ଇଂଦ୍ରଦ୍ୟୁମ୍ନଃ ପାଂଡ୍ୟଖଂଡାଧିରାଜ-
ସ୍ତ୍ଵଦ୍ଭକ୍ତାତ୍ମା ଚଂଦନାଦ୍ରୌ କଦାଚିତ୍ ।
ତ୍ଵତ୍ ସେଵାୟାଂ ମଗ୍ନଧୀରାଲୁଲୋକେ
ନୈଵାଗସ୍ତ୍ୟଂ ପ୍ରାପ୍ତମାତିଥ୍ୟକାମମ୍ ॥1॥
କୁଂଭୋଦ୍ଭୂତିଃ ସଂଭୃତକ୍ରୋଧଭାରଃ
ସ୍ତବ୍ଧାତ୍ମା ତ୍ଵଂ ହସ୍ତିଭୂୟଂ ଭଜେତି ।
ଶପ୍ତ୍ଵାଽଥୈନଂ ପ୍ରତ୍ୟଗାତ୍ ସୋଽପି ଲେଭେ
ହସ୍ତୀଂଦ୍ରତ୍ଵଂ ତ୍ଵତ୍ସ୍ମୃତିଵ୍ୟକ୍ତିଧନ୍ୟମ୍ ॥2॥
ଦଗ୍ଧାଂଭୋଧେର୍ମଧ୍ୟଭାଜି ତ୍ରିକୂଟେ
କ୍ରୀଡଂଛୈଲେ ୟୂଥପୋଽୟଂ ଵଶାଭିଃ ।
ସର୍ଵାନ୍ ଜଂତୂନତ୍ୟଵର୍ତିଷ୍ଟ ଶକ୍ତ୍ୟା
ତ୍ଵଦ୍ଭକ୍ତାନାଂ କୁତ୍ର ନୋତ୍କର୍ଷଲାଭଃ ॥3॥
ସ୍ଵେନ ସ୍ଥେମ୍ନା ଦିଵ୍ୟଦେଶତ୍ଵଶକ୍ତ୍ୟା
ସୋଽୟଂ ଖେଦାନପ୍ରଜାନନ୍ କଦାଚିତ୍ ।
ଶୈଲପ୍ରାଂତେ ଘର୍ମତାଂତଃ ସରସ୍ୟାଂ
ୟୂଥୈସ୍ସାର୍ଧଂ ତ୍ଵତ୍ପ୍ରଣୁନ୍ନୋଽଭିରେମେ ॥4॥
ହୂହୂସ୍ତାଵଦ୍ଦେଵଲସ୍ୟାପି ଶାପାତ୍
ଗ୍ରାହୀଭୂତସ୍ତଜ୍ଜଲେ ବର୍ତମାନଃ ।
ଜଗ୍ରାହୈନଂ ହସ୍ତିନଂ ପାଦଦେଶେ
ଶାଂତ୍ୟର୍ଥଂ ହି ଶ୍ରାଂତିଦୋଽସି ସ୍ଵକାନାମ୍ ॥5॥
ତ୍ଵତ୍ସେଵାୟା ଵୈଭଵାତ୍ ଦୁର୍ନିରୋଧଂ
ୟୁଧ୍ୟଂତଂ ତଂ ଵତ୍ସରାଣାଂ ସହସ୍ରମ୍ ।
ପ୍ରାପ୍ତେ କାଲେ ତ୍ଵତ୍ପଦୈକାଗ୍ର୍ୟସିଧ୍ୟୈ
ନକ୍ରାକ୍ରାଂତଂ ହସ୍ତିଵର୍ୟଂ ଵ୍ୟଧାସ୍ତ୍ଵମ୍ ॥6॥
ଆର୍ତିଵ୍ୟକ୍ତପ୍ରାକ୍ତନଜ୍ଞାନଭକ୍ତିଃ
ଶୁଂଡୋତ୍କ୍ଷିପ୍ତୈଃ ପୁଂଡରୀକୈଃ ସମର୍ଚନ୍ ।
ପୂର୍ଵାଭ୍ୟସ୍ତଂ ନିର୍ଵିଶେଷାତ୍ମନିଷ୍ଠଂ
ସ୍ତୋତ୍ରଂ ଶ୍ରେଷ୍ଠଂ ସୋଽନ୍ଵଗାଦୀତ୍ ପରାତ୍ମନ୍ ॥7॥
ଶ୍ରୁତ୍ଵା ସ୍ତୋତ୍ରଂ ନିର୍ଗୁଣସ୍ଥଂ ସମସ୍ତଂ
ବ୍ରହ୍ମେଶାଦ୍ୟୈର୍ନାହମିତ୍ୟପ୍ରୟାତେ ।
ସର୍ଵାତ୍ମା ତ୍ଵଂ ଭୂରିକାରୁଣ୍ୟଵେଗାତ୍
ତାର୍କ୍ଷ୍ୟାରୂଢଃ ପ୍ରେକ୍ଷିତୋଽଭୂଃ ପୁରସ୍ତାତ୍ ॥8॥
ହସ୍ତୀଂଦ୍ରଂ ତଂ ହସ୍ତପଦ୍ମେନ ଧୃତ୍ଵା
ଚକ୍ରେଣ ତ୍ଵଂ ନକ୍ରଵର୍ୟଂ ଵ୍ୟଦାରୀଃ ।
ଗଂଧର୍ଵେଽସ୍ମିନ୍ ମୁକ୍ତଶାପେ ସ ହସ୍ତୀ
ତ୍ଵତ୍ସାରୂପ୍ୟଂ ପ୍ରାପ୍ୟ ଦେଦୀପ୍ୟତେ ସ୍ମ ॥9॥
ଏତଦ୍ଵୃତ୍ତଂ ତ୍ଵାଂ ଚ ମାଂ ଚ ପ୍ରଗେ ୟୋ
ଗାୟେତ୍ସୋଽୟଂ ଭୂୟସେ ଶ୍ରେୟସେ ସ୍ୟାତ୍ ।
ଇତ୍ୟୁକ୍ତ୍ଵୈନଂ ତେନ ସାର୍ଧଂ ଗତସ୍ତ୍ଵଂ
ଧିଷ୍ଣ୍ୟଂ ଵିଷ୍ଣୋ ପାହି ଵାତାଲୟେଶ ॥10॥