ରାମସଖଃ କ୍ଵାପି ଦିନେ କାମଦ ଭଗଵନ୍ ଗତୋ ଭଵାନ୍ ଵିପିନମ୍ ।
ସୂନୁଭିରପି ଗୋପାନାଂ ଧେନୁଭିରଭିସଂଵୃତୋ ଲସଦ୍ଵେଷଃ ॥1॥
ସଂଦର୍ଶୟନ୍ ବଲାୟ ସ୍ଵୈରଂ ଵୃଂଦାଵନଶ୍ରିୟଂ ଵିମଲାମ୍ ।
କାଂଡୀରୈଃ ସହ ବାଲୈର୍ଭାଂଡୀରକମାଗମୋ ଵଟଂ କ୍ରୀଡନ୍ ॥2॥
ତାଵତ୍ତାଵକନିଧନସ୍ପୃହୟାଲୁର୍ଗୋପମୂର୍ତିରଦୟାଲୁଃ ।
ଦୈତ୍ୟଃ ପ୍ରଲଂବନାମା ପ୍ରଲଂବବାହୁଂ ଭଵଂତମାପେଦେ ॥3॥
ଜାନନ୍ନପ୍ୟଵିଜାନନ୍ନିଵ ତେନ ସମଂ ନିବଦ୍ଧସୌହାର୍ଦଃ ।
ଵଟନିକଟେ ପଟୁପଶୁପଵ୍ୟାବଦ୍ଧଂ ଦ୍ଵଂଦ୍ଵୟୁଦ୍ଧମାରବ୍ଧାଃ ॥4॥
ଗୋପାନ୍ ଵିଭଜ୍ୟ ତନ୍ଵନ୍ ସଂଘଂ ବଲଭଦ୍ରକଂ ଭଵତ୍କମପି ।
ତ୍ଵଦ୍ବଲଭୀରୁଂ ଦୈତ୍ୟଂ ତ୍ଵଦ୍ବଲଗତମନ୍ଵମନ୍ୟଥା ଭଗଵନ୍ ॥5॥
କଲ୍ପିତଵିଜେତୃଵହନେ ସମରେ ପରୟୂଥଗଂ ସ୍ଵଦୟିତତରମ୍ ।
ଶ୍ରୀଦାମାନମଧତ୍ଥାଃ ପରାଜିତୋ ଭକ୍ତଦାସତାଂ ପ୍ରଥୟନ୍ ॥6॥
ଏଵଂ ବହୁଷୁ ଵିଭୂମନ୍ ବାଲେଷୁ ଵହତ୍ସୁ ଵାହ୍ୟମାନେଷୁ ।
ରାମଵିଜିତଃ ପ୍ରଲଂବୋ ଜହାର ତଂ ଦୂରତୋ ଭଵଦ୍ଭୀତ୍ୟା ॥7॥
ତ୍ଵଦ୍ଦୂରଂ ଗମୟଂତଂ ତଂ ଦୃଷ୍ଟ୍ଵା ହଲିନି ଵିହିତଗରିମଭରେ ।
ଦୈତ୍ୟଃ ସ୍ଵରୂପମାଗାଦ୍ୟଦ୍ରୂପାତ୍ ସ ହି ବଲୋଽପି ଚକିତୋଽଭୂତ୍ ॥8॥
ଉଚ୍ଚତୟା ଦୈତ୍ୟତନୋସ୍ତ୍ଵନ୍ମୁଖମାଲୋକ୍ୟ ଦୂରତୋ ରାମଃ ।
ଵିଗତଭୟୋ ଦୃଢମୁଷ୍ଟ୍ୟା ଭୃଶଦୁଷ୍ଟଂ ସପଦି ପିଷ୍ଟଵାନେନମ୍ ॥9॥
ହତ୍ଵା ଦାନଵଵୀରଂ ପ୍ରାପ୍ତଂ ବଲମାଲିଲିଂଗିଥ ପ୍ରେମ୍ଣା ।
ତାଵନ୍ମିଲତୋର୍ୟୁଵୟୋଃ ଶିରସି କୃତା ପୁଷ୍ପଵୃଷ୍ଟିରମରଗଣୈଃ ॥10॥
ଆଲଂବୋ ଭୁଵନାନାଂ ପ୍ରାଲଂବଂ ନିଧନମେଵମାରଚୟନ୍ ।
କାଲଂ ଵିହାୟ ସଦ୍ୟୋ ଲୋଲଂବରୁଚେ ହରେ ହରେଃ କ୍ଲେଶାନ୍ ॥11॥