ଗରଲଂ ତରଲାନଲଂ ପୁରସ୍ତା-
ଜ୍ଜଲଧେରୁଦ୍ଵିଜଗାଲ କାଲକୂଟମ୍ ।
ଅମରସ୍ତୁତିଵାଦମୋଦନିଘ୍ନୋ
ଗିରିଶସ୍ତନ୍ନିପପୌ ଭଵତ୍ପ୍ରିୟାର୍ଥମ୍ ॥1॥
ଵିମଥତ୍ସୁ ସୁରାସୁରେଷୁ ଜାତା
ସୁରଭିସ୍ତାମୃଷିଷୁ ନ୍ୟଧାସ୍ତ୍ରିଧାମନ୍ ।
ହୟରତ୍ନମଭୂଦଥେଭରତ୍ନଂ
ଦ୍ୟୁତରୁଶ୍ଚାପ୍ସରସଃ ସୁରେଷୁ ତାନି ॥2॥
ଜଗଦୀଶ ଭଵତ୍ପରା ତଦାନୀଂ
କମନୀୟା କମଲା ବଭୂଵ ଦେଵୀ ।
ଅମଲାମଵଲୋକ୍ୟ ୟାଂ ଵିଲୋଲଃ
ସକଲୋଽପି ସ୍ପୃହୟାଂବଭୂଵ ଲୋକଃ ॥3॥
ତ୍ଵୟି ଦତ୍ତହୃଦେ ତଦୈଵ ଦେଵ୍ୟୈ
ତ୍ରିଦଶେଂଦ୍ରୋ ମଣିପୀଠିକାଂ ଵ୍ୟତାରୀତ୍ ।
ସକଲୋପହୃତାଭିଷେଚନୀୟୈଃ
ଋଷୟସ୍ତାଂ ଶ୍ରୁତିଗୀର୍ଭିରଭ୍ୟଷିଂଚନ୍ ॥4॥
ଅଭିଷେକଜଲାନୁପାତିମୁଗ୍ଧ-
ତ୍ଵଦପାଂଗୈରଵଭୂଷିତାଂଗଵଲ୍ଲୀମ୍ ।
ମଣିକୁଂଡଲପୀତଚେଲହାର-
ପ୍ରମୁଖୈସ୍ତାମମରାଦୟୋଽନ୍ଵଭୂଷନ୍ ॥5॥
ଵରଣସ୍ରଜମାତ୍ତଭୃଂଗନାଦାଂ
ଦଧତୀ ସା କୁଚକୁଂଭମଂଦୟାନା ।
ପଦଶିଂଜିତମଂଜୁନୂପୁରା ତ୍ଵାଂ
କଲିତଵ୍ରୀଲଵିଲାସମାସସାଦ ॥6॥
ଗିରିଶଦ୍ରୁହିଣାଦିସର୍ଵଦେଵାନ୍
ଗୁଣଭାଜୋଽପ୍ୟଵିମୁକ୍ତଦୋଷଲେଶାନ୍ ।
ଅଵମୃଶ୍ୟ ସଦୈଵ ସର୍ଵରମ୍ୟେ
ନିହିତା ତ୍ଵୟ୍ୟନୟାଽପି ଦିଵ୍ୟମାଲା ॥7॥
ଉରସା ତରସା ମମାନିଥୈନାଂ
ଭୁଵନାନାଂ ଜନନୀମନନ୍ୟଭାଵାମ୍ ।
ତ୍ଵଦୁରୋଵିଲସତ୍ତଦୀକ୍ଷଣଶ୍ରୀ-
ପରିଵୃଷ୍ଟ୍ୟା ପରିପୁଷ୍ଟମାସ ଵିଶ୍ଵମ୍ ॥8॥
ଅତିମୋହନଵିଭ୍ରମା ତଦାନୀଂ
ମଦୟଂତୀ ଖଲୁ ଵାରୁଣୀ ନିରାଗାତ୍ ।
ତମସଃ ପଦଵୀମଦାସ୍ତ୍ଵମେନା-
ମତିସମ୍ମାନନୟା ମହାସୁରେଭ୍ୟଃ ॥9॥
ତରୁଣାଂବୁଦସୁଂଦରସ୍ତଦା ତ୍ଵଂ
ନନୁ ଧନ୍ଵଂତରିରୁତ୍ଥିତୋଽଂବୁରାଶେଃ ।
ଅମୃତଂ କଲଶେ ଵହନ୍ କରାଭ୍ୟା-
ମଖିଲାର୍ତିଂ ହର ମାରୁତାଲୟେଶ ॥10॥