ଭଵତ୍ପ୍ରଭାଵାଵିଦୁରା ହି ଗୋପାସ୍ତରୁପ୍ରପାତାଦିକମତ୍ର ଗୋଷ୍ଠେ ।
ଅହେତୁମୁତ୍ପାତଗଣଂ ଵିଶଂକ୍ୟ ପ୍ରୟାତୁମନ୍ୟତ୍ର ମନୋ ଵିତେନୁଃ ॥1॥
ତତ୍ରୋପନଂଦାଭିଧଗୋପଵର୍ୟୋ ଜଗୌ ଭଵତ୍ପ୍ରେରଣୟୈଵ ନୂନମ୍ ।
ଇତଃ ପ୍ରତୀଚ୍ୟାଂ ଵିପିନଂ ମନୋଜ୍ଞଂ ଵୃଂଦାଵନଂ ନାମ ଵିରାଜତୀତି ॥2॥
ବୃହଦ୍ଵନଂ ତତ୍ ଖଲୁ ନଂଦମୁଖ୍ୟା ଵିଧାୟ ଗୌଷ୍ଠୀନମଥ କ୍ଷଣେନ ।
ତ୍ଵଦନ୍ଵିତତ୍ଵଜ୍ଜନନୀନିଵିଷ୍ଟଗରିଷ୍ଠୟାନାନୁଗତା ଵିଚେଲୁଃ ॥3॥
ଅନୋମନୋଜ୍ଞଧ୍ଵନିଧେନୁପାଲୀଖୁରପ୍ରଣାଦାଂତରତୋ ଵଧୂଭିଃ ।
ଭଵଦ୍ଵିନୋଦାଲପିତାକ୍ଷରାଣି ପ୍ରପୀୟ ନାଜ୍ଞାୟତ ମାର୍ଗଦୈର୍ଘ୍ୟମ୍ ॥4॥
ନିରୀକ୍ଷ୍ୟ ଵୃଂଦାଵନମୀଶ ନଂଦତ୍ପ୍ରସୂନକୁଂଦପ୍ରମୁଖଦ୍ରୁମୌଘମ୍ ।
ଅମୋଦଥାଃ ଶାଦ୍ଵଲସାଂଦ୍ରଲକ୍ଷ୍ମ୍ୟା ହରିନ୍ମଣୀକୁଟ୍ଟିମପୁଷ୍ଟଶୋଭମ୍ ॥5॥
ନଵାକନିର୍ଵ୍ୟୂଢନିଵାସଭେଦେଷ୍ଵଶେଷଗୋପେଷୁ ସୁଖାସିତେଷୁ ।
ଵନଶ୍ରିୟଂ ଗୋପକିଶୋରପାଲୀଵିମିଶ୍ରିତଃ ପର୍ୟଗଲୋକଥାସ୍ତ୍ଵମ୍ ॥6॥
ଅରାଲମାର୍ଗାଗତନିର୍ମଲାପାଂ ମରାଲକୂଜାକୃତନର୍ମଲାପାମ୍ ।
ନିରଂତରସ୍ମେରସରୋଜଵକ୍ତ୍ରାଂ କଲିଂଦକନ୍ୟାଂ ସମଲୋକୟସ୍ତ୍ଵମ୍ ॥7॥
ମୟୂରକେକାଶତଲୋଭନୀୟଂ ମୟୂଖମାଲାଶବଲଂ ମଣୀନାମ୍ ।
ଵିରିଂଚଲୋକସ୍ପୃଶମୁଚ୍ଚଶୃଂଗୈର୍ଗିରିଂ ଚ ଗୋଵର୍ଧନମୈକ୍ଷଥାସ୍ତ୍ଵମ୍ ॥8॥
ସମଂ ତତୋ ଗୋପକୁମାରକୈସ୍ତ୍ଵଂ ସମଂତତୋ ୟତ୍ର ଵନାଂତମାଗାଃ ।
ତତସ୍ତତସ୍ତାଂ କୁଟିଲାମପଶ୍ୟଃ କଲିଂଦଜାଂ ରାଗଵତୀମିଵୈକାମ୍ ॥9॥
ତଥାଵିଧେଽସ୍ମିନ୍ ଵିପିନେ ପଶଵ୍ୟେ ସମୁତ୍ସୁକୋ ଵତ୍ସଗଣପ୍ରଚାରେ ।
ଚରନ୍ ସରାମୋଽଥ କୁମାରକୈସ୍ତ୍ଵଂ ସମୀରଗେହାଧିପ ପାହି ରୋଗାତ୍ ॥10॥