വിഘ്നേശ വിഘ്നചയഖംഡനനാമധേയ
ശ്രീശംകരാത്മജ സുരാധിപവംദ്യപാദ ।
ദുര്ഗാമഹാവ്രതഫലാഖിലമംഗളാത്മന്
വിഘ്നം മമാപഹര സിദ്ധിവിനായക ത്വമ് ॥ 1 ॥
സത്പദ്മരാഗമണിവര്ണശരീരകാംതിഃ
ശ്രീസിദ്ധിബുദ്ധിപരിചര്ചിതകുംകുമശ്രീഃ ।
വക്ഷഃസ്ഥലേ വലയിതാതിമനോജ്ഞശുംഡോ
വിഘ്നം മമാപഹര സിദ്ധിവിനായക ത്വമ് ॥ 2 ॥
പാശാംകുശാബ്ജപരശൂംശ്ച ദധച്ചതുര്ഭി-
-ര്ദോര്ഭിശ്ച ശോണകുസുമസ്രഗുമാംഗജാതഃ ।
സിംദൂരശോഭിതലലാടവിധുപ്രകാശോ
വിഘ്നം മമാപഹര സിദ്ധിവിനായക ത്വമ് ॥ 3 ॥
കാര്യേഷു വിഘ്നചയഭീതവിരിംചമുഖ്യൈഃ
സംപൂജിതഃ സുരവരൈരപി മോദകാദ്യൈഃ ।
സര്വേഷു ച പ്രഥമമേവ സുരേഷു പൂജ്യോ
വിഘ്നം മമാപഹര സിദ്ധിവിനായക ത്വമ് ॥ 4 ॥
ശീഘ്രാംചനസ്ഖലനതുംഗരവോര്ധ്വകംഠ-
-സ്ഥൂലേംദുരുദ്രഗണഹാസിതദേവസംഘഃ ।
ശൂര്പശ്രുതിശ്ച പൃഥുവര്തുലതുംഗതുംദോ
വിഘ്നം മമാപഹര സിദ്ധിവിനായക ത്വമ് ॥ 5 ॥
യജ്ഞോപവീതപദലംഭിതനാഗരാജ
മാസാദിപുണ്യദദൃശീകൃതൃക്ഷരാജഃ ।
ഭക്താഭയപ്രദ ദയാലയ വിഘ്നരാജ
വിഘ്നം മമാപഹര സിദ്ധിവിനായക ത്വമ് ॥ 6 ॥
സദ്രത്നസാരതതിരാജിതസത്കിരീടഃ
കൌസുംഭചാരുവസനദ്വയ ഊര്ജിതശ്രീഃ ।
സര്വത്രമംഗളകരസ്മരണപ്രതാപോ
വിഘ്നം മമാപഹര സിദ്ധിവിനായക ത്വമ് ॥ 7 ॥
ദേവാംതകാദ്യസുരഭീതസുരാര്തിഹര്താ
വിജ്ഞാനബോധനവരേണ തമോഽപഹര്താ ।
ആനംദിതത്രിഭുവനേശ കുമാരബംധോ
വിഘ്നം മമാപഹര സിദ്ധിവിനായക ത്വമ് ॥ 8 ॥
ഇതി ശ്രീമുദ്ഗലപുരാണേ ശ്രീസിദ്ധിവിനായക സ്തോത്രം സംപൂര്ണമ് ।