ଵୈଵସ୍ଵତାଖ୍ୟମନୁପୁତ୍ରନଭାଗଜାତ-
ନାଭାଗନାମକନରେଂଦ୍ରସୁତୋଽଂବରୀଷଃ ।
ସପ୍ତାର୍ଣଵାଵୃତମହୀଦୟିତୋଽପି ରେମେ
ତ୍ଵତ୍ସଂଗିଷୁ ତ୍ଵୟି ଚ ମଗ୍ନମନାସ୍ସଦୈଵ ॥1॥
ତ୍ଵତ୍ପ୍ରୀତୟେ ସକଲମେଵ ଵିତନ୍ଵତୋଽସ୍ୟ
ଭକ୍ତ୍ୟୈଵ ଦେଵ ନଚିରାଦଭୃଥାଃ ପ୍ରସାଦମ୍ ।
ୟେନାସ୍ୟ ୟାଚନମୃତେଽପ୍ୟଭିରକ୍ଷଣାର୍ଥଂ
ଚକ୍ରଂ ଭଵାନ୍ ପ୍ରଵିତତାର ସହସ୍ରଧାରମ୍ ॥2॥
ସ ଦ୍ଵାଦଶୀଵ୍ରତମଥୋ ଭଵଦର୍ଚନାର୍ଥଂ
ଵର୍ଷଂ ଦଧୌ ମଧୁଵନେ ୟମୁନୋପକଂଠେ ।
ପତ୍ନ୍ୟା ସମଂ ସୁମନସା ମହତୀଂ ଵିତନ୍ଵନ୍
ପୂଜାଂ ଦ୍ଵିଜେଷୁ ଵିସୃଜନ୍ ପଶୁଷଷ୍ଟିକୋଟିମ୍ ॥3॥
ତତ୍ରାଥ ପାରଣଦିନେ ଭଵଦର୍ଚନାଂତେ
ଦୁର୍ଵାସସାଽସ୍ୟ ମୁନିନା ଭଵନଂ ପ୍ରପେଦେ ।
ଭୋକ୍ତୁଂ ଵୃତଶ୍ଚସ ନୃପେଣ ପରାର୍ତିଶୀଲୋ
ମଂଦଂ ଜଗାମ ୟମୁନାଂ ନିୟମାନ୍ଵିଧାସ୍ୟନ୍ ॥4॥
ରାଜ୍ଞାଽଥ ପାରଣମୁହୂର୍ତସମାପ୍ତିଖେଦା-
ଦ୍ଵାରୈଵ ପାରଣମକାରି ଭଵତ୍ପରେଣ ।
ପ୍ରାପ୍ତୋ ମୁନିସ୍ତଦଥ ଦିଵ୍ୟଦୃଶା ଵିଜାନନ୍
କ୍ଷିପ୍ୟନ୍ କ୍ରୁଧୋଦ୍ଧୃତଜଟୋ ଵିତତାନ କୃତ୍ୟାମ୍ ॥5॥
କୃତ୍ୟାଂ ଚ ତାମସିଧରାଂ ଭୁଵନଂ ଦହଂତୀ-
ମଗ୍ରେଽଭିଵୀକ୍ଷ୍ୟନୃପତିର୍ନ ପଦାଚ୍ଚକଂପେ ।
ତ୍ଵଦ୍ଭକ୍ତବାଧମଭିଵୀକ୍ଷ୍ୟ ସୁଦର୍ଶନଂ ତେ
କୃତ୍ୟାନଲଂ ଶଲଭୟନ୍ ମୁନିମନ୍ଵଧାଵୀତ୍ ॥6॥
ଧାଵନ୍ନଶେଷଭୁଵନେଷୁ ଭିୟା ସ ପଶ୍ୟନ୍
ଵିଶ୍ଵତ୍ର ଚକ୍ରମପି ତେ ଗତଵାନ୍ ଵିରିଂଚମ୍ ।
କଃ କାଲଚକ୍ରମତିଲଂଘୟତୀତ୍ୟପାସ୍ତଃ
ଶର୍ଵଂ ୟୟୌ ସ ଚ ଭଵଂତମଵଂଦତୈଵ ॥7॥
ଭୂୟୋ ଭଵନ୍ନିଲୟମେତ୍ୟ ମୁନିଂ ନମଂତଂ
ପ୍ରୋଚେ ଭଵାନହମୃଷେ ନନୁ ଭକ୍ତଦାସଃ ।
ଜ୍ଞାନଂ ତପଶ୍ଚ ଵିନୟାନ୍ଵିତମେଵ ମାନ୍ୟଂ
ୟାହ୍ୟଂବରୀଷପଦମେଵ ଭଜେତି ଭୂମନ୍ ॥8॥
ତାଵତ୍ସମେତ୍ୟ ମୁନିନା ସ ଗୃହୀତପାଦୋ
ରାଜାଽପସୃତ୍ୟ ଭଵଦସ୍ତ୍ରମସାଵନୌଷୀତ୍ ।
ଚକ୍ରେ ଗତେ ମୁନିରଦାଦଖିଲାଶିଷୋଽସ୍ମୈ
ତ୍ଵଦ୍ଭକ୍ତିମାଗସି କୃତେଽପି କୃପାଂ ଚ ଶଂସନ୍ ॥9॥
ରାଜା ପ୍ରତୀକ୍ଷ୍ୟ ମୁନିମେକସମାମନାଶ୍ଵାନ୍
ସଂଭୋଜ୍ୟ ସାଧୁ ତମୃଷିଂ ଵିସୃଜନ୍ ପ୍ରସନ୍ନମ୍ ।
ଭୁକ୍ତ୍ଵା ସ୍ଵୟଂ ତ୍ଵୟି ତତୋଽପି ଦୃଢଂ ରତୋଽଭୂ-
ତ୍ସାୟୁଜ୍ୟମାପ ଚ ସ ମାଂ ପଵନେଶ ପାୟାଃ ॥10॥