ଏକଦା ଦଧିଵିମାଥକାରିଣୀଂ ମାତରଂ ସମୁପସେଦିଵାନ୍ ଭଵାନ୍ ।
ସ୍ତନ୍ୟଲୋଲୁପତୟା ନିଵାରୟନ୍ନଂକମେତ୍ୟ ପପିଵାନ୍ ପୟୋଧରୌ ॥1॥
ଅର୍ଧପୀତକୁଚକୁଡ୍ମଲେ ତ୍ଵୟି ସ୍ନିଗ୍ଧହାସମଧୁରାନନାଂବୁଜେ ।
ଦୁଗ୍ଧମୀଶ ଦହନେ ପରିସ୍ରୁତଂ ଧର୍ତୁମାଶୁ ଜନନୀ ଜଗାମ ତେ ॥2॥
ସାମିପୀତରସଭଂଗସଂଗତକ୍ରୋଧଭାରପରିଭୂତଚେତସା।
ମଂଥଦଂଡମୁପଗୃହ୍ୟ ପାଟିତଂ ହଂତ ଦେଵ ଦଧିଭାଜନଂ ତ୍ଵୟା ॥3॥
ଉଚ୍ଚଲଦ୍ଧ୍ଵନିତମୁଚ୍ଚକୈସ୍ତଦା ସନ୍ନିଶମ୍ୟ ଜନନୀ ସମାଦ୍ରୁତା ।
ତ୍ଵଦ୍ୟଶୋଵିସରଵଦ୍ଦଦର୍ଶ ସା ସଦ୍ୟ ଏଵ ଦଧି ଵିସ୍ତୃତଂ କ୍ଷିତୌ ॥4॥
ଵେଦମାର୍ଗପରିମାର୍ଗିତଂ ରୁଷା ତ୍ଵମଵୀକ୍ଷ୍ୟ ପରିମାର୍ଗୟଂତ୍ୟସୌ ।
ସଂଦଦର୍ଶ ସୁକୃତିନ୍ୟୁଲୂଖଲେ ଦୀୟମାନନଵନୀତମୋତଵେ ॥5॥
ତ୍ଵାଂ ପ୍ରଗୃହ୍ୟ ବତ ଭୀତିଭାଵନାଭାସୁରାନନସରୋଜମାଶୁ ସା ।
ରୋଷରୂଷିତମୁଖୀ ସଖୀପୁରୋ ବଂଧନାୟ ରଶନାମୁପାଦଦେ ॥6॥
ବଂଧୁମିଚ୍ଛତି ୟମେଵ ସଜ୍ଜନସ୍ତଂ ଭଵଂତମୟି ବଂଧୁମିଚ୍ଛତୀ ।
ସା ନିୟୁଜ୍ୟ ରଶନାଗୁଣାନ୍ ବହୂନ୍ ଦ୍ଵ୍ୟଂଗୁଲୋନମଖିଲଂ କିଲୈକ୍ଷତ ॥7॥
ଵିସ୍ମିତୋତ୍ସ୍ମିତସଖୀଜନେକ୍ଷିତାଂ ସ୍ଵିନ୍ନସନ୍ନଵପୁଷଂ ନିରୀକ୍ଷ୍ୟ ତାମ୍ ।
ନିତ୍ୟମୁକ୍ତଵପୁରପ୍ୟହୋ ହରେ ବଂଧମେଵ କୃପୟାଽନ୍ଵମନ୍ୟଥାଃ ॥8॥
ସ୍ଥୀୟତାଂ ଚିରମୁଲୂଖଲେ ଖଲେତ୍ୟାଗତା ଭଵନମେଵ ସା ୟଦା।
ପ୍ରାଗୁଲୂଖଲବିଲାଂତରେ ତଦା ସର୍ପିରର୍ପିତମଦନ୍ନଵାସ୍ଥିଥାଃ ॥9॥
ୟଦ୍ୟପାଶସୁଗମୋ ଵିଭୋ ଭଵାନ୍ ସଂୟତଃ କିମୁ ସପାଶୟାଽନୟା ।
ଏଵମାଦି ଦିଵିଜୈରଭିଷ୍ଟୁତୋ ଵାତନାଥ ପରିପାହି ମାଂ ଗଦାତ୍ ॥10॥