പ്രാതസ്സ്മരാമി ഗണനാഥമനാഥബംധും
സിംദൂരപൂരപരിശോഭിതഗംഡയുഗ്മമ് ।
ഉദ്ദംഡവിഘ്നപരിഖംഡനചംഡദംഡ-
മാഖംഡലാദിസുരനായകവൃംദവംദ്യമ് ॥ 1॥
കലാഭ്യാം ചൂഡാലംകൃതശശികലാഭ്യാം നിജതപഃ
ഫലാഭ്യാം ഭക്തേഷു പ്രകടിതഫലാഭ്യാം ഭവതു മേ ।
ശിവാഭ്യാമാസ്തീകത്രിഭുവനശിവാഭ്യാം ഹൃദി പുന-
ര്ഭവാഭ്യാമാനംദസ്ഫുരദനുഭവാഭ്യാം നതിരിയമ് ॥ 2॥
നമസ്തേ നമസ്തേ മഹാദേവ! ശംഭോ!
നമസ്തേ നമസ്തേ ദയാപൂര്ണസിംധോ!
നമസ്തേ നമസ്തേ പ്രപന്നാത്മബംധോ!
നമസ്തേ നമസ്തേ നമസ്തേ മഹേശ ॥ 3॥
ശശ്വച്ഛ്രീഗിരിമൂര്ധനി ത്രിജഗതാം രക്ഷാകൃതൌ ലക്ഷിതാം
സാക്ഷാദക്ഷതസത്കടാക്ഷസരണിശ്രീമത്സുധാവര്ഷിണീമ് ।
സോമാര്ധാംകിതമസ്തകാം പ്രണമതാം നിസ്സീമസംപത്പ്രദാം
സുശ്ലോകാം ഭ്രമരാംബികാം സ്മിതമുഖീം ശംഭോസ്സഖീം ത്വാം സ്തുമഃ ॥ 4॥
മാതഃ! പ്രസീദ, സദയാ ഭവ, ഭവ്യശീലേ !
ലീലാലവാകുലിതദൈത്യകുലാപഹാരേ !
ശ്രീചക്രരാജനിലയേ ! ശ്രുതിഗീതകീര്തേ !
ശ്രീശൈലനാഥദയിതേ ! തവ സുപ്രഭാതമ് ॥ 5॥
ശംഭോ ! സുരേംദ്രനുത ! ശംകര ! ശൂലപാണേ !
ചംദ്രാവതംസ ! ശിവ ! ശര്വ ! പിനാകപാണേ !
ഗംഗാധര ! ക്രതുപതേ ! ഗരുഡധ്വജാപ്ത !
ശ്രീമല്ലികാര്ജുന വിഭോ ! തവ സുപ്രഭാതമ് ॥ 6॥
വിശ്വേശ ! വിശ്വജനസേവിത ! വിശ്വമൂര്തേ !
വിശ്വംഭര ! ത്രിപുരഭേദന ! വിശ്വയോനേ !
ഫാലാക്ഷ ! ഭവ്യഗുണ ! ഭോഗിവിഭൂഷണേശ !
ശ്രീമല്ലികാര്ജുന വിഭോ ! തവ സുപ്രഭാതമ് ॥ 7॥
കല്യാണരൂപ ! കരുണാകര ! കാലകംഠ !
കല്പദ്രുമപ്രസവപൂജിത ! കാമദായിന് !
ദുര്നീതിദൈത്യദലനോദ്യത ! ദേവ ദേവ !
ശ്രീമല്ലികാര്ജുന വിഭോ ! തവ സുപ്രഭാതമ് ॥ 8॥
ഗൌരീമനോഹര ! ഗണേശ്വരസേവിതാംഘ്രേ !
ഗംധര്വയക്ഷസുരകിന്നരഗീതകീര്തേ !
ഗംഡാവലംബിഫണികുംഡലമംഡിതാസ്യ !
ശ്രീമല്ലികാര്ജുന വിഭോ ! തവ സുപ്രഭാതമ് ॥ 9॥
നാഗേംദ്രഭൂഷണ ! നിരീഹിത ! നിര്വികാര !
നിര്മായ ! നിശ്ചല ! നിരര്ഗല ! നാഗഭേദിന് ।
നാരായണീപ്രിയ ! നതേഷ്ടദ ! നിര്മലാത്മന് !
ശ്രീപര്വതാധിപ ! വിഭോ ! തവ സുപ്രഭാതമ് ॥ 10॥
സൃഷ്ടം ത്വയൈവ ജഗദേതദശേഷമീശ !
രക്ഷാവിധിശ്ച വിധിഗോചര ! താവകീനഃ ।
സംഹാരശക്തിരപി ശംകര ! കിംകരീ തേ
ശ്രീശൈലശേഖര വിഭോ ! തവ സുപ്രഭാതമ് ॥ 11॥
ഏകസ്ത്വമേവ ബഹുധാ ഭവ ! ഭാസി ലോകേ
നിശ്ശംകധീര്വൃഷഭകേതന ! മല്ലിനാഥ !
ശ്രീഭ്രാമരീപ്രയ ! സുഖാശ്രയ ! ലോകനാഥ !
ശ്രീശൈലശേഖര വിഭോ ! തവ സുപ്രഭാതമ് ॥ 12॥
പാതാലഗാംഗജലമജ്ജനനിര്മലാംഗാഃ
ഭസ്മത്രിപുംഡ്രസമലംകൃതഫാലഭാഗാഃ ।
ഗായംതി ദേവമുനിഭക്തജനാ ഭവംതം
ശ്രീമല്ലികാര്ജുന വിഭോ ! തവ സുപ്രഭാതമ് ॥ 13॥
സാരസ്വതാംബുയുതഭോഗവതീശ്രിതായാഃ
ബ്രഹ്മേശവിഷ്ണുഗിരിചുംബിതകൃഷ്ണവേണ്യാഃ ।
സോപാനമാര്ഗമധിരുഹ്യ ഭജംതി ഭക്താഃ
ശ്രീമല്ലികാര്ജുന വിഭോ ! തവ സുപ്രഭാതമ് ॥ 14॥
ശ്രീമല്ലികാര്ജുനമഹേശ്വരസുപ്രഭാത-
സ്തോത്രം പഠംതി ഭുവി യേ മനുജാഃ പ്രഭാതേ ।
തേ സര്വ സൌഖ്യമനുഭൂയ പരാനവാപ്യം
ശ്രീശാംഭവം പദമവാപ്യ മുദം ലഭംതേ ॥ 15॥
ഇതി ശ്രീമല്ലികാര്ജുനസുപ്രഭാതം സംപൂര്ണമ് ।