ଅସ୍ୟାଃ ଚାକ୍ଷୁଷୀଵିଦ୍ୟାୟାଃ ଅହିର୍ବୁଧ୍ନ୍ୟ ଋଷିଃ । ଗାୟତ୍ରୀ ଛଂଦଃ । ସୂର୍ୟୋ ଦେଵତା । ଚକ୍ଷୁରୋଗନିଵୃତ୍ତୟେ ଜପେ ଵିନିୟୋଗଃ ।
ଓଂ ଚକ୍ଷୁଶ୍ଚକ୍ଷୁଶ୍ଚକ୍ଷୁଃ ତେଜଃ ସ୍ଥିରୋ ଭଵ । ମାଂ ପାହି ପାହି । ତ୍ଵରିତଂ ଚକ୍ଷୁରୋଗାନ୍ ଶମୟ ଶମୟ । ମମ ଜାତରୂପଂ ତେଜୋ ଦର୍ଶୟ ଦର୍ଶୟ । ୟଥାହଂ ଅଂଧୋ ନ ସ୍ୟାଂ ତଥା କଲ୍ପୟ କଲ୍ପୟ । କଲ୍ୟାଣଂ କୁରୁ କୁରୁ । ୟାନି ମମ ପୂର୍ଵଜନ୍ମୋପାର୍ଜିତାନି ଚକ୍ଷୁଃ ପ୍ରତିରୋଧକ ଦୁଷ୍କୃତାନି ସର୍ଵାଣି ନିର୍ମୂଲୟ ନିର୍ମୂଲୟ ।
ଓଂ ନମଃ ଚକ୍ଷୁସ୍ତେଜୋଦାତ୍ରେ ଦିଵ୍ୟାୟ ଭାସ୍କରାୟ । ଓଂ ନମଃ କରୁଣାକରାୟାଽମୃତାୟ । ଓଂ ନମଃ ସୂର୍ୟାୟ । ଓଂ ନମୋ ଭଗଵତେ ସୂର୍ୟାୟାକ୍ଷିତେଜସେ ନମଃ । ଖେଚରାୟ ନମଃ । ମହତେ ନମଃ । ରଜସେ ନମଃ । ତମସେ ନମଃ । ଅସତୋ ମା ସଦ୍ଗମୟ । ତମସୋ ମା ଜ୍ୟୋତିର୍ଗମୟ । ମୃତ୍ୟୋର୍ମା ଅମୃତଂ ଗମୟ । ଉଷ୍ଣୋ ଭଗଵାନ୍ ଶୁଚିରୂପଃ । ହଂସୋ ଭଗଵାନ୍ ଶୁଚିରପ୍ରତିରୂପଃ ।
ୟ ଇମାଂ ଚକ୍ଷୁଷ୍ମତୀଂ ଵିଦ୍ୟାଂ ବ୍ରାହ୍ମଣୋ ନିତ୍ୟମଧୀତେ ନ ତସ୍ୟ ଅକ୍ଷିରୋଗୋ ଭଵତି । ନ ତସ୍ୟ କୁଲେ ଅଂଧୋ ଭଵତି । ଅଷ୍ଟୌ ବ୍ରାହ୍ମଣାନ୍ ଗ୍ରାହୟିତ୍ଵା ଵିଦ୍ୟାସିଦ୍ଧିର୍ଭଵତି ।
ଵିଶ୍ଵରୂପଂ ଘୃଣିନଂ ଜାତଵେଦସଂ ହିରଣ୍ମୟଂ ପୁରୁଷଂ ଜ୍ୟୋତୀରୂପଂ ତପଂତଂ ସହସ୍ରରଶ୍ମିଃ ଶତଧାଵର୍ତମାନଃ । ପୁରଃ ପ୍ରଜାନାମୁଦୟତ୍ୟେଷ ସୂର୍ୟଃ ।
ଓଂ ନମୋ ଭଗଵତେ ଆଦିତ୍ୟାୟ ଅକ୍ଷିତେଜସେ ଅହୋ ଵାହିନି ଵାହିନି ସ୍ଵାହା ।
[ଓଂ ନମୋ ଭଗଵତେ ଆଦିତ୍ୟାୟ ସୂର୍ୟାୟାହୋ ଵାହିନ୍ୟହୋଵାହିନୀ ସ୍ଵାହା ।]