ହିରଣ୍ୟାକ୍ଷଂ ତାଵଦ୍ଵରଦ ଭଵଦନ୍ଵେଷଣପରଂ
ଚରଂତଂ ସାଂଵର୍ତେ ପୟସି ନିଜଜଂଘାପରିମିତେ ।
ଭଵଦ୍ଭକ୍ତୋ ଗତ୍ଵା କପଟପଟୁଧୀର୍ନାରଦମୁନିଃ
ଶନୈରୂଚେ ନଂଦନ୍ ଦନୁଜମପି ନିଂଦଂସ୍ତଵ ବଲମ୍ ॥1॥
ସ ମାୟାଵୀ ଵିଷ୍ଣୁର୍ହରତି ଭଵଦୀୟାଂ ଵସୁମତୀଂ
ପ୍ରଭୋ କଷ୍ଟଂ କଷ୍ଟଂ କିମିଦମିତି ତେନାଭିଗଦିତଃ ।
ନଦନ୍ କ୍ଵାସୌ କ୍ଵାସଵିତି ସ ମୁନିନା ଦର୍ଶିତପଥୋ
ଭଵଂତଂ ସଂପ୍ରାପଦ୍ଧରଣିଧରମୁଦ୍ୟଂତମୁଦକାତ୍ ॥2॥
ଅହୋ ଆରଣ୍ୟୋଽୟଂ ମୃଗ ଇତି ହସଂତଂ ବହୁତରୈ-
ର୍ଦୁରୁକ୍ତୈର୍ଵିଧ୍ୟଂତଂ ଦିତିସୁତମଵଜ୍ଞାୟ ଭଗଵନ୍ ।
ମହୀଂ ଦୃଷ୍ଟ୍ଵା ଦଂଷ୍ଟ୍ରାଶିରସି ଚକିତାଂ ସ୍ଵେନ ମହସା
ପୟୋଧାଵାଧାୟ ପ୍ରସଭମୁଦୟୁଂକ୍ଥା ମୃଧଵିଧୌ ॥3॥
ଗଦାପାଣୌ ଦୈତ୍ୟେ ତ୍ଵମପି ହି ଗୃହୀତୋନ୍ନତଗଦୋ
ନିୟୁଦ୍ଧେନ କ୍ରୀଡନ୍ ଘଟଘଟରଵୋଦ୍ଘୁଷ୍ଟଵିୟତା ।
ରଣାଲୋକୌତ୍ସୁକ୍ୟାନ୍ମିଲତି ସୁରସଂଘେ ଦ୍ରୁତମମୁଂ
ନିରୁଂଧ୍ୟାଃ ସଂଧ୍ୟାତଃ ପ୍ରଥମମିତି ଧାତ୍ରା ଜଗଦିଷେ ॥4॥
ଗଦୋନ୍ମର୍ଦେ ତସ୍ମିଂସ୍ତଵ ଖଲୁ ଗଦାୟାଂ ଦିତିଭୁଵୋ
ଗଦାଘାତାଦ୍ଭୂମୌ ଝଟିତି ପତିତାୟାମହହ! ଭୋଃ ।
ମୃଦୁସ୍ମେରାସ୍ୟସ୍ତ୍ଵଂ ଦନୁଜକୁଲନିର୍ମୂଲନଚଣଂ
ମହାଚକ୍ରଂ ସ୍ମୃତ୍ଵା କରଭୁଵି ଦଧାନୋ ରୁରୁଚିଷେ ॥5॥
ତତଃ ଶୂଲଂ କାଲପ୍ରତିମରୁଷି ଦୈତ୍ୟେ ଵିସୃଜତି
ତ୍ଵୟି ଛିଂଦତ୍ୟେନତ୍ କରକଲିତଚକ୍ରପ୍ରହରଣାତ୍ ।
ସମାରୁଷ୍ଟୋ ମୁଷ୍ଟ୍ୟା ସ ଖଲୁ ଵିତୁଦଂସ୍ତ୍ଵାଂ ସମତନୋତ୍
ଗଲନ୍ମାୟେ ମାୟାସ୍ତ୍ଵୟି କିଲ ଜଗନ୍ମୋହନକରୀଃ ॥6॥
ଭଵଚ୍ଚକ୍ରଜ୍ୟୋତିଷ୍କଣଲଵନିପାତେନ ଵିଧୁତେ
ତତୋ ମାୟାଚକ୍ରେ ଵିତତଘନରୋଷାଂଧମନସମ୍ ।
ଗରିଷ୍ଠାଭିର୍ମୁଷ୍ଟିପ୍ରହୃତିଭିରଭିଘ୍ନଂତମସୁରଂ
ସ୍ଵପାଦାଂଗୁଷ୍ଠେନ ଶ୍ରଵଣପଦମୂଲେ ନିରଵଧୀଃ ॥7॥
ମହାକାୟଃ ସୋଽୟଂ ତଵ ଚରଣପାତପ୍ରମଥିତୋ
ଗଲଦ୍ରକ୍ତୋ ଵକ୍ତ୍ରାଦପତଦୃଷିଭିଃ ଶ୍ଲାଘିତହତିଃ ।
ତଦା ତ୍ଵାମୁଦ୍ଦାମପ୍ରମଦଭରଵିଦ୍ୟୋତିହୃଦୟା
ମୁନୀଂଦ୍ରାଃ ସାଂଦ୍ରାଭିଃ ସ୍ତୁତିଭିରନୁଵନ୍ନଧ୍ଵରତନୁମ୍ ॥8॥
ତ୍ଵଚି ଛଂଦୋ ରୋମସ୍ଵପି କୁଶଗଣଶ୍ଚକ୍ଷୁଷି ଘୃତଂ
ଚତୁର୍ହୋତାରୋଽଂଘ୍ରୌ ସ୍ରୁଗପି ଵଦନେ ଚୋଦର ଇଡା ।
ଗ୍ରହା ଜିହ୍ଵାୟାଂ ତେ ପରପୁରୁଷ କର୍ଣେ ଚ ଚମସା
ଵିଭୋ ସୋମୋ ଵୀର୍ୟଂ ଵରଦ ଗଲଦେଶେଽପ୍ୟୁପସଦଃ ॥9॥
ମୁନୀଂଦ୍ରୈରିତ୍ୟାଦିସ୍ତଵନମୁଖରୈର୍ମୋଦିତମନା
ମହୀୟସ୍ୟା ମୂର୍ତ୍ୟା ଵିମଲତରକୀର୍ତ୍ୟା ଚ ଵିଲସନ୍ ।
ସ୍ଵଧିଷ୍ଣ୍ୟଂ ସଂପ୍ରାପ୍ତଃ ସୁଖରସଵିହାରୀ ମଧୁରିପୋ
ନିରୁଂଧ୍ୟା ରୋଗଂ ମେ ସକଲମପି ଵାତାଲୟପତେ ॥10॥