ଉଦ୍ଗଚ୍ଛତସ୍ତଵ କରାଦମୃତଂ ହରତ୍ସୁ
ଦୈତ୍ୟେଷୁ ତାନଶରଣାନନୁନୀୟ ଦେଵାନ୍ ।
ସଦ୍ୟସ୍ତିରୋଦଧିଥ ଦେଵ ଭଵତ୍ପ୍ରଭାଵା-
ଦୁଦ୍ୟତ୍ସ୍ଵୟୂଥ୍ୟକଲହା ଦିତିଜା ବଭୂଵୁଃ ॥1॥
ଶ୍ୟାମାଂ ରୁଚାଽପି ଵୟସାଽପି ତନୁଂ ତଦାନୀଂ
ପ୍ରାପ୍ତୋଽସି ତୁଂଗକୁଚମଂଡଲଭଂଗୁରାଂ ତ୍ଵମ୍ ।
ପୀୟୂଷକୁଂଭକଲହଂ ପରିମୁଚ୍ୟ ସର୍ଵେ
ତୃଷ୍ଣାକୁଲାଃ ପ୍ରତିୟୟୁସ୍ତ୍ଵଦୁରୋଜକୁଂଭେ ॥2॥
କା ତ୍ଵଂ ମୃଗାକ୍ଷି ଵିଭଜସ୍ଵ ସୁଧାମିମାମି-
ତ୍ୟାରୂଢରାଗଵିଵଶାନଭିୟାଚତୋଽମୂନ୍ ।
ଵିଶ୍ଵସ୍ୟତେ ମୟି କଥଂ କୁଲଟାଽସ୍ମି ଦୈତ୍ୟା
ଇତ୍ୟାଲପନ୍ନପି ସୁଵିଶ୍ଵସିତାନତାନୀଃ ॥3॥
ମୋଦାତ୍ ସୁଧାକଲଶମେଷୁ ଦଦତ୍ସୁ ସା ତ୍ଵଂ
ଦୁଶ୍ଚେଷ୍ଟିତଂ ମମ ସହଧ୍ଵମିତି ବ୍ରୁଵାଣା ।
ପଂକ୍ତିପ୍ରଭେଦଵିନିଵେଶିତଦେଵଦୈତ୍ୟା
ଲୀଲାଵିଲାସଗତିଭିଃ ସମଦାଃ ସୁଧାଂ ତାମ୍ ॥4॥
ଅସ୍ମାସ୍ଵିୟଂ ପ୍ରଣୟିଣୀତ୍ୟସୁରେଷୁ ତେଷୁ
ଜୋଷଂ ସ୍ଥିତେଷ୍ଵଥ ସମାପ୍ୟ ସୁଧାଂ ସୁରେଷୁ ।
ତ୍ଵଂ ଭକ୍ତଲୋକଵଶଗୋ ନିଜରୂପମେତ୍ୟ
ସ୍ଵର୍ଭାନୁମର୍ଧପରିପୀତସୁଧଂ ଵ୍ୟଲାଵୀଃ ॥5॥
ତ୍ଵତ୍ତଃ ସୁଧାହରଣୟୋଗ୍ୟଫଲଂ ପରେଷୁ
ଦତ୍ଵା ଗତେ ତ୍ଵୟି ସୁରୈଃ ଖଲୁ ତେ ଵ୍ୟଗୃହ୍ଣନ୍ ।
ଘୋରେଽଥ ମୂର୍ଛତି ରଣେ ବଲିଦୈତ୍ୟମାୟା-
ଵ୍ୟାମୋହିତେ ସୁରଗଣେ ତ୍ଵମିହାଵିରାସୀଃ ॥6॥
ତ୍ଵଂ କାଲନେମିମଥ ମାଲିମୁଖାଂଜଘଂଥ
ଶକ୍ରୋ ଜଘାନ ବଲିଜଂଭଵଲାନ୍ ସପାକାନ୍ ।
ଶୁଷ୍କାର୍ଦ୍ରଦୁଷ୍କରଵଧେ ନମୁଚୌ ଚ ଲୂନେ
ଫେନେନ ନାରଦଗିରା ନ୍ୟରୁଣୋ ରଣଂ ତ୍ଵମ୍ ॥7॥
ୟୋଷାଵପୁର୍ଦନୁଜମୋହନମାହିତଂ ତେ
ଶ୍ରୁତ୍ଵା ଵିଲୋକନକୁତୂହଲଵାନ୍ ମହେଶଃ ।
ଭୂତୈସ୍ସମଂ ଗିରିଜୟା ଚ ଗତଃ ପଦଂ ତେ
ସ୍ତୁତ୍ଵାଽବ୍ରଵୀଦଭିମତଂ ତ୍ଵମଥୋ ତିରୋଧାଃ ॥8॥
ଆରାମସୀମନି ଚ କଂଦୁକଘାତଲୀଲା-
ଲୋଲାୟମାନନୟନାଂ କମନୀଂ ମନୋଜ୍ଞାମ୍ ।
ତ୍ଵାମେଷ ଵୀକ୍ଷ୍ୟ ଵିଗଲଦ୍ଵସନାଂ ମନୋଭୂ-
ଵେଗାଦନଂଗରିପୁରଂଗ ସମାଲିଲିଂଗ ॥9॥
ଭୂୟୋଽପି ଵିଦ୍ରୁତଵତୀମୁପଧାଵ୍ୟ ଦେଵୋ
ଵୀର୍ୟପ୍ରମୋକ୍ଷଵିକସତ୍ପରମାର୍ଥବୋଧଃ ।
ତ୍ଵନ୍ମାନିତସ୍ତଵ ମହତ୍ତ୍ଵମୁଵାଚ ଦେଵ୍ୟୈ
ତତ୍ତାଦୃଶସ୍ତ୍ଵମଵ ଵାତନିକେତନାଥ ॥10॥