ତ୍ଵଦ୍ଵପୁର୍ନଵକଲାୟକୋମଲଂ ପ୍ରେମଦୋହନମଶେଷମୋହନମ୍ ।
ବ୍ରହ୍ମ ତତ୍ତ୍ଵପରଚିନ୍ମୁଦାତ୍ମକଂ ଵୀକ୍ଷ୍ୟ ସମ୍ମୁମୁହୁରନ୍ଵହଂ ସ୍ତ୍ରିୟଃ ॥1॥
ମନ୍ମଥୋନ୍ମଥିତମାନସାଃ କ୍ରମାତ୍ତ୍ଵଦ୍ଵିଲୋକନରତାସ୍ତତସ୍ତତଃ ।
ଗୋପିକାସ୍ତଵ ନ ସେହିରେ ହରେ କାନନୋପଗତିମପ୍ୟହର୍ମୁଖେ ॥2॥
ନିର୍ଗତେ ଭଵତି ଦତ୍ତଦୃଷ୍ଟୟସ୍ତ୍ଵଦ୍ଗତେନ ମନସା ମୃଗେକ୍ଷଣାଃ ।
ଵେଣୁନାଦମୁପକର୍ଣ୍ୟ ଦୂରତସ୍ତ୍ଵଦ୍ଵିଲାସକଥୟାଽଭିରେମିରେ ॥3॥
କାନନାଂତମିତଵାନ୍ ଭଵାନପି ସ୍ନିଗ୍ଧପାଦପତଲେ ମନୋରମେ ।
ଵ୍ୟତ୍ୟୟାକଲିତପାଦମାସ୍ଥିତଃ ପ୍ରତ୍ୟପୂରୟତ ଵେଣୁନାଲିକାମ୍ ॥4॥
ମାରବାଣଧୁତଖେଚରୀକୁଲଂ ନିର୍ଵିକାରପଶୁପକ୍ଷିମଂଡଲମ୍ ।
ଦ୍ରାଵଣଂ ଚ ଦୃଷଦାମପି ପ୍ରଭୋ ତାଵକଂ ଵ୍ୟଜନି ଵେଣୁକୂଜିତମ୍ ॥5॥
ଵେଣୁରଂଧ୍ରତରଲାଂଗୁଲୀଦଲଂ ତାଲସଂଚଲିତପାଦପଲ୍ଲଵମ୍ ।
ତତ୍ ସ୍ଥିତଂ ତଵ ପରୋକ୍ଷମପ୍ୟହୋ ସଂଵିଚିଂତ୍ୟ ମୁମୁହୁର୍ଵ୍ରଜାଂଗନାଃ ॥6॥
ନିର୍ଵିଶଂକଭଵଦଂଗଦର୍ଶିନୀଃ ଖେଚରୀଃ ଖଗମୃଗାନ୍ ପଶୂନପି ।
ତ୍ଵତ୍ପଦପ୍ରଣୟି କାନନଂ ଚ ତାଃ ଧନ୍ୟଧନ୍ୟମିତି ନନ୍ଵମାନୟନ୍ ॥7॥
ଆପିବେୟମଧରାମୃତଂ କଦା ଵେଣୁଭୁକ୍ତରସଶେଷମେକଦା ।
ଦୂରତୋ ବତ କୃତଂ ଦୁରାଶୟେତ୍ୟାକୁଲା ମୁହୁରିମାଃ ସମାମୁହନ୍ ॥8॥
ପ୍ରତ୍ୟହଂ ଚ ପୁନରିତ୍ଥମଂଗନାଶ୍ଚିତ୍ତୟୋନିଜନିତାଦନୁଗ୍ରହାତ୍ ।
ବଦ୍ଧରାଗଵିଵଶାସ୍ତ୍ଵୟି ପ୍ରଭୋ ନିତ୍ୟମାପୁରିହ କୃତ୍ୟମୂଢତାମ୍ ॥9॥
ରାଗସ୍ତାଵଜ୍ଜାୟତେ ହି ସ୍ଵଭାଵା-
ନ୍ମୋକ୍ଷୋପାୟୋ ୟତ୍ନତଃ ସ୍ୟାନ୍ନ ଵା ସ୍ୟାତ୍ ।
ତାସାଂ ତ୍ଵେକଂ ତଦ୍ଦ୍ଵୟଂ ଲବ୍ଧମାସୀତ୍
ଭାଗ୍ୟଂ ଭାଗ୍ୟଂ ପାହି ମାଂ ମାରୁତେଶ ॥10॥