ശ്രീഗോപാലകൃഷ്ണായ നമഃ ॥
ശ്രീശേഷ ഉവാച ॥
ഓം അസ്യ ശ്രീകൃഷ്ണാഷ്ടോത്തരശതനാമസ്തോത്രസ്യ।
ശ്രീശേഷ ഋഷിഃ ॥ അനുഷ്ടുപ് ഛംദഃ ॥ ശ്രീകൃഷ്ണോദേവതാ ॥
ശ്രീകൃഷ്ണാഷ്ടോത്തരശതനാമജപേ വിനിയോഗഃ ॥
ഓം ശ്രീകൃഷ്ണഃ കമലാനാഥോ വാസുദേവഃ സനാതനഃ ।
വസുദേവാത്മജഃ പുണ്യോ ലീലാമാനുഷവിഗ്രഹഃ ॥ 1 ॥
ശ്രീവത്സകൌസ്തുഭധരോ യശോദാവത്സലോ ഹരിഃ ।
ചതുര്ഭുജാത്തചക്രാസിഗദാ ശംഖാദ്യുദായുധഃ ॥ 2 ॥
ദേവകീനംദനഃ ശ്രീശോ നംദഗോപപ്രിയാത്മജഃ ।
യമുനാവേഗസംഹാരീ ബലഭദ്രപ്രിയാനുജഃ ॥ 3 ॥
പൂതനാജീവിതഹരഃ ശകടാസുരഭംജനഃ ।
നംദവ്രജജനാനംദീ സച്ചിദാനംദവിഗ്രഹഃ ॥ 4 ॥
നവനീതവിലിപ്താംഗോ നവനീതനടോഽനഘഃ ।
നവനീതനവാഹാരോ മുചുകുംദപ്രസാദകഃ ॥ 5 ॥
ഷോഡശസ്ത്രീ സഹസ്രേശ സ്രിഭംഗി മധുരാകൃതിഃ ।
ശുകവാഗമൃതാബ്ധീംദുര്ഗോവിംദോ ഗോവിദാംപതിഃ ॥ 6 ॥
വത്സവാടചരോഽനംതോ ധേനുകാസുരഭംജനഃ ।
തൃണീകൃതതൃണാവര്തോ യമളാര്ജുനഭംജനഃ ॥ 7 ॥
ഉത്താനതാലഭേത്താ ച തമാലശ്യാമലാകൃതിഃ ।
ഗോപഗോപീശ്വരോ യോഗീ സൂര്യകോടിസമപ്രഭഃ ॥ 8 ॥
ഇലാപതിഃ പരംജ്യോതിര്യാദവേംദ്രോ യദൂദ്വഹഃ ।
വനമാലീ പീതവാസാഃ പാരിജാതാപഹാരകഃ ॥ 9 ॥
ഗോവര്ധനാചലോദ്ധര്താ ഗോപാലഃ സര്വപാലകഃ ।
അജോ നിരംജനഃ കാമജനകഃ കംജലോചനഃ ॥ 10 ॥
മധുഹാ മഥുരാനാഥോ ദ്വാരകാനായകോ ബലീ ।
വൃംദാവനാംതസംചാരീ തുലസീദാമഭൂഷണഃ ॥ 11 ॥
ശ്യമംതകമണേര്ഹര്താ നരനാരായണാത്മകഃ ।
കുബ്ജാകൃഷ്ണാംബരധരോ മായീ പരമപൂരുഷഃ ॥ 12 ॥
മുഷ്ടികാസുരചാണൂരമഹായുദ്ധവിശാരദഃ ।
സംസാരവൈരീ കംസാരിര്മുരാരിര്നരകാംതകഃ ॥ 13 ॥
അനാദിബ്രഹ്മചാരീ ച കൃഷ്ണാവ്യസനകര്ഷകഃ ।
ശിശുപാലശിരശ്ഛേത്താ ദുര്യോധനകുലാംതകഃ ॥ 14 ॥
വിദുരാക്രൂരവരദോ വിശ്വരൂപപ്രദര്ശകഃ ।
സത്യവാക് സത്യസംകല്പഃ സത്യഭാമാരതോ ജയീ ॥ 15 ॥
സുഭദ്രാപൂര്വജോ വിഷ്ണുര്ഭീഷ്മമുക്തിപ്രദായകഃ ।
ജഗദ്ഗുരുര്ജഗന്നാഥോ വേണുനാദവിശാരദഃ ॥ 16 ॥
വൃഷഭാസുരവിധ്വംസീ ബാണാസുരബലാംതകഃ ।
യുധിഷ്ഠിരപ്രതിഷ്ഠാതാ ബര്ഹിബര്ഹാവതംസകഃ ॥ 17 ॥
പാര്ഥസാരഥിരവ്യക്തോ ഗീതാമൃതമഹോദധിഃ ।
കാലീയഫണിമാണിക്യരംജിതശ്രീപദാംബുജഃ ॥ 18 ॥
ദാമോദരോ യജ്ഞഭോക്താ ദാനവേംദ്രവിനാശകഃ ।
നാരായണഃ പരംബ്രഹ്മ പന്നഗാശനവാഹനഃ ॥ 19 ॥
ജലക്രീഡാസമാസക്ത ഗോപീവസ്ത്രാപഹാരകഃ ।
പുണ്യശ്ലോകസ്തീര്ഥപാദോ വേദവേദ്യോ ദയാനിധിഃ ॥ 20 ॥
സര്വതീര്ഥാത്മകഃ സര്വഗ്രഹരുപീ പരാത്പരഃ ।
ഏവം ശ്രീകൃഷ്ണദേവസ്യ നാമ്നാമഷ്ടോത്തരം ശതമ് ॥ 21 ॥
കൃഷ്ണനാമാമൃതം നാമ പരമാനംദകാരകമ് ।
അത്യുപദ്രവദോഷഘ്നം പരമായുഷ്യവര്ധനമ് ॥ 22 ॥
॥ ഇതി ശ്രീനാരദപംചരാത്രേ ജ്ഞാനാമൃതസാരേ ചതുര്ഥരാത്രേ ഉമാമഹേശ്വരസംവാദേ
ധരണീശേഷസംവാദേ ശ്രീകൃഷ്ണാഷ്ടോത്തരശതനാമസ്തോത്രം സംപൂര്ണമ് ॥