ଏଵଂ ଚତୁର୍ଦଶଜଗନ୍ମୟତାଂ ଗତସ୍ୟ
ପାତାଲମୀଶ ତଵ ପାଦତଲଂ ଵଦଂତି ।
ପାଦୋର୍ଧ୍ଵଦେଶମପି ଦେଵ ରସାତଲଂ ତେ
ଗୁଲ୍ଫଦ୍ଵୟଂ ଖଲୁ ମହାତଲମଦ୍ଭୁତାତ୍ମନ୍ ॥1॥
ଜଂଘେ ତଲାତଲମଥୋ ସୁତଲଂ ଚ ଜାନୂ
କିଂଚୋରୁଭାଗୟୁଗଲଂ ଵିତଲାତଲେ ଦ୍ଵେ ।
କ୍ଷୋଣୀତଲଂ ଜଘନମଂବରମଂଗ ନାଭି-
ର୍ଵକ୍ଷଶ୍ଚ ଶକ୍ରନିଲୟସ୍ତଵ ଚକ୍ରପାଣେ ॥2॥
ଗ୍ରୀଵା ମହସ୍ତଵ ମୁଖଂ ଚ ଜନସ୍ତପସ୍ତୁ
ଫାଲଂ ଶିରସ୍ତଵ ସମସ୍ତମୟସ୍ୟ ସତ୍ୟମ୍ ।
ଏଵଂ ଜଗନ୍ମୟତନୋ ଜଗଦାଶ୍ରିତୈର-
ପ୍ୟନ୍ୟୈର୍ନିବଦ୍ଧଵପୁଷେ ଭଗଵନ୍ନମସ୍ତେ ॥3॥
ତ୍ଵଦ୍ବ୍ରହ୍ମରଂଧ୍ରପଦମୀଶ୍ଵର ଵିଶ୍ଵକଂଦ
ଛଂଦାଂସି କେଶଵ ଘନାସ୍ତଵ କେଶପାଶାଃ ।
ଉଲ୍ଲାସିଚିଲ୍ଲିୟୁଗଲଂ ଦ୍ରୁହିଣସ୍ୟ ଗେହଂ
ପକ୍ଷ୍ମାଣି ରାତ୍ରିଦିଵସୌ ସଵିତା ଚ ନେତ୍ରୈ ॥4॥
ନିଶ୍ଶେଷଵିଶ୍ଵରଚନା ଚ କଟାକ୍ଷମୋକ୍ଷଃ
କର୍ଣୌ ଦିଶୋଽଶ୍ଵିୟୁଗଲଂ ତଵ ନାସିକେ ଦ୍ଵେ ।
ଲୋଭତ୍ରପେ ଚ ଭଗଵନ୍ନଧରୋତ୍ତରୋଷ୍ଠୌ
ତାରାଗଣାଶ୍ଚ ଦଶନାଃ ଶମନଶ୍ଚ ଦଂଷ୍ଟ୍ରା ॥5॥
ମାୟା ଵିଲାସହସିତଂ ଶ୍ଵସିତଂ ସମୀରୋ
ଜିହ୍ଵା ଜଲଂ ଵଚନମୀଶ ଶକୁଂତପଂକ୍ତିଃ ।
ସିଦ୍ଧାଦୟଃ ସ୍ଵରଗଣା ମୁଖରଂଧ୍ରମଗ୍ନି-
ର୍ଦେଵା ଭୁଜାଃ ସ୍ତନୟୁଗଂ ତଵ ଧର୍ମଦେଵଃ ॥6॥
ପୃଷ୍ଠଂ ତ୍ଵଧର୍ମ ଇହ ଦେଵ ମନଃ ସୁଧାଂଶୁ –
ରଵ୍ୟକ୍ତମେଵ ହୃଦୟଂବୁଜମଂବୁଜାକ୍ଷ ।
କୁକ୍ଷିଃ ସମୁଦ୍ରନିଵହା ଵସନଂ ତୁ ସଂଧ୍ୟେ
ଶେଫଃ ପ୍ରଜାପତିରସୌ ଵୃଷଣୌ ଚ ମିତ୍ରଃ ॥7॥
ଶ୍ରୋଣୀସ୍ଥଲଂ ମୃଗଗଣାଃ ପଦୟୋର୍ନଖାସ୍ତେ
ହସ୍ତ୍ୟୁଷ୍ଟ୍ରସୈଂଧଵମୁଖା ଗମନଂ ତୁ କାଲଃ ।
ଵିପ୍ରାଦିଵର୍ଣଭଵନଂ ଵଦନାବ୍ଜବାହୁ-
ଚାରୂରୁୟୁଗ୍ମଚରଣଂ କରୁଣାଂବୁଧେ ତେ ॥8॥
ସଂସାରଚକ୍ରମୟି ଚକ୍ରଧର କ୍ରିୟାସ୍ତେ
ଵୀର୍ୟଂ ମହାସୁରଗଣୋଽସ୍ଥିକୁଲାନି ଶୈଲାଃ ।
ନାଡ୍ୟସ୍ସରିତ୍ସମୁଦୟସ୍ତରଵଶ୍ଚ ରୋମ
ଜୀୟାଦିଦଂ ଵପୁରନିର୍ଵଚନୀୟମୀଶ ॥9॥
ଈଦୃଗ୍ଜଗନ୍ମୟଵପୁସ୍ତଵ କର୍ମଭାଜାଂ
କର୍ମାଵସାନସମୟେ ସ୍ମରଣୀୟମାହୁଃ ।
ତସ୍ୟାଂତରାତ୍ମଵପୁଷେ ଵିମଲାତ୍ମନେ ତେ
ଵାତାଲୟାଧିପ ନମୋଽସ୍ତୁ ନିରୁଂଧି ରୋଗାନ୍ ॥10॥