മുനീംദ്ര–വൃംദ–വംദിതേ ത്രിലോക–ശോക–ഹാരിണി
പ്രസന്ന-വക്ത്ര-പണ്കജേ നികുംജ-ഭൂ-വിലാസിനി
വ്രജേംദ്ര–ഭാനു–നംദിനി വ്രജേംദ്ര–സൂനു–സംഗതേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥1॥
അശോക–വൃക്ഷ–വല്ലരീ വിതാന–മംഡപ–സ്ഥിതേ
പ്രവാലബാല–പല്ലവ പ്രഭാരുണാംഘ്രി–കോമലേ ।
വരാഭയസ്ഫുരത്കരേ പ്രഭൂതസംപദാലയേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥2॥
അനംഗ-രണ്ഗ മംഗല-പ്രസംഗ-ഭംഗുര-ഭ്രുവാം
സവിഭ്രമം സസംഭ്രമം ദൃഗംത–ബാണപാതനൈഃ ।
നിരംതരം വശീകൃതപ്രതീതനംദനംദനേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥3॥
തഡിത്–സുവര്ണ–ചംപക –പ്രദീപ്ത–ഗൌര–വിഗ്രഹേ
മുഖ–പ്രഭാ–പരാസ്ത–കോടി–ശാരദേംദുമംഡലേ ।
വിചിത്ര-ചിത്ര സംചരച്ചകോര-ശാവ-ലോചനേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥4॥
മദോന്മദാതി–യൌവനേ പ്രമോദ–മാന–മംഡിതേ
പ്രിയാനുരാഗ–രംജിതേ കലാ–വിലാസ – പംഡിതേ ।
അനന്യധന്യ–കുംജരാജ്യ–കാമകേലി–കോവിദേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥5॥
അശേഷ–ഹാവഭാവ–ധീരഹീരഹാര–ഭൂഷിതേ
പ്രഭൂതശാതകുംഭ–കുംഭകുംഭി–കുംഭസുസ്തനി ।
പ്രശസ്തമംദ–ഹാസ്യചൂര്ണ പൂര്ണസൌഖ്യ –സാഗരേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥6॥
മൃണാല-വാല-വല്ലരീ തരംഗ-രംഗ-ദോര്ലതേ
ലതാഗ്ര–ലാസ്യ–ലോല–നീല–ലോചനാവലോകനേ ।
ലലല്ലുലന്മിലന്മനോജ്ഞ–മുഗ്ധ–മോഹിനാശ്രിതേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥7॥
സുവര്ണമലികാംചിത –ത്രിരേഖ–കംബു–കംഠഗേ
ത്രിസൂത്ര–മംഗലീ-ഗുണ–ത്രിരത്ന-ദീപ്തി–ദീധിതേ ।
സലോല–നീലകുംതല–പ്രസൂന–ഗുച്ഛ–ഗുംഫിതേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥8॥
നിതംബ–ബിംബ–ലംബമാന–പുഷ്പമേഖലാഗുണേ
പ്രശസ്തരത്ന-കിംകിണീ-കലാപ-മധ്യ മംജുലേ ।
കരീംദ്ര–ശുംഡദംഡികാ–വരോഹസൌഭഗോരുകേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥9॥
അനേക–മംത്രനാദ–മംജു നൂപുരാരവ–സ്ഖലത്
സമാജ–രാജഹംസ–വംശ–നിക്വണാതി–ഗൌരവേ ।
വിലോലഹേമ–വല്ലരീ–വിഡംബിചാരു–ചംക്രമേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥10॥
അനംത–കോടി–വിഷ്ണുലോക–നമ്ര–പദ്മജാര്ചിതേ
ഹിമാദ്രിജാ–പുലോമജാ–വിരിംചജാ-വരപ്രദേ ।
അപാര–സിദ്ധി–ഋദ്ധി–ദിഗ്ധ–സത്പദാംഗുലീ-നഖേ
കദാ കരിഷ്യസീഹ മാം കൃപാകടാക്ഷ–ഭാജനമ് ॥11॥
മഖേശ്വരി ക്രിയേശ്വരി സ്വധേശ്വരി സുരേശ്വരി
ത്രിവേദ–ഭാരതീശ്വരി പ്രമാണ–ശാസനേശ്വരി ।
രമേശ്വരി ക്ഷമേശ്വരി പ്രമോദ–കാനനേശ്വരി
വ്രജേശ്വരി വ്രജാധിപേ ശ്രീരാധികേ നമോസ്തുതേ ॥12॥
ഇതീ മമദ്ഭുതം-സ്തവം നിശമ്യ ഭാനുനംദിനീ
കരോതു സംതതം ജനം കൃപാകടാക്ഷ-ഭാജനമ് ।
ഭവേത്തദൈവ സംചിത ത്രിരൂപ–കര്മ നാശനം
ലഭേത്തദാ വ്രജേംദ്ര–സൂനു–മംഡല–പ്രവേശനമ് ॥13॥
രാകായാം ച സിതാഷ്ടമ്യാം ദശമ്യാം ച വിശുദ്ധധീഃ ।
ഏകാദശ്യാം ത്രയോദശ്യാം യഃ പഠേത്സാധകഃ സുധീഃ ॥14॥
യം യം കാമയതേ കാമം തം തമാപ്നോതി സാധകഃ ।
രാധാകൃപാകടാക്ഷേണ ഭക്തിഃസ്യാത് പ്രേമലക്ഷണാ ॥15॥
ഊരുദഘ്നേ നാഭിദഘ്നേ ഹൃദ്ദഘ്നേ കംഠദഘ്നകേ ।
രാധാകുംഡജലേ സ്ഥിതാ യഃ പഠേത് സാധകഃ ശതമ് ॥16॥
തസ്യ സര്വാര്ഥ സിദ്ധിഃ സ്യാദ് വാക്സാമര്ഥ്യം തഥാ ലഭേത് ।
ഐശ്വര്യം ച ലഭേത് സാക്ഷാദ്ദൃശാ പശ്യതി രാധികാമ് ॥17॥
തേന സ തത്ക്ഷണാദേവ തുഷ്ടാ ദത്തേ മഹാവരമ് ।
യേന പശ്യതി നേത്രാഭ്യാം തത് പ്രിയം ശ്യാമസുംദരമ് ॥18॥
നിത്യലീലാ–പ്രവേശം ച ദദാതി ശ്രീ-വ്രജാധിപഃ ।
അതഃ പരതരം പ്രാര്ഥ്യം വൈഷ്ണവസ്യ ന വിദ്യതേ ॥19॥
॥ ഇതി ശ്രീമദൂര്ധ്വാമ്നായേ ശ്രീരാധികായാഃ കൃപാകടാക്ഷസ്തോത്രം സംപൂര്ണമ് ॥