ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ಪಞ್ಚಮಃ ಪ್ರಶ್ನಃ – ಸತ್ರವಿಶೇಷಾಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಗಾವೋ॒ ವಾ ಏ॒ತ-ಥ್ಸ॒ತ್ರ-ಮಾ॑ಸತಾಶೃ॒ಙ್ಗಾ-ಸ್ಸ॒ತೀ-ಶ್ಶೃಙ್ಗಾ॑ಣಿ ನೋ ಜಾಯನ್ತಾ॒ ಇತಿ॒ ಕಾಮೇ॑ನ॒ ತಾಸಾ॒-ನ್ದಶ॒ಮಾಸಾ॒ ನಿಷ॑ಣ್ಣಾ॒ ಆಸ॒ನ್ನಥ॒ ಶೃಙ್ಗಾ᳚ಣ್ಯಜಾಯನ್ತ॒ ತಾ ಉದ॑ತಿಷ್ಠ॒ನ್ನರಾ॒ಥ್ಸ್ಮೇತ್ಯಥ॒ ಯಾಸಾ॒-ನ್ನಾಜಾ॑ಯನ್ತ॒ ತಾ-ಸ್ಸಂ॑ವಁಥ್ಸ॒ರ-ಮಾ॒ಪ್ತ್ವೋದ॑ತಿಷ್ಠ॒ -ನ್ನರಾ॒ಥ್ಸ್ಮೇತಿ॒ ಯಾಸಾ॒-ಞ್ಚಾಜಾ॑ಯನ್ತ॒ ಯಾಸಾ᳚-ಞ್ಚ॒ ನ ತಾ ಉ॒ಭಯೀ॒ರು-ದ॑ತಿಷ್ಠ॒-ನ್ನರಾ॒ಥ್ಸ್ಮೇತಿ॑ ಗೋಸ॒ತ್ರಂ-ವೈಁ [ಗೋಸ॒ತ್ರಂ-ವೈಁ, ಸಂ॒ವಁ॒ಥ್ಸ॒ರೋ ಯ] 1
ಸಂ॑ವಁಥ್ಸ॒ರೋ ಯ ಏ॒ವಂ-ವಿಁ॒ದ್ವಾಗ್ಂಸ॑-ಸ್ಸಂವಁಥ್ಸ॒ರ-ಮು॑ಪ॒ಯನ್ತ್ಯೃ॑ದ್ಧ್ನು॒ವನ್ತ್ಯೇ॒ವ ತಸ್ಮಾ᳚-ತ್ತೂಪ॒ರಾ ವಾರ್ಷಿ॑ಕೌ॒ ಮಾಸೌ॒ ಪರ್ತ್ವಾ॑ ಚರತಿ ಸ॒ತ್ರಾಭಿ॑ಜಿತ॒ಗ್ಗ್॒ಹ್ಯ॑ಸ್ಯೈ॒ ತಸ್ಮಾ᳚-ಥ್ಸಂವಁಥ್ಸರ॒ಸದೋ॒ ಯ-ತ್ಕಿ-ಞ್ಚ॑ ಗೃ॒ಹೇ ಕ್ರಿ॒ಯತೇ॒ ತದಾ॒ಪ್ತ-ಮವ॑ರುದ್ಧ-ಮ॒ಭಿಜಿ॑ತ-ಙ್ಕ್ರಿಯತೇ ಸಮು॒ದ್ರಂ-ವಾಁ ಏ॒ತೇ ಪ್ರ ಪ್ಲ॑ವನ್ತೇ॒ ಯೇ ಸಂ॑ವಁಥ್ಸ॒ರಮು॑ಪ॒ಯನ್ತಿ॒ ಯೋ ವೈ ಸ॑ಮು॒ದ್ರಸ್ಯ॑ ಪಾ॒ರ-ನ್ನ ಪಶ್ಯ॑ತಿ॒ ನ ವೈ ಸ ತತ॒ ಉದೇ॑ತಿ ಸಂವಁಥ್ಸ॒ರೋ [ಉದೇ॑ತಿ ಸಂವಁಥ್ಸ॒ರಃ, ವೈ ಸ॑ಮು॒ದ್ರ-] 2
ವೈ ಸ॑ಮು॒ದ್ರ-ಸ್ತಸ್ಯೈ॒ತ-ತ್ಪಾ॒ರಂ-ಯಁದ॑ತಿರಾ॒ತ್ರೌ ಯ ಏ॒ವಂ-ವಿಁ॒ದ್ವಾಗ್ಂಸ॑-ಸ್ಸಂವಁಥ್ಸ॒ರ-ಮು॑ಪ॒ಯನ್ತ್ಯನಾ᳚ರ್ತಾ ಏ॒ವೋದೃಚ॑-ಙ್ಗಚ್ಛನ್ತೀ॒ಯಂ-ವೈಁ ಪೂರ್ವೋ॑-ಽತಿರಾ॒ತ್ರೋ॑ ಽಸಾವುತ್ತ॑ರೋ॒ ಮನಃ॒ ಪೂರ್ವೋ॒ ವಾಗುತ್ತ॑ರಃ ಪ್ರಾ॒ಣಃ ಪೂರ್ವೋ॑-ಽಪಾ॒ನ ಉತ್ತ॑ರಃ ಪ್ರ॒ರೋಧ॑ನ॒-ಮ್ಪೂರ್ವ॑ ಉ॒ದಯ॑ನ॒ಮುತ್ತ॑ರೋ॒ ಜ್ಯೋತಿ॑ಷ್ಟೋಮೋ ವೈಶ್ವಾನ॒ರೋ॑ ಽತಿರಾ॒ತ್ರೋ ಭ॑ವತಿ॒ ಜ್ಯೋತಿ॑ರೇ॒ವ ಪು॒ರಸ್ತಾ᳚ದ್ದಧತೇ ಸುವ॒ರ್ಗಸ್ಯ॑ ಲೋ॒ಕಸ್ಯಾ-ನು॑ಖ್ಯಾತ್ಯೈ ಚತುರ್ವಿ॒ಗ್ಂ॒ಶಃ ಪ್ರಾ॑ಯ॒ಣೀಯೋ॑ ಭವತಿ॒ ಚತು॑ರ್ವಿಗ್ಂಶತಿ-ರರ್ಧಮಾ॒ಸಾ- [ಚತು॑ರ್ವಿಗ್ಂಶತಿ-ರರ್ಧಮಾ॒ಸಾಃ, ಸಂ॒ವಁ॒ಥ್ಸ॒ರಃ] 3
-ಸ್ಸಂ॑ವಁಥ್ಸ॒ರಃ ಪ್ರ॒ಯನ್ತ॑ ಏ॒ವ ಸಂ॑ವಁಥ್ಸ॒ರೇ ಪ್ರತಿ॑ ತಿಷ್ಠನ್ತಿ॒ ತಸ್ಯ॒ ತ್ರೀಣಿ॑ ಚ ಶ॒ತಾನಿ॑ ಷ॒ಷ್ಟಿಶ್ಚ॑ ಸ್ತೋ॒ತ್ರೀಯಾ॒ಸ್ತಾವ॑ತೀ-ಸ್ಸಂವಁಥ್ಸ॒ರಸ್ಯ॒ ರಾತ್ರ॑ಯ ಉ॒ಭೇ ಏ॒ವ ಸಂ॑ವಁಥ್ಸ॒ರಸ್ಯ॑ ರೂ॒ಪೇ ಆ᳚ಪ್ನುವನ್ತಿ॒ ತೇ ಸಗ್ಗ್ಸ್ಥಿ॑ತ್ಯಾ॒ ಅರಿ॑ಷ್ಟ್ಯಾ॒ ಉತ್ತ॑ರೈ॒ರಹೋ॑ಭಿಶ್ಚರನ್ತಿ ಷಡ॒ಹಾ ಭ॑ವನ್ತಿ॒ ಷ-ಡ್ವಾ ಋ॒ತವ॑-ಸ್ಸಂವಁಥ್ಸ॒ರ ಋ॒ತುಷ್ವೇ॒ವ ಸಂ॑ವಁಥ್ಸ॒ರೇ ಪ್ರತಿ॑ ತಿಷ್ಠನ್ತಿ॒ ಗೌಶ್ಚಾ-ಽಽಯು॑ಶ್ಚ ಮದ್ಧ್ಯ॒ತ-ಸ್ಸ್ತೋಮೌ॑ ಭವತ-ಸ್ಸಂವಁಥ್ಸ॒ರಸ್ಯೈ॒ವ ತನ್ಮಿ॑ಥು॒ನ-ಮ್ಮ॑ದ್ಧ್ಯ॒ತೋ [ತನ್ಮಿ॑ಥು॒ನ-ಮ್ಮ॑ದ್ಧ್ಯ॒ತಃ, ದ॒ಧ॒ತಿ॒ ಪ್ರ॒ಜನ॑ನಾಯ॒] 4
ದ॑ಧತಿ ಪ್ರ॒ಜನ॑ನಾಯ॒ ಜ್ಯೋತಿ॑ರ॒ಭಿತೋ॑ ಭವತಿ ವಿ॒ಮೋಚ॑ನಮೇ॒ವ ತಚ್ಛನ್ದಾಗ್॑ಸ್ಯೇ॒ವ ತ-ದ್ವಿ॒ಮೋಕಂ॑-ಯಁ॒ನ್ತ್ಯಥೋ॑ ಉಭ॒ಯತೋ᳚ಜ್ಯೋತಿಷೈ॒ವ ಷ॑ಡ॒ಹೇನ॑ ಸುವ॒ರ್ಗಂ-ಲೋಁ॒ಕಂ-ಯಁ॑ನ್ತಿ ಬ್ರಹ್ಮವಾ॒ದಿನೋ॑ ವದ॒ನ್ತ್ಯಾಸ॑ತೇ॒ ಕೇನ॑ ಯ॒ನ್ತೀತಿ॑ ದೇವ॒ಯಾನೇ॑ನ ಪ॒ಥೇತಿ॑ ಬ್ರೂಯಾ॒ಚ್ಛನ್ದಾಗ್ಂ॑ಸಿ॒ ವೈ ದೇ॑ವ॒ಯಾನಃ॒ ಪನ್ಥಾ॑ ಗಾಯ॒ತ್ರೀ ತ್ರಿ॒ಷ್ಟುಬ್-ಜಗ॑ತೀ॒ಜ್ಯೋತಿ॒ರ್ವೈ ಗಾ॑ಯ॒ತ್ರೀ ಗೌಸ್ತ್ರಿ॒ಷ್ಟುಗಾಯು॒ರ್ಜಗ॑ತೀ॒ ಯದೇ॒ತೇ ಸ್ತೋಮಾ॒ ಭವ॑ನ್ತಿ ದೇವ॒ಯಾನೇ॑ನೈ॒ವ [ ] 5
ತ-ತ್ಪ॒ಥಾ ಯ॑ನ್ತಿ ಸಮಾ॒ನಗ್ಂ ಸಾಮ॑ ಭವತಿ ದೇವಲೋ॒ಕೋ ವೈ ಸಾಮ॑ ದೇವಲೋ॒ಕಾದೇ॒ವ ನಯ॑ನ್ತ್ಯ॒ನ್ಯಾಅ॑ನ್ಯಾ॒ ಋಚೋ॑ ಭವನ್ತಿ ಮನುಷ್ಯಲೋ॒ಕೋ ವಾ ಋಚೋ॑ ಮನುಷ್ಯಲೋ॒ಕಾದೇ॒ವಾನ್ಯಮ॑ನ್ಯ-ನ್ದೇವಲೋ॒ಕಮ॑ಭ್ಯಾ॒ರೋಹ॑ನ್ತೋ ಯನ್ತ್ಯಭಿವ॒ರ್ತೋ ಬ್ರ॑ಹ್ಮಸಾ॒ಮ-ಮ್ಭ॑ವತಿ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿವೃ॑ತ್ಯಾ ಅಭಿ॒ಜಿ-ದ್ಭ॑ವತಿ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿಜಿ॑ತ್ಯೈ ವಿಶ್ವ॒ಜಿ-ದ್ಭ॑ವತಿ॒ ವಿಶ್ವ॑ಸ್ಯ॒ ಜಿತ್ಯೈ॑ ಮಾ॒ಸಿಮಾ॑ಸಿ ಪೃ॒ಷ್ಠಾನ್ಯುಪ॑ ಯನ್ತಿ ಮಾ॒ಸಿಮಾ᳚ಸ್ಯತಿಗ್ರಾ॒ಹ್ಯಾ॑ ಗೃಹ್ಯನ್ತೇ ಮಾ॒ಸಿಮಾ᳚ಸ್ಯೇ॒ವ ವೀ॒ರ್ಯ॑-ನ್ದಧತಿ ಮಾ॒ಸಾ-ಮ್ಪ್ರತಿ॑ಷ್ಠಿತ್ಯಾ ಉ॒ಪರಿ॑ಷ್ಟಾನ್ಮಾ॒ಸಾ-ಮ್ಪೃ॒ಷ್ಠಾನ್ಯುಪ॑ ಯನ್ತಿ॒ ತಸ್ಮಾ॑ದು॒ಪರಿ॑ಷ್ಟಾ॒ದೋಷ॑ಧಯಃ॒ ಫಲ॑-ಙ್ಗೃಹ್ಣನ್ತಿ ॥ 6 ॥
(ಗೋ॒ಸ॒ತ್ರಂ-ವಾಁ – ಏ॑ತಿ ಸಂವಁಥ್ಸ॒ರೋ᳚ – ಽರ್ಧಮಾ॒ಸಾ – ಮಿ॑ಥು॒ನ-ಮ್ಮ॑ದ್ಧ್ಯ॒ತೋ – ದೇ॑ವ॒ಯಾನೇ॑ನೈ॒ವ – ವೀ॒ರ್ಯಂ॑ – ತ್ರಯೋ॑ದಶ ಚ) (ಅ. 1)
ಗಾವೋ॒ ವಾ ಏ॒ತ-ಥ್ಸ॒ತ್ರಮಾ॑ಸತಾಶೃ॒ಙ್ಗಾ-ಸ್ಸ॒ತೀ-ಶ್ಶೃಙ್ಗಾ॑ಣಿ॒ ಸಿಷಾ॑ಸನ್ತೀ॒ಸ್ತಾಸಾ॒-ನ್ದಶ॒ ಮಾಸಾ॒ ನಿಷ॑ಣ್ಣಾ॒ ಆಸ॒ನ್ನಥ॒ ಶೃಙ್ಗಾ᳚ಣ್ಯಜಾಯನ್ತ॒ ತಾ ಅ॑ಬ್ರುವ॒ನ್ನರಾ॒ಥ್ಸ್ಮೋ-ತ್ತಿ॑ಷ್ಠಾ॒ಮಾವ॒ ತ-ಙ್ಕಾಮ॑ಮರುಥ್ಸ್ಮಹಿ॒ ಯೇನ॒ ಕಾಮೇ॑ನ॒ ನ್ಯಷ॑ದಾ॒ಮೇತಿ॒ ತಾಸಾ॑ಮು॒ ತ್ವಾ ಅ॑ಬ್ರುವನ್ನ॒ರ್ಧಾವಾ॒ ಯಾವ॑ತೀ॒ರ್ವಾ-ಽಽಸಾ॑ಮಹಾ ಏ॒ವೇಮೌದ್ವಾ॑ದ॒ಶೌ ಮಾಸೌ॑ ಸಂವಁಥ್ಸ॒ರಗ್ಂ ಸ॒ಪಾನ್ದ್ಯೋ-ತ್ತಿ॑ಷ್ಠಾ॒ಮೇತಿ॒ ತಾಸಾ᳚- [ತಾಸಾ᳚ಮ್, ದ್ವಾ॒ದ॒ಶೇ ಮಾ॒ಸಿ] 7
-ನ್ದ್ವಾದ॒ಶೇ ಮಾ॒ಸಿ ಶೃಙ್ಗಾ॑ಣಿ॒ ಪ್ರಾವ॑ರ್ತನ್ತ ಶ್ರ॒ದ್ಧಯಾ॒ ವಾ-ಽಶ್ರ॑ದ್ಧಯಾ ವಾ॒ ತಾ ಇ॒ಮಾ ಯಾಸ್ತೂ॑ಪ॒ರಾ ಉ॒ಭಯ್ಯೋ॒ ವಾವ ತಾ ಆ᳚ರ್ಧ್ನುವ॒ನ್॒. ಯಾಶ್ಚ॒ ಶೃಙ್ಗಾ॒ಣ್ಯಸ॑ನ್ವ॒ನ್॒. ಯಾಶ್ಚೋರ್ಜ॑ಮ॒ವಾರು॑ನ್ಧತ॒ರ್ಧ್ನೋತಿ॑ ದ॒ಶಸು॑ ಮಾ॒ಸೂ᳚ತ್ತಿಷ್ಠ॑ನ್ನೃ॒ದ್ಧ್ನೋತಿ॑ ದ್ವಾದ॒ಶಸು॒ ಯ ಏ॒ವಂ-ವೇಁದ॑ ಪ॒ದೇನ॒ ಖಲು॒ ವಾ ಏ॒ತೇ ಯ॑ನ್ತಿ ವಿ॒ನ್ದತಿ॒ ಖಲು॒ ವೈ ಪ॒ದೇನ॒ ಯ-ನ್ತದ್ವಾ ಏ॒ತದೃ॒ದ್ಧಮಯ॑ನ॒-ನ್ತಸ್ಮಾ॑ ದೇ॒ತ-ದ್ಗೋ॒ಸನಿ॑ ॥ 8 ॥
(ತಿ॒ಷ್ಠಾ॒ಮೇತಿ॒ ತಾಸಾಂ॒ – ತಸ್ಮಾ॒-ದ್- ದ್ವೇ ಚ॑) (ಅ. 2)
ಪ್ರ॒ಥ॒ಮೇ ಮಾ॒ಸಿ ಪೃ॒ಷ್ಠಾನ್ಯುಪ॑ ಯನ್ತಿ ಮದ್ಧ್ಯ॒ಮ ಉಪ॑ ಯನ್ತ್ಯುತ್ತ॒ಮ ಉಪ॑ ಯನ್ತಿ॒ ತದಾ॑ಹು॒ರ್ಯಾಂ-ವೈಁ ತ್ರಿರೇಕ॒ಸ್ಯಾಹ್ನ॑ ಉಪ॒ಸೀದ॑ನ್ತಿ ದ॒ಹ್ರಂ-ವೈಁ ಸಾ-ಽಪ॑ರಾಭ್ಯಾ॒-ನ್ದೋಹಾ᳚ಭ್ಯಾ-ನ್ದು॒ಹೇ-ಽಥ॒ ಕುತ॒-ಸ್ಸಾ ಧೋ᳚ಖ್ಷ್ಯತೇ॒ ಯಾ-ನ್ದ್ವಾದ॑ಶ॒ ಕೃತ್ವ॑ ಉಪ॒ಸೀದ॒ನ್ತೀತಿ॑ ಸಂವಁಥ್ಸ॒ರಗ್ಂ ಸ॒ಪಾನ್ದ್ಯೋ᳚ತ್ತ॒ಮೇ ಮಾ॒ಸಿ ಸ॒ಕೃ-ತ್ಪೃ॒ಷ್ಠಾನ್ಯುಪೇ॑ಯು॒ಸ್ತ-ದ್ಯಜ॑ಮಾನಾ ಯ॒ಜ್ಞ-ಮ್ಪ॒ಶೂನವ॑ ರುನ್ಧತೇ ಸಮು॒ದ್ರಂ-ವಾಁ [ಸಮು॒ದ್ರಂ-ವೈಁ, ಏ॒ತೇ॑-ಽನವಾ॒ರಮ॑ಪಾ॒ರ-ಮ್ಪ್ರ] 9
ಏ॒ತೇ॑-ಽನವಾ॒ರಮ॑ಪಾ॒ರ-ಮ್ಪ್ರ ಪ್ಲ॑ವನ್ತೇ॒ ಯೇ ಸಂ॑ವಁಥ್ಸ॒ರಮು॑ಪ॒ಯನ್ತಿ॒ ಯ-ದ್ಬೃ॑ಹ-ದ್ರಥನ್ತ॒ರೇ ಅ॒ನ್ವರ್ಜೇ॑ಯು॒ರ್ಯಥಾ॒ ಮದ್ಧ್ಯೇ॑ ಸಮು॒ದ್ರಸ್ಯ॑ ಪ್ಲ॒ವಮ॒ನ್ವರ್ಜೇ॑ಯುಸ್ತಾ॒ದೃ-ಕ್ತದನು॑ಥ್ಸರ್ಗ-ಮ್ಬೃಹ-ದ್ರಥನ್ತ॒ರಾಭ್ಯಾ॑ಮಿ॒ತ್ವಾ ಪ್ರ॑ತಿ॒ಷ್ಠಾ-ಙ್ಗ॑ಚ್ಛನ್ತಿ॒ ಸರ್ವೇ᳚ಭ್ಯೋ॒ ವೈ ಕಾಮೇ᳚ಭ್ಯ-ಸ್ಸ॒ನ್ಧಿರ್ದು॑ಹೇ॒ ತ-ದ್ಯಜ॑ಮಾನಾ॒-ಸ್ಸರ್ವಾ॒ನ್ ಕಾಮಾ॒ನವ॑ ರುನ್ಧತೇ ॥ 10 ॥
(ಸ॒ಮು॒ದ್ರಂ-ವೈಁ – ಚತು॑ಸ್ತ್ರಿಗ್ಂಶಚ್ಚ) (ಅ. 3)
ಸ॒ಮಾ॒ನ್ಯ॑ ಋಚೋ॑ ಭವನ್ತಿ ಮನುಷ್ಯಲೋ॒ಕೋ ವಾ ಋಚೋ॑ ಮನುಷ್ಯಲೋ॒ಕಾದೇ॒ವ ನ ಯ॑ನ್ತ್ಯ॒ನ್ಯದ॑ನ್ಯ॒-ಥ್ಸಾಮ॑ ಭವತಿ ದೇವಲೋ॒ಕೋ ವೈ ಸಾಮ॑ ದೇವಲೋ॒ಕಾದೇ॒ವಾನ್ಯಮ॑ನ್ಯ-ಮ್ಮನುಷ್ಯಲೋ॒ಕ-ಮ್ಪ್ರ॑ತ್ಯವ॒ರೋಹ॑ನ್ತೋ ಯನ್ತಿ॒ ಜಗ॑ತೀ॒ಮಗ್ರ॒ ಉಪ॑ ಯನ್ತಿ॒ ಜಗ॑ತೀಂ॒-ವೈಁ ಛನ್ದಾಗ್ಂ॑ಸಿ ಪ್ರ॒ತ್ಯವ॑ರೋಹನ್ತ್ಯಾ-ಗ್ರಯ॒ಣ-ಙ್ಗ್ರಹಾ॑ ಬೃ॒ಹ-ತ್ಪೃ॒ಷ್ಠಾನಿ॑ ತ್ರಯಸ್ತ್ರಿ॒ಗ್ಂ॒ಶಗ್ಗ್ಸ್ತೋಮಾ॒-ಸ್ತಸ್ಮಾ॒-ಜ್ಜ್ಯಾಯಾಗ್ಂ॑ಸ॒-ಙ್ಕನೀ॑ಯಾ-ನ್ಪ್ರ॒ತ್ಯವ॑ರೋಹತಿ ವೈಶ್ವಕರ್ಮ॒ಣೋ ಗೃ॑ಹ್ಯತೇ॒ವಿಶ್ವಾ᳚ನ್ಯೇ॒ವ ತೇನ॒ ಕರ್ಮಾ॑ಣಿ॒ ಯಜ॑ಮಾನಾ॒ ಅವ॑ ರುನ್ಧತ ಆದಿ॒ತ್ಯೋ [ಆದಿ॒ತ್ಯಃ, ಗೃ॒ಹ್ಯ॒ತ॒ ಇ॒ಯಂ-ವಾಁ] 11
ಗೃ॑ಹ್ಯತ ಇ॒ಯಂ-ವಾಁ ಅದಿ॑ತಿರ॒ಸ್ಯಾಮೇ॒ವ ಪ್ರತಿ॑ ತಿಷ್ಠನ್ತ್ಯ॒ನ್ಯೋ᳚-ಽನ್ಯೋ ಗೃಹ್ಯೇತೇ ಮಿಥುನ॒ತ್ವಾಯ॒ ಪ್ರಜಾ᳚ತ್ಯಾ ಅವಾನ್ತ॒ರಂ-ವೈಁ ದ॑ಶರಾ॒ತ್ರೇಣ॑ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ಯ-ದ್ದ॑ಶರಾ॒ತ್ರೋ ಭವ॑ತಿ ಪ್ರ॒ಜಾ ಏ॒ವ ತ-ದ್ಯಜ॑ಮಾನಾ-ಸ್ಸೃಜನ್ತ ಏ॒ತಾಗ್ಂ ಹ॒ ವಾ ಉ॑ದ॒ಙ್ಕ-ಶ್ಶೌ᳚ಲ್ಬಾಯ॒ನ-ಸ್ಸ॒ತ್ರಸ್ಯರ್ಧಿ॑ಮುವಾಚ॒ ಯ-ದ್ದ॑ಶರಾ॒ತ್ರೋಯ-ದ್ದ॑ಶರಾ॒ತ್ರೋ ಭವ॑ತಿ ಸ॒ತ್ರಸ್ಯರ್ಧ್ಯಾ॒ ಅಥೋ॒ ಯದೇ॒ವ ಪೂರ್ವೇ॒ಷ್ವಹ॑ಸ್ಸು॒ ವಿಲೋ॑ಮ ಕ್ರಿ॒ಯತೇ॒ ತಸ್ಯೈ॒ವೈ ( )-ಷಾ ಶಾನ್ತಿಃ॑ ॥ 12 ॥
(ಆ॒ದಿ॒ತ್ಯ – ಸ್ತಸ್ಯೈ॒ವ – ದ್ವೇ ಚ॑) (ಅ. 4)
ಯದಿ॒ ಸೋಮೌ॒ ಸಗ್ಂಸು॑ತೌ॒ ಸ್ಯಾತಾ᳚-ಮ್ಮಹ॒ತಿ ರಾತ್ರಿ॑ಯೈ ಪ್ರಾತರನುವಾ॒ಕ-ಮು॒ಪಾಕು॑ರ್ಯಾ॒-ತ್ಪೂರ್ವೋ॒ ವಾಚ॒-ಮ್ಪೂರ್ವೋ॑ ದೇ॒ವತಾಃ॒ ಪೂರ್ವ॒-ಶ್ಛನ್ದಾಗ್ಂ॑ಸಿ ವೃಙ್ಕ್ತೇ॒ ವೃಷ॑ಣ್ವತೀ-ಮ್ಪ್ರತಿ॒ಪದ॑-ಙ್ಕುರ್ಯಾ-ತ್ಪ್ರಾತಸ್ಸವ॒ನಾದೇ॒ವೈಷಾ॒ಮಿನ್ದ್ರಂ॑-ವೃಁ॒ಙ್ಕ್ತೇ ಽಥೋ॒ ಖಲ್ವಾ॑ಹುಸ್ಸವನಮು॒ಖೇ-ಸ॑ವನಮುಖೇ ಕಾ॒ರ್ಯೇತಿ॑ ಸವನಮು॒ಖಾ-ಥ್ಸ॑ವನಮುಖಾ-ದೇ॒ವೈಷಾ॒ಮಿನ್ದ್ರಂ॑-ವೃಁಙ್ಕ್ತೇ ಸಂವೇಁ॒ಶಾಯೋ॑ಪವೇ॒ಶಾಯ॑ ಗಾಯತ್ರಿ॒ಯಾಸ್ತ್ರಿ॒ಷ್ಟುಭೋ॒ ಜಗ॑ತ್ಯಾ ಅನು॒ಷ್ಟುಭಃ॑ ಪ॒ಙ್ಕ್ತ್ಯಾ ಅ॒ಭಿಭೂ᳚ತ್ಯೈ॒ ಸ್ವಾಹಾ॒ ಛನ್ದಾಗ್ಂ॑ಸಿ॒ ವೈ ಸಂ॑ವೇಁ॒ಶ ಉ॑ಪವೇ॒ಶ-ಶ್ಛನ್ದೋ॑ಭಿ-ರೇ॒ವೈಷಾ॒- [ಉ॑ಪವೇ॒ಶ-ಶ್ಛನ್ದೋ॑ಭಿ-ರೇ॒ವೈಷಾ᳚ಮ್, ಛನ್ದಾಗ್ಂ॑ಸಿ] 13
-ಞ್ಛನ್ದಾಗ್ಂ॑ಸಿ ವೃಙ್ಕ್ತೇ ಸಜ॒ನೀಯ॒ಗ್ಂ॒ ಶಸ್ಯಂ॑-ವಿಁಹ॒ವ್ಯಗ್ಂ॑ ಶಸ್ಯ॑ಮ॒ಗಸ್ತ್ಯ॑ಸ್ಯ ಕಯಾಶು॒ಭೀಯ॒ಗ್ಂ॒ ಶಸ್ಯ॑ಮೇ॒ತಾವ॒ದ್ವಾ ಅ॑ಸ್ತಿ॒ ಯಾವ॑ದೇ॒ತ-ದ್ಯಾವ॑ದೇ॒ವಾಸ್ತಿ॒ ತದೇ॑ಷಾಂ-ವೃಁಙ್ಕ್ತೇ॒ ಯದಿ॑ ಪ್ರಾತಸ್ಸವ॒ನೇ ಕ॒ಲಶೋ॒ ದೀರ್ಯೇ॑ತ ವೈಷ್ಣ॒ವೀಷು॑ ಶಿಪಿವಿ॒ಷ್ಟವ॑ತೀಷು ಸ್ತುವೀರ॒ನ್॒.ಯದ್ವೈ ಯ॒ಜ್ಞಸ್ಯಾ॑-ತಿ॒ರಿಚ್ಯ॑ತೇ॒ ವಿಷ್ಣು॒-ನ್ತಚ್ಛಿ॑ಪಿವಿ॒ಷ್ಟಮ॒ಭ್ಯತಿ॑ ರಿಚ್ಯತೇ॒ ತದ್ವಿಷ್ಣು॑-ಶ್ಶಿಪಿವಿ॒ಷ್ಟೋ-ಽತಿ॑ರಿಕ್ತ ಏ॒ವಾತಿ॑ರಿಕ್ತ-ನ್ದಧಾ॒ತ್ಯಥೋ॒ ಅತಿ॑ರಿಕ್ತೇನೈ॒ವಾ-ತಿ॑ರಿಕ್ತಮಾ॒ಪ್ತ್ವಾ-ಽವ॑ ರುನ್ಧತೇ॒ ಯದಿ॑ ಮ॒ದ್ಧ್ಯನ್ದಿ॑ನೇ॒ ದೀರ್ಯೇ॑ತ ವಷಟ್ಕಾ॒ರನಿ॑ಧನ॒ಗ್ಂ॒ ಸಾಮ॑ ಕುರ್ಯುರ್ವಷಟ್ಕಾ॒ರೋ ವೈ ಯ॒ಜ್ಞಸ್ಯ॑ ಪ್ರತಿ॒ಷ್ಠಾ ಪ್ರ॑ತಿ॒ಷ್ಠಾಮೇ॒ವೈನ॑-ದ್ಗಮಯನ್ತಿ॒ ಯದಿ॑ ತೃತೀಯಸವ॒ನ ಏ॒ತದೇ॒ವ ॥ 14 ॥
(ಛನ್ದೋ॑ಭಿರೇ॒ವೈಷಾ॒ – ಮವೈ – ಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 5)
ಷ॒ಡ॒ಹೈ-ರ್ಮಾಸಾ᳚ನ್-ಥ್ಸ॒ಮ್ಪಾದ್ಯಾ-ಽಹ॒ರು-ಥ್ಸೃ॑ಜನ್ತಿ ಷಡ॒ಹೈರ್ಹಿ ಮಾಸಾ᳚ನ್-ಥ್ಸ॒ಮ್ಪಶ್ಯ॑ನ್ತ್ಯ-ರ್ಧಮಾ॒ಸೈರ್ಮಾಸಾ᳚ನ್-ಥ್ಸ॒ಮ್ಪಾದ್ಯಾಹ॒ರು-ಥ್ಸೃ॑ಜನ್ತ್ಯ-ರ್ಧಮಾ॒ಸೈರ್ಹಿ ಮಾಸಾ᳚ನ್-ಥ್ಸ॒ಮ್ಪಶ್ಯ॑ನ್ತ್ಯಮಾವಾ॒ಸ್ಯ॑ಯಾ॒ ಮಾಸಾ᳚ನ್-ಥ್ಸ॒ಮ್ಪಾದ್ಯಾಹ॒ರು-ಥ್ಸೃ॑ಜನ್ತ್ಯಮಾವಾ॒ಸ್ಯ॑ಯಾ॒ ಹಿ ಮಾಸಾ᳚ನ್-ಥ್ಸ॒ಮ್ಪಶ್ಯ॑ನ್ತಿ ಪೌರ್ಣಮಾ॒ಸ್ಯಾ ಮಾಸಾ᳚ನ್-ಥ್ಸ॒ಮ್ಪಾದ್ಯಾ-ಽಹರು-ಥ್ಸೃ॑ಜನ್ತಿ ಪೌರ್ಣಮಾ॒ಸ್ಯಾ ಹಿ ಮಾಸಾ᳚ನ್-ಥ್ಸ॒ಮ್ಪಶ್ಯ॑ನ್ತಿ॒ ಯೋ ವೈ ಪೂ॒ರ್ಣ ಆ॑ಸಿ॒ಞ್ಚತಿ॒ ಪರಾ॒ ಸ ಸಿ॑ಞ್ಚತಿ॒ ಯಃ ಪೂ॒ರ್ಣಾದು॒ದಚ॑ತಿ [ ] 15
ಪ್ರಾ॒ಣಮ॑ಸ್ಮಿ॒ನ್ಥ್ಸ ದ॑ಧಾತಿ॒ ಯ-ತ್ಪೌ᳚ರ್ಣಮಾ॒ಸ್ಯಾ ಮಾಸಾ᳚ನ್-ಥ್ಸ॒ಪಾನ್ದ್ಯಾಹ॑ರು-ಥ್ಸೃ॒ಜನ್ತಿ॑ ಸಂವಁಥ್ಸ॒ರಾಯೈ॒ವ ತ-ತ್ಪ್ರಾ॒ಣ-ನ್ದ॑ಧತಿ॒ ತದನು॑ ಸ॒ತ್ರಿಣಃ॒ ಪ್ರಾಣ॑ನ್ತಿ॒ ಯದಹ॒ರ್ನೋ-ಥ್ಸೃ॒ಜೇಯು॒ರ್ಯಥಾ॒ ದೃತಿ॒ರುಪ॑ನದ್ಧೋ ವಿ॒ಪತ॑ತ್ಯೇ॒ವಗ್ಂ ಸಂ॑ವಁಥ್ಸ॒ರೋ ವಿ ಪ॑ತೇ॒ದಾರ್ತಿ॒-ಮಾರ್ಚ್ಛೇ॑ಯು॒ರ್ಯ-ತ್ಪೌ᳚ರ್ಣಮಾ॒ಸ್ಯಾ ಮಾಸಾ᳚ನ್-ಥ್ಸ॒ಪಾನ್ದ್ಯಾಹ॑ರು-ಥ್ಸೃ॒ಜನ್ತಿ॑ ಸಂವಁಥ್ಸ॒ರಾಯೈ॒ವ ತದು॑ದಾ॒ನ-ನ್ದ॑ಧತಿ॒ ತದನು॑ ಸ॒ತ್ರಿಣ॒ ಉ- [ಸ॒ತ್ರಿಣ॒ ಉತ್, ಅ॒ನ॒ನ್ತಿ॒ ನಾ-ಽಽರ್ತಿ॒-ಮಾರ್ಚ್ಛ॑ನ್ತಿ] 16
-ದ॑ನನ್ತಿ॒ ನಾ-ಽಽರ್ತಿ॒-ಮಾರ್ಚ್ಛ॑ನ್ತಿ ಪೂ॒ರ್ಣಮಾ॑ಸೇ॒ ವೈ ದೇ॒ವಾನಾಗ್ಂ॑ ಸು॒ತೋ ಯ-ತ್ಪೌ᳚ರ್ಣಮಾ॒ಸ್ಯಾ ಮಾಸಾ᳚ನ್-ಥ್ಸ॒ಪಾನ್ದ್ಯಾಹ॑ರು-ಥ್ಸೃ॒ಜನ್ತಿ॑ ದೇ॒ವಾನಾ॑ಮೇ॒ವ ತ-ದ್ಯ॒ಜ್ಞೇನ॑ ಯ॒ಜ್ಞ-ಮ್ಪ್ರ॒ತ್ಯವ॑ರೋಹನ್ತಿ॒ ವಿ ವಾ ಏ॒ತ-ದ್ಯ॒ಜ್ಞ-ಞ್ಛಿ॑ನ್ದನ್ತಿ॒ ಯ-ಥ್ಷ॑ಡ॒ಹಸ॑ತನ್ತ॒ಗ್ಂ॒ ಸನ್ತ॒ಮಥಾಹ॑ರು-ಥ್ಸೃ॒ಜನ್ತಿ॑ ಪ್ರಾಜಾಪ॒ತ್ಯ-ಮ್ಪ॒ಶುಮಾ ಲ॑ಭನ್ತೇ ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾ॑ ದೇ॒ವತಾ॑ಭಿರೇ॒ವ ಯ॒ಜ್ಞಗ್ಂ ಸ-ನ್ತ॑ನ್ವನ್ತಿ॒ ಯನ್ತಿ॒ ವಾ ಏ॒ತೇ ಸವ॑ನಾ॒ದ್ಯೇ-ಽಹ॑- [ಸವ॑ನಾ॒ದ್ಯೇ-ಽಹಃ॑, ಉ॒-ಥ್ಸೃ॒ಜನ್ತಿ॑] 17
-ರು-ಥ್ಸೃ॒ಜನ್ತಿ॑ ತು॒ರೀಯ॒-ಙ್ಖಲು॒ ವಾ ಏ॒ತ-ಥ್ಸವ॑ನಂ॒-ಯಁ-ಥ್ಸಾ᳚ನಾಂ॒ಯ್ಯಂ-ಯಁ-ಥ್ಸಾ᳚ನಾಂ॒ಯ್ಯ-ಮ್ಭವ॑ತಿ॒ ತೇನೈ॒ವ ಸವ॑ನಾ॒ನ್ನ ಯ॑ನ್ತಿ ಸಮುಪ॒ಹೂಯ॑ ಭಖ್ಷಯನ್ತ್ಯೇ॒ತಥ್- ಸೋ॑ಮಪೀಥಾ॒ ಹ್ಯೇ॑ತರ್ಹಿ॑ ಯಥಾಯತ॒ನಂ-ವಾಁ ಏ॒ತೇಷಾಗ್ಂ॑ ಸವನ॒ಭಾಜೋ॑ ದೇ॒ವತಾ॑ ಗಚ್ಛನ್ತಿ॒ ಯೇ-ಽಹ॑ರು-ಥ್ಸೃ॒ಜನ್ತ್ಯ॑ನುಸವ॒ನ-ಮ್ಪು॑ರೋ॒ಡಾಶಾ॒-ನ್ನಿರ್ವ॑ಪನ್ತಿ ಯಥಾಯತ॒ನಾದೇ॒ವ ಸ॑ವನ॒ಭಾಜೋ॑ ದೇ॒ವತಾ॒ ಅವ॑ ರುನ್ಧತೇ॒ ಽಷ್ಟಾಕ॑ಪಾಲಾ-ನ್ಪ್ರಾತಸ್ಸವ॒ನ ಏಕಾ॑ದಶಕಪಾಲಾ॒-ನ್ಮಾದ್ಧ್ಯ॑ನ್ದಿನೇ॒ ಸವ॑ನೇ॒ ದ್ವಾದ॑ಶಕಪಾಲಾಗ್-ಸ್ತೃತೀಯಸವ॒ನೇ ಛನ್ದಾಗ್॑ಸ್ಯೇ॒ವಾ-ಽಽಪ್ತ್ವಾ -ಽವ॑ ರುನ್ಧತೇ ವೈಶ್ವದೇ॒ವ-ಞ್ಚ॒ರು-ನ್ತೃ॑ತೀಯಸವ॒ನೇ ನಿರ್ವ॑ಪನ್ತಿ ವೈಶ್ವದೇ॒ವಂ-ವೈಁ ತೃ॑ತೀಯಸವ॒ನ-ನ್ತೇನೈ॒ವ ತೃ॑ತೀಯಸವ॒ನಾನ್ನ ಯ॑ನ್ತಿ ॥ 18 ॥
(ಉ॒ದಚ॒ – ತ್ಯು – ದ್ಯೇ-ಽಹ॑ – ರಾ॒ಪ್ತ್ವಾ – ಪಞ್ಚ॑ದಶ ಚ) (ಅ. 6)
ಉ॒ಥ್ಸೃಜ್ಯಾಂ(3)ನೋಥ್ಸೃಜ್ಯಾ(3)ಮಿತಿ॑ ಮೀಮಾಗ್ಂಸನ್ತೇ ಬ್ರಹ್ಮವಾ॒ದಿನ॒-ಸ್ತದ್ವಾ॑ಹುರು॒-ಥ್ಸೃಜ್ಯ॑ಮೇ॒ವೇತ್ಯ॑-ಮಾವಾ॒ಸ್ಯಾ॑ಯಾ-ಞ್ಚ ಪೌರ್ಣಮಾ॒ಸ್ಯಾ-ಞ್ಚೋ॒-ಥ್ಸೃಜ್ಯ॒ಮಿತ್ಯಾ॑ಹುರೇ॒ತೇ ಹಿ ಯ॒ಜ್ಞಂ-ವಁಹ॑ತ॒ ಇತಿ॒ ತೇ ತ್ವಾವ ನೋಥ್ಸೃಜ್ಯೇ॒ ಇತ್ಯಾ॑ಹು॒ರ್ಯೇ ಅ॑ವಾನ್ತ॒ರಂ-ಯಁ॒ಜ್ಞ-ಮ್ಭೇ॒ಜಾತೇ॒ ಇತಿ॒ ಯಾ ಪ್ರ॑ಥ॒ಮಾ ವ್ಯ॑ಷ್ಟಕಾ॒ ತಸ್ಯಾ॑ಮು॒-ಥ್ಸೃಜ್ಯ॒ಮಿತ್ಯಾ॑ಹುರೇ॒ಷ ವೈ ಮಾ॒ಸೋ ವಿ॑ಶ॒ರ ಇತಿ॒ ನಾ-ಽಽದಿ॑ಷ್ಟ॒- [ನಾ-ಽಽದಿ॑ಷ್ಟಮ್, ಉಥ್ಸೃ॑ಜೇಯು॒-] 19
-ಮುಥ್ಸೃ॑ಜೇಯು॒-ರ್ಯದಾದಿ॑ಷ್ಟ-ಮುಥ್ಸೃ॒ಜೇಯು॑ರ್ಯಾ॒ದೃಶೇ॒ ಪುನಃ॑ ಪರ್ಯಾಪ್ಲಾ॒ವೇ ಮದ್ಧ್ಯೇ॑ ಷಡ॒ಹಸ್ಯ॑ ಸ॒ಪನ್ದ್ಯೇ॑ತ ಷಡ॒ಹೈರ್ಮಾಸಾ᳚ನ್-ಥ್ಸ॒ಪಾನ್ದ್ಯ॒ ಯ-ಥ್ಸ॑ಪ್ತ॒ಮ- ಮಹ॒ಸ್ತಸ್ಮಿ॒ನ್ನು-ಥ್ಸೃ॑ಜೇಯು॒-ಸ್ತದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇಯುರೈ॒ನ್ದ್ರ-ನ್ದಧೀನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒ಮೇಕಾ॑ದಶಕಪಾಲಂ-ವೈಁಶ್ವದೇ॒ವ-ನ್ದ್ವಾದ॑ಶಕಪಾಲಮ॒ಗ್ನೇರ್ವೈ ವಸು॑ಮತಃ ಪ್ರಾತಸ್ಸವ॒ನಂ-ಯಁದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ-ನ್ನಿ॒ರ್ವಪ॑ನ್ತಿ ದೇ॒ವತಾ॑ಮೇ॒ವ ತ-ದ್ಭಾ॒ಗಿನೀ᳚-ಙ್ಕು॒ರ್ವನ್ತಿ॒ [-ಙ್ಕು॒ರ್ವನ್ತಿ॑, ಸವ॑ನ] 20
ಸವ॑ನ-ಮಷ್ಟಾ॒ಭಿರುಪ॑ ಯನ್ತಿ॒ ಯದೈ॒ನ್ದ್ರ-ನ್ದಧಿ॒ ಭವ॒ತೀನ್ದ್ರ॑ಮೇ॒ವ ತ-ದ್ಭಾ॑ಗ॒ಧೇಯಾ॒ನ್ನ ಚ್ಯಾ॑ವಯ॒ನ್ತೀನ್ದ್ರ॑ಸ್ಯ॒ ವೈ ಮ॒ರುತ್ವ॑ತೋ॒ ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನಂ॒-ಯಁದಿನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒ಮೇಕಾ॑ದಶಕಪಾಲ-ನ್ನಿ॒ರ್ವಪ॑ನ್ತಿ ದೇ॒ವತಾ॑ಮೇ॒ವ ತ-ದ್ಭಾ॒ಗಿನೀ᳚-ಙ್ಕು॒ರ್ವನ್ತಿ॒ ಸವ॑ನಮೇಕಾದ॒ಶಭಿ॒ರುಪ॑ ಯನ್ತಿ॒ ವಿಶ್ವೇ॑ಷಾಂ॒-ವೈಁ ದೇ॒ವಾನಾ॑ಮೃಭು॒ಮತಾ᳚-ನ್ತೃತೀಯಸವ॒ನಂಯಁ-ದ್ವೈ᳚ಶ್ವದೇ॒ವ-ನ್ದ್ವಾದ॑ಶಕಪಾಲ-ನ್ನಿ॒ರ್ವಪ॑ನ್ತಿ ದೇ॒ವತಾ॑ ಏ॒ವ ತ-ದ್ಭಾ॒ಗಿನೀಃ᳚ ಕು॒ರ್ವನ್ತಿ॒ ಸವ॑ನ-ನ್ದ್ವಾದ॒ಶಭಿ॒- [ಸವ॑ನ-ನ್ದ್ವಾದ॒ಶಭಿಃ॑, ಉಪ॑ ಯನ್ತಿ] 21
-ರುಪ॑ ಯನ್ತಿ ಪ್ರಾಜಾಪ॒ತ್ಯ-ಮ್ಪ॒ಶುಮಾ ಲ॑ಭನ್ತೇ ಯ॒ಜ್ಞೋ ವೈ ಪ್ರ॒ಜಾಪ॑ತಿ-ರ್ಯ॒ಜ್ಞಸ್ಯಾ-ನ॑ನುಸರ್ಗಾಯಾಭಿವ॒ರ್ತ ಇ॒ತ-ಷ್ಷಣ್ಮಾ॒ಸೋ ಬ್ರ॑ಹ್ಮಸಾ॒ಮ-ಮ್ಭ॑ವತಿ॒ ಬ್ರಹ್ಮ॒ ವಾ ಅ॑ಭಿವ॒ರ್ತೋ ಬ್ರಹ್ಮ॑ಣೈ॒ವ ತ-ಥ್ಸು॑ವ॒ರ್ಗಂ-ಲೋಁ॒ಕ-ಮ॑ಭಿವ॒ರ್ತಯ॑ನ್ತೋ ಯನ್ತಿ ಪ್ರತಿಕೂ॒ಲಮಿ॑ವ॒ ಹೀತ-ಸ್ಸು॑ವ॒ರ್ಗೋ ಲೋ॒ಕ ಇನ್ದ್ರ॒ ಕ್ರತು॑-ನ್ನ॒ ಆ ಭ॑ರ ಪಿ॒ತಾ ಪು॒ತ್ರೇಭ್ಯೋ॒ ಯಥಾ᳚ । ಶಿಖ್ಷಾ॑ ನೋ ಅ॒ಸ್ಮಿ-ನ್ಪು॑ರುಹೂತ॒ ಯಾಮ॑ನಿ ಜೀ॒ವಾ ಜ್ಯೋತಿ॑-ರಶೀಮ॒ಹೀತ್ಯ॒-ಮುತ॑ ಆಯ॒ತಾಗ್ಂ ಷಣ್ಮಾ॒ಸೋ ಬ್ರ॑ಹ್ಮಸಾ॒ಮ-ಮ್ಭ॑ವತ್ಯ॒ಯಂ-ವೈಁ ಲೋ॒ಕೋ ಜ್ಯೋತಿಃ॑ ಪ್ರ॒ಜಾ ಜ್ಯೋತಿ॑ರಿ॒ಮಮೇ॒ವ ತಲ್ಲೋ॒ಕ-ಮ್ಪಶ್ಯ॑ನ್ತೋ-ಽಭಿ॒ವದ॑ನ್ತ॒ ಆ ಯ॑ನ್ತಿ ॥ 22 ॥
(ನಾ-ಽಽದಿ॑ಷ್ಟಂ – ಕು॒ರ್ವನ್ತಿ॑ – ದ್ವಾದ॒ಶಭಿ॒ – ರಿತಿ॑- ವಿಗ್ಂಶ॒ತಿಶ್ಚ॑) (ಅ. 7)
ದೇ॒ವಾನಾಂ॒-ವಾಁ ಅನ್ತ॑-ಞ್ಜ॒ಗ್ಮುಷಾ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮಪಾ᳚ಕ್ರಾಮ॒-ತ್ತ-ತ್ಕ್ರೋ॒ಶೇನಾವಾ॑ರುನ್ಧತ॒ ತ-ತ್ಕ್ರೋ॒ಶಸ್ಯ॑ ಕ್ರೋಶ॒ತ್ವಂ-ಯಁ-ತ್ಕ್ರೋ॒ಶೇನ॒ ಚಾತ್ವಾ॑ಲ॒ಸ್ಯಾನ್ತೇ᳚ ಸ್ತು॒ವನ್ತಿ॑ ಯ॒ಜ್ಞಸ್ಯೈ॒ವಾನ್ತ॑-ಙ್ಗ॒ತ್ವೇನ್ದ್ರಿ॒ಯಂ-ವೀಁ॒ರ್ಯ॑ಮವ॑ ರುನ್ಧತೇ ಸ॒ತ್ರಸ್ಯರ್ಧ್ಯಾ॑ ಽಽಹವ॒ನೀಯ॒ಸ್ಯಾನ್ತೇ᳚ ಸ್ತುವನ್ತ್ಯ॒ಗ್ನಿ-ಮೇ॒ವೋಪ॑-ದ್ರ॒ಷ್ಟಾರ॑-ಙ್ಕೃ॒ತ್ವರ್ಧಿ॒ಮುಪ॑ ಯನ್ತಿ ಪ್ರ॒ಜಾಪ॑ತೇ॒ರ್॒ಹೃದ॑ಯೇನ ಹವಿ॒ರ್ಧಾನೇ॒-ಽನ್ತ-ಸ್ಸ್ತು॑ವನ್ತಿ ಪ್ರೇ॒ಮಾಣ॑ಮೇ॒ವಾಸ್ಯ॑ ಗಚ್ಛನ್ತಿ ಶ್ಲೋ॒ಕೇನ॑ ಪು॒ರಸ್ತಾ॒-ಥ್ಸದ॑ಸ- [ಪು॒ರಸ್ತಾ॒-ಥ್ಸದ॑ಸಃ, ಸ್ತು॒ವ॒ನ್ತ್ಯನು॑ಶ್ಲೋಕೇನ] 23
-ಸ್ಸ್ತುವ॒ನ್ತ್ಯನು॑ಶ್ಲೋಕೇನ ಪ॒ಶ್ಚಾ-ದ್ಯ॒ಜ್ಞಸ್ಯೈ॒ವಾನ್ತ॑-ಙ್ಗ॒ತ್ವಾ ಶ್ಲೋ॑ಕ॒ಭಾಜೋ॑ ಭವನ್ತಿ ನ॒ವಭಿ॑-ರದ್ಧ್ವ॒ರ್ಯುರು-ದ್ಗಾ॑ಯತಿ॒ ನವ॒ ವೈ ಪುರು॑ಷೇ ಪ್ರಾ॒ಣಾಃ ಪ್ರಾ॒ಣಾನೇ॒ವ ಯಜ॑ಮಾನೇಷು ದಧಾತಿ॒ ಸರ್ವಾ॑ ಐ॒ನ್ದ್ರಿಯೋ॑ ಭವನ್ತಿ ಪ್ರಾ॒ಣೇಷ್ವೇ॒ವೇನ್ದ್ರಿ॒ಯ-ನ್ದ॑ಧ॒-ತ್ಯಪ್ರ॑ತಿಹೃತಾಭಿ॒ರು-ದ್ಗಾ॑ಯತಿ॒ ತಸ್ಮಾ॒-ತ್ಪುರು॑ಷ॒-ಸ್ಸರ್ವಾ᳚ಣ್ಯ॒ನ್ಯಾನಿ॑ ಶೀ॒ರ್ಷ್ಣೋ-ಽಙ್ಗಾ॑ನಿ॒ ಪ್ರತ್ಯ॑ಚತಿ॒ ಶಿರ॑ ಏ॒ವ ನ ಪ॑ಞ್ಚದ॒ಶಗ್ಂರ॑ಥನ್ತ॒ರ-ಮ್ಭ॑ವತೀನ್ದ್ರಿ॒ಯಮೇ॒ವಾವ॑ ರುನ್ಧತೇ ಸಪ್ತದ॒ಶ- [ಸಪ್ತದ॒ಶಮ್, ಬೃ॒ಹ-ದ॒ನ್ನಾದ್ಯ॒ಸ್ಯಾ] 24
-ಮ್ಬೃ॒ಹ-ದ॒ನ್ನಾದ್ಯ॒ಸ್ಯಾ-ಽವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯನ್ತ ಏಕವಿ॒ಗ್ಂ॒ಶ-ಮ್ಭ॒ದ್ರ-ನ್ದ್ವಿ॒ಪದಾ॑ಸು॒ ಪ್ರತಿ॑ಷ್ಠಿತ್ಯೈ॒ ಪತ್ನ॑ಯ॒ ಉಪ॑ ಗಾಯನ್ತಿ ಮಿಥುನ॒ತ್ವಾಯ॒ ಪ್ರಜಾ᳚ತ್ಯೈ ಪ್ರ॒ಜಾ॑ಪತಿಃ ಪ್ರ॒ಜಾ ಅ॑ಸೃಜತ॒ ಸೋ॑-ಽಕಾಮಯತಾ॒-ಽಽಸಾಮ॒ಹಗ್ಂ ರಾ॒ಜ್ಯ-ಮ್ಪರೀ॑ಯಾ॒ಮಿತಿ॒ ತಾಸಾಗ್ಂ॑ ರಾಜ॒ನೇನೈ॒ವ ರಾ॒ಜ್ಯ-ಮ್ಪರ್ಯೈ॒-ತ್ತ-ದ್ರಾ॑ಜ॒ನಸ್ಯ॑ ರಾಜನ॒ತ್ವಂ-ಯಁ-ದ್ರಾ॑ಜ॒ನ-ಮ್ಭವ॑ತಿ ಪ್ರ॒ಜಾನಾ॑ಮೇ॒ವ ತ-ದ್ಯಜ॑ಮಾನಾ ರಾ॒ಜ್ಯ-ಮ್ಪರಿ॑ ಯನ್ತಿ ಪಞ್ಚವಿ॒ಗ್ಂ॒ಶ-ಮ್ಭ॑ವತಿ ಪ್ರ॒ಜಾಪ॑ತೇ॒- [ಪ್ರ॒ಜಾಪ॑ತೇಃ, ಆಪ್ತ್ಯೈ॑ ಪ॒ಞ್ಚಭಿ॒-ಸ್ತಿಷ್ಠ॑ನ್ತ-ಸ್ಸ್ತುವನ್ತಿ] 25
-ರಾಪ್ತ್ಯೈ॑ ಪ॒ಞ್ಚಭಿ॒-ಸ್ತಿಷ್ಠ॑ನ್ತ-ಸ್ಸ್ತುವನ್ತಿ ದೇವಲೋ॒ಕಮೇ॒ವಾಭಿ ಜ॑ಯನ್ತಿ ಪ॒ಞ್ಚಭಿ॒ರಾಸೀ॑ನಾ ಮನುಷ್ಯಲೋ॒ಕಮೇ॒ವಾಭಿ ಜ॑ಯನ್ತಿ॒ ದಶ॒ ಸಮ್ಪ॑ದ್ಯನ್ತೇ॒ ದಶಾ᳚ಖ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾ-ನ್ನಾದ್ಯ॒ಮವ॑ ರುನ್ಧತೇ ಪಞ್ಚ॒ಧಾ ವಿ॑ನಿ॒ಷದ್ಯ॑ ಸ್ತುವನ್ತಿ॒ ಪಞ್ಚ॒ ದಿಶೋ॑ ದಿ॒ಖ್ಷ್ವೇ॑ವ ಪ್ರತಿ॑ತಿಷ್ಠ॒ನ್ತ್ಯೇಕೈ॑ಕ॒ಯಾ-ಽಸ್ತು॑ತಯಾ ಸ॒ಮಾಯ॑ನ್ತಿ ದಿ॒ಗ್ಭ್ಯ ಏ॒ವಾನ್ನಾದ್ಯ॒ಗ್ಂ॒ ಸ-ಮ್ಭ॑ರನ್ತಿ॒ ತಾಭಿ॑-ರುದ್ಗಾ॒ತೋ-ದ್ಗಾ॑ಯತಿ ದಿ॒ಗ್ಭ್ಯ ಏ॒ವಾ-ಽನ್ನಾದ್ಯಗ್ಂ॑ [ಏ॒ವಾ-ಽನ್ನಾದ್ಯ᳚ಮ್, ಸ॒ಮ್ಭೃತ್ಯ॒ ತೇಜ॑] 26
ಸ॒ಮ್ಭೃತ್ಯ॒ ತೇಜ॑ ಆ॒ತ್ಮ-ನ್ದ॑ಧತೇ॒ ತಸ್ಮಾ॒ದೇಕಃ॑ ಪ್ರಾ॒ಣ-ಸ್ಸರ್ವಾ॒ಣ್ಯಙ್ಗಾ᳚ನ್ಯವ॒ತ್ಯಥೋ॒ ಯಥಾ॑ ಸುಪ॒ರ್ಣ ಉ॑ತ್ಪತಿ॒ಷ್ಯಞ್ಛಿರ॑ ಉತ್ತ॒ಮ-ಙ್ಕು॑ರು॒ತ ಏ॒ವಮೇ॒ವ ತ-ದ್ಯಜ॑ಮಾನಾಃ ಪ್ರ॒ಜಾನಾ॑ಮುತ್ತ॒ಮಾ ಭ॑ವನ್ತ್ಯಾಸ॒ನ್ದೀ-ಮು॑ದ್ಗಾ॒ತಾ ಽಽರೋ॑ಹತಿ॒ ಸಾಮ್ರಾ᳚ಜ್ಯಮೇ॒ವ ಗ॑ಚ್ಛನ್ತಿ ಪ್ಲೇ॒ಙ್ಖಗ್ಂ ಹೋತಾ॒ ನಾಕ॑ಸ್ಯೈ॒ವ ಪೃ॒ಷ್ಠಗ್ಂ ರೋ॑ಹನ್ತಿ ಕೂ॒ರ್ಚಾವ॑ದ್ಧ್ವ॒ರ್ಯು-ರ್ಬ್ರ॒ದ್ಧ್ನಸ್ಯೈ॒ವ ವಿ॒ಷ್ಟಪ॑-ಙ್ಗಚ್ಛನ್ತ್ಯೇ॒ತಾವ॑ನ್ತೋ॒ ವೈ ದೇ॑ವಲೋ॒ಕಾಸ್ತೇಷ್ವೇ॒ವ ಯ॑ಥಾಪೂ॒ರ್ವ-ಮ್ಪ್ರತಿ॑ ತಿಷ್ಠ॒ನ್ತ್ಯಥೋ॑ ಆ॒ಕ್ರಮ॑ಣಮೇ॒ವ ತ-ಥ್ಸೇತುಂ॒-ಯಁಜ॑ಮಾನಾಃ ಕುರ್ವತೇ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 27 ॥
(ಸದ॑ಸಃ-ಸಪ್ತದ॒ಶಂ-ಪ್ರ॒ಜಾಪ॑ತೇ-ರ್ಗಾಯತಿ ದಿ॒ಗ್ಭ್ಯ ಏ॒ವಾನ್ನಾದ್ಯಂ॒-ಪ್ರತ್ಯೇ-ಕಾ॑ದಶ ಚ) (ಅ. 8)
ಅ॒ರ್ಕ್ಯೇ॑ಣ॒ ವೈ ಸ॑ಹಸ್ರ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾಭ್ಯ॒ ಇಲಾ᳚ದೇ॒ನ್ನೇರಾಂ॒-ಲೂಁತಾ॒ಮವಾ॑ರುನ್ಧ॒ ಯದ॒ರ್ಕ್ಯ॑-ಮ್ಭವ॑ತಿ ಪ್ರ॒ಜಾ ಏ॒ವ ತ-ದ್ಯಜ॑ಮಾನಾ-ಸ್ಸೃಜನ್ತ॒ ಇಲಾ᳚ದ-ಮ್ಭವತಿ ಪ್ರ॒ಜಾಭ್ಯ॑ ಏ॒ವ ಸೃ॒ಷ್ಟಾಭ್ಯ॒ ಇರಾಂ॒-ಲೂಁತಾ॒ಮವ॑ ರುನ್ಧತೇ॒ ತಸ್ಮಾ॒ದ್ಯಾಗ್ಂ ಸಮಾಗ್ಂ॑ ಸ॒ತ್ರಗ್ಂ ಸಮೃ॑ದ್ಧ॒-ಙ್ಖ್ಷೋಧು॑ಕಾ॒ಸ್ತಾಗ್ಂ ಸಮಾ᳚-ಮ್ಪ್ರ॒ಜಾ ಇಷ॒ಗ್ಗ್॒ ಹ್ಯಾ॑ಸಾ॒ಮೂರ್ಜ॑ಮಾ॒ದದ॑ತೇ॒ ಯಾಗ್ಂ ಸಮಾಂ॒-ವ್ಯೃಁ॑ದ್ಧ॒-ಮಖ್ಷೋ॑ಧುಕಾ॒ಸ್ತಾಗ್ಂ ಸಮಾ᳚-ಮ್ಪ್ರ॒ಜಾ [ಸಮಾ᳚-ಮ್ಪ್ರ॒ಜಾಃ, ನ ಹ್ಯಾ॑ಸಾ॒ಮಿಷ॒] 28
ನ ಹ್ಯಾ॑ಸಾ॒ಮಿಷ॒-ಮೂರ್ಜ॑-ಮಾ॒ದದ॑ತ ಉತ್ಕ್ರೋ॒ದ-ಙ್ಕು॑ರ್ವತೇ॒ ಯಥಾ॑ ಬ॒ನ್ಧಾ-ನ್ಮು॑ಮುಚಾ॒ನಾ ಉ॑ತ್ಕ್ರೋ॒ದ-ಙ್ಕು॒ರ್ವತ॑ ಏ॒ವಮೇ॒ವ ತ-ದ್ಯಜ॑ಮಾನಾ ದೇವಬ॒ನ್ಧಾ-ನ್ಮು॑ಮುಚಾ॒ನಾ ಉ॑ತ್ಕ್ರೋ॒ದ-ಙ್ಕು॑ರ್ವತ॒ ಇಷ॒ಮೂರ್ಜ॑ಮಾ॒ತ್ಮ-ನ್ದಧಾ॑ನಾ ವಾ॒ಣ-ಶ್ಶ॒ತತ॑ನ್ತುರ್ಭವತಿ ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯ॒ ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠನ್ತ್ಯಾ॒ಜಿ-ನ್ಧಾ॑ವ॒ನ್ತ್ಯನ॑ಭಿಜಿತಸ್ಯಾ॒-ಭಿಜಿ॑ತ್ಯೈ ದುನ್ದು॒ಭೀನ್-ಥ್ಸ॒ಮಾಘ್ನ॑ನ್ತಿ ಪರ॒ಮಾ ವಾ ಏ॒ಷಾ ವಾಗ್ಯಾ ದು॑ನ್ದು॒ಭೌ ಪ॑ರ॒ಮಾಮೇ॒ವ [ ] 29
ವಾಚ॒ಮವ॑ ರುನ್ಧತೇ ಭೂಮಿದುನ್ದು॒ಭಿಮಾ ಘ್ನ॑ನ್ತಿ॒ ಯೈವೇಮಾಂ-ವಾಁ-ಕ್ಪ್ರವಿ॑ಷ್ಟಾ॒ ತಾಮೇ॒ವಾವ॑ ರುನ್ಧ॒ತೇ ಽಥೋ॑ ಇ॒ಮಾಮೇ॒ವ ಜ॑ಯನ್ತಿ॒ ಸರ್ವಾ॒ ವಾಚೋ॑ ವದನ್ತಿ॒ ಸರ್ವಾ॑ಸಾಂ-ವಾಁ॒ಚಾಮವ॑ರುದ್ಧ್ಯಾ ಆ॒ರ್ದ್ರೇಚರ್ಮ॒ನ್ ವ್ಯಾಯ॑ಚ್ಛೇತೇ ಇನ್ದ್ರಿ॒ಯಸ್ಯಾ ವ॑ರುದ್ಧ್ಯಾ॒ ಆ-ಽನ್ಯಃ ಕ್ರೋಶ॑ತಿ॒ ಪ್ರಾನ್ಯ-ಶ್ಶಗ್ಂ॑ಸತಿ॒ ಯ ಆ॒ಕ್ರೋಶ॑ತಿ ಪು॒ನಾತ್ಯೇ॒ವೈನಾ॒ನ್ಥ್ಸ ಯಃ ಪ್ರ॒ಶಗ್ಂಸ॑ತಿ ಪೂ॒ತೇಷ್ವೇ॒ವಾ-ಽನ್ನಾದ್ಯ॑-ನ್ದಧಾ॒ತ್ಯೃಷಿ॑ಕೃತ-ಞ್ಚ॒ [-ನ್ದಧಾ॒ತ್ಯೃಷಿ॑ಕೃತ-ಞ್ಚ॒, ವಾ ಏ॒ತೇ] 30
ವಾ ಏ॒ತೇ ದೇ॒ವಕೃ॑ತ-ಞ್ಚ॒ ಪೂರ್ವೈ॒ರ್ಮಾಸೈ॒ರವ॑ ರುನ್ಧತೇ॒ ಯ-ದ್ಭೂ॑ತೇ॒ಚ್ಛದಾ॒ಗ್ಂ॒ ಸಾಮಾ॑ನಿ॒ ಭವ॑ನ್ತ್ಯು॒ಭಯ॒ಸ್ಯಾವ॑ರುದ್ಧ್ಯೈ॒ ಯನ್ತಿ॒ ವಾ ಏ॒ತೇ ಮಿ॑ಥು॒ನಾದ್ಯೇ ಸಂ॑ವಁಥ್ಸ॒ರ-ಮು॑ಪ॒ಯನ್ತ್ಯ॑ನ್ತರ್ವೇ॒ದಿ ಮಿ॑ಥು॒ನೌ ಸ-ಮ್ಭ॑ವತ॒ಸ್ತೇನೈ॒ವ ಮಿ॑ಥು॒ನಾನ್ನ ಯ॑ನ್ತಿ ॥ 31 ॥
(ವ್ಯೃ॑ದ್ಧ॒ಮಖ್ಷೋ॑ಧುಕಾ॒ಸ್ತಾಗ್ಂ ಸಮಾ᳚-ಮ್ಪ್ರ॒ಜಾಃ – ಪ॑ರ॒ಮಾಮೇ॒ವ – ಚ॑ – ತ್ರಿ॒ಗ್ಂ॒ಶಚ್ಚ॑) (ಅ. 9)
ಚರ್ಮಾವ॑ ಭಿನ್ದನ್ತಿ ಪಾ॒ಪ್ಮಾನ॑ಮೇ॒ವೈಷಾ॒ಮವ॑ ಭಿನ್ದನ್ತಿ॒ ಮಾ-ಽಪ॑ ರಾಥ್ಸೀ॒ರ್ಮಾ-ಽತಿ॑ ವ್ಯಾಥ್ಸೀ॒ರಿತ್ಯಾ॑ಹ ಸಮ್ಪ್ರ॒ತ್ಯೇ॑ವೈಷಾ᳚-ಮ್ಪಾ॒ಪ್ಮಾನ॒ಮವ॑ ಭಿನ್ದನ್ತ್ಯುದಕು॒ಮ್ಭಾನ॑ಧಿನಿ॒ಧಾಯ॑ ದಾ॒ಸ್ಯೋ॑ ಮಾರ್ಜಾ॒ಲೀಯ॒-ಮ್ಪರಿ॑ ನೃತ್ಯನ್ತಿ ಪ॒ದೋ ನಿ॑ಘ್ನ॒ತೀರಿ॒ದಮ್ಮ॑ಧು॒-ಙ್ಗಾಯ॑ನ್ತ್ಯೋ॒ ಮಧು॒ ವೈ ದೇ॒ವಾನಾ᳚-ಮ್ಪರ॒ಮ-ಮ॒ನ್ನಾದ್ಯ॑-ಮ್ಪರ॒ಮಮೇ॒ವಾ-ನ್ನಾದ್ಯ॒ಮವ॑ ರುನ್ಧತೇ ಪ॒ದೋ ನಿ ಘ್ನ॑ನ್ತಿ ಮಹೀ॒ಯಾಮೇ॒ವೈಷು॑ ದಧತಿ ॥ 32 ॥
(ಚರ್ಮೈ – ಕಾ॒ನ್ನಪ॑ಞ್ಚಾ॒ಶತ್) (ಅ. 10)
ಪೃ॒ಥಿ॒ವ್ಯೈ ಸ್ವಾಹಾ॒ ಽನ್ತರಿ॑ಖ್ಷಾಯ॒ ಸ್ವಾಹಾ॑ ದಿ॒ವೇ ಸ್ವಾಹಾ॑ ಸಮ್ಪ್ಲೋಷ್ಯ॒ತೇ ಸ್ವಾಹಾ॑ ಸ॒ಪ್ಲಂವಁ॑ಮಾನಾಯ॒ ಸ್ವಾಹಾ॒ ಸಮ್ಪ್ಲು॑ತಾಯ॒ ಸ್ವಾಹಾ॑ ಮೇಘಾಯಿಷ್ಯ॒ತೇ ಸ್ವಾಹಾ॑ ಮೇಘಾಯ॒ತೇ ಸ್ವಾಹಾ॑ ಮೇಘಿ॒ತಾಯ॒ ಸ್ವಾಹಾ॑ ಮೇ॒ಘಾಯ॒ ಸ್ವಾಹಾ॑ ನೀಹಾ॒ರಾಯ॒ ಸ್ವಾಹಾ॑ ನಿ॒ಹಾಕಾ॑ಯೈ॒ ಸ್ವಾಹಾ᳚ ಪ್ರಾಸ॒ಚಾಯ॒ ಸ್ವಾಹಾ᳚ ಪ್ರಚ॒ಲಾಕಾ॑ಯೈ॒ ಸ್ವಾಹಾ॑ ವಿದ್ಯೋತಿಷ್ಯ॒ತೇ ಸ್ವಾಹಾ॑ ವಿ॒ದ್ಯೋತ॑ಮಾನಾಯ॒ ಸ್ವಾಹಾ॑ ಸಂವಿಁ॒ದ್ಯೋತ॑ಮಾನಾಯ॒ ಸ್ವಾಹಾ᳚ ಸ್ತನಯಿಷ್ಯ॒ತೇ ಸ್ವಾಹಾ᳚ ಸ್ತ॒ನಯ॑ತೇ॒ ಸ್ವಾಹೋ॒ -ಗ್ರಗ್ಗ್ ಸ್ತ॒ನಯ॑ತೇ॒ ಸ್ವಾಹಾ॑ ವರ್ಷಿಷ್ಯ॒ತೇ ಸ್ವಾಹಾ॒ ವರ್ಷ॑ತೇ॒ ಸ್ವಾಹಾ॑ ಽಭಿ॒ವರ್ಷ॑ತೇ॒ ಸ್ವಾಹಾ॑ ಪರಿ॒ವರ್ಷ॑ತೇ॒ ಸ್ವಾಹಾ॑ ಸಂ॒ವಁರ್ಷ॑ತೇ॒ [ಸಂ॒ವಁರ್ಷ॑ತೇ, ಸ್ವಾಹಾ॑ ಽನು॒ವರ್ಷ॑ತೇ॒ ಸ್ವಾಹಾ॑] 33
ಸ್ವಾಹಾ॑ ಽನು॒ವರ್ಷ॑ತೇ॒ ಸ್ವಾಹಾ॑ ಶೀಕಾಯಿಷ್ಯ॒ತೇ ಸ್ವಾಹಾ॑ ಶೀಕಾಯ॒ತೇ ಸ್ವಾಹಾ॑ ಶೀಕಿ॒ತಾಯ॒ ಸ್ವಾಹಾ᳚ಪ್ರೋಷಿಷ್ಯ॒ತೇ ಸ್ವಾಹಾ᳚ ಪ್ರುಷ್ಣ॒ತೇ ಸ್ವಾಹಾ॑ ಪರಿಪ್ರುಷ್ಣ॒ತೇ ಸ್ವಾಹೋ᳚-ದ್ಗ್ರಹೀಷ್ಯ॒ತೇ ಸ್ವಾಹೋ᳚ ದ್ಗೃಹ್ಣ॒ತೇ ಸ್ವಾಹೋ-ದ್ಗೃ॑ಹೀತಾಯ॒ ಸ್ವಾಹಾ॑ ವಿಪ್ಲೋಷ್ಯ॒ತೇ ಸ್ವಾಹಾ॑ ವಿ॒ಪ್ಲವ॑ಮಾನಾಯ॒ ಸ್ವಾಹಾ॒ ವಿಪ್ಲು॑ತಾಯ॒ ಸ್ವಾಹಾ॑ ಽಽತಫ್ಸ್ಯ॒ತೇ ಸ್ವಾಹಾ॒ ಽಽತಪ॑ತೇ ॒ಸ್ವಾಹೋ॒-ಗ್ರಮಾ॒ತಪ॑ತೇ॒ ಸ್ವಾಹ॒ -ರ್ಗ್ಭ್ಯ-ಸ್ಸ್ವಾಹಾ॒ ಯಜು॑ರ್ಭ್ಯ॒-ಸ್ಸ್ವಾಹಾ॒ ಸಾಮ॑ಭ್ಯ॒-ಸ್ಸ್ವಾಹಾ ಽಙ್ಗಿ॑ರೋಭ್ಯ॒-ಸ್ಸ್ವಾಹಾ॒ ವೇದೇ᳚ಭ್ಯ॒-ಸ್ಸ್ವಾಹಾ॒ ಗಾಥಾ᳚ಭ್ಯ॒-ಸ್ಸ್ವಾಹಾ॑ ನಾರಾಶ॒ಗ್ಂ॒ಸೀಭ್ಯ॒-ಸ್ಸ್ವಾಹಾ॒ ರೈಭೀ᳚ಭ್ಯ॒-ಸ್ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 34 ॥
(ಸಂ॒ವಁರ್ಷ॑ತೇ॒ – ರೈಭೀ᳚ಭ್ಯ॒-ಸ್ಸ್ವಾಹಾ॒ – ದ್ವೇ ಚ॑) (ಅ. 11)
ದ॒ತ್ವತೇ॒ ಸ್ವಾಹಾ॑ ಽದ॒ನ್ತಕಾ॑ಯ॒ ಸ್ವಾಹಾ᳚ ಪ್ರಾ॒ಣಿನೇ॒ ಸ್ವಾಹಾ᳚ ಽಪ್ರಾ॒ಣಾಯ॒ ಸ್ವಾಹಾ॒ ಮುಖ॑ವತೇ॒ ಸ್ವಾಹಾ॑-ಽಮು॒ಖಾಯ॒ ಸ್ವಾಹಾ॒ ನಾಸಿ॑ಕವತೇ॒ ಸ್ವಾಹಾ॑ ಽನಾಸಿ॒ಕಾಯ॒ ಸ್ವಾಹಾ᳚ ಽಖ್ಷ॒ಣ್ವತೇ॒ ಸ್ವಾಹಾ॑-ಽನ॒ಖ್ಷಿಕಾ॑ಯ॒ ಸ್ವಾಹಾ॑ ಕ॒ರ್ಣಿನೇ॒ ಸ್ವಾಹಾ॑ ಽಕ॒ರ್ಣಕಾ॑ಯ॒ ಸ್ವಾಹಾ॑ ಶೀರ್ಷ॒ಣ್ವತೇ॒ ಸ್ವಾಹಾ॑-ಽಶೀ॒ರ್॒ಷಕಾ॑ಯ॒ ಸ್ವಾಹಾ॑ ಪ॒ದ್ವತೇ॒ ಸ್ವಾಹಾ॑ ಽಪಾ॒ದಕಾ॑ಯ॒ ಸ್ವಾಹಾ᳚ ಪ್ರಾಣ॒ತೇ ಸ್ವಾಹಾ ಽಪ್ರಾ॑ಣತೇ॒ ಸ್ವಾಹಾ॒ ವದ॑ತೇ॒ ಸ್ವಾಹಾ ಽವ॑ದತೇ॒ ಸ್ವಾಹಾ॒ ಪಶ್ಯ॑ತೇ॒ ಸ್ವಾಹಾ ಽಪ॑ಶ್ಯತೇ॒ ಸ್ವಾಹಾ॑ ಶೃಣ್ವ॒ತೇ ಸ್ವಾಹಾ ಽಶೃ॑ಣ್ವತೇ॒ ಸ್ವಾಹಾ॑ ಮನ॒ಸ್ವಿನೇ॒ ಸ್ವಾಹಾ॑- [ಮನ॒ಸ್ವಿನೇ॒ ಸ್ವಾಹಾ᳚, ಅ॒ಮ॒ನಸೇ॒ ಸ್ವಾಹಾ॑] 35
-ಽಮ॒ನಸೇ॒ ಸ್ವಾಹಾ॑ ರೇತ॒ಸ್ವಿನೇ॒ ಸ್ವಾಹಾ॑ ಽರೇ॒ತಸ್ಕಾ॑ಯ॒ ಸ್ವಾಹಾ᳚ ಪ್ರ॒ಜಾಭ್ಯ॒-ಸ್ಸ್ವಾಹಾ᳚ ಪ್ರ॒ಜನ॑ನಾಯ॒ ಸ್ವಾಹಾ॒ ಲೋಮ॑ವತೇ॒ ಸ್ವಾಹಾ॑ ಽಲೋ॒ಮಕಾ॑ಯ॒ ಸ್ವಾಹಾ᳚ ತ್ವ॒ಚೇ ಸ್ವಾಹಾ॒ ಽತ್ವಕ್ಕಾ॑ಯ॒ ಸ್ವಾಹಾ॒ ಚರ್ಮ॑ಣ್ವತೇ॒ ಸ್ವಾಹಾ॑ ಽಚ॒ರ್ಮಕಾ॑ಯ॒ ಸ್ವಾಹಾ॒ ಲೋಹಿ॑ತವತೇ॒ ಸ್ವಾಹಾ॑-ಽಲೋಹಿ॒ತಾಯ॒ ಸ್ವಾಹಾ॑ ಮಾಗ್ಂಸ॒ನ್ವತೇ॒ ಸ್ವಾಹಾ॑ ಽಮಾ॒ಗ್ಂ॒ಸಕಾ॑ಯ॒ ಸ್ವಾಹಾ॒ ಸ್ನಾವ॑ಭ್ಯ॒-ಸ್ಸ್ವಾಹಾ᳚ ಽಸ್ನಾ॒ವಕಾ॑ಯ॒ ಸ್ವಾಹಾ᳚ ಸ್ಥ॒ನ್ವತೇ॒ ಸ್ವಾಹಾ॑-ಽನ॒ಸ್ಥಿಕಾ॑ಯ॒ ಸ್ವಾಹಾ॑ ಮಜ್ಜ॒ನ್ವತೇ॒ ಸ್ವಾಹಾ॑ ಽಮ॒ಜ್ಜಕಾ॑ಯ॒ ಸ್ವಾಹಾ॒ ಽಙ್ಗಿನೇ॒ ಸ್ವಾಹಾ॑-ಽನ॒ಙ್ಗಾಯ॒ ಸ್ವಾಹಾ॒ ಽಽತ್ಮನೇ॒ ಸ್ವಾಹಾ ಽನಾ᳚ತ್ಮನೇ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 36 ॥
(ಮ॒ನ॒ಸ್ವಿನೇ॒ ಸ್ವಾಹಾ – ಽನಾ᳚ತ್ಮನೇ॒ ಸ್ವಾಹಾ॒ – ದ್ವೇ ಚ॑) (ಅ. 12)
ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॑ ಯುನಕ್ತು॒ ವಿಷ್ಣು॑ಸ್ತ್ವಾ ಯುನಕ್ತ್ವ॒ಸ್ಯ ಯ॒ಜ್ಞಸ್ಯರ್ಧ್ಯೈ॒ ಮಹ್ಯ॒ಗ್ಂ॒ ಸನ್ನ॑ತ್ಯಾ ಅ॒ಮುಷ್ಮೈ॒ ಕಾಮಾ॒ಯಾ-ಽಽಯು॑ಷೇ ತ್ವಾ ಪ್ರಾ॒ಣಾಯ॑ ತ್ವಾ ಽಪಾ॒ನಾಯ॑ ತ್ವಾ ವ್ಯಾ॒ನಾಯ॑ ತ್ವಾ॒ ವ್ಯು॑ಷ್ಟ್ಯೈ ತ್ವಾ ರ॒ಯ್ಯೈ ತ್ವಾ॒ ರಾಧ॑ಸೇ ತ್ವಾ॒ ಘೋಷಾ॑ಯ ತ್ವಾ॒ ಪೋಷಾ॑ಯ ತ್ವಾ ಽಽರಾದ್ಘೋ॒ಷಾಯ॑ ತ್ವಾ॒ ಪ್ರಚ್ಯು॑ತ್ಯೈ ತ್ವಾ ॥ 37 ॥
(ಕಸ್ತ್ವಾ॒ – ಽಷ್ಟಾತ್ರಿಗ್ಂ॑ಶತ್) (ಅ. 13)
ಅ॒ಗ್ನಯೇ॑ ಗಾಯ॒ತ್ರಾಯ॑ ತ್ರಿ॒ವೃತೇ॒ ರಾಥ॑ನ್ತರಾಯ ವಾಸ॒ನ್ತಾಯಾ॒-ಷ್ಟಾಕ॑ಪಾಲ॒ ಇನ್ದ್ರಾ॑ಯ॒ ತ್ರೈಷ್ಟು॑ಭಾಯ ಪಞ್ಚದ॒ಶಾಯ॒ ಬಾರ್ಹ॑ತಾಯ॒ ಗ್ರೈಷ್ಮಾ॒ಯೈಕಾ॑ದಶಕಪಾಲೋ॒ ವಿಶ್ವೇ᳚ಭ್ಯೋ ದೇ॒ವೇಭ್ಯೋ॒ ಜಾಗ॑ತೇಭ್ಯ-ಸ್ಸಪ್ತದ॒ಶೇಭ್ಯೋ॑ ವೈರೂ॒ಪೇಭ್ಯೋ॒ ವಾರ್ಷಿ॑ಕೇಭ್ಯೋ॒ ದ್ವಾದ॑ಶಕಪಾಲೋ ಮಿ॒ತ್ರಾವರು॑ಣಾಭ್ಯಾ॒-ಮಾನು॑ಷ್ಟುಭಾಭ್ಯಾ-ಮೇಕವಿ॒ಗ್ಂ॒ಶಾಭ್ಯಾಂ᳚-ವೈಁರಾ॒ಜಾಭ್ಯಾಗ್ಂ॑ ಶಾರ॒ದಾಭ್ಯಾ᳚-ಮ್ಪಯ॒ಸ್ಯಾ॑ ಬೃಹ॒ಸ್ಪತ॑ಯೇ॒ ಪಾಙ್ಕ್ತಾ॑ಯ ತ್ರಿಣ॒ವಾಯ॑ ಶಾಕ್ವ॒ರಾಯ॒ ಹೈಮ॑ನ್ತಿಕಾಯ ಚ॒ರು-ಸ್ಸ॑ವಿ॒ತ್ರ ಆ॑ತಿಚ್ಛನ್ದ॒ಸಾಯ॑ ತ್ರಯಸ್ತ್ರಿ॒ಗ್ಂ॒ಶಾಯ॑ ರೈವ॒ತಾಯ॑ ಶೈಶಿ॒ರಾಯ॒ ದ್ವಾದ॑ಶಕಪಾ॒ಲೋ ಽದಿ॑ತ್ಯೈ॒ ವಿಷ್ಣು॑ಪತ್ನ್ಯೈ ಚ॒ರುರ॒ಗ್ನಯೇ॑ ವೈಶ್ವಾನ॒ರಾಯ॒ ದ್ವಾದ॑ಶಕಪಾ॒ಲೋ ಽನು॑ಮತ್ಯೈ ಚ॒ರುಃ ಕಾ॒ಯ ಏಕ॑ಕಪಾಲಃ ॥ 38 ॥
(ಅ॒ಗ್ನಯೇ-ಽದಿ॑ತ್ಯಾ॒ ಅನು॑ಮತ್ಯೈ – ಸ॒ಪ್ತಚ॑ತ್ವಾರಿಗ್ಂಶತ್) (ಅ. 14)
ಯೋ ವಾ ಅ॒ಗ್ನಾವ॒ಗ್ನಿಃ ಪ್ರ॑ಹ್ರಿ॒ಯತೇ॒ ಯಶ್ಚ॒ ಸೋಮೋ॒ ರಾಜಾ॒ ತಯೋ॑ರೇ॒ಷ ಆ॑ತಿ॒ಥ್ಯಂ-ಯಁದ॑ಗ್ನೀಷೋ॒ಮೀಯೋ-ಽಥೈ॒ಷ ರು॒ದ್ರೋ ಯಶ್ಚೀ॒ಯತೇ॒ ಯ-ಥ್ಸಞ್ಚಿ॑ತೇ॒-ಽಗ್ನಾವೇ॒ತಾನಿ॑ ಹ॒ವೀಗ್ಂಷಿ॒ ನ ನಿ॒ರ್ವಪೇ॑ದೇ॒ಷ ಏ॒ವ ರು॒ದ್ರೋ-ಽಶಾ᳚ನ್ತ ಉಪೋ॒ತ್ಥಾಯ॑ ಪ್ರ॒ಜಾ-ಮ್ಪ॒ಶೂನ್ ಯಜ॑ಮಾನಸ್ಯಾ॒ಭಿ ಮ॑ನ್ಯೇತ॒ ಯ-ಥ್ಸಞ್ಚಿ॑ತೇ॒-ಽಗ್ನಾವೇ॒ತಾನಿ॑ ಹ॒ವೀಗ್ಂಷಿ॑ ನಿ॒ರ್ವಪ॑ತಿ ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನಾಸ್ಯ॑ ರು॒ದ್ರೋ-ಽಶಾ᳚ನ್ತ [ರು॒ದ್ರೋ-ಽಶಾ᳚ನ್ತಃ, ಉ॒ಪೋ॒ತ್ಥಾಯ॑] 39
ಉಪೋ॒ತ್ಥಾಯ॑ ಪ್ರ॒ಜಾ-ಮ್ಪ॒ಶೂನ॒ಭಿ ಮ॑ನ್ಯತೇ॒ ದಶ॑ ಹ॒ವೀಗ್ಂಷಿ॑ ಭವನ್ತಿ॒ ನವ॒ ವೈ ಪುರು॑ಷೇ ಪ್ರಾ॒ಣಾ ನಾಭಿ॑ರ್ದಶ॒ಮೀ ಪ್ರಾ॒ಣಾನೇ॒ವ ಯಜ॑ಮಾನೇ ದಧಾ॒ತ್ಯಥೋ॒ ದಶಾ᳚ಖ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜ್ಯೇ॒ವಾನ್ನಾದ್ಯೇ॒ ಪ್ರತಿ॑ ತಿಷ್ಠತ್ಯೃ॒ತುಭಿ॒ರ್ವಾ ಏ॒ಷ ಛನ್ದೋ॑ಭಿ॒-ಸ್ಸ್ತೋಮೈಃ᳚ ಪೃ॒ಷ್ಠೈಶ್ಚೇ॑ತ॒ವ್ಯ॑ ಇತ್ಯಾ॑ಹು॒ರ್ಯದೇ॒ತಾನಿ॑ ಹ॒ವೀಗ್ಂಷಿ॑ ನಿ॒ರ್ವಪ॑ತ್ಯೃ॒ತುಭಿ॑ರೇ॒ವೈನ॒-ಞ್ಛನ್ದೋ॑ಭಿ॒-ಸ್ಸ್ತೋಮೈಃ᳚ ಪೃ॒ಷ್ಠೈಶ್ಚಿ॑ನುತೇ॒ ದಿಶ॑-ಸ್ಸುಷುವಾ॒ಣೇನಾ॑ – [ ] 40
-ಭಿ॒ಜಿತ್ಯಾ॒ ಇತ್ಯಾ॑ಹು॒ರ್ಯದೇ॒ತಾನಿ॑ ಹ॒ವೀಗ್ಂಷಿ॑ ನಿ॒ರ್ವಪ॑ತಿ ದಿ॒ಶಾಮ॒ಭಿಜಿ॑ತ್ಯಾ ಏ॒ತಯಾ॒ ವಾ ಇನ್ದ್ರ॑-ನ್ದೇ॒ವಾ ಅ॑ಯಾಜಯ॒-ನ್ತಸ್ಮಾ॑ದಿನ್ದ್ರಸ॒ವ ಏ॒ತಯಾ॒ ಮನು॑-ಮ್ಮನು॒ಷ್ಯಾ᳚ಸ್ತಸ್ಮಾ᳚-ನ್ಮನುಸ॒ವೋ ಯಥೇನ್ದ್ರೋ॑ ದೇ॒ವಾನಾಂ॒-ಯಁಥಾ॒ ಮನು॑ರ್ಮನು॒ಷ್ಯಾ॑ಣಾಮೇ॒ವ-ಮ್ಭ॑ವತಿ॒ ಯ ಏ॒ವಂ-ವಿಁ॒ದ್ವಾನೇ॒ತಯೇಷ್ಟ್ಯಾ॒ ಯಜ॑ತೇ॒ ದಿಗ್ವ॑ತೀಃ ಪುರೋ-ಽನುವಾ॒ಕ್ಯಾ॑ ಭವನ್ತಿ॒ ಸರ್ವಾ॑ಸಾ-ನ್ದಿ॒ಶಾಮ॒ಭಿಜಿ॑ತ್ಯೈ ॥ 41 ॥
(ಅಶಾ᳚ನ್ತಃ – ಸುಷುವಾ॒ಣೇನೈ – ಕ॑ಚತ್ವಾರಿಗ್ಂಶಚ್ಚ) (ಅ. 15)
ಯಃ ಪ್ರಾ॑ಣ॒ತೋ ನಿ॑ಮಿಷ॒ತೋ ಮ॑ಹಿ॒ತ್ವೈಕ॒ ಇದ್ರಾಜಾ॒ ಜಗ॑ತೋ ಬ॒ಭೂವ॑ । ಯ ಈಶೇ॑ ಅ॒ಸ್ಯ ದ್ವಿ॒ಪದ॒ಶ್ಚತು॑ಷ್ಪದಃ॒ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಪ್ರ॒ಜಾಪ॑ತಯೇ ತ್ವಾ॒ ಜುಷ್ಟ॑-ಙ್ಗೃಹ್ಣಾಮಿ॒ ತಸ್ಯ॑ ತೇ॒ ದ್ಯೌರ್ಮ॑ಹಿ॒ಮಾ ನಖ್ಷ॑ತ್ರಾಣಿ ರೂ॒ಪಮಾ॑ದಿ॒ತ್ಯಸ್ತೇ॒ ತೇಜ॒ಸ್ತಸ್ಮೈ᳚ ತ್ವಾ ಮಹಿ॒ಮ್ನೇ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ॥ 42 ॥
(ಯಃ ಪ್ರಾ॑ಣ॒ತೋ ದ್ಯೌರಾ॑ದಿ॒ತ್ಯೋ᳚ – ಽಷ್ಟಾತ್ರಿಗ್ಂ॑ಶತ್ ) (ಅ. 16)
ಯ ಆ᳚ತ್ಮ॒ದಾ ಬ॑ಲ॒ದಾ ಯಸ್ಯ॒ ವಿಶ್ವ॑ ಉ॒ಪಾಸ॑ತೇ ಪ್ರ॒ಶಿಷಂ॒-ಯಁಸ್ಯ॑ ದೇ॒ವಾಃ । ಯಸ್ಯ॑ ಛಾ॒ಯಾ-ಽಮೃತಂ॒-ಯಁಸ್ಯ॑ ಮೃ॒ತ್ಯುಃ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಪ್ರ॒ಜಾಪ॑ತಯೇ ತ್ವಾ॒ ಜುಷ್ಟ॑-ಙ್ಗೃಹ್ಣಾಮಿ॒ ತಸ್ಯ॑ ತೇ ಪೃಥಿ॒ವೀ ಮ॑ಹಿ॒ಮೌಷ॑ಧಯೋ॒ ವನ॒ಸ್ಪತ॑ಯೋ ರೂ॒ಪಮ॒ಗ್ನಿಸ್ತೇ॒ ತೇಜ॒ಸ್ತಸ್ಮೈ᳚ ತ್ವಾ ಮಹಿ॒ಮ್ನೇ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ॥ 43 ॥
(ಯ ಆ᳚ತ್ಮ॒ದಾಃ ಪೃ॑ಥಿ॒ವ್ಯ॑ಗ್ನಿ-ರೇಕಾ॒ನ್ನಚ॑ತ್ವಾರಿ॒ಗ್ಂ॒ಶತ್) (ಅ. 17)
ಆ ಬ್ರಹ್ಮ॑-ನ್ಬ್ರಾಹ್ಮ॒ಣೋ ಬ್ರ॑ಹ್ಮವರ್ಚ॒ಸೀ ಜಾ॑ಯತಾ॒ಮಾ ಽಸ್ಮಿ-ನ್ರಾ॒ಷ್ಟ್ರೇ ರಾ॑ಜ॒ನ್ಯ॑ ಇಷ॒ವ್ಯ॑-ಶ್ಶೂರೋ॑ ಮಹಾರ॒ಥೋ ಜಾ॑ಯತಾ॒-ನ್ದೋಗ್ಧ್ರೀ॑ಧೇ॒ನುರ್ವೋಢಾ॑ ಽನ॒ಡ್ವಾನಾ॒ಶು-ಸ್ಸಪ್ತಿಃ॒ ಪುರ॑ನ್ಧಿ॒ರ್ಯೋಷಾ॑ ಜಿ॒ಷ್ಣೂ ರ॑ಥೇ॒ಷ್ಠಾ-ಸ್ಸ॒ಭೇಯೋ॒ ಯುವಾ ಽಽಸ್ಯ ಯಜ॑ಮಾನಸ್ಯ ವೀ॒ರೋ ಜಾ॑ಯತಾ-ನ್ನಿಕಾ॒ಮೇನಿ॑ಕಾಮೇ ನಃ ಪ॒ರ್ಜನ್ಯೋ॑ ವರ್ಷತು ಫ॒ಲಿನ್ಯೋ॑ ನ॒ ಓಷ॑ಧಯಃ ಪಚ್ಯನ್ತಾಂ-ಯೋಁಗಖ್ಷೇ॒ಮೋನಃ॑ ಕಲ್ಪತಾಮ್ ॥ 44 ॥
(ಆ ಬ್ರಹ್ಮ॒ – ನ್ನೇಕ॑ಚತ್ವಾರಿಗ್ಂಶತ್ )(ಆ18)
ಆ-ಽಕ್ರಾನ್॑ ವಾ॒ಜೀ ಪೃ॑ಥಿ॒ವೀಮ॒ಗ್ನಿಂ-ಯುಁಜ॑ಮಕೃತ ವಾ॒ಜ್ಯರ್ವಾ ಽಽಕ್ರಾನ್॑ ವಾ॒ಜ್ಯ॑ನ್ತರಿ॑ಖ್ಷಂ-ವಾಁ॒ಯುಂ-ಯುಁಜ॑ಮಕೃತ ವಾ॒ಜ್ಯರ್ವಾ॒ ದ್ಯಾಂ-ವಾಁ॒ಜ್ಯಾ-ಽಕ್ರಗ್ಗ್॑ಸ್ತ॒ ಸೂರ್ಯಂ॒-ಯುಁಜ॑ಮಕೃತ ವಾ॒ಜ್ಯರ್ವಾ॒ ಽಗ್ನಿಸ್ತೇ॑ ವಾಜಿ॒ನ್॒ ಯುಙ್ಙನು॒ ತ್ವಾ ಽಽ ರ॑ಭೇ ಸ್ವ॒ಸ್ತಿ ಮಾ॒ ಸ-ಮ್ಪಾ॑ರಯ ವಾ॒ಯುಸ್ತೇ॑ ವಾಜಿ॒ನ್॒ ಯುಙ್ಙನು॒ ತ್ವಾ ಽಽ ರ॑ಭೇ ಸ್ವ॒ಸ್ತಿ ಮಾ॒ ಸ- [ಸ್ವ॒ಸ್ತಿ ಮಾ॒ ಸಮ್, ಪಾ॒ರ॒ಯಾ॒ ಽಽದಿ॒ತ್ಯಸ್ತೇ॑] 45
-ಮ್ಪಾ॑ರಯಾ ಽಽದಿ॒ತ್ಯಸ್ತೇ॑ ವಾಜಿ॒ನ್॒ ಯುಙ್ಙನು॒ ತ್ವಾ ಽಽ ರ॑ಭೇ ಸ್ವ॒ಸ್ತಿ ಮಾ॒ ಸ-ಮ್ಪಾ॑ರಯ ಪ್ರಾಣ॒ಧೃಗ॑ಸಿ ಪ್ರಾ॒ಣ-ಮ್ಮೇ॑ ದೃಗ್ಂಹ ವ್ಯಾನ॒ಧೃಗ॑ಸಿ ವ್ಯಾ॒ನ-ಮ್ಮೇ॑ ದೃಗ್ಂಹಾ ಽಪಾನ॒ಧೃಗ॑ಸ್ಯಪಾ॒ನ-ಮ್ಮ॑ ದೃಗ್ಂಹ॒ ಚಖ್ಷು॑ರಸಿ॒ ಚಖ್ಷು॒ರ್ಮಯಿ॑ ಧೇಹಿ॒ ಶ್ರೋತ್ರ॑ಮಸಿ॒ ಶ್ರೋತ್ರ॒-ಮ್ಮಯಿ॑ ಧೇ॒ಹ್ಯಾಯು॑ರ॒ಸ್ಯಾಯು॒ರ್ಮಯಿ॑ ಧೇಹಿ ॥ 46 ॥
(ವಾ॒ಯುಸ್ತೇ॑ ವಾಜಿ॒ನ್॒ ಯುಙ್ಙನು॒ ತ್ವಾ ಽಽ ರ॑ಭೇ ಸ್ವ॒ಸ್ತಿ ಮಾ॒ ಸಂ – ತ್ರಿಚ॑ತ್ವಾರಿಗ್ಂಶಚ್ಚ) (ಅ. 19)
ಜಜ್ಞಿ॒ ಬೀಜಂ॒-ವಁರ್ಷ್ಟಾ॑ ಪ॒ರ್ಜನ್ಯಃ॒ ಪಕ್ತಾ॑ ಸ॒ಸ್ಯಗ್ಂ ಸು॑ಪಿಪ್ಪ॒ಲಾ ಓಷ॑ಧಯ-ಸ್ಸ್ವಧಿಚರ॒ಣೇಯಗ್ಂ ಸೂ॑ಪಸದ॒ನೋ᳚-ಽಗ್ನಿ-ಸ್ಸ್ವ॑ದ್ಧ್ಯ॒ಖ್ಷಮ॒ನ್ತರಿ॑ಖ್ಷಗ್ಂಸುಪಾ॒ವಃ ಪವ॑ಮಾನ-ಸ್ಸೂಪಸ್ಥಾ॒ನಾ ದ್ಯೌ-ಶ್ಶಿ॒ವಮ॒ಸೌ ತಪ॑ನ್ ಯಥಾಪೂ॒ರ್ವಮ॑ಹೋರಾ॒ತ್ರೇ ಪ॑ಞ್ಚದ॒ಶಿನೋ᳚ ಽರ್ಧಮಾ॒ಸಾ-ಸ್ತ್ರಿ॒ಗ್ಂ॒ಶಿನೋ॒ ಮಾಸಾಃ᳚ ಕೢ॒ಪ್ತಾ ಋ॒ತವ॑-ಶ್ಶಾ॒ನ್ತ-ಸ್ಸಂ॑ವಁಥ್ಸ॒ರಃ ॥ 47 ॥
(ಜಜ್ಞಿ॒ ಬೀಜ॒ – ಮೇಕ॑ತ್ರಿಗ್ಂಶತ್) (ಅ. 20)
ಆ॒ಗ್ನೇ॒ಯೋ᳚-ಽಷ್ಟಾಕ॑ಪಾಲ-ಸ್ಸೌ॒ಮ್ಯಶ್ಚ॒ರು-ಸ್ಸಾ॑ವಿ॒ತ್ರೋ᳚-ಽಷ್ಟಾಕ॑ಪಾಲಃ ಪೌ॒ಷ್ಣಶ್ಚ॒ರೂ ರೌ॒ದ್ರಶ್ಚ॒ರುರ॒ಗ್ನಯೇ॑ ವೈಶ್ವಾನ॒ರಾಯ॒ ದ್ವಾದ॑ಶಕಪಾಲೋ ಮೃಗಾಖ॒ರೇ ಯದಿ॒ ನಾ-ಽಽಗಚ್ಛೇ॑-ದ॒ಗ್ನಯೇ-ಽಗ್ಂ॑ಹೋ॒ಮುಚೇ॒-ಽಷ್ಟಾಕ॑ಪಾಲ-ಸ್ಸೌ॒ರ್ಯ-ಮ್ಪಯೋ॑ ವಾಯ॒ವ್ಯ॑ ಆಜ್ಯ॑ಭಾಗಃ ॥ 48 ॥
(ಆ॒ಗ್ನೇ॒ಯ – ಶ್ಚತು॑ರ್ವಿಗ್ಂಶತಿಃ) (ಅ. 21)
ಅ॒ಗ್ನಯೇ-ಽಗ್ಂ॑ಹೋ॒ಮುಚೇ॒-ಽಷ್ಟಾಕ॑ಪಾಲ॒ ಇನ್ದ್ರಾ॑ಯಾ-ಽಗ್ಂಹೋ॒ಮುಚ॒ ಏಕಾ॑ದಶಕಪಾಲೋ ಮಿ॒ತ್ರಾವರು॑ಣಾಭ್ಯಾ-ಮಾಗೋ॒ಮುಗ್ಭ್ಯಾ᳚-ಮ್ಪಯ॒ಸ್ಯಾ॑ ವಾಯೋಸಾವಿ॒ತ್ರ ಆ॑ಗೋ॒ಮುಗ್ಭ್ಯಾ᳚-ಞ್ಚ॒ರುರ॒ಶ್ವಿಭ್ಯಾ॑-ಮಾಗೋ॒ಮುಗ್ಭ್ಯಾ᳚-ನ್ಧಾ॒ನಾ ಮ॒ರುದ್ಭ್ಯ॑ ಏನೋ॒ಮುಗ್ಭ್ಯ॑-ಸ್ಸ॒ಪ್ತಕ॑ಪಾಲೋ॒ ವಿಶ್ವೇ᳚ಭ್ಯೋ ದೇ॒ವೇಭ್ಯ॑ ಏನೋ॒ಮುಗ್ಭ್ಯೋ॒ ದ್ವಾದ॑ಶಕಪಾ॒ಲೋ ಽನು॑ಮತ್ಯೈ ಚ॒ರುರ॒ಗ್ನಯೇ॑ ವೈಶ್ವಾನ॒ರಾಯ॒ ದ್ವಾದ॑ಶಕಪಾಲೋ॒ ದ್ಯಾವಾ॑ಪೃಥಿ॒ವೀಭ್ಯಾ॑-ಮಗ್ಂಹೋ॒ಮುಗ್ಭ್ಯಾ᳚-ನ್ದ್ವಿಕಪಾ॒ಲಃ ॥ 49 ॥
(ಅ॒ಗ್ನಯೇ-ಽಗ್ಂ॑ಹೋ॒ಮುಚೇ᳚ – ತ್ರಿ॒ಗ್ಂ॒ಶತ್) (ಅ. 22)
ಅ॒ಗ್ನಯೇ॒ ಸಮ॑ನಮ-ತ್ಪೃಥಿ॒ವ್ಯೈ ಸಮ॑ನಮ॒ದ್ಯಥಾ॒-ಽಗ್ನಿಃ ಪೃ॑ಥಿ॒ವ್ಯಾ ಸ॒ಮನ॑ಮದೇ॒ವ-ಮ್ಮಹ್ಯ॑-ಮ್ಭ॒ದ್ರಾ-ಸ್ಸನ್ನ॑ತಯ॒-ಸ್ಸ-ನ್ನ॑ಮನ್ತು ವಾ॒ಯವೇ॒ ಸಮ॑ನಮದ॒ನ್ತರಿ॑ಖ್ಷಾಯ॒ ಸಮ॑ನಮ॒ದ್ಯಥಾ॑ ವಾ॒ಯುರ॒ನ್ತರಿ॑ಖ್ಷೇಣ॒ ಸೂರ್ಯಾ॑ಯ॒ ಸಮ॑ನಮದ್ದಿ॒ವೇ ಸಮ॑ನಮ॒ದ್ಯಥಾ॒ ಸೂರ್ಯೋ॑ ದಿ॒ವಾ ಚ॒ನ್ದ್ರಮ॑ಸೇ॒ ಸಮ॑ನಮ॒ನ್ನಖ್ಷ॑ತ್ರೇಭ್ಯ॒-ಸ್ಸಮ॑ನಮ॒ದ್ಯಥಾ॑ ಚ॒ನ್ದ್ರಮಾ॒ ನಖ್ಷ॑ತ್ರೈ॒ರ್ವರು॑ಣಾಯ॒ ಸಮ॑ನಮದ॒ದ್ಭ್ಯ-ಸ್ಸಮ॑ನಮ॒-ದ್ಯಥಾ॒ [-ಸ್ಸಮ॑ನಮ॒-ದ್ಯಥಾ᳚, ವರು॑ಣೋ॒-ಽದ್ಭಿ-ಸ್ಸಾಮ್ನೇ॒] 50
ವರು॑ಣೋ॒-ಽದ್ಭಿ-ಸ್ಸಾಮ್ನೇ॒ ಸಮ॑ನಮದೃ॒ಚೇ ಸಮ॑ನಮ॒ದ್ಯಥಾ॒ ಸಾಮ॒ರ್ಚಾ ಬ್ರಹ್ಮ॑ಣೇ॒ ಸಮ॑ನಮ-ತ್ಖ್ಷ॒ತ್ರಾಯ॒ ಸಮ॑ನಮ॒ದ್ಯಥಾ॒ ಬ್ರಹ್ಮ॑ ಖ್ಷ॒ತ್ರೇಣ॒ ರಾಜ್ಞೇ॒ ಸಮ॑ನಮ-ದ್ವಿ॒ಶೇ ಸಮ॑ನಮ॒ದ್ಯಥಾ॒ ರಾಜಾ॑ ವಿ॒ಶಾ ರಥಾ॑ಯ॒-ಸ್ಸಮ॑ನಮ॒ದಶ್ವೇ᳚ಭ್ಯ॒-ಸ್ಸಮ॑ನಮ॒ದ್ಯಥಾ॒ ರಥೋ-ಽಶ್ವೈಃ᳚ ಪ್ರ॒ಜಾಪ॑ತಯೇ॒ ಸಮ॑ನಮ-ದ್ಭೂ॒ತೇಭ್ಯ॒-ಸ್ಸಮ॑ನಮ॒ದ್ಯಥಾ᳚ ಪ್ರ॒ಜಾಪ॑ತಿರ್ಭೂ॒ತೈ-ಸ್ಸ॒ಮನ॑ಮದೇ॒ವ-ಮ್ಮಹ್ಯ॑-ಮ್ಭ॒ದ್ರಾ-ಸ್ಸನ್ನ॑ತಯ॒-ಸ್ಸ-ನ್ನ॑ಮನ್ತು ॥ 51 ॥
(ಅ॒ದ್ಭ್ಯ-ಸ್ಸಮ॑ನಮ॒ದ್ಯಥಾ॒-ಮಹ್ಯಂ॑-ಚ॒ತ್ವಾರಿ॑ ಚ) (ಅ. 23)
ಯೇ ತೇ॒ ಪನ್ಥಾ॑ನ-ಸ್ಸವಿತಃ ಪೂ॒ರ್ವ್ಯಾಸೋ॑-ಽರೇ॒ಣವೋ॒ ವಿತ॑ತಾ ಅ॒ನ್ತರಿ॑ಖ್ಷೇ । ತೇಭಿ॑ರ್ನೋ ಅ॒ದ್ಯ ಪ॒ಥಿಭಿ॑-ಸ್ಸು॒ಗೇಭೀ॒ ರಖ್ಷಾ॑ ಚ ನೋ॒ ಅಧಿ॑ ಚ ದೇವ ಬ್ರೂಹಿ ॥ ನಮೋ॒-ಽಗ್ನಯೇ॑ ಪೃಥಿವಿ॒ಖ್ಷಿತೇ॑ ಲೋಕ॒ಸ್ಪೃತೇ॑ ಲೋ॒ಕಮ॒ಸ್ಮೈ ಯಜ॑ಮಾನಾಯ ದೇಹಿ॒ ನಮೋ॑ ವಾ॒ಯವೇ᳚-ಽನ್ತರಿಖ್ಷ॒ಖ್ಷಿತೇ॑ ಲೋಕ॒ಸ್ಪೃತೇ॑ ಲೋ॒ಕಮ॒ಸ್ಮೈ ಯಜ॑ಮಾನಾಯ ದೇಹಿ॒ ನಮ॒-ಸ್ಸೂರ್ಯಾ॑ಯ ದಿವಿ॒ಖ್ಷಿತೇ॑ ಲೋಕ॒ಸ್ಪೃತೇ॑ ಲೋ॒ಕಮ॒ಸ್ಮೈ ಯಜ॑ಮಾನಾಯ ದೇಹಿ ॥ 52 ॥
(ಯೇ ತೇ॒ – ಚತು॑ಶ್ಚತ್ವಾರಿಗ್ಂಶತ್) (ಅ. 24)
ಯೋ ವಾ ಅಶ್ವ॑ಸ್ಯ॒ ಮೇದ್ಧ್ಯ॑ಸ್ಯ॒ ಶಿರೋ॒ ವೇದ॑ ಶೀರ್ಷ॒ಣ್ವಾ-ನ್ಮೇದ್ಧ್ಯೋ॑ ಭವತ್ಯು॒ಷಾ ವಾ ಅಶ್ವ॑ಸ್ಯ॒ ಮೇದ್ಧ್ಯ॑ಸ್ಯ॒ ಶಿರ॒-ಸ್ಸೂರ್ಯ॒ಶ್ಚಖ್ಷು॒ರ್ವಾತಃ॑ ಪ್ರಾ॒ಣಶ್ಚ॒ನ್ದ್ರಮಾ॒-ಶ್ಶ್ರೋತ್ರ॒-ನ್ದಿಶಃ॒ ಪಾದಾ॑ ಅವಾನ್ತರದಿ॒ಶಾಃ ಪರ್ಶ॑ವೋ-ಽಹೋರಾ॒ತ್ರೇ ನಿ॑ಮೇ॒ಷೋ᳚-ಽರ್ಧಮಾ॒ಸಾಃ ಪರ್ವಾ॑ಣಿ॒ ಮಾಸಾ᳚-ಸ್ಸ॒ಧಾನ್ನಾ᳚ನ್ಯೃ॒ತವೋ-ಽಙ್ಗಾ॑ನಿ ಸಂವಁಥ್ಸ॒ರ ಆ॒ತ್ಮಾ ರ॒ಶ್ಮಯಃ॒ ಕೇಶಾ॒ ನಖ್ಷ॑ತ್ರಾಣಿ ರೂ॒ಪ-ನ್ತಾರ॑ಕಾ ಅ॒ಸ್ಥಾನಿ॒ ನಭೋ॑ ಮಾ॒ಗ್ಂ॒ಸಾನ್ಯೋಷ॑ಧಯೋ॒ ಲೋಮಾ॑ನಿ॒ ವನ॒ಸ್ಪತ॑ಯೋ॒ ವಾಲಾ॑ ಅ॒ಗ್ನಿರ್ಮುಖಂ॑-ವೈಁಶ್ವಾನ॒ರೋ ವ್ಯಾತ್ತಗ್ಂ॑ [ವ್ಯಾತ್ತ᳚ಮ್, ಸ॒ಮು॒ದ್ರ ಉ॒ದರ॑ಮ॒ನ್ತರಿ॑ಖ್ಷ-] 53
ಸಮು॒ದ್ರ ಉ॒ದರ॑ಮ॒ನ್ತರಿ॑ಖ್ಷ-ಮ್ಪಾ॒ಯು-ರ್ದ್ಯಾವಾ॑ಪೃಥಿ॒ವೀ ಆ॒ಣ್ಡೌ ಗ್ರಾವಾ॒ ಶೇಪ॒-ಸ್ಸೋಮೋ॒ ರೇತೋ॒ ಯಜ್ಜ॑ಞ್ಜ॒ಭ್ಯತೇ॒ ತದ್ವಿ ದ್ಯೋ॑ತತೇ॒ ಯದ್ವಿ॑ಧೂನು॒ತೇ ತ-ಥ್ಸ್ತ॑ನಯತಿ॒ ಯನ್ಮೇಹ॑ತಿ॒ ತದ್ವ॑ರ್ಷತಿ॒ ವಾಗೇ॒ವಾಸ್ಯ॒ ವಾಗಹ॒ರ್ವಾ ಅಶ್ವ॑ಸ್ಯ॒ ಜಾಯ॑ಮಾನಸ್ಯ ಮಹಿ॒ಮಾ ಪು॒ರಸ್ತಾ᳚ಜ್ಜಾಯತೇ॒ ರಾತ್ರಿ॑ರೇನ-ಮ್ಮಹಿ॒ಮಾ ಪ॒ಶ್ಚಾದನು॑ ಜಾಯತ ಏ॒ತೌ ವೈ ಮ॑ಹಿ॒ಮಾನಾ॒-ವಶ್ವ॑ಮ॒ಭಿತ॒-ಸ್ಸ-ಮ್ಬ॑ಭೂವತು॒ರ್॒ಹಯೋ॑ ದೇ॒ವಾನ॑ವಹ॒ ದರ್ವಾ-ಽಸು॑ರಾನ್ ವಾ॒ಜೀ ಗ॑ನ್ಧ॒ರ್ವಾ-ನಶ್ವೋ॑ ಮನು॒ಷ್ಯಾ᳚ನ್-ಥ್ಸಮು॒ದ್ರೋ ವಾ ಅಶ್ವ॑ಸ್ಯ॒ ಯೋನಿ॑-ಸ್ಸಮು॒ದ್ರೋ ಬನ್ಧುಃ॑ ॥ 54 ॥
(ವ್ಯಾತ್ತ॑ – ಮವಹ॒-ದ್- ದ್ವಾದ॑ಶ ಚ ) (ಅ. 25)
(ಗಾವೋ॒ – ಗಾವ॒-ಸ್ಸಿಷಾ॑ಸನ್ತೀಃ- ಪ್ರಥ॒ಮೇ ಮಾ॒ಸಿ – ಸ॑ಮಾ॒ನ್ಯೋ॑ – ಯದಿ॒ ಸೋಮೌ॑- ಷಡ॒ಹೈ – ರು॒-ಥ್ಸೃಜ್ಯಾ(3)ನ್ – ದೇ॒ವಾನಾ॑ – ಮ॒ರ್ಕ್ಯೇ॑ಣ॒ – ಚರ್ಮಾ-ಽವ॑ – ಪೃಥಿ॒ವ್ಯೈ – ದ॒ತ್ವತೇ॒ – ಕಸ್ತ್ವಾ॒ – ಽಗ್ನಯೇ॒ – ಯೋ ವೈ – ಯಃ ಪ್ರಾ॑ಣ॒ತೋ – ಯ ಆ᳚ತ್ಮ॒ದಾ – ಆ ಬ್ರಹ್ಮ॒ – ನ್ನಾ-ಽಕ್ರಾ॒ನ್ – ಜಜ್ಞಿ॒ ಬೀಜ॑ – ಮಾಗ್ನೇ॒ಯೋ᳚-ಽಷ್ಟಾಕ॑ಪಾಲೋ॒ – ಽಗ್ನಯೇ-ಽಗ್ಂ॑ಹೋ॒ಮುಚೇ॒-ಽಷ್ಟಾಕ॑ಪಾಲೋ॒ – ಽಗ್ನಯೇ॒ಸಮ॑ನಮ॒–ದ್ಯೇ ತೇ॒ ಪನ್ಥಾ॑ನೋ॒ – ಯೋ ವಾ ಅಶ್ವ॑ಸ್ಯ॒ಮೇದ್ಧ್ಯ॑ಸ್ಯ॒ ಶಿರಃ॒ – ಪಞ್ಚ॑ವಿಗ್ಂಶತಿಃ)
(ಗಾವಃ॑ – ಸಮಾ॒ನ್ಯಃ॑ – ಸವ॑ನಮಷ್ಟಾ॒ಭಿ – ರ್ವಾ ಏ॒ತೇ ದೇ॒ವಕೃ॑ತಞ್ಚಾ – ಽಭಿ॒ಜಿತ್ಯಾ॒ ಇತ್ಯಾ॑ಹು॒ -ರ್ವರು॑ಣೋ॒-ಽದ್ಭಿ-ಸ್ಸಾಮ್ನೇ॒ – ಚತು॑ಷ್ ಪಞ್ಚಾ॒ಸತ್)
(ಗಾವೋ॒, ಯೋನಿ॑ ಸ್ಸಮು॒ದ್ರೋ ಬನ್ಧುಃ॑)
(ಪ್ರ॒ಜನನ॑ಗ್ಂ – ಸಾದ್ಯಾಃ – ಪ್ರ॒ಜವಂ॒ – ಬೃಹ॒ಸ್ಪತಿ॒ – ರ್ಗಾವಃ – ಪಞ್ಚ॑) (7)
(ಇ॒ಷೇ, ವಾ॑ಯ॒ವ್ಯ॑, ಮ್ಪ್ರ॒ಜಾಪ॑ತಿ, ರ್ಯುಞ್ಜಾ॒ನಾ, ಸ್ಸಾ॑ವಿ॒ತ್ರಾಣಿ॑, ಪ್ರಾಚೀನ॑ವಗ್ಂಶ, ಮ್ಪ್ರ॒ಜನ॑ನಗ್ಂ, ಸಪ್ತ) (7)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ಪಞ್ಚಮಃ ಪ್ರಶ್ನ-ಸ್ಸಮಾಪ್ತಃ ॥
॥ ಇತಿ ತೈತ್ತಿರೀಯಸಂಹಿತಾ ಸಮಾಪ್ತಾ ॥