॥ ଗୀତଗୋଵିଂଦମ୍ ॥
॥ ଅଷ୍ଟପଦୀ ॥
॥ ଶ୍ରୀ ଗୋପାଲକ ଧ୍ୟାନମ୍ ॥
ୟଦ୍ଗୋପୀଵଦନେଂଦୁମଂଡନମଭୂତ୍କସ୍ତୂରିକାପତ୍ରକଂ ୟଲ୍ଲକ୍ଷ୍ମୀକୁଚଶାତକୁଂଭ କଲଶେ ଵ୍ୟାଗୋଚମିଂଦୀଵରମ୍ ।
ୟନ୍ନିର୍ଵାଣଵିଧାନସାଧନଵିଧୌ ସିଦ୍ଧାଂଜନଂ ୟୋଗିନାଂ ତନ୍ନଶ୍ୟାମଳମାଵିରସ୍ତୁ ହୃଦୟେ କୃଷ୍ଣାଭିଧାନଂ ମହଃ ॥ 1 ॥
॥ ଶ୍ରୀ ଜୟଦେଵ ଧ୍ୟାନମ୍ ॥
ରାଧାମନୋରମରମାଵରରାସଲୀଲ-ଗାନାମୃତୈକଭଣିତଂ କଵିରାଜରାଜମ୍ ।
ଶ୍ରୀମାଧଵାର୍ଚ୍ଚନଵିଧଵନୁରାଗସଦ୍ମ-ପଦ୍ମାଵତୀପ୍ରିୟତମଂ ପ୍ରଣତୋସ୍ମି ନିତ୍ୟମ୍ ॥ 2 ॥
ଶ୍ରୀଗୋପଲଵିଲାସିନୀ ଵଲୟସଦ୍ରତ୍ନାଦିମୁଗ୍ଧାକୃତି ଶ୍ରୀରାଧାପତିପାଦପଦ୍ମଭଜନାନଂଦାବ୍ଧିମଗ୍ନୋଽନିଶମ୍ ॥
ଲୋକେ ସତ୍କଵିରାଜରାଜ ଇତି ୟଃ ଖ୍ୟାତୋ ଦୟାଂଭୋନିଧିଃ ତଂ ଵଂଦେ ଜୟଦେଵସଦ୍ଗୁରୁମହଂ ପଦ୍ମାଵତୀଵଲ୍ଲଭମ୍ ॥ 3 ॥
॥ ପ୍ରଥମଃ ସର୍ଗଃ ॥
॥ ସାମୋଦଦାମୋଦରଃ ॥
ମେଘୈର୍ମେଦୁରମଂବରଂ ଵନଭୁଵଃ ଶ୍ୟାମାସ୍ତମାଲଦ୍ରୁମୈ-ର୍ନକ୍ତଂ ଭୀରୁରୟଂ ତ୍ଵମେଵ ତଦିମଂ ରାଧେ ଗୃହଂ ପ୍ରାପୟ ।
ଇତ୍ଥଂ ନଂଦନିଦେଶିତଶ୍ଚଲିତୟୋଃ ପ୍ରତ୍ୟଧ୍ଵକୁଂଜଦ୍ରୁମଂ ରାଧାମାଧଵୟୋର୍ଜୟଂତି ୟମୁନାକୂଲେ ରହଃକେଲୟଃ ॥ 1 ॥
ଵାଗ୍ଦେଵତାଚରିତଚିତ୍ରିତଚିତ୍ତସଦ୍ମା ପଦ୍ମାଵତୀଚରଣଚାରଣଚକ୍ରଵର୍ତୀ ।
ଶ୍ରୀଵାସୁଦେଵରତିକେଲିକଥାସମେତଂ ଏତଂ କରୋତି ଜୟଦେଵକଵିଃ ପ୍ରବଂଧମ୍ ॥ 2 ॥
ୟଦି ହରିସ୍ମରଣେ ସରସଂ ମନୋ ୟଦି ଵିଲାସକଲାସୁ କୁତୂହଲମ୍ ।
ମଧୁରକୋମଲକାଂତପଦାଵଲୀଂ ଶୃଣୁ ତଦା ଜୟଦେଵସରସ୍ଵତୀମ୍ ॥ 3 ॥
ଵାଚଃ ପଲ୍ଲଵୟତ୍ୟୁମାପତିଧରଃ ସଂଦର୍ଭଶୁଦ୍ଧିଂ ଗିରାଂ ଜାନୀତେ ଜୟଦେଵ ଏଵ ଶରଣଃ ଶ୍ଲାଘ୍ୟୋ ଦୁରୂହଦ୍ରୁତେ ।
ଶୃଂଗାରୋତ୍ତରସତ୍ପ୍ରମେୟରଚନୈରାଚାର୍ୟଗୋଵର୍ଧନ-ସ୍ପର୍ଧୀ କୋଽପି ନ ଵିଶ୍ରୁତଃ ଶ୍ରୁତିଧରୋ ଧୋୟୀ କଵିକ୍ଷ୍ମାପତିଃ ॥ 4 ॥
॥ ଗୀତଂ 1 ॥
ପ୍ରଲୟପୟୋଧିଜଲେ ଧୃତଵାନସି ଵେଦମ୍ ।
ଵିହିତଵହିତ୍ରଚରିତ୍ରମଖେଦମ୍ ॥
କେଶଵ ଧୃତମୀନଶରୀର ଜୟ ଜଗଦୀଶ ହରେ ॥ 1 ॥
କ୍ଷିତିରତିଵିପୁଲତରେ ତଵ ତିଷ୍ଠତି ପୃଷ୍ଠେ ।
ଧରଣିଧରଣକିଣଚକ୍ରଗରିଷ୍ଠେ ॥
କେଶଵ ଧୃତକଚ୍ଛପରୂପ ଜୟ ଜଗଦୀଶ ହରେ ॥ 2 ॥
ଵସତି ଦଶନଶିଖରେ ଧରଣୀ ତଵ ଲଗ୍ନା ।
ଶଶିନି କଲଂକକଲେଵ ନିମଗ୍ନା ॥
କେଶଵ ଧୃତସୂକରରୂପ ଜୟ ଜଗଦୀଶ ହରେ ॥ 3 ॥
ତଵ କରକମଲଵରେ ନଖମଦ୍ଭୁତଶୃଂଗମ୍ ।
ଦଲିତହିରଣ୍ୟକଶିପୁତନୁଭୃଂଗମ୍ ॥
କେଶଵ ଧୃତନରହରିରୂପ ଜୟ ଜଗଦୀଶ ହରେ ॥ 4 ॥
ଛଲୟସି ଵିକ୍ରମଣେ ବଲିମଦ୍ଭୁତଵାମନ ।
ପଦନଖନୀରଜନିତଜନପାଵନ ॥
କେଶଵ ଧୃତଵାମନରୂପ ଜୟ ଜଗଦୀଶ ହରେ ॥ 5 ॥
କ୍ଷତ୍ରିୟରୁଧିରମୟେ ଜଗଦପଗତପାପମ୍ ।
ସ୍ନପୟସି ପୟସି ଶମିତଭଵତାପମ୍ ॥
କେଶଵ ଧୃତଭୃଘୁପତିରୂପ ଜୟ ଜଗଦୀଶ ହରେ ॥ 6 ॥
ଵିତରସି ଦିକ୍ଷୁ ରଣେ ଦିକ୍ପତିକମନୀୟମ୍ ।
ଦଶମୁଖମୌଲିବଲିଂ ରମଣୀୟମ୍ ॥
କେଶଵ ଧୃତରାମଶରୀର ଜୟ ଜଗଦୀଶ ହରେ ॥ 7 ॥
ଵହସି ଵପୁଷି ଵିଶଦେ ଵସନଂ ଜଲଦାଭମ୍ ।
ହଲହତିଭୀତିମିଲିତୟମୁନାଭମ୍ ॥
କେଶଵ ଧୃତହଲଧରରୂପ ଜୟ ଜଗଦୀଶ ହରେ ॥ 8 ॥
ନିଂଦସି ୟଜ୍ଞଵିଧେରହହ ଶ୍ରୁତିଜାତମ୍ ।
ସଦୟହୃଦୟଦର୍ଶିତପଶୁଘାତମ୍ ॥
କେଶଵ ଧୃତବୁଦ୍ଧଶରୀର ଜୟ ଜଗଦୀଶ ହରେ ॥ 9 ॥
ମ୍ଲେଚ୍ଛନିଵହନିଧନେ କଲୟସି କରଵାଲମ୍ ।
ଧୂମକେତୁମିଵ କିମପି କରାଲମ୍ ॥
କେଶଵ ଧୃତକଲ୍କିଶରୀର ଜୟ ଜଗଦୀଶ ହରେ ॥ 10 ॥
ଶ୍ରୀଜୟଦେଵକଵେରିଦମୁଦିତମୁଦାରମ୍ ।
ଶୃଣୁ ସୁଖଦଂ ଶୁଭଦଂ ଭଵସାରମ୍ ॥
କେଶଵ ଧୃତଦଶଵିଧରୂପ ଜୟ ଜଗଦୀଶ ହରେ ॥ 11 ॥
ଵେଦାନୁଦ୍ଧରତେ ଜଗନ୍ନିଵହତେ ଭୂଗୋଲମୁଦ୍ବିଭ୍ରତେ ଦୈତ୍ୟଂ ଦାରୟତେ ବଲିଂ ଛଲୟତେ କ୍ଷତ୍ରକ୍ଷୟଂ କୁର୍ଵତେ ।
ପୌଲସ୍ତ୍ୟଂ ଜୟତେ ହଲଂ କଲୟତେ କାରୁଣ୍ୟମାତନ୍ଵତେ ମ୍ଲେଚ୍ଛାନ୍ମୂର୍ଚ୍ଛୟତେ ଦଶାକୃତିକୃତେ କୃଷ୍ଣାୟ ତୁଭ୍ୟଂ ନମଃ ॥ 5 ॥
॥ ଗୀତଂ 2 ॥
ଶ୍ରିତକମଲାକୁଚମଂଡଲ! ଧୃତକୁଂଡଲ! ।
କଲିତଲଲିତଵନମାଲ! ଜୟ, ଜୟ, ଦେଵ! ହରେ! ॥ 1 ॥
ଦିନମଣୀମଂଡଲମଂଡନ! ଭଵଖଂଡନ! ।
ମୁନିଜନମାନସହଂସ! ଜୟ, ଜୟ, ଦେଵ! ହରେ! ॥ 2 ॥
କାଲିୟଵିଷଧରଗଂଜନ! ଜନରଂଜନ! ।
ୟଦୁକୁଲନଲିନଦିନେଶ! ଜୟ, ଜୟ, ଦେଵ! ହରେ! ॥ 3 ॥
ମଧୁମୁରନରକଵିନାଶନ! ଗରୁଡାସନ! ।
ସୁରକୁଲକେଲିନିଦାନ! ଜୟ, ଜୟ, ଦେଵ! ହରେ! ॥ 4 ॥
ଅମଲକମଲଦଲଲୋଚନ! ଭଵମୋଚନ୍! ।
ତ୍ରିଭୁଵନଭଵନନିଧାନ! ଜୟ, ଜୟ, ଦେଵ! ହରେ! ॥ 5 ॥
ଜନକସୁତାକୃତଭୂଷଣ! ଜିତଦୂଷଣ! ।
ସମରଶମିତଦଶଖଂଠ! ଜୟ, ଜୟ, ଦେଵ! ହରେ! ॥ 6 ॥
ଅଭିନଵଜଲଧରସୁଂଦର! ଧୃତମଂଦର! ।
ଶ୍ରୀମୁଖଚଂଦ୍ରଚକୋର! ଜୟ, ଜୟ, ଦେଵ! ହରେ! ॥ 7 ॥
ଶ୍ରୀଜୟଦେଵକଵେରିଦଂ କୁରୁତେ ମୁଦମ୍ ।
ମଂଗଲମୁଜ୍ଜ୍ଵଲଗୀତଂ; ଜୟ, ଜୟ, ଦେଵ! ହରେ! ॥ 8 ॥
ପଦ୍ମାପୟୋଧରତଟୀପରିରଂଭଲଗ୍ନ-କାଶ୍ମୀରମୁଦ୍ରିତମୁରୋ ମଧୁସୂଦନସ୍ୟ ।
ଵ୍ୟକ୍ତାନୁରାଗମିଵ ଖେଲଦନଂଗଖେଦ-ସ୍ଵେଦାଂବୁପୂରମନୁପୂରୟତୁ ପ୍ରିୟଂ ଵଃ ॥ 6 ॥
ଵସଂତେ ଵାସଂତୀକୁସୁମସୁକୁମାରୈରଵୟଵୈ-ର୍ଭ୍ରମଂତୀଂ କାଂତାରେ ବହୁଵିହିତକୃଷ୍ଣାନୁସରଣାମ୍ ।
ଅମଂଦଂ କଂଦର୍ପଜ୍ଵରଜନିତଚିଂତାକୁଲତୟା ଵଲଦ୍ବାଧାଂ ରାଧାଂ ସରସମିଦମୁଚେ ସହଚରୀ ॥ 7 ॥
॥ ଗୀତଂ 3 ॥
ଲଲିତଲଵଂଗଲତାପରିଶୀଲନକୋମଲମଲୟସମୀରେ ।
ମଧୁକରନିକରକରଂବିତକୋକିଲକୂଜିତକୁଂଜକୁଟୀରେ ॥
ଵିହରତି ହରିରିହ ସରସଵସଂତେ ନୃତ୍ୟତି ୟୁଵତିଜନେନ ସମଂ ସଖି ଵିରହିଜନସ୍ୟ ଦୁରଂତେ ॥ 1 ॥
ଉନ୍ମଦମଦନମନୋରଥପଥିକଵଧୂଜନଜନିତଵିଲାପେ ।
ଅଲିକୁଲସଂକୁଲକୁସୁମସମୂହନିରାକୁଲବକୁଲକଲାପେ ॥ 2 ॥
ମୃଗମଦସୌରଭରଭସଵଶଂଵଦନଵଦଲମାଲତମାଲେ ।
ୟୁଵଜନହୃଦୟଵିଦାରଣମନସିଜନଖରୁଚିକିଂଶୁକଜାଲେ ॥ 3 ॥
ମଦନମହୀପତିକନକଦଂଡରୁଚିକେଶରକୁସୁମଵିକାସେ ।
ମିଲିତଶିଲୀମୁଖପାଟଲିପଟଲକୃତସ୍ମରତୂଣଵିଲାସେ ॥ 4 ॥
ଵିଗଲିତଲଜ୍ଜିତଜଗଦଵଲୋକନତରୁଣକରୁଣକୃତହାସେ ।
ଵିରହିନିକୃଂତନକୁଂତମୁଖାକୃତିକେତକଦଂତୁରିତାଶେ ॥ 5 ॥
ମାଧଵିକାପରିମଲଲଲିତେ ନଵମାଲିକଜାତିସୁଗଂଧୌ ।
ମୁନିମନସାମପି ମୋହନକାରିଣି ତରୁଣାକାରଣବଂଧୌ ॥ 6 ॥
ସ୍ଫୁରଦତିମୁକ୍ତଲତାପରିରଂଭଣମୁକୁଲିତପୁଲକିତଚୂତେ ।
ବୃଂଦାଵନଵିପିନେ ପରିସରପରିଗତୟମୁନାଜଲପୂତେ ॥ 7 ॥
ଶ୍ରୀଜୟଦେଵଭଣିତମିଦମୁଦୟତି ହରିଚରଣସ୍ମୃତିସାରମ୍ ।
ସରସଵସଂତସମୟଵନଵର୍ଣନମନୁଗତମଦନଵିକାରମ୍ ॥ 8 ॥
ଦରଵିଦଲିତମଲ୍ଲୀଵଲ୍ଲିଚଂଚତ୍ପରାଗ-ପ୍ରକଟିତପଟଵାସୈର୍ଵାସୟନ୍ କାନନାନି ।
ଇହ ହି ଦହତି ଚେତଃ କେତକୀଗଂଧବଂଧୁଃ ପ୍ରସରଦସମବାଣପ୍ରାଣଵଦ୍ଗଂଧଵାହଃ ॥ 8 ॥
ଉନ୍ମୀଲନ୍ମଧୁଗଂଧଲୁବ୍ଧମଧୁପଵ୍ୟାଧୂତଚୂତାଂକୁର-କ୍ରୀଡତ୍କୋକିଲକାକଲୀକଲକଲୈରୁଦ୍ଗୀର୍ଣକର୍ଣଜ୍ଵରାଃ ।
ନୀୟଂତେ ପଥିକୈଃ କଥଂକଥମପି ଧ୍ୟାନାଵଧାନକ୍ଷଣ-ପ୍ରାପ୍ତପ୍ରାଣସମାସମାଗମରସୋଲ୍ଲାସୈରମୀ ଵାସରାଃ ॥ 9 ॥
ଅନେକନାରୀପରିରଂଭସଂଭ୍ରମ-ସ୍ଫୁରନ୍ମନୋହାରିଵିଲାସଲାଲସମ୍ ।
ମୁରାରିମାରାଦୁପଦର୍ଶୟଂତ୍ୟସୌ ସଖୀ ସମକ୍ଷଂ ପୁନରାହ ରାଧିକାମ୍ ॥ 10 ॥
॥ ଗୀତଂ 4 ॥
ଚଂଦନଚର୍ଚିତନୀଲକଲେବରପୀତଵସନଵନମାଲୀ ।
କେଲିଚଲନ୍ମଣିକୁଂଡଲମଂଡିତଗଂଡୟୁଗସ୍ମିତଶାଲୀ ॥
ହରିରିହମୁଗ୍ଧଵଧୂନିକରେ ଵିଲାସିନି ଵିଲସତି କେଲିପରେ ॥ 1 ॥
ପୀନପୟୋଧରଭାରଭରେଣ ହରିଂ ପରିରମ୍ୟ ସରାଗମ୍ ।
ଗୋପଵଧୂରନୁଗାୟତି କାଚିଦୁଦଂଚିତପଂଚମରାଗମ୍ ॥ 2 ॥
କାପି ଵିଲାସଵିଲୋଲଵିଲୋଚନଖେଲନଜନିତମନୋଜମ୍ ।
ଧ୍ୟାୟତି ମୁଗ୍ଧଵଧୂରଧିକଂ ମଧୁସୂଦନଵଦନସରୋଜମ୍ ॥ 3 ॥
କାପି କପୋଲତଲେ ମିଲିତା ଲପିତୁଂ କିମପି ଶ୍ରୁତିମୂଲେ ।
ଚାରୁ ଚୁଚୁଂବ ନିତଂବଵତୀ ଦୟିତଂ ପୁଲକୈରନୁକୂଲେ ॥ 4 ॥
କେଲିକଲାକୁତୁକେନ ଚ କାଚିଦମୁଂ ୟମୁନାଜଲକୂଲେ ।
ମଂଜୁଲଵଂଜୁଲକୁଂଜଗତଂ ଵିଚକର୍ଷ କରେଣ ଦୁକୂଲେ ॥ 5 ॥
କରତଲତାଲତରଲଵଲୟାଵଲିକଲିତକଲସ୍ଵନଵଂଶେ ।
ରାସରସେ ସହନୃତ୍ୟପରା ହରିଣା ୟୁଵତିଃ ପ୍ରଶଶଂସେ ॥ 6 ॥
ଶ୍ଲିଷ୍ୟତି କାମପି ଚୁଂବତି କାମପି କାମପି ରମୟତି ରାମାମ୍ ।
ପଶ୍ୟତି ସସ୍ମିତଚାରୁପରାମପରାମନୁଗଚ୍ଛତି ଵାମାମ୍ ॥ 7 ॥
ଶ୍ରୀଜୟଦେଵକଵେରିଦମଦ୍ଭୁତକେଶଵକେଲିରହସ୍ୟମ୍ ।
ଵୃଂଦାଵନଵିପିନେ ଲଲିତଂ ଵିତନୋତୁ ଶୁଭାନି ୟଶସ୍ୟମ୍ ॥ 8 ॥
ଵିଶ୍ଵେଷାମନୁରଂଜନେନ ଜନୟନ୍ନାନଂଦମିଂଦୀଵର-ଶ୍ରେଣୀଶ୍ୟାମଲକୋମଲୈରୁପନୟନ୍ନଂଗୈରନଂଗୋତ୍ସଵମ୍ ।
ସ୍ଵଚ୍ଛଂଦଂ ଵ୍ରଜସୁଂଦରୀଭିରଭିତଃ ପ୍ରତ୍ୟଂଗମାଲିଂକିତଃ ଶୃଂଗାରଃ ସଖି ମୂର୍ତିମାନିଵ ମଧୌ ମୁଗ୍ଧୋ ହରିଃ କ୍ରୀଡତି ॥ 11 ॥
ଅଦ୍ୟୋତ୍ସଂଗଵସଦ୍ଭୁଜଂଗକଵଲକ୍ଲେଶାଦିଵେଶାଚଲଂ ପ୍ରାଲେୟପ୍ଲଵନେଚ୍ଛୟାନୁସରତି ଶ୍ରୀଖଂଡଶୈଲାନିଲଃ ।
କିଂ ଚ ସ୍ନିଗ୍ଧରସାଲମୌଲିମୁକୁଲାନ୍ୟାଲୋକ୍ୟ ହର୍ଷୋଦୟା-ଦୁନ୍ମୀଲଂତି କୁହୂଃ କୁହୂରିତି କଲୋତ୍ତାଲାଃ ପିକାନାଂ ଗିରଃ ॥ 12 ॥
ରାସୋଲ୍ଲାସଭରେଣଵିଭ୍ରମଭୃତାମାଭୀରଵାମଭ୍ରୁଵା-ମଭ୍ୟର୍ଣଂ ପରିରମ୍ୟନିର୍ଭରମୁରଃ ପ୍ରେମାଂଧୟା ରାଧୟା ।
ସାଧୁ ତ୍ଵଦ୍ଵଦନଂ ସୁଧାମୟମିତି ଵ୍ୟାହୃତ୍ୟ ଗୀତସ୍ତୁତି-ଵ୍ୟାଜାଦୁଦ୍ଭଟଚୁଂବିତସ୍ମିତମନୋହରୀ ହରିଃ ପାତୁ ଵଃ ॥ 13 ॥
॥ ଇତି ଶ୍ରୀଗୀତଗୋଵିଂଦେ ସାମୋଦଦାମୋଦରୋ ନାମ ପ୍ରଥମଃ ସର୍ଗଃ ॥