ഭവാനി സ്തോതും ത്വാം പ്രഭവതി ചതുര്ഭിര്ന വദനൈഃ
പ്രജാനാമീശാനസ്ത്രിപുരമഥനഃ പംചഭിരപി ।
ന ഷഡ്ഭിഃ സേനാനീര്ദശശതമുഖൈരപ്യഹിപതിഃ
തദാന്യേഷാം കേഷാം കഥയ കഥമസ്മിന്നവസരഃ ॥ 1॥
ഘൃതക്ഷീരദ്രാക്ഷാമധുമധുരിമാ കൈരപി പദൈഃ
വിശിഷ്യാനാഖ്യേയോ ഭവതി രസനാമാത്ര വിഷയഃ ।
തഥാ തേ സൌംദര്യം പരമശിവദൃങ്മാത്രവിഷയഃ
കഥംകാരം ബ്രൂമഃ സകലനിഗമാഗോചരഗുണേ ॥ 2॥
മുഖേ തേ താംബൂലം നയനയുഗളേ കജ്ജലകലാ
ലലാടേ കാശ്മീരം വിലസതി ഗളേ മൌക്തികലതാ ।
സ്ഫുരത്കാംചീ ശാടീ പൃഥുകടിതടേ ഹാടകമയീ
ഭജാമി ത്വാം ഗൌരീം നഗപതികിശോരീമവിരതമ് ॥ 3॥
വിരാജന്മംദാരദ്രുമകുസുമഹാരസ്തനതടീ
നദദ്വീണാനാദശ്രവണവിലസത്കുംഡലഗുണാ
നതാംഗീ മാതംഗീ രുചിരഗതിഭംഗീ ഭഗവതീ
സതീ ശംഭോരംഭോരുഹചടുലചക്ഷുര്വിജയതേ ॥ 4॥
നവീനാര്കഭ്രാജന്മണികനകഭൂഷണപരികരൈഃ
വൃതാംഗീ സാരംഗീരുചിരനയനാംഗീകൃതശിവാ ।
തഡിത്പീതാ പീതാംബരലലിതമംജീരസുഭഗാ
മമാപര്ണാ പൂര്ണാ നിരവധിസുഖൈരസ്തു സുമുഖീ ॥ 5॥
ഹിമാദ്രേഃ സംഭൂതാ സുലലിതകരൈഃ പല്ലവയുതാ
സുപുഷ്പാ മുക്താഭിര്ഭ്രമരകലിതാ ചാലകഭരൈഃ ।
കൃതസ്ഥാണുസ്ഥാനാ കുചഫലനതാ സൂക്തിസരസാ
രുജാം ഹംത്രീ ഗംത്രീ വിലസതി ചിദാനംദലതികാ ॥ 6॥
സപര്ണാമാകീര്ണാം കതിപയഗുണൈഃ സാദരമിഹ
ശ്രയംത്യന്യേ വല്ലീം മമ തു മതിരേവം വിലസതി ।
അപര്ണൈകാ സേവ്യാ ജഗതി സകലൈര്യത്പരിവൃതഃ
പുരാണോഽപി സ്ഥാണുഃ ഫലതി കില കൈവല്യപദവീമ് ॥ 7॥
വിധാത്രീ ധര്മാണാം ത്വമസി സകലാമ്നായജനനീ
ത്വമര്ഥാനാം മൂലം ധനദനമനീയാംഘ്രികമലേ ।
ത്വമാദിഃ കാമാനാം ജനനി കൃതകംദര്പവിജയേ
സതാം മുക്തേര്ബീജം ത്വമസി പരമബ്രഹ്മമഹിഷീ ॥ 8॥
പ്രഭൂതാ ഭക്തിസ്തേ യദപി ന മമാലോലമനസഃ
ത്വയാ തു ശ്രീമത്യാ സദയമവലോക്യോഽഹമധുനാ ।
പയോദഃ പാനീയം ദിശതി മധുരം ചാതകമുഖേ
ഭൃശം ശംകേ കൈര്വാ വിധിഭിരനുനീതാ മമ മതിഃ ॥ 9॥
കൃപാപാംഗാലോകം വിതര തരസാ സാധുചരിതേ
ന തേ യുക്തോപേക്ഷാ മയി ശരണദീക്ഷാമുപഗതേ ।
ന ചേദിഷ്ടം ദദ്യാദനുപദമഹോ കല്പലതികാ
വിശേഷഃ സാമാന്യൈഃ കഥമിതരവല്ലീപരികരൈഃ ॥ 10॥
മഹാംതം വിശ്വാസം തവ ചരണപംകേരുഹയുഗേ
നിധായാന്യന്നൈവാശ്രിതമിഹ മയാ ദൈവതമുമേ ।
തഥാപി ത്വച്ചേതോ യദി മയി ന ജായേത സദയം
നിരാലംബോ ലംബോദരജനനി കം യാമി ശരണമ് ॥ 11॥
അയഃ സ്പര്ശേ ലഗ്നം സപദി ലഭതേ ഹേമപദവീം
യഥാ രഥ്യാപാഥഃ ശുചി ഭവതി ഗംഗൌഘമിലിതമ് ।
തഥാ തത്തത്പാപൈരതിമലിനമംതര്മമ യദി
ത്വയി പ്രേമ്ണാസക്തം കഥമിവ ന ജായേത വിമലമ് ॥ 12॥
ത്വദന്യസ്മാദിച്ഛാവിഷയഫലലാഭേ ന നിയമഃ
ത്വമര്ഥാനാമിച്ഛാധികമപി സമര്ഥാ വിതരണേ ।
ഇതി പ്രാഹുഃ പ്രാംചഃ കമലഭവനാദ്യാസ്ത്വയി മനഃ
ത്വദാസക്തം നക്തം ദിവമുചിതമീശാനി കുരു തത് ॥ 13॥
സ്ഫുരന്നാനാരത്നസ്ഫടികമയഭിത്തിപ്രതിഫല
ത്ത്വദാകാരം ചംചച്ഛശധരകലാസൌധശിഖരമ് ।
മുകുംദബ്രഹ്മേംദ്രപ്രഭൃതിപരിവാരം വിജയതേ
തവാഗാരം രമ്യം ത്രിഭുവനമഹാരാജഗൃഹിണി ॥ 14॥
നിവാസഃ കൈലാസേ വിധിശതമഖാദ്യാഃ സ്തുതികരാഃ
കുടുംബം ത്രൈലോക്യം കൃതകരപുടഃ സിദ്ധിനികരഃ ।
മഹേശഃ പ്രാണേശസ്തദവനിധരാധീശതനയേ
ന തേ സൌഭാഗ്യസ്യ ക്വചിദപി മനാഗസ്തി തുലനാ ॥ 15॥
വൃഷോ വൃദ്ധോ യാനം വിഷമശനമാശാ നിവസനം
ശ്മശാനം ക്രീഡാഭൂര്ഭുജഗനിവഹോ ഭൂഷണവിധിഃ
സമഗ്രാ സാമഗ്രീ ജഗതി വിദിതൈവ സ്മരരിപോഃ
യദേതസ്യൈശ്വര്യം തവ ജനനി സൌഭാഗ്യമഹിമാ ॥ 16॥
അശേഷബ്രഹ്മാംഡപ്രലയവിധിനൈസര്ഗികമതിഃ
ശ്മശാനേഷ്വാസീനഃ കൃതഭസിതലേപഃ പശുപതിഃ ।
ദധൌ കംഠേ ഹാലാഹലമഖിലഭൂഗോലകൃപയാ
ഭവത്യാഃ സംഗത്യാഃ ഫലമിതി ച കല്യാണി കലയേ ॥ 17॥
ത്വദീയം സൌംദര്യം നിരതിശയമാലോക്യ പരയാ
ഭിയൈവാസീദ്ഗംഗാ ജലമയതനുഃ ശൈലതനയേ ।
തദേതസ്യാസ്തസ്മാദ്വദനകമലം വീക്ഷ്യ കൃപയാ
പ്രതിഷ്ഠാമാതന്വന്നിജശിരസിവാസേന ഗിരിശഃ ॥ 18॥
വിശാലശ്രീഖംഡദ്രവമൃഗമദാകീര്ണഘുസൃണ
പ്രസൂനവ്യാമിശ്രം ഭഗവതി തവാഭ്യംഗസലിലമ് ।
സമാദായ സ്രഷ്ടാ ചലിതപദപാംസൂന്നിജകരൈഃ
സമാധത്തേ സൃഷ്ടിം വിബുധപുരപംകേരുഹദൃശാമ് ॥ 19॥
വസംതേ സാനംദേ കുസുമിതലതാഭിഃ പരിവൃതേ
സ്ഫുരന്നാനാപദ്മേ സരസി കലഹംസാലിസുഭഗേ ।
സഖീഭിഃ ഖേലംതീം മലയപവനാംദോലിതജലേ
സ്മരേദ്യസ്ത്വാം തസ്യ ജ്വരജനിതപീഡാപസരതി ॥ 20॥
॥ ഇതി ശ്രീമച്ഛംകരാചാര്യവിരചിതാ ആനംദലഹരീ സംപൂര്ണാ ॥