ଵ୍ୟକ୍ତାଵ୍ୟକ୍ତମିଦଂ ନ କିଂଚିଦଭଵତ୍ପ୍ରାକ୍ପ୍ରାକୃତପ୍ରକ୍ଷୟେ
ମାୟାୟାଂ ଗୁଣସାମ୍ୟରୁଦ୍ଧଵିକୃତୌ ତ୍ଵୟ୍ୟାଗତାୟାଂ ଲୟମ୍ ।
ନୋ ମୃତ୍ୟୁଶ୍ଚ ତଦାଽମୃତଂ ଚ ସମଭୂନ୍ନାହ୍ନୋ ନ ରାତ୍ରେଃ ସ୍ଥିତି-
ସ୍ତତ୍ରୈକସ୍ତ୍ଵମଶିଷ୍ୟଥାଃ କିଲ ପରାନଂଦପ୍ରକାଶାତ୍ମନା ॥1॥
କାଲଃ କର୍ମ ଗୁଣାଶ୍ଚ ଜୀଵନିଵହା ଵିଶ୍ଵଂ ଚ କାର୍ୟଂ ଵିଭୋ
ଚିଲ୍ଲୀଲାରତିମେୟୁଷି ତ୍ଵୟି ତଦା ନିର୍ଲୀନତାମାୟୟୁଃ ।
ତେଷାଂ ନୈଵ ଵଦଂତ୍ୟସତ୍ତ୍ଵମୟି ଭୋଃ ଶକ୍ତ୍ୟାତ୍ମନା ତିଷ୍ଠତାଂ
ନୋ ଚେତ୍ କିଂ ଗଗନପ୍ରସୂନସଦୃଶାଂ ଭୂୟୋ ଭଵେତ୍ସଂଭଵଃ ॥2॥
ଏଵଂ ଚ ଦ୍ଵିପରାର୍ଧକାଲଵିଗତାଵୀକ୍ଷାଂ ସିସୃକ୍ଷାତ୍ମିକାଂ
ବିଭ୍ରାଣେ ତ୍ଵୟି ଚୁକ୍ଷୁଭେ ତ୍ରିଭୁଵନୀଭାଵାୟ ମାୟା ସ୍ଵୟମ୍ ।
ମାୟାତଃ ଖଲୁ କାଲଶକ୍ତିରଖିଲାଦୃଷ୍ଟଂ ସ୍ଵଭାଵୋଽପି ଚ
ପ୍ରାଦୁର୍ଭୂୟ ଗୁଣାନ୍ଵିକାସ୍ୟ ଵିଦଧୁସ୍ତସ୍ୟାସ୍ସହାୟକ୍ରିୟାମ୍ ॥3॥
ମାୟାସନ୍ନିହିତୋଽପ୍ରଵିଷ୍ଟଵପୁଷା ସାକ୍ଷୀତି ଗୀତୋ ଭଵାନ୍
ଭେଦୈସ୍ତାଂ ପ୍ରତିବିଂବତୋ ଵିଵିଶିଵାନ୍ ଜୀଵୋଽପି ନୈଵାପରଃ ।
କାଲାଦିପ୍ରତିବୋଧିତାଽଥ ଭଵତା ସଂଚୋଦିତା ଚ ସ୍ଵୟଂ
ମାୟା ସା ଖଲୁ ବୁଦ୍ଧିତତ୍ତ୍ଵମସୃଜଦ୍ୟୋଽସୌ ମହାନୁଚ୍ୟତେ ॥4॥
ତତ୍ରାସୌ ତ୍ରିଗୁଣାତ୍ମକୋଽପି ଚ ମହାନ୍ ସତ୍ତ୍ଵପ୍ରଧାନଃ ସ୍ଵୟଂ
ଜୀଵେଽସ୍ମିନ୍ ଖଲୁ ନିର୍ଵିକଲ୍ପମହମିତ୍ୟୁଦ୍ବୋଧନିଷ୍ପାଦ୍କଃ ।
ଚକ୍ରେଽସ୍ମିନ୍ ସଵିକଲ୍ପବୋଧକମହଂତତ୍ତ୍ଵଂ ମହାନ୍ ଖଲ୍ଵସୌ
ସଂପୁଷ୍ଟଂ ତ୍ରିଗୁଣୈସ୍ତମୋଽତିବହୁଲଂ ଵିଷ୍ଣୋ ଭଵତ୍ପ୍ରେରଣାତ୍ ॥5॥
ସୋଽହଂ ଚ ତ୍ରିଗୁଣକ୍ରମାତ୍ ତ୍ରିଵିଧତାମାସାଦ୍ୟ ଵୈକାରିକୋ
ଭୂୟସ୍ତୈଜସତାମସାଵିତି ଭଵନ୍ନାଦ୍ୟେନ ସତ୍ତ୍ଵାତ୍ମନା
ଦେଵାନିଂଦ୍ରିୟମାନିନୋଽକୃତ ଦିଶାଵାତାର୍କପାଶ୍ୟଶ୍ଵିନୋ
ଵହ୍ନୀଂଦ୍ରାଚ୍ୟୁତମିତ୍ରକାନ୍ ଵିଧୁଵିଧିଶ୍ରୀରୁଦ୍ରଶାରୀରକାନ୍ ॥6॥
ଭୂମନ୍ ମାନସବୁଦ୍ଧ୍ୟହଂକୃତିମିଲଚ୍ଚିତ୍ତାଖ୍ୟଵୃତ୍ତ୍ୟନ୍ଵିତଂ
ତଚ୍ଚାଂତଃକରଣଂ ଵିଭୋ ତଵ ବଲାତ୍ ସତ୍ତ୍ଵାଂଶ ଏଵାସୃଜତ୍ ।
ଜାତସ୍ତୈଜସତୋ ଦଶେଂଦ୍ରିୟଗଣସ୍ତତ୍ତାମସାଂଶାତ୍ପୁନ-
ସ୍ତନ୍ମାତ୍ରଂ ନଭସୋ ମରୁତ୍ପୁରପତେ ଶବ୍ଦୋଽଜନି ତ୍ଵଦ୍ବଲାତ୍ ॥7॥
ଶ୍ବ୍ଦାଦ୍ଵ୍ୟୋମ ତତଃ ସସର୍ଜିଥ ଵିଭୋ ସ୍ପର୍ଶଂ ତତୋ ମାରୁତଂ
ତସ୍ମାଦ୍ରୂପମତୋ ମହୋଽଥ ଚ ରସଂ ତୋୟଂ ଚ ଗଂଧଂ ମହୀମ୍ ।
ଏଵଂ ମାଧଵ ପୂର୍ଵପୂର୍ଵକଲନାଦାଦ୍ୟାଦ୍ୟଧର୍ମାନ୍ଵିତଂ
ଭୂତଗ୍ରାମମିମଂ ତ୍ଵମେଵ ଭଗଵନ୍ ପ୍ରାକାଶୟସ୍ତାମସାତ୍ ॥8॥
ଏତେ ଭୂତଗଣାସ୍ତଥେଂଦ୍ରିୟଗଣା ଦେଵାଶ୍ଚ ଜାତାଃ ପୃଥଙ୍-
ନୋ ଶେକୁର୍ଭୁଵନାଂଡନିର୍ମିତିଵିଧୌ ଦେଵୈରମୀଭିସ୍ତଦା ।
ତ୍ଵଂ ନାନାଵିଧସୂକ୍ତିଭିର୍ନୁତଗୁଣସ୍ତତ୍ତ୍ଵାନ୍ୟମୂନ୍ୟାଵିଶଂ-
ଶ୍ଚେଷ୍ଟାଶକ୍ତିମୁଦୀର୍ୟ ତାନି ଘଟୟନ୍ ହୈରଣ୍ୟମଂଡଂ ଵ୍ୟଧାଃ ॥9॥
ଅଂଡଂ ତତ୍ଖଲୁ ପୂର୍ଵସୃଷ୍ଟସଲିଲେଽତିଷ୍ଠତ୍ ସହସ୍ରଂ ସମାଃ
ନିର୍ଭିଂଦନ୍ନକୃଥାଶ୍ଚତୁର୍ଦଶଜଗଦ୍ରୂପଂ ଵିରାଡାହ୍ଵୟମ୍ ।
ସାହସ୍ରୈଃ କରପାଦମୂର୍ଧନିଵହୈର୍ନିଶ୍ଶେଷଜୀଵାତ୍ମକୋ
ନିର୍ଭାତୋଽସି ମରୁତ୍ପୁରାଧିପ ସ ମାଂ ତ୍ରାୟସ୍ଵ ସର୍ଵାମୟାତ୍ ॥10॥