ଭଗଵତି ତଵ ତୀରେ ନୀରମାତ୍ରାଶନୋଽହମ୍
ଵିଗତଵିଷୟତୃଷ୍ଣଃ କୃଷ୍ଣମାରାଧୟାମି ।
ସକଲ କଲୁଷଭଂଗେ ସ୍ଵର୍ଗସୋପାନସଂଗେ
ତରଲତରତରଂଗେ ଦେଵି ଗଂଗେ ପ୍ରସୀଦ ॥ 1 ॥
ଭଗଵତି ଭଵଲୀଲା ମୌଳିମାଲେ ତଵାଂଭଃ
କଣମଣୁପରିମାଣଂ ପ୍ରାଣିନୋ ୟେ ସ୍ପୃଶଂତି ।
ଅମରନଗରନାରୀ ଚାମର ଗ୍ରାହିଣୀନାଂ
ଵିଗତ କଲିକଲଂକାତଂକମଂକେ ଲୁଠଂତି ॥ 2 ॥
ବ୍ରହ୍ମାଂଡଂ ଖଂଡୟଂତୀ ହରଶିରସି ଜଟାଵଲ୍ଲିମୁଲ୍ଲାସୟଂତୀ
ସ୍ଵର୍ଲୋକାଦାପତଂତୀ କନକଗିରିଗୁହାଗଂଡଶୈଲାତ୍ ସ୍ଖଲଂତୀ ।
କ୍ଷୋଣୀପୃଷ୍ଠେ ଲୁଠଂତୀ ଦୁରିତଚୟଚମୂର୍ନିର୍ଭରଂ ଭର୍ତ୍ସୟଂତୀ
ପାଥୋଧିଂ ପୂରୟଂତୀ ସୁରନଗରସରିତ୍ପାଵନୀ ନଃ ପୁନାତୁ ॥ 3 ॥
ମଜ୍ଜନ୍ମାତଂଗ କୁଂଭଚ୍ୟୁତ ମଦମଦିରାମୋଦମତ୍ତାଲିଜାଲଂ
ସ୍ନାନୈଃ ସିଦ୍ଧାଂଗନାନାଂ କୁଚୟୁଗ ଵିଲସତ୍କୁଂକୁମାସଂଗପିଂଗମ୍ ।
ସାୟଂ ପ୍ରାତର୍ମୁନୀନାଂ କୁଶକୁସୁମଚୟୈଶ୍ଛିନ୍ନତୀରସ୍ଥନୀରଂ
ପାୟାନ୍ନୋ ଗାଂଗମଂଭଃ କରିକଲଭ କରାକ୍ରାଂତ ରଂଗସ୍ତରଂଗମ୍ ॥ 4 ॥
ଆଦାଵାଦି ପିତାମହସ୍ୟ ନିୟମ ଵ୍ୟାପାର ପାତ୍ରେ ଜଲଂ
ପଶ୍ଚାତ୍ପନ୍ନଗଶାୟିନୋ ଭଗଵତଃ ପାଦୋଦକଂ ପାଵନମ୍ ।
ଭୂୟଃ ଶଂଭୁଜଟାଵିଭୂଷଣ ମଣିର୍ଜହ୍ନୋର୍ମହର୍ଷେରିୟଂ
କନ୍ୟା କଲ୍ମଷନାଶିନୀ ଭଗଵତୀ ଭାଗୀରଥୀ ଦୃଶ୍ୟତେ ॥ 5 ॥
ଶୈଲେଂଦ୍ରାଦଵତାରିଣୀ ନିଜଜଲେ ମଜ୍ଜଜ୍ଜନୋତ୍ତାରିଣୀ
ପାରାଵାରଵିହାରିଣୀ ଭଵଭୟଶ୍ରେଣୀ ସମୁତ୍ସାରିଣୀ ।
ଶେଷାଂଗୈରନୁକାରିଣୀ ହରଶିରୋଵଲ୍ଲୀଦଳାକାରିଣୀ
କାଶୀପ୍ରାଂତଵିହାରିଣୀ ଵିଜୟତେ ଗଂଗା ମନୋହାରିଣୀ ॥ 6 ॥
କୁତୋ ଵୀଚିର୍ଵୀଚିସ୍ତଵ ୟଦି ଗତା ଲୋଚନପଥଂ
ତ୍ଵମାପୀତା ପୀତାଂବରପୁରଵାସଂ ଵିତରସି ।
ତ୍ଵଦୁତ୍ସଂଗେ ଗଂଗେ ପତତି ୟଦି କାୟସ୍ତନୁଭୃତାଂ
ତଦା ମାତଃ ଶାଂତକ୍ରତଵପଦଲାଭୋଽପ୍ୟତିଲଘୁଃ ॥ 7 ॥
ଗଂଗେ ତ୍ରୈଲୋକ୍ୟସାରେ ସକଲସୁରଵଧୂଧୌତଵିସ୍ତୀର୍ଣତୋୟେ
ପୂର୍ଣବ୍ରହ୍ମସ୍ଵରୂପେ ହରିଚରଣରଜୋହାରିଣି ସ୍ଵର୍ଗମାର୍ଗେ ।
ପ୍ରାୟଶ୍ଚିତଂ ୟଦି ସ୍ୟାତ୍ତଵ ଜଲକଣିକା ବ୍ରହ୍ମହତ୍ୟାଦି ପାପେ
କସ୍ତ୍ଵାଂ ସ୍ତୋତୁଂ ସମର୍ଥଃ ତ୍ରିଜଗଦଘହରେ ଦେଵି ଗଂଗେ ପ୍ରସୀଦ ॥ 8 ॥
ମାତର୍ଜାହ୍ନଵୀ ଶଂଭୁସଂଗମିଲିତେ ମୌଳୌ ନିଧାୟାଂଜଲିଂ
ତ୍ଵତ୍ତୀରେ ଵପୁଷୋଽଵସାନସମୟେ ନାରାୟଣାଂଘ୍ରିଦ୍ଵୟମ୍ ।
ସାନଂଦଂ ସ୍ମରତୋ ଭଵିଷ୍ୟତି ମମ ପ୍ରାଣପ୍ରୟାଣୋତ୍ସଵେ
ଭୂୟାଦ୍ଭକ୍ତିରଵିଚ୍ୟୁତା ହରିହରାଦ୍ଵୈତାତ୍ମିକା ଶାଶ୍ଵତୀ ॥ 9 ॥
ଗଂଗାଷ୍ଟକମିଦଂ ପୁଣ୍ୟଂ ୟଃ ପଠେତ୍ପ୍ରୟତୋ ନରଃ ।
ସର୍ଵପାପଵିନିର୍ମୁକ୍ତୋ ଵିଷ୍ଣୁଲୋକଂ ସ ଗଚ୍ଛତି ॥ 10 ॥