ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ತೃತೀಯಃ ಪ್ರಶ್ನಃ – ಸೋಮಮನ್ತ್ರಬ್ರಾಹ್ಮಣನಿರೂಪಣಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಚಾತ್ವಾ॑ಲಾ॒-ದ್ಧಿಷ್ಣಿ॑ಯಾ॒ನುಪ॑ ವಪತಿ॒ ಯೋನಿ॒ರ್ವೈ ಯ॒ಜ್ಞಸ್ಯ॒ ಚಾತ್ವಾ॑ಲಂ-ಯಁ॒ಜ್ಞಸ್ಯ॑ ಸಯೋನಿ॒ತ್ವಾಯ॑ ದೇ॒ವಾ ವೈ ಯ॒ಜ್ಞ-ಮ್ಪರಾ॑-ಽಜಯನ್ತ॒ ತಮಾಗ್ನೀ᳚ದ್ಧ್ರಾ॒-ತ್ಪುನ॒ರಪಾ॑ಜಯನ್ನೇ॒ತದ್ವೈ ಯ॒ಜ್ಞಸ್ಯಾ-ಪ॑ರಾಜಿತಂ॒-ಯಁದಾಗ್ನೀ᳚ದ್ಧ್ರಂ॒-ಯಁದಾಗ್ನೀ᳚ದ್ಧ್ರಾ॒ದ್ಧಿಷ್ಣಿ॑ಯಾನ್. ವಿ॒ಹರ॑ತಿ॒ ಯದೇ॒ವ ಯ॒ಜ್ಞಸ್ಯಾ-ಪ॑ರಾಜಿತ॒-ನ್ತತ॑ ಏ॒ವೈನ॒-ಮ್ಪುನ॑ಸ್ತನುತೇ ಪರಾ॒ಜಿತ್ಯೇ॑ವ॒ ಖಲು॒ ವಾ ಏ॒ತೇ ಯ॑ನ್ತಿ॒ ಯೇ ಬ॑ಹಿಷ್ಪವಮಾ॒ನಗ್ಂ ಸರ್ಪ॑ನ್ತಿ ಬಹಿಷ್ಪವಮಾ॒ನೇ ಸ್ತು॒ತ [ಸ್ತು॒ತೇ, ಆ॒ಹಾಗ್ನೀ॑ದ॒ಗ್ನೀನ್. ವಿ] 1
ಆ॒ಹಾಗ್ನೀ॑ದ॒ಗ್ನೀನ್. ವಿ ಹ॑ರ ಬ॒ರ್॒ಹಿ-ಸ್ಸ್ತೃ॑ಣಾಹಿ ಪುರೋ॒ಡಾಶಾ॒ಗ್ಂ॒ ಅಲ॑-ಙ್ಕು॒ರ್ವಿತಿ॑ ಯ॒ಜ್ಞಮೇ॒ವಾಪ॒ಜಿತ್ಯ॒ ಪುನ॑ಸ್ತನ್ವಾ॒ನಾ ಯ॒ನ್ತ್ಯಙ್ಗಾ॑ರೈ॒ರ್ದ್ವೇ ಸವ॑ನೇ॒ ವಿ ಹ॑ರತಿ ಶ॒ಲಾಕಾ॑ಭಿ-ಸ್ತೃ॒ತೀಯಗ್ಂ॑ ಸಶುಕ್ರ॒ತ್ವಾಯಾಥೋ॒ ಸ-ಮ್ಭ॑ರತ್ಯೇ॒ವೈನ॒ದ್ಧಿಷ್ಣಿ॑ಯಾ॒ ವಾ ಅ॒ಮುಷ್ಮಿ॑-ಲ್ಲೋಁ॒ಕೇ ಸೋಮ॑ಮರಖ್ಷ॒-ನ್ತೇಭ್ಯೋ-ಽಧಿ॒ ಸೋಮ॒ಮಾ-ಽಹ॑ರ॒-ನ್ತ ಮ॑ನ್ವ॒ವಾಯ॒ನ್ತ-ಮ್ಪರ್ಯ॑ವಿಶ॒ನ್॒. ಯ ಏ॒ವಂ-ವೇಁದ॑ ವಿ॒ನ್ದತೇ॑ [ಯ ಏ॒ವಂ-ವೇಁದ॑ ವಿ॒ನ್ದತೇ᳚, ಪ॒ರಿ॒ವೇ॒ಷ್ಟಾರ॒-ನ್ತೇ] 2
ಪರಿವೇ॒ಷ್ಟಾರ॒-ನ್ತೇ ಸೋ॑ಮಪೀ॒ಥೇನ॒ ವ್ಯಾ᳚ರ್ಧ್ಯನ್ತ॒ ತೇ ದೇ॒ವೇಷು॑ ಸೋಮಪೀ॒ಥಮೈ᳚ಚ್ಛನ್ತ॒ ತಾ-ನ್ದೇ॒ವಾ ಅ॑ಬ್ರುವ॒-ನ್ದ್ವೇದ್ವೇ॒ ನಾಮ॑ನೀ ಕುರುದ್ಧ್ವ॒ಮಥ॒ ಪ್ರ ವಾ॒-ಽಽಫ್ಸ್ಯಥ॒ ನ ವೇತ್ಯ॒ಗ್ನಯೋ॒ ವಾ ಅಥ॒ ಧಿಷ್ಣಿ॑ಯಾ॒ಸ್ತಸ್ಮಾ᳚-ದ್ದ್ವಿ॒ನಾಮಾ᳚ ಬ್ರಾಹ್ಮ॒ಣೋ-ಽರ್ಧು॑ಕ॒ಸ್ತೇಷಾಂ॒-ಯೇಁ ನೇದಿ॑ಷ್ಠ-ಮ್ಪ॒ರ್ಯವಿ॑ಶ॒-ನ್ತೇ ಸೋ॑ಮಪೀ॒ಥ-ಮ್ಪ್ರಾ-ಽಪ್ನು॑ವನ್ನಾಹವ॒ನೀಯ॑ ಆಗ್ನೀ॒ದ್ಧ್ರೀಯೋ॑ ಹೋ॒ತ್ರೀಯೋ॑ ಮಾರ್ಜಾ॒ಲೀಯ॒ಸ್ತಸ್ಮಾ॒-ತ್ತೇಷು॑ ಜುಹ್ವತ್ಯತಿ॒ಹಾಯ॒ ವಷ॑-ಟ್ಕರೋತಿ॒ ವಿ ಹ್ಯೇ॑ [ವಿ ಹಿ, ಏ॒ತೇ ಸೋ॑ಮಪೀ॒ಥೇನಾ-ಽಽರ್ಧ್ಯ॑ನ್ತ] 3
-ತೇ ಸೋ॑ಮಪೀ॒ಥೇನಾ-ಽಽರ್ಧ್ಯ॑ನ್ತ ದೇ॒ವಾ ವೈ ಯಾಃ ಪ್ರಾಚೀ॒-ರಾಹು॑ತೀ॒-ರಜು॑ಹವು॒ರ್ಯೇ ಪು॒ರಸ್ತಾ॒ದಸು॑ರಾ॒ ಆಸ॒-ನ್ತಾಗ್ ಸ್ತಾಭಿಃ॒ ಪ್ರಾಣು॑ದನ್ತ॒ ಯಾಃ ಪ್ರ॒ತೀಚೀ॒ರ್ಯೇ ಪ॒ಶ್ಚಾದಸು॑ರಾ॒ ಆಸ॒-ನ್ತಾಗ್ಸ್ತಾಭಿ॒-ರಪಾ॑ನುದನ್ತ॒ ಪ್ರಾಚೀ॑ರ॒ನ್ಯಾ ಆಹು॑ತಯೋ ಹೂ॒ಯನ್ತೇ᳚ ಪ್ರ॒ತ್ಯಙ್ಙಾಸೀ॑ನೋ॒ ಧಿಷ್ಣಿ॑ಯಾ॒ನ್. ವ್ಯಾಘಾ॑ರಯತಿ ಪ॒ಶ್ಚಾಚ್ಚೈ॒ವ ಪುರಸ್ತಾ᳚ಚ್ಚ॒ ಯಜ॑ಮಾನೋ॒ ಭ್ರಾತೃ॑ವ್ಯಾ॒-ನ್ಪ್ರ ಣು॑ದತೇ॒ ತಸ್ಮಾ॒-ತ್ಪರಾ॑ಚೀಃ ಪ್ರ॒ಜಾಃ ಪ್ರ ವೀ॑ಯನ್ತೇ ಪ್ರ॒ತೀಚೀ᳚- [ಪ್ರ॒ತೀಚೀಃ᳚, ಜಾ॒ಯ॒ನ್ತೇ॒ ಪ್ರಾ॒ಣಾ ವಾ ಏ॒ತೇ] 4
-ರ್ಜಾಯನ್ತೇ ಪ್ರಾ॒ಣಾ ವಾ ಏ॒ತೇ ಯದ್ಧಿಷ್ಣಿ॑ಯಾ॒ ಯದ॑ದ್ಧ್ವ॒ರ್ಯುಃ ಪ್ರ॒ತ್ಯ-ನ್ಧಿಷ್ಣಿ॑ಯಾ-ನತಿ॒ಸರ್ಪೇ᳚-ತ್ಪ್ರಾ॒ಣಾನ್-ಥ್ಸಙ್ಕ॑ರ್ಷೇ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ನ್ನಾಭಿ॒ರ್ವಾ ಏ॒ಷಾ ಯ॒ಜ್ಞಸ್ಯ॒ ಯದ್ಧೋತೋ॒ರ್ಧ್ವಃ ಖಲು॒ ವೈ ನಾಭ್ಯೈ᳚ ಪ್ರಾ॒ಣೋ-ಽವಾಂ॑ಅಪಾ॒ನೋ ಯದ॑ಧ್ವ॒ರ್ಯುಃ ಪ್ರ॒ತ್ಯಂ ಹೋತಾ॑ರಮತಿ॒ಸರ್ಪೇ॑ದಪಾ॒ನೇ ಪ್ರಾ॒ಣ-ನ್ದ॑ಧ್ಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ನ್ನಾದ್ಧ್ವ॒ರ್ಯುರುಪ॑ ಗಾಯೇ॒-ದ್ವಾಗ್ವೀ᳚ರ್ಯೋ॒ ವಾ ಅ॑ದ್ಧ್ವ॒ರ್ಯು-ರ್ಯದ॑ದ್ಧ್ವ॒ರ್ಯುರು॑ಪ॒-ಗಾಯೇ॑ದು-ದ್ಗಾ॒ತ್ರೇ [ ] 5
ವಾಚ॒ಗ್ಂ॒ ಸ-ಮ್ಪ್ರ ಯ॑ಚ್ಛೇ-ದುಪ॒ದಾಸು॑ಕಾ-ಽಸ್ಯ॒ ವಾ-ಖ್ಸ್ಯಾ᳚ದ್ಬ್ರಹ್ಮವಾ॒ದಿನೋ॑ ವದನ್ತಿ॒ ನಾಸಗ್ಗ್॑ಸ್ಥಿತೇ॒ ಸೋಮೇ᳚-ಽದ್ಧ್ವ॒ರ್ಯುಃ ಪ್ರ॒ತ್ಯಙ್-ಖ್ಸದೋ-ಽತೀ॑ಯಾ॒ದಥ॑ ಕ॒ಥಾ ದಾ᳚ಖ್ಷಿ॒ಣಾನಿ॒ ಹೋತು॑ಮೇತಿ॒ ಯಾಮೋ॒ ಹಿ ಸ ತೇಷಾ॒-ಙ್ಕಸ್ಮಾ॒ ಅಹ॑ ದೇ॒ವಾ ಯಾಮಂ॒-ವಾಁ-ಽಯಾ॑ಮಂ॒-ವಾಁ-ಽನು॑ ಜ್ಞಾಸ್ಯ॒ನ್ತೀತ್ಯು-ತ್ತ॑ರೇ॒ಣಾ-ಽಽಗ್ನೀ᳚ದ್ಧ್ರ-ಮ್ಪ॒ರೀತ್ಯ॑ ಜುಹೋತಿ ದಾಖ್ಷಿ॒ಣಾನಿ॒ ನ ಪ್ರಾ॒ಣಾನ್ಥ್ಸ-ಙ್ಕ॑ರ್ಷತಿ॒ ನ್ಯ॑ನ್ಯೇ ಧಿಷ್ಣಿ॑ಯಾ ಉ॒ಪ್ಯನ್ತೇ॒ ನಾನ್ಯೇ ಯಾ-ನ್ನಿ॒ವಪ॑ತಿ॒ ತೇನ॒ ತಾ-ನ್ಪ್ರೀ॑ಣಾತಿ॒ ಯಾ-ನ್ನನಿ॒ವಪ॑ತಿ॒ ಯದ॑ನುದಿ॒ಶತಿ॒ ತೇನ॒ ತಾನ್ ॥ 6 ॥
(ಸ್ತು॒ತೇ – ವಿ॒ನ್ದತೇ॒ – ಹಿ – ವೀ॑ಯನ್ತೇ ಪ್ರ॒ತೀಚೀ॑ – ರುದ್ಗ್ರಾ॒ತ್ರ – ಉ॒ಪ್ಯನ್ತೇ॒ – ಚತು॑ರ್ದಶ ಚ) (ಅ. 1)
ಸು॒ವ॒ರ್ಗಾಯ॒ ವಾ ಏ॒ತಾನಿ॑ ಲೋ॒ಕಾಯ॑ ಹೂಯನ್ತೇ॒ ಯ-ದ್ವೈ॑ಸರ್ಜ॒ನಾನಿ॒ ದ್ವಾಭ್ಯಾ॒-ಙ್ಗಾರ್ಹ॑ಪತ್ಯೇ ಜುಹೋತಿ ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯಾ॒ ಆಗ್ನೀ᳚ದ್ಧ್ರೇ ಜುಹೋತ್ಯ॒ನ್ತರಿ॑ಖ್ಷ ಏ॒ವಾ-ಽಽಕ್ರ॑ಮತ ಆಹವ॒ನೀಯೇ॑ ಜುಹೋತಿ ಸುವ॒ರ್ಗಮೇ॒ವೈನಂ॑-ಲೋಁ॒ಕ-ಙ್ಗ॑ಮಯತಿ ದೇ॒ವಾನ್. ವೈ ಸು॑ವ॒ರ್ಗಂ-ಲೋಁ॒ಕಂ-ಯಁ॒ತೋ ರಖ್ಷಾಗ್॑ಸ್ಯ ಜಿಘಾಗ್ಂಸ॒ನ್ತೇ ಸೋಮೇ॑ನ॒ ರಾಜ್ಞಾ॒ ರಖ್ಷಾಗ್॑-ಸ್ಯಪ॒ಹತ್ಯಾ॒ಪ್ತು-ಮಾ॒ತ್ಮಾನ॑-ಙ್ಕೃ॒ತ್ವಾ ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ರಖ್ಷ॑ಸಾ॒-ಮನು॑ಪಲಾಭಾ॒ಯಾ ಽಽತ್ತ॒-ಸ್ಸೋಮೋ॑ ಭವ॒ತ್ಯಥ॑ [ಭವ॒ತ್ಯಥ॑, ವೈ॒ಸ॒ರ್ಜ॒ನಾನಿ॑ ಜುಹೋತಿ॒] 7
ವೈಸರ್ಜ॒ನಾನಿ॑ ಜುಹೋತಿ॒ ರಖ್ಷ॑ಸಾ॒ಮಪ॑ಹತ್ಯೈ॒ ತ್ವಗ್ಂ ಸೋ॑ಮ ತನೂ॒ಕೃದ್ಭ್ಯ॒ ಇತ್ಯಾ॑ಹ ತನೂ॒ಕೃದ್ಧ್ಯ॑ಷ ದ್ವೇಷೋ᳚ಭ್ಯೋ॒-ಽನ್ಯಕೃ॑ತೇಭ್ಯ॒ ಇತ್ಯಾ॑ಹಾ॒ನ್ಯಕೃ॑ತಾನಿ॒ ಹಿ ರಖ್ಷಾಗ್॑ಸ್ಯು॒ರು ಯ॒ನ್ತಾ-ಽಸಿ॒ ವರೂ॑ಥ॒ಮಿತ್ಯಾ॑ಹೋ॒ರು ಣ॑ಸ್ಕೃ॒ಧೀತಿ॒ ವಾವೈತದಾ॑ಹ ಜುಷಾ॒ಣೋ ಅ॒ಪ್ತುರಾಜ್ಯ॑ಸ್ಯ ವೇ॒ತ್ವಿತ್ಯಾ॑ಹಾ॒ಪ್ತುಮೇ॒ವ ಯಜ॑ಮಾನ-ಙ್ಕೃ॒ತ್ವಾ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ॒ ರಖ್ಷ॑ಸಾ॒-ಮನು॑ಪಲಾಭಾ॒ಯಾ-ಽಽ ಸೋಮ॑-ನ್ದದತ॒ [ಸೋಮ॑-ನ್ದದತೇ, ಆ ಗ್ರಾವ್ಣ್ಣ॒ ಆ] 8
ಆ ಗ್ರಾವ್ಣ್ಣ॒ ಆ ವಾ॑ಯ॒ವ್ಯಾ᳚ನ್ಯಾ ದ್ರೋ॑ಣಕಲ॒ಶಮು-ತ್ಪತ್ನೀ॒ಮಾ ನ॑ಯ॒ನ್ತ್ಯನ್ವನಾಗ್ಂ॑ಸಿ॒ ಪ್ರ ವ॑ರ್ತಯನ್ತಿ॒ ಯಾವ॑ದೇ॒ವಾಸ್ಯಾಸ್ತಿ॒ ತೇನ॑ ಸ॒ಹ ಸು॑ವ॒ರ್ಗಂ-ಲೋಁ॒ಕಮೇ॑ತಿ॒ ನಯ॑ವತ್ಯ॒ರ್ಚಾ-ಽಽಗ್ನೀ᳚ದ್ಧ್ರೇ ಜುಹೋತಿ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿನೀ᳚ತ್ಯೈ॒ ಗ್ರಾವ್ಣ್ಣೋ॑ ವಾಯ॒ವ್ಯಾ॑ನಿ ದ್ರೋಣಕಲ॒ಶಮಾಗ್ನೀ᳚ದ್ಧ್ರ॒ ಉಪ॑ ವಾಸಯತಿ॒ ವಿ ಹ್ಯೇ॑ನ॒-ನ್ತೈರ್ಗೃ॒ಹ್ಣತೇ॒ ಯ-ಥ್ಸ॒ಹೋಪ॑ವಾ॒ಸಯೇ॑-ದಪುವಾ॒ಯೇತ॑ ಸೌ॒ಮ್ಯರ್ಚಾ ಪ್ರ ಪಾ॑ದಯತಿ॒ ಸ್ವಯೈ॒- [ಪ್ರ ಪಾ॑ದಯತಿ॒ ಸ್ವಯ᳚, ಏ॒ವೈನ॑-ನ್ದೇ॒ವತ॑ಯಾ॒] 9
-ವೈನ॑-ನ್ದೇ॒ವತ॑ಯಾ॒ ಪ್ರ ಪಾ॑ದಯ॒ತ್ಯದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ ಸೀ॒ದೇತ್ಯಾ॑ಹ ಯಥಾಯ॒ಜುರೇ॒ವೈತ-ದ್ಯಜ॑ಮಾನೋ॒ ವಾ ಏ॒ತಸ್ಯ॑ ಪು॒ರಾ ಗೋ॒ಪ್ತಾ ಭ॑ವತ್ಯೇ॒ಷ ವೋ॑ ದೇವ ಸವಿತ॒-ಸ್ಸೋಮ॒ ಇತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವೈನ॑-ನ್ದೇ॒ವತಾ᳚ಭ್ಯ॒-ಸ್ಸ-ಮ್ಪ್ರಯ॑ಚ್ಛತ್ಯೇ॒ತ-ತ್ತ್ವಗ್ಂ ಸೋ॑ಮ ದೇ॒ವೋ ದೇ॒ವಾನುಪಾ॑ಗಾ॒ ಇತ್ಯಾ॑ಹ ದೇ॒ವೋ ಹ್ಯೇ॑ಷ ಸ- [ದೇ॒ವೋ ಹ್ಯೇ॑ಷ ಸನ್ನ್, ದೇ॒ವಾನು॒ಪೈತೀ॒ದಮ॒ಹ-] 10
-ನ್ದೇ॒ವಾನು॒ಪೈತೀ॒ದಮ॒ಹ-ಮ್ಮ॑ನು॒ಷ್ಯೋ॑ ಮನು॒ಷ್ಯಾ॑ನಿತ್ಯಾ॑ಹ ಮನು॒ಷ್ಯೋ᳚(1॒) ಹ್ಯೇ॑ಷ ಸ-ನ್ಮ॑ನು॒ಷ್ಯಾ॑ನು॒ಪೈತಿ॒ ಯದೇ॒ತ-ದ್ಯಜು॒ರ್ನ ಬ್ರೂ॒ಯಾದಪ್ರ॑ಜಾ ಅಪ॒ಶುರ್ಯಜ॑ಮಾನ-ಸ್ಸ್ಯಾ-ಥ್ಸ॒ಹ ಪ್ರ॒ಜಯಾ॑ ಸಹ ರಾ॒ಯಸ್ಪೋಷೇ॒ಣೇತ್ಯಾ॑ಹ ಪ್ರ॒ಜಯೈ॒ವ ಪ॒ಶುಭಿ॑-ಸ್ಸ॒ಹೇಮಂ-ಲೋಁ॒ಕಮು॒ಪಾವ॑ರ್ತತೇ॒ ನಮೋ॑ ದೇ॒ವೇಭ್ಯ॒ ಇತ್ಯಾ॑ಹ ನಮಸ್ಕಾ॒ರೋ ಹಿ ದೇ॒ವಾನಾಗ್॑ ಸ್ವ॒ಧಾ ಪಿ॒ತೃಭ್ಯ॒ ಇತ್ಯಾ॑ಹ ಸ್ವಧಾಕಾ॒ರೋ ಹಿ [ಸ್ವಧಾಕಾ॒ರೋ ಹಿ, ಪಿ॒ತೃ॒ಣಾಮಿ॒ದಮ॒ಹ-] 11
ಪಿ॑ತೃ॒ಣಾಮಿ॒ದಮ॒ಹ-ನ್ನಿರ್ವರು॑ಣಸ್ಯ॒ ಪಾಶಾ॒ದಿತ್ಯಾ॑ಹ ವರುಣಪಾ॒ಶಾದೇ॒ವ ನಿರ್ಮು॑ಚ್ಯ॒ತೇ ಽಗ್ನೇ᳚ ವ್ರತಪತ ಆ॒ತ್ಮನಃ॒ ಪೂರ್ವಾ॑ ತ॒ನೂರಾ॒ದೇಯೇತ್ಯಾ॑ಹುಃ॒ ಕೋ ಹಿ ತದ್ವೇದ॒ ಯ-ದ್ವಸೀ॑ಯಾ॒ನ್-ಥ್ಸ್ವೇ ವಶೇ॑ ಭೂ॒ತೇ ಪುನ॑ರ್ವಾ॒ ದದಾ॑ತಿ॒ ನ ವೇತಿ॒ ಗ್ರಾವಾ॑ಣೋ॒ ವೈ ಸೋಮ॑ಸ್ಯ॒ ರಾಜ್ಞೋ॑ ಮಲಿಮ್ಲುಸೇ॒ನಾ ಯ ಏ॒ವಂ-ವಿಁ॒ದ್ವಾ-ನ್ಗ್ರಾವ್ಣ್ಣ॒ ಆಗ್ನೀ᳚ದ್ಧ್ರ ಉಪವಾ॒ಸಯ॑ತಿ॒ ನೈನ॑-ಮ್ಮಲಿಮ್ಲುಸೇ॒ನಾ ವಿ॑ನ್ದತಿ ॥ 12 ॥
(ಅಥ॑-ದದತೇ॒ – ಸ್ವಯಾ॒ – ಸನ್ಥ್ – ಸ್ವ॑ಧಾಕಾ॒ರೋ ಹಿ – ವಿ॑ನ್ದತಿ) (ಅ. 2)
ವೈ॒ಷ್ಣ॒ವ್ಯರ್ಚಾ ಹು॒ತ್ವಾ ಯೂಪ॒ಮಚ್ಛೈ॑ತಿ ವೈಷ್ಣ॒ವೋ ವೈ ದೇ॒ವತ॑ಯಾ॒ ಯೂಪ॒-ಸ್ಸ್ವಯೈ॒ವೈನ॑-ನ್ದೇ॒ವತ॒ಯಾ ಽಚ್ಛೈ॒ತ್ಯತ್ಯ॒ನ್ಯಾನಗಾ॒-ನ್ನಾನ್ಯಾ-ನುಪಾ॑ಗಾ॒ಮಿತ್ಯಾ॒ಹಾತಿ॒ ಹ್ಯ॑ನ್ಯಾನೇತಿ॒ ನಾನ್ಯಾ-ನು॒ಪೈತ್ಯ॒ರ್ವಾಕ್ತ್ವಾ॒ ಪರೈ॑ರವಿದ-ಮ್ಪ॒ರೋ-ಽವ॑ರೈ॒ರಿತ್ಯಾ॑ಹಾ॒ರ್ವಾಘ್ಯೇ॑ನ॒-ಮ್ಪರೈ᳚ರ್ವಿ॒ನ್ದತಿ॑ ಪ॒ರೋ-ಽವ॑ರೈ॒ಸ್ತ-ನ್ತ್ವಾ॑ ಜುಷೇ [ಜುಷೇ, ವೈ॒ಷ್ಣ॒ವ-ನ್ದೇ॑ವಯ॒ಜ್ಯಾಯಾ॒] 13
ವೈಷ್ಣ॒ವ-ನ್ದೇ॑ವಯ॒ಜ್ಯಾಯಾ॒ ಇತ್ಯಾ॑ಹ ದೇವಯ॒ಜ್ಯಾಯೈ॒ ಹ್ಯೇ॑ನ-ಞ್ಜು॒ಷತೇ॑ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನ॒ಕ್ತ್ವಿತ್ಯಾ॑ಹ॒ ತೇಜ॑ಸೈ॒ವೈನ॑-ಮನ॒ಕ್ತ್ಯೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ರಿತ್ಯಾ॑ಹ॒ ವಜ್ರೋ॒ ವೈ ಸ್ವಧಿ॑ತಿ॒-ಶ್ಶಾನ್ತ್ಯೈ॒ ಸ್ವಧಿ॑ತೇರ್ವೃ॒ಖ್ಷಸ್ಯ॒ ಬಿಭ್ಯ॑ತಃ ಪ್ರಥ॒ಮೇನ॒ ಶಕ॑ಲೇನ ಸ॒ಹ ತೇಜಃ॒ ಪರಾ॑ ಪತತಿ॒ ಯಃ ಪ್ರ॑ಥ॒ಮ-ಶ್ಶಕ॑ಲಃ ಪರಾ॒ಪತೇ॒-ತ್ತಮಪ್ಯಾ ಹ॑ರೇ॒-ಥ್ಸತೇ॑ಜಸ- [ಹ॑ರೇ॒-ಥ್ಸತೇ॑ಜಸಮ್, ಏ॒ವೈನ॒ಮಾ] 14
-ಮೇ॒ವೈನ॒ಮಾ ಹ॑ರತೀ॒ಮೇ ವೈ ಲೋ॒ಕಾ ಯೂಪಾ᳚-ತ್ಪ್ರಯ॒ತೋ ಬಿ॑ಭ್ಯತಿ॒ ದಿವ॒ಮಗ್ರೇ॑ಣ॒ ಮಾ ಲೇ॑ಖೀರ॒ನ್ತರಿ॑ಖ್ಷ॒-ಮ್ಮದ್ಧ್ಯೇ॑ನ॒ ಮಾ ಹಿಗ್ಂ॑ಸೀ॒ರಿತ್ಯಾ॑ಹೈ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯ॑-ಶ್ಶಮಯತಿ॒ ವನ॑ಸ್ಪತೇ ಶ॒ತವ॑ಲ್ಶೋ॒ ವಿ ರೋ॒ಹೇತ್ಯಾ॒ವ್ರಶ್ಚ॑ನೇ ಜುಹೋತಿ॒ ತಸ್ಮಾ॑-ದಾ॒ವ್ರಶ್ಚ॑ನಾ-ದ್ವೃ॒ಖ್ಷಾಣಾ॒-ಮ್ಭೂಯಾಗ್ಂ॑ಸ॒ ಉತ್ತಿ॑ಷ್ಠನ್ತಿ ಸ॒ಹಸ್ರ॑ವಲ್ಶಾ॒ ವಿ ವ॒ಯಗ್ಂ ರು॑ಹೇ॒ಮೇತ್ಯಾ॑ಹಾ॒- ಽಽಶಿಷ॑ಮೇ॒ವೈತಾಮಾ ಶಾ॒ಸ್ತೇ ಽನ॑ಖ್ಷಸಙ್ಗ- [ಶಾ॒ಸ್ತೇ ಽನ॑ಖ್ಷಸಙ್ಗಮ್, ವೃ॒ಶ್ಚೇ॒-ದ್ಯದ॑ಖ್ಷಸ॒ಙ್ಗಂ-] 15
-ವೃಁಶ್ಚೇ॒-ದ್ಯದ॑ಖ್ಷಸ॒ಙ್ಗಂ-ವೃಁ॒ಶ್ಚೇದ॑ಧಈ॒ಷಂ-ಯಁಜ॑ಮಾನಸ್ಯ ಪ್ರ॒ಮಾಯು॑ಕಗ್ಗ್ ಸ್ಯಾ॒ದ್ಯ-ಙ್ಕಾ॒ಮಯೇ॒ತಾಪ್ರ॑ತಿಷ್ಠಿತ-ಸ್ಸ್ಯಾ॒ದಿತ್ಯಾ॑ರೋ॒ಹ-ನ್ತಸ್ಮ॑ ವೃಶ್ಚೇದೇ॒ಷ ವೈ ವನ॒ಸ್ಪತೀ॑ನಾ॒-ಮಪ್ರ॑ತಿಷ್ಠಿ॒ತೋ-ಽಪ್ರ॑ತಿಷ್ಠಿತ ಏ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತಾಪ॒ಶು-ಸ್ಸ್ಯಾ॒ದಿತ್ಯ॑ಪ॒ರ್ಣ-ನ್ತಸ್ಮೈ॒ ಶುಷ್ಕಾ᳚ಗ್ರಂ-ವೃಁಶ್ಚೇದೇ॒ಷ ವೈ ವನ॒ಸ್ಪತೀ॑ನಾ-ಮಪಶ॒ವ್ಯೋ॑-ಽಪ॒ಶುರೇ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ದಿತಿ॑ ಬಹುಪ॒ರ್ಣ-ನ್ತಸ್ಮೈ॑ ಬಹುಶಾ॒ಖಂ-ವೃಁ॑ಶ್ಚೇದೇ॒ಷ ವೈ [ ] 16
ವನ॒ಸ್ಪತೀ॑ನಾ-ಮ್ಪಶ॒ವ್ಯಃ॑ ಪಶು॒ಮಾನೇ॒ವ ಭ॑ವತಿ॒ ಪ್ರತಿ॑ಷ್ಠಿತಂ-ವೃಁಶ್ಚೇ-ತ್ಪ್ರತಿ॒ಷ್ಠಾಕಾ॑ಮಸ್ಯೈ॒ಷ ವೈ ವನ॒ಸ್ಪತೀ॑ನಾ॒-ಮ್ಪ್ರತಿ॑ಷ್ಠಿತೋ॒ ಯ-ಸ್ಸ॒ಮೇ ಭೂಮ್ಯೈ॒ ಸ್ವಾದ್ಯೋನೇ॑ ರೂ॒ಢಃ ಪ್ರತ್ಯೇ॒ವ ತಿ॑ಷ್ಠತಿ॒ ಯಃ ಪ್ರ॒ತ್ಯಙ್ಙುಪ॑ನತ॒ಸ್ತಂ-ವೃಁ॑ಶ್ಚೇ॒-ಥ್ಸ ಹಿ ಮೇಧ॑ಮ॒ಭ್ಯುಪ॑ನತಃ॒ ಪಞ್ಚಾ॑ರತ್ನಿ॒-ನ್ತಸ್ಮೈ॑ ವೃಶ್ಚೇ॒ದ್ಯ-ಙ್ಕಾ॒ಮಯೇ॒ತೋಪೈ॑ನ॒ಮುತ್ತ॑ರೋ ಯ॒ಜ್ಞೋ ನ॑ಮೇ॒ದಿತಿ॒ ಪಞ್ಚಾ᳚ಖ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞ ಉಪೈ॑ನ॒ಮುತ್ತ॑ರೋ ಯ॒ಜ್ಞೋ [ಯ॒ಜ್ಞಃ, ನ॒ಮ॒ತಿ॒ ಷಡ॑ರತ್ನಿ] 17
ನ॑ಮತಿ॒ ಷಡ॑ರತ್ನಿ-ಮ್ಪ್ರತಿ॒ಷ್ಠಾಕಾ॑ಮಸ್ಯ॒ ಷಡ್ವಾ ಋ॒ತವ॑ ಋ॒ತುಷ್ವೇ॒ವ ಪ್ರತಿ॑ ತಿಷ್ಠತಿ ಸ॒ಪ್ತಾರ॑ತ್ನಿ-ಮ್ಪ॒ಶುಕಾ॑ಮಸ್ಯ ಸ॒ಪ್ತಪ॑ದಾ॒ ಶಕ್ವ॑ರೀ ಪ॒ಶವ॒-ಶ್ಶಕ್ವ॑ರೀ ಪ॒ಶೂನೇ॒ವಾವ॑ ರುನ್ಧೇ॒ ನವಾ॑ರತ್ನಿ॒-ನ್ತೇಜ॑ಸ್ಕಾಮಸ್ಯ ತ್ರಿ॒ವೃತಾ॒ ಸ್ತೋಮೇ॑ನ॒ ಸಮ್ಮಿ॑ತ॒-ನ್ತೇಜ॑ಸ್ತ್ರಿ॒ವೃ-ತ್ತೇ॑ಜ॒ಸ್ವ್ಯೇ॑ವ ಭ॑ವ॒-ತ್ಯೇಕಾ॑ದಶಾರತ್ನಿ-ಮಿನ್ದ್ರಿ॒ಯಕಾ॑ಮ॒-ಸ್ಯೈಕಾ॑ದಶಾಖ್ಷರಾ ತ್ರಿ॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟುಗಿ॑ನ್ದ್ರಿಯಾ॒ವ್ಯೇ॑ವ ಭ॑ವತಿ॒ ಪಞ್ಚ॑ದಶಾರತ್ನಿ॒-ಮ್ಭ್ರಾತೃ॑ವ್ಯವತಃ ಪಞ್ಚದ॒ಶೋ ವಜ್ರೋ॒ ಭ್ರಾತೃ॑ವ್ಯಾಭಿಭೂತ್ಯೈ ಸ॒ಪ್ತದ॑ಶಾರತ್ನಿ-ಮ್ಪ್ರ॒ಜಾಕಾ॑ಮಸ್ಯ ಸಪ್ತದ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯಾ॒ ಏಕ॑ವಿಗ್ಂಶತ್ಯರತ್ನಿ-ಮ್ಪ್ರತಿ॒ಷ್ಠಾಕಾ॑ಮ-ಸ್ಯೈಕವಿ॒ಗ್ಂ॒ಶ-ಸ್ಸ್ತೋಮಾ॑ನಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯಾ ಅ॒ಷ್ಟಾಶ್ರಿ॑ರ್ಭವ-ತ್ಯ॒ಷ್ಟಾಖ್ಷ॑ರಾ ಗಾಯ॒ತ್ರೀ ತೇಜೋ॑ ಗಾಯ॒ತ್ರೀ ಗಾ॑ಯ॒ತ್ರೀ ಯ॑ಜ್ಞಮು॒ಖ-ನ್ತೇಜ॑ಸೈ॒ವ ಗಾ॑ಯತ್ರಿ॒ಯಾ ಯ॑ಜ್ಞಮು॒ಖೇನ॒ ಸಮ್ಮಿ॑ತಃ ॥ 18 ॥
(ಜು॒ಷೇ॒ – ಸತೇ॑ಜಸ॒ – ಮನ॑ಖ್ಷಸಙ್ಗಂ – ಬಹುಶಾ॒ಖಂ-ವೃಁ॑ಶ್ಚೇದೇ॒ಷ ವೈ – ಯ॒ಜ್ಞ ಉಪೈ॑ನ॒ಮುತ್ತ॑ರೋ ಯ॒ಜ್ಞ – ಆಪ್ತ್ಯಾ॒ – ಏಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 3)
ಪೃ॒ಥಿ॒ವ್ಯೈ ತ್ವಾ॒-ಽನ್ತರಿ॑ಖ್ಷಾಯ ತ್ವಾ ದಿ॒ವೇ ತ್ವೇತ್ಯಾ॑ಹೈ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॒ ಪ್ರೋಖ್ಷ॑ತಿ॒ ಪರಾ᳚ಞ್ಚ॒-ಮ್ಪ್ರೋಖ್ಷ॑ತಿ॒ ಪರಾ॑ಙಿವ॒ ಹಿ ಸು॑ವ॒ರ್ಗೋ ಲೋ॒ಕಃ ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ॒ ಯ-ತ್ಖನ॑ತ್ಯ॒ಪೋ-ಽವ॑ ನಯತಿ॒ ಶಾನ್ತ್ಯೈ॒ ಯವ॑ಮತೀ॒ರವ॑ ನಯ॒ತ್ಯೂರ್ಗ್ವೈ ಯವೋ॒ ಯಜ॑ಮಾನೇನ॒ ಯೂಪ॒-ಸ್ಸಮ್ಮಿ॑ತೋ॒ ಯಾವಾ॑ನೇ॒ವ ಯಜ॑ಮಾನ॒-ಸ್ತಾವ॑ತೀ-ಮೇ॒ವಾಸ್ಮಿ॒-ನ್ನೂರ್ಜ॑-ನ್ದಧಾತಿ [ಮೇ॒ವಾಸ್ಮಿ॒-ನ್ನೂರ್ಜ॑-ನ್ದಧಾತಿ, ಪಿ॒ತೃ॒ಣಾಗ್ಂ ಸದ॑ನಮ॒ಸೀತಿ॑] 19
ಪಿತೃ॒ಣಾಗ್ಂ ಸದ॑ನಮ॒ಸೀತಿ॑ ಬ॒ರ್॒ಹಿರವ॑ ಸ್ತೃಣಾತಿ ಪಿತೃದೇವ॒ತ್ಯಾ᳚(1॒)ಗ್ಗ್॒ ಹ್ಯೇ॑ತ-ದ್ಯನ್ನಿಖಾ॑ತಂ॒-ಯಁ-ದ್ಬ॒ರ್॒ಹಿರನ॑ವಸ್ತೀರ್ಯ ಮಿನು॒ಯಾ-ತ್ಪಿ॑ತೃದೇವ॒ತ್ಯೋ॑ ನಿಖಾ॑ತ-ಸ್ಸ್ಯಾ-ದ್ಬ॒ರ್॒ಹಿರ॑ವ॒ಸ್ತೀರ್ಯ॑ ಮಿನೋತ್ಯ॒ಸ್ಯಾಮೇ॒ವೈನ॑-ಮ್ಮಿನೋತಿ ಯೂಪಶಕ॒ಲಮವಾ᳚ಸ್ಯತಿ॒ ಸತೇ॑ಜಸಮೇ॒ವೈನ॑-ಮ್ಮಿನೋತಿ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನ॒ಕ್ತ್ವಿತ್ಯಾ॑ಹ॒ ತೇಜ॑ಸೈ॒ವೈನ॑ಮನಕ್ತಿ ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ॒ ಇತಿ॑ ಚ॒ಷಾಲ॒-ಮ್ಪ್ರತಿ॑- [ಚ॒ಷಾಲ॒-ಮ್ಪ್ರತಿ॑, ಮು॒ಞ್ಚ॒ತಿ॒ ತಸ್ಮಾ᳚ಚ್ಛೀರ್ಷ॒ತ] 20
-ಮುಞ್ಚತಿ॒ ತಸ್ಮಾ᳚ಚ್ಛೀರ್ಷ॒ತ ಓಷ॑ಧಯಃ॒ ಫಲ॑-ಙ್ಗೃಹ್ಣನ್ತ್ಯ॒ನಕ್ತಿ॒ ತೇಜೋ॒ ವಾ ಆಜ್ಯಂ॒-ಯಁಜ॑ಮಾನೇನಾಗ್ನಿ॒ಷ್ಠಾ-ಽಶ್ರಿ॒-ಸ್ಸಮ್ಮಿ॑ತಾ॒ ಯದ॑ಗ್ನಿ॒ಷ್ಠಾ-ಮಶ್ರಿ॑ಮ॒ನಕ್ತಿ॒ ಯಜ॑ಮಾನಮೇ॒ವ ತೇಜ॑ಸಾ ಽನಕ್ತ್ಯಾ॒ನ್ತ-ಮ॑ನಕ್ತ್ಯಾ॒ನ್ತಮೇ॒ವ ಯಜ॑ಮಾನ॒-ನ್ತೇಜ॑ಸಾನಕ್ತಿ ಸ॒ರ್ವತಃ॒ ಪರಿ॑ ಮೃಶ॒ತ್ಯಪ॑ರಿವರ್ಗ-ಮೇ॒ವಾಸ್ಮಿ॒-ನ್ತೇಜೋ॑ ದಧಾ॒ತ್ಯು-ದ್ದಿವಗ್ಗ್॑ ಸ್ತಭಾ॒ನಾ-ಽನ್ತರಿ॑ಖ್ಷ-ಮ್ಪೃ॒ಣೇತ್ಯಾ॑ಹೈ॒ಷಾಂ-ಲೋಁ॒ಕಾನಾಂ॒-ವಿಁಧೃ॑ತ್ಯೈ ವೈಷ್ಣ॒ವ್ಯರ್ಚಾ [ವೈಷ್ಣ॒ವ್ಯರ್ಚಾ, ಕ॒ಲ್ಪ॒ಯ॒ತಿ॒ ವೈ॒ಷ್ಣ॒ವೋ ವೈ] 21
ಕ॑ಲ್ಪಯತಿ ವೈಷ್ಣ॒ವೋ ವೈ ದೇ॒ವತ॑ಯಾ॒ ಯೂಪ॒-ಸ್ಸ್ವಯೈ॒ವೈನ॑-ನ್ದೇ॒ವತ॑ಯಾ ಕಲ್ಪಯತಿ॒ ದ್ವಾಭ್ಯಾ᳚-ಙ್ಕಲ್ಪಯತಿ ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ॒ ಯ-ಙ್ಕಾ॒ಮಯೇ॑ತ॒ ತೇಜ॑ಸೈನ-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ವ್ಯ॑ರ್ಧಯೇಯ॒-ಮಿತ್ಯ॑ಗ್ನಿ॒ಷ್ಠಾ-ನ್ತಸ್ಯಾಶ್ರಿ॑-ಮಾಹವ॒ನೀಯಾ॑ದಿ॒ತ್ಥಂ-ವೇಁ॒ತ್ಥಂ-ವಾಁ-ಽತಿ॑ ನಾವಯೇ॒-ತ್ತೇಜ॑ಸೈ॒ವೈನ॑-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ವ್ಯ॑ರ್ಧಯತಿ॒ ಯ-ಙ್ಕಾ॒ಮಯೇ॑ತ॒ ತೇಜ॑ಸೈನ-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ಸಮ॑ರ್ಧಯೇಯ॒ಮಿ- [ಸಮ॑ರ್ಧಯೇಯ॒ಮಿತಿ॑, ಅ॒ಗ್ನಿ॒ಷ್ಠಾ-] 22
-ತ್ಯ॑ಗ್ನಿ॒ಷ್ಠಾ-ನ್ತಸ್ಯಾಶ್ರಿ॑ಮಾಹವ॒ನೀಯೇ॑ನ॒ ಸ-ಮ್ಮಿ॑ನುಯಾ॒-ತ್ತೇಜ॑ಸೈ॒ವೈನ॑-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ಸಮ॑ರ್ಧಯತಿ ಬ್ರಹ್ಮ॒ವನಿ॑-ನ್ತ್ವಾ ಖ್ಷತ್ರ॒ವನಿ॒ಮಿತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಪರಿ॑ ವ್ಯಯ॒ತ್ಯೂರ್ಗ್ವೈ ರ॑ಶ॒ನಾ ಯಜ॑ಮಾನೇನ॒ ಯೂಪ॒-ಸ್ಸಮ್ಮಿ॑ತೋ॒ ಯಜ॑ಮಾನಮೇ॒ವೋರ್ಜಾ ಸಮ॑ರ್ಧಯತಿ ನಾಭಿದ॒ಘ್ನೇ ಪರಿ॑ ವ್ಯಯತಿ ನಾಭಿದ॒ಘ್ನ ಏ॒ವಾಸ್ಮಾ॒ ಊರ್ಜ॑-ನ್ದಧಾತಿ॒ ತಸ್ಮಾ᳚ನ್ನಾಭಿದ॒ಘ್ನ ಊ॒ರ್ಜಾ ಭು॑ಞ್ಜತೇ॒ ಯ-ಙ್ಕಾ॒ಮಯೇ॑ತೋ॒ರ್ಜೈನಂ॒- [ಯ-ಙ್ಕಾ॒ಮಯೇ॑ತೋ॒ರ್ಜೈನ᳚ಮ್, ವ್ಯ॑ರ್ಧಯೇಯ॒-] 23
ವ್ಯಁ॑ರ್ಧಯೇಯ॒-ಮಿತ್ಯೂ॒ರ್ಧ್ವಾಂ-ವಾಁ॒ ತಸ್ಯಾವಾ॑ಚೀಂ॒-ವಾಁ-ಽವೋ॑ಹೇದೂ॒ರ್ಜೈವೈನಂ॒-ವ್ಯಁ॑ರ್ಧಯತಿ॒ ಯದಿ॑ ಕಾ॒ಮಯೇ॑ತ॒ ವರ್ಷು॑ಕಃ ಪ॒ರ್ಜನ್ಯ॑-ಸ್ಸ್ಯಾ॒ದಿತ್ಯ-ವಾ॑ಚೀ॒ಮವೋ॑ಹೇ॒-ದ್ವೃಷ್ಟಿ॑ಮೇ॒ವ ನಿ ಯ॑ಚ್ಛತಿ॒ ಯದಿ॑ ಕಾ॒ಮಯೇ॒ತಾವ॑ರ್ಷುಕ-ಸ್ಸ್ಯಾ॒ದಿತ್ಯೂ॒ರ್ಧ್ವಾಮುದೂ॑ಹೇ॒-ದ್ವೃಷ್ಟಿ॑ಮೇ॒ವೋ-ದ್ಯ॑ಚ್ಛತಿ ಪಿತೃ॒ಣಾ-ನ್ನಿಖಾ॑ತ-ಮ್ಮನು॒ಷ್ಯಾ॑ಣಾಮೂ॒ರ್ಧ್ವ-ನ್ನಿಖಾ॑ತಾ॒ದಾ ರ॑ಶ॒ನಾಯಾ॒ ಓಷ॑ಧೀನಾಗ್ಂ ರಶ॒ನಾ ವಿಶ್ವೇ॑ಷಾ- [ವಿಶ್ವೇ॑ಷಾಮ್, ದೇ॒ವಾನಾ॑-] 24
-ನ್ದೇ॒ವಾನಾ॑-ಮೂ॒ರ್ಧ್ವಗ್ಂ ರ॑ಶ॒ನಾಯಾ॒ ಆ ಚ॒ಷಾಲಾ॒ದಿನ್ದ್ರ॑ಸ್ಯ ಚ॒ಷಾಲಗ್ಂ॑ ಸಾ॒ದ್ಧ್ಯಾನಾ॒ಮತಿ॑ರಿಕ್ತ॒ಗ್ಂ॒ ಸ ವಾ ಏ॒ಷ ಸ॑ರ್ವದೇವ॒ತ್ಯೋ॑ ಯದ್ಯೂಪೋ॒ ಯದ್ಯೂಪ॑-ಮ್ಮಿ॒ನೋತಿ॒ ಸರ್ವಾ॑ ಏ॒ವ ದೇ॒ವತಾಃ᳚ ಪ್ರೀಣಾತಿ ಯ॒ಜ್ಞೇನ॒ ವೈ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ತೇ॑-ಽಮನ್ಯನ್ತ ಮನು॒ಷ್ಯಾ॑ ನೋ॒-ಽನ್ವಾಭ॑ವಿಷ್ಯ॒ನ್ತೀತಿ॒ ತೇ ಯೂಪೇ॑ನ ಯೋಪಯಿ॒ತ್ವಾ ಸು॑ವ॒ರ್ಗಂ ಲೋಁ॒ಕಮಾ॑ಯ॒-ನ್ತಮೃಷ॑ಯೋ॒ ಯೂಪೇ॑ನೈ॒ವಾನು॒ ಪ್ರಾಜಾ॑ನ॒-ನ್ತ-ದ್ಯೂಪ॑ಸ್ಯ ಯೂಪ॒ತ್ವಂ- [ಯೂಪ॒ತ್ವಮ್, ಯ-ದ್ಯೂಪ॑-] 25
ಯಁ-ದ್ಯೂಪ॑-ಮ್ಮಿ॒ನೋತಿ॑ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಪ್ರಜ್ಞಾ᳚ತ್ಯೈ ಪು॒ರಸ್ತಾ᳚-ನ್ಮಿನೋತಿ ಪು॒ರಸ್ತಾ॒ದ್ಧಿ ಯ॒ಜ್ಞಸ್ಯ॑ ಪ್ರಜ್ಞಾ॒ಯತೇ ಪ್ರ॑ಜ್ಞಾತ॒ಗ್ಂ॒ ಹಿ ತ-ದ್ಯದತಿ॑ಪನ್ನ ಆ॒ಹುರಿ॒ದ-ಙ್ಕಾ॒ರ್ಯ॑ಮಾಸೀ॒ದಿತಿ॑ ಸಾ॒ದ್ಧ್ಯಾ ವೈ ದೇ॒ವಾ ಯ॒ಜ್ಞಮತ್ಯ॑ಮನ್ಯನ್ತ॒ ತಾನ್. ಯ॒ಜ್ಞೋ ನಾಸ್ಪೃ॑ಶ॒-ತ್ತಾನ್. ಯ-ದ್ಯ॒ಜ್ಞಸ್ಯಾತಿ॑ರಿಕ್ತ॒ಮಾಸೀ॒-ತ್ತದ॑ಸ್ಪೃಶ॒ದತಿ॑ರಿಕ್ತಂ॒-ವಾಁ ಏ॒ತ-ದ್ಯ॒ಜ್ಞಸ್ಯ॒ ಯದ॒ಗ್ನಾವ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ॒ಹರ॒ತ್ಯತಿ॑ರಿಕ್ತಮೇ॒ತ- [ಪ್ರ॒ಹರ॒ತ್ಯತಿ॑ರಿಕ್ತಮೇ॒ತತ್, ಯೂಪ॑ಸ್ಯ॒] 26
-ದ್ಯೂಪ॑ಸ್ಯ॒ ಯದೂ॒ರ್ಧ್ವ-ಞ್ಚ॒ಷಾಲಾ॒-ತ್ತೇಷಾ॒-ನ್ತ-ದ್ಭಾ॑ಗ॒ಧೇಯ॒-ನ್ತಾನೇ॒ವ ತೇನ॑ ಪ್ರೀಣಾತಿ ದೇ॒ವಾ ವೈ ಸಗ್ಗ್ಸ್ಥಿ॑ತೇ॒ ಸೋಮೇ॒ ಪ್ರ ಸ್ರುಚೋ-ಽಹ॑ರ॒-ನ್ಪ್ರ ಯೂಪ॒-ನ್ತೇ॑-ಽಮನ್ಯನ್ತ ಯಜ್ಞವೇಶ॒ಸಂ-ವಾಁ ಇ॒ದ-ಙ್ಕು॑ರ್ಮ॒ ಇತಿ॒ ತೇ ಪ್ರ॑ಸ್ತ॒ರಗ್ಗ್ ಸ್ರು॒ಚಾ-ನ್ನಿ॒ಷ್ಕ್ರಯ॑ಣ-ಮಪಶ್ಯ॒ನ್-ಥ್ಸ್ವರುಂ॒-ಯೂಁಪ॑ಸ್ಯ॒ ಸಗ್ಗ್ಸ್ಥಿ॑ತೇ॒ ಸೋಮೇ॒ ಪ್ರ ಪ್ರ॑ಸ್ತ॒ರಗ್ಂ ಹರ॑ತಿ ಜು॒ಹೋತಿ॒ ಸ್ವರು॒ಮಯ॑ಜ್ಞವೇಶಸಾಯ ॥ 27 ॥
(ದ॒ಧಾ॒ತಿ॒ – ಪ್ರತ್ಯೃ॒ – ಚಾ – ಸಮ॑ರ್ಧಯೇಯ॒ಮಿತ್ಯೂ॒ – ರ್ಜೈನಂ॒ – ವಿಁಶ್ವೇ॑ಷಾಂ – ಯೂಁಪ॒ತ್ವ – ಮತಿ॑ರಿಕ್ತಮೇ॒ತ-ದ್- ದ್ವಿಚ॑ತ್ವಾರಿಗ್ಂಶಚ್ಚ) (ಅ. 4)
ಸಾ॒ದ್ಧ್ಯಾ ವೈ ದೇ॒ವಾ ಅ॒ಸ್ಮಿಲ್ಲೋಁ॒ಕ ಆ॑ಸ॒-ನ್ನಾನ್ಯ-ತ್ಕಿ॑-ಞ್ಚ॒ನ ಮಿ॒ಷ-ತ್ತೇ᳚-ಽಗ್ನಿಮೇ॒ವಾಗ್ನಯೇ॒ ಮೇಧಾ॒ಯಾ ಽಲ॑ಭನ್ತ॒ ನ ಹ್ಯ॑ನ್ಯದಾ॑ಲ॒ಭ್ಯಂ॑-ಮವಿ॑ನ್ದ॒-ನ್ತತೋ॒ ವಾ ಇ॒ಮಾಃ ಪ್ರ॒ಜಾಃ ಪ್ರಾಜಾ॑ಯನ್ತ॒ ಯದ॒ಗ್ನಾವ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ॒ಹರ॑ತಿ ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ರು॒ದ್ರೋ ವಾ ಏ॒ಷ ಯದ॒ಗ್ನಿರ್ಯಜ॑ಮಾನಃ ಪ॒ಶುರ್ಯ-ತ್ಪ॒ಶುಮಾ॒ಲಭ್ಯಾ॒ಗ್ನಿ-ಮ್ಮನ್ಥೇ᳚-ದ್ರು॒ದ್ರಾಯ॒ ಯಜ॑ಮಾನ॒- [ಯಜ॑ಮಾನಮ್, ಅಪಿ॑ ದದ್ಧ್ಯಾ-] 28
-ಮಪಿ॑ ದದ್ಧ್ಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ದಥೋ॒ ಖಲ್ವಾ॑ಹುರ॒ಗ್ನಿ-ಸ್ಸರ್ವಾ॑ ದೇ॒ವತಾ॑ ಹ॒ವಿರೇ॒ತದ್ಯ-ತ್ಪ॒ಶುರಿತಿ॒ ಯ-ತ್ಪ॒ಶುಮಾ॒ಲಭ್ಯಾ॒ಗ್ನಿ-ಮ್ಮನ್ಥ॑ತಿ ಹ॒ವ್ಯಾಯೈ॒ವಾ-ಽಽಸ॑ನ್ನಾಯ॒ ಸರ್ವಾ॑ ದೇ॒ವತಾ॑ ಜನಯ-ತ್ಯುಪಾ॒ಕೃತ್ಯೈ॒ವ ಮನ್ಥ್ಯ॒-ಸ್ತನ್ನೇವಾ-ಽಽಲ॑ಬ್ಧ॒-ನ್ನೇವಾನಾ॑ಲಬ್ಧ-ಮ॒ಗ್ನೇ-ರ್ಜ॒ನಿತ್ರ॑-ಮ॒ಸೀತ್ಯಾ॑ಹಾ॒ಗ್ನೇರ್ಹ್ಯೇ॑ತ-ಜ್ಜ॒ನಿತ್ರಂ॒-ವೃಁಷ॑ಣೌ ಸ್ಥ॒ ಇತ್ಯಾ॑ಹ॒ ವೃಷ॑ಣೌ॒ [ವೃಷ॑ಣೌ, ಹ್ಯೇ॑ತಾ-] 29
ಹ್ಯೇ॑ತಾ-ವು॒ರ್ವಶ್ಯ॑ಸ್ಯಾ॒ಯು-ರ॒ಸೀತ್ಯಾ॑ಹ ಮಿಥುನ॒ತ್ವಾಯ॑ ಘೃ॒ತೇನಾ॒ಕ್ತೇ ವೃಷ॑ಣ-ನ್ದಧಾಥಾ॒ಮಿತ್ಯಾ॑ಹ॒ ವೃಷ॑ಣ॒ಗ್ಗ್॒ ಹ್ಯೇ॑ತೇ ದಧಾ॑ತೇ॒ ಯೇ ಅ॒ಗ್ನಿ-ಙ್ಗಾ॑ಯ॒ತ್ರ-ಞ್ಛನ್ದೋ-ಽನು॒ ಪ್ರ ಜಾ॑ಯ॒ಸ್ವೇತ್ಯಾ॑ಹ॒ ಛನ್ದೋ॑ಭಿರೇ॒ವೈನ॒-ಮ್ಪ್ರ ಜ॑ನಯತ್ಯ॒ಗ್ನಯೇ॑ ಮ॒ಥ್ಯಮಾ॑ನಾ॒ಯಾನು॑ ಬ್ರೂ॒ಹೀತ್ಯಾ॑ಹ ಸಾವಿ॒ತ್ರೀಮೃಚ॒ಮನ್ವಾ॑ಹ ಸವಿ॒ತೃಪ್ರ॑ಸೂತ ಏ॒ವೈನ॑-ಮ್ಮನ್ಥತಿ ಜಾ॒ತಾಯಾನು॑ ಬ್ರೂಹಿ [ಬ್ರೂಹಿ, ಪ್ರ॒ಹ್ರಿ॒ಯಮಾ॑ಣಾ॒ಯಾ-ಽನು॑] 30
ಪ್ರಹ್ರಿ॒ಯಮಾ॑ಣಾ॒ಯಾ-ಽನು॑ ಬ್ರೂ॒ಹೀತ್ಯಾ॑ಹ॒ ಕಾಣ್ಡೇ॑ಕಾಣ್ಡ ಏ॒ವೈನ॑-ಙ್ಕ್ರಿ॒ಯಮಾ॑ಣೇ॒ ಸಮ॑ರ್ಧಯತಿ ಗಾಯ॒ತ್ರೀ-ಸ್ಸರ್ವಾ॒ ಅನ್ವಾ॑ಹ ಗಾಯ॒ತ್ರಛ॑ನ್ದಾ॒ ವಾ ಅ॒ಗ್ನಿ-ಸ್ಸ್ವೇನೈ॒ವೈನ॒-ಞ್ಛನ್ದ॑ಸಾ॒ ಸಮ॑ರ್ಧಯತ್ಯ॒ಗ್ನಿಃ ಪು॒ರಾ ಭವ॑ತ್ಯ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ ಹ॑ರತಿ॒ ತೌ ಸ॒ಭಂವಁ॑ನ್ತೌ॒ ಯಜ॑ಮಾನಮ॒ಭಿ ಸ-ಮ್ಭ॑ವತೋ॒ ಭವ॑ತ-ನ್ನ॒-ಸ್ಸಮ॑ನಸಾ॒ವಿತ್ಯಾ॑ಹ॒ ಶಾನ್ತ್ಯೈ᳚ ಪ್ರ॒ಹೃತ್ಯ॑ ಜುಹೋತಿ ಜಾ॒ತಾಯೈ॒ವಾಸ್ಮಾ॒ ಅನ್ನ॒ಮಪಿ॑ ದಧಾ॒ತ್ಯಾಜ್ಯೇ॑ನ ಜುಹೋತ್ಯೇ॒ತದ್ವಾ ಅ॒ಗ್ನೇಃ ಪ್ರಿ॒ಯ-ನ್ಧಾಮ॒ ಯದಾಜ್ಯ॑-ಮ್ಪ್ರಿ॒ಯೇಣೈ॒ವೈನ॒-ನ್ಧಾಮ್ನಾ॒ ಸಮ॑ರ್ಧಯ॒ತ್ಯಥೋ॒ ತೇಜ॑ಸಾ ॥ 31 ॥
(ಯಜ॑ಮಾನ-ಮಾಹ॒ ವೃಷ॑ಣೌ-ಜಾ॒ತಾಯಾನು॑ ಬ್ರೂ॒ಹ್ಯಾ-ಪ್ಯ॒ -ಷ್ಟಾದ॑ಶ ಚ) (ಅ. 5)
ಇ॒ಷೇ ತ್ವೇತಿ॑ ಬ॒ರ್॒ಹಿರಾ ದ॑ತ್ತ ಇ॒ಚ್ಛತ॑ ಇವ॒ ಹ್ಯೇ॑ಷ ಯೋ ಯಜ॑ತ ಉಪ॒ವೀರ॒ಸೀತ್ಯಾ॒ಹೋಪ॒ ಹ್ಯೇ॑ನಾನಾಕ॒ರೋತ್ಯುಪೋ॑ ದೇ॒ವಾ-ನ್ದೈವೀ॒ರ್ವಿಶಃ॒ ಪ್ರಾಗು॒ರಿತ್ಯಾ॑ಹ॒ ದೈವೀ॒ರ್ಹ್ಯೇ॑ತಾ ವಿಶ॑-ಸ್ಸ॒ತೀರ್ದೇ॒ವಾನು॑ಪ॒ಯನ್ತಿ॒ ವಹ್ನೀ॑ರು॒ಶಿಜ॒ ಇತ್ಯಾ॑ಹ॒ರ್ತ್ವಿಜೋ॒ ವೈ ವಹ್ನ॑ಯ ಉ॒ಶಿಜ॒-ಸ್ತಸ್ಮಾ॑ದೇ॒ವಮಾ॑ಹ॒ ಬೃಹ॑ಸ್ಪತೇ ಧಾ॒ರಯಾ॒ ವಸೂ॒ನೀ- [ವಸೂ॒ನೀತಿ॑, ಆ॒ಹ॒ ಬ್ರಹ್ಮ॒ ವೈ] 32
-ತ್ಯಾ॑ಹ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ಹ॒ವ್ಯಾ ತೇ᳚ ಸ್ವದನ್ತಾ॒ಮಿತ್ಯಾ॑ಹ ಸ್ವ॒ದಯ॑ತ್ಯೇ॒ವೈನಾ॒-ನ್ದೇವ॑ ತ್ವಷ್ಟ॒ರ್ವಸು॑ ರ॒ಣ್ವೇತ್ಯಾ॑ಹ॒ ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಗ್ಂ॑ ರೂಪ॒ಕೃ-ದ್ರೂ॒ಪಮೇ॒ವ ಪ॒ಶುಷು॑ ದಧಾತಿ॒ ರೇವ॑ತೀ॒ ರಮ॑ದ್ಧ್ವ॒ಮಿತ್ಯಾ॑ಹ ಪ॒ಶವೋ॒ ವೈ ರೇ॒ವತೀಃ᳚ ಪ॒ಶೂನೇ॒ವಾಸ್ಮೈ॑ ರಮಯತಿ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॑ [ಇತಿ॑, ರ॒ಶ॒ನಾಮಾ ದ॑ತ್ತೇ॒] 33
ರಶ॒ನಾಮಾ ದ॑ತ್ತೇ॒ ಪ್ರಸೂ᳚ತ್ಯಾ ಅ॒ಶ್ವಿನೋ᳚ರ್ಬಾ॒ಹುಭ್ಯಾ॒-ಮಿತ್ಯಾ॑ಹಾ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯಾ॑ ಋ॒ತಸ್ಯ॑ ತ್ವಾ ದೇವಹವಿಃ॒ ಪಾಶೇ॒ನಾ-ಽಽ ರ॑ಭ॒ ಇತ್ಯಾ॑ಹ ಸ॒ತ್ಯಂ-ವಾಁ ಋ॒ತಗ್ಂ ಸ॒ತ್ಯೇನೈ॒ವೈನ॑ಮೃ॒ತೇನಾ ಽಽರ॑ಭತೇ ಽಖ್ಷ್ಣ॒ಯಾ ಪರಿ॑ ಹರತಿ॒ ವದ್ಧ್ಯ॒ಗ್ಂ॒ ಹಿ ಪ್ರ॒ತ್ಯಞ್ಚ॑-ಮ್ಪ್ರತಿ ಮು॒ಞ್ಚನ್ತಿ॒ ವ್ಯಾವೃ॑ತ್ತ್ಯೈ॒ ಧರ್ಷಾ॒ ಮಾನು॑ಷಾ॒ನಿತಿ॒ ನಿ ಯು॑ನಕ್ತಿ॒ ಧೃತ್ಯಾ॑ ಅ॒ದ್ಭ್ಯ- [ಅ॒ದ್ಭ್ಯಃ, ತ್ವೌಷ॑ಧೀಭ್ಯಃ॒] 34
-ಸ್ತ್ವೌಷ॑ಧೀಭ್ಯಃ॒ ಪ್ರೋಖ್ಷಾ॒ಮೀತ್ಯಾ॑ಹಾ॒ದ್ಭ್ಯೋ ಹ್ಯೇ॑ಷ ಓಷ॑ಧೀಭ್ಯ-ಸ್ಸ॒ಭಂವಁ॑ತಿ॒ ಯ-ತ್ಪ॒ಶುರ॒ಪಾ-ಮ್ಪೇ॒ರುರ॒ಸೀತ್ಯಾ॑ಹೈ॒ಷ ಹ್ಯ॑ಪಾ-ಮ್ಪಾ॒ತಾ ಯೋ ಮೇಧಾ॑ಯಾ-ಽಽ ರ॒ಭ್ಯತೇ᳚ ಸ್ವಾ॒ತ್ತ-ಞ್ಚಿ॒-ಥ್ಸದೇ॑ವಗ್ಂ ಹ॒ವ್ಯಮಾಪೋ॑ ದೇವೀ॒-ಸ್ಸ್ವದ॑ತೈನ॒ಮಿತ್ಯಾ॑ಹ ಸ್ವ॒ದಯ॑ತ್ಯೇ॒ವೈನ॑-ಮು॒ಪರಿ॑ಷ್ಟಾ॒-ತ್ಪ್ರೋಖ್ಷ॑ತ್ಯು॒ಪರಿ॑ಷ್ಟಾದೇ॒ವೈನ॒-ಮ್ಮೇದ್ಧ್ಯ॑-ಙ್ಕರೋತಿ ಪಾ॒ಯಯ॑ತ್ಯನ್ತರ॒ತ ಏ॒ವೈನ॒-ಮ್ಮೇದ್ಧ್ಯ॑-ಙ್ಕರೋತ್ಯ॒ಧಸ್ತಾ॒ದುಪೋ᳚ಖ್ಷತಿ ಸ॒ರ್ವತ॑ ಏ॒ವೈನ॒-ಮ್ಮೇದ್ಧ್ಯ॑-ಙ್ಕರೋತಿ ॥ 35 ॥
(ವಸೂ॒ನೀತಿ॑-ಪ್ರಸ॒ವ ಇತ್ಯ॒-ದ್ಭ್ಯೋ᳚-ಽನ್ತರ॒ತ ಏ॒ವೈನಂ॒ – ದಶ॑ ಚ) (ಅ. 6)
ಅ॒ಗ್ನಿನಾ॒ ವೈ ಹೋತ್ರಾ॑ ದೇ॒ವಾ ಅಸು॑ರಾ-ನ॒ಭ್ಯ॑ಭವ-ನ್ನ॒ಗ್ನಯೇ॑ ಸಮಿ॒ದ್ಧ್ಯಮಾ॑ನಾ॒ಯಾನು॑ ಬ್ರೂ॒ಹೀತ್ಯಾ॑ಹ॒ ಭ್ರಾತೃ॑ವ್ಯಾಭಿಭೂತ್ಯೈ ಸ॒ಪ್ತದ॑ಶ ಸಾಮಿಧೇ॒ನೀರನ್ವಾ॑ಹ ಸಪ್ತದ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಸ॒ಪ್ತದ॒ಶಾನ್ವಾ॑ಹ॒ ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವ॒-ಸ್ಸ ಸಂ॑ವಁಥ್ಸ॒ರ-ಸ್ಸಂ॑ವಁಥ್ಸ॒ರ-ಮ್ಪ್ರ॒ಜಾ ಅನು॒ ಪ್ರಜಾ॑ಯನ್ತೇ ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ದೇ॒ವಾ ವೈ ಸಾ॑ಮಿಧೇ॒ನೀರ॒ನೂಚ್ಯ॑ ಯ॒ಜ್ಞ-ನ್ನಾನ್ವ॑ಪಶ್ಯ॒ನ್-ಥ್ಸ ಪ್ರ॒ಜಾಪ॑ತಿ-ಸ್ತೂ॒ಷ್ಣೀ-ಮಾ॑ಘಾ॒ರ- [-ಮಾ॑ಘಾ॒ರಮ್, ಆ ಽಘಾ॑ರಯ॒-ತ್ತತೋ॒ ವೈ] 36
-ಮಾ ಽಘಾ॑ರಯ॒-ತ್ತತೋ॒ ವೈ ದೇ॒ವಾ ಯ॒ಜ್ಞಮನ್ವ॑ಪಶ್ಯ॒ನ್॒. ಯ-ತ್ತೂ॒ಷ್ಣೀ-ಮಾ॑ಘಾ॒ರ-ಮಾ॑ಘಾ॒ರಯ॑ತಿ ಯ॒ಜ್ಞಸ್ಯಾನು॑ಖ್ಯಾತ್ಯಾ॒ ಅಸು॑ರೇಷು॒ ವೈ ಯ॒ಜ್ಞ ಆ॑ಸೀ॒-ತ್ತ-ನ್ದೇ॒ವಾಸ್ತೂ᳚ಷ್ಣೀಗ್ಂ ಹೋ॒ಮೇನಾ॑ವೃಞ್ಜತ॒ ಯ-ತ್ತೂ॒ಷ್ಣೀ-ಮಾ॑ಘಾ॒ರ-ಮಾ॑ಘಾ॒ರಯ॑ತಿ॒ ಭ್ರಾತೃ॑ವ್ಯಸ್ಯೈ॒ ವ ತ-ದ್ಯ॒ಜ್ಞಂ-ವೃಁ॑ಙ್ಕ್ತೇ ಪರಿ॒ಧೀ॑ನ್-ಥ್ಸ-ಮ್ಮಾ᳚ರ್ಷ್ಟಿ ಪು॒ನಾತ್ಯೇ॒ವೈನಾ॒-ನ್ತ್ರಿಸ್ತ್ರಿ॒-ಸ್ಸ-ಮ್ಮಾ᳚ರ್ಷ್ಟಿ॒ ತ್ರ್ಯಾ॑ವೃ॒ದ್ಧಿ ಯ॒ಜ್ಞೋ-ಽಥೋ॒ ರಖ್ಷ॑ಸಾ॒ಮಪ॑ಹತ್ಯೈ॒ ದ್ವಾದ॑ಶ॒ ಸ-ಮ್ಪ॑ದ್ಯನ್ತೇ॒ ದ್ವಾದ॑ಶ॒ [ದ್ವಾದ॑ಶ, ಮಾಸಾ᳚-ಸ್ಸಂವಁಥ್ಸ॒ರ-] 37
ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ॒ ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರೋ᳚-ಽಗ್ನಿ-ಸ್ಸರ್ವಾ॑ ದೇ॒ವತಾ॒ ಯದಾ॑ಘಾ॒ರ-ಮಾ॑ಘಾ॒ರಯ॑ತಿ ಶೀರ್ಷ॒ತ ಏ॒ವ ಯ॒ಜ್ಞಸ್ಯ॒ ಯಜ॑ಮಾನ॒-ಸ್ಸರ್ವಾ॑ ದೇ॒ವತಾ॒ ಅವ॑ ರುನ್ಧೇ॒ ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರ ಆ॒ತ್ಮಾ ಪ॒ಶುರಾ॑ಘಾ॒ರಮಾ॒ಘಾರ್ಯ॑ ಪ॒ಶುಗ್ಂ ಸಮ॑ನಕ್ತ್ಯಾ॒ತ್ಮನ್ನೇ॒ವ ಯ॒ಜ್ಞಸ್ಯ॒ [ಯ॒ಜ್ಞಸ್ಯ॑, ಶಿರಃ॒ ಪ್ರತಿ॑ ದಧಾತಿ॒] 38
ಶಿರಃ॒ ಪ್ರತಿ॑ ದಧಾತಿ॒ ಸ-ನ್ತೇ᳚ ಪ್ರಾ॒ಣೋ ವಾ॒ಯುನಾ॑ ಗಚ್ಛತಾ॒ಮಿತ್ಯಾ॑ಹ ವಾಯುದೇವ॒ತ್ಯೋ॑ ವೈ ಪ್ರಾ॒ಣೋ ವಾ॒ಯಾವೇ॒ವಾಸ್ಯ॑ ಪ್ರಾ॒ಣ-ಞ್ಜು॑ಹೋತಿ॒ ಸಂ-ಯಁಜ॑ತ್ರೈ॒ರಙ್ಗಾ॑ನಿ॒ ಸಂ-ಯಁ॒ಜ್ಞಪ॑ತಿರಾ॒ಶಿಷೇತ್ಯಾ॑ಹ ಯ॒ಜ್ಞಪ॑ತಿಮೇ॒ವಾಸ್ಯಾ॒-ಽಽಶಿಷ॑-ಙ್ಗಮಯತಿ ವಿ॒ಶ್ವರೂ॑ಪೋ॒ ವೈ ತ್ವಾ॒ಷ್ಟ್ರ ಉ॒ಪರಿ॑ಷ್ಟಾ-ತ್ಪ॒ಶುಮ॒ಭ್ಯ॑ವಮೀ॒-ತ್ತಸ್ಮಾ॑-ದು॒ಪರಿ॑ಷ್ಟಾ-ತ್ಪ॒ಶೋರ್ನಾವ॑ ದ್ಯನ್ತಿ॒ ಯದು॒ಪರಿ॑ಷ್ಟಾ-ತ್ಪ॒ಶುಗ್ಂ ಸ॑ಮ॒ನಕ್ತಿ॒ ಮೇದ್ಧ್ಯ॑ಮೇ॒ವೈ- [ಮೇದ್ಧ್ಯ॑ಮೇ॒ವ, ಏ॒ನ॒-ಙ್ಕ॒ರೋ॒ತ್ಯೃ॒ತ್ವಿಜೋ॑] 39
-ನ॑-ಙ್ಕರೋತ್ಯೃ॒ತ್ವಿಜೋ॑ ವೃಣೀತೇ॒ ಛನ್ದಾಗ್॑ಸ್ಯೇ॒ವ ವೃ॑ಣೀತೇ ಸ॒ಪ್ತ ವೃ॑ಣೀತೇ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವ॑-ಸ್ಸ॒ಪ್ತಾ-ಽಽರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑ಸ್ಯು॒ಭಯ॒ಸ್ಯಾ ವ॑ರುದ್ಧ್ಯಾ॒ ಏಕಾ॑ದಶ ಪ್ರಯಾ॒ಜಾನ್. ಯ॑ಜತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತ-ಮ್ಪ್ರ ಯ॑ಜತಿ ವ॒ಪಾಮೇಕಃ॒ ಪರಿ॑ ಶಯ ಆ॒ತ್ಮೈವಾ-ಽಽತ್ಮಾನ॒-ಮ್ಪರಿ॑ ಶಯೇ॒ ವಜ್ರೋ॒ ವೈ ಸ್ವಧಿ॑ತಿ॒ರ್ವಜ್ರೋ॑ ಯೂಪಶಕ॒ಲೋ ಘೃ॒ತ-ಙ್ಖಲು॒ ವೈ ದೇ॒ವಾ ವಜ್ರ॑-ಙ್ಕೃ॒ತ್ವಾ ಸೋಮ॑ಮಘ್ನ-ನ್ಘೃ॒ತೇನಾ॒ಕ್ತೌ ಪ॒ಶು-ನ್ತ್ರಾ॑ಯೇಥಾ॒ಮಿತ್ಯಾ॑ಹ॒ ವಜ್ರೇ॑ಣೈ॒ವೈನಂ॒-ವಁಶೇ॑ ಕೃ॒ತ್ವಾ-ಽಽಲ॑ಭತೇ ॥ 40 ॥
(ಆ॒ಘಾ॒ರಂ – ಪ॑ದ್ಯನ್ತೇ॒ ದ್ವಾದ॑ಶಾ॒ – ಽಽತ್ಮನ್ನೇ॒ವ ಯ॒ಜ್ಞಸ್ಯ॒ – ಮೇಧ್ಯ॑ಮೇ॒ವ – ಖಲು॒ ವಾ – ಅ॒ಷ್ಟಾದ॑ಶ ಚ) (ಅ. 7)
ಪರ್ಯ॑ಗ್ನಿ ಕರೋತಿ ಸರ್ವ॒ಹುತ॑ಮೇ॒ವೈನ॑-ಙ್ಕರೋ॒ತ್ಯ-ಸ್ಕ॑ನ್ದಾ॒ಯಾ-ಸ್ಕ॑ನ್ನ॒ಗ್ಂ॒ ಹಿ ತ-ದ್ಯ-ದ್ಧು॒ತಸ್ಯ॒ ಸ್ಕನ್ದ॑ತಿ॒ ತ್ರಿಃ ಪರ್ಯ॑ಗ್ನಿ ಕರೋತಿ॒ ತ್ರ್ಯಾ॑ವೃ॒ದ್ಧಿ ಯ॒ಜ್ಞೋ-ಽಥೋ॒ ರಖ್ಷ॑ಸಾ॒ಮಪ॑ಹತ್ಯೈ ಬ್ರಹ್ಮವಾ॒ದಿನೋ॑ ವದನ್ತ್ಯನ್ವಾ॒ರಭ್ಯಃ॑ ಪ॒ಶೂ(3)-ರ್ನಾನ್ವಾ॒ರಭ್ಯಾ(3) ಇತಿ॑ ಮೃ॒ತ್ಯವೇ॒ ವಾ ಏ॒ಷ ನೀ॑ಯತೇ॒ ಯ-ತ್ಪ॒ಶುಸ್ತಂ-ಯಁದ॑ನ್ವಾ॒ರಭೇ॑ತ ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾ॒ದಥೋ॒ ಖಲ್ವಾ॑ಹು-ಸ್ಸುವ॒ರ್ಗಾಯ॒ ವಾ ಏ॒ಷ ಲೋ॒ಕಾಯ॑ ನೀಯತೇ॒ ಯ- [ಯತ್, ಪ॒ಶುರಿತಿ॒] 41
-ತ್ಪ॒ಶುರಿತಿ॒ ಯನ್ನಾನ್ವಾ॒ರಭೇ॑ತ ಸುವ॒ರ್ಗಾಲ್ಲೋ॒ಕಾ-ದ್ಯಜ॑ಮಾನೋ ಹೀಯೇತ ವಪಾ॒ಶ್ರಪ॑ಣೀಭ್ಯಾ-ಮ॒ನ್ವಾರ॑ಭತೇ॒ ತನ್ನೇವಾ॒ನ್ವಾರ॑ಬ್ಧ॒-ನ್ನೇವಾನ॑ನ್ವಾರಬ್ಧ॒ಮುಪ॒ ಪ್ರೇಷ್ಯ॑ ಹೋತರ್ಹ॒ವ್ಯಾ ದೇ॒ವೇಭ್ಯ॒ ಇತ್ಯಾ॑ಹೇಷಿ॒ತಗ್ಂ ಹಿ ಕರ್ಮ॑ ಕ್ರಿ॒ಯತೇ॒ ರೇವ॑ತೀರ್ಯ॒ಜ್ಞಪ॑ತಿ-ಮ್ಪ್ರಿಯ॒ಧಾ ಽಽವಿ॑ಶ॒ತೇತ್ಯಾ॑ಹ ಯಥಾಯ॒ಜುರೇ॒ವೈತದ॒ಗ್ನಿನಾ॑ ಪು॒ರಸ್ತಾ॑ದೇತಿ॒ ರಖ್ಷ॑ಸಾ॒ಮಪ॑ಹತ್ಯೈ ಪೃಥಿ॒ವ್ಯಾ-ಸ್ಸ॒ಪೃಞ್ಚಃ॑ ಪಾ॒ಹೀತಿ॑ ಬ॒ರ್॒ಹಿ- [ಬ॒ರ್॒ಹಿಃ, ಉಪಾ᳚-ಽಸ್ಯ॒ತ್ಯ-ಸ್ಕ॑ನ್ದಾ॒ಯಾ-] 42
-ರುಪಾ᳚-ಽಸ್ಯ॒ತ್ಯ-ಸ್ಕ॑ನ್ದಾ॒ಯಾ-ಸ್ಕ॑ನ್ನ॒ಗ್ಂ॒ ಹಿ ತ-ದ್ಯ-ದ್ಬ॒ರ್॒ಹಿಷಿ॒ ಸ್ಕನ್ದ॒ತ್ಯಥೋ॑ ಬರ್ಹಿ॒ಷದ॑ಮೇ॒ವೈನ॑-ಙ್ಕರೋತಿ॒ ಪರಾಂ॒ಆ ವ॑ರ್ತತೇ-ಽದ್ಧ್ವ॒ರ್ಯುಃ ಪ॒ಶೋ-ಸ್ಸ᳚ಜ್ಞ॒ಮ್ಪ್ಯಮಾ॑ನಾ-ತ್ಪ॒ಶುಭ್ಯ॑ ಏ॒ವ ತನ್ನಿ ಹ್ನು॑ತ ಆ॒ತ್ಮನೋ-ಽನಾ᳚ವ್ರಸ್ಕಾಯ॒ ಗಚ್ಛ॑ತಿ॒ ಶ್ರಿಯ॒-ಮ್ಪ್ರ ಪ॒ಶೂನಾ᳚ಪ್ನೋತಿ॒ ಯ ಏ॒ವಂ-ವೇಁದ॑ ಪ॒ಶ್ಚಾಲ್ಲೋ॑ಕಾ॒ ವಾ ಏ॒ಷಾ ಪ್ರಾಚ್ಯು॒ದಾನೀ॑ಯತೇ॒ ಯ-ತ್ಪತ್ನೀ॒ ನಮ॑ಸ್ತ ಆತಾ॒ನೇತ್ಯಾ॑ಹಾ-ಽಽದಿ॒ತ್ಯಸ್ಯ॒ ವೈ ರ॒ಶ್ಮಯ॑ [ರ॒ಶ್ಮಯಃ॑, ಆ॒ತಾ॒ನಾಸ್ತೇಭ್ಯ॑] 43
ಆತಾ॒ನಾಸ್ತೇಭ್ಯ॑ ಏ॒ವ ನಮ॑ಸ್ಕರೋತ್ಯನ॒ರ್ವಾ ಪ್ರೇಹೀತ್ಯಾ॑ಹ॒ ಭ್ರಾತೃ॑ವ್ಯೋ॒ ವಾ ಅರ್ವಾ॒ ಭ್ರಾತೃ॑ವ್ಯಾಪನುತ್ತ್ಯೈ ಘೃ॒ತಸ್ಯ॑ ಕು॒ಲ್ಯಾಮನು॑ ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॒ಣೇ-ತ್ಯಾ॑ಹಾ॒ ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತ॒ ಆಪೋ॑ ದೇವೀ-ಶ್ಶುದ್ಧಾಯುವ॒ ಇತ್ಯಾ॑ಹ ಯಥಾಯ॒ಜುರೇ॒ವೈತತ್ ॥ 44 ॥
(ಲೋ॒ಕಾಯ॑ ನೀಯತೇ॒ ಯ-ದ್- ಬ॒ರ॒ಃಈ – ರ॒ಶ್ಮಯಃ॑ – ಸ॒ಪ್ತತ್ರಿಗ್ಂ॑ಶಚ್ಚ) (ಅ. 8)
ಪ॒ಶೋರ್ವಾ ಆಲ॑ಬ್ಧಸ್ಯ ಪ್ರಾ॒ಣಾಞ್ಛುಗೃ॑ಚ್ಛತಿ॒ ವಾಕ್ತ॒ ಆ ಪ್ಯಾ॑ಯತಾ-ಮ್ಪ್ರಾ॒ಣಸ್ತ॒ ಆ ಪ್ಯಾ॑ಯತಾ॒ಮಿತ್ಯಾ॑ಹ ಪ್ರಾ॒ಣೇಭ್ಯ॑ ಏ॒ವಾಸ್ಯ॒ ಶುಚಗ್ಂ॑ ಶಮಯತಿ॒ ಸಾ ಪ್ರಾ॒ಣೇಭ್ಯೋ-ಽಧಿ॑ ಪೃಥಿ॒ವೀಗ್ಂ ಶು-ಕ್ಪ್ರ ವಿ॑ಶತಿ॒ ಶಮಹೋ᳚ಭ್ಯಾ॒ಮಿತಿ॒ ನಿ ನ॑ಯತ್ಯಹೋರಾ॒ತ್ರಾಭ್ಯಾ॑ಮೇ॒ವ ಪೃ॑ಥಿ॒ವ್ಯೈ ಶುಚಗ್ಂ॑ ಶಮಯ॒ತ್ಯೋಷ॑ಧೇ॒ ತ್ರಾ॑ಯಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ರಿತ್ಯಾ॑ಹ॒ ವಜ್ರೋ॒ ವೈ ಸ್ವಧಿ॑ತಿ॒- [ಸ್ವಧಿ॑ತಿಃ, ಶಾನ್ತ್ಯೈ॑ ಪಾರ್ಶ್ವ॒ತ] 45
-ಶ್ಶಾನ್ತ್ಯೈ॑ ಪಾರ್ಶ್ವ॒ತ ಆ ಚ್ಛ್ಯ॑ತಿ ಮದ್ಧ್ಯ॒ತೋ ಹಿ ಮ॑ನು॒ಷ್ಯಾ॑ ಆ॒ ಚ್ಛ್ಯನ್ತಿ॑ ತಿರ॒ಶ್ಚೀನ॒ಮಾ ಚ್ಛ್ಯ॑ತ್ಯನೂ॒ಚೀನ॒ಗ್ಂ॒ ಹಿ ಮ॑ನು॒ಷ್ಯಾ॑ ಆ॒ಚ್ಛ್ಯನ್ತಿ॒ ವ್ಯಾವೃ॑ತ್ತ್ಯೈ॒ ರಖ್ಷ॑ಸಾ-ಮ್ಭಾ॒ಗೋ॑-ಽಸೀತಿ॑ ಸ್ಥವಿಮ॒ತೋ ಬ॒ರ್॒ಹಿರ॒ಕ್ತ್ವಾ-ಽಪಾ᳚ಸ್ಯತ್ಯ॒ಸ್ನೈವ ರಖ್ಷಾಗ್ಂ॑ಸಿ ನಿ॒ರವ॑ದಯತ ಇ॒ದಮ॒ಹಗ್ಂ ರಖ್ಷೋ॑-ಽಧ॒ಮ-ನ್ತಮೋ॑ ನಯಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇತ್ಯಾ॑ಹ॒ ದ್ವೌ ವಾವ ಪುರು॑ಷೌ॒ ಯ-ಞ್ಚೈ॒ವ [ ] 46
ದ್ವೇಷ್ಟಿ॒ ಯಶ್ಚೈ॑ನ॒-ನ್ದ್ವೇಷ್ಟಿ॒ ತಾವು॒ಭಾವ॑ಧ॒ಮ-ನ್ತಮೋ॑ ನಯತೀ॒ಷೇ ತ್ವೇತಿ॑ ವ॒ಪಾಮುತ್ಖಿ॑ದತೀ॒ಚ್ಛತ॑ ಇವ॒ ಹ್ಯೇ॑ಷ ಯೋ ಯಜ॑ತೇ॒ ಯದು॑ಪತೃ॒ನ್ದ್ಯಾ-ದ್ರು॒ದ್ರೋ᳚-ಽಸ್ಯ ಪ॒ಶೂ-ನ್ಘಾತು॑ಕ-ಸ್ಸ್ಯಾ॒-ದ್ಯನ್ನೋಪ॑ತೃ॒ನ್ದ್ಯಾ-ದಯ॑ತಾ ಸ್ಯಾ-ದ॒ನ್ಯಯೋ॑ಪತೃ॒ಣತ್ತ್ಯ॒ನ್ಯಯಾ॒ ನ ಧೃತ್ಯೈ॑ ಘೃ॒ತೇನ॑ ದ್ಯಾವಾಪೃಥಿವೀ॒ ಪ್ರೋರ್ಣ್ವಾ॑ಥಾ॒ಮಿತ್ಯಾ॑ಹ॒ ದ್ಯಾವಾ॑ಪೃಥಿ॒ವೀ ಏ॒ವ ರಸೇ॑ನಾನ॒ಕ್ತ್ಯಚ್ಛಿ॑ನ್ನೋ॒ [ರಸೇ॑ನಾನ॒ಕ್ತ್ಯಚ್ಛಿ॑ನ್ನಃ, ರಾಯ॑-ಸ್ಸು॒ವೀರ॒] 47
ರಾಯ॑-ಸ್ಸು॒ವೀರ॒ ಇತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ॒ ಯ-ದ್ವ॒ಪಾ-ಮು॑ತ್ಖಿ॒ದ-ತ್ಯು॒ರ್ವ॑ನ್ತರಿ॑ಖ್ಷ॒-ಮನ್ವಿ॒ಹೀತ್ಯಾ॑ಹ॒ ಶಾನ್ತ್ಯೈ॒ ಪ್ರ ವಾ ಏ॒ಷೋ᳚-ಽಸ್ಮಾಲ್ಲೋ॒ಕಾಚ್ಚ್ಯ॑ವತೇ॒ ಯಃ ಪ॒ಶು-ಮ್ಮೃ॒ತ್ಯವೇ॑ ನೀ॒ಯಮಾ॑ನಮನ್ವಾ॒ರಭ॑ತೇ ವಪಾ॒ಶ್ರಪ॑ಣೀ॒ ಪುನ॑ರ॒ನ್ವಾರ॑ಭತೇ॒-ಽಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ ತಿಷ್ಠತ್ಯ॒ಗ್ನಿನಾ॑ ಪು॒ರಸ್ತಾ॑ದೇತಿ॒ ರಖ್ಷ॑ಸಾ॒ಮಪ॑ಹತ್ಯಾ॒ ಅಥೋ॑ ದೇ॒ವತಾ॑ ಏ॒ವ ಹ॒ವ್ಯೇನಾ- [ಏ॒ವ ಹ॒ವ್ಯೇನ॑, ಅನ್ವೇ॑ತಿ॒] 48
-ನ್ವೇ॑ತಿ॒ ನಾನ್ತ॒ಮಮಙ್ಗಾ॑ರ॒ಮತಿ॑ ಹರೇ॒-ದ್ಯದ॑ನ್ತ॒ಮಮಙ್ಗಾ॑ರಮತಿ॒ ಹರೇ᳚-ದ್ದೇ॒ವತಾ॒ ಅತಿ॑ ಮನ್ಯೇತ॒ ವಾಯೋ॒ ವೀಹಿ॑ ಸ್ತೋ॒ಕಾನಾ॒ಮಿತ್ಯಾ॑ಹ॒ ತಸ್ಮಾ॒-ದ್ವಿಭ॑ಕ್ತಾ-ಸ್ಸ್ತೋ॒ಕಾ ಅವ॑ ಪದ್ಯ॒ನ್ತೇ-ಽಗ್ರಂ॒-ವಾಁ ಏ॒ತ-ತ್ಪ॑ಶೂ॒ನಾಂ-ಯಁ-ದ್ವ॒ಪಾ-ಽಗ್ರ॒ಮೋಷ॑ಧೀನಾ-ಮ್ಬ॒ರ್॒ಹಿರಗ್ರೇ॑ಣೈ॒ವಾಗ್ರ॒ಗ್ಂ॒ ಸಮ॑ರ್ಧಯ॒ತ್ಯಥೋ॒ ಓಷ॑ಧೀಷ್ವೇ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯತಿ॒ ಸ್ವಾಹಾ॑ಕೃತೀಭ್ಯಃ॒ ಪ್ರೇಷ್ಯೇತ್ಯಾ॑ಹ [ ] 49
ಯ॒ಜ್ಞಸ್ಯ॒ ಸಮಿ॑ಷ್ಟ್ಯೈ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಮಾ॒ತ್ಮಾ ವ॒ಪಾ ಪೃ॑ಷದಾ॒ಜ್ಯಮ॑ಭಿ॒ಘಾರ್ಯ॑ ವ॒ಪಾಮ॒ಭಿ ಘಾ॑ರಯತ್ಯಾ॒ತ್ಮನ್ನೇ॒ವ ಪ॑ಶೂ॒ನಾ-ಮ್ಪ್ರಾ॑ಣಾಪಾ॒ನೌ ದ॑ಧಾತಿ॒ ಸ್ವಾಹೋ॒ರ್ಧ್ವನ॑ಭಸ-ಮ್ಮಾರು॒ತ-ಙ್ಗ॑ಚ್ಛತ॒ಮಿತ್ಯಾ॑ಹೋ॒ರ್ಧ್ವನ॑ಭಾ ಹ ಸ್ಮ॒ ವೈ ಮಾ॑ರು॒ತೋ ದೇ॒ವಾನಾಂ᳚-ವಁಪಾ॒ಶ್ರಪ॑ಣೀ॒ ಪ್ರ ಹ॑ರತಿ॒ ತೇನೈ॒ವೈನೇ॒ ಪ್ರ ಹ॑ರತಿ॒ ವಿಷೂ॑ಚೀ॒ ಪ್ರ ಹ॑ರತಿ॒ ತಸ್ಮಾ॒-ದ್ವಿಷ್ವ॑ಞ್ಚೌ ಪ್ರಾಣಾಪಾ॒ನೌ ॥ 50 ॥
(ಸ್ವಧಿ॑ತಿ – ಶ್ಚೈ॒ವಾ – ಚ್ಛಿ॑ನ್ನೋ – ಹ॒ವ್ಯೇನೇ॒ – ಷ್ಯೇತ್ಯಾ॑ಹ॒ – ಷಟ್ಚ॑ತ್ವಾರಿಗ್ಂಶಚ್ಚ) (ಅ. 9)
ಪ॒ಶುಮಾ॒ಲಭ್ಯ॑ ಪುರೋ॒ಡಾಶ॒-ನ್ನಿರ್ವ॑ಪತಿ॒ ಸಮೇ॑ಧಮೇ॒ವೈನ॒ಮಾ ಲ॑ಭತೇ ವ॒ಪಯಾ᳚ ಪ್ರ॒ಚರ್ಯ॑ ಪುರೋ॒ಡಾಶೇ॑ನ॒ ಪ್ರ ಚ॑ರ॒ತ್ಯೂರ್ಗ್ವೈ ಪು॑ರೋ॒ಡಾಶ॒ ಊರ್ಜ॑ಮೇ॒ವ ಪ॑ಶೂ॒ನಾ-ಮ್ಮ॑ದ್ಧ್ಯ॒ತೋ ದ॑ಧಾ॒ತ್ಯಥೋ॑ ಪ॒ಶೋರೇ॒ವ ಛಿ॒ದ್ರಮಪಿ॑ ದಧಾತಿ ಪೃಷದಾ॒ಜ್ಯಸ್ಯೋ॑ಪ॒ಹತ್ಯ॒ ತ್ರಿಃ ಪೃ॑ಚ್ಛತಿ ಶೃ॒ತಗ್ಂ ಹ॒ವೀ(3)-ಶ್ಶ॑ಮಿತ॒ರಿತಿ॒ ತ್ರಿಷ॑ತ್ಯಾ॒ ಹಿ ದೇ॒ವಾ ಯೋ-ಽಶೃ॑ತಗ್ಂ ಶೃ॒ತಮಾಹ॒ ಸ ಏನ॑ಸಾ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ- [ಏ॒ತೌ ಪ॑ಶೂ॒ನಾಮ್, ಯ-ತ್ಪೃ॑ಷದಾ॒ಜ್ಯ-ಮ್ಪ॒ಶೋಃ] 51
-ಯಁ-ತ್ಪೃ॑ಷದಾ॒ಜ್ಯ-ಮ್ಪ॒ಶೋಃ ಖಲು॒ ವಾ ಆಲ॑ಬ್ಧಸ್ಯ॒ ಹೃದ॑ಯಮಾ॒ತ್ಮಾ-ಽಭಿ ಸಮೇ॑ತಿ॒ ಯ-ತ್ಪೃ॑ಷದಾ॒ಜ್ಯೇನ॒ ಹೃದ॑ಯ-ಮಭಿಘಾ॒ರಯ॑ತ್ಯಾ॒ತ್ಮನ್ನೇ॒ವ ಪ॑ಶೂ॒ನಾ-ಮ್ಪ್ರಾ॑ಣಾಪಾ॒ನೌ ದ॑ಧಾತಿ ಪ॒ಶುನಾ॒ ವೈ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ತೇ॑-ಽಮನ್ಯನ್ತ ಮನು॒ಷ್ಯಾ॑ ನೋ॒-ಽನ್ವಾಭ॑ವಿಷ್ಯ॒ನ್ತೀತಿ॒ ತಸ್ಯ॒ ಶಿರ॑-ಶ್ಛಿ॒ತ್ತ್ವಾ ಮೇಧ॒-ಮ್ಪ್ರಾಖ್ಷಾ॑ರಯ॒ನ್ಥ್ಸ ಪ್ರ॒ಖ್ಷೋ॑-ಽಭವ॒-ತ್ತ-ತ್ಪ್ರ॒ಖ್ಷಸ್ಯ॑ ಪ್ರಖ್ಷ॒ತ್ವಂ-ಯಁ-ತ್ಪ್ಲ॑ಖ್ಷಶಾ॒ಖೋ-ತ್ತ॑ರಬ॒ರ್॒ಹಿ-ರ್ಭವ॑ತಿ॒ ಸಮೇ॑ಧಸ್ಯೈ॒ವ [ ] 52
ಪ॒ಶೋರವ॑ ದ್ಯತಿ ಪ॒ಶುಂ-ವೈಁ ಹ್ರಿ॒ಯಮಾ॑ಣ॒ಗ್ಂ॒ ರಖ್ಷಾ॒ಗ್॒ಸ್ಯನು॑ ಸಚನ್ತೇ-ಽನ್ತ॒ರಾ ಯೂಪ॑-ಞ್ಚಾ-ಽಽಹವ॒ನೀಯ॑-ಞ್ಚ ಹರತಿ॒ ರಖ್ಷ॑ಸಾ॒ಮಪ॑ಹತ್ಯೈ ಪ॒ಶೋರ್ವಾ ಆಲ॑ಬ್ಧಸ್ಯ॒ ಮನೋ-ಽಪ॑ ಕ್ರಾಮತಿ ಮ॒ನೋತಾ॑ಯೈ ಹ॒ವಿಷೋ॑-ಽವದೀ॒ಯಮಾ॑ನ॒ಸ್ಯಾನು॑ ಬ್ರೂ॒ಹೀತ್ಯಾ॑ಹ॒ ಮನ॑ ಏ॒ವಾಸ್ಯಾವ॑ ರುನ್ಧ॒ ಏಕಾ॑ದಶಾವ॒ದಾನಾ॒ನ್ಯವ॑ ದ್ಯತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತಸ್ಯಾ-ಽವ॑- [ಪ॒ಶುಸ್ತಸ್ಯಾ-ಽವ॑, ದ್ಯ॒ತಿ॒ ಹೃದ॑ಯ॒ಸ್ಯಾ-] 53
-ದ್ಯತಿ॒ ಹೃದ॑ಯ॒ಸ್ಯಾ-ಗ್ರೇ-ಽವ॑ ದ್ಯ॒ತ್ಯಥ॑ ಜಿ॒ಹ್ವಾಯಾ॒ ಅಥ॒ ವಖ್ಷ॑ಸೋ॒ ಯದ್ವೈ ಹೃದ॑ಯೇನಾಭಿ॒ಗಚ್ಛ॑ತಿ॒ ತಜ್ಜಿ॒ಹ್ವಯಾ॑ ವದತಿ॒ ಯಜ್ಜಿ॒ಹ್ವಯಾ॒ ವದ॑ತಿ॒ ತದುರ॒ಸೋ-ಽಧಿ॒ ನಿರ್ವ॑ದತ್ಯೇ॒ತದ್ವೈ ಪ॒ಶೋರ್ಯ॑ಥಾಪೂ॒ರ್ವಂ-ಯಁಸ್ಯೈ॒ವಮ॑ವ॒ದಾಯ॑ ಯಥಾ॒ಕಾಮ॒-ಮುತ್ತ॑ರೇಷಾಮವ॒ದ್ಯತಿ॑ ಯಥಾ ಪೂ॒ರ್ವಮೇ॒ವಾಸ್ಯ॑ ಪ॒ಶೋರವ॑ತ್ತ-ಮ್ಭವತಿ ಮದ್ಧ್ಯ॒ತೋ ಗು॒ದಸ್ಯಾವ॑ ದ್ಯತಿ ಮದ್ಧ್ಯ॒ತೋ ಹಿ ಪ್ರಾ॒ಣ ಉ॑ತ್ತ॒ಮಸ್ಯಾವ॑ ದ್ಯ- [ಉ॑ತ್ತ॒ಮಸ್ಯಾವ॑ ದ್ಯತಿ, ಉ॒ತ್ತ॒ಮೋ ಹಿ ಪ್ರಾ॒ಣೋ] 54
-ತ್ಯುತ್ತ॒ಮೋ ಹಿ ಪ್ರಾ॒ಣೋ ಯದೀತ॑ರಂ॒-ಯಁದೀತ॑ರ-ಮು॒ಭಯ॑ಮೇ॒ವಾಜಾ॑ಮಿ॒ ಜಾಯ॑ಮಾನೋ॒ ವೈ ಬ್ರಾ᳚ಹ್ಮ॒ಣ-ಸ್ತ್ರಿ॒ಭಿರ್-ಋ॑ಣ॒ವಾ ಜಾ॑ಯತೇ ಬ್ರಹ್ಮ॒ಚರ್ಯೇ॒ಣರ್ಷಿ॑ಭ್ಯೋ ಯ॒ಜ್ಞೇನ॑ ದೇ॒ವೇಭ್ಯಃ॑ ಪ್ರ॒ಜಯಾ॑ ಪಿ॒ತೃಭ್ಯ॑ ಏ॒ಷ ವಾ ಅ॑ನೃ॒ಣೋ ಯಃ ಪು॒ತ್ರೀ ಯಜ್ವಾ᳚ ಬ್ರಹ್ಮಚಾರಿವಾ॒ಸೀ ತದ॑ವ॒ದಾನೈ॑-ರೇ॒ವಾ-ಽವ॑ ದಯತೇ॒ ತದ॑ವ॒ದಾನಾ॑ನಾ-ಮವದಾನ॒ತ್ವ-ನ್ದೇ॑ವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಅ॒ಗ್ನಿಮ॑ಬ್ರುವ॒-ನ್ತ್ವಯಾ॑ ವೀ॒ರೇಣಾಸು॑ರಾನ॒ಭಿ ಭ॑ವಾ॒ಮೇತಿ॒ [ಭ॑ವಾ॒ಮೇತಿ॑, ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ] 55
ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ ಪ॒ಶೋರು॑ದ್ಧಾ॒ರಮುದ್ಧ॑ರಾ॒ ಇತಿ॒ ಸ ಏ॒ತಮು॑ದ್ಧಾ॒ರಮುದ॑ಹರತ॒ ದೋಃ ಪೂ᳚ರ್ವಾ॒ರ್ಧಸ್ಯ॑ ಗು॒ದ-ಮ್ಮ॑ದ್ಧ್ಯ॒ತ-ಶ್ಶ್ರೋಣಿ॑-ಞ್ಜಘನಾ॒ರ್ಧಸ್ಯ॒ ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯ-ತ್ತ್ರ್ಯ॒ಙ್ಗಾಣಾಗ್ಂ॑ ಸಮವ॒ದ್ಯತಿ॒ ಭ್ರಾತೃ॑ವ್ಯಾಭಿಭೂತ್ಯೈ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತ್ಯಖ್ಷ್ಣ॒ಯಾ-ಽವ॑ ದ್ಯತಿ॒ ತಸ್ಮಾ॑ದಖ್ಷ್ಣ॒ಯಾ ಪ॒ಶವೋ-ಽಙ್ಗಾ॑ನಿ॒ ಪ್ರ ಹ॑ರನ್ತಿ॒ ಪ್ರತಿ॑ಷ್ಠಿತ್ಯೈ ॥ 56 ॥
(ಏ॒ತೌ ಪ॑ಶೂ॒ನಾಗ್ಂ – ಸಮೇ॑ಧಸ್ಯೈ॒ವ – ತಸ್ಯಾ-ಽವೋ᳚ – ತ್ತ॒ಮಸ್ಯಾವ॑ ದ್ಯ॒ತೀ – ತಿ॒ – ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 10)
ಮೇದ॑ಸಾ॒ ಸ್ರುಚೌ॒ ಪ್ರೋರ್ಣೋ॑ತಿ॒ ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪಮೇ॒ವ ಪ॒ಶುಷು॑ ದಧಾತಿ ಯೂ॒ಷನ್ನ॑ವ॒ಧಾಯ॒ ಪ್ರೋರ್ಣೋ॑ತಿ॒ ರಸೋ॒ ವಾ ಏ॒ಷ ಪ॑ಶೂ॒ನಾಂ-ಯಁದ್ಯೂ ರಸ॑ಮೇ॒ವ ಪ॒ಶುಷು॑ ದಧಾತಿ ಪಾ॒ರ್ಶ್ವೇನ॑ ವಸಾಹೋ॒ಮ-ಮ್ಪ್ರಯೌ॑ತಿ॒ ಮದ್ಧ್ಯಂ॒-ವಾಁ ಏ॒ತ-ತ್ಪ॑ಶೂ॒ನಾಂ-ಯಁ-ತ್ಪಾ॒ರ್ಶ್ವಗ್ಂ ರಸ॑ ಏ॒ಷ ಪ॑ಶೂ॒ನಾಂ-ಯಁದ್ವಸಾ॒ ಯ-ತ್ಪಾ॒ರ್ಶ್ವೇನ॑ ವಸಾಹೋ॒ಮ-ಮ್ಪ್ರ॒ಯೌತಿ॑ ಮದ್ಧ್ಯ॒ತ ಏ॒ವ ಪ॑ಶೂ॒ನಾಗ್ಂ ರಸ॑-ನ್ದಧಾತಿ॒ ಘ್ನನ್ತಿ॒ [ಘ್ನನ್ತಿ॑, ವಾ ಏ॒ತ-ತ್ಪ॒ಶು-] 57
ವಾ ಏ॒ತ-ತ್ಪ॒ಶುಂ-ಯಁ-ಥ್ಸ᳚ಜ್ಞ॒ಮ್ಪಯ॑ನ್ತ್ಯೈ॒ನ್ದ್ರಃ ಖಲು॒ ವೈ ದೇ॒ವತ॑ಯಾ ಪ್ರಾ॒ಣ ಐ॒ನ್ದ್ರೋ॑-ಽಪಾ॒ನ ಐ॒ನ್ದ್ರಃ ಪ್ರಾ॒ಣೋ ಅಙ್ಗೇ॑ಅಙ್ಗೇ॒ ನಿ ದೇ᳚ದ್ಧ್ಯ॒ದಿತ್ಯಾ॑ಹ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತಿ॒ ದೇವ॑ ತ್ವಷ್ಟ॒ರ್ಭೂರಿ॑ ತೇ॒ ಸಗ್ಂ ಸ॑ಮೇ॒ತ್ವಿತ್ಯಾ॑ಹ ತ್ವಾ॒ಷ್ಟ್ರಾ ಹಿ ದೇ॒ವತ॑ಯಾ ಪ॒ಶವೋ॒ ವಿಷು॑ರೂಪಾ॒ ಯ-ಥ್ಸಲ॑ಖ್ಷ್ಮಾಣೋ॒ ಭವ॒ಥೇತ್ಯಾ॑ಹ॒ ವಿಷು॑ರೂಪಾ॒ ಹ್ಯೇ॑ತೇ ಸನ್ತ॒-ಸ್ಸಲ॑ಖ್ಷ್ಮಾಣ ಏ॒ತರ್ಹಿ॒ ಭವ॑ನ್ತಿ ದೇವ॒ತ್ರಾ ಯನ್ತ॒- [ದೇವ॒ತ್ರಾ ಯನ್ತ᳚ಮ್, ಅವ॑ಸೇ॒] 58
-ಮವ॑ಸೇ॒ ಸಖಾ॒ಯೋ-ಽನು॑ ತ್ವಾ ಮಾ॒ತಾ ಪಿ॒ತರೋ॑ ಮದ॒ನ್ತ್ವಿತ್ಯಾ॒ಹಾ-ನು॑ಮತಮೇ॒ವೈನ॑-ಮ್ಮಾ॒ತ್ರಾ ಪಿ॒ತ್ರಾ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತ್ಯರ್ಧ॒ರ್ಚೇ ವ॑ಸಾಹೋ॒ಮ-ಞ್ಜು॑ಹೋತ್ಯ॒ಸೌ ವಾ ಅ॑ರ್ಧ॒ರ್ಚ ಇ॒ಯಮ॑ರ್ಧ॒ರ್ಚ ಇ॒ಮೇ ಏ॒ವ ರಸೇ॑ನಾನಕ್ತಿ॒ ದಿಶೋ॑ ಜುಹೋತಿ॒ ದಿಶ॑ ಏ॒ವ ರಸೇ॑ನಾನ॒ಕ್ತ್ಯಥೋ॑ ದಿ॒ಗ್ಭ್ಯ ಏ॒ವೋರ್ಜ॒ಗ್ಂ॒ ರಸ॒ಮವ॑ ರುನ್ಧೇ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಂ-ವಾಁ॑ನಸ್ಪ॒ತ್ಯಾಃ ಖಲು॒ [ಖಲು॑, ವೈ ದೇ॒ವತ॑ಯಾ ಪ॒ಶವೋ॒] 59
ವೈ ದೇ॒ವತ॑ಯಾ ಪ॒ಶವೋ॒ ಯ-ತ್ಪೃ॑ಷದಾ॒ಜ್ಯಸ್ಯೋ॑-ಪ॒ಹತ್ಯಾ-ಽಽಹ॒ ವನ॒ಸ್ಪತ॒ಯೇ-ಽನು॑ ಬ್ರೂಹಿ॒ ವನ॒ಸ್ಪತ॑ಯೇ॒ ಪ್ರೇಷ್ಯೇತಿ॑ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತ್ಯ॒ನ್ಯಸ್ಯಾ᳚ನ್ಯಸ್ಯ ಸಮವ॒ತ್ತಗ್ಂ ಸ॒ಮವ॑ದ್ಯತಿ॒ ತಸ್ಮಾ॒ನ್ನಾನಾ॑ರೂಪಾಃ ಪ॒ಶವೋ॑ ಯೂ॒ಷ್ಣೋಪ॑ ಸಿಞ್ಚತಿ॒ ರಸೋ॒ ವಾ ಏ॒ಷ ಪ॑ಶೂ॒ನಾಂ-ಯಁದ್ಯೂ ರಸ॑ಮೇ॒ವ ಪ॒ಶುಷು॑ ದಧಾ॒ತೀಡಾ॒ಮುಪ॑ ಹ್ವಯತೇ ಪ॒ಶವೋ॒ ವಾ ಇಡಾ॑ ಪ॒ಶೂನೇ॒ವೋಪ॑ ಹ್ವಯತೇ ಚ॒ತುರುಪ॑ ಹ್ವಯತೇ॒ [ಚ॒ತುರುಪ॑ ಹ್ವಯತೇ, ಚತು॑ಷ್ಪಾದೋ॒ ಹಿ] 60
ಚತು॑ಷ್ಪಾದೋ॒ ಹಿ ಪ॒ಶವೋ॒ ಯ-ಙ್ಕಾ॒ಮಯೇ॑ತಾ ಪ॒ಶು-ಸ್ಸ್ಯಾ॒ದಿತ್ಯ॑ಮೇ॒ದಸ್ಕ॒-ನ್ತಸ್ಮಾ॒ ಆ ದ॑ದ್ಧ್ಯಾ॒ನ್ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪೇಣೈ॒ವೈನ॑-ಮ್ಪ॒ಶುಭ್ಯೋ॒ ನಿರ್ಭ॑ಜತ್ಯಪ॒ಶುರೇ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ದಿತಿ॒ ಮೇದ॑ಸ್ವ॒-ತ್ತಸ್ಮಾ॒ ಆ ದ॑ದ್ಧ್ಯಾ॒ನ್ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪೇಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ಪಶು॒ಮಾನೇ॒ವ ಭ॑ವತಿ ಪ್ರ॒ಜಾಪ॑ತಿರ್ಯ॒ಜ್ಞಮ॑ಸೃಜತ॒ ಸ ಆಜ್ಯ॑- [ಸ ಆಜ್ಯ᳚ಮ್, ಪು॒ರಸ್ತಾ॑ದಸೃಜತ] 61
-ಮ್ಪು॒ರಸ್ತಾ॑ದಸೃಜತ ಪ॒ಶು-ಮ್ಮ॑ದ್ಧ್ಯ॒ತಃ ಪೃ॑ಷದಾ॒ಜ್ಯ-ಮ್ಪ॒ಶ್ಚಾ-ತ್ತಸ್ಮಾ॒ದಾಜ್ಯೇ॑ನ ಪ್ರಯಾ॒ಜಾ ಇ॑ಜ್ಯನ್ತೇ ಪ॒ಶುನಾ॑ ಮದ್ಧ್ಯ॒ತಃ ಪೃ॑ಷದಾ॒ಜ್ಯೇನಾ॑-ನೂಯಾ॒ಜಾ-ಸ್ತಸ್ಮಾ॑ದೇ॒ತನ್ಮಿ॒ಶ್ರಮಿ॑ವ ಪಶ್ಚಾ-ಥ್ಸೃ॒ಷ್ಟಗ್ಗ್ ಹ್ಯೇಕಾ॑ದಶಾನೂಯಾ॒ಜಾನ್. ಯ॑ಜತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತಮನು॑ ಯಜತಿ॒ ಘ್ನನ್ತಿ॒ ವಾ ಏ॒ತ-ತ್ಪ॒ಶುಂ-ಯಁ-ಥ್ಸಂ᳚(2)ಜ್ಞ॒ಪಯ॑ನ್ತಿ ಪ್ರಾಣಾಪಾ॒ನೌ ಖಲು॒ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಂ-ಯಁ-ತ್ಪೃ॑ಷದಾ॒ಜ್ಯೇನಾ॑ ನೂಯಾ॒ಜಾನ್. ಯಜ॑ತಿ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತಿ ॥ 62 ॥
(ಘ್ನನ್ತಿ॒ – ಯನ್ತಂ॒ – ಖಲು॑ – ಚ॒ತುರುಪ॑ ಹ್ವಯತ॒ – ಆಜ್ಯಂ॒ – ಯಁ-ತ್ಪೃ॑ಷದಾ॒ಜ್ಯೇನ॒ – ಷಟ್ ಚ॑) (ಅ. 11)
(ಚಾತ್ವಾ॑ಲಾಥ್ – ಸುವ॒ರ್ಗಾಯ॒ ಯ-ದ್ವೈ॑ಸರ್ಜ॒ನಾನಿ॑ – ವೈಷ್ಣ॒ವ್ಯರ್ಚಾ – ಪೃ॑ಥಿ॒ವ್ಯೈ – ಸಾ॒ಧ್ಯಾ – ಇ॒ಷೇ ತ್ವೇ – ತ್ಯ॒ಗ್ನಿನಾ॒ – ಪರ್ಯ॑ಗ್ನಿ – ಪ॒ಶೋಃ – ಪ॒ಶುಮಾ॒ಲಭ್ಯ॒ – ಮೇದ॑ಸಾ॒ ಸ್ರುಚಾ॒ – ವೇಕಾ॑ದಶ)
(ಚಾತ್ವಾ॑ಲಾ-ದ್- ದೇ॒ವಾನು॒ಪೈತಿ॑ – ಮುಞ್ಚತಿ – ಪ್ರಹ್ರಿ॒ಯಮಾ॑ಣಾಯ॒ – ಪರ್ಯ॑ಗ್ನಿ – ಪ॒ಶುಮಾ॒ಲಭ್ಯ॒ – ಚತು॑ಷ್ಪಾದೋ॒ – ದ್ವಿಷ॑ಷ್ಟಿಃ)
(ಚಾತ್ವಾ॑ಲಾ, ತ್ಪ॒ಶುಷು॑ ದಧಾತಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ತೃತೀಯಃ ಪ್ರಶ್ನ-ಸ್ಸಮಾಪ್ತಃ ॥