ଅନ୍ୟାଵତାରନିକରେଷ୍ଵନିରୀକ୍ଷିତଂ ତେ
ଭୂମାତିରେକମଭିଵୀକ୍ଷ୍ୟ ତଦାଘମୋକ୍ଷେ ।
ବ୍ରହ୍ମା ପରୀକ୍ଷିତୁମନାଃ ସ ପରୋକ୍ଷଭାଵଂ
ନିନ୍ୟେଽଥ ଵତ୍ସକଗଣାନ୍ ପ୍ରଵିତତ୍ୟ ମାୟାମ୍ ॥1॥
ଵତ୍ସାନଵୀକ୍ଷ୍ୟ ଵିଵଶେ ପଶୁପୋତ୍କରେ ତା-
ନାନେତୁକାମ ଇଵ ଧାତୃମତାନୁଵର୍ତୀ ।
ତ୍ଵଂ ସାମିଭୁକ୍ତକବଲୋ ଗତଵାଂସ୍ତଦାନୀଂ
ଭୁକ୍ତାଂସ୍ତିରୋଽଧିତ ସରୋଜଭଵଃ କୁମାରାନ୍ ॥2॥
ଵତ୍ସାୟିତସ୍ତଦନୁ ଗୋପଗଣାୟିତସ୍ତ୍ଵଂ
ଶିକ୍ୟାଦିଭାଂଡମୁରଲୀଗଵଲାଦିରୂପଃ ।
ପ୍ରାଗ୍ଵଦ୍ଵିହୃତ୍ୟ ଵିପିନେଷୁ ଚିରାୟ ସାୟଂ
ତ୍ଵଂ ମାୟୟାଽଥ ବହୁଧା ଵ୍ରଜମାୟୟାଥ ॥3॥
ତ୍ଵାମେଵ ଶିକ୍ୟଗଵଲାଦିମୟଂ ଦଧାନୋ
ଭୂୟସ୍ତ୍ଵମେଵ ପଶୁଵତ୍ସକବାଲରୂପଃ ।
ଗୋରୂପିଣୀଭିରପି ଗୋପଵଧୂମୟୀଭି-
ରାସାଦିତୋଽସି ଜନନୀଭିରତିପ୍ରହର୍ଷାତ୍ ॥4॥
ଜୀଵଂ ହି କଂଚିଦଭିମାନଵଶାତ୍ସ୍ଵକୀୟଂ
ମତ୍ଵା ତନୂଜ ଇତି ରାଗଭରଂ ଵହଂତ୍ୟଃ ।
ଆତ୍ମାନମେଵ ତୁ ଭଵଂତମଵାପ୍ୟ ସୂନୁଂ
ପ୍ରୀତିଂ ୟୟୁର୍ନ କିୟତୀଂ ଵନିତାଶ୍ଚ ଗାଵଃ ॥5॥
ଏଵଂ ପ୍ରତିକ୍ଷଣଵିଜୃଂଭିତହର୍ଷଭାର-
ନିଶ୍ଶେଷଗୋପଗଣଲାଲିତଭୂରିମୂର୍ତିମ୍ ।
ତ୍ଵାମଗ୍ରଜୋଽପି ବୁବୁଧେ କିଲ ଵତ୍ସରାଂତେ
ବ୍ରହ୍ମାତ୍ମନୋରପି ମହାନ୍ ୟୁଵୟୋର୍ଵିଶେଷଃ ॥6॥
ଵର୍ଷାଵଧୌ ନଵପୁରାତନଵତ୍ସପାଲାନ୍
ଦୃଷ୍ଟ୍ଵା ଵିଵେକମସୃଣେ ଦ୍ରୁହିଣେ ଵିମୂଢେ ।
ପ୍ରାଦୀଦୃଶଃ ପ୍ରତିନଵାନ୍ ମକୁଟାଂଗଦାଦି
ଭୂଷାଂଶ୍ଚତୁର୍ଭୁଜୟୁଜଃ ସଜଲାଂବୁଦାଭାନ୍ ॥7॥
ପ୍ରତ୍ୟେକମେଵ କମଲାପରିଲାଲିତାଂଗାନ୍
ଭୋଗୀଂଦ୍ରଭୋଗଶୟନାନ୍ ନୟନାଭିରାମାନ୍ ।
ଲୀଲାନିମୀଲିତଦୃଶଃ ସନକାଦିୟୋଗି-
ଵ୍ୟାସେଵିତାନ୍ କମଲଭୂର୍ଭଵତୋ ଦଦର୍ଶ ॥8॥
ନାରାୟଣାକୃତିମସଂଖ୍ୟତମାଂ ନିରୀକ୍ଷ୍ୟ
ସର୍ଵତ୍ର ସେଵକମପି ସ୍ଵମଵେକ୍ଷ୍ୟ ଧାତା ।
ମାୟାନିମଗ୍ନହୃଦୟୋ ଵିମୁମୋହ ୟାଵ-
ଦେକୋ ବଭୂଵିଥ ତଦା କବଲାର୍ଧପାଣିଃ ॥9॥
ନଶ୍ୟନ୍ମଦେ ତଦନୁ ଵିଶ୍ଵପତିଂ ମୁହୁସ୍ତ୍ଵାଂ
ନତ୍ଵା ଚ ନୂତଵତି ଧାତରି ଧାମ ୟାତେ ।
ପୋତୈଃ ସମଂ ପ୍ରମୁଦିତୈଃ ପ୍ରଵିଶନ୍ ନିକେତଂ
ଵାତାଲୟାଧିପ ଵିଭୋ ପରିପାହି ରୋଗାତ୍ ॥10॥