ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ದ್ವಿತೀಯಃ ಪ್ರಶ್ನಃ – ಷಡ್ ರಾತ್ರಾದ್ಯಾನಾ-ನ್ನಿರೂಪಣಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಸಾ॒ದ್ಧ್ಯಾ ವೈ ದೇ॒ವಾ-ಸ್ಸು॑ವ॒ರ್ಗಕಾ॑ಮಾ ಏ॒ತಗ್ಂ ಷ॑ಡ್-ರಾ॒ತ್ರಮ॑ಪಶ್ಯ॒-ನ್ತಮಾ-ಽಹ॑ರ॒-ನ್ತೇನಾ॑ಯಜನ್ತ॒ ತತೋ॒ ವೈ ತೇ ಸು॑ವ॒ರ್ಗಂ-ಲೋಁ॒ಕಮಾ॑ಯ॒ನ್॒. ಯ ಏ॒ವಂ-ವಿಁ॒ದ್ವಾಗ್ಂಸ॑-ಷ್ಷಡ್-ರಾ॒ತ್ರಮಾಸ॑ತೇ ಸುವ॒ರ್ಗಮೇ॒ವ ಲೋ॒ಕಂ-ಯಁ॑ನ್ತಿ ದೇವಸ॒ತ್ರಂ-ವೈಁ ಷ॑ಡ್-ರಾ॒ತ್ರಃ ಪ್ರ॒ತ್ಯಖ್ಷ॒ಗ್ಗ್॒ ಹ್ಯೇ॑ತಾನಿ॑ ಪೃ॒ಷ್ಠಾನಿ॒ ಯ ಏ॒ವಂ-ವಿಁ॒ದ್ವಾಗ್ಂಸ॑-ಷ್ಷಡ್-ರಾ॒ತ್ರಮಾಸ॑ತೇ ಸಾ॒ಖ್ಷಾದೇ॒ವ ದೇ॒ವತಾ॑ ಅ॒ಭ್ಯಾರೋ॑ಹನ್ತಿ॒ ಷಡ್-ರಾ॒ತ್ರೋ ಭ॑ವತಿ॒ ಷ-ಡ್ವಾ ಋ॒ತವ॒-ಷ್ಷಟ್ ಪೃ॒ಷ್ಠಾನಿ॑ [ ] 1
ಪೃ॒ಷ್ಠೈರೇ॒ವರ್ತೂನ॒-ನ್ವಾರೋ॑ಹನ್ತ್ಯೃ॒ತುಭಿ॑-ಸ್ಸಂವಁಥ್ಸ॒ರ-ನ್ತೇ ಸಂ॑ವಁಥ್ಸ॒ರ ಏ॒ವ ಪ್ರತಿ॑ ತಿಷ್ಠನ್ತಿ ಬೃಹ-ದ್ರಥನ್ತ॒ರಾಭ್ಯಾಂ᳚-ಯಁನ್ತೀ॒ಯಂ-ವಾಁವ ರ॑ಥನ್ತ॒ರಮ॒ಸೌ ಬೃ॒ಹದಾ॒ಭ್ಯಾಮೇ॒ವ ಯ॒ನ್ತ್ಯಥೋ॑ ಅ॒ನಯೋ॑ರೇ॒ವ ಪ್ರತಿ॑ ತಿಷ್ಠನ್ತ್ಯೇ॒ತೇ ವೈ ಯ॒ಜ್ಞಸ್ಯಾ᳚ಞ್ಜ॒ಸಾಯ॑ನೀ ಸ್ರು॒ತೀ ತಾಭ್ಯಾ॑ಮೇ॒ವ ಸು॑ವ॒ರ್ಗಂ-ಲೋಁ॒ಕಂ-ಯಁ॑ನ್ತಿ ತ್ರಿ॒ವೃದ॑ಗ್ನಿಷ್ಟೋ॒ಮೋ ಭ॑ವತಿ॒ ತೇಜ॑ ಏ॒ವಾವ॑ ರುನ್ಧತೇ ಪಞ್ಚದ॒ಶೋ ಭ॑ವತೀನ್ದ್ರಿ॒ಯಮೇ॒ವಾವ॑ ರುನ್ಧತೇ ಸಪ್ತದ॒ಶೋ [ಸಪ್ತದ॒ಶಃ, ಭ॒ವ॒ತ್ಯ॒ನ್ನಾದ್ಯ॒ಸ್ಯಾ-ಽವ॑ರುದ್ಧ್ಯಾ॒] 2
ಭ॑ವತ್ಯ॒ನ್ನಾದ್ಯ॒ಸ್ಯಾ-ಽವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯನ್ತ ಏಕವಿ॒ಗ್ಂ॒ಶೋ ಭ॑ವತಿ॒ ಪ್ರತಿ॑ಷ್ಠಿತ್ಯಾ॒ ಅಥೋ॒ ರುಚ॑ಮೇ॒ವಾ-ಽಽತ್ಮ-ನ್ದ॑ಧತೇ ತ್ರಿಣ॒ವೋ ಭ॑ವತಿ॒ ವಿಜಿ॑ತ್ಯೈ ತ್ರಯಸ್ತ್ರಿ॒ಗ್ಂ॒ಶೋ ಭ॑ವತಿ॒ ಪ್ರತಿ॑ಷ್ಠಿತ್ಯೈ ಸದೋಹವಿರ್ಧಾ॒ನಿನ॑ ಏ॒ತೇನ॑ ಷಡ್-ರಾ॒ತ್ರೇಣ॑ ಯಜೇರ॒ನ್ನಾಶ್ವ॑ತ್ಥೀ ಹವಿ॒ರ್ಧಾನ॒-ಞ್ಚಾ-ಽಽಗ್ನೀ᳚ದ್ಧ್ರ-ಞ್ಚ ಭವತ॒ಸ್ತದ್ಧಿ ಸು॑ವ॒ರ್ಗ್ಯ॑-ಞ್ಚ॒ಕ್ರೀವ॑ತೀ ಭವತ-ಸ್ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯಾ ಉ॒ಲೂಖ॑ಲಬುದ್ಧ್ನೋ॒ ಯೂಪೋ॑ ಭವತಿ॒ ಪ್ರತಿ॑ಷ್ಠಿತ್ಯೈ॒ ಪ್ರಾಞ್ಚೋ॑ ಯಾನ್ತಿ॒ ಪ್ರಾಙಿ॑ವ॒ ಹಿ ಸು॑ವ॒ರ್ಗೋ [ಹಿ ಸು॑ವ॒ರ್ಗಃ, ಲೋ॒ಕ-ಸ್ಸರ॑ಸ್ವತ್ಯಾ] 3
ಲೋ॒ಕ-ಸ್ಸರ॑ಸ್ವತ್ಯಾ ಯಾನ್ತ್ಯೇ॒ಷ ವೈ ದೇ॑ವ॒ಯಾನಃ॒ ಪನ್ಥಾ॒ಸ್ತ-ಮೇ॒ವಾ-ನ್ವಾರೋ॑ಹನ್ತ್ಯಾ॒ಕ್ರೋಶ॑ನ್ತೋ ಯಾ॒ನ್ತ್ಯವ॑ರ್ತಿ-ಮೇ॒ವಾನ್ಯಸ್ಮಿ॑-ನ್ಪ್ರತಿ॒ಷಜ್ಯ॑ ಪ್ರತಿ॒ಷ್ಠಾ-ಙ್ಗ॑ಚ್ಛನ್ತಿ ಯ॒ದಾ ದಶ॑ ಶ॒ತ-ಙ್ಕು॒ರ್ವನ್ತ್ಯಥೈಕ॑-ಮು॒ತ್ಥಾನಗ್ಂ॑ ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯ॒ ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠನ್ತಿ ಯ॒ದಾ ಶ॒ತಗ್ಂ ಸ॒ಹಸ್ರ॑-ಙ್ಕು॒ರ್ವನ್ತ್ಯಥೈಕ॑-ಮು॒ತ್ಥಾನಗ್ಂ॑ ಸ॒ಹಸ್ರ॑ಸಮ್ಮಿತೋ॒ ವಾ ಅ॒ಸೌ ಲೋ॒ಕೋ॑-ಽಮುಮೇ॒ವ ಲೋ॒ಕಮ॒ಭಿ ಜ॑ಯನ್ತಿ ಯ॒ದೈ -ಷಾ᳚-ಮ್ಪ್ರ॒ಮೀಯೇ॑ತ ಯ॒ದಾ ವಾ॒ ಜೀಯೇ॑ರ॒ನ್ನಥೈಕ॑-ಮು॒ತ್ಥಾನ॒-ನ್ತದ್ಧಿ ತೀ॒ರ್ಥಮ್ ॥ 4 ॥
(ಪೃ॒ಷ್ಠಾನಿ॑-ಸಪ್ತದ॒ಶಃ-ಸು॑ವ॒ರ್ಗೋ-ಜ॑ಯನ್ತಿ ಯ॒ದೈ – ಕಾ॑ದಶ ಚ) (ಅ. 1)
ಕು॒ಸು॒ರು॒ಬಿನ್ದ॒ ಔದ್ದಾ॑ಲಕಿ-ರಕಾಮಯತ ಪಶು॒ಮಾನ್-ಥ್ಸ್ಯಾ॒ಮಿತಿ॒ ಸ ಏ॒ತಗ್ಂ ಸ॑ಪ್ತರಾ॒ತ್ರ-ಮಾ-ಽಹ॑ರ॒-ತ್ತೇನಾ॑ಯಜತ॒ ತೇನ॒ ವೈ ಸ ಯಾವ॑ನ್ತೋ ಗ್ರಾ॒ಮ್ಯಾಃ ಪ॒ಶವ॒ಸ್ತಾನವಾ॑-ರುನ್ಧ॒ ಯ ಏ॒ವಂ-ವಿಁ॒ದ್ವಾನ್-ಥ್ಸ॑ಪ್ತರಾ॒ತ್ರೇಣ॒ ಯಜ॑ತೇ॒ ಯಾವ॑ನ್ತ ಏ॒ವ ಗ್ರಾ॒ಮ್ಯಾಃ ಪ॒ಶವ॒ಸ್ತಾ-ನೇ॒ವಾವ॑ ರುನ್ಧೇ ಸಪ್ತರಾ॒ತ್ರೋ ಭ॑ವತಿ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವ॑-ಸ್ಸ॒ಪ್ತಾ-ಽಽರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑-ಸ್ಯು॒ಭಯ॒ಸ್ಯಾ-ವ॑ರುದ್ಧ್ಯೈ ತ್ರಿ॒ವೃ-ದ॑ಗ್ನಿಷ್ಟೋ॒ಮೋ ಭ॑ವತಿ॒ ತೇಜ॑ [ತೇಜಃ॑, ಏ॒ವಾ-ಽವ॑ ರುನ್ಧೇ] 5
ಏ॒ವಾ-ಽವ॑ ರುನ್ಧೇ ಪಞ್ಚದ॒ಶೋ ಭ॑ವತೀನ್ದ್ರಿ॒ಯಮೇ॒ವಾವ॑ ರುನ್ಧೇ ಸಪ್ತದ॒ಶೋ ಭ॑ವತ್ಯ॒ನ್ನಾದ್ಯ॒ಸ್ಯಾ ವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯತ ಏಕವಿ॒ಗ್ಂ॒ಶೋ ಭ॑ವತಿ॒ ಪ್ರತಿ॑ಷ್ಠಿತ್ಯಾ॒ ಅಥೋ॒ ರುಚ॑ಮೇ॒ವಾ-ಽಽತ್ಮ-ನ್ಧ॑ತ್ತೇ ತ್ರಿಣ॒ವೋ ಭ॑ವತಿ॒ ವಿಜಿ॑ತ್ಯೈ ಪಞ್ಚವಿ॒ಗ್ಂ॒ಶೋ᳚-ಽಗ್ನಿಷ್ಟೋ॒ಮೋ ಭ॑ವತಿ ಪ್ರ॒ಜಾಪ॑ತೇ॒-ರಾಪ್ತ್ಯೈ॑ ಮಹಾವ್ರ॒ತವಾ॑-ನ॒ನ್ನಾದ್ಯ॒ಸ್ಯಾ ವ॑ರುದ್ಧ್ಯೈ ವಿಶ್ವ॒ಜಿ-ಥ್ಸರ್ವ॑ಪೃಷ್ಠೋ ಽತಿರಾ॒ತ್ರೋ ಭ॑ವತಿ॒ ಸರ್ವ॑ಸ್ಯಾ॒ಭಿಜಿ॑ತ್ಯೈ॒ ಯ-ತ್ಪ್ರ॒ತ್ಯಖ್ಷ॒-ಮ್ಪೂರ್ವೇ॒ಷ್ವಹ॑ಸ್ಸು ಪೃ॒ಷ್ಠಾನ್ಯು॑ಪೇ॒ಯುಃ ಪ್ರ॒ತ್ಯಖ್ಷಂ॑- [ಪ್ರ॒ತ್ಯಖ್ಷ᳚ಮ್, ವಿ॒ಶ್ವ॒ಜಿತಿ॒ ಯಥಾ॑] 6
-ವಿಁಶ್ವ॒ಜಿತಿ॒ ಯಥಾ॑ ದು॒ಗ್ಧಾ-ಮು॑ಪ॒ಸೀದ॑ತ್ಯೇ॒ವಮು॑ತ್ತ॒ಮ-ಮಹ॑-ಸ್ಸ್ಯಾ॒ನ್ನೈಕ॑ರಾ॒ತ್ರಶ್ಚ॒ನ ಸ್ಯಾ᳚-ದ್ಬೃಹ-ದ್ರಥನ್ತ॒ರೇ ಪೂರ್ವೇ॒ಷ್ವಹ॒ಸ್ಸೂಪ॑ ಯನ್ತೀ॒ಯಂ-ವಾಁವ ರ॑ಥನ್ತ॒ರಮ॒ಸೌ ಬೃ॒ಹದಾ॒ಭ್ಯಾಮೇ॒ವ ನ ಯ॒ನ್ತ್ಯಥೋ॑ ಅ॒ನಯೋ॑ರೇ॒ವ ಪ್ರತಿ॑ ತಿಷ್ಠನ್ತಿ॒ ಯ-ತ್ಪ್ರ॒ತ್ಯಖ್ಷಂ॑-ವಿಁಶ್ವ॒ಜಿತಿ॑ ಪೃ॒ಷ್ಠಾನ್ಯು॑ಪ॒ಯನ್ತಿ॒ ಯಥಾ॒ ಪ್ರತ್ತಾ᳚-ನ್ದು॒ಹೇ ತಾ॒ದೃಗೇ॒ವ ತತ್ ॥ 7 ॥
(ತೇಜ॑ – ಉಪೇ॒ಯುಃ ಪ್ರ॒ತ್ಯಖ್ಷಂ॒ – ದ್ವಿಚ॑ತ್ವಾರಿಗ್ಂಶಚ್ಚ) (ಅ. 2)
ಬೃಹ॒ಸ್ಪತಿ॑-ರಕಾಮಯತ ಬ್ರಹ್ಮವರ್ಚ॒ಸೀ ಸ್ಯಾ॒ಮಿತಿ॒ ಸ ಏ॒ತ-ಮ॑ಷ್ಟರಾ॒ತ್ರ-ಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸ ಬ್ರ॑ಹ್ಮವರ್ಚ॒ಸ್ಯ॑ಭವ॒ದ್ಯ ಏ॒ವಂ-ವಿಁ॒ದ್ವಾ-ನ॑ಷ್ಟರಾ॒ತ್ರೇಣ॒ ಯಜ॑ತೇ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತ್ಯಷ್ಟರಾ॒ತ್ರೋ ಭ॑ವತ್ಯ॒ಷ್ಟಾಖ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸ-ಙ್ಗಾ॑ಯತ್ರಿ॒ಯೈವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ-ಽಷ್ಟರಾ॒ತ್ರೋ ಭ॑ವತಿ॒ ಚತ॑ಸ್ರೋ॒ ವೈ ದಿಶ॒ಶ್ಚತ॑ಸ್ರೋ ಽವಾನ್ತರದಿ॒ಶಾ ದಿ॒ಗ್ಭ್ಯ ಏ॒ವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ [ ] 8
ತ್ರಿ॒ವೃ-ದ॑ಗ್ನಿಷ್ಟೋ॒ಮೋ ಭ॑ವತಿ॒ ತೇಜ॑ ಏ॒ವಾವ॑ ರುನ್ಧೇ ಪಞ್ಚದ॒ಶೋ ಭ॑ವತೀನ್ದ್ರಿ॒ಯಮೇ॒ವಾವ॑ ರುನ್ಧೇ ಸಪ್ತದ॒ಶೋ ಭ॑ವತ್ಯ॒ನ್ನಾದ್ಯ॒ಸ್ಯಾ-ವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯತ ಏಕವಿ॒ಗ್ಂ॒ಶೋ ಭ॑ವತಿ॒ ಪ್ರತಿ॑ಷ್ಠಿತ್ಯಾ॒ ಅಥೋ॒ ರುಚ॑ಮೇ॒ವಾ-ಽಽತ್ಮ-ನ್ಧ॑ತ್ತೇ ತ್ರಿಣ॒ವೋ ಭ॑ವತಿ॒ ವಿಜಿ॑ತ್ಯೈ ತ್ರಯಸ್ತ್ರಿ॒ಗ್ಂ॒ಶೋ ಭ॑ವತಿ॒ ಪ್ರತಿ॑ಷ್ಠಿತ್ಯೈ ಪಞ್ಚವಿ॒ಗ್ಂ॒ಶೋ᳚-ಽಗ್ನಿಷ್ಟೋ॒ಮೋ ಭ॑ವತಿ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಮಹಾವ್ರ॒ತವಾ॑-ನ॒ನ್ನಾದ್ಯ॒ಸ್ಯಾ ವ॑ರುದ್ಧ್ಯೈ ವಿಶ್ವ॒ಜಿ-ಥ್ಸರ್ವ॑ಪೃಷ್ಠೋ-ಽತಿರಾ॒ತ್ರೋ ಭ॑ವತಿ॒ ಸರ್ವ॑ಸ್ಯಾ॒ಭಿಜಿ॑ತ್ಯೈ ॥ 9 ॥
(ದಿ॒ಗ್ಭ್ಯ ಏ॒ವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ॒ – ಽಭಿಜಿ॑ತ್ಯೈ) (ಅ. 3)
ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ-ಸ್ಸೃ॒ಷ್ಟಾಃ, ಖ್ಷುಧ॒-ನ್ನ್ಯಾ॑ಯ॒ನ್ಥ್ಸ ಏ॒ತ-ನ್ನ॑ವರಾ॒ತ್ರ-ಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಪ್ರ॒ಜಾಭ್ಯೋ॑-ಽಕಲ್ಪತ॒ ಯರ್ಹಿ॑ ಪ್ರ॒ಜಾಃ, ಖ್ಷುಧ॑-ನ್ನಿ॒ಗಚ್ಛೇ॑ಯು॒-ಸ್ತರ್ಹಿ॑ ನವರಾ॒ತ್ರೇಣ॑ ಯಜೇತೇ॒ಮೇ ಹಿ ವಾ ಏ॒ತಾಸಾಂ᳚-ಲೋಁ॒ಕಾ ಅಕೢ॑ಪ್ತಾ॒ ಅಥೈ॒ತಾಃ, ಖ್ಷುಧ॒-ನ್ನಿ ಗ॑ಚ್ಛನ್ತೀ॒ಮಾ-ನೇ॒ವಾ-ಽಽಭ್ಯೋ॑ ಲೋ॒ಕಾನ್ ಕ॑ಲ್ಪಯತಿ॒ ತಾನ್ ಕಲ್ಪ॑ಮಾನಾ-ನ್ಪ್ರ॒ಜಾಭ್ಯೋ-ಽನು॑ ಕಲ್ಪತೇ॒ ಕಲ್ಪ॑ನ್ತೇ- [ಕಲ್ಪ॑ನ್ತೇ, ಅ॒ಸ್ಮಾ॒ ಇ॒ಮೇ ಲೋ॒ಕಾ] 10
-ಽಸ್ಮಾ ಇ॒ಮೇ ಲೋ॒ಕಾ ಊರ್ಜ॑-ಮ್ಪ್ರ॒ಜಾಸು॑ ದಧಾತಿ ತ್ರಿರಾ॒ತ್ರೇಣೈ॒ವೇಮಂ-ಲೋಁ॒ಕ-ಙ್ಕ॑ಲ್ಪಯತಿ ತ್ರಿರಾ॒ತ್ರೇಣಾ॒ನ್ತರಿ॑ಖ್ಷ-ನ್ತ್ರಿರಾ॒ತ್ರೇಣಾ॒ಮುಂ-ಲೋಁ॒ಕಂ-ಯಁಥಾ॑ ಗು॒ಣೇ ಗ॒ಣ-ಮ॒ನ್ವಸ್ಯ॑ತ್ಯೇ॒ವಮೇ॒ವ ತಲ್ಲೋ॒ಕೇ ಲೋ॒ಕಮನ್ವ॑ಸ್ಯತಿ॒ ಧೃತ್ಯಾ॒ ಅಶಿ॑ಥಿಲಮ್ಭಾವಾಯ॒ ಜ್ಯೋತಿ॒ರ್ಗೌರಾಯು॒ರಿತಿ॑ ಜ್ಞಾ॒ತಾ-ಸ್ಸ್ತೋಮಾ॑ ಭವನ್ತೀ॒ಯಂ-ವಾಁವ ಜ್ಯೋತಿ॑ರ॒ನ್ತರಿ॑ಖ್ಷ॒-ಙ್ಗೌರ॒ಸಾ-ವಾಯು॑ರೇ॒ಷ್ವೇ॑ವ ಲೋ॒ಕೇಷು॒ ಪ್ರತಿ॑ ತಿಷ್ಠನ್ತಿ॒ ಜ್ಞಾತ್ರ॑-ಮ್ಪ್ರ॒ಜಾನಾ᳚- [ಜ್ಞಾತ್ರ॑-ಮ್ಪ್ರ॒ಜಾನಾ᳚ಮ್, ಗ॒ಚ್ಛ॒ತಿ॒ ನ॒ವ॒ರಾ॒ತ್ರೋ] 11
-ಙ್ಗಚ್ಛತಿ ನವರಾ॒ತ್ರೋ ಭ॑ವತ್ಯಭಿಪೂ॒-ರ್ವಮೇ॒ವಾ-ಽಸ್ಮಿ॒-ನ್ತೇಜೋ॑ ದಧಾತಿ॒ ಯೋ ಜ್ಯೋಗಾ॑ಮಯಾವೀ॒ ಸ್ಯಾ-ಥ್ಸ ನ॑ವರಾ॒ತ್ರೇಣ॑ ಯಜೇತ ಪ್ರಾ॒ಣಾ ಹಿ ವಾ ಏ॒ತಸ್ಯಾ ಧೃ॑ತಾ॒ ಅಥೈ॒ತಸ್ಯ॒ ಜ್ಯೋಗಾ॑ಮಯತಿ ಪ್ರಾ॒ಣಾನೇ॒ವಾಸ್ಮಿ॑-ನ್ದಾಧಾರೋ॒ತ ಯದೀ॒ತಾಸು॒ರ್ಭವ॑ತಿ॒ ಜೀವ॑ತ್ಯೇ॒ವ ॥ 12 ॥
(ಕಲ್ಪ॑ನ್ತೇ-ಪ್ರ॒ಜನಾಂ॒ – ತ್ರಯ॑ಸ್ತ್ರಿಗ್ಂಶಚ್ಚ) (ಅ. 4)
ಪ್ರ॒ಜಾಪ॑ತಿ-ರಕಾಮಯತ॒ ಪ್ರ ಜಾ॑ಯೇ॒ಯೇತಿ॒ ಸ ಏ॒ತ-ನ್ದಶ॑ಹೋತಾರಮಪಶ್ಯ॒-ತ್ತಮ॑ಜುಹೋ॒-ತ್ತೇನ॑ ದಶರಾ॒ತ್ರಮ॑ಸೃಜತ॒ ತೇನ॑ ದಶರಾ॒ತ್ರೇಣ॒ ಪ್ರಾ ಜಾ॑ಯತ ದಶರಾ॒ತ್ರಾಯ॑ ದೀಖ್ಷಿ॒ಷ್ಯಮಾ॑ಣೋ॒ ದಶ॑ಹೋತಾರ-ಞ್ಜುಹುಯಾ॒-ದ್ದಶ॑ಹೋತ್ರೈ॒ವ ದ॑ಶರಾ॒ತ್ರಗ್ಂ ಸೃ॑ಜತೇ॒ ತೇನ॑ ದಶರಾ॒ತ್ರೇಣ॒ ಪ್ರ ಜಾ॑ಯತೇ ವೈರಾ॒ಜೋ ವಾ ಏ॒ಷ ಯ॒ಜ್ಞೋ ಯದ್ದ॑ಶರಾ॒ತ್ರೋ ಯ ಏ॒ವಂ-ವಿಁ॒ದ್ವಾನ್-ದ॑ಶರಾ॒ತ್ರೇಣ॒ ಯಜ॑ತೇ ವಿ॒ರಾಜ॑ಮೇ॒ವ ಗ॑ಚ್ಛತಿ ಪ್ರಾಜಾಪ॒ತ್ಯೋ ವಾ ಏ॒ಷ ಯ॒ಜ್ಞೋ ಯ-ದ್ದ॑ಶರಾ॒ತ್ರೋ [ಯ-ದ್ದ॑ಶರಾ॒ತ್ರಃ, ಯ ಏ॒ವಂ-ವಿಁ॒ದ್ವಾನ್-ದ॑ಶರಾ॒ತ್ರೇಣ॒] 13
ಯ ಏ॒ವಂ-ವಿಁ॒ದ್ವಾನ್-ದ॑ಶರಾ॒ತ್ರೇಣ॒ ಯಜ॑ತೇ॒ ಪ್ರೈವ ಜಾ॑ಯತ॒ ಇನ್ದ್ರೋ॒ ವೈ ಸ॒ದೃ-ನ್ದೇ॒ವತಾ॑ಭಿರಾಸೀ॒-ಥ್ಸ ನ ವ್ಯಾ॒ವೃತ॑ಮಗಚ್ಛ॒-ಥ್ಸ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ತ್ತಸ್ಮಾ॑ ಏ॒ತ-ನ್ದ॑ಶರಾ॒ತ್ರ-ಮ್ಪ್ರಾಯ॑ಚ್ಛ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸೋ᳚-ಽನ್ಯಾಭಿ॑-ರ್ದೇ॒ವತಾ॑ಭಿ-ರ್ವ್ಯಾ॒ವೃತ॑ಮಗಚ್ಛ॒ದ್ಯ ಏ॒ವಂ-ವಿಁ॒ದ್ವಾ-ನ್ದ॑ಶರಾ॒ತ್ರೇಣ॒ ಯಜ॑ತೇ ವ್ಯಾ॒ವೃತ॑ಮೇ॒ವ ಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಗಚ್ಛತಿ ತ್ರಿಕ॒ಕುದ್ವಾ [ತ್ರಿಕ॒ಕುದ್ವೈ, ಏ॒ಷ ಯ॒ಜ್ಞೋ ಯ-ದ್ದ॑ಶರಾ॒ತ್ರಃ] 14
ಏ॒ಷ ಯ॒ಜ್ಞೋ ಯ-ದ್ದ॑ಶರಾ॒ತ್ರಃ ಕ॒ಕು-ತ್ಪ॑ಞ್ಚದ॒ಶಃ ಕ॒ಕುದೇ॑ಕವಿ॒ಗ್ಂ॒ಶಃ ಕ॒ಕು-ತ್ತ್ರ॑ಯಸ್ತ್ರಿ॒ಗ್ಂ॒ಶೋ ಯ ಏ॒ವಂ-ವಿಁ॒ದ್ವಾ-ನ್ದ॑ಶರಾ॒ತ್ರೇಣ॒ ಯಜ॑ತೇ ತ್ರಿಕ॒ಕುದೇ॒ವ ಸ॑ಮಾ॒ನಾನಾ᳚-ಮ್ಭವತಿ॒ ಯಜ॑ಮಾನಃ ಪಞ್ಚದ॒ಶೋ ಯಜ॑ಮಾನ ಏಕವಿ॒ಗ್ಂ॒ಶೋ ಯಜ॑ಮಾನ-ಸ್ತ್ರಯಸ್ತ್ರಿ॒ಗ್ಂ॒ಶಃ ಪುರ॒ ಇತ॑ರಾ ಅಭಿಚ॒ರ್ಯಮಾ॑ಣೋ ದಶರಾ॒ತ್ರೇಣ॑ ಯಜೇತ ದೇವಪು॒ರಾ ಏ॒ವ ಪರ್ಯೂ॑ಹತೇ॒ ತಸ್ಯ॒ ನ ಕುತ॑ಶ್ಚ॒ನೋಪಾ᳚ವ್ಯಾ॒ಧೋ ಭ॑ವತಿ॒ ನೈನ॑ಮಭಿ॒ಚರನ್᳚-ಥ್ಸ್ತೃಣುತೇ ದೇವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಏ॒ತಾ [ಏ॒ತಾಃ, ದೇ॒ವ॒ಪು॒ರಾ ಅ॑ಪಶ್ಯ॒ನ್॒] 15
ದೇ॑ವಪು॒ರಾ ಅ॑ಪಶ್ಯ॒ನ್॒ ಯ-ದ್ದ॑ಶರಾ॒ತ್ರಸ್ತಾಃ ಪರ್ಯೌ॑ಹನ್ತ॒ ತೇಷಾ॒-ನ್ನ ಕುತ॑ಶ್ಚ॒ನೋಪಾ᳚ವ್ಯಾ॒ಧೋ॑ ಽಭವ॒-ತ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್-ಥ್ಸ್ಯಾ-ಥ್ಸ ದ॑ಶರಾ॒ತ್ರೇಣ॑ ಯಜೇತ ದೇವಪು॒ರಾ ಏ॒ವ ಪರ್ಯೂ॑ಹತೇ॒ ತಸ್ಯ॒ ನ ಕುತ॑ಶ್ಚ॒ನೋಪಾ᳚ವ್ಯಾ॒ಧೋ ಭ॑ವತಿ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ॒ ಸ್ತೋಮ॒-ಸ್ಸ್ತೋಮ॒ಸ್ಯೋಪ॑ಸ್ತಿರ್ಭವತಿ॒ ಭ್ರಾತೃ॑ವ್ಯಮೇ॒ವೋಪ॑ಸ್ತಿ-ಙ್ಕುರುತೇ ಜಾ॒ಮಿ ವಾ [ಜಾ॒ಮಿ ವೈ, ಏ॒ತ-ತ್ಕು॑ರ್ವನ್ತಿ॒] 16
ಏ॒ತ-ತ್ಕು॑ರ್ವನ್ತಿ॒ ಯಜ್ಜ್ಯಾಯಾಗ್ಂ॑ಸ॒ಗ್ಗ್॒ ಸ್ತೋಮ॑ಮು॒ಪೇತ್ಯ॒ ಕನೀ॑ಯಾಗ್ಂಸಮುಪ॒ಯನ್ತಿ॒ ಯದ॑ಗ್ನಿಷ್ಟೋ-ಮಸಾ॒ಮಾನ್ಯ॒ವಸ್ತಾ᳚ಚ್ಚ ಪ॒ರಸ್ತಾ᳚ಚ್ಚ॒ ಭವ॒ನ್ತ್ಯಜಾ॑ಮಿತ್ವಾಯ ತ್ರಿ॒ವೃದ॑ಗ್ನಿಷ್ಟೋ॒ಮೋ᳚ ಽಗ್ನಿ॒ಷ್ಟುದಾ᳚ಗ್ನೇ॒ಯೀಷು॑ ಭವತಿ॒ ತೇಜ॑ ಏ॒ವಾವ॑ ರುನ್ಧೇ ಪಞ್ಚದ॒ಶ ಉ॒ಕ್ಥ್ಯ॑ ಐ॒ನ್ದ್ರೀಷ್ವಿ॑ನ್ದ್ರಿ॒ಯಮೇ॒ವಾವ॑ ರುನ್ಧೇ ತ್ರಿ॒ವೃದ॑ಗ್ನಿಷ್ಟೋ॒ಮೋ ವೈ᳚ಶ್ವದೇ॒ವೀಷು॒ ಪುಷ್ಟಿ॑ಮೇ॒ವಾವ॑ ರುನ್ಧೇ ಸಪ್ತದ॒ಶೋ᳚-ಽಗ್ನಿಷ್ಟೋ॒ಮಃ ಪ್ರಾ॑ಜಾಪ॒ತ್ಯಾಸು॑ ತೀವ್ರಸೋ॒ಮೋ᳚ ಽನ್ನಾದ್ಯ॒ಸ್ಯಾ-ವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯತ [ತೇನ॑ ಜಾಯತೇ, ಏ॒ಕ॒ವಿ॒ಗ್ಂ॒ಶ ಉ॒ಕ್ಥ್ಯ॑-ಸ್ಸೌ॒ರೀಷು॒] 17
ಏಕವಿ॒ಗ್ಂ॒ಶ ಉ॒ಕ್ಥ್ಯ॑-ಸ್ಸೌ॒ರೀಷು॒ ಪ್ರತಿ॑ಷ್ಠಿತ್ಯಾ॒ ಅಥೋ॒ ರುಚ॑ಮೇ॒ವಾ-ಽಽತ್ಮ-ನ್ಧ॑ತ್ತೇ ಸಪ್ತದ॒ಶೋ᳚-ಽಗ್ನಿಷ್ಟೋ॒ಮಃ ಪ್ರಾ॑ಜಾಪ॒ತ್ಯಾಸೂ॑ಪಹ॒ವ್ಯ॑ ಉಪಹ॒ವಮೇ॒ವ ಗ॑ಚ್ಛತಿ ತ್ರಿಣ॒ವಾವ॑ಗ್ನಿಷ್ಟೋ॒ಮಾವ॒ಭಿತ॑ ಐ॒ನ್ದ್ರೀಷು॒ ವಿಜಿ॑ತ್ಯೈ ತ್ರಯಸ್ತ್ರಿ॒ಗ್ಂ॒ಶ ಉ॒ಕ್ಥ್ಯೋ॑ ವೈಶ್ವದೇ॒ವೀಷು॒ ಪ್ರತಿ॑ಷ್ಠಿತ್ಯೈ ವಿಶ್ವ॒ಜಿ-ಥ್ಸರ್ವ॑ಪೃಷ್ಠೋ-ಽತಿರಾ॒ತ್ರೋ ಭ॑ವತಿ॒ ಸರ್ವ॑ಸ್ಯಾ॒ಭಿಜಿ॑ತ್ಯೈ ॥ 18 ॥
(ಪ್ರ॒ಜಾ॒ಪ॒ತ್ಯೋ ವಾ ಏ॒ಷ ಯ॒ಜ್ಞೋ ಯ-ದ್ದ॑ಶರಾ॒ತ್ರ – ಸ್ತ್ರಿ॑ಕ॒ಕುದ್ಧಾ – ಏ॒ತಾ – ವೈ – ಜಾ॑ಯತ॒ – ಏಕ॑ತ್ರಿಗ್ಂಶಚ್ಚ) (ಅ. 5)
ಋ॒ತವೋ॒ ವೈ ಪ್ರ॒ಜಾಕಾ॑ಮಾಃ ಪ್ರ॒ಜಾ-ನ್ನಾ-ಽವಿ॑ನ್ದನ್ತ॒ ತೇ॑-ಽಕಾಮಯನ್ತ ಪ್ರ॒ಜಾಗ್ಂ ಸೃ॑ಜೇಮಹಿ ಪ್ರ॒ಜಾಮವ॑ ರುನ್ಧೀಮಹಿ ಪ್ರ॒ಜಾಂ-ವಿಁ॑ನ್ದೇಮಹಿ ಪ್ರ॒ಜಾವ॑ನ್ತ-ಸ್ಸ್ಯಾ॒ಮೇತಿ॒ ತ ಏ॒ತಮೇ॑ಕಾದಶರಾ॒ತ್ರಮ॑ಪಶ್ಯ॒-ನ್ತಮಾ-ಽಹ॑ರ॒-ನ್ತೇನಾ॑ಯಜನ್ತ॒ ತತೋ॒ ವೈ ತೇ ಪ್ರ॒ಜಾಮ॑ಸೃಜನ್ತ ಪ್ರ॒ಜಾಮವಾ॑ರುನ್ಧತ ಪ್ರ॒ಜಾಮ॑ವಿನ್ದನ್ತ ಪ್ರ॒ಜಾವ॑ನ್ತೋ-ಽಭವ॒ನ್ತ ಋ॒ತವೋ॑-ಽಭವ॒-ನ್ತದಾ᳚ರ್ತ॒ವಾನಾ॑-ಮಾರ್ತವ॒ತ್ವ-ಮೃ॑ತೂ॒ನಾಂ-ವಾಁ ಏ॒ತೇ ಪು॒ತ್ರಾ-ಸ್ತಸ್ಮಾ॑- [ಪು॒ತ್ರಾ-ಸ್ತಸ್ಮಾ᳚ತ್, ಆ॒ರ್ತ॒ವಾ ಉ॑ಚ್ಯನ್ತೇ॒] 19
-ದಾರ್ತ॒ವಾ ಉ॑ಚ್ಯನ್ತೇ॒ ಯ ಏ॒ವಂ-ವಿಁ॒ದ್ವಾಗ್ಂಸ॑ ಏಕಾದಶರಾ॒ತ್ರಮಾಸ॑ತೇ ಪ್ರ॒ಜಾಮೇ॒ವ ಸೃ॑ಜನ್ತೇ ಪ್ರ॒ಜಾಮವ॑ ರುನ್ಧತೇ ಪ್ರ॒ಜಾಂ-ವಿಁ॑ನ್ದನ್ತೇ ಪ್ರ॒ಜಾವ॑ನ್ತೋ ಭವನ್ತಿ॒ ಜ್ಯೋತಿ॑ರತಿರಾ॒ತ್ರೋ ಭ॑ವತಿ॒ ಜ್ಯೋತಿ॑ರೇ॒ವ ಪು॒ರಸ್ತಾ᳚-ದ್ದಧತೇ ಸುವ॒ರ್ಗಸ್ಯ॑ ಲೋ॒ಕಸ್ಯಾ-ನು॑ಖ್ಯಾತ್ಯೈ॒ ಪೃಷ್ಠ್ಯ॑-ಷ್ಷಡ॒ಹೋ ಭ॑ವತಿ॒ ಷ-ಡ್ವಾ ಋ॒ತವ॒-ಷ್ಷಟ್ ಪೃ॒ಷ್ಠಾನಿ॑ ಪೃ॒ಷ್ಠೈರೇ॒ವರ್ತೂನ॒-ನ್ವಾರೋ॑ಹನ್ತ್ಯೃ॒ತುಭಿ॑-ಸ್ಸಂವಁಥ್ಸ॒ರ-ನ್ತೇ ಸಂ॑ವಁಥ್ಸ॒ರ ಏ॒ವ ಪ್ರತಿ॑ ತಿಷ್ಠನ್ತಿ ಚತುರ್ವಿ॒ಗ್ಂ॒ಶೋ ಭ॑ವತಿ॒ ಚತು॑ರ್ವಿಗ್ಂಶತ್ಯಖ್ಷರಾ ಗಾಯ॒ತ್ರೀ [ಗಾಯ॒ತ್ರೀ, ಗಾ॒ಯ॒ತ್ರ-ಮ್ಬ್ರ॑ಹ್ಮವರ್ಚ॒ಸ-] 20
ಗಾ॑ಯ॒ತ್ರ-ಮ್ಬ್ರ॑ಹ್ಮವರ್ಚ॒ಸ-ಙ್ಗಾ॑ಯತ್ರಿ॒ಯಾಮೇ॒ವ ಬ್ರ॑ಹ್ಮವರ್ಚ॒ಸೇ ಪ್ರತಿ॑ ತಿಷ್ಠನ್ತಿ ಚತುಶ್ಚತ್ವಾರಿ॒ಗ್ಂ॒ಶೋ ಭ॑ವತಿ॒ ಚತು॑ಶ್ಚತ್ವಾರಿಗ್ಂಶದಖ್ಷರಾ ತ್ರಿ॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟು-ಪ್ತ್ರಿ॒ಷ್ಟುಭ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠನ್ತ್ಯಷ್ಟಾಚತ್ವಾರಿ॒ಗ್ಂ॒ಶೋ ಭ॑ವತ್ಯ॒ಷ್ಟಾಚ॑ತ್ವಾರಿಗ್ಂಶದಖ್ಷರಾ॒ ಜಗ॑ತೀ॒ ಜಾಗ॑ತಾಃ ಪ॒ಶವೋ॒ ಜಗ॑ತ್ಯಾಮೇ॒ವ ಪ॒ಶುಷು॒ ಪ್ರತಿ॑ ತಿಷ್ಠನ್ತ್ಯೇ-ಕಾದಶರಾ॒ತ್ರೋ ಭ॑ವತಿ॒ ಪಞ್ಚ॒ ವಾ ಋ॒ತವ॑ ಆರ್ತ॒ವಾಃ ಪಞ್ಚ॒ರ್ತುಷ್ವೇ॒ವಾ-ಽಽರ್ತ॒ವೇಷು॑ ಸಂವಁಥ್ಸ॒ರೇ ಪ್ರ॑ತಿ॒ಷ್ಠಾಯ॑ ಪ್ರ॒ಜಾಮವ॑ ರುನ್ಧತೇ ಽತಿರಾ॒ತ್ರಾವ॒ಭಿತೋ॑ ಭವತಃ ಪ್ರ॒ಜಾಯೈ॒ ಪರಿ॑ಗೃಹೀತ್ಯೈ ॥ 21 ॥
(ತಸ್ಮಾ᳚-ದ್- ಗಾಯ॒ತ್ರ್ಯೇ – ಕಾ॒ನ್ನಪ॑ಞ್ಚಾ॒ಶಚ್ಚ॑) (ಅ. 6)
ಐ॒ನ್ದ್ರ॒ವಾ॒ಯ॒ವಾಗ್ರಾ᳚-ನ್ಗೃಹ್ಣೀಯಾ॒ದ್ಯಃ ಕಾ॒ಮಯೇ॑ತ ಯಥಾ ಪೂ॒ರ್ವ-ಮ್ಪ್ರ॒ಜಾಃ ಕ॑ಲ್ಪೇರ॒ನ್ನಿತಿ॑ ಯ॒ಜ್ಞಸ್ಯ॒ ವೈ ಕೢಪ್ತಿ॒ಮನು॑ ಪ್ರ॒ಜಾಃ ಕ॑ಲ್ಪನ್ತೇ ಯ॒ಜ್ಞಸ್ಯಾ-ಽಕೢ॑ಪ್ತಿ॒ಮನು॒ ನ ಕ॑ಲ್ಪನ್ತೇ ಯಥಾ ಪೂ॒ರ್ವಮೇ॒ವ ಪ್ರ॒ಜಾಃ ಕ॑ಲ್ಪಯತಿ॒ ನ ಜ್ಯಾಯಾಗ್ಂ॑ಸ॒-ಙ್ಕನೀ॑ಯಾ॒ನತಿ॑ ಕ್ರಾಮತ್ಯೈನ್ದ್ರವಾಯ॒ವಾಗ್ರಾ᳚-ನ್ಗೃಹ್ಣೀಯಾದಾಮಯಾ॒ವಿನಃ॑ ಪ್ರಾ॒ಣೇನ॒ ವಾ ಏ॒ಷ ವ್ಯೃ॑ದ್ಧ್ಯತೇ॒ ಯಸ್ಯಾ॒-ಽಽಮಯ॑ತಿ ಪ್ರಾ॒ಣ ಐ᳚ನ್ದ್ರವಾಯ॒ವಃ ಪ್ರಾ॒ಣೇನೈ॒ವೈನ॒ಗ್ಂ॒ ಸಮ॑ರ್ಧಯತಿ ಮೈತ್ರಾವರು॒ಣಾಗ್ರಾ᳚-ನ್ಗೃಹ್ಣೀರ॒ನ್॒ ಯೇಷಾ᳚-ನ್ದೀಖ್ಷಿ॒ತಾನಾ᳚-ಮ್ಪ್ರ॒ಮೀಯೇ॑ತ [ಪ್ರ॒ಮೀಯೇ॑ತ, ಪ್ರಾ॒ಣಾ॒ಪಾ॒ನಾಭ್ಯಾಂ॒-ವಾಁ ಏ॒ತೇ] 22
ಪ್ರಾಣಾಪಾ॒ನಾಭ್ಯಾಂ॒-ವಾಁ ಏ॒ತೇ ವ್ಯೃ॑ದ್ಧ್ಯನ್ತೇ॒ ಯೇಷಾ᳚-ನ್ದೀಖ್ಷಿ॒ತಾನಾ᳚-ಮ್ಪ್ರ॒ಮೀಯ॑ತೇ ಪ್ರಾಣಾಪಾ॒ನೌ ಮಿ॒ತ್ರಾವರು॑ಣೌ ಪ್ರಾಣಾಪಾ॒ನಾವೇ॒ವ ಮು॑ಖ॒ತಃ ಪರಿ॑ ಹರನ್ತ ಆಶ್ವಿ॒ನಾಗ್ರಾ᳚-ನ್ಗೃಹ್ಣೀತಾ ಽಽನುಜಾವ॒ರೋ᳚-ಽಶ್ವಿನೌ॒ ವೈ ದೇ॒ವಾನಾ॑ಮಾನುಜಾವ॒ರೌ ಪ॒ಶ್ಚೇವಾಗ್ರ॒-ಮ್ಪರ್ಯೈ॑ತಾ-ಮ॒ಶ್ವಿನಾ॑ವೇ॒ತಸ್ಯ॑ ದೇ॒ವತಾ॒ ಯ ಆ॑ನುಜಾವ॒ರ-ಸ್ತಾವೇ॒ವೈನ॒ಮಗ್ರ॒-ಮ್ಪರಿ॑ ಣಯತ-ಶ್ಶು॒ಕ್ರಾಗ್ರಾ᳚-ನ್ಗೃಹ್ಣೀತ ಗ॒ತಶ್ರೀಃ᳚ ಪ್ರತಿ॒ಷ್ಠಾಕಾ॑ಮೋ॒-ಽಸೌ ವಾ ಆ॑ದಿ॒ತ್ಯ-ಶ್ಶು॒ಕ್ರ ಏ॒ಷೋ-ಽನ್ತೋ-ಽನ್ತಂ॑ ಮನು॒ಷ್ಯ॑- [ಏ॒ಷೋ-ಽನ್ತೋ-ಽನ್ತಂ॑ ಮನು॒ಷ್ಯಃ॑, ಶ್ರಿ॒ಯೈ ಗ॒ತ್ವಾ ನಿ] 23
-ಶ್ಶ್ರಿ॒ಯೈ ಗ॒ತ್ವಾ ನಿ ವ॑ರ್ತ॒ತೇ ಽನ್ತಾ॑ದೇ॒ವಾ-ಽನ್ತ॒ಮಾ ರ॑ಭತೇ॒ ನ ತತಃ॒ ಪಾಪೀ॑ಯಾ-ನ್ಭವತಿ ಮನ್ಥ್ಯ॑ಗ್ರಾ-ನ್ಗೃಹ್ಣೀತಾ-ಭಿ॒ಚರ॑-ನ್ನಾರ್ತಪಾ॒ತ್ರಂ-ವಾಁ ಏ॒ತ-ದ್ಯ-ನ್ಮ॑ನ್ಥಿಪಾ॒ತ್ರ-ಮ್ಮೃ॒ತ್ಯುನೈ॒ವೈನ॑-ಙ್ಗ್ರಾಹಯತಿ ತಾ॒ಜಗಾರ್ತಿ॒ಮಾರ್ಚ್ಛ॑ತ್ಯಾ-ಗ್ರಯ॒ಣಾಗ್ರಾ᳚-ನ್ಗೃಹ್ಣೀತ॒ ಯಸ್ಯ॑ ಪಿ॒ತಾ ಪಿ॑ತಾಮ॒ಹಃ ಪುಣ್ಯ॒-ಸ್ಸ್ಯಾದಥ॒ ತನ್ನ ಪ್ರಾ᳚ಪ್ನು॒ಯಾ-ದ್ವಾ॒ಚಾ ವಾ ಏ॒ಷ ಇ॑ನ್ದ್ರಿ॒ಯೇಣ॒ ವ್ಯೃ॑ದ್ಧ್ಯತೇ॒ ಯಸ್ಯ॑ ಪಿ॒ತಾ ಪಿ॑ತಾಮ॒ಹಃ ಪುಣ್ಯೋ॒ [ಪುಣ್ಯಃ॑, ಭವ॒ತ್ಯಥ॒ ತನ್ನ] 24
ಭವ॒ತ್ಯಥ॒ ತನ್ನ ಪ್ರಾ॒ಪ್ನೋತ್ಯುರ॑ ಇವೈ॒ತ-ದ್ಯ॒ಜ್ಞಸ್ಯ॒ ವಾಗಿ॑ವ॒ ಯದಾ᳚ಗ್ರಯ॒ಣೋ ವಾ॒ಚೈವೈನ॑ಮಿನ್ದ್ರಿ॒ಯೇಣ॒ ಸಮ॑ರ್ಧಯತಿ॒ ನ ತತಃ॒ ಪಾಪೀ॑ಯಾ-ನ್ಭವತ್ಯು॒ಕ್ಥ್ಯಾ᳚ಗ್ರಾ-ನ್ಗೃಹ್ಣೀತಾಭಿಚ॒ರ್ಯಮಾ॑ಣ॒-ಸ್ಸರ್ವೇ॑ಷಾಂ॒-ವಾಁ ಏ॒ತ-ತ್ಪಾತ್ರಾ॑ಣಾಮಿನ್ದ್ರಿ॒ಯಂ-ಯಁದು॑ಕ್ಥ್ಯಪಾ॒ತ್ರಗ್ಂ ಸರ್ವೇ॑ಣೈ॒ವೈನ॑ಮಿನ್ದ್ರಿ॒ಯೇಣಾತಿ॒ ಪ್ರಯು॑ಙ್ಕ್ತೇ॒ ಸರ॑ಸ್ವತ್ಯ॒ಭಿ ನೋ॑ ನೇಷಿ॒ ವಸ್ಯ॒ ಇತಿ॑ ಪುರೋ॒ರುಚ॑-ಙ್ಕುರ್ಯಾ॒-ದ್ವಾಗ್ವೈ [ ] 25
ಸರ॑ಸ್ವತೀ ವಾ॒ಚೈವೈನ॒ಮತಿ॒ ಪ್ರಯು॑ಙ್ಕ್ತೇ॒ ಮಾ ತ್ವ-ತ್ಖ್ಷೇತ್ರಾ॒ಣ್ಯರ॑ಣಾನಿ ಗ॒ನ್ಮೇತ್ಯಾ॑ಹ ಮೃ॒ತ್ಯೋರ್ವೈ ಖ್ಷೇತ್ರಾ॒ಣ್ಯರ॑ಣಾನಿ॒ ತೇನೈ॒ವ ಮೃ॒ತ್ಯೋಃ, ಖ್ಷೇತ್ರಾ॑ಣಿ॒ ನ ಗ॑ಚ್ಛತಿ ಪೂ॒ರ್ಣಾ-ನ್ಗ್ರಹಾ᳚-ನ್ಗೃಹ್ಣೀಯಾದಾಮಯಾ॒ವಿನಃ॑ ಪ್ರಾ॒ಣಾನ್ ವಾ ಏ॒ತಸ್ಯ॒ ಶುಗೃ॑ಚ್ಛತಿ॒ ಯಸ್ಯಾ॒ ಽಽಮಯ॑ತಿ ಪ್ರಾ॒ಣಾ ಗ್ರಹಾಃ᳚ ಪ್ರಾ॒ಣಾನೇ॒ವಾಸ್ಯ॑ ಶು॒ಚೋ ಮು॑ಞ್ಚತ್ಯು॒ತ ಯದೀ॒ತಾಸು॒ರ್ಭವ॑ತಿ॒ ಜೀವ॑ತ್ಯೇ॒ವ ಪೂ॒ರ್ಣಾ-ನ್ಗ್ರಹಾ᳚-ನ್ಗೃಹ್ಣೀಯಾ॒-ದ್ಯರ್ಹಿ॑ ಪ॒ರ್ಜನ್ಯೋ॒ ನ ವರ್ಷೇ᳚-ತ್ಪ್ರಾ॒ಣಾನ್ ವಾ ಏ॒ತರ್ಹಿ॑ ಪ್ರ॒ಜಾನಾ॒ಗ್ಂ॒ ಶುಗೃ॑ಚ್ಛತಿ॒ ಯರ್ಹಿ॑ ಪ॒ರ್ಜನ್ಯೋ॒ ನ ವರ್ಷ॑ತಿ ಪ್ರಾ॒ಣಾ ಗ್ರಹಾಃ᳚ ಪ್ರಾ॒ಣಾನೇ॒ವ ಪ್ರ॒ಜಾನಾಗ್ಂ॑ ಶು॒ಚೋ ಮು॑ಞ್ಚತಿ ತಾ॒ಜ-ಕ್ಪ್ರ ವ॑ರ್ಷತಿ ॥ 26 ॥
(ಪ್ರ॒ಮೀಯೇ॑ತ – ಮನು॒ಷ್ಯ॑ – ಋದ್ಧ್ಯತೇ॒ ಯಸ್ಯ॑ ಪಿ॒ತಾ ಪಿ॑ತಾಮ॒ಹಃ ಪುಣ್ಯೋ॒-ವಾಗ್ವಾ-ಏ॒ವ ಪೂ॒ರ್ಣಾ-ನ್ಗ್ರಹಾ॒ನ್-ಪಞ್ಚ॑ವಿಗ್ಂಶತಿಶ್ಚ) (ಅ. 7)
ಗಾ॒ಯ॒ತ್ರೋ ವಾ ಐ᳚ನ್ದ್ರವಾಯ॒ವೋ ಗಾ॑ಯ॒ತ್ರ-ಮ್ಪ್ರಾ॑ಯ॒ಣೀಯ॒-ಮಹ॒ಸ್ತಸ್ಮಾ᳚-ತ್ಪ್ರಾಯ॒ಣೀಯೇ-ಽಹ॑ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾತಿ॒ ತ್ರೈಷ್ಟು॑ಭೋ॒ ವೈ ಶು॒ಕ್ರಸ್ತ್ರೈಷ್ಟು॑ಭ-ನ್ದ್ವಿ॒ತೀಯ॒-ಮಹ॒ಸ್ತಸ್ಮಾ᳚-ದ್ದ್ವಿ॒ತೀಯೇ-ಽಹ॑ಞ್ಛು॒ಕ್ರೋ ಗೃ॑ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾತಿ॒ ಜಾಗ॑ತೋ॒ ವಾ ಆ᳚ಗ್ರಯ॒ಣೋ ಜಾಗ॑ತ-ನ್ತೃ॒ತೀಯ॒-ಮಹ॒ಸ್ತಸ್ಮಾ᳚-ತ್ತೃ॒ತೀಯೇ-ಽಹ॑ನ್ನಾಗ್ರಯ॒ಣೋ ಗೃ॑ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾತ್ಯೇ॒ತದ್ವೈ [ ] 27
ಯ॒ಜ್ಞಮಾ॑ಪ॒-ದ್ಯಚ್ಛನ್ದಾಗ್॑ಸ್ಯಾ॒ಪ್ನೋತಿ॒ ಯದಾ᳚ಗ್ರಯ॒ಣ-ಶ್ಶ್ವೋ ಗೃ॒ಹ್ಯತೇ॒ ಯತ್ರೈ॒ವ ಯ॒ಜ್ಞಮದೃ॑ಶ॒-ನ್ತತ॑ ಏ॒ವೈನ॒-ಮ್ಪುನಃ॒ ಪ್ರಯು॑ಙ್ಕ್ತೇ॒ ಜಗ॑ನ್ಮುಖೋ॒ ವೈ ದ್ವಿ॒ತೀಯ॑ಸ್ತ್ರಿರಾ॒ತ್ರೋ ಜಾಗ॑ತ ಆಗ್ರಯ॒ಣೋ ಯಚ್ಚ॑ತು॒ರ್ಥೇ-ಽಹ॑ನ್ನಾಗ್ರಯ॒ಣೋ ಗೃ॒ಹ್ಯತೇ॒ ಸ್ವ ಏ॒ವೈನ॑-ಮಾ॒ಯತ॑ನೇ ಗೃಹ್ಣಾ॒ತ್ಯಥೋ॒ ಸ್ವಮೇ॒ವ ಛನ್ದೋ-ಽನು॑ ಪ॒ರ್ಯಾವ॑ರ್ತನ್ತೇ॒ ರಾಥ॑ನ್ತರೋ॒ ವಾ ಐ᳚ನ್ದ್ರವಾಯ॒ವೋ ರಾಥ॑ನ್ತರ-ಮ್ಪಞ್ಚ॒ಮ-ಮಹ॒-ಸ್ತಸ್ಮಾ᳚-ತ್ಪಞ್ಚ॒ಮೇ-ಽಹ॑- [-ಸ್ತಸ್ಮಾ᳚-ತ್ಪಞ್ಚ॒ಮೇ-ಽಹನ್ನ್॑, ಐ॒ನ್ದ್ರ॒ವಾ॒ಯ॒ವೋ ಗೃ॑ಹ್ಯತೇ॒] 28
-ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ॒ ಸ್ವ ಏ॒ವೈನ॑-ಮಾ॒ಯತ॑ನೇ ಗೃಹ್ಣಾತಿ॒ ಬಾರ್ಹ॑ತೋ॒ ವೈ ಶು॒ಕ್ರೋ ಬಾರ್ಹ॑ತಗ್ಂ ಷ॒ಷ್ಠ-ಮಹ॒-ಸ್ತಸ್ಮಾ᳚-ಥ್ಷ॒ಷ್ಠೇ-ಽಹ॑ಞ್ಛು॒ಕ್ರೋ ಗೃ॑ಹ್ಯತೇ॒ ಸ್ವ ಏ॒ವೈನ॑-ಮಾ॒ಯತ॑ನೇ ಗೃಹ್ಣಾತ್ಯೇ॒ತದ್ವೈ ದ್ವಿ॒ತೀಯಂ॑-ಯಁ॒ಜ್ಞಮಾ॑ಪ॒-ದ್ಯಚ್ಛನ್ದಾಗ್॑ಸ್ಯಾ॒ಪ್ನೋತಿ॒ ಯಚ್ಛು॒ಕ್ರ-ಶ್ಶ್ವೋ ಗೃ॒ಹ್ಯತೇ॒ ಯತ್ರೈ॒ವ ಯ॒ಜ್ಞ-ಮದೃ॑ಶ॒-ನ್ತತ॑ ಏ॒ವೈನ॒-ಮ್ಪುನಃ॒ ಪ್ರಯು॑ಙ್ಕ್ತೇ ತ್ರಿ॒ಷ್ಟುಙ್ಮು॑ಖೋ॒ ವೈ ತೃ॒ತೀಯ॑-ಸ್ತ್ರಿರಾ॒ತ್ರ-ಸ್ತ್ರೈಷ್ಟು॑ಭ- [-ಸ್ತ್ರೈಷ್ಟು॑ಭಃ, ಶು॒ಕ್ರೋ] 29
-ಶ್ಶು॒ಕ್ರೋ ಯ-ಥ್ಸ॑ಪ್ತ॒ಮೇ-ಽಹ॑ಞ್ಛು॒ಕ್ರೋ ಗೃ॒ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾ॒ತ್ಯಥೋ॒ ಸ್ವಮೇ॒ವ ಛನ್ದೋ-ಽನು॑ ಪ॒ರ್ಯಾವ॑ರ್ತನ್ತೇ॒ ವಾಗ್ವಾ ಆ᳚ಗ್ರಯ॒ಣೋ ವಾಗ॑ಷ್ಟ॒ಮಮಹ॒-ಸ್ತಸ್ಮಾ॑ದಷ್ಟ॒ಮೇ-ಽಹ॑ನ್ನಾಗ್ರಯ॒ಣೋ ಗೃ॑ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾತಿ ಪ್ರಾ॒ಣೋ ವಾ ಐ᳚ನ್ದ್ರವಾಯ॒ವಃ ಪ್ರಾ॒ಣೋ ನ॑ವ॒ಮ-ಮಹ॒ಸ್ತಸ್ಮಾ᳚ನ್ನವ॒ಮೇ ಽಹ॑ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ॒ ಸ್ವ ಏ॒ವೈನ॑ಮಾ॒ಯತ॑ನೇ ಗೃಹ್ಣಾತ್ಯೇ॒ತ- [ಗೃಹ್ಣಾತ್ಯೇ॒ತತ್, ವೈ ತೃ॒ತೀಯಂ॑-] 30
-ದ್ವೈ ತೃ॒ತೀಯಂ॑-ಯಁ॒ಜ್ಞಮಾ॑ಪ॒-ದ್ಯಚ್ಛನ್ದಾಗ್॑ಸ್ಯಾ॒ಪ್ನೋತಿ॒ ಯದೈ᳚ನ್ದ್ರವಾಯ॒ವ-ಶ್ಶ್ವೋ ಗೃ॒ಹ್ಯತೇ॒ ಯತ್ರೈ॒ವ ಯ॒ಜ್ಞಮದೃ॑ಶ॒-ನ್ತತ॑ ಏ॒ವೈನ॒-ಮ್ಪುನಃ॒ ಪ್ರಯು॒ಙ್ಕ್ತೇ ಽಥೋ॒ ಸ್ವಮೇ॒ವ ಛನ್ದೋ-ಽನು॑ ಪ॒ರ್ಯಾವ॑ರ್ತನ್ತೇ ಪ॒ಥೋ ವಾ ಏ॒ತೇ-ಽದ್ಧ್ಯಪ॑ಥೇನ ಯನ್ತಿ॒ ಯೇ᳚-ಽನ್ಯೇನೈ᳚ನ್ದ್ರವಾಯ॒ವಾ-ತ್ಪ್ರ॑ತಿ॒ಪದ್ಯ॒ನ್ತೇ-ಽನ್ತಃ॒ ಖಲು॒ ವಾ ಏ॒ಷ ಯ॒ಜ್ಞಸ್ಯ॒ ಯ-ದ್ದ॑ಶ॒ಮ-ಮಹ॑ರ್ದಶ॒ಮೇ ಽಹ॑ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ ಯ॒ಜ್ಞಸ್ಯೈ॒- [ಯ॒ಜ್ಞಸ್ಯ॑, ಏ॒ವಾನ್ತ॑-ಙ್ಗ॒ತ್ವಾ] 31
-ವಾನ್ತ॑-ಙ್ಗ॒ತ್ವಾ ಽಪ॑ಥಾ॒-ತ್ಪನ್ಥಾ॒ಮಪಿ॑ ಯ॒ನ್ತ್ಯಥೋ॒ ಯಥಾ॒ ವಹೀ॑ಯಸಾ ಪ್ರತಿ॒ಸಾರಂ॒-ವಁಹ॑ನ್ತಿ ತಾ॒ದೃಗೇ॒ವ ತಚ್ಛನ್ದಾಗ್॑ಸ್ಯ॒ನ್ಯೋ᳚-ಽನ್ಯಸ್ಯ॑ ಲೋ॒ಕಮ॒ಭ್ಯ॑ದ್ಧ್ಯಾಯ॒-ನ್ತಾನ್ಯೇ॒ತೇನೈ॒ವ ದೇ॒ವಾ ವ್ಯ॑ವಾಹಯನ್ನೈನ್ದ್ರವಾಯ॒ವಸ್ಯ॒ ವಾ ಏ॒ತದಾ॒ಯತ॑ನಂ॒-ಯಁಚ್ಚ॑ತು॒ರ್ಥ-ಮಹ॒ಸ್ತಸ್ಮಿ॑-ನ್ನಾಗ್ರಯ॒ಣೋ ಗೃ॑ಹ್ಯತೇ॒ ತಸ್ಮಾ॑-ದಾಗ್ರಯ॒ಣಸ್ಯಾ॒ ಽಽಯತ॑ನೇ ನವ॒ಮೇ-ಽಹ॑ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ ಶು॒ಕ್ರಸ್ಯ॒ ವಾ ಏ॒ತದಾ॒ಯತ॑ನಂ॒-ಯಁ-ತ್ಪ॑ಞ್ಚ॒ಮ- [ಯ-ತ್ಪ॑ಞ್ಚ॒ಮಮ್, ಅಹ॒ಸ್ತಸ್ಮಿ॑-ನ್ನೈನ್ದ್ರವಾಯ॒ವೋ] 32
-ಮಹ॒ಸ್ತಸ್ಮಿ॑-ನ್ನೈನ್ದ್ರವಾಯ॒ವೋ ಗೃ॑ಹ್ಯತೇ॒ ತಸ್ಮಾ॑-ದೈನ್ದ್ರವಾಯ॒ವಸ್ಯಾ॒-ಽಽಯತ॑ನೇ ಸಪ್ತ॒ಮೇ-ಽಹ॑ಞ್ಛು॒ಕ್ರೋ ಗೃ॑ಹ್ಯತ ಆಗ್ರಯ॒ಣಸ್ಯ॒ ವಾ ಏ॒ತದಾ॒ಯತ॑ನಂ॒-ಯಁ-ಥ್ಷ॒ಷ್ಠಮಹ॒-ಸ್ತಸ್ಮಿ॑ಞ್ಛು॒ಕ್ರೋ ಗೃ॑ಹ್ಯತೇ॒ ತಸ್ಮಾ᳚-ಚ್ಛು॒ಕ್ರಸ್ಯಾ॒ ಽಽಯತ॑ನೇ-ಽಷ್ಟ॒ಮೇ-ಽಹ॑ನ್ನಾಗ್ರಯ॒ಣೋ ಗೃ॑ಹ್ಯತೇ॒ ಛನ್ದಾಗ್॑ಸ್ಯೇ॒ವ ತದ್ವಿ ವಾ॑ಹಯತಿ॒ ಪ್ರ ವಸ್ಯ॑ಸೋ ವಿವಾ॒ಹಮಾ᳚ಪ್ನೋತಿ॒ ಯ ಏ॒ವಂ-ವೇಁದಾಥೋ॑ ದೇ॒ವತಾ᳚ಭ್ಯ ಏ॒ವ ಯ॒ಜ್ಞೇ ಸಂ॒ವಿಁದ॑-ನ್ದಧಾತಿ॒ ತಸ್ಮಾ॑ದಿ॒ದ-ಮ॒ನ್ಯೋ᳚-ಽನ್ಯಸ್ಮೈ॑ ದದಾತಿ ॥ 33 ॥
(ಏ॒ತದ್ವೈ – ಪ॑ಞ್ಚ॒ಮೇ-ಽಹ॒ನ್ – ತ್ರೈಷ್ಟು॑ಭ – ಏ॒ತ-ದ್- ಗೃ॑ಹ್ಯತೇ ಯ॒ಜ್ಞಸ್ಯ॑ – ಪಞ್ಚ॒ಮ – ಮ॒ನ್ಯಸ್ಮಾ॒ – ಏಕ॑ಞ್ಚ) (ಅ. 8)
ಪ್ರ॒ಜಾಪ॑ತಿರಕಾಮಯತ॒ ಪ್ರ ಜಾ॑ಯೇ॒ಯೇತಿ॒ ಸ ಏ॒ತ-ನ್ದ್ವಾ॑ದಶರಾ॒ತ್ರ-ಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸ ಪ್ರಾಜಾ॑ಯತ॒ ಯಃ ಕಾ॒ಮಯೇ॑ತ॒ ಪ್ರ ಜಾ॑ಯೇ॒ಯೇತಿ॒ ಸ ದ್ವಾ॑ದಶರಾ॒ತ್ರೇಣ॑ ಯಜೇತ॒ ಪ್ರೈವ ಜಾ॑ಯತೇ ಬ್ರಹ್ಮವಾ॒ದಿನೋ॑ ವದನ್ತ್ಯಗ್ನಿಷ್ಟೋ॒ಮಪ್ರಾ॑ಯಣಾ ಯ॒ಜ್ಞಾ ಅಥ॒ ಕಸ್ಮಾ॑ದತಿರಾ॒ತ್ರಃ ಪೂರ್ವಃ॒ ಪ್ರ ಯು॑ಜ್ಯತ॒ ಇತಿ॒ ಚಖ್ಷು॑ಷೀ॒ ವಾ ಏ॒ತೇ ಯ॒ಜ್ಞಸ್ಯ॒ ಯದ॑ತಿರಾ॒ತ್ರೌ ಕ॒ನೀನಿ॑ಕೇ ಅಗ್ನಿಷ್ಟೋ॒ಮೌ ಯ- [ಅಗ್ನಿಷ್ಟೋ॒ಮೌ ಯತ್, ಅ॒ಗ್ನಿ॒ಷ್ಟೋ॒ಮ-ಮ್ಪೂರ್ವ॑-] 34
-ದ॑ಗ್ನಿಷ್ಟೋ॒ಮ-ಮ್ಪೂರ್ವ॑-ಮ್ಪ್ರಯುಞ್ಜೀ॒ರ-ನ್ಬ॑ಹಿ॒ರ್ಧಾ ಕ॒ನೀನಿ॑ಕೇ ದದ್ಧ್ಯು॒ಸ್ತಸ್ಮಾ॑-ದತಿರಾ॒ತ್ರಃ ಪೂರ್ವಃ॒ ಪ್ರ ಯು॑ಜ್ಯತೇ॒ ಚಖ್ಷು॑ಷೀ ಏ॒ವ ಯ॒ಜ್ಞೇ ಧಿ॒ತ್ವಾ ಮ॑ದ್ಧ್ಯ॒ತಃ ಕ॒ನೀನಿ॑ಕೇ॒ ಪ್ರತಿ॑ ದಧತಿ॒ ಯೋ ವೈ ಗಾ॑ಯ॒ತ್ರೀ-ಞ್ಜ್ಯೋತಿಃ॑ಪಖ್ಷಾಂ॒-ವೇಁದ॒ ಜ್ಯೋತಿ॑ಷಾ ಭಾ॒ಸಾ ಸು॑ವ॒ರ್ಗಂ-ಲೋಁ॒ಕಮೇ॑ತಿ॒ ಯಾವ॑ಗ್ನಿಷ್ಟೋ॒ಮೌ ತೌ ಪ॒ಖ್ಷೌ ಯೇ-ಽನ್ತ॑ರೇ॒-ಽಷ್ಟಾ-ವು॒ಕ್ಥ್ಯಾ᳚-ಸ್ಸ ಆ॒ತ್ಮೈಷಾ ವೈ ಗಾ॑ಯ॒ತ್ರೀ ಜ್ಯೋತಿಃ॑ಪಖ್ಷಾ॒ ಯ ಏ॒ವಂ-ವೇಁದ॒ ಜ್ಯೋತಿ॑ಷಾ ಭಾ॒ಸಾ ಸು॑ವ॒ರ್ಗಂ-ಲೋಁ॒ಕ- [ಸು॑ವ॒ರ್ಗಂ-ಲೋಁ॒ಕಮ್, ಏ॒ತಿ॒ ಪ್ರ॒ಜಾಪ॑ತಿ॒ರ್ವಾ] 35
-ಮೇ॑ತಿ ಪ್ರ॒ಜಾಪ॑ತಿ॒ರ್ವಾ ಏ॒ಷ ದ್ವಾ॑ದಶ॒ಧಾ ವಿಹಿ॑ತೋ॒ ಯ-ದ್ದ್ವಾ॑ದಶರಾ॒ತ್ರೋ ಯಾವ॑ತಿರಾ॒ತ್ರೋ ತೌ ಪ॒ಖ್ಷೌ ಯೇ-ಽನ್ತ॑ರೇ॒-ಽಷ್ಟಾ-ವು॒ಕ್ಥ್ಯಾ᳚-ಸ್ಸ ಆ॒ತ್ಮಾ ಪ್ರ॒ಜಾಪ॑ತಿ॒ರ್ವಾವೈಷ ಸನ್ಥ್ಸದ್ಧ॒ ವೈ ಸ॒ತ್ರೇಣ॑ ಸ್ಪೃಣೋತಿ ಪ್ರಾ॒ಣಾ ವೈ ಸ-ತ್ಪ್ರಾ॒ಣಾನೇ॒ವ ಸ್ಪೃ॑ಣೋತಿ॒ ಸರ್ವಾ॑ಸಾಂ॒-ವಾಁ ಏ॒ತೇ ಪ್ರ॒ಜಾನಾ᳚-ಮ್ಪ್ರಾ॒ಣೈರಾ॑ಸತೇ॒ ಯೇ ಸ॒ತ್ರಮಾಸ॑ತೇ॒ ತಸ್ಮಾ᳚-ತ್ಪೃಚ್ಛನ್ತಿ॒ ಕಿಮೇ॒ತೇ ಸ॒ತ್ರಿಣ॒ ಇತಿ॑ ಪ್ರಿ॒ಯಃ ಪ್ರ॒ಜಾನಾ॒ ಮುತ್ಥಿ॑ತೋ ಭವತಿ॒ ಯ ಏ॒ವಂ ವೇಁದ॑ ॥ 36 ॥
(ಅ॒ಗ್ನಿ॒ಷ್ಟೋ॒ಮೌ ಯಥ್ – ಸು॑ವ॒ರ್ಗಂ-ಲೋಁ॒ಕಂ – ಪ್ರಿ॒ಯಃ ಪ್ರ॒ಜಾನಾಂ॒ – ಪಞ್ಚ॑ ಚ) (ಅ. 9)
ನ ವಾ ಏ॒ಷೋ᳚-ಽನ್ಯತೋ॑ವೈಶ್ವಾನರ-ಸ್ಸುವ॒ರ್ಗಾಯ॑ ಲೋ॒ಕಾಯ॒ ಪ್ರಾಭ॑ವದೂ॒ರ್ಧ್ವೋ ಹ॒ ವಾ ಏ॒ಷ ಆತ॑ತ ಆಸೀ॒-ತ್ತೇ ದೇ॒ವಾ ಏ॒ತಂ-ವೈಁ᳚ಶ್ವಾನ॒ರ-ಮ್ಪರ್ಯೌ॑ಹನ್-ಥ್ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಪ್ರಭೂ᳚ತ್ಯಾ ಋ॒ತವೋ॒ ವಾ ಏ॒ತೇನ॑ ಪ್ರ॒ಜಾಪ॑ತಿಮಯಾಜಯ॒-ನ್ತೇಷ್ವಾ᳚ರ್ಧ್ನೋ॒ದಧಿ॒ ತದೃ॒ದ್ಧ್ನೋತಿ॑ ಹ॒ ವಾ ಋ॒ತ್ವಿಖ್ಷು॒ ಯ ಏ॒ವಂ-ವಿಁ॒ದ್ವಾ-ನ್ದ್ವಾ॑ದಶಾ॒ಹೇನ॒ ಯಜ॑ತೇ॒ ತೇ᳚-ಽಸ್ಮಿನ್ನೈಚ್ಛನ್ತ॒ ಸ ರಸ॒ಮಹ॑ ವಸ॒ನ್ತಾಯ॒ ಪ್ರಾಯ॑ಚ್ಛ॒- [ಪ್ರಾಯ॑ಚ್ಛತ್, ಯವ॑-ಙ್ಗ್ರೀ॒ಷ್ಮಾಯೌಷ॑ಧೀ-] 37
-ದ್ಯವ॑-ಙ್ಗ್ರೀ॒ಷ್ಮಾಯೌಷ॑ಧೀ-ರ್ವ॒ರ್॒ಷಾಭ್ಯೋ᳚ ವ್ರೀ॒ಹೀಞ್ಛ॒ರದೇ॑ ಮಾಷತಿ॒ಲೌ ಹೇ॑ಮನ್ತಶಿಶಿ॒ರಾಭ್ಯಾ॒-ನ್ತೇನೇನ್ದ್ರ॑-ಮ್ಪ್ರ॒ಜಾಪ॑ತಿರಯಾಜಯ॒-ತ್ತತೋ॒ ವಾ ಇನ್ದ್ರ॒ ಇನ್ದ್ರೋ॑-ಽಭವ॒-ತ್ತಸ್ಮಾ॑ದಾಹು-ರಾನುಜಾವ॒ರಸ್ಯ॑ ಯ॒ಜ್ಞ ಇತಿ॒ ಸ ಹ್ಯೇ॑ತೇನಾ-ಽಗ್ರೇ-ಽಯ॑ಜತೈ॒ಷ ಹ॒ ವೈ ಕು॒ಣಪ॑ಮತ್ತಿ॒ ಯ-ಸ್ಸ॒ತ್ರೇ ಪ್ರ॑ತಿಗೃ॒ಹ್ಣಾತಿ॑ ಪುರುಷಕುಣ॒ಪ-ಮ॑ಶ್ವಕುಣ॒ಪ-ಙ್ಗೌರ್ವಾ ಅನ್ನಂ॒-ಯೇಁನ॒ ಪಾತ್ರೇ॒ಣಾನ್ನ॒-ಮ್ಬಿಭ್ರ॑ತಿ॒ ಯ-ತ್ತನ್ನ ನಿ॒ರ್ಣೇನಿ॑ಜತಿ॒ ತತೋ-ಽಧಿ॒ [ತತೋ-ಽಧಿ॑, ಮಲ॑-ಞ್ಜಾಯತ॒ ಏಕ॑ ಏ॒ವ] 38
ಮಲ॑-ಞ್ಜಾಯತ॒ ಏಕ॑ ಏ॒ವ ಯ॑ಜೇ॒ತೈಕೋ॒ ಹಿ ಪ್ರ॒ಜಾಪ॑ತಿ॒-ರಾರ್ಧ್ನೋ॒-ದ್ದ್ವಾದ॑ಶ॒ ರಾತ್ರೀ᳚ರ್ದೀಖ್ಷಿ॒ತ-ಸ್ಸ್ಯಾ॒-ದ್ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತಿ॒ರ್ವಾವೈಷ ಏ॒ಷ ಹ॒ ತ್ವೈ ಜಾ॑ಯತೇ॒ ಯಸ್ತಪ॒ಸೋ-ಽಧಿ॒ ಜಾಯ॑ತೇ ಚತು॒ರ್ಧಾ ವಾ ಏ॒ತಾಸ್ತಿ॒ಸ್ರಸ್ತಿ॑ಸ್ರೋ॒ ರಾತ್ರ॑ಯೋ॒ ಯ-ದ್ದ್ವಾದ॑ಶೋಪ॒ಸದೋ॒ ಯಾಃ ಪ್ರ॑ಥ॒ಮಾ ಯ॒ಜ್ಞ-ನ್ತಾಭಿ॒-ಸ್ಸ-ಮ್ಭ॑ರತಿ॒ ಯಾ ದ್ವಿ॒ತೀಯಾ॑ ಯ॒ಜ್ಞ-ನ್ತಾಭಿ॒ರಾ ರ॑ಭತೇ॒ [ಯ॒ಜ್ಞ-ನ್ತಾಭಿ॒ರಾ ರ॑ಭತೇ, ಯಾಸ್ತೃ॒ತೀಯಾಃ॒] 39
ಯಾಸ್ತೃ॒ತೀಯಾಃ॒ ಪಾತ್ರಾ॑ಣಿ॒ ತಾಭಿ॒ರ್ನಿರ್ಣೇ॑ನಿಕ್ತೇ॒ ಯಾಶ್ಚ॑ತು॒ರ್ಥೀರಪಿ॒ ತಾಭಿ॑ರಾ॒ತ್ಮಾನ॑-ಮನ್ತರ॒ತ-ಶ್ಶು॑ನ್ಧತೇ॒ ಯೋ ವಾ ಅ॑ಸ್ಯ ಪ॒ಶುಮತ್ತಿ॑ ಮಾ॒ಗ್ಂ॒ಸಗ್ಂ ಸೋ᳚-ಽತ್ತಿ॒ ಯಃ ಪು॑ರೋ॒ಡಾಶ॑-ಮ್ಮ॒ಸ್ತಿಷ್ಕ॒ಗ್ಂ॒ ಸ ಯಃ ಪ॑ರಿವಾ॒ಪ-ಮ್ಪುರೀ॑ಷ॒ಗ್ಂ॒ ಸ ಯ ಆಜ್ಯ॑-ಮ್ಮ॒ಜ್ಜಾನ॒ಗ್ಂ॒ ಸ ಯ-ಸ್ಸೋಮ॒ಗ್ಗ್॒ ಸ್ವೇದ॒ಗ್ಂ॒ ಸೋ-ಽಪಿ॑ ಹ॒ ವಾ ಅ॑ಸ್ಯ ಶೀರ್ಷ॒ಣ್ಯಾ॑ ನಿ॒ಷ್ಪದಃ॒ ಪ್ರತಿ॑ ಗೃಹ್ಣಾತಿ॒ ಯೋ ದ್ವಾ॑ದಶಾ॒ಹೇ ಪ್ರ॑ತಿಗೃ॒ಹ್ಣಾತಿ॒ ತಸ್ಮಾ᳚-ದ್ದ್ವಾದಶಾ॒ಹೇನ॒ ನ ಯಾಜ್ಯ॑-ಮ್ಪಾ॒ಪ್ಮನೋ॒ ವ್ಯಾವೃ॑ತ್ತ್ಯೈ ॥ 40 ॥
(ಅಯ॑ಚ್ಛ॒ – ದಧಿ॑ – ರಭತೇ – ದ್ವಾದಶಾ॒ಹೇನ॑ – ಚ॒ತ್ವಾರಿ॑ ಚ) (ಅ. 10)
ಏಕ॑ಸ್ಮೈ॒ ಸ್ವಾಹಾ॒ ದ್ವಾಭ್ಯಾ॒ಗ್॒ ಸ್ವಾಹಾ᳚ ತ್ರಿ॒ಭ್ಯ-ಸ್ಸ್ವಾಹಾ॑ ಚ॒ತುರ್ಭ್ಯ॒-ಸ್ಸ್ವಾಹಾ॑ ಪ॒ಞ್ಚಭ್ಯ॒-ಸ್ಸ್ವಾಹಾ॑ ಷ॒ಡ್ಭ್ಯ-ಸ್ಸ್ವಾಹಾ॑ ಸ॒ಪ್ತಭ್ಯ॒-ಸ್ಸ್ವಾಹಾ᳚ ಽಷ್ಟಾ॒ಭ್ಯ-ಸ್ಸ್ವಾಹಾ॑ ನ॒ವಭ್ಯ॒-ಸ್ಸ್ವಾಹಾ॑ ದ॒ಶಭ್ಯ॒-ಸ್ಸ್ವಾಹೈ॑ -ಕಾದ॒ಶಭ್ಯ॒-ಸ್ಸ್ವಾಹಾ᳚ ದ್ವಾದ॒ಶಭ್ಯ॒-ಸ್ಸ್ವಾಹಾ᳚ ತ್ರಯೋದ॒ಶಭ್ಯ॒-ಸ್ಸ್ವಾಹಾ॑ ಚತುರ್ದ॒ಶಭ್ಯ॒-ಸ್ಸ್ವಾಹಾ॑ ಪಞ್ಚದ॒ಶಭ್ಯ॒-ಸ್ಸ್ವಾಹಾ॑ ಷೋಡ॒ಶಭ್ಯ॒-ಸ್ಸ್ವಾಹಾ॑ ಸಪ್ತದ॒ಶಭ್ಯ॒-ಸ್ಸ್ವಾಹಾ᳚ ಽಷ್ಟಾದ॒ಶಭ್ಯ॒-ಸ್ಸ್ವಾಹೈ-ಕಾ॒ನ್ನ ವಿಗ್ಂ॑ಶ॒ತ್ಯೈ ಸ್ವಾಹಾ॒ ನವ॑ವಿಗ್ಂಶತ್ಯೈ॒ ಸ್ವಾಹೈ-ಕಾ॒ನ್ನ ಚ॑ತ್ವಾರಿ॒ಗ್ಂ॒ಶತೇ॒ ಸ್ವಾಹಾ॒ ನವ॑ಚತ್ವಾರಿಗ್ಂಶತೇ॒ ಸ್ವಾಹೈ-ಕಾ॒ನ್ನ ಷ॒ಷ್ಟ್ಯೈ ಸ್ವಾಹಾ॒ ನವ॑ಷಷ್ಟ್ಯೈ॒ ಸ್ವಾಹೈ -ಕಾ॒ನ್ನಾಶೀ॒ತ್ಯೈ ಸ್ವಾಹಾ॒ ನವಾ॑ಶೀತ್ಯೈ॒ ಸ್ವಾಹೈಕಾ॒ನ್ನ ಶ॒ತಾಯ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ದ್ವಾಭ್ಯಾಗ್ಂ॑ ಶ॒ತಾಭ್ಯಾ॒ಗ್॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 41 ॥
(ನವ॑ಚತ್ವಾರಿಗ್ಂಶತೇ॒ ಸ್ವಾಹೈ-ಕಾ॒ನ್ನೈಕ॑ವಿಗ್ಂಶತಿಶ್ಚ) (ಅ. 11)
ಏಕ॑ಸ್ಮೈ॒ ಸ್ವಾಹಾ᳚ ತ್ರಿ॒ಭ್ಯ-ಸ್ಸ್ವಾಹಾ॑ ಪ॒ಞ್ಚಭ್ಯ॒-ಸ್ಸ್ವಾಹಾ॑ ಸ॒ಪ್ತಭ್ಯ॒-ಸ್ಸ್ವಾಹಾ॑ ನ॒ವಭ್ಯ॒-ಸ್ಸ್ವಾಹೈ॑- ಕಾದ॒ಶಭ್ಯ॒-ಸ್ಸ್ವಾಹಾ᳚ ತ್ರಯೋದ॒ಶಭ್ಯ॒-ಸ್ಸ್ವಾಹಾ॑ ಪಞ್ಚದ॒ಶಭ್ಯ॒-ಸ್ಸ್ವಾಹಾ॑ ಸಪ್ತದ॒ಶಭ್ಯ॒-ಸ್ಸ್ವಾಹೈಕಾ॒ನ್ನ ವಿಗ್ಂ॑ಶ॒ತ್ಯೈ ಸ್ವಾಹಾ॒ ನವ॑ವಿಗ್ಂಶತ್ಯೈ॒ ಸ್ವಾಹೈಕಾ॒ನ್ನ ಚ॑ತ್ವಾರಿ॒ಗ್ಂ॒ಶತೇ॒ ಸ್ವಾಹಾ॒ ನವ॑ಚತ್ವಾರಿಗ್ಂಶತೇ॒ ಸ್ವಾಹೈಕಾ॒ನ್ನ ಷ॒ಷ್ಟ್ಯೈ ಸ್ವಾಹಾ॒ ನವ॑ಷಷ್ಟ್ಯೈ॒ ಸ್ವಾಹೈಕಾ॒ನ್ನಾ ಶೀ॒ತ್ಯೈ ಸ್ವಾಹಾ॒ ನವಾ॑ಶೀತ್ಯೈ॒ ಸ್ವಾಹೈಕಾ॒ನ್ನ ಶ॒ತಾಯ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 42 ॥
(ಏಕ॑ಸ್ಮೈ ತ್ರಿ॒ಭ್ಯಃ – ಪ॑ಞ್ಚಾ॒ಶತ್) (ಅ. 12)
ದ್ವಾಭ್ಯಾ॒ಗ್॒ ಸ್ವಾಹಾ॑ ಚ॒ತುರ್ಭ್ಯ॒-ಸ್ಸ್ವಾಹಾ॑ ಷ॒ಡ್ಭ್ಯ-ಸ್ಸ್ವಾಹಾ᳚ ಽಷ್ಟಾ॒ಭ್ಯ-ಸ್ಸ್ವಾಹಾ॑ ದ॒ಶಭ್ಯ॒-ಸ್ಸ್ವಾಹಾ᳚ ದ್ವಾದ॒ಶಭ್ಯ॒-ಸ್ಸ್ವಾಹಾ॑ ಚತುರ್ದ॒ಶಭ್ಯ॒-ಸ್ಸ್ವಾಹಾ॑ ಷೋಡ॒ಶಭ್ಯ॒-ಸ್ಸ್ವಾಹಾ᳚ ಽಷ್ಟಾದ॒ಶಭ್ಯ॒-ಸ್ಸ್ವಾಹಾ॑ ವಿಗ್ಂಶ॒ತ್ಯೈ ಸ್ವಾಹಾ॒ ಽಷ್ಟಾನ॑ವತ್ಯೈ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 43 ॥
(ದ್ವಾಭ್ಯಾ॑ಮ॒ಷ್ಟಾನ॑ವತ್ಯೈ॒ – ಷಡ್ವಿಗ್ಂ॑ಶತಿಃ) (ಅ. 13)
ತ್ರಿ॒ಭ್ಯ-ಸ್ಸ್ವಾಹಾ॑ ಪ॒ಞ್ಚಭ್ಯ॒-ಸ್ಸ್ವಾಹಾ॑ ಸ॒ಪ್ತಭ್ಯ॒-ಸ್ಸ್ವಾಹಾ॑ ನ॒ವಭ್ಯ॒-ಸ್ಸ್ವಾಹೈ॑-ಕಾದ॒ಶಭ್ಯ॒-ಸ್ಸ್ವಾಹಾ᳚ ತ್ರಯೋದ॒ಶಭ್ಯ॒-ಸ್ಸ್ವಾಹಾ॑ ಪಞ್ಚದ॒ಶಭ್ಯ॒-ಸ್ಸ್ವಾಹಾ॑ ಸಪ್ತದ॒ಶಭ್ಯ॒-ಸ್ಸ್ವಾಹೈಕಾ॒ನ್ನ ವಿಗ್ಂ॑ಶ॒ತ್ಯೈ ಸ್ವಾಹಾ॒ ನವ॑ವಿಗ್ಂಶತ್ಯೈ॒ ಸ್ವಾಹೈಕಾ॒ನ್ನ ಚ॑ತ್ವಾರಿ॒ಗ್ಂ॒ಶತೇ॒ ಸ್ವಾಹಾ॒ ನವ॑ಚತ್ವಾರಿಗ್ಂಶತೇ॒ ಸ್ವಾಹೈಕಾ॒ನ್ನ ಷ॒ಷ್ಟ್ಯೈ ಸ್ವಾಹಾ॒ ನವ॑ಷಷ್ಟ್ಯೈ॒ ಸ್ವಾಹೈಕಾ॒ನ್ನಾ ಽಶೀ॒ತ್ಯೈ ಸ್ವಾಹಾ॒ ನವಾ॑ಶೀತ್ಯೈ॒ ಸ್ವಾಹೈಕಾ॒ನ್ನ ಶ॒ತಾಯ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 44 ॥
(ತ್ರಿ॒ಭ್ಯೋ᳚ – ಽಷ್ಟಾಚತ್ವಾರಿ॒ಗ್ಂ॒ಶತ್) (ಅ. 14)
ಚ॒ತುರ್ಭ್ಯ॒-ಸ್ಸ್ವಾಹಾ᳚ ಽಷ್ಟಾ॒ಭ್ಯ-ಸ್ಸ್ವಾಹಾ᳚ ದ್ವಾದ॒ಶಭ್ಯ॒-ಸ್ಸ್ವಾಹಾ॑ ಷೋಡ॒ಶಭ್ಯ॒-ಸ್ಸ್ವಾಹಾ॑ ವಿಗ್ಂಶ॒ತ್ಯೈ ಸ್ವಾಹಾ॒ ಷಣ್ಣ॑ವತ್ಯೈ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 45 ॥
(ಚ॒ತುರ್ಭ್ಯ॒-ಷ್ಷಣ್ಣ॑ವತ್ಯೈ॒ – ಷೋಡ॑ಶ) (ಅ. 15)
ಪ॒ಞ್ಚಭ್ಯ॒-ಸ್ಸ್ವಾಹಾ॑ ದ॒ಶಭ್ಯ॒-ಸ್ಸ್ವಾಹಾ॑ ಪಞ್ಚದ॒ಶಭ್ಯ॒-ಸ್ಸ್ವಾಹಾ॑ ವಿಗ್ಂಶ॒ತ್ಯೈ ಸ್ವಾಹಾ॒ ಪಞ್ಚ॑ನವತ್ಯೈ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 46 ॥
(ಪ॒ಞ್ಚಭ್ಯಃ॒ ಪಞ್ಚ॑ನವತ್ಯೈ॒ – ಚತು॑ರ್ದಶ) (ಅ. 16)
ದ॒ಶಭ್ಯ॒-ಸ್ಸ್ವಾಹಾ॑ ವಿಗ್ಂಶ॒ತ್ಯೈ ಸ್ವಾಹಾ᳚ ತ್ರಿ॒ಗ್ಂ॒ಶತೇ॒ ಸ್ವಾಹಾ॑ ಚತ್ವಾರಿ॒ಗ್ಂ॒ಶತೇ॒ ಸ್ವಾಹಾ॑ ಪಞ್ಚಾ॒ಶತೇ॒ ಸ್ವಾಹಾ॑ ಷ॒ಷ್ಟ್ಯೈ ಸ್ವಾಹಾ॑ ಸಪ್ತ॒ತ್ಯೈ ಸ್ವಾಹಾ॑ ಽಶೀ॒ತ್ಯೈ ಸ್ವಾಹಾ॑ ನವ॒ತ್ಯೈ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 47 ॥
(ದ॒ಶಭ್ಯೋ॒ – ದ್ವಾವಿಗ್ಂ॑ಶತಿಃ) (ಅ. 17)
ವಿ॒ಗ್ಂ॒ಶ॒ತ್ಯೈ ಸ್ವಾಹಾ॑ ಚತ್ವಾರಿ॒ಗ್ಂ॒ಶತೇ॒ ಸ್ವಾಹಾ॑ ಷ॒ಷ್ಟ್ಯೈ ಸ್ವಾಹಾ॑ ಽಶೀ॒ತ್ಯೈ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 48 ॥
(ವಿ॒ಗ್ಂ॒ಶ॒ತ್ಯೈ – ದ್ವಾದ॑ಶ) (ಅ. 18)
ಪ॒ಞ್ಚಾ॒ಶತೇ॒ ಸ್ವಾಹಾ॑ ಶ॒ತಾಯ॒ ಸ್ವಾಹಾ॒ ದ್ವಾಭ್ಯಾಗ್ಂ॑ ಶ॒ತಾಭ್ಯಾ॒ಗ್॒ ಸ್ವಾಹಾ᳚ ತ್ರಿ॒ಭ್ಯ-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ಚ॒ತುರ್ಭ್ಯ॑-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ಪ॒ಞ್ಚಭ್ಯ॑-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ಷ॒ಡ್ಭ್ಯ-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ಸ॒ಪ್ತಭ್ಯ॑-ಶ್ಶ॒ತೇಭ್ಯ॒-ಸ್ಸ್ವಾಹಾ᳚ ಽಷ್ಟಾ॒ಭ್ಯ-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ನ॒ವಭ್ಯ॑-ಶ್ಶ॒ತೇಭ್ಯ॒-ಸ್ಸ್ವಾಹಾ॑ ಸ॒ಹಸ್ರಾ॑ಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 49 ॥
(ಪ॒ಞ್ಚಾ॒ಶತೇ॒ – ದ್ವಾತ್ರಿಗ್ಂ॑ಶತ್) (ಅ. 19)
ಶ॒ತಾಯ॒ ಸ್ವಾಹಾ॑ ಸ॒ಹಸ್ರಾ॑ಯ॒ ಸ್ವಾಹಾ॒ ಽಯುತಾ॑ಯ॒ ಸ್ವಾಹಾ॑ ನಿ॒ಯುತಾ॑ಯ॒ ಸ್ವಾಹಾ᳚ ಪ್ರ॒ಯುತಾ॑ಯ॒ ಸ್ವಾಹಾ ಽರ್ಬು॑ದಾಯ॒ ಸ್ವಾಹಾ॒ ನ್ಯ॑ರ್ಬುದಾಯ॒ ಸ್ವಾಹಾ॑ ಸಮು॒ದ್ರಾಯ॒ ಸ್ವಾಹಾ॒ ಮದ್ಧ್ಯಾ॑ಯ॒ ಸ್ವಾಹಾ ಽನ್ತಾ॑ಯ॒ ಸ್ವಾಹಾ॑ ಪರಾ॒ರ್ಧಾಯ॒ ಸ್ವಾಹೋ॒ಷಸೇ॒ ಸ್ವಾಹಾ॒ ವ್ಯು॑ಷ್ಟ್ಯೈ॒ ಸ್ವಾಹೋ॑ದೇಷ್ಯ॒ತೇ ಸ್ವಾಹೋ᳚ದ್ಯ॒ತೇ ಸ್ವಾಹೋದಿ॑ತಾಯ॒ ಸ್ವಾಹಾ॑ ಸುವ॒ರ್ಗಾಯ॒ ಸ್ವಾಹಾ॑ ಲೋ॒ಕಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 50 ॥
(ಶ॒ತಾಯಾ॒-ಽಷ್ಟಾತ್ರಿಗ್ಂ॑ಶತ್) (ಅ. 20)
(ಸಾ॒ಧ್ಯಾ-ಷ್ಷ॑ಡ್ ರಾ॒ತ್ರಂ – ಕು॑ಸುರು॒ಬಿನ್ದ॑-ಸ್ಸಪ್ತರಾ॒ತ್ರಂ – ಬೃಹ॒ಸ್ಪತಿ॑ರಷ್ಟರಾ॒ತ್ರಂ – ಪ್ರ॒ಜಾಪ॑ತಿ॒ಸ್ತಾಃ, ಖ್ಷುಧ॑ನ್ನವರಾ॒ತ್ರಂ – ಪ್ರ॒ಜಾಪ॑ತಿರಕಾಮಯತ॒ ದಶ॑ಹೋತಾರಾತ್ರ – ಮೃ॒ತವ॑ – ಐನ್ದ್ರವಾಯ॒ವಾಗ್ರಾ᳚ನ್ – ಗಾಯ॒ತ್ರೋ ವೈ – ಪ್ರ॒ಜಾಪ॑ತಿ॒-ಸ್ಸ ದ್ವಾ॑ದಶರಾ॒ತ್ರಂ – ನ ವಾ -ಏಕ॑ಸ್ಮಾ॒ – ಏಕ॑ಸ್ಮೈ॒ – ದ್ವಾಭ್ಯಾಂ᳚ – ತ್ರಿ॒ಭ್ಯಃ – ಚ॒ತುರ್ಭ್ಯಃ॑ – ಪ॒ಞ್ಚಭ್ಯೋ॑ – ದ॒ಶಭ್ಯೋ॑ – ವಿಗ್ಂಶ॒ತ್ಯೈ – ಪ॑ಞ್ಚಾ॒ಶತೇ॑ – ಶ॒ತಾಯ॑ – ವಿಗ್ಂಶ॒ತಿಃ )
(ಸಾ॒ಧ್ಯಾ – ಅ॑ಸ್ಮಾ ಇ॒ಮೇ ಲೋ॒ಕಾ – ಗಾ॑ಯ॒ತ್ರಂ – ವೈಁ ತೃ॒ತೀಯ॒ – ಮೇಕ॑ಸ್ಮೈ – ಪಞ್ಚಾ॒ಶತ್ )
(ಸಾ॒ಧ್ಯಾ, ಸ್ಸರ್ವ॑ಸ್ಮೈ॒ ಸ್ವಾಹಾ᳚ )
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ದ್ವಿತೀಯಃ ಪ್ರಶ್ನ-ಸ್ಸಮಾಪ್ತಃ ॥