അഷ്ടാവക്ര ഉവാച ॥
അവിനാശിനമാത്മാനമേകം വിജ്ഞായ തത്ത്വതഃ ।
തവാത്മജ്ഞാനസ്യ ധീരസ്യ കഥമര്ഥാര്ജനേ രതിഃ ॥ 3-1॥
ആത്മാജ്ഞാനാദഹോ പ്രീതിര്വിഷയഭ്രമഗോചരേ ।
ശുക്തേരജ്ഞാനതോ ലോഭോ യഥാ രജതവിഭ്രമേ ॥ 3-2॥
വിശ്വം സ്ഫുരതി യത്രേദം തരംഗാ ഇവ സാഗരേ ।
സോഽഹമസ്മീതി വിജ്ഞായ കിം ദീന ഇവ ധാവസി ॥ 3-3॥
ശ്രുത്വാപി ശുദ്ധചൈതന്യ ആത്മാനമതിസുംദരമ് ।
ഉപസ്ഥേഽത്യംതസംസക്തോ മാലിന്യമധിഗച്ഛതി ॥ 3-4॥
സര്വഭൂതേഷു ചാത്മാനം സര്വഭൂതാനി ചാത്മനി ।
മുനേര്ജാനത ആശ്ചര്യം മമത്വമനുവര്തതേ ॥ 3-5॥
ആസ്ഥിതഃ പരമാദ്വൈതം മോക്ഷാര്ഥേഽപി വ്യവസ്ഥിതഃ ।
ആശ്ചര്യം കാമവശഗോ വികലഃ കേലിശിക്ഷയാ ॥ 3-6॥
ഉദ്ഭൂതം ജ്ഞാനദുര്മിത്രമവധാര്യാതിദുര്ബലഃ ।
ആശ്ചര്യം കാമമാകാംക്ഷേത് കാലമംതമനുശ്രിതഃ ॥ 3-7॥
ഇഹാമുത്ര വിരക്തസ്യ നിത്യാനിത്യവിവേകിനഃ ।
ആശ്ചര്യം മോക്ഷകാമസ്യ മോക്ഷാദ് ഏവ വിഭീഷികാ ॥ 3-8॥
ധീരസ്തു ഭോജ്യമാനോഽപി പീഡ്യമാനോഽപി സര്വദാ ।
ആത്മാനം കേവലം പശ്യന് ന തുഷ്യതി ന കുപ്യതി ॥ 3-9॥
ചേഷ്ടമാനം ശരീരം സ്വം പശ്യത്യന്യശരീരവത് ।
സംസ്തവേ ചാപി നിംദായാം കഥം ക്ഷുഭ്യേത് മഹാശയഃ ॥ 3-10॥
മായാമാത്രമിദം വിശ്വം പശ്യന് വിഗതകൌതുകഃ ।
അപി സന്നിഹിതേ മൃത്യൌ കഥം ത്രസ്യതി ധീരധീഃ ॥ 3-11॥
നിഃസ്പൃഹം മാനസം യസ്യ നൈരാശ്യേഽപി മഹാത്മനഃ ।
തസ്യാത്മജ്ഞാനതൃപ്തസ്യ തുലനാ കേന ജായതേ ॥ 3-12॥
സ്വഭാവാദ് ഏവ ജാനാനോ ദൃശ്യമേതന്ന കിംചന ।
ഇദം ഗ്രാഹ്യമിദം ത്യാജ്യം സ കിം പശ്യതി ധീരധീഃ ॥ 3-13॥
അംതസ്ത്യക്തകഷായസ്യ നിര്ദ്വംദ്വസ്യ നിരാശിഷഃ ।
യദൃച്ഛയാഗതോ ഭോഗോ ന ദുഃഖായ ന തുഷ്ടയേ ॥ 3-14॥