മുദാ സുരൌഘൈസ്ത്വമുദാരസമ്മദൈ-
രുദീര്യ ദാമോദര ഇത്യഭിഷ്ടുതഃ ।
മൃദുദരഃ സ്വൈരമുലൂഖലേ ലഗ-
ന്നദൂരതോ ദ്വൌ കകുഭാവുദൈക്ഷഥാഃ ॥1॥
കുബേരസൂനുര്നലകൂബരാഭിധഃ
പരോ മണിഗ്രീവ ഇതി പ്രഥാം ഗതഃ ।
മഹേശസേവാധിഗതശ്രിയോന്മദൌ
ചിരം കില ത്വദ്വിമുഖാവഖേലതാമ് ॥2॥
സുരാപഗായാം കില തൌ മദോത്കടൌ
സുരാപഗായദ്ബഹുയൌവതാവൃതൌ ।
വിവാസസൌ കേലിപരൌ സ നാരദോ
ഭവത്പദൈകപ്രവണോ നിരൈക്ഷത ॥3॥
ഭിയാ പ്രിയാലോകമുപാത്തവാസസം
പുരോ നിരീക്ഷ്യാപി മദാംധചേതസൌ ।
ഇമൌ ഭവദ്ഭക്ത്യുപശാംതിസിദ്ധയേ
മുനിര്ജഗൌ ശാംതിമൃതേ കുതഃ സുഖമ് ॥4॥
യുവാമവാപ്തൌ കകുഭാത്മതാം ചിരം
ഹരിം നിരീക്ഷ്യാഥ പദം സ്വമാപ്നുതമ് ।
ഇതീരേതൌ തൌ ഭവദീക്ഷണസ്പൃഹാം
ഗതൌ വ്രജാംതേ കകുഭൌ ബഭൂവതുഃ ॥5॥
അതംദ്രമിംദ്രദ്രുയുഗം തഥാവിധം
സമേയുഷാ മംഥരഗാമിനാ ത്വയാ ।
തിരായിതോലൂഖലരോധനിര്ധുതൌ
ചിരായ ജീര്ണൌ പരിപാതിതൌ തരൂ ॥6॥
അഭാജി ശാഖിദ്വിതയം യദാ ത്വയാ
തദൈവ തദ്ഗര്ഭതലാന്നിരേയുഷാ ।
മഹാത്വിഷാ യക്ഷയുഗേന തത്ക്ഷണാ-
ദഭാജി ഗോവിംദ ഭവാനപി സ്തവൈഃ ॥7॥
ഇഹാന്യഭക്തോഽപി സമേഷ്യതി ക്രമാത്
ഭവംതമേതൌ ഖലു രുദ്രസേവകൌ ।
മുനിപ്രസാദാദ്ഭവ്ദംഘ്രിമാഗതൌ
ഗതൌ വൃണാനൌ ഖലു ഭക്തിമുത്തമാമ് ॥8॥
തതസ്തരൂദ്ദാരണദാരുണാരവ-
പ്രകംപിസംപാതിനി ഗോപമംഡലേ ।
വിലജ്ജിതത്വജ്ജനനീമുഖേക്ഷിണാ
വ്യമോക്ഷി നംദേന ഭവാന് വിമോക്ഷദഃ ॥9॥
മഹീരുഹോര്മധ്യഗതോ ബതാര്ഭകോ
ഹരേഃ പ്രഭാവാദപരിക്ഷതോഽധുനാ ।
ഇതി ബ്രുവാണൈര്ഗമിതോ ഗൃഹം ഭവാന്
മരുത്പുരാധീശ്വര പാഹി മാം ഗദാത് ॥10॥