ମଧ୍ୟୋଦ୍ଭଵେ ଭୁଵ ଇଲାଵୃତନାମ୍ନି ଵର୍ଷେ
ଗୌରୀପ୍ରଧାନଵନିତାଜନମାତ୍ରଭାଜି ।
ଶର୍ଵେଣ ମଂତ୍ରନୁତିଭିଃ ସମୁପାସ୍ୟମାନଂ
ସଂକର୍ଷଣାତ୍ମକମଧୀଶ୍ଵର ସଂଶ୍ରୟେ ତ୍ଵାମ୍ ॥1॥
ଭଦ୍ରାଶ୍ଵନାମକ ଇଲାଵୃତପୂର୍ଵଵର୍ଷେ
ଭଦ୍ରଶ୍ରଵୋଭିଃ ଋଷିଭିଃ ପରିଣୂୟମାନମ୍ ।
କଲ୍ପାଂତଗୂଢନିଗମୋଦ୍ଧରଣପ୍ରଵୀଣଂ
ଧ୍ୟାୟାମି ଦେଵ ହୟଶୀର୍ଷତନୁଂ ଭଵଂତମ୍ ॥2॥
ଧ୍ୟାୟାମି ଦକ୍ଷିଣଗତେ ହରିଵର୍ଷଵର୍ଷେ
ପ୍ରହ୍ଲାଦମୁଖ୍ୟପୁରୁଷୈଃ ପରିଷେଵ୍ୟମାଣମ୍ ।
ଉତ୍ତୁଂଗଶାଂତଧଵଲାକୃତିମେକଶୁଦ୍ଧ-
ଜ୍ଞାନପ୍ରଦଂ ନରହରିଂ ଭଗଵନ୍ ଭଵଂତମ୍ ॥3॥
ଵର୍ଷେ ପ୍ରତୀଚି ଲଲିତାତ୍ମନି କେତୁମାଲେ
ଲୀଲାଵିଶେଷଲଲିତସ୍ମିତଶୋଭନାଂଗମ୍ ।
ଲକ୍ଷ୍ମ୍ୟା ପ୍ରଜାପତିସୁତୈଶ୍ଚ ନିଷେଵ୍ୟମାଣଂ
ତସ୍ୟାଃ ପ୍ରିୟାୟ ଧୃତକାମତନୁଂ ଭଜେ ତ୍ଵାମ୍ ॥4॥
ରମ୍ୟେ ହ୍ୟୁଦୀଚି ଖଲୁ ରମ୍ୟକନାମ୍ନି ଵର୍ଷେ
ତଦ୍ଵର୍ଷନାଥମନୁଵର୍ୟସପର୍ୟମାଣମ୍ ।
ଭକ୍ତୈକଵତ୍ସଲମମତ୍ସରହୃତ୍ସୁ ଭାଂତଂ
ମତ୍ସ୍ୟାକୃତିଂ ଭୁଵନନାଥ ଭଜେ ଭଵଂତମ୍ ॥5॥
ଵର୍ଷଂ ହିରଣ୍ମୟସମାହ୍ଵୟମୌତ୍ତରାହ-
ମାସୀନମଦ୍ରିଧୃତିକର୍ମଠକାମଠାଂଗମ୍ ।
ସଂସେଵତେ ପିତୃଗଣପ୍ରଵରୋଽର୍ୟମା ୟଂ
ତଂ ତ୍ଵାଂ ଭଜାମି ଭଗଵନ୍ ପରଚିନ୍ମୟାତ୍ମନ୍ ॥6॥
କିଂଚୋତ୍ତରେଷୁ କୁରୁଷୁ ପ୍ରିୟୟା ଧରଣ୍ୟା
ସଂସେଵିତୋ ମହିତମଂତ୍ରନୁତିପ୍ରଭେଦୈଃ ।
ଦଂଷ୍ଟ୍ରାଗ୍ରଘୃଷ୍ଟଘନପୃଷ୍ଠଗରିଷ୍ଠଵର୍ଷ୍ମା
ତ୍ଵଂ ପାହି ବିଜ୍ଞନୁତ ୟଜ୍ଞଵରାହମୂର୍ତେ ॥7॥
ୟାମ୍ୟାଂ ଦିଶଂ ଭଜତି କିଂପୁରୁଷାଖ୍ୟଵର୍ଷେ
ସଂସେଵିତୋ ହନୁମତା ଦୃଢଭକ୍ତିଭାଜା ।
ସୀତାଭିରାମପରମାଦ୍ଭୁତରୂପଶାଲୀ
ରାମାତ୍ମକଃ ପରିଲସନ୍ ପରିପାହି ଵିଷ୍ଣୋ ॥8॥
ଶ୍ରୀନାରଦେନ ସହ ଭାରତଖଂଡମୁଖ୍ୟୈ-
ସ୍ତ୍ଵଂ ସାଂଖ୍ୟୟୋଗନୁତିଭିଃ ସମୁପାସ୍ୟମାନଃ ।
ଆକଲ୍ପକାଲମିହ ସାଧୁଜନାଭିରକ୍ଷୀ
ନାରାୟଣୋ ନରସଖଃ ପରିପାହି ଭୂମନ୍ ॥9॥
ପ୍ଲାକ୍ଷେଽର୍କରୂପମୟି ଶାଲ୍ମଲ ଇଂଦୁରୂପଂ
ଦ୍ଵୀପେ ଭଜଂତି କୁଶନାମନି ଵହ୍ନିରୂପମ୍ ।
କ୍ରୌଂଚେଽଂବୁରୂପମଥ ଵାୟୁମୟଂ ଚ ଶାକେ
ତ୍ଵାଂ ବ୍ରହ୍ମରୂପମପି ପୁଷ୍କରନାମ୍ନି ଲୋକାଃ ॥10॥
ସର୍ଵୈର୍ଧ୍ରୁଵାଦିଭିରୁଡୁପ୍ରକରୈର୍ଗ୍ରହୈଶ୍ଚ
ପୁଚ୍ଛାଦିକେଷ୍ଵଵୟଵେଷ୍ଵଭିକଲ୍ପ୍ୟମାନୈଃ ।
ତ୍ଵଂ ଶିଂଶୁମାରଵପୁଷା ମହତାମୁପାସ୍ୟଃ
ସଂଧ୍ୟାସୁ ରୁଂଧି ନରକଂ ମମ ସିଂଧୁଶାୟିନ୍ ॥11॥
ପାତାଲମୂଲଭୁଵି ଶେଷତନୁଂ ଭଵଂତଂ
ଲୋଲୈକକୁଂଡଲଵିରାଜିସହସ୍ରଶୀର୍ଷମ୍ ।
ନୀଲାଂବରଂ ଧୃତହଲଂ ଭୁଜଗାଂଗନାଭି-
ର୍ଜୁଷ୍ଟଂ ଭଜେ ହର ଗଦାନ୍ ଗୁରୁଗେହନାଥ ॥12॥