ନୀତସ୍ସୁଗ୍ରୀଵମୈତ୍ରୀଂ ତଦନୁ ହନୁମତା ଦୁଂଦୁଭେଃ କାୟମୁଚ୍ଚୈଃ
କ୍ଷିପ୍ତ୍ଵାଂଗୁଷ୍ଠେନ ଭୂୟୋ ଲୁଲୁଵିଥ ୟୁଗପତ୍ ପତ୍ରିଣା ସପ୍ତ ସାଲାନ୍ ।
ହତ୍ଵା ସୁଗ୍ରୀଵଘାତୋଦ୍ୟତମତୁଲବଲଂ ବାଲିନଂ ଵ୍ୟାଜଵୃତ୍ତ୍ୟା
ଵର୍ଷାଵେଲାମନୈଷୀର୍ଵିରହତରଲିତସ୍ତ୍ଵଂ ମତଂଗାଶ୍ରମାଂତେ ॥1॥
ସୁଗ୍ରୀଵେଣାନୁଜୋକ୍ତ୍ୟା ସଭୟମଭିୟତା ଵ୍ୟୂହିତାଂ ଵାହିନୀଂ ତା-
ମୃକ୍ଷାଣାଂ ଵୀକ୍ଷ୍ୟ ଦିକ୍ଷୁ ଦ୍ରୁତମଥ ଦୟିତାମାର୍ଗଣାୟାଵନମ୍ରାମ୍ ।
ସଂଦେଶଂ ଚାଂଗୁଲୀୟଂ ପଵନସୁତକରେ ପ୍ରାଦିଶୋ ମୋଦଶାଲୀ
ମାର୍ଗେ ମାର୍ଗେ ମମାର୍ଗେ କପିଭିରପି ତଦା ତ୍ଵତ୍ପ୍ରିୟା ସପ୍ରୟାସୈଃ ॥2॥
ତ୍ଵଦ୍ଵାର୍ତାକର୍ଣନୋଦ୍ୟଦ୍ଗରୁଦୁରୁଜଵସଂପାତିସଂପାତିଵାକ୍ୟ-
ପ୍ରୋତ୍ତୀର୍ଣାର୍ଣୋଧିରଂତର୍ନଗରି ଜନକଜାଂ ଵୀକ୍ଷ୍ୟ ଦତ୍ଵାଂଗୁଲୀୟମ୍ ।
ପ୍ରକ୍ଷୁଦ୍ୟୋଦ୍ୟାନମକ୍ଷକ୍ଷପଣଚଣରଣଃ ସୋଢବଂଧୋ ଦଶାସ୍ୟଂ
ଦୃଷ୍ଟ୍ଵା ପ୍ଲୁଷ୍ଟ୍ଵା ଚ ଲଂକାଂ ଝଟିତି ସ ହନୁମାନ୍ ମୌଲିରତ୍ନଂ ଦଦୌ ତେ ॥3॥
ତ୍ଵଂ ସୁଗ୍ରୀଵାଂଗଦାଦିପ୍ରବଲକପିଚମୂଚକ୍ରଵିକ୍ରାଂତଭୂମୀ-
ଚକ୍ରୋଽଭିକ୍ରମ୍ୟ ପାରେଜଲଧି ନିଶିଚରେଂଦ୍ରାନୁଜାଶ୍ରୀୟମାଣଃ ।
ତତ୍ପ୍ରୋକ୍ତାଂ ଶତ୍ରୁଵାର୍ତାଂ ରହସି ନିଶମୟନ୍ ପ୍ରାର୍ଥନାପାର୍ଥ୍ୟରୋଷ-
ପ୍ରାସ୍ତାଗ୍ନେୟାସ୍ତ୍ରତେଜସ୍ତ୍ରସଦୁଦଧିଗିରା ଲବ୍ଧଵାନ୍ ମଧ୍ୟମାର୍ଗମ୍ ॥4॥
କୀଶୈରାଶାଂତରୋପାହୃତଗିରିନିକରୈଃ ସେତୁମାଧାପ୍ୟ ୟାତୋ
ୟାତୂନ୍ୟାମର୍ଦ୍ୟ ଦଂଷ୍ଟ୍ରାନଖଶିଖରିଶିଲାସାଲଶସ୍ତ୍ରୈଃ ସ୍ଵସୈନ୍ୟୈଃ ।
ଵ୍ୟାକୁର୍ଵନ୍ ସାନୁଜସ୍ତ୍ଵଂ ସମରଭୁଵି ପରଂ ଵିକ୍ରମଂ ଶକ୍ରଜେତ୍ରା
ଵେଗାନ୍ନାଗାସ୍ତ୍ରବଦ୍ଧଃ ପତଗପତିଗରୁନ୍ମାରୁତୈର୍ମୋଚିତୋଽଭୂଃ ॥5॥
ସୌମିତ୍ରିସ୍ତ୍ଵତ୍ର ଶକ୍ତିପ୍ରହୃତିଗଲଦସୁର୍ଵାତଜାନୀତଶୈଲ-
ଘ୍ରାଣାତ୍ ପ୍ରାଣାନୁପେତୋ ଵ୍ୟକୃଣୁତ କୁସୃତିଶ୍ଲାଘିନଂ ମେଘନାଦମ୍ ।
ମାୟାକ୍ଷୋଭେଷୁ ଵୈଭୀଷଣଵଚନହୃତସ୍ତଂଭନଃ କୁଂଭକର୍ଣଂ
ସଂପ୍ରାପ୍ତଂ କଂପିତୋର୍ଵୀତଲମଖିଲଚମୂଭକ୍ଷିଣଂ ଵ୍ୟକ୍ଷିଣୋସ୍ତ୍ଵମ୍ ॥6॥
ଗୃହ୍ଣନ୍ ଜଂଭାରିସଂପ୍ରେଷିତରଥକଵଚୌ ରାଵଣେନାଭିୟୁଦ୍ଧ୍ୟନ୍
ବ୍ରହ୍ମାସ୍ତ୍ରେଣାସ୍ୟ ଭିଂଦନ୍ ଗଲତତିମବଲାମଗ୍ନିଶୁଦ୍ଧାଂ ପ୍ରଗୃହ୍ଣନ୍ ।
ଦେଵଶ୍ରେଣୀଵରୋଜ୍ଜୀଵିତସମରମୃତୈରକ୍ଷତୈଃ ଋକ୍ଷସଂଘୈ-
ର୍ଲଂକାଭର୍ତ୍ରା ଚ ସାକଂ ନିଜନଗରମଗାଃ ସପ୍ରିୟଃ ପୁଷ୍ପକେଣ ॥7॥
ପ୍ରୀତୋ ଦିଵ୍ୟାଭିଷେକୈରୟୁତସମଧିକାନ୍ ଵତ୍ସରାନ୍ ପର୍ୟରଂସୀ-
ର୍ମୈଥିଲ୍ୟାଂ ପାପଵାଚା ଶିଵ! ଶିଵ! କିଲ ତାଂ ଗର୍ଭିଣୀମଭ୍ୟହାସୀଃ ।
ଶତ୍ରୁଘ୍ନେନାର୍ଦୟିତ୍ଵା ଲଵଣନିଶିଚରଂ ପ୍ରାର୍ଦୟଃ ଶୂଦ୍ରପାଶଂ
ତାଵଦ୍ଵାଲ୍ମୀକିଗେହେ କୃତଵସତିରୁପାସୂତ ସୀତା ସୁତୌ ତେ ॥8॥
ଵାଲ୍ମୀକେସ୍ତ୍ଵତ୍ସୁତୋଦ୍ଗାପିତମଧୁରକୃତେରାଜ୍ଞୟା ୟଜ୍ଞଵାଟେ
ସୀତାଂ ତ୍ଵୟ୍ୟାପ୍ତୁକାମେ କ୍ଷିତିମଵିଶଦସୌ ତ୍ଵଂ ଚ କାଲାର୍ଥିତୋଽଭୂଃ ।
ହେତୋଃ ସୌମିତ୍ରିଘାତୀ ସ୍ଵୟମଥ ସରୟୂମଗ୍ନନିଶ୍ଶେଷଭୃତ୍ୟୈଃ
ସାକଂ ନାକଂ ପ୍ରୟାତୋ ନିଜପଦମଗମୋ ଦେଵ ଵୈକୁଂଠମାଦ୍ୟମ୍ ॥9॥
ସୋଽୟଂ ମର୍ତ୍ୟାଵତାରସ୍ତଵ ଖଲୁ ନିୟତଂ ମର୍ତ୍ୟଶିକ୍ଷାର୍ଥମେଵଂ
ଵିଶ୍ଲେଷାର୍ତିର୍ନିରାଗସ୍ତ୍ୟଜନମପି ଭଵେତ୍ କାମଧର୍ମାତିସକ୍ତ୍ୟା ।
ନୋ ଚେତ୍ ସ୍ଵାତ୍ମାନୁଭୂତେଃ କ୍ଵ ନୁ ତଵ ମନସୋ ଵିକ୍ରିୟା ଚକ୍ରପାଣେ
ସ ତ୍ଵଂ ସତ୍ତ୍ଵୈକମୂର୍ତେ ପଵନପୁରପତେ ଵ୍ୟାଧୁନୁ ଵ୍ୟାଧିତାପାନ୍ ॥10॥