രാമസഖഃ ക്വാപി ദിനേ കാമദ ഭഗവന് ഗതോ ഭവാന് വിപിനമ് ।
സൂനുഭിരപി ഗോപാനാം ധേനുഭിരഭിസംവൃതോ ലസദ്വേഷഃ ॥1॥
സംദര്ശയന് ബലായ സ്വൈരം വൃംദാവനശ്രിയം വിമലാമ് ।
കാംഡീരൈഃ സഹ ബാലൈര്ഭാംഡീരകമാഗമോ വടം ക്രീഡന് ॥2॥
താവത്താവകനിധനസ്പൃഹയാലുര്ഗോപമൂര്തിരദയാലുഃ ।
ദൈത്യഃ പ്രലംബനാമാ പ്രലംബബാഹും ഭവംതമാപേദേ ॥3॥
ജാനന്നപ്യവിജാനന്നിവ തേന സമം നിബദ്ധസൌഹാര്ദഃ ।
വടനികടേ പടുപശുപവ്യാബദ്ധം ദ്വംദ്വയുദ്ധമാരബ്ധാഃ ॥4॥
ഗോപാന് വിഭജ്യ തന്വന് സംഘം ബലഭദ്രകം ഭവത്കമപി ।
ത്വദ്ബലഭീരും ദൈത്യം ത്വദ്ബലഗതമന്വമന്യഥാ ഭഗവന് ॥5॥
കല്പിതവിജേതൃവഹനേ സമരേ പരയൂഥഗം സ്വദയിതതരമ് ।
ശ്രീദാമാനമധത്ഥാഃ പരാജിതോ ഭക്തദാസതാം പ്രഥയന് ॥6॥
ഏവം ബഹുഷു വിഭൂമന് ബാലേഷു വഹത്സു വാഹ്യമാനേഷു ।
രാമവിജിതഃ പ്രലംബോ ജഹാര തം ദൂരതോ ഭവദ്ഭീത്യാ ॥7॥
ത്വദ്ദൂരം ഗമയംതം തം ദൃഷ്ട്വാ ഹലിനി വിഹിതഗരിമഭരേ ।
ദൈത്യഃ സ്വരൂപമാഗാദ്യദ്രൂപാത് സ ഹി ബലോഽപി ചകിതോഽഭൂത് ॥8॥
ഉച്ചതയാ ദൈത്യതനോസ്ത്വന്മുഖമാലോക്യ ദൂരതോ രാമഃ ।
വിഗതഭയോ ദൃഢമുഷ്ട്യാ ഭൃശദുഷ്ടം സപദി പിഷ്ടവാനേനമ് ॥9॥
ഹത്വാ ദാനവവീരം പ്രാപ്തം ബലമാലിലിംഗിഥ പ്രേമ്ണാ ।
താവന്മിലതോര്യുവയോഃ ശിരസി കൃതാ പുഷ്പവൃഷ്ടിരമരഗണൈഃ ॥10॥
ആലംബോ ഭുവനാനാം പ്രാലംബം നിധനമേവമാരചയന് ।
കാലം വിഹായ സദ്യോ ലോലംബരുചേ ഹരേ ഹരേഃ ക്ലേശാന് ॥11॥