ଆତ୍ମାପରାଧଵୃକ୍ଷସ୍ୟ ଫଲାନ୍ୟେତାନି ଦେହିନାମ୍ ।
ଦାରିଦ୍ର୍ୟଦୁଃଖରୋଗାଣି ବଂଧନଵ୍ୟସନାନି ଚ ॥ 01 ॥
ପୁନର୍ଵିତ୍ତଂ ପୁନର୍ମିତ୍ରଂ ପୁନର୍ଭାର୍ୟା ପୁନର୍ମହୀ ।
ଏତତ୍ସର୍ଵଂ ପୁନର୍ଲଭ୍ୟଂ ନ ଶରୀରଂ ପୁନଃ ପୁନଃ ॥ 02 ॥
ବହୂନାଂ ଚୈଵ ସତ୍ତ୍ଵାନାଂ ସମଵାୟୋ ରିପୁଂଜୟଃ ।
ଵର୍ଷାଧାରାଧରୋ ମେଘସ୍ତୃଣୈରପି ନିଵାର୍ୟତେ ॥ 03 ॥
ଜଲେ ତୈଲଂ ଖଲେ ଗୁହ୍ୟଂ ପାତ୍ରେ ଦାନଂ ମନାଗପି ।
ପ୍ରାଜ୍ଞେ ଶାସ୍ତ୍ରଂ ସ୍ଵୟଂ ୟାତି ଵିସ୍ତାରଂ ଵସ୍ତୁଶକ୍ତିତଃ ॥ 04 ॥
ଧର୍ମାଖ୍ୟାନେ ଶ୍ମଶାନେ ଚ ରୋଗିଣାଂ ୟା ମତିର୍ଭଵେତ୍ ।
ସା ସର୍ଵଦୈଵ ତିଷ୍ଠେଚ୍ଚେତ୍କୋ ନ ମୁଚ୍ୟେତ ବଂଧନାତ୍ ॥ 05 ॥
ଉତ୍ପନ୍ନପଶ୍ଚାତ୍ତାପସ୍ୟ ବୁଦ୍ଧିର୍ଭଵତି ୟାଦୃଶୀ ।
ତାଦୃଶୀ ୟଦି ପୂର୍ଵଂ ସ୍ୟାତ୍କସ୍ୟ ନ ସ୍ୟାନ୍ମହୋଦୟଃ ॥ 06 ॥
ଦାନେ ତପସି ଶୌର୍ୟେ ଵା ଵିଜ୍ଞାନେ ଵିନୟେ ନୟେ ।
ଵିସ୍ମୟୋ ନହି କର୍ତଵ୍ୟୋ ବହୁରତ୍ନା ଵସୁଂଧରା ॥ 07 ॥
ଦୂରସ୍ଥୋଽପି ନ ଦୂରସ୍ଥୋ ୟୋ ୟସ୍ୟ ମନସି ସ୍ଥିତଃ ।
ୟୋ ୟସ୍ୟ ହୃଦୟେ ନାସ୍ତି ସମୀପସ୍ଥୋଽପି ଦୂରତଃ ॥ 08 ॥
ୟସ୍ମାଚ୍ଚ ପ୍ରିୟମିଚ୍ଛେତ୍ତୁ ତସ୍ୟ ବ୍ରୂୟାତ୍ସଦା ପ୍ରିୟମ୍ ।
ଵ୍ୟାଧୋ ମୃଗଵଧଂ କର୍ତୁଂ ଗୀତଂ ଗାୟତି ସୁସ୍ଵରମ୍ ॥ 09 ॥
ଅତ୍ୟାସନ୍ନା ଵିନାଶାୟ ଦୂରସ୍ଥା ନ ଫଲପ୍ରଦା ।
ସେଵ୍ୟତାଂ ମଧ୍ୟଭାଵେନ ରାଜା ଵହ୍ନିର୍ଗୁରୁଃ ସ୍ତ୍ରିୟଃ ॥ 10 ॥
ଅଗ୍ନିରାପଃ ସ୍ତ୍ରିୟୋ ମୂର୍ଖାଃ ସର୍ପା ରାଜକୁଲାନି ଚ ।
ନିତ୍ୟଂ ୟତ୍ନେନ ସେଵ୍ୟାନି ସଦ୍ୟଃ ପ୍ରାଣହରାଣି ଷଟ୍ ॥ 11 ॥
ସ ଜୀଵତି ଗୁଣା ୟସ୍ୟ ୟସ୍ୟ ଧର୍ମଃ ସ ଜୀଵତି ।
ଗୁଣଧର୍ମଵିହୀନସ୍ୟ ଜୀଵିତଂ ନିଷ୍ପ୍ରୟୋଜନମ୍ ॥ 12 ॥
ୟଦୀଚ୍ଛସି ଵଶୀକର୍ତୁଂ ଜଗଦେକେନ କର୍ମଣା ।
ପୁରା ପଂଚଦଶାସ୍ୟେଭ୍ୟୋ ଗାଂ ଚରଂତୀ ନିଵାରୟ ॥ 13 ॥
ପ୍ରସ୍ତାଵସଦୃଶଂ ଵାକ୍ୟଂ ପ୍ରଭାଵସଦୃଶଂ ପ୍ରିୟମ୍ ।
ଆତ୍ମଶକ୍ତିସମଂ କୋପଂ ୟୋ ଜାନାତି ସ ପଂଡିତଃ ॥ 14 ॥
ଏକ ଏଵ ପଦାର୍ଥସ୍ତୁ ତ୍ରିଧା ଭଵତି ଵୀକ୍ଷିତଃ ।
କୁଣପଂ କାମିନୀ ମାଂସଂ ୟୋଗିଭିଃ କାମିଭିଃ ଶ୍ଵଭିଃ ॥ 15 ॥
ସୁସିଦ୍ଧମୌଷଧଂ ଧର୍ମଂ ଗୃହଚ୍ଛିଦ୍ରଂ ଚ ମୈଥୁନମ୍ ।
କୁଭୁକ୍ତଂ କୁଶ୍ରୁତଂ ଚୈଵ ମତିମାନ୍ନ ପ୍ରକାଶୟେତ୍ ॥ 16 ॥
ତାଵନ୍ମୌନେନ ନୀୟଂତେ କୋକିଲୈଶ୍ଚୈଵ ଵାସରାଃ ।
ୟାଵତ୍ସର୍ଵଜନାନଂଦଦାୟିନୀ ଵାକ୍ପ୍ରଵର୍ତତେ ॥ 17 ॥
ଧର୍ମଂ ଧନଂ ଚ ଧାନ୍ୟଂ ଚ ଗୁରୋର୍ଵଚନମୌଷଧମ୍ ।
ସୁଗୃହୀତଂ ଚ କର୍ତଵ୍ୟମନ୍ୟଥା ତୁ ନ ଜୀଵତି ॥ 18 ॥
ତ୍ୟଜ ଦୁର୍ଜନସଂସର୍ଗଂ ଭଜ ସାଧୁସମାଗମମ୍ ।
କୁରୁ ପୁଣ୍ୟମହୋରାତ୍ରଂ ସ୍ମର ନିତ୍ୟମନିତ୍ୟତଃ ॥ 19 ॥