ତ୍ଵତ୍ସେଵୋତ୍କସ୍ସୌଭରିର୍ନାମ ପୂର୍ଵଂ
କାଲିଂଦ୍ୟଂତର୍ଦ୍ଵାଦଶାବ୍ଦଂ ତପସ୍ୟନ୍ ।
ମୀନଵ୍ରାତେ ସ୍ନେହଵାନ୍ ଭୋଗଲୋଲେ
ତାର୍କ୍ଷ୍ୟଂ ସାକ୍ଷାଦୈକ୍ଷତାଗ୍ରେ କଦାଚିତ୍ ॥1॥
ତ୍ଵଦ୍ଵାହଂ ତଂ ସକ୍ଷୁଧଂ ତୃକ୍ଷସୂନୁଂ
ମୀନଂ କଂଚିଜ୍ଜକ୍ଷତଂ ଲକ୍ଷୟନ୍ ସଃ ।
ତପ୍ତଶ୍ଚିତ୍ତେ ଶପ୍ତଵାନତ୍ର ଚେତ୍ତ୍ଵଂ
ଜଂତୂନ୍ ଭୋକ୍ତା ଜୀଵିତଂ ଚାପି ମୋକ୍ତା ॥2॥
ତସ୍ମିନ୍ କାଲେ କାଲିୟଃ କ୍ଷ୍ଵେଲଦର୍ପାତ୍
ସର୍ପାରାତେଃ କଲ୍ପିତଂ ଭାଗମଶ୍ନନ୍ ।
ତେନ କ୍ରୋଧାତ୍ତ୍ଵତ୍ପଦାଂଭୋଜଭାଜା
ପକ୍ଷକ୍ଷିପ୍ତସ୍ତଦ୍ଦୁରାପଂ ପୟୋଽଗାତ୍ ॥3॥
ଘୋରେ ତସ୍ମିନ୍ ସୂରଜାନୀରଵାସେ
ତୀରେ ଵୃକ୍ଷା ଵିକ୍ଷତାଃ କ୍ଷ୍ଵେଲଵେଗାତ୍ ।
ପକ୍ଷିଵ୍ରାତାଃ ପେତୁରଭ୍ରେ ପତଂତଃ
କାରୁଣ୍ୟାର୍ଦ୍ରଂ ତ୍ଵନ୍ମନସ୍ତେନ ଜାତମ୍ ॥4॥
କାଲେ ତସ୍ମିନ୍ନେକଦା ସୀରପାଣିଂ
ମୁକ୍ତ୍ଵା ୟାତେ ୟାମୁନଂ କାନନାଂତମ୍ ।
ତ୍ଵୟ୍ୟୁଦ୍ଦାମଗ୍ରୀଷ୍ମଭୀଷ୍ମୋଷ୍ମତପ୍ତା
ଗୋଗୋପାଲା ଵ୍ୟାପିବନ୍ କ୍ଷ୍ଵେଲତୋୟମ୍ ॥5॥
ନଶ୍ୟଜ୍ଜୀଵାନ୍ ଵିଚ୍ୟୁତାନ୍ କ୍ଷ୍ମାତଲେ ତାନ୍
ଵିଶ୍ଵାନ୍ ପଶ୍ୟନ୍ନଚ୍ୟୁତ ତ୍ଵଂ ଦୟାର୍ଦ୍ରଃ ।
ପ୍ରାପ୍ୟୋପାଂତଂ ଜୀଵୟାମାସିଥ ଦ୍ରାକ୍
ପୀୟୂଷାଂଭୋଵର୍ଷିଭିଃ ଶ୍ରୀକଟକ୍ଷୈଃ ॥6॥
କିଂ କିଂ ଜାତୋ ହର୍ଷଵର୍ଷାତିରେକଃ
ସର୍ଵାଂଗେଷ୍ଵିତ୍ୟୁତ୍ଥିତା ଗୋପସଂଘାଃ ।
ଦୃଷ୍ଟ୍ଵାଽଗ୍ରେ ତ୍ଵାଂ ତ୍ଵତ୍କୃତଂ ତଦ୍ଵିଦଂତ-
ସ୍ତ୍ଵାମାଲିଂଗନ୍ ଦୃଷ୍ଟନାନାପ୍ରଭାଵାଃ ॥7॥
ଗାଵଶ୍ଚୈଵଂ ଲବ୍ଧଜୀଵାଃ କ୍ଷଣେନ
ସ୍ଫୀତାନଂଦାସ୍ତ୍ଵାଂ ଚ ଦୃଷ୍ଟ୍ଵା ପୁରସ୍ତାତ୍ ।
ଦ୍ରାଗାଵଵ୍ରୁଃ ସର୍ଵତୋ ହର୍ଷବାଷ୍ପଂ
ଵ୍ୟାମୁଂଚଂତ୍ୟୋ ମଂଦମୁଦ୍ୟନ୍ନିନାଦାଃ ॥8॥
ରୋମାଂଚୋଽୟଂ ସର୍ଵତୋ ନଃ ଶରୀରେ
ଭୂୟସ୍ୟଂତଃ କାଚିଦାନଂଦମୂର୍ଛା ।
ଆଶ୍ଚର୍ୟୋଽୟଂ କ୍ଷ୍ଵେଲଵେଗୋ ମୁକୁଂଦେ-
ତ୍ୟୁକ୍ତୋ ଗୋପୈର୍ନଂଦିତୋ ଵଂଦିତୋଽଭୂଃ ॥9॥
ଏଵଂ ଭକ୍ତାନ୍ ମୁକ୍ତଜୀଵାନପି ତ୍ଵଂ
ମୁଗ୍ଧାପାଂଗୈରସ୍ତରୋଗାଂସ୍ତନୋଷି ।
ତାଦୃଗ୍ଭୂତସ୍ଫୀତକାରୁଣ୍ୟଭୂମା
ରୋଗାତ୍ ପାୟା ଵାୟୁଗେହାଧିଵାସ ॥10॥