തരലമധുകൃത് വൃംദേ വൃംദാവനേഽഥ മനോഹരേ
പശുപശിശുഭിഃ സാകം വത്സാനുപാലനലോലുപഃ ।
ഹലധരസഖോ ദേവ ശ്രീമന് വിചേരിഥ ധാരയന്
ഗവലമുരലീവേത്രം നേത്രാഭിരാമതനുദ്യുതിഃ ॥1॥
വിഹിതജഗതീരക്ഷം ലക്ഷ്മീകരാംബുജലാലിതം
ദദതി ചരണദ്വംദ്വം വൃംദാവനേ ത്വയി പാവനേ ।
കിമിവ ന ബഭൌ സംപത്സംപൂരിതം തരുവല്ലരീ-
സലിലധരണീഗോത്രക്ഷേത്രാദികം കമലാപതേ ॥2॥
വിലസദുലപേ കാംതാരാംതേ സമീരണശീതലേ
വിപുലയമുനാതീരേ ഗോവര്ധനാചലമൂര്ധസു ।
ലലിതമുരലീനാദഃ സംചാരയന് ഖലു വാത്സകം
ക്വചന ദിവസേ ദൈത്യം വത്സാകൃതിം ത്വമുദൈക്ഷഥാഃ ॥3॥
രഭസവിലസത്പുച്ഛം വിച്ഛായതോഽസ്യ വിലോകയന്
കിമപി വലിതസ്കംധം രംധ്രപ്രതീക്ഷമുദീക്ഷിതമ് ।
തമഥ ചരണേ ബിഭ്രദ്വിഭ്രാമയന് മുഹുരുച്ചകൈഃ
കുഹചന മഹാവൃക്ഷേ ചിക്ഷേപിഥ ക്ഷതജീവിതമ് ॥4॥
നിപതതി മഹാദൈത്യേ ജാത്യാ ദുരാത്മനി തത്ക്ഷണം
നിപതനജവക്ഷുണ്ണക്ഷോണീരുഹക്ഷതകാനനേ ।
ദിവി പരിമിലത് വൃംദാ വൃംദാരകാഃ കുസുമോത്കരൈഃ
ശിരസി ഭവതോ ഹര്ഷാദ്വര്ഷംതി നാമ തദാ ഹരേ ॥5॥
സുരഭിലതമാ മൂര്ധന്യൂര്ധ്വം കുതഃ കുസുമാവലീ
നിപതതി തവേത്യുക്തോ ബാലൈഃ സഹേലമുദൈരയഃ ।
ഝടിതി ദനുജക്ഷേപേണോര്ധ്വം ഗതസ്തരുമംഡലാത്
കുസുമനികരഃ സോഽയം നൂനം സമേതി ശനൈരിതി ॥6॥
ക്വചന ദിവസേ ഭൂയോ ഭൂയസ്തരേ പരുഷാതപേ
തപനതനയാപാഥഃ പാതും ഗതാ ഭവദാദയഃ ।
ചലിതഗരുതം പ്രേക്ഷാമാസുര്ബകം ഖലു വിസ്മ്രൃതം
ക്ഷിതിധരഗരുച്ഛേദേ കൈലാസശൈലമിവാപരമ് ॥7॥
പിബതി സലിലം ഗോപവ്രാതേ ഭവംതമഭിദ്രുതഃ
സ കില നിഗിലന്നഗ്നിപ്രഖ്യം പുനര്ദ്രുതമുദ്വമന് ।
ദലയിതുമഗാത്ത്രോട്യാഃ കോട്യാ തദാഽഽശു ഭവാന് വിഭോ
ഖലജനഭിദാചുംചുശ്ചംചൂ പ്രഗൃഹ്യ ദദാര തമ് ॥8॥
സപദി സഹജാം സംദ്രഷ്ടും വാ മൃതാം ഖലു പൂതനാ-
മനുജമഘമപ്യഗ്രേ ഗത്വാ പ്രതീക്ഷിതുമേവ വാ ।
ശമനനിലയം യാതേ തസ്മിന് ബകേ സുമനോഗണേ
കിരതി സുമനോവൃംദം വൃംദാവനാത് ഗൃഹമൈയഥാഃ ॥9॥
ലലിതമുരലീനാദം ദൂരാന്നിശമ്യ വധൂജനൈ-
സ്ത്വരിതമുപഗമ്യാരാദാരൂഢമോദമുദീക്ഷിതഃ ।
ജനിതജനനീനംദാനംദഃ സമീരണമംദിര-
പ്രഥിതവസതേ ശൌരേ ദൂരീകുരുഷ്വ മമാമയാന് ॥10॥