ତରଲମଧୁକୃତ୍ ଵୃଂଦେ ଵୃଂଦାଵନେଽଥ ମନୋହରେ
ପଶୁପଶିଶୁଭିଃ ସାକଂ ଵତ୍ସାନୁପାଲନଲୋଲୁପଃ ।
ହଲଧରସଖୋ ଦେଵ ଶ୍ରୀମନ୍ ଵିଚେରିଥ ଧାରୟନ୍
ଗଵଲମୁରଲୀଵେତ୍ରଂ ନେତ୍ରାଭିରାମତନୁଦ୍ୟୁତିଃ ॥1॥
ଵିହିତଜଗତୀରକ୍ଷଂ ଲକ୍ଷ୍ମୀକରାଂବୁଜଲାଲିତଂ
ଦଦତି ଚରଣଦ୍ଵଂଦ୍ଵଂ ଵୃଂଦାଵନେ ତ୍ଵୟି ପାଵନେ ।
କିମିଵ ନ ବଭୌ ସଂପତ୍ସଂପୂରିତଂ ତରୁଵଲ୍ଲରୀ-
ସଲିଲଧରଣୀଗୋତ୍ରକ୍ଷେତ୍ରାଦିକଂ କମଲାପତେ ॥2॥
ଵିଲସଦୁଲପେ କାଂତାରାଂତେ ସମୀରଣଶୀତଲେ
ଵିପୁଲୟମୁନାତୀରେ ଗୋଵର୍ଧନାଚଲମୂର୍ଧସୁ ।
ଲଲିତମୁରଲୀନାଦଃ ସଂଚାରୟନ୍ ଖଲୁ ଵାତ୍ସକଂ
କ୍ଵଚନ ଦିଵସେ ଦୈତ୍ୟଂ ଵତ୍ସାକୃତିଂ ତ୍ଵମୁଦୈକ୍ଷଥାଃ ॥3॥
ରଭସଵିଲସତ୍ପୁଚ୍ଛଂ ଵିଚ୍ଛାୟତୋଽସ୍ୟ ଵିଲୋକୟନ୍
କିମପି ଵଲିତସ୍କଂଧଂ ରଂଧ୍ରପ୍ରତୀକ୍ଷମୁଦୀକ୍ଷିତମ୍ ।
ତମଥ ଚରଣେ ବିଭ୍ରଦ୍ଵିଭ୍ରାମୟନ୍ ମୁହୁରୁଚ୍ଚକୈଃ
କୁହଚନ ମହାଵୃକ୍ଷେ ଚିକ୍ଷେପିଥ କ୍ଷତଜୀଵିତମ୍ ॥4॥
ନିପତତି ମହାଦୈତ୍ୟେ ଜାତ୍ୟା ଦୁରାତ୍ମନି ତତ୍କ୍ଷଣଂ
ନିପତନଜଵକ୍ଷୁଣ୍ଣକ୍ଷୋଣୀରୁହକ୍ଷତକାନନେ ।
ଦିଵି ପରିମିଲତ୍ ଵୃଂଦା ଵୃଂଦାରକାଃ କୁସୁମୋତ୍କରୈଃ
ଶିରସି ଭଵତୋ ହର୍ଷାଦ୍ଵର୍ଷଂତି ନାମ ତଦା ହରେ ॥5॥
ସୁରଭିଲତମା ମୂର୍ଧନ୍ୟୂର୍ଧ୍ଵଂ କୁତଃ କୁସୁମାଵଲୀ
ନିପତତି ତଵେତ୍ୟୁକ୍ତୋ ବାଲୈଃ ସହେଲମୁଦୈରୟଃ ।
ଝଟିତି ଦନୁଜକ୍ଷେପେଣୋର୍ଧ୍ଵଂ ଗତସ୍ତରୁମଂଡଲାତ୍
କୁସୁମନିକରଃ ସୋଽୟଂ ନୂନଂ ସମେତି ଶନୈରିତି ॥6॥
କ୍ଵଚନ ଦିଵସେ ଭୂୟୋ ଭୂୟସ୍ତରେ ପରୁଷାତପେ
ତପନତନୟାପାଥଃ ପାତୁଂ ଗତା ଭଵଦାଦୟଃ ।
ଚଲିତଗରୁତଂ ପ୍ରେକ୍ଷାମାସୁର୍ବକଂ ଖଲୁ ଵିସ୍ମ୍ରୃତଂ
କ୍ଷିତିଧରଗରୁଚ୍ଛେଦେ କୈଲାସଶୈଲମିଵାପରମ୍ ॥7॥
ପିବତି ସଲିଲଂ ଗୋପଵ୍ରାତେ ଭଵଂତମଭିଦ୍ରୁତଃ
ସ କିଲ ନିଗିଲନ୍ନଗ୍ନିପ୍ରଖ୍ୟଂ ପୁନର୍ଦ୍ରୁତମୁଦ୍ଵମନ୍ ।
ଦଲୟିତୁମଗାତ୍ତ୍ରୋଟ୍ୟାଃ କୋଟ୍ୟା ତଦାଽଽଶୁ ଭଵାନ୍ ଵିଭୋ
ଖଲଜନଭିଦାଚୁଂଚୁଶ୍ଚଂଚୂ ପ୍ରଗୃହ୍ୟ ଦଦାର ତମ୍ ॥8॥
ସପଦି ସହଜାଂ ସଂଦ୍ରଷ୍ଟୁଂ ଵା ମୃତାଂ ଖଲୁ ପୂତନା-
ମନୁଜମଘମପ୍ୟଗ୍ରେ ଗତ୍ଵା ପ୍ରତୀକ୍ଷିତୁମେଵ ଵା ।
ଶମନନିଲୟଂ ୟାତେ ତସ୍ମିନ୍ ବକେ ସୁମନୋଗଣେ
କିରତି ସୁମନୋଵୃଂଦଂ ଵୃଂଦାଵନାତ୍ ଗୃହମୈୟଥାଃ ॥9॥
ଲଲିତମୁରଲୀନାଦଂ ଦୂରାନ୍ନିଶମ୍ୟ ଵଧୂଜନୈ-
ସ୍ତ୍ଵରିତମୁପଗମ୍ୟାରାଦାରୂଢମୋଦମୁଦୀକ୍ଷିତଃ ।
ଜନିତଜନନୀନଂଦାନଂଦଃ ସମୀରଣମଂଦିର-
ପ୍ରଥିତଵସତେ ଶୌରେ ଦୂରୀକୁରୁଷ୍ଵ ମମାମୟାନ୍ ॥10॥