പ്രദ്യുമ്നോ രൌക്മിണേയഃ സ ഖലു തവ കലാ ശംബരേണാഹൃതസ്തം
ഹത്വാ രത്യാ സഹാപ്തോ നിജപുരമഹരദ്രുക്മികന്യാം ച ധന്യാമ് ।
തത്പുത്രോഽഥാനിരുദ്ധോ ഗുണനിധിരവഹദ്രോചനാം രുക്മിപൌത്രീം
തത്രോദ്വാഹേ ഗതസ്ത്വം ന്യവധി മുസലിനാ രുക്മ്യപി ദ്യൂതവൈരാത് ॥1॥
ബാണസ്യ സാ ബലിസുതസ്യ സഹസ്രബാഹോ-
ര്മാഹേശ്വരസ്യ മഹിതാ ദുഹിതാ കിലോഷാ ।
ത്വത്പൌത്രമേനമനിരുദ്ധമദൃഷ്ടപൂര്വം
സ്വപ്നേഽനുഭൂയ ഭഗവന് വിരഹാതുരാഽഭൂത് ॥2॥
യോഗിന്യതീവ കുശലാ ഖലു ചിത്രലേഖാ
തസ്യാഃ സഖീ വിലിഖതീ തരുണാനശേഷാന് ।
തത്രാനിരുദ്ധമുഷയാ വിദിതം നിശായാ-
മാനേഷ്ട യോഗബലതോ ഭവതോ നികേതാത് ॥3॥
കന്യാപുരേ ദയിതയാ സുഖമാരമംതം
ചൈനം കഥംചന ബബംധുഷി ശര്വബംധൌ ।
ശ്രീനാരദോക്തതദുദംതദുരംതരോഷൈ-
സ്ത്വം തസ്യ ശോണിതപുരം യദുഭിര്ന്യരുംധാഃ ॥4॥
പുരീപാലശ്ശൈലപ്രിയദുഹിതൃനാഥോഽസ്യ ഭഗവാന്
സമം ഭൂതവ്രാതൈര്യദുബലമശംകം നിരുരുധേ ।
മഹാപ്രാണോ ബാണോ ഝടിതി യുയുധാനേനയുയുധേ
ഗുഹഃ പ്രദ്യുമ്നേന ത്വമപി പുരഹംത്രാ ജഘടിഷേ ॥5॥
നിരുദ്ധാശേഷാസ്ത്രേ മുമുഹുഷി തവാസ്ത്രേണ ഗിരിശേ
ദ്രുതാ ഭൂതാ ഭീതാഃ പ്രമഥകുലവീരാഃ പ്രമഥിതാഃ ।
പരാസ്കംദ്ത് സ്കംദഃ കുസുമശരബാണൈശ്ച സചിവഃ
സ കുംഭാംഡോ ഭാംഡം നവമിവ ബലേനാശു ബിഭിദേ ॥6॥
ചാപാനാം പംചശത്യാ പ്രസഭമുപഗതേ ഛിന്നചാപേഽഥ ബാണേ
വ്യര്ഥേ യാതേ സമേതോ ജ്വരപതിരശനൈരജ്വരി ത്വജ്ജ്വരേണ ।
ജ്ഞാനീ സ്തുത്വാഽഥ ദത്വാ തവ ചരിതജുഷാം വിജ്വരം സ ജ്വരോഽഗാത്
പ്രായോഽംതര്ജ്ഞാനവംതോഽപി ച ബഹുതമസാ രൌദ്രചേഷ്ടാ ഹി രൌദ്രാഃ ॥7॥
ബാണം നാനായുധോഗ്രം പുനരഭിപതിതം ദര്പദോഷാദ്വിതന്വന്
നിര്ലൂനാശേഷദോഷം സപദി ബുബുധുഷാ ശംകരേണോപഗീതഃ ।
തദ്വാചാ ശിഷ്ടബാഹുദ്വിതയമുഭയതോ നിര്ഭയം തത്പ്രിയം തം
മുക്ത്വാ തദ്ദത്തമാനോ നിജപുരമഗമഃ സാനിരുദ്ധഃ സഹോഷഃ ॥8॥
മുഹുസ്താവച്ഛക്രം വരുണമജയോ നംദഹരണേ
യമം ബാലാനീതൌ ദവദഹനപാനേഽനിലസഖമ് ।
വിധിം വത്സസ്തേയേ ഗിരിശമിഹ ബാണസ്യ സമരേ
വിഭോ വിശ്വോത്കര്ഷീ തദയമവതാരോ ജയതി തേ ॥9॥
ദ്വിജരുഷാ കൃകലാസവപുര്ധരം നൃഗനൃപം ത്രിദിവാലയമാപയന് ।
നിജജനേ ദ്വിജഭക്തിമനുത്തമാമുപദിശന് പവനേശ്വര് പാഹി മാമ് ॥10॥