ପ୍ରିୟଵ୍ରତସ୍ୟ ପ୍ରିୟପୁତ୍ରଭୂତା-
ଦାଗ୍ନୀଧ୍ରରାଜାଦୁଦିତୋ ହି ନାଭିଃ ।
ତ୍ଵାଂ ଦୃଷ୍ଟଵାନିଷ୍ଟଦମିଷ୍ଟିମଧ୍ୟେ
ତଵୈଵ ତୁଷ୍ଟ୍ୟୈ କୃତୟଜ୍ଞକର୍ମା ॥1॥
ଅଭିଷ୍ଟୁତସ୍ତତ୍ର ମୁନୀଶ୍ଵରୈସ୍ତ୍ଵଂ
ରାଜ୍ଞଃ ସ୍ଵତୁଲ୍ୟଂ ସୁତମର୍ଥ୍ୟମାନଃ ।
ସ୍ଵୟଂ ଜନିଷ୍ୟେଽହମିତି ବ୍ରୁଵାଣ-
ସ୍ତିରୋଦଧା ବର୍ହିଷି ଵିଶ୍ଵମୂର୍ତେ ॥2॥
ନାଭିପ୍ରିୟାୟାମଥ ମେରୁଦେଵ୍ୟାଂ
ତ୍ଵମଂଶତୋଽଭୂଃ ୠଷଭାଭିଧାନଃ ।
ଅଲୋକସାମାନ୍ୟଗୁଣପ୍ରଭାଵ-
ପ୍ରଭାଵିତାଶେଷଜନପ୍ରମୋଦଃ ॥3॥
ତ୍ଵୟି ତ୍ରିଲୋକୀଭୃତି ରାଜ୍ୟଭାରଂ
ନିଧାୟ ନାଭିଃ ସହ ମେରୁଦେଵ୍ୟା ।
ତପୋଵନଂ ପ୍ରାପ୍ୟ ଭଵନ୍ନିଷେଵୀ
ଗତଃ କିଲାନଂଦପଦଂ ପଦଂ ତେ ॥4॥
ଇଂଦ୍ରସ୍ତ୍ଵଦୁତ୍କର୍ଷକୃତାଦମର୍ଷା-
ଦ୍ଵଵର୍ଷ ନାସ୍ମିନ୍ନଜନାଭଵର୍ଷେ ।
ୟଦା ତଦା ତ୍ଵଂ ନିଜୟୋଗଶକ୍ତ୍ୟା
ସ୍ଵଵର୍ଷମେନଦ୍ଵ୍ୟଦଧାଃ ସୁଵର୍ଷମ୍ ॥5॥
ଜିତେଂଦ୍ରଦତ୍ତାଂ କମନୀଂ ଜୟଂତୀ-
ମଥୋଦ୍ଵହନ୍ନାତ୍ମରତାଶୟୋଽପି ।
ଅଜୀଜନସ୍ତତ୍ର ଶତଂ ତନୂଜା-
ନେଷାଂ କ୍ଷିତୀଶୋ ଭରତୋଽଗ୍ରଜନ୍ମା ॥6॥
ନଵାଭଵନ୍ ୟୋଗିଵରା ନଵାନ୍ୟେ
ତ୍ଵପାଲୟନ୍ ଭାରତଵର୍ଷଖଂଡାନ୍ ।
ସୈକା ତ୍ଵଶୀତିସ୍ତଵ ଶେଷପୁତ୍ର-
ସ୍ତପୋବଲାତ୍ ଭୂସୁରଭୂୟମୀୟୁଃ ॥7॥
ଉକ୍ତ୍ଵା ସୁତେଭ୍ୟୋଽଥ ମୁନୀଂଦ୍ରମଧ୍ୟେ
ଵିରକ୍ତିଭକ୍ତ୍ୟନ୍ଵିତମୁକ୍ତିମାର୍ଗମ୍ ।
ସ୍ଵୟଂ ଗତଃ ପାରମହଂସ୍ୟଵୃତ୍ତି-
ମଧା ଜଡୋନ୍ମତ୍ତପିଶାଚଚର୍ୟାମ୍ ॥8॥
ପରାତ୍ମଭୂତୋଽପି ପରୋପଦେଶଂ
କୁର୍ଵନ୍ ଭଵାନ୍ ସର୍ଵନିରସ୍ୟମାନଃ ।
ଵିକାରହୀନୋ ଵିଚଚାର କୃତ୍ସ୍ନାଂ
ମହୀମହୀନାତ୍ମରସାଭିଲୀନଃ ॥9॥
ଶୟୁଵ୍ରତଂ ଗୋମୃଗକାକଚର୍ୟାଂ
ଚିରଂ ଚରନ୍ନାପ୍ୟ ପରଂ ସ୍ଵରୂପମ୍ ।
ଦଵାହୃତାଂଗଃ କୁଟକାଚଲେ ତ୍ଵଂ
ତାପାନ୍ ମମାପାକୁରୁ ଵାତନାଥ ॥10॥