ସ୍ଵାୟଂଭୁଵୋ ମନୁରଥୋ ଜନସର୍ଗଶୀଲୋ
ଦୃଷ୍ଟ୍ଵା ମହୀମସମୟେ ସଲିଲେ ନିମଗ୍ନାମ୍ ।
ସ୍ରଷ୍ଟାରମାପ ଶରଣଂ ଭଵଦଂଘ୍ରିସେଵା-
ତୁଷ୍ଟାଶୟଂ ମୁନିଜନୈଃ ସହ ସତ୍ୟଲୋକେ ॥1॥
କଷ୍ଟଂ ପ୍ରଜାଃ ସୃଜତି ମୟ୍ୟଵନିର୍ନିମଗ୍ନା
ସ୍ଥାନଂ ସରୋଜଭଵ କଲ୍ପୟ ତତ୍ ପ୍ରଜାନାମ୍ ।
ଇତ୍ୟେଵମେଷ କଥିତୋ ମନୁନା ସ୍ଵୟଂଭୂଃ –
ରଂଭୋରୁହାକ୍ଷ ତଵ ପାଦୟୁଗଂ ଵ୍ୟଚିଂତୀତ୍ ॥ 2 ॥
ହା ହା ଵିଭୋ ଜଲମହଂ ନ୍ୟପିବଂ ପୁରସ୍ତା-
ଦଦ୍ୟାପି ମଜ୍ଜତି ମହୀ କିମହଂ କରୋମି ।
ଇତ୍ଥଂ ତ୍ଵଦଂଘ୍ରିୟୁଗଲଂ ଶରଣଂ ୟତୋଽସ୍ୟ
ନାସାପୁଟାତ୍ ସମଭଵଃ ଶିଶୁକୋଲରୂପୀ ।3॥
ଅଂଗୁଷ୍ଠମାତ୍ରଵପୁରୁତ୍ପତିତଃ ପୁରସ୍ତାତ୍
ଭୋୟୋଽଥ କୁଂଭିସଦୃଶଃ ସମଜୃଂଭଥାସ୍ତ୍ଵମ୍ ।
ଅଭ୍ରେ ତଥାଵିଧମୁଦୀକ୍ଷ୍ୟ ଭଵଂତମୁଚ୍ଚୈ –
ର୍ଵିସ୍ମେରତାଂ ଵିଧିରଗାତ୍ ସହ ସୂନୁଭିଃ ସ୍ଵୈଃ ॥4॥
କୋଽସାଵଚିଂତ୍ୟମହିମା କିଟିରୁତ୍ଥିତୋ ମେ
ନାସାପୁଟାତ୍ କିମୁ ଭଵେଦଜିତସ୍ୟ ମାୟା ।
ଇତ୍ଥଂ ଵିଚିଂତୟତି ଧାତରି ଶୈଲମାତ୍ରଃ
ସଦ୍ୟୋ ଭଵନ୍ କିଲ ଜଗର୍ଜିଥ ଘୋରଘୋରମ୍ ॥5॥
ତଂ ତେ ନିନାଦମୁପକର୍ଣ୍ୟ ଜନସ୍ତପଃସ୍ଥାଃ
ସତ୍ୟସ୍ଥିତାଶ୍ଚ ମୁନୟୋ ନୁନୁଵୁର୍ଭଵଂତମ୍ ।
ତତ୍ସ୍ତୋତ୍ରହର୍ଷୁଲମନାଃ ପରିଣଦ୍ୟ ଭୂୟ-
ସ୍ତୋୟାଶୟଂ ଵିପୁଲମୂର୍ତିରଵାତରସ୍ତ୍ଵମ୍ ॥6॥
ଊର୍ଧ୍ଵପ୍ରସାରିପରିଧୂମ୍ରଵିଧୂତରୋମା
ପ୍ରୋତ୍କ୍ଷିପ୍ତଵାଲଧିରଵାଙ୍ମୁଖଘୋରଘୋଣଃ ।
ତୂର୍ଣପ୍ରଦୀର୍ଣଜଲଦଃ ପରିଘୂର୍ଣଦକ୍ଷ୍ଣା
ସ୍ତୋତୃନ୍ ମୁନୀନ୍ ଶିଶିରୟନ୍ନଵତେରିଥ ତ୍ଵମ୍ ॥7॥
ଅଂତର୍ଜଲଂ ତଦନୁସଂକୁଲନକ୍ରଚକ୍ରଂ
ଭ୍ରାମ୍ୟତ୍ତିମିଂଗିଲକୁଲଂ କଲୁଷୋର୍ମିମାଲମ୍ ।
ଆଵିଶ୍ୟ ଭୀଷଣରଵେଣ ରସାତଲସ୍ଥା –
ନାକଂପୟନ୍ ଵସୁମତୀମଗଵେଷୟସ୍ତ୍ଵମ୍ ॥8॥
ଦୃଷ୍ଟ୍ଵାଽଥ ଦୈତ୍ୟହତକେନ ରସାତଲାଂତେ
ସଂଵେଶିତାଂ ଝଟିତି କୂଟକିଟିର୍ଵିଭୋ ତ୍ଵମ୍ ।
ଆପାତୁକାନଵିଗଣୟ୍ୟ ସୁରାରିଖେଟାନ୍
ଦଂଷ୍ଟ୍ରାଂକୁରେଣ ଵସୁଧାମଦଧାଃ ସଲୀଲମ୍ ॥9॥
ଅଭ୍ୟୁଦ୍ଧରନ୍ନଥ ଧରାଂ ଦଶନାଗ୍ରଲଗ୍ନ
ମୁସ୍ତାଂକୁରାଂକିତ ଇଵାଧିକପୀଵରାତ୍ମା ।
ଉଦ୍ଧୂତଘୋରସଲିଲାଜ୍ଜଲଧେରୁଦଂଚନ୍
କ୍ରୀଡାଵରାହଵପୁରୀଶ୍ଵର ପାହି ରୋଗାତ୍ ॥10॥