കല്ലോലോല്ലസിതാമൃതാബ്ധിലഹരീമധ്യേ വിരാജന്മണി-
-ദ്വീപേ കല്പകവാടികാപരിവൃതേ കാദംബവാട്യുജ്ജ്വലേ ।
രത്നസ്തംഭസഹസ്രനിര്മിതസഭാമധ്യേ വിമാനോത്തമേ
ചിംതാരത്നവിനിര്മിതം ജനനി തേ സിംഹാസനം ഭാവയേ ॥ 1 ॥
ഏണാംകാനലഭാനുമംഡലലസച്ഛ്രീചക്രമധ്യേ സ്ഥിതാം
ബാലാര്കദ്യുതിഭാസുരാം കരതലൈഃ പാശാംകുശൌ ബിഭ്രതീമ് ।
ചാപം ബാണമപി പ്രസന്നവദനാം കൌസുംഭവസ്ത്രാന്വിതാം
താം ത്വാം ചംദ്രകളാവതംസമകുടാം ചാരുസ്മിതാം ഭാവയേ ॥ 2 ॥
ഈശാനാദിപദം ശിവൈകഫലദം രത്നാസനം തേ ശുഭം
പാദ്യം കുംകുമചംദനാദിഭരിതൈരര്ഘ്യം സരത്നാക്ഷതൈഃ ।
ശുദ്ധൈരാചമനീയകം തവ ജലൈര്ഭക്ത്യാ മയാ കല്പിതം
കാരുണ്യാമൃതവാരിധേ തദഖിലം സംതുഷ്ടയേ കല്പതാമ് ॥ 3 ॥
ലക്ഷ്യേ യോഗിജനസ്യ രക്ഷിതജഗജ്ജാലേ വിശാലേക്ഷണേ
പ്രാലേയാംബുപടീരകുംകുമലസത്കര്പൂരമിശ്രോദകൈഃ ।
ഗോക്ഷീരൈരപി നാരികേലസലിലൈഃ ശുദ്ധോദകൈര്മംത്രിതൈഃ
സ്നാനം ദേവി ധിയാ മയൈതദഖിലം സംതുഷ്ടയേ കല്പതാമ് ॥ 4 ॥
ഹ്രീം‍കാരാംകിതമംത്രലക്ഷിതതനോ ഹേമാചലാത്സംചിതൈഃ
രത്നൈരുജ്ജ്വലമുത്തരീയസഹിതം കൌസുംഭവര്ണാംശുകമ് ।
മുക്താസംതതിയജ്ഞസൂത്രമമലം സൌവര്ണതംതൂദ്ഭവം
ദത്തം ദേവി ധിയാ മയൈതദഖിലം സംതുഷ്ടയേ കല്പതാമ് ॥ 5 ॥
ഹംസൈരപ്യതിലോഭനീയഗമനേ ഹാരാവലീമുജ്ജ്വലാം
ഹിംദോലദ്യുതിഹീരപൂരിതതരേ ഹേമാംഗദേ കംകണേ ।
മംജീരൌ മണികുംഡലേ മകുടമപ്യര്ധേംദുചൂഡാമണിം
നാസാമൌക്തികമംഗുലീയകടകൌ കാംചീമപി സ്വീകുരു ॥ 6 ॥
സര്വാംഗേ ഘനസാരകുംകുമഘനശ്രീഗംധപംകാംകിതം
കസ്തൂരീതിലകം ച ഫാലഫലകേ ഗോരോചനാപത്രകമ് ।
ഗംഡാദര്ശനമംഡലേ നയനയോര്ദിവ്യാംജനം തേഽംചിതം
കംഠാബ്ജേ മൃഗനാഭിപംകമമലം ത്വത്പ്രീതയേ കല്പതാമ് ॥ 7 ॥
കഹ്ലാരോത്പലമല്ലികാമരുവകൈഃ സൌവര്ണപംകേരുഹൈ-
-ര്ജാതീചംപകമാലതീവകുലകൈര്മംദാരകുംദാദിഭിഃ ।
കേതക്യാ കരവീരകൈര്ബഹുവിധൈഃ ക്ലുപ്താഃ സ്രജോ മാലികാഃ
സംകല്പേന സമര്പയാമി വരദേ സംതുഷ്ടയേ ഗൃഹ്യതാമ് ॥ 8 ॥
ഹംതാരം മദനസ്യ നംദയസി യൈരംഗൈരനംഗോജ്ജ്വലൈ-
-ര്യൈര്ഭൃംഗാവലിനീലകുംതലഭരൈര്ബധ്നാസി തസ്യാശയമ് ।
താനീമാനി തവാംബ കോമലതരാണ്യാമോദലീലാഗൃഹാ-
-ണ്യാമോദായ ദശാംഗഗുഗ്ഗുലുഘൃതൈര്ധൂപൈരഹം ധൂപയേ ॥ 9 ॥
ലക്ഷ്മീമുജ്ജ്വലയാമി രത്നനിവഹോദ്ഭാസ്വത്തരേ മംദിരേ
മാലാരൂപവിലംബിതൈര്മണിമയസ്തംഭേഷു സംഭാവിതൈഃ ।
ചിത്രൈര്ഹാടകപുത്രികാകരധൃതൈര്ഗവ്യൈര്ഘൃതൈര്വര്ധിതൈ-
-ര്ദിവ്യൈര്ദീപഗണൈര്ധിയാ ഗിരിസുതേ സംതുഷ്ടയേ കല്പതാമ് ॥ 10 ॥
ഹ്രീം‍കാരേശ്വരി തപ്തഹാടകകൃതൈഃ സ്ഥാലീസഹസ്രൈര്ഭൃതം
ദിവ്യാന്നം ഘൃതസൂപശാകഭരിതം ചിത്രാന്നഭേദം തഥാ ।
ദുഗ്ധാന്നം മധുശര്കരാദധിയുതം മാണിക്യപാത്രേ സ്ഥിതം
മാഷാപൂപസഹസ്രമംബ സഫലം നൈവേദ്യമാവേദയേ ॥ 11 ॥
സച്ഛായൈര്വരകേതകീദലരുചാ താംബൂലവല്ലീദലൈഃ
പൂഗൈര്ഭൂരിഗുണൈഃ സുഗംധിമധുരൈഃ കര്പൂരഖംഡോജ്ജ്വലൈഃ ।
മുക്താചൂര്ണവിരാജിതൈര്ബഹുവിധൈര്വക്ത്രാംബുജാമോദനൈഃ
പൂര്ണാ രത്നകലാചികാ തവ മുദേ ന്യസ്താ പുരസ്താദുമേ ॥ 12 ॥
കന്യാഭിഃ കമനീയകാംതിഭിരലംകാരാമലാരാര്തികാ
പാത്രേ മൌക്തികചിത്രപംക്തിവിലസത്കര്പൂരദീപാലിഭിഃ ।
തത്തത്താലമൃദംഗഗീതസഹിതം നൃത്യത്പദാംഭോരുഹം
മംത്രാരാധനപൂര്വകം സുവിഹിതം നീരാജനം ഗൃഹ്യതാമ് ॥ 13 ॥
ലക്ഷ്മീര്മൌക്തികലക്ഷകല്പിതസിതച്ഛത്ത്രം തു ധത്തേ രസാ-
-ദിംദ്രാണീ ച രതിശ്ച ചാമരവരേ ധത്തേ സ്വയം ഭാരതീ ।
വീണാമേണവിലോചനാഃ സുമനസാം നൃത്യംതി തദ്രാഗവ-
-ദ്ഭാവൈരാംഗികസാത്ത്വികൈഃ സ്ഫുടരസം മാതസ്തദാകര്ണ്യതാമ് ॥ 14 ॥
ഹ്രീം‍കാരത്രയസംപുടേന മനുനോപാസ്യേ ത്രയീമൌലിഭി-
-ര്വാക്യൈര്ലക്ഷ്യതനോ തവ സ്തുതിവിധൌ കോ വാ ക്ഷമേതാംബികേ ।
സല്ലാപാഃ സ്തുതയഃ പ്രദക്ഷിണശതം സംചാര ഏവാസ്തു തേ
സംവേശോ നമസഃ സഹസ്രമഖിലം ത്വത്പ്രീതയേ കല്പതാമ് ॥ 15 ॥
ശ്രീമംത്രാക്ഷരമാലയാ ഗിരിസുതാം യഃ പൂജയേച്ചേതസാ
സംധ്യാസു പ്രതിവാസരം സുനിയതസ്തസ്യാമലം സ്യാന്മനഃ ।
ചിത്താംഭോരുഹമംടപേ ഗിരിസുതാ നൃത്തം വിധത്തേ രസാ-
-ദ്വാണീ വക്ത്രസരോരുഹേ ജലധിജാ ഗേഹേ ജഗന്മംഗളാ ॥ 16 ॥
ഇതി ഗിരിവരപുത്രീപാദരാജീവഭൂഷാ
ഭുവനമമലയംതീ സൂക്തിസൌരഭ്യസാരൈഃ ।
ശിവപദമകരംദസ്യംദിനീയം നിബദ്ധാ
മദയതു കവിഭൃംഗാന്മാതൃകാപുഷ്പമാലാ ॥ 17 ॥
ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ മംത്രമാതൃകാപുഷ്പമാലാ സ്തവഃ ।