ಞ॑ ಆದಿ॒ತ್ಯಾನಾ᳚-ಮ್ಮ॒ರುತಾ॒ಗ್ಂ॒ ಶರ್ಧ॑ ಉ॒ಗ್ರಮ್ । ಮ॒ಹಾಮ॑ನಸಾ-ಮ್ಭುವನಚ್ಯ॒ವಾನಾ॒-ಙ್ಘೋಷೋ॑ ದೇ॒ವಾನಾ॒-ಞ್ಜಯ॑ತಾ॒ ಮುದ॑ಸ್ಥಾತ್ ॥ ಅ॒ಸ್ಮಾಕ॒-ಮಿನ್ದ್ರ॒-ಸ್ಸಮೃ॑ತೇಷು ಧ್ವ॒ಜೇಷ್ವ॒ಸ್ಮಾಕಂ॒-ಯಾಁ ಇಷ॑ವ॒ಸ್ತಾ ಜ॑ಯನ್ತು । 18
ಅ॒ಸ್ಮಾಕಂ॑-ವೀಁ॒ರಾ ಉತ್ತ॑ರೇ ಭವನ್ತ್ವ॒ಸ್ಮಾನು॑ ದೇವಾ ಅವತಾ॒ ಹವೇ॑ಷು ॥ ಉದ್ಧ॑ರ್ಷಯ ಮಘವ॒ನ್ನಾ-ಯು॑ಧಾ॒-ನ್ಯುಥ್ಸತ್ವ॑ನಾ-ಮ್ಮಾಮ॒ಕಾನಾ॒-ಮ್ಮಹಾಗ್ಂ॑ಸಿ । ಉದ್ವೃ॑ತ್ರಹನ್ ವಾ॒ಜಿನಾಂ॒-ವಾಁಜಿ॑ನಾ॒ನ್ಯು-ದ್ರಥಾ॑ನಾ॒-ಞ್ಜಯ॑ತಾಮೇತು॒ ಘೋಷಃ॑ ॥ ಉಪ॒ ಪ್ರೇತ॒ ಜಯ॑ತಾ ನರಸ್ಸ್ಥಿ॒ರಾ ವ॑-ಸ್ಸನ್ತು ಬಾ॒ಹವಃ॑ । ಇನ್ದ್ರೋ॑ ವ॒-ಶ್ಶರ್ಮ॑ ಯಚ್ಛ ತ್ವನಾ-ಧೃ॒ಷ್ಯಾ ಯಥಾಸ॑ಥ ॥ ಅವ॑ಸೃಷ್ಟಾ॒ ಪರಾ॑ ಪತ॒ ಶರ॑ವ್ಯೇ॒ ಬ್ರಹ್ಮ॑ ಸಗ್ಂಶಿತಾ । ಗಚ್ಛಾ॒-ಽಮಿತ್ರಾ॒-ನ್ಪ್ರ- [ಗಚ್ಛಾ॒-ಽಮಿತ್ರಾ॒-ನ್ಪ್ರ, ವಿ॒ಶ॒ ಮೈಷಾ॒-] 19
-ವಿ॑ಶ॒ ಮೈಷಾ॒-ಙ್ಕಞ್ಚ॒ನೋಚ್ಛಿ॑ಷಃ ॥ ಮರ್ಮಾ॑ಣಿ ತೇ॒ ವರ್ಮ॑ಭಿಶ್ಛಾದಯಾಮಿ॒ ಸೋಮ॑ಸ್ತ್ವಾ॒ ರಾಜಾ॒ ಽಮೃತೇ॑ನಾ॒ಭಿ-ವ॑ಸ್ತಾಮ್ । ಉ॒ರೋರ್ವರೀ॑ಯೋ॒ ವರಿ॑ವಸ್ತೇ ಅಸ್ತು॒ ಜಯ॑ನ್ತ॒-ನ್ತ್ವಾಮನು॑ ಮದನ್ತು ದೇ॒ವಾಃ ॥ ಯತ್ರ॑ ಬಾ॒ಣಾ-ಸ್ಸ॒ಮ್ಪತ॑ನ್ತಿ ಕುಮಾ॒ರಾ ವಿ॑ಶಿ॒ಖಾ ಇ॑ವ । ಇನ್ದ್ರೋ॑ ನ॒ಸ್ತತ್ರ॑ ವೃತ್ರ॒ಹಾ ವಿ॑ಶ್ವಾ॒ಹಾ ಶರ್ಮ॑ ಯಚ್ಛತು ॥ 20 ॥
(ದೀ॒ಯಾ॒ – ಽದಾ॒ಯೋ – ಜ॑ಯನ್ತ್ವ॒ – ಮಿತ್ರಾ॒-ನ್ಪ್ರ – ಚ॑ತ್ವಾರಿ॒ಗ್ಂ॒ಶಚ್ಚ॑) (ಅ. 4)
ಪ್ರಾಚೀ॒ಮನು॑ ಪ್ರ॒ದಿಶ॒-ಮ್ಪ್ರೇಹಿ॑ ವಿ॒ದ್ವಾನ॒ಗ್ನೇರ॑ಗ್ನೇ ಪು॒ರೋ ಅ॑ಗ್ನಿರ್ಭವೇ॒ಹ । ವಿಶ್ವಾ॒ ಆಶಾ॒ ದೀದ್ಯಾ॑ನೋ॒ ವಿ ಭಾ॒ಹ್ಯೂರ್ಜ॑-ನ್ನೋ ಧೇಹಿ ದ್ವಿ॒ಪದೇ॒ ಚತು॑ಷ್ಪದೇ ॥ ಕ್ರಮ॑ದ್ಧ್ವಮ॒ಗ್ನಿನಾ॒ ನಾಕ॒ಮುಖ್ಯ॒ಗ್ಂ॒ ಹಸ್ತೇ॑ಷು॒ ಬಿಭ್ರ॑ತಃ । ದಿ॒ವಃ ಪೃ॒ಷ್ಠಗ್ಂ ಸುವ॑ರ್ಗ॒ತ್ವಾ ಮಿ॒ಶ್ರಾ ದೇ॒ವೇಭಿ॑ರಾದ್ಧ್ವಮ್ ॥ ಪೃ॒ಥಿ॒ವ್ಯಾ ಅ॒ಹಮುದ॒ನ್ತರಿ॑ಖ್ಷ॒-ಮಾ-ಽರು॑ಹ-ಮ॒ನ್ತರಿ॑ಖ್ಷಾ॒-ದ್ದಿವ॒ಮಾ-ಽರು॑ಹಮ್ । ದಿ॒ವೋ ನಾಕ॑ಸ್ಯ ಪೃ॒ಷ್ಠಾ-ಥ್ಸುವ॒ರ್ಜ್ಯೋತಿ॑ರಗಾ- [ಪೃ॒ಷ್ಠಾ-ಥ್ಸುವ॒ರ್ಜ್ಯೋತಿ॑ರಗಾಮ್, ಅ॒ಹಮ್ ।] 21
-ಮ॒ಹಮ್ ॥ ಸುವ॒ರ್ಯನ್ತೋ॒ ನಾಪೇ᳚ಖ್ಷನ್ತ॒ ಆ ದ್ಯಾಗ್ಂ ರೋ॑ಹನ್ತಿ॒ ರೋದ॑ಸೀ । ಯ॒ಜ್ಞಂ-ಯೇಁ ವಿ॒ಶ್ವತೋ॑ಧಾರ॒ಗ್ಂ॒ ಸುವಿ॑ದ್ವಾಗ್ಂಸೋ ವಿತೇನಿ॒ರೇ ॥ ಅಗ್ನೇ॒ ಪ್ರೇಹಿ॑ ಪ್ರಥ॒ಮೋ ದೇ॑ವಯ॒ತಾ-ಞ್ಚಖ್ಷು॑ರ್ದೇ॒ವಾನಾ॑ಮು॒ತ ಮರ್ತ್ಯಾ॑ನಾಮ್ । ಇಯ॑ಖ್ಷಮಾಣಾ॒ ಭೃಗು॑ಭಿ-ಸ್ಸ॒ಜೋಷಾ॒-ಸ್ಸುವ॑ರ್ಯನ್ತು॒ ಯಜ॑ಮಾನಾ-ಸ್ಸ್ವ॒ಸ್ತಿ ॥ ನಕ್ತೋ॒ಷಾಸಾ॒ ಸಮ॑ನಸಾ॒ ವಿರೂ॑ಪೇ ಧಾ॒ಪಯೇ॑ತೇ॒ ಶಿಶು॒ಮೇಕಗ್ಂ॑ ಸಮೀ॒ಚೀ । ದ್ಯಾವಾ॒ ಖ್ಷಾಮಾ॑ ರು॒ಕ್ಮೋ ಅ॒ನ್ತರ್ವಿ ಭಾ॑ತಿ ದೇ॒ವಾ ಅ॒ಗ್ನಿ-ನ್ಧಾ॑ರಯ-ನ್ದ್ರವಿಣೋ॒ದಾಃ ॥ ಅಗ್ನೇ॑ ಸಹಸ್ರಾಖ್ಷ [ಅಗ್ನೇ॑ ಸಹಸ್ರಾಖ್ಷ, ಶ॒ತ॒ಮೂ॒ರ್ಧ॒ಞ್ಛ॒ತ-ನ್ತೇ᳚] 22
ಶತಮೂರ್ಧಞ್ಛ॒ತ-ನ್ತೇ᳚ ಪ್ರಾ॒ಣಾ-ಸ್ಸ॒ಹಸ್ರ॑ಮಪಾ॒ನಾಃ । ತ್ವಗ್ಂ ಸಾ॑ಹ॒ಸ್ರಸ್ಯ॑ ರಾ॒ಯ ಈ॑ಶಿಷೇ॒ ತಸ್ಮೈ॑ ತೇ ವಿಧೇಮ॒ ವಾಜಾ॑ಯ॒ ಸ್ವಾಹಾ᳚ ॥ ಸು॒ಪ॒ರ್ಣೋ॑-ಽಸಿ ಗ॒ರುತ್ಮಾ᳚-ನ್ಪೃಥಿ॒ವ್ಯಾಗ್ಂ ಸೀ॑ದ ಪೃ॒ಷ್ಠೇ ಪೃ॑ಥಿ॒ವ್ಯಾ-ಸ್ಸೀ॑ದ ಭಾ॒ಸಾ-ಽನ್ತರಿ॑ಖ್ಷ॒ಮಾ ಪೃ॑ಣ॒ ಜ್ಯೋತಿ॑ಷಾ॒ ದಿವ॒ಮುತ್ತ॑ಭಾನ॒ ತೇಜ॑ಸಾ॒ ದಿಶ॒ ಉ-ದ್ದೃಗ್ಂ॑ಹ ॥ ಆ॒ಜುಹ್ವಾ॑ನ-ಸ್ಸು॒ಪ್ರತೀ॑ಕಃ ಪು॒ರಸ್ತಾ॒ದಗ್ನೇ॒ ಸ್ವಾಂ-ಯೋಁನಿ॒ಮಾ ಸೀ॑ದ ಸಾ॒ದ್ಧ್ಯಾ । ಅ॒ಸ್ಮಿನ್-ಥ್ಸ॒ಧಸ್ಥೇ॒ ಅದ್ಧ್ಯುತ್ತ॑ರಸ್ಮಿ॒ನ್ ವಿಶ್ವೇ॑ ದೇವಾ॒ [ಅದ್ಧ್ಯುತ್ತ॑ರಸ್ಮಿ॒ನ್ ವಿಶ್ವೇ॑ ದೇವಾಃ, ಯಜ॑ಮಾನಶ್ಚ ಸೀದತ ।] 23
ಯಜ॑ಮಾನಶ್ಚ ಸೀದತ ॥ ಪ್ರೇದ್ಧೋ॑ ಅಗ್ನೇ ದೀದಿಹಿ ಪು॒ರೋ ನೋ-ಽಜ॑ಸ್ರಯಾ ಸೂ॒ರ್ಮ್ಯಾ॑ ಯವಿಷ್ಠ । ತ್ವಾಗ್ಂ ಶಶ್ವ॑ನ್ತ॒ ಉಪ॑ ಯನ್ತಿ॒ ವಾಜಾಃ᳚ ॥ ವಿ॒ಧೇಮ॑ ತೇ ಪರ॒ಮೇ ಜನ್ಮ॑ನ್ನಗ್ನೇ ವಿ॒ಧೇಮ॒ ಸ್ತೋಮೈ॒ರವ॑ರೇ ಸ॒ಧಸ್ಥೇ᳚ । ಯಸ್ಮಾ॒-ದ್ಯೋನೇ॑ರು॒ದಾರಿ॑ಥಾ॒ ಯಜೇ॒ ತ-ಮ್ಪ್ರತ್ವೇ ಹ॒ವೀಗ್ಂಷಿ॑ ಜುಹುರೇ॒ ಸಮಿ॑ದ್ಧೇ ॥ ತಾಗ್ಂ ಸ॑ವಿ॒ತುರ್ವರೇ᳚ಣ್ಯಸ್ಯ ಚಿ॒ತ್ರಾಮಾ-ಽಹಂ-ವೃಁ॑ಣೇ ಸುಮ॒ತಿಂ-ವಿಁ॒ಶ್ವಜ॑ನ್ಯಾಮ್ । ಯಾಮ॑ಸ್ಯ॒ ಕಣ್ವೋ॒ ಅದು॑ಹ॒-ತ್ಪ್ರಪೀ॑ನಾಗ್ಂ ಸ॒ಹಸ್ರ॑ಧಾರಾ॒- [ಸ॒ಹಸ್ರ॑ಧಾರಾಮ್, ಪಯ॑ಸಾ ಮ॒ಹೀ-ಙ್ಗಾಮ್ ।] 24
-ಮ್ಪಯ॑ಸಾ ಮ॒ಹೀ-ಙ್ಗಾಮ್ ॥ ಸ॒ಪ್ತ ತೇ॑ ಅಗ್ನೇ ಸ॒ಮಿಧ॑-ಸ್ಸ॒ಪ್ತ ಜಿ॒ಹ್ವಾ-ಸ್ಸ॒ಪ್ತರ್ಷ॑ಯ-ಸ್ಸ॒ಪ್ತ ಧಾಮ॑ ಪ್ರಿ॒ಯಾಣಿ॑ । ಸ॒ಪ್ತ ಹೋತ್ರಾ᳚-ಸ್ಸಪ್ತ॒ಧಾ ತ್ವಾ॑ ಯಜನ್ತಿ ಸ॒ಪ್ತ ಯೋನೀ॒ರಾ ಪೃ॑ಣಸ್ವಾ ಘೃ॒ತೇನ॑ ॥ ಈ॒ದೃ-ಞ್ಚಾ᳚ನ್ಯಾ॒ದೃ-ಞ್ಚೈ॑ತಾ॒ದೃಞ್ಚ॑ ಪ್ರತಿ॒ದೃ-ಞ್ಚ॑ ಮಿ॒ತಶ್ಚ॒ ಸಮ್ಮಿ॑ತಶ್ಚ॒ ಸಭ॑ರಾಃ ॥ ಶು॒ಕ್ರಜ್ಯೋ॑ತಿಶ್ಚ ಚಿ॒ತ್ರಜ್ಯೋ॑ತಿಶ್ಚ ಸ॒ತ್ಯಜ್ಯೋ॑ತಿಶ್ಚ॒ ಜ್ಯೋತಿ॑ಷ್ಮಾಗ್ಶ್ಚ ಸ॒ತ್ಯಶ್ಚ॑ರ್ತ॒ಪಾಶ್ಚಾತ್ಯಗ್ಂ॑ಹಾಃ । 25
ಋ॒ತ॒ಜಿಚ್ಚ॑ ಸತ್ಯ॒ಜಿಚ್ಚ॑ ಸೇನ॒ಜಿಚ್ಚ॑ ಸು॒ಷೇಣ॒ಶ್ಚಾನ್ತ್ಯ॑ಮಿತ್ರಶ್ಚ ದೂ॒ರೇ ಅ॑ಮಿತ್ರಶ್ಚ ಗ॒ಣಃ ॥ ಋ॒ತಶ್ಚ॑ ಸ॒ತ್ಯಶ್ಚ॑ ಧ್ರು॒ವಶ್ಚ॑ ಧ॒ರುಣ॑ಶ್ಚ ಧ॒ರ್ತಾ ಚ॑ ವಿಧ॒ರ್ತಾ ಚ॑ ವಿಧಾರ॒ಯಃ ॥ ಈ॒ದೃಖ್ಷಾ॑ಸ ಏತಾ॒ದೃಖ್ಷಾ॑ಸ ಊ॒ ಷುಣ॑-ಸ್ಸ॒ದೃಖ್ಷಾ॑ಸಃ॒ ಪ್ರತಿ॑ಸದೃಖ್ಷಾಸ॒ ಏತ॑ನ । ಮಿ॒ತಾಸ॑ಶ್ಚ॒ ಸಮ್ಮಿ॑ತಾಸಶ್ಚ ನ ಊ॒ತಯೇ॒ ಸಭ॑ರಸೋ ಮರುತೋ ಯ॒ಜ್ಞೇ ಅ॒ಸ್ಮಿನ್ನಿನ್ದ್ರ॒-ನ್ದೈವೀ॒ರ್ವಿಶೋ॑ ಮ॒ರುತೋ-ಽನು॑ವರ್ತ್ಮಾನೋ॒ ಯಥೇನ್ದ್ರ॒-ನ್ದೈವೀ॒ರ್ವಿಶೋ॑ ಮ॒ರುತೋ-ಽನು॑ವರ್ತ್ಮಾನ ಏ॒ವಮಿ॒ಮಂ-ಯಁಜ॑ಮಾನ॒-ನ್ದೈವೀ᳚ಶ್ಚ॒ ವಿಶೋ॒ ಮಾನು॑ಷೀ॒ಶ್ಚಾನು॑ವರ್ತ್ಮಾನೋ ಭವನ್ತು ॥ 26 ॥
(ಅ॒ಗಾ॒ಗ್ಂ॒ – ಸ॒ಹ॒ಸ್ರಾ॒ಖ್ಷ॒ – ದೇ॒ವಾಃ॒ – ಸ॒ಹಸ್ರ॑ಧಾರಾ॒ – ಮತ್ಯಗ್ಂ॑ಹಾ॒ – ಅನು॑ವರ್ತ್ಮಾನಃ॒ – ಷೋಡ॑ಶ ಚ) (ಅ. 5)
ಜೀ॒ಮೂತ॑ಸ್ಯೇವ ಭವತಿ॒ ಪ್ರತೀ॑ಕಂ॒-ಯಁದ್ವ॒ರ್ಮೀ ಯಾತಿ॑ ಸ॒ಮದಾ॑ಮು॒ಪಸ್ಥೇ᳚ । ಅನಾ॑ವಿದ್ಧಯಾ ತ॒ನುವಾ॑ ಜಯ॒ ತ್ವಗ್ಂ ಸ ತ್ವಾ॒ ವರ್ಮ॑ಣೋ ಮಹಿ॒ಮಾ ಪಿ॑ಪರ್ತು ॥ ಧನ್ವ॑ನಾ॒ ಗಾ ಧನ್ವ॑ನಾ॒-ಽಽಜಿ-ಞ್ಜ॑ಯೇಮ॒ ಧನ್ವ॑ನಾ ತೀ॒ವ್ರಾ-ಸ್ಸ॒ಮದೋ॑ ಜಯೇಮ । ಧನು॒-ಶ್ಶತ್ರೋ॑ರಪಕಾ॒ಮ-ಙ್ಕೃ॑ಣೋತಿ॒ ಧನ್ವ॑ನಾ॒ ಸರ್ವಾಃ᳚ ಪ್ರ॒ದಿಶೋ॑ ಜಯೇಮ ॥ ವ॒ಖ್ಷ್ಯನ್ತೀ॒ವೇದಾ ಗ॑ನೀಗನ್ತಿ॒ ಕರ್ಣ॑-ಮ್ಪ್ರಿ॒ಯಗ್ಂ ಸಖಾ॑ಯ-ಮ್ಪರಿಷಸ್ವಜಾ॒ನಾ । ಯೋಷೇ॑ವ ಶಿಙ್ಕ್ತೇ॒ ವಿತ॒ತಾ-ಽಧಿ॒ ಧನ್ವ॒- [ಧನ್ವನ್ನ್॑, ಜ್ಯಾ ಇ॒ಯಗ್ಂ] 27
-ಞ್ಜ್ಯಾ ಇ॒ಯಗ್ಂ ಸಮ॑ನೇ ಪಾ॒ರಯ॑ನ್ತೀ ॥ ತೇ ಆ॒ಚರ॑ನ್ತೀ॒ ಸಮ॑ನೇವ॒ ಯೋಷಾ॑ ಮಾ॒ತೇವ॑ ಪು॒ತ್ರ-ಮ್ಬಿ॑ಭೃತಾಮು॒ಪಸ್ಥೇ᳚ । ಅಪ॒ ಶತ್ರೂನ್॑ ವಿದ್ಧ್ಯತಾಗ್ಂ ಸಂವಿಁದಾ॒ನೇ ಆರ್ತ್ನೀ॑ ಇ॒ಮೇ ವಿ॑ಷ್ಫು॒ರನ್ತೀ॑ ಅ॒ಮಿತ್ರಾನ್॑ ॥ ಬ॒ಹ್ವೀ॒ನಾ-ಮ್ಪಿ॒ತಾ ಬ॒ಹುರ॑ಸ್ಯ ಪು॒ತ್ರಶ್ಚಿ॒ಶ್ಚಾ ಕೃ॑ಣೋತಿ॒ ಸಮ॑ನಾ-ಽವ॒ಗತ್ಯ॑ । ಇ॒ಷು॒ಧಿ-ಸ್ಸಙ್ಕಾಃ॒ ಪೃತ॑ನಾಶ್ಚ॒ ಸರ್ವಾಃ᳚ ಪೃ॒ಷ್ಠೇ ನಿನ॑ದ್ಧೋ ಜಯತಿ॒ ಪ್ರಸೂ॑ತಃ ॥ ರಥೇ॒ ತಿಷ್ಠ॑-ನ್ನಯತಿ ವಾ॒ಜಿನಃ॑ ಪು॒ರೋ ಯತ್ರ॑ಯತ್ರ ಕಾ॒ಮಯ॑ತೇ ಸುಷಾರ॒ಥಿಃ । ಅ॒ಭೀಶೂ॑ನಾ-ಮ್ಮಹಿ॒ಮಾನ॑- [ಮಹಿ॒ಮಾನ᳚ಮ್, ಪ॒ನಾ॒ಯ॒ತ॒ ಮನಃ॑] 28
-ಮ್ಪನಾಯತ॒ ಮನಃ॑ ಪ॒ಶ್ಚಾದನು॑ ಯಚ್ಛನ್ತಿ ರ॒ಶ್ಮಯಃ॑ ॥ ತೀ॒ವ್ರಾ-ನ್ಘೋಷಾ᳚ನ್ ಕೃಣ್ವತೇ॒ ವೃಷ॑ಪಾಣ॒ಯೋ-ಽಶ್ವಾ॒ ರಥೇ॑ಭಿ-ಸ್ಸ॒ಹ ವಾ॒ಜಯ॑ನ್ತಃ । ಅ॒ವ॒ಕ್ರಾಮ॑ನ್ತಃ॒ ಪ್ರಪ॑ದೈರ॒ಮಿತ್ರಾ᳚ನ್ ಖ್ಷಿ॒ಣನ್ತಿ॒ ಶತ್ರೂ॒ಗ್ಂ॒ರನ॑ಪವ್ಯಯನ್ತಃ ॥ ರ॒ಥ॒ವಾಹ॑ನಗ್ಂ ಹ॒ವಿರ॑ಸ್ಯ॒ ನಾಮ॒ ಯತ್ರಾ-ಽಽಯು॑ಧ॒-ನ್ನಿಹಿ॑ತಮಸ್ಯ॒ ವರ್ಮ॑ । ತತ್ರಾ॒ ರಥ॒ಮುಪ॑ ಶ॒ಗ್ಮಗ್ಂ ಸ॑ದೇಮ ವಿ॒ಶ್ವಾಹಾ॑ ವ॒ಯಗ್ಂ ಸು॑ಮನ॒ಸ್ಯಮಾ॑ನಾಃ ॥ ಸ್ವಾ॒ದು॒ಷ॒ಗ್ಂ॒ ಸದಃ॑ ಪಿ॒ತರೋ॑ ವಯೋ॒ಧಾಃ ಕೃ॑ಚ್ಛ್ರೇ॒ಶ್ರಿತ॒-ಶ್ಶಕ್ತೀ॑ವನ್ತೋ ಗಭೀ॒ರಾಃ । ಚಿ॒ತ್ರಸೇ॑ನಾ॒ ಇಷು॑ಬಲಾ॒ ಅಮೃ॑ದ್ಧ್ರಾ-ಸ್ಸ॒ತೋವೀ॑ರಾ ಉ॒ರವೋ᳚ ವ್ರಾತಸಾ॒ಹಾಃ ॥ ಬ್ರಾಹ್ಮ॑ಣಾಸಃ॒ [ಬ್ರಾಹ್ಮ॑ಣಾಸಃ, ಪಿತ॑ರ॒-] 29
ಪಿತ॑ರ॒-ಸ್ಸೋಮ್ಯಾ॑ಸ-ಶ್ಶಿ॒ವೇ ನೋ॒ ದ್ಯಾವಾ॑ಪೃಥಿ॒ವೀ ಅ॑ನೇ॒ಹಸಾ᳚ । ಪೂ॒ಷಾ ನಃ॑ ಪಾತು ದುರಿ॒ತಾದೃ॑ತಾವೃಧೋ॒ ರಖ್ಷಾ॒ ಮಾಕಿ॑ರ್ನೋ ಅ॒ಘಶಗ್ಂ॑ಸ ಈಶತ ॥ ಸು॒ಪ॒ರ್ಣಂ-ವಁ॑ಸ್ತೇ ಮೃ॒ಗೋ ಅ॑ಸ್ಯಾ॒ ದನ್ತೋ॒ ಗೋಭಿ॒-ಸ್ಸನ್ನ॑ದ್ಧಾ ಪತತಿ॒ ಪ್ರಸೂ॑ತಾ । ಯತ್ರಾ॒ ನರ॒-ಸ್ಸ-ಞ್ಚ॒ ವಿ ಚ॒ ದ್ರವ॑ನ್ತಿ॒ ತತ್ರಾ॒ಸ್ಮಭ್ಯ॒ಮಿಷ॑ವ॒-ಶ್ಶರ್ಮ॑ ಯಗ್ಂಸನ್ನ್ ॥ ಋಜೀ॑ತೇ॒ ಪರಿ॑ ವೃಙ್ಗ್ಧಿ॒ ನೋ-ಽಶ್ಮಾ॑ ಭವತು ನಸ್ತ॒ನೂಃ । ಸೋಮೋ॒ ಅಧಿ॑ ಬ್ರವೀತು॒ ನೋ-ಽದಿ॑ತಿ॒- [ನೋ-ಽದಿ॑ತಿಃ, ಶರ್ಮ॑ ಯಚ್ಛತು ।] 30
-ಶ್ಶರ್ಮ॑ ಯಚ್ಛತು ॥ ಆ ಜ॑ಙ್ಘನ್ತಿ॒ ಸಾನ್ವೇ॑ಷಾ-ಞ್ಜ॒ಘನಾ॒ಗ್ಂ॒ ಉಪ॑ ಜಿಘ್ನತೇ । ಅಶ್ವಾ॑ಜನಿ॒ ಪ್ರಚೇ॑ತ॒ಸೋ-ಽಶ್ವಾ᳚ನ್-ಥ್ಸ॒ಮಥ್ಸು॑ ಚೋದಯ ॥ ಅಹಿ॑ರಿವ ಭೋ॒ಗೈಃ ಪರ್ಯೇ॑ತಿ ಬಾ॒ಹು-ಞ್ಜ್ಯಾಯಾ॑ ಹೇ॒ತಿ-ಮ್ಪ॑ರಿ॒ಬಾಧ॑ಮಾನಃ । ಹ॒ಸ್ತ॒ಘ್ನೋ ವಿಶ್ವಾ॑ ವ॒ಯುನಾ॑ನಿ ವಿ॒ದ್ವಾ-ನ್ಪುಮಾ॒-ನ್ಪುಮಾಗ್ಂ॑ಸ॒-ಮ್ಪರಿ॑ ಪಾತು ವಿ॒ಶ್ವತಃ॑ ॥ ವನ॑ಸ್ಪತೇ ವೀ॒ಡ್ವ॑ಙ್ಗೋ॒ ಹಿ ಭೂ॒ಯಾ ಅ॒ಸ್ಮ-ಥ್ಸ॑ಖಾ ಪ್ರ॒ತರ॑ಣ-ಸ್ಸು॒ವೀರಃ॑ । ಗೋಭಿ॒-ಸ್ಸನ್ನ॑ದ್ಧೋ ಅಸಿ ವೀ॒ಡಯ॑ಸ್ವಾ-ಽಽಸ್ಥಾ॒ತಾ ತೇ॑ ಜಯತು॒ ಜೇತ್ವಾ॑ನಿ ॥ ದಿ॒ವಃ ಪೃ॑ಥಿ॒ವ್ಯಾಃ ಪ- [ಪರಿ॑, ಓಜ॒ ಉ-ದ್ಭೃ॑ತಂ॒-] 31
-ರ್ಯೋಜ॒ ಉ-ದ್ಭೃ॑ತಂ॒-ವಁನ॒ಸ್ಪತಿ॑ಭ್ಯಃ॒ ಪರ್ಯಾಭೃ॑ತ॒ಗ್ಂ॒ ಸಹಃ॑ । ಅ॒ಪಾಮೋ॒ಜ್ಮಾನ॒-ಮ್ಪರಿ॒ ಗೋಭಿ॒ರಾವೃ॑ತ॒ಮಿನ್ದ್ರ॑ಸ್ಯ॒ ವಜ್ರಗ್ಂ॑ ಹ॒ವಿಷಾ॒ ರಥಂ॑-ಯಁಜ ॥ ಇನ್ದ್ರ॑ಸ್ಯ॒ ವಜ್ರೋ॑ ಮ॒ರುತಾ॒ಮನೀ॑ಕ-ಮ್ಮಿ॒ತ್ರಸ್ಯ॒ ಗರ್ಭೋ॒ ವರು॑ಣಸ್ಯ॒ ನಾಭಿಃ॑ । ಸೇಮಾ-ನ್ನೋ॑ ಹ॒ವ್ಯದಾ॑ತಿ-ಞ್ಜುಷಾ॒ಣೋ ದೇವ॑ ರಥ॒ ಪ್ರತಿ॑ ಹ॒ವ್ಯಾ ಗೃ॑ಭಾಯ ॥ ಉಪ॑ ಶ್ವಾಸಯ ಪೃಥಿ॒ವೀಮು॒ತ ದ್ಯಾ-ಮ್ಪು॑ರು॒ತ್ರಾ ತೇ॑ ಮನುತಾಂ॒-ವಿಁಷ್ಠಿ॑ತ॒-ಞ್ಜಗ॑ತ್ । ಸ ದು॑ನ್ದುಭೇ ಸ॒ಜೂರಿನ್ದ್ರೇ॑ಣ ದೇ॒ವೈರ್ದೂ॒ರಾ- [ದೇ॒ವೈರ್ದೂ॒ರಾತ್, ದವೀ॑ಯೋ॒] 32
-ದ್ದವೀ॑ಯೋ॒ ಅಪ॑ಸೇಧ॒ ಶತ್ರೂನ್॑ ॥ ಆ ಕ್ರ॑ನ್ದಯ॒ ಬಲ॒ಮೋಜೋ॑ ನ॒ ಆ ಧಾ॒ ನಿಷ್ಟ॑ನಿಹಿ ದುರಿ॒ತಾ ಬಾಧ॑ಮಾನಃ । ಅಪ॑ ಪ್ರೋಥ ದುನ್ದುಭೇ ದು॒ಚ್ಛುನಾಗ್ಂ॑ ಇ॒ತ ಇನ್ದ್ರ॑ಸ್ಯ ಮು॒ಷ್ಟಿರ॑ಸಿ ವೀ॒ಡಯ॑ಸ್ವ ॥ ಆ-ಽಮೂರ॑ಜ ಪ್ರ॒ತ್ಯಾವ॑ರ್ತಯೇ॒ಮಾಃ ಕೇ॑ತು॒ಮ-ದ್ದು॑ನ್ದು॒ಭಿ ರ್ವಾ॑ವದೀತಿ । ಸಮಶ್ವ॑ಪರ್ಣಾ॒ಶ್ಚರ॑ನ್ತಿ ನೋ॒ ನರೋ॒-ಽಸ್ಮಾಕ॑ಮಿನ್ದ್ರ ರ॒ಥಿನೋ॑ ಜಯನ್ತು ॥ 33 ॥
(ಧನ್ವ॑ನ್ – ಮಹಿ॒ಮಾನಂ॒ – ಬ್ರಾಹ್ಮ॑ಣಾ॒ಸೋ – ಽದಿ॑ತಿಃ – ಪೃಥಿ॒ವ್ಯಾಃ ಪರಿ॑ – ದೂ॒ರಾ – ದೇಕ॑ಚತ್ವಾರಿಗ್ಂಶಚ್ಚ) (ಅ. 6)
ಯದಕ್ರ॑ನ್ದಃ ಪ್ರಥ॒ಮ-ಞ್ಜಾಯ॑ಮಾನ ಉ॒ದ್ಯನ್-ಥ್ಸ॑ಮು॒ದ್ರಾದು॒ತ ವಾ॒ ಪುರೀ॑ಷಾತ್ । ಶ್ಯೇ॒ನಸ್ಯ॑ ಪ॒ಖ್ಷಾ ಹ॑ರಿ॒ಣಸ್ಯ॑ ಬಾ॒ಹೂ ಉ॑ಪ॒ಸ್ತುತ್ಯ॒-ಮ್ಮಹಿ॑ ಜಾ॒ತ-ನ್ತೇ॑ ಅರ್ವನ್ನ್ ॥ ಯ॒ಮೇನ॑ ದ॒ತ್ತ-ನ್ತ್ರಿ॒ತ ಏ॑ನಮಾಯುನ॒ಗಿನ್ದ್ರ॑ ಏಣ-ಮ್ಪ್ರಥ॒ಮೋ ಅದ್ಧ್ಯ॑ತಿಷ್ಠತ್ । ಗ॒ನ್ಧ॒ರ್ವೋ ಅ॑ಸ್ಯ ರಶ॒ನಾಮ॑-ಗೃಭ್ಣಾ॒-ಥ್ಸೂರಾ॒ದಶ್ವಂ॑-ವಁಸವೋ॒ ನಿರ॑ತಷ್ಟ ॥ ಅಸಿ॑ ಯ॒ಮೋ ಅಸ್ಯಾ॑ದಿ॒ತ್ಯೋ ಅ॑ರ್ವ॒ನ್ನಸಿ॑ ತ್ರಿ॒ತೋ ಗುಹ್ಯೇ॑ನ ವ್ರ॒ತೇನ॑ । ಅಸಿ॒ ಸೋಮೇ॑ನ ಸ॒ಮಯಾ॒ ವಿಪೃ॑ಕ್ತ [ವಿಪೃ॑ಕ್ತಃ, ಆ॒ಹುಸ್ತೇ॒ ತ್ರೀಣಿ॑ ದಿ॒ವಿ ಬನ್ಧ॑ನಾನಿ ।] 34
ಆ॒ಹುಸ್ತೇ॒ ತ್ರೀಣಿ॑ ದಿ॒ವಿ ಬನ್ಧ॑ನಾನಿ ॥ ತ್ರೀಣಿ॑ ತ ಆಹುರ್ದಿ॒ವಿ ಬನ್ಧ॑ನಾನಿ॒ ತ್ರೀಣ್ಯ॒ಫ್ಸು ತ್ರೀಣ್ಯ॒ನ್ತ-ಸ್ಸ॑ಮು॒ದ್ರೇ । ಉ॒ತೇವ॑ ಮೇ॒ ವರು॑ಣಶ್ಛನ್-ಥ್ಸ್ಯರ್ವ॒ನ್॒. ಯತ್ರಾ॑ ತ ಆ॒ಹುಃ ಪ॑ರ॒ಮ-ಞ್ಜ॒ನಿತ್ರ᳚ಮ್ ॥ ಇ॒ಮಾ ತೇ॑ ವಾಜಿನ್ನವ॒ಮಾರ್ಜ॑ನಾನೀ॒ಮಾ ಶ॒ಫಾನಾಗ್ಂ॑ ಸನಿ॒ತುರ್ನಿ॒ಧಾನಾ᳚ । ಅತ್ರಾ॑ ತೇ ಭ॒ದ್ರಾ ರ॑ಶ॒ನಾ ಅ॑ಪಶ್ಯಮೃ॒ತಸ್ಯ॒ ಯಾ ಅ॑ಭಿ॒ರಖ್ಷ॑ನ್ತಿ ಗೋ॒ಪಾಃ ॥ ಆ॒ತ್ಮಾನ॑-ನ್ತೇ॒ ಮನ॑ಸಾ॒-ಽಽರಾದ॑ಜಾನಾಮ॒ವೋ ದಿ॒ವಾ [ ] 35
ಪ॒ತಯ॑ನ್ತ-ಮ್ಪತ॒ಙ್ಗಮ್ । ಶಿರೋ॑ ಅಪಶ್ಯ-ಮ್ಪ॒ಥಿಭಿ॑-ಸ್ಸು॒ಗೇಭಿ॑ರರೇ॒ಣುಭಿ॒ರ್ಜೇಹ॑ಮಾನ-ಮ್ಪತ॒ತ್ರಿ ॥ ಅತ್ರಾ॑ ತೇ ರೂ॒ಪಮು॑ತ್ತ॒ಮಮ॑ಪಶ್ಯ॒-ಞ್ಜಿಗೀ॑ಷಮಾಣಮಿ॒ಷ ಆ ಪ॒ದೇ ಗೋಃ । ಯ॒ದಾ ತೇ॒ ಮರ್ತೋ॒ ಅನು॒ ಭೋಗ॒ಮಾನ॒ಡಾದಿ-ದ್ಗ್ರಸಿ॑ಷ್ಠ॒ ಓಷ॑ಧೀರಜೀಗಃ ॥ ಅನು॑ ತ್ವಾ॒ ರಥೋ॒ ಅನು॒ ಮರ್ಯೋ॑ ಅರ್ವ॒ನ್ನನು॒ ಗಾವೋ-ಽನು॒ ಭಗಃ॑ ಕ॒ನೀನಾ᳚ಮ್ । ಅನು॒ ವ್ರಾತಾ॑ಸ॒ಸ್ತವ॑ ಸ॒ಖ್ಯಮೀ॑ಯು॒ರನು॑ ದೇ॒ವಾ ಮ॑ಮಿರೇ ವೀ॒ರ್ಯ॑- [ವೀ॒ರ್ಯ᳚ಮ್, ತೇ ।] 36
-ನ್ತೇ ॥ ಹಿರ॑ಣ್ಯಶೃ॒ಙ್ಗೋ-ಽಯೋ॑ ಅಸ್ಯ॒ ಪಾದಾ॒ ಮನೋ॑ಜವಾ॒ ಅವ॑ರ॒ ಇನ್ದ್ರ॑ ಆಸೀತ್ । ದೇ॒ವಾ ಇದ॑ಸ್ಯ ಹವಿ॒ರದ್ಯ॑ಮಾಯ॒ನ್॒. ಯೋ ಅರ್ವ॑ನ್ತ-ಮ್ಪ್ರಥ॒ಮೋ ಅ॒ದ್ಧ್ಯತಿ॑ಷ್ಠತ್ ॥ ಈ॒ರ್ಮಾನ್ತಾ॑ಸ॒-ಸ್ಸಿಲಿ॑ಕಮದ್ಧ್ಯಮಾಸ॒-ಸ್ಸಗ್ಂ ಶೂರ॑ಣಾಸೋ ದಿ॒ವ್ಯಾಸೋ॒ ಅತ್ಯಾಃ᳚ । ಹ॒ಗ್ಂ॒ಸಾ ಇ॑ವ ಶ್ರೇಣಿ॒ಶೋ ಯ॑ತನ್ತೇ॒ ಯದಾಖ್ಷಿ॑ಷುರ್ದಿ॒ವ್ಯ-ಮಜ್ಮ॒ಮಶ್ವಾಃ᳚ ॥ ತವ॒ ಶರೀ॑ರ-ಮ್ಪತಯಿ॒ಷ್ಣ್ವ॑ರ್ವ॒-ನ್ತವ॑ ಚಿ॒ತ್ತಂ-ವಾಁತ॑ ಇವ॒ ಧ್ರಜೀ॑ಮಾನ್ । ತವ॒ ಶೃಙ್ಗಾ॑ಣಿ॒ ವಿಷ್ಠಿ॑ತಾ ಪುರು॒ತ್ರಾ-ಽರ॑ಣ್ಯೇಷು॒ ಜರ್ಭು॑ರಾಣಾ ಚರನ್ತಿ ॥ ಉಪ॒ [ಉಪ॑, ಪ್ರಾಗಾ॒ಚ್ಛಸ॑ನಂ-] 37
ಪ್ರಾಗಾ॒ಚ್ಛಸ॑ನಂ-ವಾಁ॒ಜ್ಯರ್ವಾ॑ ದೇವ॒ದ್ರೀಚಾ॒ ಮನ॑ಸಾ॒ ದೀದ್ಧ್ಯಾ॑ನಃ । ಅ॒ಜಃ ಪು॒ರೋ ನೀ॑ಯತೇ॒ ನಾಭಿ॑ರ॒ಸ್ಯಾನು॑ ಪ॒ಶ್ಚಾ-ತ್ಕ॒ವಯೋ॑ ಯನ್ತಿ ರೇ॒ಭಾಃ ॥ ಉಪ॒ ಪ್ರಾಗಾ᳚-ತ್ಪರ॒ಮಂ-ಯಁ-ಥ್ಸ॒ಧಸ್ಥ॒ಮರ್ವಾ॒ಗ್ಂ॒ ಅಚ್ಛಾ॑ ಪಿ॒ತರ॑-ಮ್ಮಾ॒ತರ॑-ಞ್ಚ । ಅ॒ದ್ಯಾ ದೇ॒ವಾನ್ ಜುಷ್ಟ॑ತಮೋ॒ ಹಿ ಗ॒ಮ್ಯಾ ಅಥಾ-ಽಽಶಾ᳚ಸ್ತೇ ದಾ॒ಶುಷೇ॒ ವಾರ್ಯಾ॑ಣಿ ॥ 38 ॥
(ವಿಪೃ॑ಕ್ತೋ – ದಿ॒ವಾ – ವೀ॒ರ್ಯ॑ – ಮುಪೈ – ಕಾ॒ನ್ನಚ॑ತ್ವಾರಿ॒ಗ್ಂ॒ಶಚ್ಚ॑) (ಅ. 7)
ಮಾ ನೋ॑ ಮಿ॒ತ್ರೋ ವರು॑ಣೋ ಅರ್ಯ॒ಮಾ-ಽಽಯುರಿನ್ದ್ರ॑ ಋಭು॒ಖ್ಷಾ ಮ॒ರುತಃ॒ ಪರಿ॑ ಖ್ಯನ್ನ್ । ಯ-ದ್ವಾ॒ಜಿನೋ॑ ದೇ॒ವಜಾ॑ತಸ್ಯ॒ ಸಪ್ತೇಃ᳚ ಪ್ರವ॒ಖ್ಷ್ಯಾಮೋ॑ ವಿ॒ದಥೇ॑ ವೀ॒ರ್ಯಾ॑ಣಿ ॥ ಯನ್ನಿ॒ರ್ಣಿಜಾ॒ ರೇಕ್ಣ॑ಸಾ॒ ಪ್ರಾವೃ॑ತಸ್ಯ ರಾ॒ತಿ-ಙ್ಗೃ॑ಭೀ॒ತಾ-ಮ್ಮು॑ಖ॒ತೋ ನಯ॑ನ್ತಿ । ಸುಪ್ರಾ॑ಙ॒ಜೋ ಮೇಮ್ಯ॑-ದ್ವಿ॒ಶ್ವರೂ॑ಪ ಇನ್ದ್ರಾಪೂ॒ಷ್ಣೋಃ ಪ್ರಿ॒ಯಮಪ್ಯೇ॑ತಿ॒ ಪಾಥಃ॑ ॥ ಏ॒ಷ ಚ್ಛಾಗಃ॑ ಪು॒ರೋ ಅಶ್ವೇ॑ನ ವಾ॒ಜಿನಾ॑ ಪೂ॒ಷ್ಣೋ ಭಾ॒ಗೋ ನೀ॑ಯತೇ ವಿ॒ಶ್ವದೇ᳚ವ್ಯಃ । ಅ॒ಭಿ॒ಪ್ರಿಯಂ॒-ಯಁ-ತ್ಪು॑ರೋ॒ಡಾಶ॒ಮರ್ವ॑ತಾ॒ ತ್ವಷ್ಟೇ- [ತ್ವಷ್ಟೇತ್, ಏ॒ನ॒ಗ್ಂ॒ ಸೌ॒ಶ್ರ॒ವ॒ಸಾಯ॑ ಜಿನ್ವತಿ ।] 39
-ದೇ॑ನಗ್ಂ ಸೌಶ್ರವ॒ಸಾಯ॑ ಜಿನ್ವತಿ ॥ ಯದ್ಧ॒ವಿಷ್ಯ॑ಮೃತು॒ಶೋ ದೇ॑ವ॒ಯಾನ॒-ನ್ತ್ರಿರ್ಮಾನು॑ಷಾಃ॒ ಪರ್ಯಶ್ವ॒-ನ್ನಯ॑ನ್ತಿ । ಅತ್ರಾ॑ ಪೂ॒ಷ್ಣಃ ಪ್ರ॑ಥ॒ಮೋ ಭಾ॒ಗ ಏ॑ತಿ ಯ॒ಜ್ಞ-ನ್ದೇ॒ವೇಭ್ಯಃ॑ ಪ್ರತಿವೇ॒ದಯ॑ನ್ನ॒ಜಃ ॥ ಹೋತಾ᳚-ಽದ್ಧ್ವ॒ರ್ಯುರಾವ॑ಯಾ ಅಗ್ನಿಮಿ॒ನ್ಧೋ ಗ್ರಾ॑ವಗ್ರಾ॒ಭ ಉ॒ತ ಶಗ್ಗ್ಸ್ತಾ॒ ಸುವಿ॑ಪ್ರಃ । ತೇನ॑ ಯ॒ಜ್ಞೇನ॒ ಸ್ವ॑ರಙ್ಕೃತೇನ॒ ಸ್ವಿ॑ಷ್ಟೇನ ವ॒ಖ್ಷಣಾ॒ ಆ ಪೃ॑ಣದ್ಧ್ವಮ್ ॥ ಯೂ॒ಪ॒ವ್ರ॒ಸ್ಕಾ ಉ॒ತ ಯೇ ಯೂ॑ಪವಾ॒ಹಾಶ್ಚ॒ಷಾಲಂ॒-ಯೇಁ ಅ॑ಶ್ವಯೂ॒ಪಾಯ॒ ತಖ್ಷ॑ತಿ । ಯೇ ಚಾರ್ವ॑ತೇ॒ ಪಚ॑ನಗ್ಂ ಸ॒ಭಂರ॑ನ್ತ್ಯು॒ತೋ [ ] 40
ತೇಷಾ॑-ಮ॒ಭಿಗೂ᳚ರ್ತಿರ್ನ ಇನ್ವತು ॥ ಉಪ॒ ಪ್ರಾಗಾ᳚-ಥ್ಸು॒ಮನ್ಮೇ॑-ಽಧಾಯಿ॒ ಮನ್ಮ॑ ದೇ॒ವಾನಾ॒ಮಾಶಾ॒ ಉಪ॑ ವೀ॒ತಪೃ॑ಷ್ಠಃ । ಅನ್ವೇ॑ನಂ॒-ವಿಁಪ್ರಾ॒ ಋಷ॑ಯೋ ಮದನ್ತಿ ದೇ॒ವಾನಾ᳚-ಮ್ಪು॒ಷ್ಟೇ ಚ॑ಕೃಮಾ ಸು॒ಬನ್ಧು᳚ಮ್ ॥ ಯ-ದ್ವಾ॒ಜಿನೋ॒ ದಾಮ॑ ಸ॒ದಾನ್ನ॒ಮರ್ವ॑ತೋ॒ ಯಾ ಶೀ॑ರ್ಷ॒ಣ್ಯಾ॑ ರಶ॒ನಾ ರಜ್ಜು॑ರಸ್ಯ । ಯದ್ವಾ॑ ಘಾಸ್ಯ॒ ಪ್ರಭೃ॑ತಮಾ॒ಸ್ಯೇ॑ ತೃಣ॒ಗ್ಂ॒ ಸರ್ವಾ॒ ತಾ ತೇ॒ ಅಪಿ॑ ದೇ॒ವೇಷ್ವ॑ಸ್ತು ॥ ಯದಶ್ವ॑ಸ್ಯ ಕ್ರ॒ವಿಷೋ॒ [ಯದಶ್ವ॑ಸ್ಯ ಕ್ರ॒ವಿಷಃ॑, ಮಖ್ಷಿ॒ಕಾ-ಽಽಶ॒] 41
ಮಖ್ಷಿ॒ಕಾ-ಽಽಶ॒ ಯದ್ವಾ॒ ಸ್ವರೌ॒ ಸ್ವಧಿ॑ತೌ ರಿ॒ಪ್ತಮಸ್ತಿ॑ । ಯದ್ಧಸ್ತ॑ಯೋ-ಶ್ಶಮಿ॒ತುರ್ಯನ್ನ॒ಖೇಷು॒ ಸರ್ವಾ॒ ತಾ ತೇ॒ ಅಪಿ॑ ದೇ॒ವೇಷ್ವ॑ಸ್ತು ॥ ಯದೂವ॑ದ್ಧ್ಯಮು॒ದರ॑ಸ್ಯಾಪ॒ವಾತಿ॒ ಯ ಆ॒ಮಸ್ಯ॑ ಕ್ರ॒ವಿಷೋ॑ ಗ॒ನ್ಧೋ ಅಸ್ತಿ॑ । ಸು॒ಕೃ॒ತಾ ತಚ್ಛ॑ಮಿ॒ತಾರಃ॑ ಕೃಣ್ವನ್ತೂ॒ತ ಮೇಧಗ್ಂ॑ ಶೃತ॒ಪಾಕ॑-ಮ್ಪಚನ್ತು ॥ ಯ-ತ್ತೇ॒ ಗಾತ್ರಾ॑ದ॒ಗ್ನಿನಾ॑ ಪ॒ಚ್ಯಮಾ॑ನಾದ॒ಭಿ ಶೂಲ॒-ನ್ನಿಹ॑ತಸ್ಯಾವ॒ಧಾವ॑ತಿ । ಮಾ ತ-ದ್ಭೂಮ್ಯಾ॒ಮಾ ಶ್ರಿ॑ಷ॒ ( )-ನ್ಮಾ ತೃಣೇ॑ಷು ದೇ॒ವೇಭ್ಯ॒ಸ್ತದು॒ಶದ್ಭ್ಯೋ॑ ರಾ॒ತಮ॑ಸ್ತು ॥ 42 ॥
(ಇ – ದು॒ತೋ – ಕ್ರ॒ವಿಷಃ॑ – ಶ್ರಿಷಥ್ – ಸ॒ಪ್ತ ಚ॑) (ಅ. 8)
ಯೇ ವಾ॒ಜಿನ॑-ಮ್ಪರಿ॒ಪಶ್ಯ॑ನ್ತಿ ಪ॒ಕ್ವಂ-ಯಁ ಈ॑ಮಾ॒ಹು-ಸ್ಸು॑ರ॒ಭಿರ್ನಿರ್ಹ॒ರೇತಿ॑ । ಯೇ ಚಾರ್ವ॑ತೋ ಮಾಗ್ಂಸಭಿ॒ಖ್ಷಾಮು॒ಪಾಸ॑ತ ಉ॒ತೋ ತೇಷಾ॑ಮ॒ಭಿಗೂ᳚ರ್ತಿರ್ನ ಇನ್ವತು ॥ ಯನ್ನೀಖ್ಷ॑ಣ-ಮ್ಮಾ॒ಗ್॒ಸ್ಪಚ॑ನ್ಯಾ ಉ॒ಖಾಯಾ॒ ಯಾ ಪಾತ್ರಾ॑ಣಿ ಯೂ॒ಷ್ಣ ಆ॒ಸೇಚ॑ನಾನಿ । ಊ॒ಷ್ಮ॒ಣ್ಯಾ॑-ಽಪಿ॒ಧಾನಾ॑ ಚರೂ॒ಣಾಮ॒ಙ್ಕಾ-ಸ್ಸೂ॒ನಾಃ ಪರಿ॑ ಭೂಷ॒ನ್ತ್ಯಶ್ವ᳚ಮ್ ॥ ನಿ॒ಕ್ರಮ॑ಣ-ನ್ನಿ॒ಷದ॑ನಂ-ವಿಁ॒ವರ್ತ॑ನಂ॒-ಯಁಚ್ಚ॒ ಪಡ್ಬೀ॑ಶ॒ಮರ್ವ॑ತಃ । ಯಚ್ಚ॑ ಪ॒ಪೌ ಯಚ್ಚ॑ ಘಾ॒ಸಿ- [ಘಾ॒ಸಿಮ್, ಜ॒ಘಾಸ॒ ಸರ್ವಾ॒ ತಾ] 43
-ಞ್ಜ॒ಘಾಸ॒ ಸರ್ವಾ॒ ತಾ ತೇ॒ ಅಪಿ॑ ದೇ॒ವೇಷ್ವ॑ಸ್ತು ॥ ಮಾ ತ್ವಾ॒-ಽಗ್ನಿ-ರ್ಧ್ವ॑ನಯಿ-ದ್ಧೂ॒ಮಗ॑ನ್ಧಿ॒ರ್ಮೋಖಾ ಭ್ರಾಜ॑ನ್ತ್ಯ॒ಭಿ ವಿ॑ಕ್ತ॒ ಜಘ್ರಿಃ॑ । ಇ॒ಷ್ಟಂ-ವೀಁ॒ತಮ॒ಭಿಗೂ᳚ರ್ತಂ॒-ವಁಷ॑ಟ್ಕೃತ॒-ನ್ತ-ನ್ದೇ॒ವಾಸಃ॒ ಪ್ರತಿ॑ ಗೃಭ್ಣ॒ನ್ತ್ಯಶ್ವ᳚ಮ್ ॥ ಯದಶ್ವಾ॑ಯ॒ ವಾಸ॑ ಉಪಸ್ತೃ॒ಣನ್ತ್ಯ॑ಧೀವಾ॒ಸಂ-ಯಾಁ ಹಿರ॑ಣ್ಯಾನ್ಯಸ್ಮೈ । ಸ॒ನ್ದಾನ॒ಮರ್ವ॑ನ್ತ॒-ಮ್ಪಡ್ಬೀ॑ಶ-ಮ್ಪ್ರಿ॒ಯಾ ದೇ॒ವೇಷ್ವಾ ಯಾ॑ಮಯನ್ತಿ ॥ ಯ-ತ್ತೇ॑ ಸಾ॒ದೇ ಮಹ॑ಸಾ॒ ಶೂಕೃ॑ತಸ್ಯ॒ ಪಾರ್ಷ್ಣಿ॑ಯಾ ವಾ॒ ಕಶ॑ಯಾ [ವಾ॒ ಕಶ॑ಯಾ, ವಾ॒ ತು॒ತೋದ॑ ।] 44
ವಾ ತು॒ತೋದ॑ । ಸ್ರು॒ಚೇವ॒ ತಾ ಹ॒ವಿಷೋ॑ ಅದ್ಧ್ವ॒ರೇಷು॒ ಸರ್ವಾ॒ ತಾ ತೇ॒ ಬ್ರಹ್ಮ॑ಣಾ ಸೂದಯಾಮಿ ॥ ಚತು॑ಸ್ತ್ರಿಗ್ಂಶ-ದ್ವಾ॒ಜಿನೋ॑ ದೇ॒ವಬ॑ನ್ಧೋ॒-ರ್ವಙ್ಕ್ರೀ॒-ರಶ್ವ॑ಸ್ಯ॒ ಸ್ವಧಿ॑ತಿ॒-ಸ್ಸಮೇ॑ತಿ । ಅಚ್ಛಿ॑ದ್ರಾ॒ ಗಾತ್ರಾ॑ ವ॒ಯುನಾ॑ ಕೃಣೋತ॒ ಪರು॑ಷ್ಪರುರನು॒ಘುಷ್ಯಾ॒ ವಿ ಶ॑ಸ್ತ ॥ ಏಕ॒ಸ್ತ್ವಷ್ಟು॒ರಶ್ವ॑ಸ್ಯಾ ವಿಶ॒ಸ್ತಾ ದ್ವಾ ಯ॒ನ್ತಾರಾ॑ ಭವತ॒ಸ್ತಥ॒ರ್ತುಃ । ಯಾ ತೇ॒ ಗಾತ್ರಾ॑ಣಾಮೃತು॒ಥಾ ಕೃ॒ಣೋಮಿ॒ ತಾತಾ॒ ಪಿಣ್ಡಾ॑ನಾ॒-ಮ್ಪ್ರ ಜು॑ಹೋಮ್ಯ॒ಗ್ನೌ ॥ ಮಾ ತ್ವಾ॑ ತಪ- [ತಪತ್, ಪ್ರಿ॒ಯ ಆ॒ತ್ಮಾ-] 45
-ತ್ಪ್ರಿ॒ಯ ಆ॒ತ್ಮಾ-ಽಪಿ॒ಯನ್ತ॒-ಮ್ಮಾ ಸ್ವಧಿ॑ತಿಸ್ತ॒ನುವ॒ ಆ ತಿ॑ಷ್ಠಿಪ-ತ್ತೇ । ಮಾ ತೇ॑ ಗೃ॒ದ್ಧ್ನು-ರ॑ವಿಶ॒ಸ್ತಾ-ಽತಿ॒ಹಾಯ॑ ಛಿ॒ದ್ರಾ ಗಾತ್ರಾ᳚ಣ್ಯ॒ಸಿನಾ॒ ಮಿಥೂ॑ ಕಃ ॥ ನ ವಾ ಉ॑ವೇ॒ತನ್ಮ್ರಿ॑ಯಸೇ॒ ನ ರಿ॑ಷ್ಯಸಿ ದೇ॒ವಾಗ್ಂ ಇದೇ॑ಷಿ ಪ॒ಥಿಭಿ॑-ಸ್ಸು॒ಗೇಭಿಃ॑ । ಹರೀ॑ ತೇ॒ ಯುಞ್ಜಾ॒ ಪೃಷ॑ತೀ ಅಭೂತಾ॒ಮುಪಾ᳚ಸ್ಥಾ-ದ್ವಾ॒ಜೀ ಧು॒ರಿ ರಾಸ॑ಭಸ್ಯ ॥ ಸು॒ಗವ್ಯ॑-ನ್ನೋ ವಾ॒ಜೀ ಸ್ವಶ್ವಿ॑ಯ-ಮ್ಪು॒ಗ್ಂ॒ಸಃ ಪು॒ತ್ರಾಗ್ಂ ಉ॒ತ ವಿ॑ಶ್ವಾ॒ಪುಷಗ್ಂ॑ ರ॒ಯಿಮ್ । ಅ॒ನಾ॒ಗಾ॒ಸ್ತ್ವ-ನ್ನೋ॒ ಅದಿ॑ತಿಃ ಕೃಣೋತು ಖ್ಷ॒ತ್ರ-ನ್ನೋ॒ ಅಶ್ವೋ॑ ವನತಾಗ್ಂ ಹ॒ವಿಷ್ಮಾನ್॑ ॥ 46 ॥
(ಘಾ॒ಸಿಂ-ಕಶ॑ಯಾ – ತಪ-ದ್- ರ॒ಯಿಂ – ನವ॑ ಚ ) (ಅ. 9)
(ಅಶ್ಮ॒ನ್ – ಯ ಇ॒ಮೋ – ದೇ॑ನ – ಮಾ॒ಶುಃ – ಪ್ರಾಚೀಂ᳚ – ಜೀ॒ಮೂತ॑ಸ್ಯ॒ – ಯದಕ್ರ॑ನ್ದೋ॒ – ಮಾ ನೋ॑ ಮಿ॒ತ್ರೋ – ಯೇ ವಾ॒ಜಿನಂ॒ – ನವ॑)
(ಅಶ್ಮ॑ನ್ – ಮನೋ॒ಯುಜಂ॒ – ಪ್ರಾಚೀ॒ಮನು॒ – ಶರ್ಮ॑ ಯಚ್ಛತು॒ – ತೇಷಾ॑ಮ॒ಭಿಗೂ᳚ರ್ತಿಃ॒ – ಷಟ್ಚ॑ತ್ವಾರಿಗ್ಂಶತ್)
(ಅಶ್ಮ॑ನ್, ಹ॒ವಿಷ್ಮಾನ್॑)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಞ್ಚತುರ್ಥ ಕಾಣ್ಡೇ ಷಷ್ಠಃ ಪ್ರಶ್ನ-ಸ್ಸಮಾಪ್ತಃ ॥
ಓ-ನ್ನಮಃ ಪರಮಾತ್ಮನೇ , ಶ್ರೀ ಮಹಾಗಣಪತಯೇ ನಮಃ , ಶ್ರೀ ಗುರುಭ್ಯೋ ನಮಃ , ಹ॒ರಿಃ॒ ಓಂ