അഥ നാരായന ഹൃദയ സ്തോത്രമ്
അസ്യ ശ്രീനാരായണഹൃദയസ്തോത്രമംത്രസ്യ ഭാര്ഗവ ഋഷിഃ, അനുഷ്ടുപ്ഛംദഃ, ശ്രീലക്ഷ്മീനാരായണോ ദേവതാ, ഓം ബീജം, നമശ്ശക്തിഃ, നാരായണായേതി കീലകം, ശ്രീലക്ഷ്മീനാരായണ പ്രീത്യര്ഥേ ജപേ വിനിയോഗഃ ।
കരന്യാസഃ ।
ഓം നാരായണഃ പരം ജ്യോതിരിതി അംഗുഷ്ഠാഭ്യാം നമഃ ।
നാരായണഃ പരം ബ്രഹ്മേതി തര്ജനീഭ്യാം നമഃ ।
നാരായണഃ പരോ ദേവ ഇതി മധ്യമാഭ്യാം നമഃ ।
നാരായണഃ പരം ധാമേതി അനാമികാഭ്യാം നമഃ ।
നാരായണഃ പരോ ധര്മ ഇതി കനിഷ്ഠികാഭ്യാം നമഃ ।
വിശ്വം നാരായണ ഇതി കരതലകരപൃഷ്ഠാഭ്യാം നമഃ ।
അംഗന്യാസഃ ।
നാരായണഃ പരം ജ്യോതിരിതി ഹൃദയായ നമഃ ।
നാരായണഃ പരം ബ്രഹ്മേതി ശിരസേ സ്വാഹാ ।
നാരായണഃ പരോ ദേവ ഇതി ശിഖായൈ വൌഷട് ।
നാരായണഃ പരം ധാമേതി കവചായ ഹുമ് ।
നാരായണഃ പരോ ധര്മ ഇതി നേത്രാഭ്യാം വൌഷട് ।
വിശ്വം നാരായണ ഇതി അസ്ത്രായ ഫട് ।
ദിഗ്ബംധഃ ।
ഓം ഐംദ്ര്യാദിദശദിശം ഓം നമഃ സുദര്ശനായ സഹസ്രാരായ ഹും ഫട് ബധ്നാമി നമശ്ചക്രായ സ്വാഹാ । ഇതി പ്രതിദിശം യോജ്യമ് ।
അഥ ധ്യാനമ് ।
ഉദ്യാദാദിത്യസംകാശം പീതവാസം ചതുര്ഭുജമ് ।
ശംഖചക്രഗദാപാണിം ധ്യായേല്ലക്ഷ്മീപതിം ഹരിമ് ॥ 1 ॥
ത്രൈലോക്യാധാരചക്രം തദുപരി കമഠം തത്ര ചാനംതഭോഗീ
തന്മധ്യേ ഭൂമിപദ്മാംകുശശിഖരദളം കര്ണികാഭൂതമേരുമ് ।
തത്രസ്ഥം ശാംതമൂര്തിം മണിമയമകുടം കുംഡലോദ്ഭാസിതാംഗം
ലക്ഷ്മീനാരായണാഖ്യം സരസിജനയനം സംതതം ചിംതയാമി ॥ 2 ॥
അഥ മൂലാഷ്ടകമ് ।
ഓമ് ॥ നാരായണഃ പരം ജ്യോതിരാത്മാ നാരായണഃ പരഃ ।
നാരായണഃ പരം ബ്രഹ്മ നാരായണ നമോഽസ്തു തേ ॥ 1 ॥
നാരായണഃ പരോ ദേവോ ധാതാ നാരായണഃ പരഃ ।
നാരായണഃ പരോ ധാതാ നാരായണ നമോഽസ്തു തേ ॥ 2 ॥
നാരായണഃ പരം ധാമ ധ്യാനം നാരായണഃ പരഃ ।
നാരായണ പരോ ധര്മോ നാരായണ നമോഽസ്തു തേ ॥ 3 ॥
നാരായണഃ പരോവേദ്യഃ വിദ്യാ നാരായണഃ പരഃ ।
വിശ്വം നാരായണഃ സാക്ഷാന്നാരായണ നമോഽസ്തു തേ ॥ 4 ॥
നാരായണാദ്വിധിര്ജാതോ ജാതോ നാരായണാദ്ഭവഃ ।
ജാതോ നാരായണാദിംദ്രോ നാരായണ നമോഽസ്തു തേ ॥ 5 ॥
രവിര്നാരായണസ്തേജഃ ചംദ്രോ നാരായണോ മഹഃ ।
വഹ്നിര്നാരായണഃ സാക്ഷാന്നാരായണ നമോഽസ്തു തേ ॥ 6 ॥
നാരായണ ഉപാസ്യഃ സ്യാദ്ഗുരുര്നാരായണഃ പരഃ ।
നാരായണഃ പരോ ബോധോ നാരായണ നമോഽസ്തു തേ ॥ 7 ॥
നാരായണഃ ഫലം മുഖ്യം സിദ്ധിര്നാരായണഃ സുഖമ് ।
സേവ്യോനാരായണഃ ശുദ്ധോ നാരായണ നമോഽസ്തു തേ ॥ 8 ॥ [ഹരി]
അഥ പ്രാര്ഥനാദശകമ് ।
നാരായണ ത്വമേവാസി ദഹരാഖ്യേ ഹൃദി സ്ഥിതഃ ।
പ്രേരകഃ പ്രേര്യമാണാനാം ത്വയാ പ്രേരിതമാനസഃ ॥ 9 ॥
ത്വദാജ്ഞാം ശിരസാ ധൃത്വാ ജപാമി ജനപാവനമ് ।
നാനോപാസനമാര്ഗാണാം ഭവകൃദ്ഭാവബോധകഃ ॥ 10 ॥
ഭാവാര്ഥകൃദ്ഭവാതീതോ ഭവ സൌഖ്യപ്രദോ മമ ।
ത്വന്മായാമോഹിതം വിശ്വം ത്വയൈവ പരികല്പിതമ് ॥ 11 ॥
ത്വദധിഷ്ഠാനമാത്രേണ സാ വൈ സര്വാര്ഥകാരിണീ ।
ത്വമേതാം ച പുരസ്കൃത്യ സര്വകാമാന്പ്രദര്ശയ ॥ 12 ॥
ന മേ ത്വദന്യസ്ത്രാതാസ്തി ത്വദന്യന്ന ഹി ദൈവതമ് ।
ത്വദന്യം ന ഹി ജാനാമി പാലകം പുണ്യവര്ധനമ് ॥ 13 ॥
യാവത്സാംസാരികോ ഭാവോ മനസ്സ്ഥോ ഭാവനാത്മകഃ ।
താവത്സിദ്ധിര്ഭവേത്സാധ്യാ സര്വഥാ സര്വദാ വിഭോ ॥ 14 ॥
പാപിനാമഹമേവാഗ്ര്യോ ദയാളൂനാം ത്വമഗ്രണീഃ ।
ദയനീയോ മദന്യോഽസ്തി തവ കോഽത്ര ജഗത്ത്രയേ ॥ 15 ॥
ത്വയാഹം നൈവ സൃഷ്ടശ്ചേന്ന സ്യാത്തവ ദയാളുതാ ।
ആമയോ വാ ന സൃഷ്ടശ്ചേദൌഷധസ്യ വൃഥോദയഃ ॥ 16 ॥
പാപസംഘപരിശ്രാംതഃ പാപാത്മാ പാപരൂപധൃത് ।
ത്വദന്യഃ കോഽത്ര പാപേഭ്യസ്ത്രാതാസ്തി ജഗതീതലേ ॥ 17 ॥
ത്വമേവ മാതാ ച പിതാ ത്വമേവ
ത്വമേവ ബംധുശ്ച സഖാ ത്വമേവ ।
ത്വമേവ സേവ്യശ്ച ഗുരുസ്ത്വമേവ
ത്വമേവ സര്വം മമ ദേവ ദേവ ॥ 18 ॥
പ്രാര്ഥനാദശകം ചൈവ മൂലാഷ്ടകമതഃ പരമ് ।
യഃ പഠേച്ഛൃണുയാന്നിത്യം തസ്യ ലക്ഷ്മീഃ സ്ഥിരാ ഭവേത് ॥ 19 ॥
നാരായണസ്യ ഹൃദയം സര്വാഭീഷ്ടഫലപ്രദമ് ।
ലക്ഷ്മീഹൃദയകം സ്തോത്രം യദി ചേത്തദ്വിനാകൃതമ് ॥ 20 ॥
തത്സര്വം നിഷ്ഫലം പ്രോക്തം ലക്ഷ്മീഃ ക്രുദ്ധ്യതി സര്വദാ ।
ഏതത്സംകലിതം സ്തോത്രം സര്വകാമഫലപ്രദമ് ॥ 21 ॥
ലക്ഷ്മീഹൃദയകം ചൈവ തഥാ നാരായണാത്മകമ് ।
ജപേദ്യഃ സംകലീകൃത്യ സര്വാഭീഷ്ടമവാപ്നുയാത് ॥ 22 ॥
നാരായണസ്യ ഹൃദയമാദൌ ജപ്ത്വാ തതഃ പരമ് ।
ലക്ഷ്മീഹൃദയകം സ്തോത്രം ജപേന്നാരായണം പുനഃ ॥ 23 ॥
പുനര്നാരായണം ജപ്ത്വാ പുനര്ലക്ഷ്മീനുതിം ജപേത് ।
പുനര്നാരായണം ജാപ്യം സംകലീകരണം ഭവേത് ॥ 24 ॥
ഏവം മധ്യേ ദ്വിവാരേണ ജപേത്സംകലിതം തു തത് ।
ലക്ഷ്മീഹൃദയകം സ്തോത്രം സര്വകാമപ്രകാശിതമ് ॥ 25 ॥
തദ്വജ്ജപാദികം കുര്യാദേതത്സംകലിതം ശുഭമ് ।
സര്വാന്കാമാനവാപ്നോതി ആധിവ്യാധിഭയം ഹരേത് ॥ 26 ॥
ഗോപ്യമേതത്സദാ കുര്യാന്ന സര്വത്ര പ്രകാശയേത് ।
ഇതി ഗുഹ്യതമം ശാസ്ത്രം പ്രാപ്തം ബ്രഹ്മാദികൈഃ പുരാ ॥ 27 ॥
തസ്മാത്സര്വപ്രയത്നേന ഗോപയേത്സാധയേസുധീഃ ।
യത്രൈതത്പുസ്തകം തിഷ്ഠേല്ലക്ഷ്മീനാരായണാത്മകമ് ॥ 28 ॥
ഭൂതപൈശാചവേതാള ഭയം നൈവ തു സര്വദാ ।
ലക്ഷ്മീഹൃദയകം പ്രോക്തം വിധിനാ സാധയേത്സുധീഃ ॥ 29 ॥
ഭൃഗുവാരേ ച രാത്രൌ ച പൂജയേത്പുസ്തകദ്വയമ് ।
സര്വഥാ സര്വദാ സത്യം ഗോപയേത്സാധയേത്സുധീഃ ।
ഗോപനാത്സാധനാല്ലോകേ ധന്യോ ഭവതി തത്ത്വതഃ ॥ 30 ॥
ഇത്യഥര്വരഹസ്യേ ഉത്തരഭാഗേ നാരായണഹൃദയം സംപൂര്ണമ് ।
അഥ ലക്ഷ്മീ ഹൃദയ സ്തോത്രമ്
അസ്യ ശ്രീ മഹാലക്ഷ്മീഹൃദയസ്തോത്ര മഹാമംത്രസ്യ ഭാര്ഗവ ഋഷിഃ, അനുഷ്ടുപാദീനി നാനാഛംദാംസി, ആദ്യാദി ശ്രീമഹാലക്ഷ്മീര്ദേവതാ, ശ്രീം ബീജം, ഹ്രീം ശക്തിഃ, ഐം കീലകം, ആദ്യാദിമഹാലക്ഷ്മീ പ്രസാദസിദ്ധ്യര്ഥം ജപേ വിനിയോഗഃ ॥
ഋഷ്യാദിന്യാസഃ –
ഓം ഭാര്ഗവൃഷയേ നമഃ ശിരസി ।
ഓം അനുഷ്ടുപാദിനാനാഛംദോഭ്യോ നമോ മുഖേ ।
ഓം ആദ്യാദിശ്രീമഹാലക്ഷ്മീ ദേവതായൈ നമോ ഹൃദയേ ।
ഓം ശ്രീം ബീജായ നമോ ഗുഹ്യേ ।
ഓം ഹ്രീം ശക്തയേ നമഃ പാദയോഃ ।
ഓം ഐം കീലകായ നമോ നാഭൌ ।
ഓം വിനിയോഗായ നമഃ സര്വാംഗേ ।
കരന്യാസഃ –
ഓം ശ്രീം അംഗുഷ്ഠാഭ്യാം നമഃ ।
ഓം ഹ്രീം തര്ജനീഭ്യാം നമഃ ।
ഓം ഐം മധ്യമാഭ്യാം നമഃ ।
ഓം ശ്രീം അനാമികാഭ്യാം നമഃ ।
ഓം ഹ്രീം കനിഷ്ഠികാഭ്യാം നമഃ ।
ഓം ഐം കരതല കരപൃഷ്ഠാഭ്യാം നമഃ ।
അംഗന്യാസഃ –
ഓം ശ്രീം ഹൃദയായ നമഃ ।
ഓം ഹ്രീം ശിരസേ സ്വാഹാ ।
ഓം ഐം ശിഖായൈ വഷട് ।
ഓം ശ്രീം കവചായ ഹുമ് ।
ഓം ഹ്രീം നേത്രത്രയായ വൌഷട് ।
ഓം ഐം അസ്ത്രായ ഫട് ।
ഓം ശ്രീം ഹ്രീം ഐം ഇതി ദിഗ്ബംധഃ ।
അഥ ധ്യാനമ് ।
ഹസ്തദ്വയേന കമലേ ധാരയംതീം സ്വലീലയാ ।
ഹാരനൂപുരസംയുക്താം ലക്ഷ്മീം ദേവീം വിചിംതയേ ॥
കൌശേയപീതവസനാമരവിംദനേത്രാം
പദ്മദ്വയാഭയവരോദ്യതപദ്മഹസ്താമ് ।
ഉദ്യച്ഛതാര്കസദൃശീം പരമാംകസംസ്ഥാം
ധ്യായേദ്വിധീശനതപാദയുഗാം ജനിത്രീമ് ॥
പീതവസ്ത്രാം സുവര്ണാംഗീം പദ്മഹസ്തദ്വായാന്വിതാമ് ।
ലക്ഷ്മീം ധ്യാത്വേതി മംത്രേണ സ ഭവേത്പൃഥിവീപതിഃ ॥
മാതുലുംഗം ഗദാം ഖേടം പാണൌ പാത്രം ച ബിഭ്രതീ ।
നാഗം ലിംഗം ച യോനിം ച ബിഭ്രതീം ചൈവ മൂര്ധനി ॥
[ ഇതി ധ്യാത്വാ മാനസോപചാരൈഃ സംപൂജ്യ ।
ശംഖചക്രഗദാഹസ്തേ ശുഭ്രവര്ണേ സുവാസിനീ ।
മമ ദേഹി വരം ലക്ഷ്മീഃ സര്വസിദ്ധിപ്രദായിനീ ।
ഇതി സംപ്രാര്ഥ്യ ഓം ശ്രീം ഹ്രീം ഐം മഹാലക്ഷ്മ്യൈ കമലധാരിണ്യൈ സിംഹവാഹിന്യൈ സ്വാഹാ ഇതി മംത്രം ജപ്ത്വാ പുനഃ പൂര്വവദ്ധൃദയാദി ഷഡംഗന്യാസം കൃത്വാ സ്തോത്രം പഠേത് । ]
സ്തോത്രമ് ।
വംദേ ലക്ഷ്മീം പരമശിവമയീം ശുദ്ധജാംബൂനദാഭാം
തേജോരൂപാം കനകവസനാം സര്വഭൂഷോജ്ജ്വലാംഗീമ് ।
ബീജാപൂരം കനകകലശം ഹേമപദ്മം ദധാനാ-
-മാദ്യാം ശക്തിം സകലജനനീം വിഷ്ണുവാമാംകസംസ്ഥാമ് ॥ 1 ॥
ശ്രീമത്സൌഭാഗ്യജനനീം സ്തൌമി ലക്ഷ്മീം സനാതനീമ് ।
സര്വകാമഫലാവാപ്തിസാധനൈകസുഖാവഹാമ് ॥ 2 ॥
സ്മരാമി നിത്യം ദേവേശി ത്വയാ പ്രേരിതമാനസഃ ।
ത്വദാജ്ഞാം ശിരസാ ധൃത്വാ ഭജാമി പരമേശ്വരീമ് ॥ 3 ॥
സമസ്തസംപത്സുഖദാം മഹാശ്രിയം
സമസ്തസൌഭാഗ്യകരീം മഹാശ്രിയമ് ।
സമസ്തകള്യാണകരീം മഹാശ്രിയം
ഭജാമ്യഹം ജ്ഞാനകരീം മഹാശ്രിയമ് ॥ 4 ॥
വിജ്ഞാനസംപത്സുഖദാം സനാതനീം
വിചിത്രവാഗ്ഭൂതികരീം മനോഹരാമ് ।
അനംതസംമോദസുഖപ്രദായിനീം
നമാമ്യഹം ഭൂതികരീം ഹരിപ്രിയാമ് ॥ 5 ॥
സമസ്തഭൂതാംതരസംസ്ഥിതാ ത്വം
സമസ്തഭോക്ത്രീശ്വരി വിശ്വരൂപേ ।
തന്നാസ്തി യത്ത്വദ്വ്യതിരിക്തവസ്തു
ത്വത്പാദപദ്മം പ്രണമാമ്യഹം ശ്രീഃ ॥ 6 ॥
ദാരിദ്ര്യ ദുഃഖൌഘതമോപഹംത്രീ
ത്വത്പാദപദ്മം മയി സന്നിധത്സ്വ ।
ദീനാര്തിവിച്ഛേദനഹേതുഭൂതൈഃ
കൃപാകടാക്ഷൈരഭിഷിംച മാം ശ്രീഃ ॥ 7 ॥
അംബ പ്രസീദ കരുണാസുധയാര്ദ്രദൃഷ്ട്യാ
മാം ത്വത്കൃപാദ്രവിണഗേഹമിമം കുരുഷ്വ ।
ആലോകയ പ്രണതഹൃദ്ഗതശോകഹംത്രീ
ത്വത്പാദപദ്മയുഗളം പ്രണമാമ്യഹം ശ്രീഃ ॥ 8 ॥
ശാംത്യൈ നമോഽസ്തു ശരണാഗതരക്ഷണായൈ
കാംത്യൈ നമോഽസ്തു കമനീയഗുണാശ്രയായൈ ।
ക്ഷാംത്യൈ നമോഽസ്തു ദുരിതക്ഷയകാരണായൈ
ദാത്ര്യൈ നമോഽസ്തു ധനധാന്യസമൃദ്ധിദായൈ ॥ 9 ॥
ശക്ത്യൈ നമോഽസ്തു ശശിശേഖരസംസ്തുതായൈ
രത്യൈ നമോഽസ്തു രജനീകരസോദരായൈ ।
ഭക്ത്യൈ നമോഽസ്തു ഭവസാഗരതാരകായൈ
മത്യൈ നമോഽസ്തു മധുസൂദനവല്ലഭായൈ ॥ 10 ॥
ലക്ഷ്മ്യൈ നമോഽസ്തു ശുഭലക്ഷണലക്ഷിതായൈ
സിദ്ധ്യൈ നമോഽസ്തു ശിവസിദ്ധസുപൂജിതായൈ ।
ധൃത്യൈ നമോഽസ്ത്വമിതദുര്ഗതിഭംജനായൈ
ഗത്യൈ നമോഽസ്തു വരസദ്ഗതിദായികായൈ ॥ 11 ॥
ദേവ്യൈ നമോഽസ്തു ദിവി ദേവഗണാര്ചിതായൈ
ഭൂത്യൈ നമോഽസ്തു ഭുവനാര്തിവിനാശനായൈ ।
ധാത്ര്യൈ നമോഽസ്തു ധരണീധരവല്ലഭായൈ
പുഷ്ട്യൈ നമോഽസ്തു പുരുഷോത്തമവല്ലഭായൈ ॥ 12 ॥
സുതീവ്രദാരിദ്ര്യവിദുഃഖഹംത്ര്യൈ
നമോഽസ്തു തേ സര്വഭയാപഹംത്ര്യൈ ।
ശ്രീവിഷ്ണുവക്ഷഃസ്ഥലസംസ്ഥിതായൈ
നമോ നമഃ സര്വവിഭൂതിദായൈ ॥ 13 ॥
ജയതു ജയതു ലക്ഷ്മീര്ലക്ഷണാലംകൃതാംഗീ
ജയതു ജയതു പദ്മാ പദ്മസദ്മാഭിവംദ്യാ ।
ജയതു ജയതു വിദ്യാ വിഷ്ണുവാമാംകസംസ്ഥാ
ജയതു ജയതു സമ്യക്സര്വസംപത്കരീ ശ്രീഃ ॥ 14 ॥
ജയതു ജയതു ദേവീ ദേവസംഘാഭിപൂജ്യാ
ജയതു ജയതു ഭദ്രാ ഭാര്ഗവീ ഭാഗ്യരൂപാ ।
ജയതു ജയതു നിത്യാ നിര്മലജ്ഞാനവേദ്യാ
ജയതു ജയതു സത്യാ സര്വഭൂതാംതരസ്ഥാ ॥ 15 ॥
ജയതു ജയതു രമ്യാ രത്നഗര്ഭാംതരസ്ഥാ
ജയതു ജയതു ശുദ്ധാ ശുദ്ധജാംബൂനദാഭാ ।
ജയതു ജയതു കാംതാ കാംതിമദ്ഭാസിതാംഗീ
ജയതു ജയതു ശാംതാ ശീഘ്രമാഗച്ഛ സൌമ്യേ ॥ 16 ॥
യസ്യാഃ കലായാഃ കമലോദ്ഭവാദ്യാ
രുദ്രാശ്ച ശക്ര പ്രമുഖാശ്ച ദേവാഃ ।
ജീവംതി സര്വേഽപി സശക്തയസ്തേ
പ്രഭുത്വമാപ്താഃ പരമായുഷസ്തേ ॥ 17 ॥
ലിലേഖ നിടിലേ വിധിര്മമ ലിപിം വിസൃജ്യാംതരം
ത്വയാ വിലിഖിതവ്യമേതദിതി തത്ഫലപ്രാപ്തയേ ।
തദംതരഫലേസ്ഫുടം കമലവാസിനീ ശ്രീരിമാം
സമര്പയ സമുദ്രികാം സകലഭാഗ്യസംസൂചികാമ് ॥ 18 ॥
കലയാ തേ യഥാ ദേവി ജീവംതി സചരാചരാഃ ।
തഥാ സംപത്കരേ ലക്ഷ്മി സര്വദാ സംപ്രസീദ മേ ॥ 19 ॥
യഥാ വിഷ്ണുര്ധ്രുവേ നിത്യം സ്വകലാം സംന്യവേശയത് ।
തഥൈവ സ്വകലാം ലക്ഷ്മി മയി സമ്യക് സമര്പയ ॥ 20 ॥
സര്വസൌഖ്യപ്രദേ ദേവി ഭക്താനാമഭയപ്രദേ ।
അചലാം കുരു യത്നേന കലാം മയി നിവേശിതാമ് ॥ 21 ॥
മുദാസ്താം മത്ഫാലേ പരമപദലക്ഷ്മീഃ സ്ഫുടകലാ
സദാ വൈകുംഠശ്രീര്നിവസതു കലാ മേ നയനയോഃ ।
വസേത്സത്യേ ലോകേ മമ വചസി ലക്ഷ്മീര്വരകലാ
ശ്രിയഃ ശ്വേതദ്വീപേ നിവസതു കലാ മേ സ്വകരയോഃ ॥ 22 ॥
താവന്നിത്യം മമാംഗേഷു ക്ഷീരാബ്ധൌ ശ്രീകലാ വസേത് ।
സൂര്യാചംദ്രമസൌ യാവദ്യാവല്ലക്ഷ്മീപതിഃ ശ്രിയാഃ ॥ 23 ॥
സര്വമംഗളസംപൂര്ണാ സര്വൈശ്വര്യസമന്വിതാ ।
ആദ്യാദി ശ്രീര്മഹാലക്ഷ്മീ ത്വത്കലാ മയി തിഷ്ഠതു ॥ 24 ॥
അജ്ഞാനതിമിരം ഹംതും ശുദ്ധജ്ഞാനപ്രകാശികാ ।
സര്വൈശ്വര്യപ്രദാ മേഽസ്തു ത്വത്കലാ മയി സംസ്ഥിതാ ॥ 25 ॥
അലക്ഷ്മീം ഹരതു ക്ഷിപ്രം തമഃ സൂര്യപ്രഭാ യഥാ ।
വിതനോതു മമ ശ്രേയസ്ത്വത്കളാ മയി സംസ്ഥിതാ ॥ 26 ॥
ഐശ്വര്യമംഗളോത്പത്തിസ്ത്വത്കലായാം നിധീയതേ ।
മയി തസ്മാത്കൃതാര്ഥോഽസ്മി പാത്രമസ്മി സ്ഥിതേസ്തവ ॥ 27 ॥
ഭവദാവേശഭാഗ്യാര്ഹോ ഭാഗ്യവാനസ്മി ഭാര്ഗവി ।
ത്വത്പ്രസാദാത്പവിത്രോഽഹം ലോകമാതര്നമോഽസ്തു തേ ॥ 28 ॥
പുനാസി മാം ത്വത്കലയൈവ യസ്മാ-
-ദതഃ സമാഗച്ഛ മമാഗ്രതസ്ത്വമ് ।
പരം പദം ശ്രീര്ഭവ സുപ്രസന്നാ
മയ്യച്യുതേന പ്രവിശാദിലക്ഷ്മീഃ ॥ 29 ॥
ശ്രീവൈകുംഠസ്ഥിതേ ലക്ഷ്മി സമാഗച്ഛ മമാഗ്രതഃ ।
നാരായണേന സഹ മാം കൃപാദൃഷ്ട്യാഽവലോകയ ॥ 30 ॥
സത്യലോകസ്ഥിതേ ലക്ഷ്മി ത്വം മമാഗച്ഛ സന്നിധിമ് ।
വാസുദേവേന സഹിതാ പ്രസീദ വരദാ ഭവ ॥ 31 ॥
ശ്വേതദ്വീപസ്ഥിതേ ലക്ഷ്മി ശീഘ്രമാഗച്ഛ സുവ്രതേ ।
വിഷ്ണുനാ സഹിതേ ദേവി ജഗന്മാതഃ പ്രസീദ മേ ॥ 32 ॥
ക്ഷീരാംബുധിസ്ഥിതേ ലക്ഷ്മി സമാഗച്ഛ സമാധവാ ।
ത്വത്കൃപാദൃഷ്ടിസുധയാ സതതം മാം വിലോകയ ॥ 33 ॥
രത്നഗര്ഭസ്ഥിതേ ലക്ഷ്മി പരിപൂര്ണേ ഹിരണ്മയേ ।
സമാഗച്ഛ സമാഗച്ഛ സ്ഥിത്വാഽഽശു പുരതോ മമ ॥ 34 ॥
സ്ഥിരാ ഭവ മഹാലക്ഷ്മി നിശ്ചലാ ഭവ നിര്മലേ ।
പ്രസന്നേ കമലേ ദേവി പ്രസന്നഹൃദയാ ഭവ ॥ 35 ॥
ശ്രീധരേ ശ്രീമഹാഭൂതേ ത്വദംതഃസ്ഥം മഹാനിധിമ് ।
ശീഘ്രമുദ്ധൃത്യ പുരതഃ പ്രദര്ശയ സമര്പയ ॥ 36 ॥
വസുംധരേ ശ്രീവസുധേ വസുദോഗ്ധ്രി കൃപാമയേ ।
ത്വത്കുക്ഷിഗതസര്വസ്വം ശീഘ്രം മേ സംപ്രദര്ശയ ॥ 37 ॥
വിഷ്ണുപ്രിയേ രത്നഗര്ഭേ സമസ്തഫലദേ ശിവേ ।
ത്വദ്ഗര്ഭഗതഹേമാദീന് സംപ്രദര്ശയ ദര്ശയ ॥ 38 ॥
രസാതലഗതേ ലക്ഷ്മി ശീഘ്രമാഗച്ഛ മേ പുരഃ ।
ന ജാനേ പരമം രൂപം മാതര്മേ സംപ്രദര്ശയ ॥ 39 ॥
ആവിര്ഭവ മനോവേഗാച്ഛീഘ്രമാഗച്ഛ മേ പുരഃ ।
മാ വത്സ ഭൈരിഹേത്യുക്ത്വാ കാമം ഗൌരിവ രക്ഷ മാമ് ॥ 40 ॥
ദേവി ശീഘ്രം സമാഗച്ഛ ധരണീഗര്ഭസംസ്ഥിതേ ।
മാതസ്ത്വദ്ഭൃത്യഭൃത്യോഽഹം മൃഗയേ ത്വാം കുതൂഹലാത് ॥ 41 ॥
ഉത്തിഷ്ഠ ജാഗൃഹി ത്വം മേ സമുത്തിഷ്ഠ സുജാഗൃഹി ।
അക്ഷയാന് ഹേമകലശാന് സുവര്ണേന സുപൂരിതാന് ॥ 42 ॥
നിക്ഷേപാന്മേ സമാകൃഷ്യ സമുദ്ധൃത്യ മമാഗ്രതഃ ।
സമുന്നതാനനാ ഭൂത്വാ സമാധേഹി ധരാംതരാത് ॥ 43 ॥
മത്സന്നിധിം സമാഗച്ഛ മദാഹിതകൃപാരസാത് ।
പ്രസീദ ശ്രേയസാം ദോഗ്ധ്രീ ലക്ഷ്മീര്മേ നയനാഗ്രതഃ ॥ 44 ॥
അത്രോപവിശ ലക്ഷ്മി ത്വം സ്ഥിരാ ഭവ ഹിരണ്മയേ ।
സുസ്ഥിരാ ഭവ സംപ്രീത്യാ പ്രസീദ വരദാ ഭവ ॥ 45 ॥
ആനീതാംസ്തു തഥാ ദേവി നിധീന്മേ സംപ്രദര്ശയ ।
അദ്യ ക്ഷണേന സഹസാ ദത്ത്വാ സംരക്ഷ മാം സദാ ॥ 46 ॥
മയി തിഷ്ഠ തഥാ നിത്യം യഥേംദ്രാദിഷു തിഷ്ഠസി ।
അഭയം കുരു മേ ദേവി മഹാലക്ഷ്മീര്നമോഽസ്തു തേ ॥ 47 ॥
സമാഗച്ഛ മഹാലക്ഷ്മി ശുദ്ധജാംബൂനദപ്രഭേ ।
പ്രസീദ പുരതഃ സ്ഥിത്വാ പ്രണതം മാം വിലോകയ ॥ 48 ॥
ലക്ഷ്മീര്ഭുവം ഗതാ ഭാസി യത്ര യത്ര ഹിരണ്മയീ ।
തത്ര തത്ര സ്ഥിതാ ത്വം മേ തവ രൂപം പ്രദര്ശയ ॥ 49 ॥
ക്രീഡംതീ ബഹുധാ ഭൂമൌ പരിപൂര്ണകൃപാമയി ।
മമ മൂര്ധനി തേ ഹസ്തമവിലംബിതമര്പയ ॥ 50 ॥
ഫലദ്ഭാഗ്യോദയേ ലക്ഷ്മി സമസ്തപുരവാസിനീ ।
പ്രസീദ മേ മഹാലക്ഷ്മി പരിപൂര്ണമനോരഥേ ॥ 51 ॥
അയോധ്യാദിഷു സര്വേഷു നഗരേഷു സമാസ്ഥിതേ ।
വൈഭവൈര്വിവിധൈര്യുക്തൈഃ സമാഗച്ഛ മുദാന്വിതേ ॥ 52 ॥
സമാഗച്ഛ സമാഗച്ഛ മമാഗ്രേ ഭവ സുസ്ഥിരാ ।
കരുണാരസനിഷ്യംദനേത്രദ്വയ വിലാസിനീ ॥ 53 ॥ [നിഷ്പന്ന]
സന്നിധത്സ്വ മഹാലക്ഷ്മി ത്വത്പാണിം മമ മസ്തകേ ।
കരുണാസുധയാ മാം ത്വമഭിഷിംച്യ സ്ഥിരം കുരു ॥ 54 ॥
സര്വരാജഗൃഹേ ലക്ഷ്മി സമാഗച്ഛ ബലാന്വിതേ । [മുദാന്വിതേ]
സ്ഥിത്വാഽഽശു പുരതോ മേഽദ്യ പ്രസാദേനാഽഭയം കുരു ॥ 55 ॥
സാദരം മസ്തകേ ഹസ്തം മമ ത്വം കൃപയാര്പയ ।
സര്വരാജഗൃഹേ ലക്ഷ്മി ത്വത്കലാ മയി തിഷ്ഠതു ॥ 56 ॥
ആദ്യാദി ശ്രീമഹാലക്ഷ്മി വിഷ്ണുവാമാംകസംസ്ഥിതേ ।
പ്രത്യക്ഷം കുരു മേ രൂപം രക്ഷ മാം ശരണാഗതമ് ॥ 57 ॥
പ്രസീദ മേ മഹാലക്ഷ്മി സുപ്രസീദ മഹാശിവേ ।
അചലാ ഭവ സംപ്രീത്യാ സുസ്ഥിരാ ഭവ മദ്ഗൃഹേ ॥ 58 ॥
യാവത്തിഷ്ഠംതി വേദാശ്ച യാവച്ചംദ്രദിവാകരൌ ।
യാവദ്വിഷ്ണുശ്ച യാവത്ത്വം താവത്കുരു കൃപാം മയി ॥ 59 ॥
ചാംദ്രീകലാ യഥാ ശുക്ലേ വര്ധതേ സാ ദിനേ ദിനേ ।
തഥാ ദയാ തേ മയ്യേവ വര്ധതാമഭിവര്ധതാമ് ॥ 60 ॥
യഥാ വൈകുംഠനഗരേ യഥാ വൈ ക്ഷീരസാഗരേ ।
തഥാ മദ്ഭവനേ തിഷ്ഠ സ്ഥിരം ശ്രീവിഷ്ണുനാ സഹ ॥ 61 ॥
യോഗിനാം ഹൃദയേ നിത്യം യഥാ തിഷ്ഠസി വിഷ്ണുനാ ।
തഥാ മദ്ഭവനേ തിഷ്ഠ സ്ഥിരം ശ്രീവിഷ്ണുനാ സഹ ॥ 62 ॥
നാരായണസ്യ ഹൃദയേ ഭവതീ യഥാസ്തേ
നാരായണോഽപി തവ ഹൃത്കമലേ യഥാസ്തേ ।
നാരായണസ്ത്വമപി നിത്യമുഭൌ തഥൈവ
തൌ തിഷ്ഠതാം ഹൃദി മമാപി ദയാന്വിതൌ ശ്രീഃ ॥ 63 ॥
വിജ്ഞാനവൃദ്ധിം ഹൃദയേ കുരു ശ്രീഃ
സൌഭാഗ്യവൃദ്ധിം കുരു മേ ഗൃഹേ ശ്രീഃ ।
ദയാസുവൃദ്ധിം കുരുതാം മയി ശ്രീഃ
സുവര്ണവൃദ്ധിം കുരു മേ ഗൃഹേ ശ്രീഃ ॥ 64 ॥
ന മാം ത്യജേഥാഃ ശ്രിതകല്പവല്ലി
സദ്ഭക്തചിംതാമണികാമധേനോ ।
വിശ്വസ്യ മാതര്ഭവ സുപ്രസന്നാ
ഗൃഹേ കലത്രേഷു ച പുത്രവര്ഗേ ॥ 65 ॥
ആദ്യാദിമായേ ത്വമജാംഡബീജം
ത്വമേവ സാകാരനിരാകൃതിസ്ത്വമ് ।
ത്വയാ ധൃതാശ്ചാബ്ജഭവാംഡസംഘാ-
-ശ്ചിത്രം ചരിത്രം തവ ദേവി വിഷ്ണോഃ ॥ 66 ॥
ബ്രഹ്മരുദ്രാദയോ ദേവാ വേദാശ്ചാപി ന ശക്നുയുഃ ।
മഹിമാനം തവ സ്തോതും മംദോഽഹം ശക്നുയാം കഥമ് ॥ 67 ॥
അംബ ത്വദ്വത്സവാക്യാനി സൂക്താസൂക്താനി യാനി ച ।
താനി സ്വീകുരു സര്വജ്ഞേ ദയാലുത്വേന സാദരമ് ॥ 68 ॥
ഭവതീം ശരണം ഗത്വാ കൃതാര്ഥാഃ സ്യുഃ പുരാതനാഃ ।
ഇതി സംചിംത്യ മനസാ ത്വാമഹം ശരണം വ്രജേ ॥ 69 ॥
അനംതാ നിത്യസുഖിനസ്ത്വദ്ഭക്താസ്ത്വത്പരായണാഃ ।
ഇതി വേദപ്രമാണാദ്ധി ദേവി ത്വാം ശരണം വ്രജേ ॥ 70 ॥
തവ പ്രതിജ്ഞാ മദ്ഭക്താ ന നശ്യംതീത്യപി ക്വചിത് ।
ഇതി സംചിംത്യ സംചിംത്യ പ്രാണാന് സംധാരയാമ്യഹമ് ॥ 71 ॥
ത്വദധീനസ്ത്വഹം മാതസ്ത്വത്കൃപാ മയി വിദ്യതേ ।
യാവത്സംപൂര്ണകാമഃ സ്യാത്താവദ്ദേഹി ദയാനിധേ ॥ 72 ॥
ക്ഷണമാത്രം ന ശക്നോമി ജീവിതും ത്വത്കൃപാം വിനാ ।
ന ജീവംതീഹ ജലജാ ജലം ത്യക്ത്വാ ജലഗ്രഹാഃ ॥ 73 ॥
യഥാ ഹി പുത്രവാത്സല്യാജ്ജനനീ പ്രസ്നുതസ്തനീ ।
വത്സം ത്വരിതമാഗത്യ സംപ്രീണയതി വത്സലാ ॥ 74 ॥
യദി സ്യാം തവ പുത്രോഽഹം മാതാ ത്വം യദി മാമകീ ।
ദയാപയോധരസ്തന്യസുധാഭിരഭിഷിംച മാമ് ॥ 75 ॥
മൃഗ്യോ ന ഗുണലേശോഽപി മയി ദോഷൈകമംദിരേ ।
പാംസൂനാം വൃഷ്ടിബിംദൂനാം ദോഷാണാം ച ന മേ മതിഃ ॥ 76 ॥
പാപിനാമഹമേവാഗ്ര്യോ ദയാലൂനാം ത്വമഗ്രണീഃ ।
ദയനീയോ മദന്യോഽസ്തി തവ കോഽത്ര ജഗത്ത്രയേ ॥ 77 ॥
വിധിനാഹം ന സൃഷ്ടശ്ചേന്ന സ്യാത്തവ ദയാലുതാ ।
ആമയോ വാ ന സൃഷ്ടശ്ചേദൌഷധസ്യ വൃഥോദയഃ ॥ 78 ॥
കൃപാ മദഗ്രജാ കിം തേ അഹം കിം വാ തദഗ്രജഃ ।
വിചാര്യ ദേഹി മേ വിത്തം തവ ദേവി ദയാനിധേ ॥ 79 ॥
മാതാ പിതാ ത്വം ഗുരുസദ്ഗതിഃ ശ്രീ-
-സ്ത്വമേവ സംജീവനഹേതുഭൂതാ ।
അന്യം ന മന്യേ ജഗദേകനാഥേ
ത്വമേവ സര്വം മമ ദേവി സത്യേ ॥ 80 ॥
ആദ്യാദിലക്ഷ്മീര്ഭവ സുപ്രസന്നാ
വിശുദ്ധവിജ്ഞാനസുഖൈകദോഗ്ധ്രീ ।
അജ്ഞാനഹംത്രീ ത്രിഗുണാതിരിക്താ
പ്രജ്ഞാനനേത്രീ ഭവ സുപ്രസന്നാ ॥ 81 ॥
അശേഷവാഗ്ജാഡ്യമലാപഹംത്രീ
നവം നവം സ്പഷ്ടസുവാക്പ്രദായിനീ ।
മമേഹ ജിഹ്വാഗ്ര സുരംഗനര്തകീ [നര്തിനീ]
ഭവ പ്രസന്നാ വദനേ ച മേ ശ്രീഃ ॥ 82 ॥
സമസ്തസംപത്സുവിരാജമാനാ
സമസ്തതേജശ്ചയഭാസമാനാ ।
വിഷ്ണുപ്രിയേ ത്വം ഭവ ദീപ്യമാനാ
വാഗ്ദേവതാ മേ നയനേ പ്രസന്നാ ॥ 83 ॥
സര്വപ്രദര്ശേ സകലാര്ഥദേ ത്വം
പ്രഭാസുലാവണ്യദയാപ്രദോഗ്ധ്രീ ।
സുവര്ണദേ ത്വം സുമുഖീ ഭവ ശ്രീ-
-ര്ഹിരണ്മയീ മേ നയനേ പ്രസന്നാ ॥ 84 ॥
സര്വാര്ഥദാ സര്വജഗത്പ്രസൂതിഃ
സര്വേശ്വരീ സര്വഭയാപഹംത്രീ ।
സര്വോന്നതാ ത്വം സുമുഖീ ഭവ ശ്രീ-
-ര്ഹിരണ്മയീ മേ നയനേ പ്രസന്നാ ॥ 85 ॥
സമസ്തവിഘ്നൌഘവിനാശകാരിണീ
സമസ്തഭക്തോദ്ധരണേ വിചക്ഷണാ ।
അനംതസൌഭാഗ്യസുഖപ്രദായിനീ
ഹിരണ്മയീ മേ നയനേ പ്രസന്നാ ॥ 86 ॥
ദേവി പ്രസീദ ദയനീയതമായ മഹ്യം
ദേവാധിനാഥഭവദേവഗണാഭിവംദ്യേ ।
മാതസ്തഥൈവ ഭവ സന്നിഹിതാ ദൃശോര്മേ
പത്യാ സമം മമ മുഖേ ഭവ സുപ്രസന്നാ ॥ 87 ॥
മാ വത്സ ഭൈരഭയദാനകരോഽര്പിതസ്തേ
മൌലൌ മമേതി മയി ദീനദയാനുകംപേ ।
മാതഃ സമര്പയ മുദാ കരുണാകടാക്ഷം
മാംഗള്യബീജമിഹ നഃ സൃജ ജന്മ മാതഃ ॥ 88 ॥
കടാക്ഷ ഇഹ കാമധുക്തവ മനസ്തു ചിംതാമണിഃ
കരഃ സുരതരുഃ സദാ നവനിധിസ്ത്വമേവേംദിരേ ।
ഭവേ തവ ദയാരസോ മമ രസായനം ചാന്വഹം
മുഖം തവ കലാനിധിര്വിവിധവാംഛിതാര്ഥപ്രദമ് ॥ 89 ॥
യഥാ രസസ്പര്ശനതോഽയസോഽപി
സുവര്ണതാ സ്യാത്കമലേ തഥാ തേ ।
കടാക്ഷസംസ്പര്ശനതോ ജനാനാ-
-മമംഗളാനാമപി മംഗളത്വമ് ॥ 90 ॥
ദേഹീതി നാസ്തീതി വചഃ പ്രവേശാ-
-ദ്ഭീതോ രമേ ത്വാം ശരണം പ്രപദ്യേ ।
അതഃ സദാഽസ്മിന്നഭയപ്രദാ ത്വം
സഹൈവ പത്യാ മയി സന്നിധേഹി ॥ 91 ॥
കല്പദ്രുമേണ മണിനാ സഹിതാ സുരമ്യാ
ശ്രീസ്തേ കലാ മയി രസേന രസായനേന ।
ആസ്താം യതോ മമ ശിരഃകരദൃഷ്ടിപാദ-
-സ്പൃഷ്ടാഃ സുവര്ണവപുഷഃ സ്ഥിരജംഗമാഃ സ്യുഃ ॥ 92 ॥
ആദ്യാദിവിഷ്ണോഃ സ്ഥിരധര്മപത്നീ
ത്വമേവ പത്യാ മയി സന്നിധേഹി ।
ആദ്യാദിലക്ഷ്മി ത്വദനുഗ്രഹേണ
പദേ പദേ മേ നിധിദര്ശനം സ്യാത് ॥ 93 ॥
ആദ്യാദിലക്ഷ്മീഹൃദയം പഠേദ്യഃ
സ രാജ്യലക്ഷ്മീമചലാം തനോതി ।
മഹാദരിദ്രോഽപി ഭവേദ്ധനാഢ്യ-
-സ്തദന്വയേ ശ്രീഃ സ്ഥിരതാം പ്രയാതി ॥ 94 ॥
യസ്യ സ്മരണമാത്രേണ തുഷ്ടാ സ്യാദ്വിഷ്ണുവല്ലഭാ ।
തസ്യാഭീഷ്ടം ദദത്യാശു തം പാലയതി പുത്രവത് ॥ 95 ॥
ഇദം രഹസ്യം ഹൃദയം സര്വകാമഫലപ്രദമ് ।
ജപഃ പംചസഹസ്രം തു പുരശ്ചരണമുച്യതേ ॥ 96 ॥
ത്രികാലമേകകാലം വാ നരോ ഭക്തിസമന്വിതഃ ।
യഃ പഠേച്ഛൃണുയാദ്വാപി സ യാതി പരമാം ശ്രിയമ് ॥ 97 ॥
മഹാലക്ഷ്മീം സമുദ്ദിശ്യ നിശി ഭാര്ഗവവാസരേ ।
ഇദം ശ്രീഹൃദയം ജപ്ത്വാ പംചവാരം ധനീ ഭവേത് ॥ 98 ॥
അനേന ഹൃദയേനാന്നം ഗര്ഭിണ്യാ അഭിമംത്രിതമ് ।
ദദാതി തത്കുലേ പുത്രോ ജായതേ ശ്രീപതിഃ സ്വയമ് ॥ 99 ॥
നരേണ വാഽഥവാ നാര്യാ ലക്ഷ്മീഹൃദയമംത്രിതേ ।
ജലേ പീതേ ച തദ്വംശേ മംദഭാഗ്യോ ന ജായതേ ॥ 100 ॥
യ ആശ്വിനേ മാസി ച ശുക്ലപക്ഷേ
രമോത്സവേ സന്നിഹിതേ സുഭക്ത്യാ ।
പഠേത്തഥൈകോത്തരവാരവൃദ്ധ്യാ
ലഭേത്സ സൌവര്ണമയീം സുവൃഷ്ടിമ് ॥ 101 ॥
യ ഏകഭക്തോഽന്വഹമേകവര്ഷം
വിശുദ്ധധീഃ സപ്തതിവാരജാപീ ।
സ മംദഭാഗ്യോഽപി രമാകടാക്ഷാ-
-ദ്ഭവേത്സഹസ്രാക്ഷശതാധികശ്രീഃ ॥ 102 ॥
ശ്രീശാംഘ്രിഭക്തിം ഹരിദാസദാസ്യം
പ്രസന്നമംത്രാര്ഥദൃഢൈകനിഷ്ഠാമ് ।
ഗുരോഃ സ്മൃതിം നിര്മലബോധബുദ്ധിം
പ്രദേഹി മാതഃ പരമം പദം ശ്രീഃ ॥ 103 ॥
പൃഥ്വീപതിത്വം പുരുഷോത്തമത്വം
വിഭൂതിവാസം വിവിധാര്ഥസിദ്ധിമ് ।
സംപൂര്ണകീര്തിം ബഹുവര്ഷഭോഗം
പ്രദേഹി മേ ലക്ഷ്മി പുനഃ പുനസ്ത്വമ് ॥ 104 ॥
വാദാര്ഥസിദ്ധിം ബഹുലോകവശ്യം
വയഃ സ്ഥിരത്വം ലലനാസുഭോഗമ് ।
പൌത്രാദിലബ്ധിം സകലാര്ഥസിദ്ധിം
പ്രദേഹി മേ ഭാര്ഗവി ജന്മജന്മനി ॥ 105 ॥
സുവര്ണവൃദ്ധിം കുരു മേ ഗൃഹേ ശ്രീഃ
സുധാന്യവൃദ്ധിം കുരൂ മേ ഗൃഹേ ശ്രീഃ ।
കല്യാണവൃദ്ധിം കുരു മേ ഗൃഹേ ശ്രീഃ
വിഭൂതിവൃദ്ധിം കുരു മേ ഗൃഹേ ശ്രീഃ ॥ 106 ॥
ധ്യായേല്ലക്ഷ്മീം പ്രഹസിതമുഖീം കോടിബാലാര്കഭാസാം
വിദ്യുദ്വര്ണാംബരവരധരാം ഭൂഷണാഢ്യാം സുശോഭാമ് ।
ബീജാപൂരം സരസിജയുഗം ബിഭ്രതീം സ്വര്ണപാത്രം
ഭര്ത്രായുക്താം മുഹുരഭയദാം മഹ്യമപ്യച്യുതശ്രീഃ ॥ 107 ॥
ഗുഹ്യാതിഗുഹ്യഗോപ്ത്രീ ത്വം ഗൃഹാണാസ്മത്കൃതം ജപമ് ।
സിദ്ധിര്ഭവതു മേ ദേവി ത്വത്പ്രസാദാന്മയി സ്ഥിതാ ॥ 108 ॥
ഇതി ശ്രീഅഥര്വണരഹസ്യേ ശ്രീലക്ഷ്മീഹൃദയസ്തോത്രം സംപൂര്ണമ് ॥