അയി സബല മുരാരേ പാണിജാനുപ്രചാരൈഃ
കിമപി ഭവനഭാഗാന് ഭൂഷയംതൌ ഭവംതൌ ।
ചലിതചരണകംജൌ മംജുമംജീരശിംജാ-
ശ്രവണകുതുകഭാജൌ ചേരതുശ്ചാരുവേഗാത് ॥1॥
മൃദു മൃദു വിഹസംതാവുന്മിഷദ്ദംതവംതൌ
വദനപതിതകേശൌ ദൃശ്യപാദാബ്ജദേശൌ ।
ഭുജഗലിതകരാംതവ്യാലഗത്കംകണാംകൌ
മതിമഹരതമുച്ചൈഃ പശ്യതാം വിശ്വനൃണാമ് ॥2॥
അനുസരതി ജനൌഘേ കൌതുകവ്യാകുലാക്ഷേ
കിമപി കൃതനിനാദം വ്യാഹസംതൌ ദ്രവംതൌ ।
വലിതവദനപദ്മം പൃഷ്ഠതോ ദത്തദൃഷ്ടീ
കിമിവ ന വിദധാഥേ കൌതുകം വാസുദേവ ॥3॥
ദ്രുതഗതിഷു പതംതാവുത്ഥിതൌ ലിപ്തപംകൌ
ദിവി മുനിഭിരപംകൈഃ സസ്മിതം വംദ്യമാനൌ ।
ദ്രുതമഥ ജനനീഭ്യാം സാനുകംപം ഗൃഹീതൌ
മുഹുരപി പരിരബ്ധൌ ദ്രാഗ്യുവാം ചുംബിതൌ ച ॥4॥
സ്നുതകുചഭരമംകേ ധാരയംതീ ഭവംതം
തരലമതി യശോദാ സ്തന്യദാ ധന്യധന്യാ ।
കപടപശുപ മധ്യേ മുഗ്ധഹാസാംകുരം തേ
ദശനമുകുലഹൃദ്യം വീക്ഷ്യ വക്ത്രം ജഹര്ഷ ॥5॥
തദനുചരണചാരീ ദാരകൈസ്സാകമാരാ-
ന്നിലയതതിഷു ഖേലന് ബാലചാപല്യശാലീ ।
ഭവനശുകവിഡാലാന് വത്സകാംശ്ചാനുധാവന്
കഥമപി കൃതഹാസൈര്ഗോപകൈര്വാരിതോഽഭൂഃ ॥6॥
ഹലധരസഹിതസ്ത്വം യത്ര യത്രോപയാതോ
വിവശപതിതനേത്രാസ്തത്ര തത്രൈവ ഗോപ്യഃ ।
വിഗലിതഗൃഹകൃത്യാ വിസ്മൃതാപത്യഭൃത്യാ
മുരഹര മുഹുരത്യംതാകുലാ നിത്യമാസന് ॥7॥
പ്രതിനവനവനീതം ഗോപികാദത്തമിച്ഛന്
കലപദമുപഗായന് കോമലം ക്വാപി നൃത്യന് ।
സദയയുവതിലോകൈരര്പിതം സര്പിരശ്നന്
ക്വചന നവവിപക്വം ദുഗ്ധമപ്യാപിബസ്ത്വമ് ॥8॥
മമ ഖലു ബലിഗേഹേ യാചനം ജാതമാസ്താ-
മിഹ പുനരബലാനാമഗ്രതോ നൈവ കുര്വേ ।
ഇതി വിഹിതമതിഃ കിം ദേവ സംത്യജ്യ യാച്ഞാം
ദധിഘൃതമഹരസ്ത്വം ചാരുണാ ചോരണേന ॥9॥
തവ ദധിഘൃതമോഷേ ഘോഷയോഷാജനാനാ-
മഭജത ഹൃദി രോഷോ നാവകാശം ന ശോകഃ ।
ഹൃദയമപി മുഷിത്വാ ഹര്ഷസിംധൌ ന്യധാസ്ത്വം
സ മമ ശമയ രോഗാന് വാതഗേഹാധിനാഥ ॥10॥
ശാഖാഗ്രേ വിധും വിലോക്യ ഫലമിത്യംബാം ച താതം മുഹുഃ
സംപ്രാര്ഥ്യാഥ തദാ തദീയവചസാ പ്രോത്ക്ഷിപ്തബാഹൌ ത്വയി।
ചിത്രം ദേവ ശശീ സ തേ കര്മഗാത് കിം ബ്രൂമഹേ സംപതഃ
ജ്യോതിര്മംഡലപൂരിതാഖിലവപുഃ പ്രാഗാ വിരാഡ്രൂപതാമ് ॥ 11॥
കിം കിം ബതേദമിതി സംഭ്രമ ഭാജമേനം
ബ്രഹ്മാര്ണവേ ക്ഷണമമും പരിമജ്ജ്യ താതമ് ।
മായാം പുനസ്തനയ-മോഹമയീം വിതന്വന്
ആനംദചിന്മയ ജഗന്മയ പാഹി രോഗാത് ॥12॥