കേശപാശധൃതപിംഛികാവിതതിസംചലന്മകരകുംഡലം
ഹാരജാലവനമാലികാലലിതമംഗരാഗഘനസൌരഭമ് ।
പീതചേലധൃതകാംചികാംചിതമുദംചദംശുമണിനൂപുരം
രാസകേലിപരിഭൂഷിതം തവ ഹി രൂപമീശ കലയാമഹേ ॥1॥
താവദേവ കൃതമംഡനേ കലിതകംചുലീകകുചമംഡലേ
ഗംഡലോലമണികുംഡലേ യുവതിമംഡലേഽഥ പരിമംഡലേ ।
അംതരാ സകലസുംദരീയുഗലമിംദിരാരമണ സംചരന്
മംജുലാം തദനു രാസകേലിമയി കംജനാഭ സമുപാദധാഃ ॥2॥
വാസുദേവ തവ ഭാസമാനമിഹ രാസകേലിരസസൌരഭം
ദൂരതോഽപി ഖലു നാരദാഗദിതമാകലയ്യ കുതുകാകുലാ ।
വേഷഭൂഷണവിലാസപേശലവിലാസിനീശതസമാവൃതാ
നാകതോ യുഗപദാഗതാ വിയതി വേഗതോഽഥ സുരമംഡലീ ॥3॥
വേണുനാദകൃതതാനദാനകലഗാനരാഗഗതിയോജനാ-
ലോഭനീയമൃദുപാദപാതകൃതതാലമേലനമനോഹരമ് ।
പാണിസംക്വണിതകംകണം ച മുഹുരംസലംബിതകരാംബുജം
ശ്രോണിബിംബചലദംബരം ഭജത രാസകേലിരസഡംബരമ് ॥4॥
സ്പര്ധയാ വിരചിതാനുഗാനകൃതതാരതാരമധുരസ്വരേ
നര്തനേഽഥ ലലിതാംഗഹാരലുലിതാംഗഹാരമണിഭൂഷണേ ।
സമ്മദേന കൃതപുഷ്പവര്ഷമലമുന്മിഷദ്ദിവിഷദാം കുലം
ചിന്മയേ ത്വയി നിലീയമാനമിവ സമ്മുമോഹ സവധൂകുലമ് ॥5॥
സ്വിന്നസന്നതനുവല്ലരീ തദനു കാപി നാമ പശുപാംഗനാ
കാംതമംസമവലംബതേ സ്മ തവ താംതിഭാരമുകുലേക്ഷണാ ॥
കാചിദാചലിതകുംതലാ നവപടീരസാരഘനസൌരഭം
വംചനേന തവ സംചുചുംബ ഭുജമംചിതോരുപുലകാംകുരാ ॥6॥
കാപി ഗംഡഭുവി സന്നിധായ നിജഗംഡമാകുലിതകുംഡലം
പുണ്യപൂരനിധിരന്വവാപ തവ പൂഗചര്വിതരസാമൃതമ് ।
ഇംദിരാവിഹൃതിമംദിരം ഭുവനസുംദരം ഹി നടനാംതരേ
ത്വാമവാപ്യ ദധുരംഗനാഃ കിമു ന സമ്മദോന്മദദശാംതരമ് ॥7॥
ഗാനമീശ വിരതം ക്രമേണ കില വാദ്യമേലനമുപാരതം
ബ്രഹ്മസമ്മദരസാകുലാഃ സദസി കേവലം നനൃതുരംഗനാഃ ।
നാവിദന്നപി ച നീവികാം കിമപി കുംതലീമപി ച കംചുലീം
ജ്യോതിഷാമപി കദംബകം ദിവി വിലംബിതം കിമപരം ബ്രുവേ ॥8॥
മോദസീമ്നി ഭുവനം വിലാപ്യ വിഹൃതിം സമാപ്യ ച തതോ വിഭോ
കേലിസമ്മൃദിതനിര്മലാംഗനവഘര്മലേശസുഭഗാത്മനാമ് ।
മന്മഥാസഹനചേതസാം പശുപയോഷിതാം സുകൃതചോദിത-
സ്താവദാകലിതമൂര്തിരാദധിഥ മാരവീരപരമോത്സവാന് ॥9॥
കേലിഭേദപരിലോലിതാഭിരതിലാലിതാഭിരബലാലിഭിഃ
സ്വൈരമീശ നനു സൂരജാപയസി ചാരുനാമ വിഹൃതിം വ്യധാഃ ।
കാനനേഽപി ച വിസാരിശീതലകിശോരമാരുതമനോഹരേ
സൂനസൌരഭമയേ വിലേസിഥ വിലാസിനീശതവിമോഹനമ് ॥10॥
കാമിനീരിതി ഹി യാമിനീഷു ഖലു കാമനീയകനിധേ ഭവാന്
പൂര്ണസമ്മദരസാര്ണവം കമപി യോഗിഗമ്യമനുഭാവയന് ।
ബ്രഹ്മശംകരമുഖാനപീഹ പശുപാംഗനാസു ബഹുമാനയന്
ഭക്തലോകഗമനീയരൂപ കമനീയ കൃഷ്ണ പരിപാഹി മാമ് ॥11॥