ଶକ୍ରେଣ ସଂୟତି ହତୋଽପି ବଲିର୍ମହାତ୍ମା
ଶୁକ୍ରେଣ ଜୀଵିତତନୁଃ କ୍ରତୁଵର୍ଧିତୋଷ୍ମା ।
ଵିକ୍ରାଂତିମାନ୍ ଭୟନିଲୀନସୁରାଂ ତ୍ରିଲୋକୀଂ
ଚକ୍ରେ ଵଶେ ସ ତଵ ଚକ୍ରମୁଖାଦଭୀତଃ ॥1॥
ପୁତ୍ରାର୍ତିଦର୍ଶନଵଶାଦଦିତିର୍ଵିଷଣ୍ଣା
ତଂ କାଶ୍ୟପଂ ନିଜପତିଂ ଶରଣଂ ପ୍ରପନ୍ନା ।
ତ୍ଵତ୍ପୂଜନଂ ତଦୁଦିତଂ ହି ପୟୋଵ୍ରତାଖ୍ୟଂ
ସା ଦ୍ଵାଦଶାହମଚରତ୍ତ୍ଵୟି ଭକ୍ତିପୂର୍ଣା ॥2॥
ତସ୍ୟାଵଧୌ ତ୍ଵୟି ନିଲୀନମତେରମୁଷ୍ୟାଃ
ଶ୍ୟାମଶ୍ଚତୁର୍ଭୁଜଵପୁଃ ସ୍ଵୟମାଵିରାସୀଃ ।
ନମ୍ରାଂ ଚ ତାମିହ ଭଵତ୍ତନୟୋ ଭଵେୟଂ
ଗୋପ୍ୟଂ ମଦୀକ୍ଷଣମିତି ପ୍ରଲପନ୍ନୟାସୀଃ ॥3॥
ତ୍ଵଂ କାଶ୍ୟପେ ତପସି ସନ୍ନିଦଧତ୍ତଦାନୀଂ
ପ୍ରାପ୍ତୋଽସି ଗର୍ଭମଦିତେଃ ପ୍ରଣୁତୋ ଵିଧାତ୍ରା ।
ପ୍ରାସୂତ ଚ ପ୍ରକଟଵୈଷ୍ଣଵଦିଵ୍ୟରୂପଂ
ସା ଦ୍ଵାଦଶୀଶ୍ରଵଣପୁଣ୍ୟଦିନେ ଭଵଂତମ୍ ॥4॥
ପୁଣ୍ୟାଶ୍ରମଂ ତମଭିଵର୍ଷତି ପୁଷ୍ପଵର୍ଷୈ-
ର୍ହର୍ଷାକୁଲେ ସୁରଗଣେ କୃତତୂର୍ୟଘୋଷେ ।
ବଧ୍ଵାଽଂଜଲିଂ ଜୟ ଜୟେତି ନୁତଃ ପିତୃଭ୍ୟାଂ
ତ୍ଵଂ ତତ୍କ୍ଷଣେ ପଟୁତମଂ ଵଟୁରୂପମାଧାଃ ॥5॥
ତାଵତ୍ପ୍ରଜାପତିମୁଖୈରୁପନୀୟ ମୌଂଜୀ-
ଦଂଡାଜିନାକ୍ଷଵଲୟାଦିଭିରର୍ଚ୍ୟମାନଃ ।
ଦେଦୀପ୍ୟମାନଵପୁରୀଶ କୃତାଗ୍ନିକାର୍ୟ-
ସ୍ତ୍ଵଂ ପ୍ରାସ୍ଥିଥା ବଲିଗୃହଂ ପ୍ରକୃତାଶ୍ଵମେଧମ୍ ॥6॥
ଗାତ୍ରେଣ ଭାଵିମହିମୋଚିତଗୌରଵଂ ପ୍ରା-
ଗ୍ଵ୍ୟାଵୃଣ୍ଵତେଵ ଧରଣୀଂ ଚଲୟନ୍ନାୟାସୀଃ ।
ଛତ୍ରଂ ପରୋଷ୍ମତିରଣାର୍ଥମିଵାଦଧାନୋ
ଦଂଡଂ ଚ ଦାନଵଜନେଷ୍ଵିଵ ସନ୍ନିଧାତୁମ୍ ॥7॥
ତାଂ ନର୍ମଦୋତ୍ତରତଟେ ହୟମେଧଶାଲା-
ମାସେଦୁଷି ତ୍ଵୟି ରୁଚା ତଵ ରୁଦ୍ଧନେତ୍ରୈଃ ।
ଭାସ୍ଵାନ୍ କିମେଷ ଦହନୋ ନୁ ସନତ୍କୁମାରୋ
ୟୋଗୀ ନୁ କୋଽୟମିତି ଶୁକ୍ରମୁଖୈଶ୍ଶଶଂକେ ॥8॥
ଆନୀତମାଶୁ ଭୃଗୁଭିର୍ମହସାଽଭିଭୂତୈ-
ସ୍ତ୍ଵାଂ ରମ୍ୟରୂପମସୁରଃ ପୁଲକାଵୃତାଂଗଃ ।
ଭକ୍ତ୍ୟା ସମେତ୍ୟ ସୁକୃତୀ ପରିଣିଜ୍ୟ ପାଦୌ
ତତ୍ତୋୟମନ୍ଵଧୃତ ମୂର୍ଧନି ତୀର୍ଥତୀର୍ଥମ୍ ॥9॥
ପ୍ରହ୍ଲାଦଵଂଶଜତୟା କ୍ରତୁଭିର୍ଦ୍ଵିଜେଷୁ
ଵିଶ୍ଵାସତୋ ନୁ ତଦିଦଂ ଦିତିଜୋଽପି ଲେଭେ ।
ୟତ୍ତେ ପଦାଂବୁ ଗିରିଶସ୍ୟ ଶିରୋଭିଲାଲ୍ୟଂ
ସ ତ୍ଵଂ ଵିଭୋ ଗୁରୁପୁରାଲୟ ପାଲୟେଥାଃ ॥10॥