വിരാടനഗരം രമ്യം ഗച്ഛമാനോ യുധിഷ്ഠിരഃ ।
അസ്തുവന്മനസാ ദേവീം ദുര്ഗാം ത്രിഭുവനേശ്വരീമ് ॥ 1 ॥
യശോദാഗര്ഭസംഭൂതാം നാരായണവരപ്രിയാമ് ।
നംദഗോപകുലേജാതാം മംഗള്യാം കുലവര്ധനീമ് ॥ 2 ॥
കംസവിദ്രാവണകരീം അസുരാണാം ക്ഷയംകരീമ് ।
ശിലാതടവിനിക്ഷിപ്താം ആകാശം പ്രതിഗാമിനീമ് ॥ 3 ॥
വാസുദേവസ്യ ഭഗിനീം ദിവ്യമാല്യ വിഭൂഷിതാമ് ।
ദിവ്യാംബരധരാം ദേവീം ഖഡ്ഗഖേടകധാരിണീമ് ॥ 4 ॥
ഭാരാവതരണേ പുണ്യേ യേ സ്മരംതി സദാശിവാമ് ।
താന്വൈ താരയതേ പാപാത് പംകേഗാമിവ ദുര്ബലാമ് ॥ 5 ॥
സ്തോതും പ്രചക്രമേ ഭൂയോ വിവിധൈഃ സ്തോത്രസംഭവൈഃ ।
ആമംത്ര്യ ദര്ശനാകാംക്ഷീ രാജാ ദേവീം സഹാനുജഃ ॥ 6 ॥
നമോഽസ്തു വരദേ കൃഷ്ണേ കുമാരി ബ്രഹ്മചാരിണി ।
ബാലാര്ക സദൃശാകാരേ പൂര്ണചംദ്രനിഭാനനേ ॥ 7 ॥
ചതുര്ഭുജേ ചതുര്വക്ത്രേ പീനശ്രോണിപയോധരേ ।
മയൂരപിംഛവലയേ കേയൂരാംഗദധാരിണി ॥ 8 ॥
ഭാസി ദേവി യദാ പദ്മാ നാരായണപരിഗ്രഹഃ ।
സ്വരൂപം ബ്രഹ്മചര്യം ച വിശദം തവ ഖേചരി ॥ 9 ॥
കൃഷ്ണച്ഛവിസമാ കൃഷ്ണാ സംകര്ഷണസമാനനാ ।
ബിഭ്രതീ വിപുലൌ ബാഹൂ ശക്രധ്വജസമുച്ഛ്രയൌ ॥ 10 ॥
പാത്രീ ച പംകജീ കംഠീ സ്ത്രീ വിശുദ്ധാ ച യാ ഭുവി ।
പാശം ധനുര്മഹാചക്രം വിവിധാന്യായുധാനി ച ॥ 11 ॥
കുംഡലാഭ്യാം സുപൂര്ണാഭ്യാം കര്ണാഭ്യാം ച വിഭൂഷിതാ ।
ചംദ്രവിസ്പാര്ധിനാ ദേവി മുഖേന ത്വം വിരാജസേ ॥ 12 ॥
മുകുടേന വിചിത്രേണ കേശബംധേന ശോഭിനാ ।
ഭുജംഗാഽഭോഗവാസേന ശ്രോണിസൂത്രേണ രാജതാ ॥ 13 ॥
ഭ്രാജസേ ചാവബദ്ധേന ഭോഗേനേവേഹ മംദരഃ ।
ധ്വജേന ശിഖിപിംഛാനാം ഉച്ഛ്രിതേന വിരാജസേ ॥ 14 ॥
കൌമാരം വ്രതമാസ്ഥായ ത്രിദിവം പാവിതം ത്വയാ ।
തേന ത്വം സ്തൂയസേ ദേവി ത്രിദശൈഃ പൂജ്യസേഽപി ച ॥ 15 ॥
ത്രൈലോക്യ രക്ഷണാര്ഥായ മഹിഷാസുരനാശിനി ।
പ്രസന്നാ മേ സുരശ്രേഷ്ഠേ ദയാം കുരു ശിവാ ഭവ ॥ 16 ॥
ജയാ ത്വം വിജയാ ചൈവ സംഗ്രാമേ ച ജയപ്രദാ ।
മമാഽപി വിജയം ദേഹി വരദാ ത്വം ച സാംപ്രതമ് ॥ 17 ॥
വിംധ്യേ ചൈവ നഗശ്രേഷ്ടേ തവ സ്ഥാനം ഹി ശാശ്വതമ് ।
കാളി കാളി മഹാകാളി സീധുമാംസ പശുപ്രിയേ ॥ 18 ॥
കൃതാനുയാത്രാ ഭൂതൈസ്ത്വം വരദാ കാമചാരിണി ।
ഭാരാവതാരേ യേ ച ത്വാം സംസ്മരിഷ്യംതി മാനവാഃ ॥ 19 ॥
പ്രണമംതി ച യേ ത്വാം ഹി പ്രഭാതേ തു നരാ ഭുവി ।
ന തേഷാം ദുര്ലഭം കിംചിത് പുത്രതോ ധനതോഽപി വാ ॥ 20 ॥
ദുര്ഗാത്താരയസേ ദുര്ഗേ തത്വം ദുര്ഗാ സ്മൃതാ ജനൈഃ ।
കാംതാരേഷ്വവപന്നാനാം മഗ്നാനാം ച മഹാര്ണവേ ॥ 21 ॥
(ദസ്യുഭിര്വാ നിരുദ്ധാനാം ത്വം ഗതിഃ പരമാ നൃണാമ)
ജലപ്രതരണേ ചൈവ കാംതാരേഷ്വടവീഷു ച ।
യേ സ്മരംതി മഹാദേവീം ന ച സീദംതി തേ നരാഃ ॥ 22 ॥
ത്വം കീര്തിഃ ശ്രീര്ധൃതിഃ സിദ്ധിഃ ഹ്രീര്വിദ്യാ സംതതിര്മതിഃ ।
സംധ്യാ രാത്രിഃ പ്രഭാ നിദ്രാ ജ്യോത്സ്നാ കാംതിഃ ക്ഷമാ ദയാ ॥ 23 ॥
നൃണാം ച ബംധനം മോഹം പുത്രനാശം ധനക്ഷയമ് ।
വ്യാധിം മൃത്യും ഭയം ചൈവ പൂജിതാ നാശയിഷ്യസി ॥ 24 ॥
സോഽഹം രാജ്യാത്പരിഭ്രഷ്ടഃ ശരണം ത്വാം പ്രപന്നവാന് ।
പ്രണതശ്ച യഥാ മൂര്ധ്നാ തവ ദേവി സുരേശ്വരി ॥ 25 ॥
ത്രാഹി മാം പദ്മപത്രാക്ഷി സത്യേ സത്യാ ഭവസ്വ നഃ ।
ശരണം ഭവ മേ ദുര്ഗേ ശരണ്യേ ഭക്തവത്സലേ ॥ 26 ॥
ഏവം സ്തുതാ ഹി സാ ദേവീ ദര്ശയാമാസ പാംഡവമ് ।
ഉപഗമ്യ തു രാജാനമിദം വചനമബ്രവീത് ॥ 27 ॥
ശൃണു രാജന് മഹാബാഹോ മദീയം വചനം പ്രഭോ ।
ഭവിഷ്യത്യചിരാദേവ സംഗ്രാമേ വിജയസ്തവ ॥ 28 ॥
മമ പ്രസാദാന്നിര്ജിത്യ ഹത്വാ കൌരവ വാഹിനീമ് ।
രാജ്യം നിഷ്കംടകം കൃത്വാ ഭോക്ഷ്യസേ മേദിനീം പുനഃ ॥ 29 ॥
ഭ്രാതൃഭിഃ സഹിതോ രാജന് പ്രീതിം പ്രാപ്സ്യസി പുഷ്കലാമ് ।
മത്പ്രസാദാച്ച തേ സൌഖ്യം ആരോഗ്യം ച ഭവിഷ്യതി ॥ 30 ॥
യേ ച സംകീര്തയിഷ്യംതി ലോകേ വിഗതകല്മഷാഃ ।
തേഷാം തുഷ്ടാ പ്രദാസ്യാമി രാജ്യമായുര്വപുസ്സുതമ് ॥ 31 ॥
പ്രവാസേ നഗരേ ചാപി സംഗ്രാമേ ശത്രുസംകടേ ।
അടവ്യാം ദുര്ഗകാംതാരേ സാഗരേ ഗഹനേ ഗിരൌ ॥ 32 ॥
യേ സ്മരിഷ്യംതി മാം രാജന് യഥാഹം ഭവതാ സ്മൃതാ ।
ന തേഷാം ദുര്ലഭം കിംചിദസ്മിന് ലോകേ ഭവിഷ്യതി ॥ 33 ॥
യ ഇദം പരമസ്തോത്രം ഭക്ത്യാ ശൃണുയാദ്വാ പഠേത വാ ।
തസ്യ സര്വാണി കാര്യാണി സിധ്ധിം യാസ്യംതി പാംഡവാഃ ॥ 34 ॥
മത്പ്രസാദാച്ച വസ്സര്വാന് വിരാടനഗരേ സ്ഥിതാന് ।
ന പ്രജ്ഞാസ്യംതി കുരവഃ നരാ വാ തന്നിവാസിനഃ ॥ 35 ॥
ഇത്യുക്ത്വാ വരദാ ദേവീ യുധിഷ്ഠിരമരിംദമമ് ।
രക്ഷാം കൃത്വാ ച പാംഡൂനാം തത്രൈവാംതരധീയത ॥ 38 ॥