ରୁଚିରକଂପିତକୁଂଡଲମଂଡଲଃ ସୁଚିରମୀଶ ନନର୍ତିଥ ପନ୍ନଗେ ।
ଅମରତାଡିତଦୁଂଦୁଭିସୁଂଦରଂ ଵିୟତି ଗାୟତି ଦୈଵତୟୌଵତେ ॥1॥
ନମତି ୟଦ୍ୟଦମୁଷ୍ୟ ଶିରୋ ହରେ ପରିଵିହାୟ ତଦୁନ୍ନତମୁନ୍ନତମ୍ ।
ପରିମଥନ୍ ପଦପଂକରୁହା ଚିରଂ ଵ୍ୟହରଥାଃ କରତାଲମନୋହରମ୍ ॥2॥
ତ୍ଵଦଵଭଗ୍ନଵିଭୁଗ୍ନଫଣାଗଣେ ଗଲିତଶୋଣିତଶୋଣିତପାଥସି ।
ଫଣିପତାଵଵସୀଦତି ସନ୍ନତାସ୍ତଦବଲାସ୍ତଵ ମାଧଵ ପାଦୟୋଃ ॥3॥
ଅୟି ପୁରୈଵ ଚିରାୟ ପରିଶ୍ରୁତତ୍ଵଦନୁଭାଵଵିଲୀନହୃଦୋ ହି ତାଃ ।
ମୁନିଭିରପ୍ୟନଵାପ୍ୟପଥୈଃ ସ୍ତଵୈର୍ନୁନୁଵୁରୀଶ ଭଵଂତମୟଂତ୍ରିତମ୍ ॥4॥
ଫଣିଵଧୂଗଣଭକ୍ତିଵିଲୋକନପ୍ରଵିକସତ୍କରୁଣାକୁଲଚେତସା ।
ଫଣିପତିର୍ଭଵତାଽଚ୍ୟୁତ ଜୀଵିତସ୍ତ୍ଵୟି ସମର୍ପିତମୂର୍ତିରଵାନମତ୍ ॥5॥
ରମଣକଂ ଵ୍ରଜ ଵାରିଧିମଧ୍ୟଗଂ ଫଣିରିପୁର୍ନ କରୋତି ଵିରୋଧିତାମ୍ ।
ଇତି ଭଵଦ୍ଵଚନାନ୍ୟତିମାନୟନ୍ ଫଣିପତିର୍ନିରଗାଦୁରଗୈଃ ସମମ୍ ॥6॥
ଫଣିଵଧୂଜନଦତ୍ତମଣିଵ୍ରଜଜ୍ଵଲିତହାରଦୁକୂଲଵିଭୂଷିତଃ ।
ତଟଗତୈଃ ପ୍ରମଦାଶ୍ରୁଵିମିଶ୍ରିତୈଃ ସମଗଥାଃ ସ୍ଵଜନୈର୍ଦିଵସାଵଧୌ ॥7॥
ନିଶି ପୁନସ୍ତମସା ଵ୍ରଜମଂଦିରଂ ଵ୍ରଜିତୁମକ୍ଷମ ଏଵ ଜନୋତ୍କରେ ।
ସ୍ଵପତି ତତ୍ର ଭଵଚ୍ଚରଣାଶ୍ରୟେ ଦଵକୃଶାନୁରରୁଂଧ ସମଂତତଃ ॥8॥
ପ୍ରବୁଧିତାନଥ ପାଲୟ ପାଲୟେତ୍ୟୁଦୟଦାର୍ତରଵାନ୍ ପଶୁପାଲକାନ୍ ।
ଅଵିତୁମାଶୁ ପପାଥ ମହାନଲଂ କିମିହ ଚିତ୍ରମୟଂ ଖଲୁ ତେ ମୁଖମ୍ ॥9॥
ଶିଖିନି ଵର୍ଣତ ଏଵ ହି ପୀତତା ପରିଲସତ୍ୟଧୁନା କ୍ରିୟୟାଽପ୍ୟସୌ ।
ଇତି ନୁତଃ ପଶୁପୈର୍ମୁଦିତୈର୍ଵିଭୋ ହର ହରେ ଦୁରିତୈଃସହ ମେ ଗଦାନ୍ ॥10॥