ପଠଂତୋ ନାମାନି ପ୍ରମଦଭରସିଂଧୌ ନିପତିତାଃ
ସ୍ମରଂତୋ ରୂପଂ ତେ ଵରଦ କଥୟଂତୋ ଗୁଣକଥାଃ ।
ଚରଂତୋ ୟେ ଭକ୍ତାସ୍ତ୍ଵୟି ଖଲୁ ରମଂତେ ପରମମୂ-
ନହଂ ଧନ୍ୟାନ୍ ମନ୍ୟେ ସମଧିଗତସର୍ଵାଭିଲଷିତାନ୍ ॥1॥
ଗଦକ୍ଲିଷ୍ଟଂ କଷ୍ଟଂ ତଵ ଚରଣସେଵାରସଭରେଽ-
ପ୍ୟନାସକ୍ତଂ ଚିତ୍ତଂ ଭଵତି ବତ ଵିଷ୍ଣୋ କୁରୁ ଦୟାମ୍ ।
ଭଵତ୍ପାଦାଂଭୋଜସ୍ମରଣରସିକୋ ନାମନିଵହା-
ନହଂ ଗାୟଂ ଗାୟଂ କୁହଚନ ଵିଵତ୍ସ୍ୟାମି ଵିଜନେ ॥2॥
କୃପା ତେ ଜାତା ଚେତ୍କିମିଵ ନ ହି ଲଭ୍ୟଂ ତନୁଭୃତାଂ
ମଦୀୟକ୍ଲେଶୌଘପ୍ରଶମନଦଶା ନାମ କିୟତୀ ।
ନ କେ କେ ଲୋକେଽସ୍ମିନ୍ନନିଶମୟି ଶୋକାଭିରହିତା
ଭଵଦ୍ଭକ୍ତା ମୁକ୍ତାଃ ସୁଖଗତିମସକ୍ତା ଵିଦଧତେ ॥3॥
ମୁନିପ୍ରୌଢା ରୂଢା ଜଗତି ଖଲୁ ଗୂଢାତ୍ମଗତୟୋ
ଭଵତ୍ପାଦାଂଭୋଜସ୍ମରଣଵିରୁଜୋ ନାରଦମୁଖାଃ ।
ଚରଂତୀଶ ସ୍ଵୈରଂ ସତତପରିନିର୍ଭାତପରଚି –
ତ୍ସଦାନଂଦାଦ୍ଵୈତପ୍ରସରପରିମଗ୍ନାଃ କିମପରମ୍ ॥4॥
ଭଵଦ୍ଭକ୍ତିଃ ସ୍ଫୀତା ଭଵତୁ ମମ ସୈଵ ପ୍ରଶମୟେ-
ଦଶେଷକ୍ଲେଶୌଘଂ ନ ଖଲୁ ହୃଦି ସଂଦେହକଣିକା ।
ନ ଚେଦ୍ଵ୍ୟାସସ୍ୟୋକ୍ତିସ୍ତଵ ଚ ଵଚନଂ ନୈଗମଵଚୋ
ଭଵେନ୍ମିଥ୍ୟା ରଥ୍ୟାପୁରୁଷଵଚନପ୍ରାୟମଖିଲମ୍ ॥5॥
ଭଵଦ୍ଭକ୍ତିସ୍ତାଵତ୍ ପ୍ରମୁଖମଧୁରା ତ୍ଵତ୍ ଗୁଣରସାତ୍
କିମପ୍ୟାରୂଢା ଚେଦଖିଲପରିତାପପ୍ରଶମନୀ ।
ପୁନଶ୍ଚାଂତେ ସ୍ଵାଂତେ ଵିମଲପରିବୋଧୋଦୟମିଲ-
ନ୍ମହାନଂଦାଦ୍ଵୈତଂ ଦିଶତି କିମତଃ ପ୍ରାର୍ଥ୍ୟମପରମ୍ ॥6॥
ଵିଧୂୟ କ୍ଲେଶାନ୍ମେ କୁରୁ ଚରଣୟୁଗ୍ମଂ ଧୃତରସଂ
ଭଵତ୍କ୍ଷେତ୍ରପ୍ରାପ୍ତୌ କରମପି ଚ ତେ ପୂଜନଵିଧୌ ।
ଭଵନ୍ମୂର୍ତ୍ୟାଲୋକେ ନୟନମଥ ତେ ପାଦତୁଲସୀ-
ପରିଘ୍ରାଣେ ଘ୍ରାଣଂ ଶ୍ରଵଣମପି ତେ ଚାରୁଚରିତେ ॥7॥
ପ୍ରଭୂତାଧିଵ୍ୟାଧିପ୍ରସଭଚଲିତେ ମାମକହୃଦି
ତ୍ଵଦୀୟଂ ତଦ୍ରୂପଂ ପରମସୁଖଚିଦ୍ରୂପମୁଦିୟାତ୍ ।
ଉଦଂଚଦ୍ରୋମାଂଚୋ ଗଲିତବହୁହର୍ଷାଶ୍ରୁନିଵହୋ
ୟଥା ଵିସ୍ମର୍ୟାସଂ ଦୁରୁପଶମପୀଡାପରିଭଵାନ୍ ॥8॥
ମରୁଦ୍ଗେହାଧୀଶ ତ୍ଵୟି ଖଲୁ ପରାଂଚୋଽପି ସୁଖିନୋ
ଭଵତ୍ସ୍ନେହୀ ସୋଽହଂ ସୁବହୁ ପରିତପ୍ୟେ ଚ କିମିଦମ୍ ।
ଅକୀର୍ତିସ୍ତେ ମା ଭୂଦ୍ଵରଦ ଗଦଭାରଂ ପ୍ରଶମୟନ୍
ଭଵତ୍ ଭକ୍ତୋତ୍ତଂସଂ ଝଟିତି କୁରୁ ମାଂ କଂସଦମନ ॥9॥
କିମୁକ୍ତୈର୍ଭୂୟୋଭିସ୍ତଵ ହି କରୁଣା ୟାଵଦୁଦିୟା-
ଦହଂ ତାଵଦ୍ଦେଵ ପ୍ରହିତଵିଵିଧାର୍ତପ୍ରଲପିତଃ ।
ପୁରଃ କ୍ଲୃପ୍ତେ ପାଦେ ଵରଦ ତଵ ନେଷ୍ୟାମି ଦିଵସା-
ନ୍ୟଥାଶକ୍ତି ଵ୍ୟକ୍ତଂ ନତିନୁତିନିଷେଵା ଵିରଚୟନ୍ ॥10॥