ଅତ୍ରେଃ ପୁତ୍ରତୟା ପୁରା ତ୍ଵମନସୂୟାୟାଂ ହି ଦତ୍ତାଭିଧୋ
ଜାତଃ ଶିଷ୍ୟନିବଂଧତଂଦ୍ରିତମନାଃ ସ୍ଵସ୍ଥଶ୍ଚରନ୍ କାଂତୟା ।
ଦୃଷ୍ଟୋ ଭକ୍ତତମେନ ହେହୟମହୀପାଲେନ ତସ୍ମୈ ଵରା-
ନଷ୍ଟୈଶ୍ଵର୍ୟମୁଖାନ୍ ପ୍ରଦାୟ ଦଦିଥ ସ୍ଵେନୈଵ ଚାଂତେ ଵଧମ୍ ॥1॥
ସତ୍ୟଂ କର୍ତୁମଥାର୍ଜୁନସ୍ୟ ଚ ଵରଂ ତଚ୍ଛକ୍ତିମାତ୍ରାନତଂ
ବ୍ରହ୍ମଦ୍ଵେଷି ତଦାଖିଲଂ ନୃପକୁଲଂ ହଂତୁଂ ଚ ଭୂମେର୍ଭରମ୍ ।
ସଂଜାତୋ ଜମଦଗ୍ନିତୋ ଭୃଗୁକୁଲେ ତ୍ଵଂ ରେଣୁକାୟାଂ ହରେ
ରାମୋ ନାମ ତଦାତ୍ମଜେଷ୍ଵଵରଜଃ ପିତ୍ରୋରଧାଃ ସମ୍ମଦମ୍ ॥2॥
ଲବ୍ଧାମ୍ନାୟଗଣଶ୍ଚତୁର୍ଦଶଵୟା ଗଂଧର୍ଵରାଜେ ମନା-
ଗାସକ୍ତାଂ କିଲ ମାତରଂ ପ୍ରତି ପିତୁଃ କ୍ରୋଧାକୁଲସ୍ୟାଜ୍ଞୟା ।
ତାତାଜ୍ଞାତିଗସୋଦରୈଃ ସମମିମାଂ ଛିତ୍ଵାଽଥ ଶାଂତାତ୍ ପିତୁ-
ସ୍ତେଷାଂ ଜୀଵନୟୋଗମାପିଥ ଵରଂ ମାତା ଚ ତେଽଦାଦ୍ଵରାନ୍ ॥3॥
ପିତ୍ରା ମାତୃମୁଦେ ସ୍ତଵାହୃତଵିୟଦ୍ଧେନୋର୍ନିଜାଦାଶ୍ରମାତ୍
ପ୍ରସ୍ଥାୟାଥ ଭୃଗୋର୍ଗିରା ହିମଗିରାଵାରାଧ୍ୟ ଗୌରୀପତିମ୍ ।
ଲବ୍ଧ୍ଵା ତତ୍ପରଶୁଂ ତଦୁକ୍ତଦନୁଜଚ୍ଛେଦୀ ମହାସ୍ତ୍ରାଦିକଂ
ପ୍ରାପ୍ତୋ ମିତ୍ରମଥାକୃତଵ୍ରଣମୁନିଂ ପ୍ରାପ୍ୟାଗମଃ ସ୍ଵାଶ୍ରମମ୍ ॥4॥
ଆଖେଟୋପଗତୋଽର୍ଜୁନଃ ସୁରଗଵୀସଂପ୍ରାପ୍ତସଂପଦ୍ଗଣୈ-
ସ୍ତ୍ଵତ୍ପିତ୍ରା ପରିପୂଜିତଃ ପୁରଗତୋ ଦୁର୍ମଂତ୍ରିଵାଚା ପୁନଃ ।
ଗାଂ କ୍ରେତୁଂ ସଚିଵଂ ନ୍ୟୟୁଂକ୍ତ କୁଧିୟା ତେନାପି ରୁଂଧନ୍ମୁନି-
ପ୍ରାଣକ୍ଷେପସରୋଷଗୋହତଚମୂଚକ୍ରେଣ ଵତ୍ସୋ ହୃତଃ ॥5॥
ଶୁକ୍ରୋଜ୍ଜୀଵିତତାତଵାକ୍ୟଚଲିତକ୍ରୋଧୋଽଥ ସଖ୍ୟା ସମଂ
ବିଭ୍ରଦ୍ଧ୍ୟାତମହୋଦରୋପନିହିତଂ ଚାପଂ କୁଠାରଂ ଶରାନ୍ ।
ଆରୂଢଃ ସହଵାହୟଂତୃକରଥଂ ମାହିଷ୍ମତୀମାଵିଶନ୍
ଵାଗ୍ଭିର୍ଵତ୍ସମଦାଶୁଷି କ୍ଷିତିପତୌ ସଂପ୍ରାସ୍ତୁଥାଃ ସଂଗରମ୍ ॥6॥
ପୁତ୍ରାଣାମୟୁତେନ ସପ୍ତଦଶଭିଶ୍ଚାକ୍ଷୌହିଣୀଭିର୍ମହା-
ସେନାନୀଭିରନେକମିତ୍ରନିଵହୈର୍ଵ୍ୟାଜୃଂଭିତାୟୋଧନଃ ।
ସଦ୍ୟସ୍ତ୍ଵତ୍କକୁଠାରବାଣଵିଦଲନ୍ନିଶ୍ଶେଷସୈନ୍ୟୋତ୍କରୋ
ଭୀତିପ୍ରଦ୍ରୁତନଷ୍ଟଶିଷ୍ଟତନୟସ୍ତ୍ଵାମାପତତ୍ ହେହୟଃ ॥7॥
ଲୀଲାଵାରିତନର୍ମଦାଜଲଵଲଲ୍ଲଂକେଶଗର୍ଵାପହ-
ଶ୍ରୀମଦ୍ବାହୁସହସ୍ରମୁକ୍ତବହୁଶସ୍ତ୍ରାସ୍ତ୍ରଂ ନିରୁଂଧନ୍ନମୁମ୍ ।
ଚକ୍ରେ ତ୍ଵୟ୍ୟଥ ଵୈଷ୍ଣଵେଽପି ଵିଫଲେ ବୁଦ୍ଧ୍ଵା ହରିଂ ତ୍ଵାଂ ମୁଦା
ଧ୍ୟାୟଂତଂ ଛିତସର୍ଵଦୋଷମଵଧୀଃ ସୋଽଗାତ୍ ପରଂ ତେ ପଦମ୍ ॥8॥
ଭୂୟୋଽମର୍ଷିତହେହୟାତ୍ମଜଗଣୈସ୍ତାତେ ହତେ ରେଣୁକା-
ମାଘ୍ନାନାଂ ହୃଦୟଂ ନିରୀକ୍ଷ୍ୟ ବହୁଶୋ ଘୋରାଂ ପ୍ରତିଜ୍ଞାଂ ଵହନ୍ ।
ଧ୍ୟାନାନୀତରଥାୟୁଧସ୍ତ୍ଵମକୃଥା ଵିପ୍ରଦ୍ରୁହଃ କ୍ଷତ୍ରିୟାନ୍
ଦିକ୍ଚକ୍ରେଷୁ କୁଠାରୟନ୍ ଵିଶିଖୟନ୍ ନିଃକ୍ଷତ୍ରିୟାଂ ମେଦିନୀମ୍ ॥9॥
ତାତୋଜ୍ଜୀଵନକୃନ୍ନୃପାଲକକୁଲଂ ତ୍ରିସ୍ସପ୍ତକୃତ୍ଵୋ ଜୟନ୍
ସଂତର୍ପ୍ୟାଥ ସମଂତପଂଚକମହାରକ୍ତହୃଦୌଘେ ପିତୃନ୍
ୟଜ୍ଞେ କ୍ଷ୍ମାମପି କାଶ୍ୟପାଦିଷୁ ଦିଶନ୍ ସାଲ୍ଵେନ ୟୁଧ୍ୟନ୍ ପୁନଃ
କୃଷ୍ଣୋଽମୁଂ ନିହନିଷ୍ୟତୀତି ଶମିତୋ ୟୁଦ୍ଧାତ୍ କୁମାରୈର୍ଭଵାନ୍ ॥10॥
ନ୍ୟସ୍ୟାସ୍ତ୍ରାଣି ମହେଂଦ୍ରଭୂଭୃତି ତପସ୍ତନ୍ଵନ୍ ପୁନର୍ମଜ୍ଜିତାଂ
ଗୋକର୍ଣାଵଧି ସାଗରେଣ ଧରଣୀଂ ଦୃଷ୍ଟ୍ଵାର୍ଥିତସ୍ତାପସୈଃ ।
ଧ୍ୟାତେଷ୍ଵାସଧୃତାନଲାସ୍ତ୍ରଚକିତଂ ସିଂଧୁଂ ସ୍ରୁଵକ୍ଷେପଣା-
ଦୁତ୍ସାର୍ୟୋଦ୍ଧୃତକେରଲୋ ଭୃଗୁପତେ ଵାତେଶ ସଂରକ୍ଷ ମାମ୍ ॥11॥